புதுடெல்லி:

மத்திய அமைச்சரவை ரூ.3 லட்சம் ரூபாய் வரையில், விவசாயிகளுக்கு குறுகியக்காலக் கடன் வழங்கும் அனைத்து வகையான நிதி நிறுவனங்களுக்கும் ஆண்டுக்கு 1.5 சதவீதம் வட்டி மானியம் வழங்க ஒப்புதல் அளித்துள்ளது.

விவசாயிகளுக்கு நடப்பு 2022-23 நிதியாண்டு முதல் 2024 - 25 வரை ரூ.3 லட்சம் வரை குறுகிய கால கடனுதவி அளிக்கும். பொதுத்துறை மற்றும் தனியார் வங்கிகள், சிறு நிதி நிறுவனங்கள், மண்டல ஊரக வங்கிகள், கூட்டுறவு மற்றும் கணினி மயமாக்கப்பட்ட தொடக்க வேளாண்மைக் கூட்டுறவு வங்கிகளுக்கு இந்த வட்டி மானியம் வழங்கப்படும் என்று தெரிவிக்கப்பட்டுள்ளது.

இத்திட்டத்தின் கீழ் கடன் வழங்க 2022-23 முதல் 2024-25 வரை உள்ள நிதியாண்டில் ரூ.34,856 கோடி கூடுதல் பட்ஜெட் ஒதுக்கீடு செய்யப்பட்டுள்ளது. உரிய காலத்தில் கடனை திருப்பிச் செலுத்தும் விவசாயிகளுக்கு ஆண்டுக்கு 4 சதவீதம் வட்டி விகிதத்தில் குறுகிய கால கடன் வழங்குவது தொடரும் என்று தெரிவிக்கப்பட்டுள்ளது.

பெல்பாஸ்ட்:

அயர்லாந்தில் சுற்றுப்பயணம் மேற்கொண்டுள்ள ஆப்கானிஸ்தான் அணி 5 போட்டிகள் கொண்ட டி20 தொடரில் விளையாடியது. 4 போட்டிகளின் முடிவில் இரு அணிகளும் தலா 2 போட்டிகளில் வெற்றி பெற்றன.

இந்நிலையில், இரு அணிகளுக்கு இடையிலான 5வது மற்றும் கடைசி டி20 போட்டி பெல்பாஸ்டில் நடைபெற்றது. டாஸ் வென்ற அயர்லாந்து முதலில் பந்துவீச்சை தேர்வு செய்தது.

அதன்படி, முதலில் பேட் செய்த ஆப்கானிஸ்தான் 15 ஓவரில் 5 விக்கெட் இழப்புக்கு 95 ரன்கள் எடுத்தபோது மழை பெய்ததால் ஆட்டம் நிறுத்தப்பட்டது. அதிகபட்சமாக உஸ்மான் கனி 44 ரன்கள் எடுத்தார்.

மழை தொடர்ந்து பெய்ததால், ட்க்வொர்த் லூயிஸ் முறையில் 7ஓவரில் 56 ரன்கள் எடுத்தால் வெற்றி என அயர்லாந்து அணிக்கு இலக்கு நிர்ணயிக்கப்பட்டது.

இதையடுத்து களமிறங்கிய அயர்லாந்து அணி 6.4 ஓவரில் 3 விக்கெட்டுக்கு 56 ரன்கள் எடுத்து வெற்றி பெற்றது. இதன்மூலம் டி20 தொடரை 3-2 என கைப்பற்றி அசத்தியது.

ஆட்ட நாயகன் விருது மார்க் அடைருக்கும், தொடர் நாயகன் விருது டாக்ரெலுக்கும் வழங்கப்பட்டது.

காபூல்:

ஆப்கானிஸ்தானில் ஷியா, சன்னி பிரிவினர் இடையே அடிக்கடி மோதல் நடைபெற்று வருகிறது. சமீபகாலமாக நடந்த தாக்குதல்களுக்கு ஐ.எஸ். பயங்கரவாத அமைப்பு பொறுப்பேற்றது.

இந்நிலையில், ஆப்கானிஸ்தான் தலைநகர் காபூலில் உள்ள பிரசித்தி பெற்ற மசூதியில் நேற்று ஏராளமானோர் வழக்கமான தொழுகைக்கான குவிந்தனர். அப்போது மசூதிக்குள் பயங்கர சத்தத்துடன் குண்டு வெடித்தது. இதில் 30க்கும் மேற்பட்டோர் உடல் சிதறி பலியாயினர். பலர் காயமடைந்தனர்.

தகவலறிந்த மீட்புப் படையினர் காயம் அடைந்தவர்களை மீட்டு மருத்துவமனைக்கு அனுப்பி வைத்தனர். குண்டு வெடிப்புக்கான காரணம் குறித்து ஆப்கன் போலீசார் விசாரித்து வருகின்றனர்.

பலரது நிலைமை கவலைக்கிடமாக உள்ளதால் பலி எண்ணிக்கை அதிகரிக்க கூடும் என அஞ்சப்படுகிறது. இத்தாக்குதலுக்கு இதுவரை எந்த அமைப்பும் பொறுப்பேற்கவில்லை.

சென்னை:

சென்னை அடுத்த வானகரத்தில் உள்ள தனியாருக்கு சொந்தமான பிளைவுட் குடோனில் நள்ளிரவில் தீ விபத்து ஏற்பட்டது.

சமையல் எண்ணெய் குடோனில் பரவிய நெருப்பு, பிளைவுட் குடோன் உள்பட 3 இடங்களில் பரவியது. இதனால் அப்பகுதி முழுவதும் கரும்புகை மண்டலமாகக் காட்சி அளித்தது.

இதில் அங்கு வைக்கப்பட்டிருந்த பொருள்கள் எரிந்து நாசமாகின. கோயம்பேடு, மதுரவாயல், பூந்தமல்லி உள்பட 6 நிலையங்களில் இருந்து தீயணைப்பு வாகனங்கள் வரவழைக்கப்பட்டு தீயை அணைக்கும் பணி நடைபெற்று வருகிறது.

தீயை அணைக்க வீரர்கள் போராடி வருகின்றனர். தீ விபத்து ஏற்பட்டதற்கான காரணம் குறித்த தகவல் வெளியாகவில்லை.

சென்னை:

முதலமைச்சர் மு.க.ஸ்டாலின் நேற்று நள்ளிரவு டெல்லி சென்றார். இன்று காலை 10.30 மணியளவில் துணை ஜனாதிபதி ஜெகதீப் தன்கரைச் சந்தித்து புதிதாகத் தோவு செய்யப்பட்டதற்காக முதலமைச்சர் மு.க.ஸ்டாலின் வாழ்த்து தெரிவித்தார். அதைத் தொடர்ந்து, ஜனாதிபதியாக பொறுப்பேற்றுள்ள திரவுபதி முா்முவை நேரில் சந்தித்து அவருக்கு வாழ்த்து தெரிவித்தார்.

இதையடுத்து, மாலை 4 மணியளவில் புதுடெல்லியில் உள்ள பிரதமர் இல்லத்திற்குச் சென்ற முதலமைச்சர் மு.க.ஸ்டாலின் செஸ் ஒலிம்பியாட் தொடக்க விழாவுக்கு வந்த பிரதமருக்கு நேரில் நன்றி தெரிவித்தார். அப்போது தமிழகத்தின் கோரிக்கைகள் அடங்கிய மனுவை பிரதமரிடம் முதலமைச்சர் மு.க.ஸ்டாலின் வழங்கினார்.

நீட் விலக்கு, மேகதாது விவகாரம், புதிய கல்விக்கொள்கை போன்றவற்றில் தமிழக அரசு நலன் சார்ந்த கோரிக்கைகளை பிரதமரிடம் எடுத்துரைத்தார்.

இந்நிலையில் டெல்லி சென்று ஜனாதிபதி, துணை ஜனாதிபதி, பிரதமரைச் சந்தித்து விட்டு முதலமைச்சர் மு.க.ஸ்டாலின் இன்றிரவு சென்னை திரும்பினார்.

ஜெனீவா:

ஆப்பிரிக்க நாடுகளில் பரவிய குரங்கு அம்மை நோய் தற்போது ஆஸ்திரேலியா, அமெரிக்கா, இங்கிலாந்து உள்ளிட்ட 92க்கும் மேற்பட்ட நாடுகளுக்கு பரவி வருகிறது.

உலகம் முழுவதிலும் குரங்கு அம்மை காரணமாக பாதிக்கப்பட்டோர் எண்ணிக்கை அடுத்தடுத்து அதிகரித்து வரும் நிலையில் உலகம் முழுவதும் சுகாதார நடவடிக்கைகளை அந்நாட்டு அரசுகள் தீவிரபடுத்தி உள்ளன.

இந்நிலையில், உலகம் முழுவதும் குரங்கு அம்மை நோயால் பாதித்தவர்களின் எண்ணிக்கை 35 ஆயிரத்தை கடந்துள்ளது என உலக சுகாதார அமைப்பு தெரிவித்துள்ளது. இதுவரை 12 பேர் உயிரிழந்துள்ளனர்.

இதுதொடர்பாக, உலக சுகாதார அமைப்பின் தலைவர் டெட்ராஸ் அதானம் கூறுகையில், குரங்கு அம்மை நோய் பரவலைக் கட்டுப்படுத்துவதில் தடுப்பூசிகளும் முக்கியப் பங்கு வகிக்கிறது. பல நாடுகளில் பாதிக்கப்பட்டவர்களுக்கு செலுத்த தடுப்பூசியின் தேவை அதிகம் உள்ளது என தெரிவித்துள்ளார்.

சென்னை:

தமிழகத்தில் ஆன்லைன் ரம்மி போன்ற ஆன்லைன் சூதாட்ட விளையாட்டுகளால் ஏற்பட்ட நிதி நெருக்கடியின் காரணமாக உயிரை மாய்த்துக்கொள்ளும் நிகழ்வுகள் அதிகரித்துள்ளன. எனவே, ஆன்லைன் ரம்மி விளையாட்டுக்கு தடை விதிக்க பல்வேறு அரசியல் கட்சிகளின் தலைவர்கள், வலியுறுத்தி வருகின்றனர்.

இதனையடுத்து ஆன்லைன் விளையாட்டுகள் தொடர்பாக புதிய அவசர சட்டம் இயற்றுவதற்காக தமிழக அரசுக்கு பரிந்துரைகள் வழங்க சென்னை உயர்நீதிமன்றத்தின் ஓய்வு பெற்ற நீதிபதி சந்துரு தலைமையில் ஒரு கமிட்டி அமைக்கப்பட்டது. அந்த கமிட்டி 701 பக்கம் கொண்ட அறிக்கையை தமிழக முதல் அமைச்சரிடம் கடந்த மாதம் 27-ந்தேதி தாக்கல் செய்தது.

இந்த நிலையில், ஆன்லைன் ரம்மி தடை அவசர சட்டம் இயற்றுவது குறித்து முதல்-அமைச்சர் மு.க.ஸ்டாலின் நாளை ஆலோசனை கூட்டம் நடத்த உள்ளார். சென்னை தலைமைச் செயலகத்தில் நாளை நடைபெறவுள்ள ஆலோசனை கூட்டத்தில் சட்டத்துறை, காவல்துறை உயர் அதிகாரிகள் பங்கேற்க உள்ளனர். இந்த ஆலோசனைக் கூட்டத்தின் நிறைவில், ஆன்லைன் ரம்மி தடை அவசர சட்டத்தை இயற்றுவது குறித்து முதல்வர் மு.க.ஸ்டாலின் முக்கிய முடிவு எடுக்க வாய்ப்பு உள்ளது.

புதுடெல்லி:

தமிழக முதல்வர் மு.க.ஸ்டாலின் இன்று டெல்லியில் ஜனாதிபதி திரவுபதி முர்மு, துணை ஜனாதிபதி ஜகதீப் தன்கர் மற்றும் பிரதமர் மோடி ஆகியோரை தனித்தனியாக சந்தித்து பேசினார். இந்த சந்திப்பின்போது, தமிழகத்தில் உள்ள மரபு தானியங்களின் தொகுப்பு அடங்கிய பெட்டகத்தை வழங்கினார்.

மரபு தானியங்களான மாப்பிள்ளை சம்பா, குள்ளக்கார், கருப்புக் கவுனி, சீரகச் சம்பா, குடவாழை ஆகிய அரிசி வகைகள் மற்றும் அருந்தானியங்களான கம்பு, வரகு, சாமை, தினை, கேழ்வரகு ஆகியவற்றின் தொகுப்பை முதல்வர் பரிசாக அளித்தார்.

சென்னை:

திராவிட இயக்கத் தமிழர் பேரவை பொதுச்செயலாளர் சுப.வீரபாண்டியன் மாலை மலர் இணையதளத்திற்கு அளித்த சிறப்பு பேட்டி வருமாறு:-

2ஜி பற்றி அவ்வளவு சத்தமாக நாடு முழுவதும் குரல் கேட்டது. 5ஜி மிக மெதுவாக முணுமுணுப்பாக கூட செய்திகள் வரவில்லை. இரண்டையும் ஒப்பிட்டுப் பார்த்தால் இதற்கும் அதற்கும் இமாலய வேறுபாடு இருக்கிறது. 2ஜி என்பது 5ஜிக்கு முன்னால் வெறும் கடுகுதான்.

2ஜி பற்றி 2008 முதல் 2010 வரை பேசாத ஊடகங்கள், பேசாத மேடைகள் இல்லை. தேர்தலுக்கும் அது பயன்படுத்தப்பட்டது. அப்போது 9400 கோடிக்குத்தான் 2ஜி ஏலம் போனது. சிஏஜி வினோத்ராய் கொடுத்த அறிக்கையில், ரூ.1 லட்சத்து 85 ஆயிரம் கோடிக்கு போயிருக்கவேண்டும், எனவே, அரசுக்கு ரூ.1லட்சத்து 76 ஆயிரம் கோடி நஷ்டம் என்று சொன்னார். 14 ஆண்டுகளுக்கு முன்னால் இது நடந்தது.

இன்றைக்கு 5ஜி மிக நவீனமான தொழில்நுட்பம். 2ஜி-யில் நாம் பார்க்கும் படங்கள் 5ஜியில் ஒரு நொடிக்குள் கிடைக்கும் என சொல்கிறார்கள். எனவே, தரத்திலும் கூடுதல் அளவிலும் கூடுதல். 2ஜி விற்பனையானது 300 மெகா ஹெர்ஸ், இது 500 கிகா ஹெர்ஸ். எனவே, அன்றைக்கு ஒரு லட்சத்து 85 ஆயிரம் கோடிக்கு விற்பனையாகியிருக்கவேண்டும் என்று சொன்னால், தரத்திலும் அளவிலும் பல மடங்கு கூடுதல் உள்ள 5ஜி, நான்கரை முதல் 5 லட்சம் கோடிக்கு விற்பனையாகியிருக்கவேண்டும். ஆனால் ஒன்றரை லட்சம் கோடிக்குத்தான் விற்பனையாகியிருக்கிறது.

அதில் 88 ஆயிரம் கோடி முகேஷ் அம்பானி ஒருவரே வாங்கியிருக்கிறார். இன்றொருவர் 43 ஆயிரம் கோடி. அதானியெல்லாம் செலக்டிவ் பர்பசஸ் என்கிறார்கள். அவர்களுடைய சொந்த விமான நிலையம், துறைமுகத்திற்காக அதை வாங்கியிருக்கிறார்கள். ஒரு நாட்டின் சொத்து சொந்த பயன்பாட்டிற்காக விற்பனை செய்யப்படுகிறது. ஆனால், அரசு நிறுவனமான பிஎஸ்என்எல் இந்த போட்டியில் இடம்பெறவே இல்லை. 1 லட்சத்து 64 ஆயிரம் கோடி பிஎஸ்என்எல்-க்கு கொடுக்கப்பட்டிருக்கிறது. மொத்த ஏலத்தையும் பிஎஸ்என்எல் வாங்கியிருக்கலாம். ஆனால் பிஎஸ்என்எல் அந்த காட்சியிலேயே இல்லை. எனவே, இந்த நாடு யாருடைய நாடாக இருக்கிறது என்ற மிகப்பெரிய கேள்வி எழுந்திருக்கிறது.

குறைந்தது ரூ.4.5 லட்சம் கோடி என்று அரசாங்கமே சொன்னது. அந்த குறைந்த கணக்கை வைத்து சொன்னால்கூட, 3 லட்சம் கோடி எங்கே போனது? இது ஊழலா, மோசடியா என்பதை மக்கள்தான் சொல்ல வேண்டும். 2ஜி ஊழல் என்றால் 5ஜி மெகா ஊழல். அதுதான் சரியான சொல்லாடல்.

இந்த ஊழல் தேர்தலில் எதிரொலித்து ஆட்சி மாற்றம் வருமா? என்பதை இப்போதே கணித்து விட முடியாது. இன்னும் ஏறத்தாழ ஒன்றரை ஆண்டுகாலம் உள்ளது. பல அரசியல் மாற்றங்கள் நிகழும். சில நேரம் அரசியலில் சட்டென்று நிகழும் ஒரு நிகழ்வு பெரும் மாற்றத்தைக் கொண்டு வரும். பீகாரில் நடந்த மாற்றம்கூட வரவேற்கப்படவேண்டிய மாற்றம்.

நமது முதலமைச்சருக்கு தேஜஸ்வி எழுதிய கடிதத்தில், 'இது தொடக்கமாக இருக்கட்டும், நாம் எல்லோரும் ஒருங்கிணைந்து இப்போது இருக்கும் மத்திய அரசை எதிர்க்க வேண்டும்' என்று எழுதியிருக்கிறார். இந்த பொறுப்புணர்வும் கடமை உணர்ச்சியும் இந்தியா முழுவதும் உள்ள எல்லோருக்கும் வரவேண்டும் என்று கருதுகிறவர்களில் நானும் ஒருவன். மாற்றம் கண்டிப்பாக வரும் என்ற நம்பிக்கையோடு காத்திருக்கிறோம்.

இவ்வாறு அவர் கூறினார்.

நடிகர் ரஜினிகாந்த் சமீபத்தில் டெல்லி சென்று பிரதமர் மோடியை சந்தித்து பேசிவிட்டு வந்த சூட்டோடு சூடாக தமிழக கவர்னர் ஆர்.என்.ரவியை சந்தித்துப் பேசியது பலவிதமான யூகங்களை அரசியல் வட்டாரத்தில் ஏற்படுத்தி இருக்கிறது. கவர்னருடன் அரசியல் பேசினேன் என்று ரஜினி "பளீர்" என கூறியதும் விவாதமாகி இருக்கிறது.

உண்மையில் கவர்னர் ஆர்.என்.ரவி-ரஜினி சந்திப்பில் என்னதான் நடந்திருக்கும் என்ற கேள்விக்குறி எல்லோரது மனதிலும் எழுந்துள்ளது.

2024-ம் ஆண்டு பாராளுமன்ற தேர்தலுக்கு முன்பு தமிழகத்தில் பாரதிய ஜனதாவை மேலும் வலுப்படுத்த வேண்டும் என்பதில் பா.ஜ.க. மேலிட தலைவர்கள் மிக, மிக தீவிரமாகி இருக்கிறார்கள். அந்த இலக்கின் ஒரு பகுதிதான் கவர்னர் ரவி-ரஜினி சந்திப்பு என்கிறார்கள். ரஜினியை பயன்படுத்திக் கொள்வதில் பாரதிய ஜனதா வட்டாரத்தில் ஆதரவும் இருக்கிறது. எதிர்ப்பும் இருக்கிறது.

பிரதமர் மோடி, ரஜினியை விரும்புவதாகவும், உள்துறை மந்திரி அமித்ஷா விரும்பவில்லை என்றும் கூட தகவல்கள் வெளியாகி உள்ளன. ரஜினியை தங்கள் பக்கம் இழுத்து சில பொதுக்கூட்டங்களில் பேச வைத்தாலே போதும் என்று கூட நினைக்கிறார்களாம்.

இதற்காக ரஜினிக்கு என்ன வேண்டுமானாலும் செய்ய பா.ஜ.க. மூத்த தலைவர்கள் தயாராக இருக்கிறார்களாம். தற்போது சில மாநிலங்களில் கவர்னர் பதவி காலியாகவே உள்ளது. சிறிய மாநிலம் ஒன்றில் ரஜினியை கவர்னர் பதவியில் அமர வைக்கலாம் என்று கூட பேசப்பட்டதாக சமீபத்தில் ஒரு வார இதழில் தகவல் வெளியாகி இருந்தது. டெல்லி வட்டாரத்தில் இது உறுதி செய்யப்படுகிறது.

தமிழக அரசியலைப் பொருத்தவரை ரஜினிக்கு மிகப்பெரிய வாக்கு வங்கி இல்லை. ஆதரிக்கும் மன நிலையில் இருந்த நடுநிலை மக்களும் இப்போது ரஜினியை கண்டு கொள்வதில்லை. என்றாலும் ரஜினியை முன்நிறுத்தி ஏதோ ஒரு அலையை உருவாக்க பாரதிய ஜனதாவில் சில மூத்த தலைவர்கள் தீவிரமாக உள்ளனர்.

ஆண்டவன் சொல்றான்... அருணாச்சலம் முடிக்கிறான்.