நீங்கள் தேடியது "நிர்மலா சீதாராமன்"

சென்னை:

மத்திய நிதியமைச்சர் நிர்மலா சீதாராமனுக்கு மதுரை பாராளுமன்ற தொகுதி மார்க்சிஸ்ட் எம்.பி. சு.வெங்கடேசன் எழுதியுள்ள கடிதத்தில்,

இந்திய சிறு தொழில் மேம்பாட்டு வங்கி அதிகாரிகள் நியமனங்களுக்கான முறைமையில் கொண்டு வரப்பட்டுள்ள மாற்றம் வெளிச்சந்தையில் வேலைக்காக காத்திருக்கும் இளைஞர்களுக்கு பேரதிர்ச்சி தருவதாக உள்ளது.

இவ்வாண்டு வெளியிடப்பட்டுள்ள அறிவிக்கையில் முன் பணி அனுபவம் கட்டாயத் தகுதியாக இணைக்கப்பட்டுள்ளது. பட்டியலிடப்பட்ட வணிக வங்கிகளில் 2 ஆண்டுகள், தனியார் வங்கி அல்லது நிதி நிறுவனங்களில் 3 ஆண்டுகள் பணி ஆற்றி இருந்தால் மட்டுமே விண்ணப்பம் செய்ய இயலும் என்பதே அது. கடந்த கால பணி நியமனங்களில் இந்த நிபந்தனை கிடையாது. இது வேலைக்காக வெளியே காத்திருக்கும் புதிய தேர்வர்களுக்கு, முன் பணி அனுபவம் இல்லாத கோடிக்கணக்கான இளைஞர்களுக்கு இழைக்கப்படும் அநீதியாகும். அவர்களுக்கு வாய்ப்பு மறுக்கப்பட்டு நியமனத் தேர்வில் பங்கேற்க இயலாமல் வெளியே நிறுத்துவது ஆகும்.

தேர்வு முறைமையில் எழுத்துத் தேர்வு நீக்கப்பட்டுள்ளது. குழு விவாதம், நேர்காணல் வாயிலாகத் தேர்வு நடைபெறும் என்றும் மாற்றம் செய்யப்பட்டுள்ளது. எல்லா வங்கிகளிலும் நுழைவு நிலை பதவிகளுக்கு எழுத்துத் தேர்வுகள் நடைமுறையில் உள்ளன. இந்திய சிறு தொழில் மேம்பாட்டு வங்கியின் உள் பதவி உயர்வுகளுக்கே எழுத்துத் தேர்வுகள் உள்ள நிலையில் புதிய நியமனங்களுக்கு எழுத்துத் தேர்வு இல்லை என்ற முரண்பாடு வியப்பைத் தருகிறது.

இத்தகைய மாற்றம் தமிழ்வழிக் கல்வி மற்றும் அரசுப் பள்ளிகளில் பயிலும் எளிய மாணவர்களுக்கு போட்டியில் சம வாய்ப்பை மறுப்பதாகவும் இருக்கும். மேலும் எழுத்துத் தேர்வை நீக்கி குழு விவாதம், நேர்காணல் மட்டுமான முறைமை வெளிப்படைத் தன்மை அற்றதாகவே அமையும். இது தனி நபர் விருப்பு வெறுப்புகள், வெளித் தலையீடுகளுக்கு வழி வகுப்பதுமாகும்.

ஆகவே புதிய முறைமையை கைவிட்டு, முன் அனுபவ நிபந்தனையை நீக்கி, எழுத்துத் தேர்வுடன் கூடிய முந்தைய நியமன முறைமைக்குத் திரும்ப தலையீடுகளை செய்யுமாறு கோரி நிதியமைச்சர் நிர்மலா சீதாராமன் மற்றும் இந்திய சிறு தொழில் மேம்பாட்டு வங்கியின் தலைவருக்கும் கடிதம் எழுதியுள்ளேன்.

வங்கி அதிகாரிகள் நியமனத்திற்கு எழுத்து தேர்வு நீக்கம்.

குழு விவாதம், நேர் காணல் வாயிலாக தேர்வு நடைபெறும் என்று அறிவிப்பு.

ஆளுங்கட்சியின் விருப்பத்தை நிறைவேற்ற செய்யப்பட்ட வெளிப்படைத்தன்மை அற்ற தேர்வு முறையை ஒன்றிய நிதியமைச்சர் கைவிட வேண்டும். @FinMinIndia @sidbiofficial #Bank… pic.twitter.com/mpRLDeswCR

— Su Venkatesan MP (@SuVe4Madurai) March 2, 2024

புதுச்சேரி:

பாராளுமன்ற தேர்தலில் புதுச்சேரியில் ஆளும் கட்சியான தேசிய ஜனநாயக கூட்டணியில் பா.ஜனதா போட்டியிடுவது உறுதியாகியுள்ளது.

பா.ஜனதா வேட்பாளரை தேர்வு செய்வதில் தொடர் இழுபறி நீடித்து வருகிறது. புதுவையை சேர்ந்த பா.ஜனதாவினர் அமைச்சர் நமச்சிவாயத்தை வேட்பாளராக களம் இறக்கினால், எளிதில் வெற்றி பெறலாம் என கட்சித்தலைமையிடம் தெரிவித்து வந்தனர். ஆனால் உள்ளூர் அரசியலை விட்டு விலக அமைச்சர் நமச்சிவாயம் விரும்ப வில்லை.

இதனால் யாரை வேட்பாளராக்கினாலும், தான் வெற்றி பெற செய்வ தாக கட்சித் தலைமையிடம் அமைச்சர் நமச்சிவாயம் உறுதி கூறியுள்ளார்.

யூனியன் பிரதேசமான புதுவை, காரைக்கால், மாகி, ஏனாம் என 4 பிராந்தியமாக உள்ளது. இந்த 4 பிராந்தியங்களிலும் வாக்காளர்களிடம் அறிமுகமான வேட்பாளரை நிறுத்தினால்தான் வெற்றி எளிதாக இருக்கும் என பா.ஜனதா தலைமை கருதுகிறது. இதனால் பா.ஜனதா தலைமை அமைச்சர் நமச்சிவாயத்தை போட்டியிட செய்வதே சரி என கருதி வந்தது.

கவர்னர் தமிழிசையும் புதுச்சேரி தொகுதியில் களம் இறங்க ஆர்வமாக இருப்பதாக பேசப்பட்டது. இந்நிலையில் புதுச்சேரி பா.ஜனதா தேர்தல் அலுவலகத்தை மேலிட பார்வையாளர் நிர்மல்குமார் சுரானா திறந்து வைத்தார். தொடர்ந்து பா.ஜனதா எம்.எல்.ஏ.க்களோடு ஆலோசனை நடத்தினார்.

மாநில தலைவர் செல்வகணபதி எம்.பி. தலைமையில் நடந்த கூட்டத்தில், அமைச்சர் நமச்சிவாயம் போட்டியிடாத பட்சத்தில், தாங்கள் போட்டியிட தயாராக உள்ளதாக பா.ஜனதா எம்.எல்.ஏ. கல்யாணசுந்தரம், பா.ஜனதா ஆதரவு எம்.எல்.ஏ. சிவசங்கரன் ஆகியோர் விருப்பம் தெரிவித்தனர்.

இது திடீர் திருப்பத்தை ஏற்படுத்தியுள்ளது. ஏனெனில் கல்யாணசுந்தரம் எம்.எல்.ஏ. புதுச்சேரியில் உள்ள பெரும்பான்மை சமூகத்தை சேர்ந்தவர். பா.ஜனதாவுக்கு ஆதரவு அளிக்கும் சுயேச்சை எம்.எல்.ஏ. சிவசங்கரன் ஏற்கனவே தனக்கு போட்டியிட வாய்ப்பளிக்கும்படி கோரியிருந்தார்.

அவரும் இந்த கூட்டத்தில் தனக்கு வாய்ப்பளிக்கும்படி கேட்டுள்ளார். இதுதவிர முன்னாள் எம்.எல்.ஏ. தீப்பாய்ந்தான் பெயர் புதிதாக வலம் வருகிறது. இவர் பா.ஜனதாவில் இணைந்த போது அவருக்கு கட்சி சில வாக்குறுதிகளை அளித்திருந்தது. அதனை நிறைவேற்றவில்லை என்பதால் அவருடைய் பெயரும் பட்டியலில் சென்றுள்ளது.

அதேநேரத்தில் மத்திய நிதி மந்திரி நிர்மலா சீதாராமன் பெயர் வேட்பாளர் பட்டியலில் இடம் பெற்றுள்ளது.

ஏற்கனவே முதல்-அமைச்சர் ரங்கசாமி பரிந்துரை செய்யும் வேட்பாளரைத்தான் தேர்தலில் போட்டியிட செய்வோம் என பா.ஜனதா மேலிட பார்வையாளர் அறிவித்திருந்தார்.

இதனடிப்படையில் மத்திய மந்திரி நிர்மலா சீதாராமன், அமைச்சர் நமச்சிவாயம், சுயேட்சை எம்.எல்.ஏ. சிவசங்கரன், கல்யாணசுந்தரம் எம்.எல்.ஏ. முன்னாள் எம்.எல்.ஏ. தீப்பாய்ந்தான் ஆகியோர் அடங்கிய வேட்பாளர் பட்டியலோடு முதல்-அமைச்சர் ரங்கசாமியை, பா.ஜனதா மேலிட பார்வையாளர் நிர்மல்குமார் சுரானா சந்தித்து ஆலோசனை நடத்தினார். அப்போது சில யோசனை களை முதல்-அமைச்சர் ரங்கசாமி கூறியதாக தெரிகிறது.

இந்நிலையில் வருகிற 27-ந்தேதி பிரதமர் மோடி கோவையில் பிரம்மாண்ட பொதுக்கூட்டத்தில் பங்கேற்று பேச உள்ளார். அதற்கு முன்பாக புதுச்சேரி வேட்பாளரை இறுதி செய்ய கட்சி தலைமை தீவிரம் காட்டி வருகிறது.

அனேகமாக அன்றைய தினம் பா.ஜனதா முதல்கட்ட வேட்பாளர்கள் பட்டியல் வெளியாகும் வாய்ப்பு உள்ளதாக கூறப்படுகிறது. அதில் புதுச்சேரி தொகுதி வேட்பாளர் அறிவிக்கப்படும் என தெரிகிறது.

மும்பை:

மத்திய நிதி மந்திரி நிர்மலா சீதாராமன் மும்பையின் காட்கோபரில் இருந்து கல்யாண் செல்லும் மின்சார ரெயிலில் இன்று பயணம் செய்தார். அப்போது மகாராஷ்டிர மாநில முதல் மந்திரி ஏக்நாத் ஷிண்டே, துணை முதல் மந்திரி தேவேந்திர பட்னாவிஸ் ஆகியோர் உடனிருந்தனர்.

சக பயணிகளுடன் கலந்துரையாடிய நிர்மலா சீதாராமன் அவர்களுடன் செல்பி எடுத்துக் கொண்டார். சக பயணிகள் போல் நிதி மந்திரி பயணம் செய்ததை கண்டு மக்கள் ஆச்சரியம் அடைந்தனர்.

மும்பையின் காட்கோபரில் இருந்து கல்யாண் செல்லும் மின்சார ரெயிலில் ஒவ்வொரு நாளும் 60 லட்சத்திற்கும் அதிகமான பயணிகள் பயணம் செய்து வருகின்றனர்.

Smt @nsitharaman interacts with commuters while travelling from Ghatkopar to Kalyan in a Mumbai local train. pic.twitter.com/T15BdC3f5V

— Nirmala Sitharaman Office (@nsitharamanoffc) February 24, 2024

மகராஜ்கஞ்ச்:

மத்திய நிதி மந்திரி நிர்மலா சீதாராமன், உத்தரபிரதேசத்தின் மகராஜ்கஞ்ச் மாவட்டத்தில் நடந்த கடன் வழங்கும் முகாமில் கலந்து கொண்டார். இதில் 40,011 பேருக்கு ரூ.1,143 கோடி கடன் வழங்கினார்.

இந்த நிகழ்ச்சியில் பேசும்போது அவர் கூறியதாவது:-

நல்ல நிலையிலான குடிமக்களின் வாழ்க்கைத்தரம் கொண்ட ஒரு நாடுதான் பொருளாதாரத்தில் வலுவான நிலையில் இருப்பதாக அர்த்தம். அதன் மூலம் ஒவ்வொருவரும் பலனடைவார்கள்.

அந்தவகையில் உலக பொருளாதாரத்தில் 10-வது இடத்தில் இருந்த இந்தியா, பிரதமர் மோடி தலைமையின் கீழ் 5-வது இடத்துக்கு முன்னேறி இருக்கிறது. இது அடுத்த ஒன்று அல்லது ஒன்றரை ஆண்டுகளில் 3-வது இடத்தை பிடித்து விடும்.

இவ்வாறு நிர்மலா சீதாராமன் கூறினார்.

புதுடெல்லி:

காங்கிரஸ் அமைப்பு பொதுச்செயலாளர் கே.சி.வேணுகோபால் நிதி மந்திரி நிர்மலா சீதாராமனுக்கு கடிதம் எழுதியுள்ளார். அந்தக் கடிதத்தில் கூறியுள்ளதாவது:

அமலாக்கத்துறை, வருமான வரித்துறை மற்றும் சி.பி.ஐ. ஆகிய மத்திய புலனாய்வு அமைப்புகளின் விசாரணையை எதிர்கொண்ட பிறகு, பல தனியார் நிறுவனங்கள் பா.ஜ.க.வுக்கு நன்கொடை வழங்கியிருப்பதாக பல்வேறு ஊடக அறிக்கைகள் தெரிவிக்கின்றன.

இது மத்திய புலனாய்வு அமைப்புகளின் சுதந்திரம், தன்னாட்சி மற்றும் செயல்பாடுகள் குறித்து தீவிரமான கேள்விகளை எழுப்புகிறது. இந்த 3 புலனாய்வு அமைப்புகளில் 2 அமைப்புகள் மத்திய நிதி அமைச்சகத்தின் அதிகார வரம்பிற்கு உட்பட்டவை.

பா.ஜ.க. அரசாங்கத்தால் புலனாய்வு அமைப்புகள் எவ்வாறு கட்டுப்படுத்தப்படுகின்றன என்பது முழு தேசத்திற்கும் தெரியும். 2014-ம் ஆண்டிலிருந்து அரசியல்வாதிகளுக்கு எதிரான அமலாக்கத்துறை வழக்குகள் 4 மடங்கு அதிகரித்துள்ளன. இதில் 95 சதவீத வழக்குகள் எதிர்க்கட்சித் தலைவர்களுக்கு எதிராக உள்ளன.

பா.ஜ.க.வுக்கு மொத்தம் ரூ.187.58 கோடி வழங்கிய 30 நிறுவனங்களில் 23 நிறுவனங்கள், 2014 முதல் சோதனை நடந்த ஆண்டு வரை பா.ஜ.க.வுக்கு எந்த நன்கொடையும் வழங்கியிருக்கவில்லை. ஆனால் அதன்பிறகு நன்கொடை வழங்கியுள்ளன. ஏற்கனவே நன்கொடை வழங்கி வந்த நிறுவனங்கள், சோதனைக்குப் பிறகு அதிக தொகையை நன்கொடையாக வழங்கியுள்ளன.

விசாரணை அமைப்புகளால் பதிவுசெய்யப்பட்ட வழக்குகள் சட்டவிரோதமானது என நாங்கள் கூறவில்லை. விசாரணையை எதிர்கொண்ட பின் இந்த நிறுவனங்கள் ஏன் பா.ஜ.க.வுக்கு நன்கொடை வழங்குகின்றன என்பது விசாரிக்கப்பட வேண்டிய விவகாரம் ஆகும். அமலாக்கத்துறை நடவடிக்கைக்குப் பிறகு அவர்கள் பா.ஜ.க.வுக்கு நன்கொடை அளிப்பது வெறும் தற்செயலானதா?

இந்த விவகாரத்தை நாங்கள் நீதித்துறையிடமும், மக்களிடமும் கொண்டு செல்வோம். இரு இடங்களிலும் நாங்கள் உங்களைத் தோற்கடிப்போம் என தெரிவித்துள்ளார்.

இதேபோல், தலைநகர் டெல்லியில் செய்தியாளர்களைச் சந்தித்த காங்கிரஸ் பொதுச்செயலாளர் ஜெய்ராம் ரமேஷ் கூறுகையில், பா.ஜ.க. தனது நிதி ஆதாரங்கள் தொடர்பாக வெள்ளை அறிக்கை வெளியிட வேண்டும். அப்படி இல்லையெனில் சுப்ரீம் கோர்ட் கண்காணிப்பின் கீழ் இந்த நன்கொடைகள் குறித்த விசாரணைக்கு உடன்பட வேண்டும் என்றார்.

பிரதமர் மோடி கடந்த 2014-ம் ஆண்டு பிரதமராக பதவி ஏற்றார். அதற்கு முன்னதாக இந்தியாவின் பொருளாதார நிலை, பிரதமர் மோடி பதவி ஏற்றபின் இந்தியாவின் பொருளாதாரத்துடன் ஒப்பிட்டு பாராளுமன்றத்தில் வெள்ளை அறிக்கை தாக்கல் செய்யப்படும் என மத்திய அரசு தெரிவித்தது.

அதன்படி நேற்று மத்திய நிதியமைச்சர் நிர்மலா சீதாராமன் வெள்ளை அறிக்கையை பாராளுமன்றத்தில் தாக்கல் செய்தார். இன்று அவர் மக்களவைவில் வெள்கை அறிக்கை தொடர்பாக பேசினார். அப்போது நீங்கள் (UPA- காங்கிரஸ் ஆட்சி காலத்தில்) நிலக்கரியை சாம்பலாக்கி விட்டீர்கள். நாங்கள் நிலக்கரியை வைரமாக்கியுள்ளோம். நிலக்கரி ஊழல் தொடர்பான சிஏஜி அறிக்கையில், இந்தியாவுக்கு ரூ.1.86 லட்சம் கோடி இழப்பு ஏற்பட்டதாக கூறப்பட்டுள்ளது.

உலகளாவிய பொருளாதார நெருக்கடியை உங்களால் கையாள முடியவில்லை. அதை எப்படி கையாள வேண்டும் என்று இப்போது பாடம் எடுக்கிறார்கள். 2008 பொருளாதார நெருக்கடி கொரோனா நெருக்கடி காலம் போன்றது போல் தீவிரமாக இல்லை. காங்கிரஸ் அரசாங்கம் நேர்மையாக கையாண்டிருக்க வேண்டும். நாட்டின் நலனை பாதுகாக்க ஒன்றும் செய்யவில்லை. ஆனால் ஊழல் மேல் ஊழல் தொடர்ந்தது. இப்படி பட்ட சூழ்நிலையில்தான் ஆட்சியில் இருந்து வெளியேறினார்கள்" என்றார்.

புதுடெல்லி:

பாராளுமன்ற பட்ஜெட் கூட்டத்தொடர் நாளையுடன் முடிவடைய இருந்த நிலையில், மேலும் ஒரு நாள் நீட்டிக்கப்பட்டுள்ளது.

காங்கிரஸ் தலைமையிலான 2014-க்கு முந்தைய மத்திய அரசின் 10 ஆண்டு காலத்தில் இந்தியாவின் பொருளாதார நிலையுடன் தற்போது மோடியின் 10 ஆண்டு கால ஆட்சியில் இந்தியாவின் பொருளாதாரத்தை ஒப்பிடும் வகையில் மத்திய அரசு வெள்ளை அறிக்கை கொண்டு வர இருப்பதாக தெரிவிக்கப்பட்டுள்ளது.

இந்நிலையில், பாராளுமன்றத்தில் இன்று நாட்டின் பொருளாதாரம் குறித்த வெள்ளை அறிக்கையை மத்திய நிதி மந்திரி நிர்மலா சீதாராமன் தாக்கல் செய்தார். ஆங்கிலம், இந்தி ஆகிய 2 மொழிகளில் வெள்ளை அறிக்கையை அவர் தாக்கல் செய்தார். அப்போது அவர் தெரிவித்ததாவது:

2014-ம் ஆண்டு பா.ஜ.க. ஆட்சிப் பொறுப்பை ஏற்றபோது பொருளாதாரம் மிகவும் பலவீனமாக இருந்தது.

டெலிகாம் உள்ளிட்ட பல்வேறு துறைகள் மிகவும் மோசமாக இருந்தது.

வாராக்கடன் அதிகமாக இருந்ததால் வங்கிகள் பலவீனமாக இருந்தன.

காமன்வெல்த் போட்டியில் மிகப்பெரிய ஊழல் நடந்துள்ளது. எதிர்கால வளர்ச்சி வாய்ப்புகளை அதிகரிக்க உள்கட்டமைப்பில் காங்கிரஸ் அரசு முதலீடு செய்யவில்லை.

ஐக்கிய முற்போக்கு கூட்டணி ஆட்சியில் முதலீடுகள் குறைந்த அளவிலேயே இருந்தன.

முந்தைய ஐக்கிய முற்போக்கு கூட்டணி அரசாங்கம் விட்டுச்சென்ற சவால்களை கடந்த 10 ஆண்டுகளில் தேசிய ஜனநாயக கூட்டணி அரசு வெற்றிகரமாக சமாளித்தது.

இந்தியாவை நிலையான வளர்ச்சிப் பாதையில் வைக்க கடினமான முடிவுகளை எடுத்துள்ளது என அறிக்கையில் தெரிவிக்கப்பட்டுள்ளது.

புதுடெல்லி:

பாராளுமன்ற பட்ஜெட் கூட்டத்தொடர் நாளையுடன் முடிவடைய இருந்த நிலையில், மேலும் ஒரு நாள் நீட்டிக்கப்பட்டுள்ளது.

அப்போது காங்கிரஸ் தலைமையிலான 2014-க்கு முந்தைய மத்திய அரசின் 10 ஆண்டு காலத்தில் இந்தியாவின் பொருளாதார நிலையுடன் தற்போது மோடியின் 10 ஆண்டு கால ஆட்சியில் இந்தியாவின் பொருளாதாரத்தை ஒப்பிடும் வகையில் மத்திய அரசு வெள்ளை அறிக்கை கொண்டு வர இருப்பதாக தெரிவிக்கப்பட்டுள்ளது.

இந்நிலையில், மத்திய நிதி மந்திரி நிர்மலா சீதாராமன் இன்று மக்களவையில் வெள்ளை அறிக்கையை தாக்கல் செய்தார்.

கர்நாடகா மாநிலத்தில் இருந்து அதிக அளவில் வரி வசூல் பெறும் நிலையில், மத்திய அரசு திருப்பி அளிக்கும் நிதி மிகவும் குறைவு. வறட்சியால் பாதிக்கப்பட்ட நிலையில் ஒரு ரூபாய் கூட நிதி ஒதுக்கவில்லை என கார்நாடக மாநில முதல்வர் சித்தராமையா விமர்சனம் செய்தார்.

மேலும், டெல்லியில் நேற்று காங்கிரஸ் எம்.எல்.ஏ.-க்களுடன் போராட்டத்தில் ஈடுபட்டார். அப்போது "வரி வசூலில் கர்நாடகா 2-வது இடத்தில் உள்ளது. மகாராஷ்டிரா முதல் இடத்தில் உள்ளது. இந்த வருடம் கர்நாடகா 4.30 லட்சம் கோடியை விட அதிக வரிவசூல் பங்களிப்பை கொடுத்துள்ளது. நாங்கள் 100 ரூபாய் வரிவசூல் செய்து, அதை மத்திய அரசிடம் கொடுத்தால், அதன்பின் மத்திய அரசு எங்களுக்கு 12 ரூபாய் முதல் 13 ரூபாய் வரைதான் தருகிறது. இதுதான் எங்களுடைய பங்கீட்டு தொகை"என்றார்.

இந்த நிலையில் நிர்மலா சீதாராமன் கர்நாடக மாநில அரசின் குற்றச்சாட்டு பதில் அளித்துள்ளார். இது தொடர்பாக அவர் பாராளுமன்றத்தில் கூறியதாவது:-

13-வது நிதிக் கமிசன் காலத்தில் (2010-11 முதல் 2014-15) கர்நாடகா 61,691 கோடி ரூபாய் பெற்றுள்ளது.

14-வது நிதிக்கமிசன் காலத்தில் (2015-16 முதல் 2019-20 வரை) ஒரு லட்சத்து 51 ஆயிரத்து 309 கோடி ரூபாய் பெற்றுள்ளது.

தற்போதைய 15-வது நிதிக் கமிசன் காலத்தில் 2020-21 முதல் 2026 மார்ச் 31-ந்தேதி வரை நான்கு ஆண்டு காலத்தில் தற்போதுவரை கர்நாடகா ஒரு லட்சத்து 29 ஆயிரத்து 854 கோடி ரூபாய் பெற்றுள்ளது.

இது முழுக்காலம் அளவில் தோராயமாக ஒரு லட்சத்து 73 ஆயிரத்து 339 கோடி ரூபாயாக இருக்கும். இது வரிப்பகிர்வு தொடர்பானது.

மானிய உதவியை எடுத்துக் கொண்டால் காங்கிரஸ் தலைமையிலான 10 ஆண்டு மத்திய ஆட்சி காலத்தில் கர்நாடகா 60 ஆயிரத்து 779 கோடி ரூபாய் பெற்றுள்ளது.

மோடியின் கடந்த 9 ஆண்டு காலத்தில் கர்நாடகா 2 லட்சத்து 8 ஆயிரத்து 832 கோடி ரூபாய் பெற்றுள்ளது. கூடுதலாக பட்ஜெட்டின்படி இந்த ஆண்டு 18 ஆயிரத்து 5 கோடி ரூபாய் ஒதுக்கப்படுகிறது. இதனால் கர்நாடகா 2 லட்சத்து 26 ஆயிரத்து 837 கோடி ரூபாய் பெறும்.

கர்நாடகா ஏற்கனவே 50 ஆண்டுகளுக்கு வட்டியில்லாமல் 6280 கோடி ரூபாய் பெற்றுள்ளது.

கர்நாடகாவின் நிதி எங்கே மறுக்கப்படுகிறது. கர்நாடகா எங்கே நிதியை குறைவாக பெற்றுள்ளது.

புதுடெல்லி:

பாராளுமன்ற பட்ஜெட் கூட்டத்தொடர் கடந்த 31-ந்தேதி ஜனாதிபதி உரையுடன் தொடங்கி நடந்து வருகிறது. கடந்த 1-ந்தேதி இடைக்கால பட்ஜெட்டை மத்திய மந்திரி நிர்மலா சீதாராமன் தாக்கல் செய்தார்.

அதன் பிறகு பட்ஜெட் கூட்டத் தொடர் நடந்து வருகிறது. இன்று காலை பாராளுமன்றம் கூடியது. கூட்டம் தொடங்கியதும் பல்வேறு மசோதாக்கள் தாக்கல் செய்யப்பட்டன.

இதில் பொதுத்தேர்வு மற்றும் நுழைவு தேர்வுகளில் முறைகேடு செய்வோருக்கு ஜெயில் தண்டனை மற்றும் அபராதம் விதிக்கும் புதிய மசோதா தாக்கல் செய்யப்பட்டது. இந்த மசோதாவை மத்திய மந்திரி ஜிதேந்திர சிங் இன்று தாக்கல் செய்தார்.

நீட் உள்ளிட்ட நுழைவுத் தேர்வுகளில் ஆள் மாறாட்டம் உள்ளிட்ட மோசடி நடைபெறுவதை தடுப்பதற்காக இந்த மசோதா தாக்கல் செய்யப்பட்டுள்ளது.

நுழைவுத் தேர்வு மற்றும் பொதுத் தேர்வுகளில் மோசடி செய்தால் 10 ஆண்டுகள் ஜெயில் தண்டனை விதிக்கப்படும். மேலும் 1 கோடி ரூபாய் வரை அபராதம் விதிக்கவும் இந்த மசோதாவில் வழி வகை செய்யப்பட்டுள்ளது.

வேலை வாய்ப்புக்கான தேர்வுகளில் மோசடி செய்தாலும் 10 ஆண்டுகள் தண்டனை வழங்கப்படும் என்றும் மசோதாவில் தெரிவிக்கப்பட்டுள்ளது.

சென்னை:

மத்திய பட்ஜெட்டில் தமிழ்நாடு திட்டமிட்டு புறக்கணிக்கப்பட்டு உள்ளதாக முதலமைச்சர் மு.க.ஸ்டாலின் கண்டனம் தெரிவித்துள்ளார்.

முதலமைச்சர் வெளியிட்டுள்ள அறிக்கையில், தமிழ்நாட்டு மக்கள் நலனை முழுமையாக புறக்கணித்து, தமிழ்நாட்டு வளர்ச்சிக்கு கிஞ்சித்தும் அக்கறை இல்லாமல் ஒரு நிதிநிலை அறிக்கையை தயாரித்து அளித்துள்ளார் நிதி மந்திரி நிர்மலா சீதாராமன். இந்த நிதிநிலை அறிக்கையில் தமிழ்நாடு திட்டமிட்டு புறக்கணிக்கப்பட்டு உள்ளது. இதுகுறித்து தி.மு.க எம்.பி.க்கள் பாராளுமன்றத்தில் கேள்வி எழுப்புவார்கள்.

பாராளுமன்ற வளாகத்தில் உள்ள காந்தியடிகள் சிலைக்கு முன்னால் கருப்புச் சின்னம் அணிந்து போராட்டமும் நடத்துவார்கள் என்று முதலமைச்சர் மு.க.ஸ்டாலின் தெரிவித்து இருந்தார்.

இந்நிலையில் பிப்.8-ந்தேதி தி.மு.க. எம்.பி.க்கள் போராட்டம் நடத்த உள்ளதாக அறிவிக்கப்பட்டுள்ளது. பாராளுமன்ற வளாகத்தில் காந்தியடிகள் சிலைக்கு முன்னால் தி.மு.க. எம்.பி.க்கள் போராட்டம் நடத்த உள்ளனர்.

பட்ஜெட்டில் தமிழ்நாடு புறக்கணிக்கப்பட்டதை கண்டித்தும், வெள்ள நிவாரணம் வழங்காததை கண்டித்தும் போராட்டம் நடத்த உள்ளதாக தெரிவிக்கப்பட்டுள்ளது.

2024 ஜனவரி 22 அன்று, பிரதமர் நரேந்திர மோடி, பிரதான் மந்த்ரி சூர்யோதய் யோஜ்னா (Pradhan Manthri Suryoday Yojana) எனும் திட்டத்தை குறித்து விளக்கினார்.

இதன்படி, ஏழை மற்றும் நடுத்தர மக்களின் வீடுகளின் மேற்கூரையில் சூரிய ஒளி மின்சாரத்திற்கான தகடுகளை பொருத்தி மின்சார தன்னிறைவு ஏற்படுத்த அரசு திட்டமிட்டுள்ளதாகவும், இதன் மூலம், குடும்பங்களின் மாதாந்திர மின்சார தேவையை ஈடு செய்யவும், உபரியாக உற்பத்தி ஆகும் மின்சாரத்தை அரசுக்கு விற்று குடும்பத்தினர் வருவாய் ஈட்டவும் வழிவகை செய்ய முடியும் என்றும் தெரிவித்தார்.

இன்று தாக்கல் செய்யப்பட்ட இடைக்கால பட்ஜெட்டிலும் மத்திய நிதியமைச்சர் நிர்மலா சீதாராமன், இது குறித்து பேசினார்.

சுமார் 1 கோடி வீடுகளின் மேற்கூரையில் சூரிய ஓளி மின்சாரத்திற்கான தகடுகள் பொருத்தப்படும் என்றும் இதில் உற்பத்தி ஆகும் மின்சாரத்தில் அவர்களுக்கு 300 யூனிட் இலவசம் என்றும் தனது உரையில் தெரிவித்தார்.

இந்த அறிவிப்பை தொடர்ந்து இன்று பசுமை எரிசக்தி துறை பங்குகளின் விலை, பங்குச்சந்தையில் உயர்ந்தது குறிப்பிடத்தக்கது.

ஏற்கெனவே சூரிய ஒளி மின்சார உற்பத்திக்கான கட்டமைப்பை அமைக்க அரசு மானியம் வழங்குவது நடைமுறையில் உள்ளது.

ஆனாலும், அரசின் இந்த முயற்சியை சமூக வலைதளங்களில் பல பயனர்கள் விமர்சிக்கின்றனர்.

1 கிலோவாட் பவர் உற்பத்திக்கு ரூ.20 ஆயிரம் வரை மானியம் தரப்படுகிறது. ஆனால், 1 கிலோவாட் உற்பத்திக்கு சுமார் 10 சதுர மீட்டர் இடம் தேவை. சில வீடுகளின் மேற்கூரையில் மட்டுமே இது சாத்தியமாகும்.

இதையும் தாண்டி தங்கள் வீட்டு உபயோகத்திற்கு மின்சார உற்பத்தி செய்ய விரும்பும் பயனர்கள், மின்சார வாரியத்திற்கு ஏன் அதிக கட்டணம் செலுத்த வேண்டும் என புலம்புகின்றனர்.

அரசாங்கம் வழங்கும் குடிநீரை பயன்படுத்த கட்டணம் வசூலிப்பது சரி. வீட்டு கிணற்றிலிருந்து நீரை பயன்படுத்துவதற்கு கட்டனம் வசூலிப்பது சரி அல்ல என உதாரணம் கூறும் பயனர்கள், குடும்பத்தினரின் சொந்த உபயோகத்திற்கு சூரிய ஒளி மின்சார உற்பத்தி செய்வதற்கு அரசு அதிக கட்டணம் வசூலிப்பதாகவும், இது ஏற்க முடியாதது என்றும் கூறுகின்றனர்.

மேலும், மானிய தொகையை அரசிடம் பெறுவதிலும் சிக்கல் நிலவுவதாக சமூக வலைதளங்களில் சில பயனர்கள் தெரிவித்தனர்.