சிறப்புக் கட்டுரைகள்

திருமணம் ஆகவேண்டுமா? ராகு-கேது தோஷம் நீங்க வேண்டுமா? திருஷ்டி கழிய வேண்டுமா? கிழக்கு கடற்கரை சாலைக்கு வெறும் ஜாலியாக மட்டும் செல்லாமல், திருவிடந்தை சென்று ஆறரை அடி உயரத்தில் பிரமாண்டமாக அருளாட்சி புரியும் நித்திய கல்யாணப் பெருமாளை தரிசனம் செய்து பாருங்கள். உங்கள் வாழ்க்கை ஒளி பொருந்தியதாக மாறும்.

திருவிடந்தை கோவில் கிழக்கு கடற்கரை சாலையில் சென்னையிலிருந்து 42 கி.மீ. தொலைவிலும் மாமல்லபுரத்திலிருந்து 16 கி.மீ. தூரத்திலும் அமைந்திருக்கிறது. பிராட்வேயில் இருந்து பிபி-19, தி.நகரிலிருந்து ஜி-19 பஸ்கள் செல்கின்றன.

இந்த ஊரின் பெயர் நித்திய கல்யாணபுரி. கடவுளின் பெயர் நித்ய கல்யாணப் பெருமாள். கோவில் விமானமோ கல்யாண விமானம். திருக்குளத்தின் பெயர், கல்யாண தீர்த்தம்.

ஆதிவராகப் பெருமாளும் அகிலவல்லி நாச்சியாரும் கோமளவல்லித் தாயாரும் தினசரி காட்சி தருவதும் கல்யாணக் கோலத்தில் தான். ஆலயத்தின் தலமரமோ, மணவிழாவிற்கு உகந்த புன்னை.

பெருமாளுக்கு இங்கே தினந்தோறும் கல்யாணம் நடக்கிறது. 'கல்யாணம் ஆகாதவங்க ஆணாக இருந்தாலும் சரி, பெண்ணாக இருந்தாலும் சரி இங்கு சென்று பெருமாளை தரிசனம் செய்தால் போதும், ஒரு மாதத்துலயே கல்யாணம் நிச்சயம் ஆயிடும். வரவங்க ரெண்டு மாலைகளை வாங்கிட்டு வரணும். அர்ச்சனை பண்ணி ஒரு மாலையைப் பெருமாளுக்குச் சாத்துவார்கள். இன்னொண்றை கழுத்துல போட்டுக்கிட்டு, சம்பந்தப்பட்டவங்க பிரகாரத்தைச் சுற்றிவரணும். அப்புறமா அந்த மாலையை வீட்டுக்கு எடுத்துக்கிட்டுப் போய், சாமி படத்துக்கிட்ட வச்சு வணங்கினாப் போதும். கல்யாணம் நிச்சயமாயிடும்.

திருமணம் நடப்பதற்கும் இந்தக் கோவிலுக்கும் என்ன சம்பந்தம்? பெருமாளுக்கு இங்கே தினசரி கல்யாணம் நடப்பது ஏன்?

அதற்கான புராண வரலாறு வருமாறு:-

பண்டைய காலத்தில் திருவிடந்தைக்கு அக்காலத்தில் மேகநாதன் என்ற அசுரன் இருந்தான். அவனது மகன் பலிச்சக்கரவர்த்தி.

இந்த பலிச்சக்கரவர்த்தி உலகினைத் தர்ம சாஸ்திரத்தின்படி, முறையாக ஆட்சிபுரிந்து வந்தான். இவனது நண்பர்களான மாலி, மால்யவன், சுமாலி ஆகிய மூவரும் தேவர்களுக்கு எதிரான போரில் தோல்வியடைந்து பலிச்சக்கரவர்த்தியிடம் சென்று அடைக்கலம் புகுந்தனர். தனது நண்பர்களுக்காக பலிச்சக்கரவர்த்தி தேவர்களுக்கு எதிராக போரிட நேரிட்டது.

இதனால் ஏற்பட்ட பாவத்தினைப் போக்க பலிச்சக்கரவர்த்தி திருவிடந்தையில் தவம் புரிந்தான். மகாவிஷ்ணு வராக அவதாரம் எடுத்து பலியின் முன்பு தோன்றி அவனுக்கு வேண்டிய வரம்களை அளித்தார். இவ்வூரின் அழகில் மயங்கிய இறைவன் திருவிடந்தையிலேயே தங்கிவிட்டார்.

திருவிடந்தையில் மூலவர் தன் திருநாமத்திலேயே நித்ய கல்யாணப் பெயரைக் கொண்டுள்ளதால், திருமணத் தடை நீங்கும் என்பது ஐதீகம்.

இந்த நிலையில் முனிவர் ஒருவரும், அவரது பெண்ணும் சொர்க்கம் அடையத் தவம் இருந்தனர். இதில் முனிவரின் பெண் முதலில் சொர்க்கம் அடையத் தகுதி பெற்றார். அவர் திருமணமாகாத பெண் என்பதால் சொர்க்கம் நுழைய அனுமதி மறுக்கப்பட்டது.

நாரதர் பூலோகத்தில் இருந்த முனி புங்கவர்களிடம் அப்பெண்ணைத் திருமணம் செய்து கொள்ளுமாறு வேண்டினார். காலவ ரிஷி என்ற முனிவர் அவளை மணந்து கொண்டார்.

முனிவருக்கு ஒரே வருடத்தில் 360 பெண் குழந்தைகளைப் பெற்றுத் தந்துவிட்டு சொர்க்க லோகம் சென்றுவிட்டாள் அவரது மனைவி. அத்தனை பெண் குழந்தைகளை வைத்து, காப்பாற்றச் சிரமப்படும் முனிவர், இறுதியில் இந்த திருவடந்தைக்கு வந்தார்.

இங்கே அருள்பாலிக்கும் வராக மூர்த்தியை வணங்கினார். தேவர்களுடன் போரிட்டதால் சாபம் பெற்ற பலி மன்னனுக்கும் காட்சி தந்து ரட்சித்த வராகர், இவர் தான் என்பதால், தன் மகள்களுக்கும் இவரே நல்வாழ்க்கையை அமைத்துத் தருவார் என்று நம்பினார் காலவ மகரிஷி.

முனிவரின் கவலையைத் தீர்க்க, வராகப் பெருமாள், பிரம்மசாரி உருவெடுத்து பெண் கேட்டு வந்தார். தினம் ஒரு கன்னிகை வீதம் 360 நாட்களுக்கு ஒவ்வொருவராகத் திருமணம் செய்து கொண்டார். பெருமாள். கடைசி தினத்தில் 360 மனைவிகளையும் ஒன்றாகச் சேர்த்து அனைத்து ஒரே பெண்ணாக ஆக்கி தன் இடத்து பக்கத் திருத் தொடையில் வைத்துக் கொண்டு வராகப் பெருமாளாக அனைவருக்கும் காட்சியளித்தார். (இப் போதும் அதே காட்சியை நாம் தரிசிக்கலாம்).

360 கன்னிகள் சேர்ந்து ஒருங்கே உருவானதால், வராகரின் இடபாகத்தில் உள்ள நாச்சியாருக்கு அகில வல்லித் தாயார் என்றும் வருடம் பூராவும் திருமணம் செய்து கொண்டதால், வராகருக்கு நித்யகல்யாணப் பெருமாள் என்றும் பெயர்கள் ஏற்பட்டன. 360 பெண்களில் மூத்தவளின் பெயர் கோமளவள்ளி என்பதால், இங்கே தனிக் கோவிலில் காட்சி தரும் தாயாருக்கும் கோமளவள்ளிஎன்றே பெயர். 'திரு' (லட்சுமியை) தனது இடது பக்கத்தில் பெருமாள் வைத்துக் கொண்டதால் இந்த ஊருக்கு 'திருஇடவெந்தை' என்ற பெயர் ஏற்பட்டது.

தினந்தோறும் திருமணம் செய்து கொண்ட பெருமாளை தரிசனம் செய்வதால், இங்கே வரும் பக்தர்களுக்கும் விரைவில் திருமணம் நடைபெற்று விடுகிறது.

திருமணம் ஆகாத ஆண் அல்லது பெண் தங்களது பெற்றோர் அல்லது உறவினர்களுடன் இந்த ஆலயத்திற்கு வரவேண்டும்.

இரண்டு மாலைகள் வாங்க வேண்டும். ரோஜா மாலையாக இருந்தால் நல்லது. அர்ச்சகர் அந்த மாலைகளை தாயாருக்கு அணிவித்து பரிகாரம் செய்யப்பட வேண்டியவரின் பெயரில் அர்ச்சனை செய்வார். பிறகு இரண்டு மாலைகளில் ஒரு மாலையை மட்டும் எடுத்து வந்து தருவார்.

அதை திருமணத்துக்கு உரியவர் தானே தனது கழுத்தில் போட்டுக்கொள்ள வேண்டும். பிறகு ஆலயத்தை 9 முறை சுற்றி வரவேண்டும். பிரகாரத்தை வலம் வரும்போது விரைவில் தனக்கு நல்ல இடத்தில் திருமணம் கைக்கூட வேண்டும் நித்திய கல்யாணப்பெருமாளிடம் மனமுருக வேண்டிகொள்ள வேண்டும்.

9 தடவை பிரகாரத்தை சுற்றி முடித்ததும், கொடிமரம் அருகில் வந்து சாஷ்டாங்மாக விழுந்து வழிபட வேண்டும். பிறகு அந்த மாலையை தானே கழற்றி எடுக்கவேண்டும். அதை ஒரு பைக்குள் பத்திரமாக வைத்து வீட்டிற்கு எடுத்து செல்ல வேண்டும். வீட்டில் அந்த மாலையை பூஜை அறை விசாலமாக இருந்தால் அங்கே வைத்துவிடலாம். அல்லது சுற்றில் அணியில் அடித்து அதில் தொங்கவிட்டுவிடலாம்.

தினமும் பூஜை அறையில் விளக்கேற்றி சாமிக்கும்பிடும் போது குலதெய்வத்தை வணங்கிவிட்டு நித்தியகல்யாணப்பெருமாளையும் மனத்திற்குள் நினைத்து வழிபட வேண்டும். அந்த பெருமாளின் அருளால் நிச்சயம் விரைவில் திருமணம் கைக்கூடிவிடும். குறிப்பிட்ட காலத்திற்குள் சிறப்பாக திருமணம் நடைபெறும். பல்லாயிரக்கணக்கானவர்கள் வாழ்வில் இது நடந்து உள்ளது.

திருவிடந்தை பெருமாளை தரிசனம் செய்தால் திருப்பதி பெருமாளை தரிசனம் செய்வதற்கு சமம் என்று கூறலாம். 108 திருப்பதிகளில் பெருமாள் வராகமூர்த்தியாக தரிசனம் தரும் திருப்பதியும் இது மட்டும்தான். தம்பதி சமதேராக ஆதிசேஷன், பெருமாள் திருவடியைத் தாங்கி சேவை சாதிப்பதால், இங்கே வந்து நித்ய கல்யாணப் பெருமாளை வணங்கினால் உங்கள் ராகு, கேது தோஷங்களும் நீங்கிவிடும். உற்சவர் பெருமாளுக்கும், தாயாருக்கும் தாடையில் திருஷ்டிப்பொட்டு இயற்கையாகவே அமைந்துள்ளதால் அவர்களை வணங்கினால் இதுநாள் வரை உங்களுக்கு ஏற்பட்ட திருஷ்டிகளும் பறந்துவிடும்.

அன்பார்ந்த வாசகர்களே, கடந்த வாரம் துறவு என்பது எதையும் விட்டு விடுவது அல்ல, இருப்பதை அப்படியே ஏற்று கொண்டு வாழ்வது என்பது உண்மையான துறவின் இலக்கணம் ஆகும். இதை நிஷ்காமிய கர்மம் என்கிறது கீதை. இதை இன்னும் நாம் எளிமையாக புரிந்து கொள்ளும் விதமாக வேதாத்திரி மகரிஷி அவர்கள் "உறவிலே கண்ட உண்மை நிலை தெளிவு துறவு" என்கிறார்.

எனக்கு எது எப்படி, எங்கு, எவ்வாறு அமைந்ததோ, அது இறைவன் சித்தம். அதை நான் ஏற்று கொள்கிறேன் என்கின்ற மன பக்குவத்தோடு வாழ வேண்டும். ஏனென்றால் நாம் யாரும், இந்த உலகத்திலே, நான் இந்த தாய், தந்தைக்கு மகனாகவோ, மகளாகவோ பிறக்க வேண்டும் என்று ஆசைப்படவில்லை. இதில் இருந்து என்ன தெரிகிறது? பிறப்பு என்பதே நம் கையில் இல்லை. அப்படி என்றால் எதுவும் நம் கையில் இல்லை. அது, அது நடக்க வேண்டிய நேரத்தில் தானாக நடக்கிறது.

எனவே, இந்த உலகில் யாரையும் மாற்றுவதற்காக நான் பிறக்கவில்லை. என்னை நானே முதலில் மாற்றி கொள்ள வேண்டும். என் மாற்றத்தை பார்த்து தான் நம் குடும்பத்தில் உள்ளவர்கள் மாறுவார்கள். ஆனால் நாம் மாறாமல், மற்றவர்களுக்கு உபதேசம் செய்து கொண்டு இருக்கிறோம். இதனால் குடும்பத்தில் சிக்கல்கள் வருகிறது.

ஒன்றை நாம் தெளிவாக தெரிந்து கொள்ள வேண்டும். நம் வாழ்க்கையானது, பிறக்கும் போது நம்மோடு சேர்ந்து வந்தது இன்பம், துன்பம் என்கின்ற இந்த இரண்டு உணர்வுகள். அதை அப்படியே ஏற்று கொள்வது தான் ஞான வாழ்க்கை. உண்மையான சந்நியாசம், இந்த நிலையில் இருந்து நாம் அறியப்படும் பொருளை அதாவது ஆன்மாவை அறிய முற்பட வேண்டும்.

நாம் சாதாரண மனிதர்கள் அல்ல, நாம் மனம் கொண்ட ஈசனாய் இருப்பதால் தான் நமது பெயர் மனுசன். அந்த ஈசனுக்கு உடல் இல்லை. இந்த மனிதர் என்கின்ற ஈசனுக்கு உடல் உண்டு. எனவே, இந்த பிரபஞ்சம் என்பது ஒரு பிரம்ம பீடம்.

நாம் இந்த உலகத்திற்கு வந்த நோக்கம் மிகவும் உன்னதமானது. நாம் இங்கு வந்திருக்கிறோம் என்றால், நம்மிடம் அதற்கான தகுதியும், தரமும் இறைவன் கொடுத்து தான் நம்மை ஒரு தாயின் வயிற்றில் கருவிலே உருவாக்கி இருக்கிறான். அந்த தகுதி நமக்கு இல்லையென்றால், நாம் இன்னும் பல பிறவிகள் ஓரறிவு தாவரம் முதல் ஐந்தறிவு விலங்காக தான் பிறவியில் இருப்போம்.

எனவே நாம் ஒவ்வொருவரும் இறை தன்மை பெற்றவர்கள். இதை நாம் உணர்வதே, ஞான வாழ்வின் நோக்கம். இதை தான் வேதாத்திரி மகரிஷி அவர்கள், மனித வாழ்வின் நோக்கம் அறநெறி படி வாழ்ந்து இறையுணர்வு பெறுதல் என்கிறார். இதற்கு முதல் வழி, தன்னையறிதல் ஆகும்.

வாழும் காலத்திலே தன்னையறிதலுக்கு இரண்டு வழிகள் உண்டு. ஒன்று தவம் மற்றொன்று மவுனம் ஆகும். தவத்தின் வழியாக (தியானம்) புலன்களின் மூலமாக மனதை அறிய முடியும். ஆனால் மவுனத்திலே, மனதின் எஜமானாகிய ஆன்மாவை அறியமுடியும். இதை தான் திருமூலர் அவர்கள்,

"தன்னை அறிந்தால் தனக்கொரு கேடில்லை

தன்னை அறியாமல் தானே கெடுகின்றான்

தன்னை அறியும் அறிவை அறிந்த பின்

தன்னை தானே அர்ச்சித்தானே" - என்கிறார்.

இதையே மகரிஷி அவர்கள், மனதை அறிந்தால் தான் அதன் மூலத்தை அறியலாம் என்கிறார். எனவே மனதை அறிவது தவம். அதை பற்றிய ஆய்வே மவுனம் ஆகும். எனவே உன்னில் தேட உள்ளது கிடைக்கும் என்று மகான்கள் கூறுகிறார்கள்.

இந்த ஞான வாழ்க்கையை வேதத்திரி மகரிஷி அவர்கள், ஒரு மனிதர் வாழும் காலத்திலேயே முதலில் தன்னை உணர வேண்டும். அப்படி அறிந்தால் தான், தன் குறைகளை நம்மால் உணர முடியும். அப்படி உணர்ந்தால் தான் அந்த குறைகளை திருத்தம் பெற வழி செய்யமுடியும். அப்படி வழி செய்தால் தான் வகுத்தபடி வாழ முடியும் என்கிறார். இந்த நிலை வருவதற்கு நம்மை நாமே பக்குவபடுத்தி கொள்ள வேண்டும்.

மனவளக்கலை பேராசிரியர்கள் கி. சௌமித்ரன், பொன்னி சௌமித்ரன்

ஏனெனில், வாழ்க்கையில் நாம் கற்பனை செய்வது ஒன்று, ஆனால் இறைவன் கொடுப்பது வேறு ஒன்று. ஆனால், வாழ்க்கையில் நமக்கு எது நடந்தாலும், சந்தோஷமாக இருக்க அல்லது மனம் சம நிலையில் இருக்க கற்றுக்கொள்ள வேண்டும் என்று நம்முடைய சாஸ்திரங்கள் சொல்கிறது. ஆனால் அப்படி இல்லை என்று நமது பலவீனம் சொல்கிறது. அதாவது சாஸ்திரம் முடியும் என்கிறது. நமது பலவீனம் முடியாது என்கிறது. இதில் சாஸ்திரம் சத்தியமா? அல்லது நமது பலவீனம் சத்தியமா? நம்மை பொறுத்தவரை பலவீனம் தான் சத்தியம் என்று நாம் சொல்லுவோம்.

ஏனெனில் எது நடந்தாலும், நம்மால் சந்தோஷமாக இருக்க முடிவது இல்லை. நாம் எல்லாம், நமது வாழ்க்கையிலே நாம் எதிர்பாப்பது போல் நடக்க வேண்டும் என்று எண்ணுகிறோம். ஆனால் எதுவும் நடப்பது இல்லை. நாளை ஏதோ ஒன்று கிடைக்க போகிறது என்கின்ற ஒரு எதிர்பார்ப்போடு வாழ்ந்து கொண்டு இருக்கிறோம். ஆனால் இறைவன் வேறு விதமாக நம்மிடம் விளையாடுகிறான். இதை சித்தர் பாடலிலே

"உலகத்தை உருட்டி திரட்டியவன் அவன்

எனக்கு உயிர் கொடுத்தவன் அவன்

வாழும் காலத்திலே அகத்திலே உணராததால்

வாழ்க்கை எனும் சக்கரத்திலே என்னை

செக்கு மாடாய் சுழற்றியவன் அவன்" - என்கிறார்கள்.

அதாவது செக்கு மாடு என்ன செய்யும்.. ஒரு செக்கு கடையை வைத்து இருக்கும் முதலாளி ஆனவர், அந்த செக்கு இயந்திரத்திலே தேவையான பொருட்களை போட்டு மாட்டை சுற்ற விடுவார், மாடு தானாக சுற்றாது. அதன் இரண்டு கொம்புகளுக்கு இடையே ஒரு கீரை கட்டை கட்டி விட்டு மாட்டை ஓட்டுவார். மாடு அந்த கீரை கட்டை பிடிப்பதற்கு நாக்கை மேல் நோக்கி நீட்டி கீரையை பார்த்து கொண்டே செல்லும். மாட்டின் கவனம் கீரையின் மேல்.. முதலாளியின் கவனம் செக்கு எண்ணெய் ஆட்டுவதிலே இருக்கும். அந்த எண்ணெய் தயாராகும் வரை மாட்டால் கீரையை தின்ன முடியாது. அது போல இறைவன் நம்மிடம் கீரை கட்டு போன்ற எதிர்காலம் என்கின்ற வாழ்வை நம் முன் காட்டி, அந்த மாயையில் சிக்க வைத்து, அதன் போக்கிலேயே நமது வாழ்க்கை செல்கிறது.

கடந்த காலத்தை பற்றி நாம் பேசும் போது கர்வம் ஏற்படுகிறது. எதிர்காலத்தை பற்றி சிந்திக்கும் போது பயம் ஏற்படுகிறது. இதனால், நிகழ்காலத்திலே, நமக்கு உள்ளே ஆனந்தம் என்கின்ற ஒன்று உள்ளதை அறியவிடாமல் மாயை மறைத்து விடுகிறது. இதுவே ஆன்மாவை உணர்வதற்கு தடையாக உள்ளது.

எனவே வாழ்க்கையில் நமக்கு எது நடந்தாலும், இறைவனை தியானிப்பதை விட்டுவிடக் கூடாது. உதாரணத்திற்கு சொல்ல வேண்டும் என்றால் கிராமத்திலே, தலையிலே தண்ணீர் குடம் ஒன்றையும், இடுப்பிலே தண்ணீர் குடம் ஒன்றையும் பெண்கள் வைத்துக் கொண்டு, தன் தலையில் இருக்கும் குடத்தை பிடிக்காமல், குழுவாக பேசி கொண்டே வருவார்கள். ஆனால் ஒரு துளி நீர் கூட கீழே சிந்தாது. அவர்கள் கண்கள் பாதையின் மீதும், புற உலகின் மீதும் இருந்தாலும், முழு கவனமும் தண்ணீர் குடத்தின் மீதே இருக்கும். அது போல நாமும், வாழ்க்கையில் எவ்வளவு துயரமும், துன்பமும் வந்தாலும், இறைவனை நினைப்பதை விடவே கூடாது. இதுவே ஞான வாழ்க்கையாகும்.

அன்னை சாரதா தேவி வாழ்க்கையை படித்து பார்த்தால், நமக்கு தெரியும். அவர்கள் ராமகிருஷ்ணருடைய மனைவியாக இருந்தாலும், எவ்வளவு கஷ்டப்பட்டார்கள் என்று. அது போல அன்னை லோகாம்பாளை பற்றி படித்தால், அவர்கள் வேதாத்திரி மகரிஷியினுடைய மனைவியாக இருந்தாலும் எவ்வளவு கஷ்டப்பட்டார்கள் என்று தெரியும். அவர்கள் பட்ட கஷ்டங்களை எல்லாம் நாம் பார்க்கும் போது, நம் வாழ்வில் கஷ்டங்கள் ஒன்றும் பெரிது இல்லை என்பது விளங்கும்.

வாழ்வில் எது வரும் என்று நமக்கு தெரியாது. வாழ்க்கை ஆனது எங்கோ ஆரம்பித்து, எங்கோ போய் முடியும். ஒரு சிலர் சிறு வயதிலேயே ஞான வாழ்க்கையை பற்றி பேசுவர். எதிர்காலத்திலே அவர் ஒரு சிறந்த ஞானியாக உருவாவார் என்று எதிர்பார்த்தால் அவர் இருந்த இடம் தெரியாமல் போய் விடுவார். ஒரு சிலரோ சதாரண குடும்ப வாழ்க்கையிலே எந்த வித சலனமும் இல்லாமல் இருப்பார். எதிர்காலத்திலே ஞானியாக உருவெடுப்பார்.

எனவே, ஞான வாழ்க்கையிலே அறியப்படும் இறைவனை, அறியவராகிய நாம், முதலில் வாழ்க்கையில் எதையும் எதிர்பார்ப்பதை நிறுத்திவிட வேண்டும்.

சந்தோஷத்தை தவிர எதையும் நம்மால் வாங்க முடியும். வெளியே மனதை விட்டால், அது மாறிக் கொண்டே இருக்கும். மனக்கதவை திறந்து விட்டால், நாம் இறைவனிடம் கேட்க வேண்டியது எதுவும் இல்லை. ஏனெனில் நமக்கு தேவை என்பது இல்லை. அதற்கு காரணம், கேட்பதும், அதற்கு பதிலும் அவரே. அங்கு இரண்டு அல்ல , எல்லாம் அந்த ஒன்றே நடத்தும். அதில் நடப்பது நடக்கும். நாம் கடமைகளை மட்டும் செய்ய வேண்டும். இதனால் உடலுக்கு ஒரு ஆரோக்கியம் ஏற்படும். அது போல மனம் எந்த அளவிற்கு எண்ணங்கள் இல்லாமல் இருக்கிறதோ, அப்போது தான் மனதிற்கு ஆரோக்கியம்.

இதற்கு முதல் தடையாக இருப்பது 'நான்' மற்றும் 'எனது' என்கின்ற நமது எண்ணங்களே. இந்த இரண்டிலும் நமக்கு இன்பம் மற்றும் துன்பத்தை தவிர வேறு அனுபவம் ஏற்பட்டு இருக்காது. எனவே ஞான வாழ்க்கை வாழ்வதற்கு, துன்பத்தை நீக்கி இன்பத்தை மட்டும் அறியும் வாழ்க்கை எப்படி என்பதை ஆராய்ச்சி செய்வோம்.

போன்: 9444234348

வாழ்க்கை நிலையற்றது. என்றேனும் ஒருநாள் கட்டாயம் உடலை விட்டு உயிர் பிரிந்துவிடும். எனவே நாம் உயிருடன் இருக்கும்போதே தர்ம காரியங்களைச் செய்ய வேண்டும். இவ்விதம் வாழ்வின் நிலையாமையை வலியுறுத்தி நம்மை நன்னெறிகளில் தூண்டவே திருநீறு அணியப்படுகிறது.

ஒருநாள் இல்லாவிட்டால் ஒருநாள் திருநீற்றுச் சாம்பலைப் போலவே உடலும் சாம்பலாகும் என்பதை நினைவில் கொண்டு நற்சிந்தனைகளோடு வாழவேண்டும் என்பதை அணியும்போதெல்லாம் நினைவுபடுத்துகிறது புனிதமான திருநீறு.

பசுஞ்சாணத்தை வெய்யிலில் காயவைத்து நெருப்பிலிட்டுச் சாம்பலாக்கி திருநீறு தயாரிக்கப்படுகிறது. திருநீறுக்குப் பல மருத்துவ குணங்கள் உண்டு.

முக்கியமாக நெற்றியில் திருநீறு அணிவதன் மூலம் தலையில் இருக்கும் ஈரம் உறிஞ்சப்பட்டு விடும். அதனால் சளி போன்ற தொந்தரவுகளிலிருந்து எளிதாக விடுபட முடியும்.

சைவ ஆலயங்களில் சிவ லிங்கத்திற்கும் முருகப் பெருமானுக்கும் சந்தனக் காப்பு சார்த்துவதைப் போல, விபூதிக் காப்பும் சார்த்துவதுண்டு. விபூதிப் பிரசாதத்தை வில்வ இலைகளிலும் வெற்றிலையிலும் வைத்து வழங்கும் வழக்கமும் சில ஆலயங்களில் கடைப் பிடிக்கப் படுகிறது.

தமிழ் மூதாட்டி அவ்வையார் இயற்றிய நல்வழி என்ற நீதி நூலில் வரும் ஒரு நேரிசை வெண்பா திருநீறு இடாத நெற்றி பாழானது என்கிறது.

`நீறில்லா நெற்றிபாழ்

நெய்யில்லா உண்டிபாழ்

ஆறில்லா ஊருக்கு

அழகுபாழ் - மாறில்

உடன்பிறப் பில்லா

உடம்புபாழ் பாழே

மடக்கொடி இல்லா மனை!'

திருநீற்றினாலே நெற்றியும், நெய்யினாலே உணவும், நதியினாலே ஊரும், உடன்பிறப்பால் உடல்நலமும், மனைவியினால் இல்லமும், சிறப்படையும் என்றும், இதெல்லாம் இல்லாவிட்டால் வாழ்க்கை பாழாகிவிடும் என்றும் சொல்கிறது இந்த வெண்பா.

பதினெண் சித்தர்களுள் ஒருவரான மகான் திருமூலர் எழுதிய திருமந்திரம் என்ற ஞான நூல் திருநீற்றின் பெருமையைப் பேசுகிறது. திருநீறு அணிவதால் ஒருவன் செய்த தீவினைகள் யாவும் நீங்கி அவன் சிவபெருமானின் திருவடியைச் சென்று சேரலாம் என உறுதிபடக் கூறுகிறது திருமந்திரத்தில் வரும் ஒரு பாடல்:

`கங்காளன் பூசும் கவசத் திருநீற்றை

மங்காமல் பூசி மகிழ்வரே யாமாகில்

தங்கா வினைகளும் சாரும் சிவகதி

சிங்கார மான திருவடி சேர்வரே!'

கூன்பாண்டியனின் வெப்ப நோயைத் தீர்ப்பதற்காக அவன் உடல் முழுதும் திருநீறு பூசி திருநீற்றுப் பதிகம் பாடி சிவபெருமானைத் துதித்தார் சைவ சமயக் குரவர்களில் ஒருவரான திருஞானசம்பந்தர். திருநீற்றின் மகிமையால் வெப்ப நோய் முற்றிலுமாகத் தீர்ந்து பாண்டிய மன்னன் பூரண குணமடைந்தான்.

`மந்திரமாவது நீறு வானவர் மேலது நீறு

சுந்தர மாவது நீறு துதிக்கப் படுவது நீறு

தந்திரமாவது நீறு சமயத்தி லுள்ளது நீறு

செந்துவர் வாயுமை பங்கன் திருஆல

வாயன் திருநீறே!'

என்ற முதல் பாடலுடன் தொடங்கும் திருநீற்றுப் பதிகம், திருநீற்றின் பெருமைகளை விரிவாகப் பேசுகிறது. அனைவரும் திருநீறு அணியுங்கள் என அறைகூவிச் சொல்கிறது.

இன்றும் நெற்றியில் திருநீறு பூசி, ஞானசம்பந்தர் அருளிய திருநீற்றுப் பதிகத்தை நாள்தோறும் ஓதினால் அனைத்து நோய்களும் குணமாகும் என்பது அடியவர்கள் நம்பிக்கை.

அறுபத்து மூவரில் ஒருவரான மெய்ப்பொருள் நாயனார் அடியவர்கள் அணியும் திருநீற்றுக்குப் பெரும் முக்கியத்துவம் கொடுத்து மதித்தவர். அவரைப் போரில் வெல்ல முடியாத முத்தநாதன், அவரது சிவபக்தியை அறிந்து அவரை ஏமாற்றிக் கொல்ல நினைக்கிறான்.

திருநீறு பூசி அடியவர் போல் வேடமிட்டு வந்து இரவில் அவரைச் சந்திக்கிறான். அவனது திருநீற்றுக் கோலத்தைப் பார்த்து அடியவர் என்றே கருதி வணங்குகிறார் மெய்ப்பொருள் நாயனார். அவன் மறைத்து வைத்திருந்த வாளால் அவரைக் கொல்கிறான் என வளர்கிறது மெய்ப்பொருள் நாயனாரின் திருச்சரிதம்.

`மெய்யெலாம் நீறு பூசி

வேணிகள் முடித்துக் கட்டி

கையிலே படைகரந்த

புத்தகக் கவளி ஏந்தி

மைபொதி விளக்கே அன்ன

மனத்திடைக் கறுப்பு வைத்து

பொய்த்தவ வேடம் கொண்டு

புகுந்தனன் முத்த நாதன்'

என முத்தநாதனின் பொய்த்தவ வேடத்தை விவரிக்கிறது பக்திச் சுவை நனி சொட்டச் சொட்டப் பாடிய புலவரான சேக்கிழாரின் பாடல்.

ஏனாதிநாத நாயனார் சரிதத்திலும் திருநீறு ஒரு முக்கியப் பங்கு வகிக்கிறது. அவரைக் கொல்ல நினைத்த அதிசூரன், திருநீறு தாங்கிய நெற்றி உடையோரை அவர் ஒருபோதும் கொல்ல மாட்டார் என்பதை அறிந்து கொள்கிறான்.

தனித்துப் போர்புரிய வருமாறு அறைகூவி அவரை அழைக்கிறான். போரிட வந்தவர் முன் திருநீறு தரித்த நெற்றியோடு நிற்கிறான் அதிசூரன். அவனைக் கொல்லாது நின்ற ஏனாதிநாத நாயனாரை அவன் கொல்கிறான் என விரிகிறது ஏனாதிநாத நாயனார் திருச்சரிதம்.

`தீங்கு குறித்தழைத்த தீயோன் திருநீறு

தாங்கிய நெற்றியினார் தங்களையே

எவ்விடத்தும்

ஆங்கவரும் தீங்கிழையார் என்ப

தறிந்தானாய்ப்

பாங்கில் திருநீறு பண்டு பயிலாதான்

வெண்நீறு நெற்றி விரவப் புறம் பூசி

உள்நெஞ்சில் வஞ்சக் கறுப்பும்

உடன்கொண்டு

வண்ணச் சுடர்வாள் மணிப்பலகை

கைக்கொண்டு

புண்ணியப் போர் வீரர்க்குச் சொன்ன

இடம் புகுந்தான்'

என முன்னர் திருநீறு பூசாதவன் இப்போது நெற்றியில் நீறு பூசிப் போருக்கு வந்தான் என்று அவன் வந்த காட்சியை விவரிக்கிறார் சேக்கிழார் பெருமான்.

சீர்காழியில் உண்ணாமுலை அம்மையின் மூலம் ஞானப்பால் அருளப்பெற்ற திருஞான சம்பந்தர் மூன்று வயதில் பாடிய தனது முதல் பாடலில் சிவபெருமானை சுடலைப் பொடியாகிய திருநீறைப் பூசிக்கொண்டு என் உள்ளம் கவர் கள்வன் எனப் போற்றுகிறார்.

`தோடுடைய செவியன்

விடையேறியோர்

தூவெண் மதிசூடி

காடுடைய சுடலைப்

பொடிபூசி

என் உள்ளம் கவர் கள்வன்

ஏடுடைய மலரான்முனை

நாட் பணிந்து

ஏத்த அருள்செய்த

பீடுடைய பிரமாபுரம்

மேவிய

பெம்மான் இவன் அன்றே`

தலபுராண வேந்தர் என அழைக்கப்படும் மீனாட்சிசுந்தரம் பிள்ளை, தாம் எழுதிய தலபுராணம் ஒன்றில் சிவபெருமானின் திருநீறை மையமாக வைத்து ஒரு கற்பனையைப் பின்னுகிறார். பிள்ளையவர்களின் அந்த அழகிய கற்பனை நம்மை வியக்க வைக்கிறது.

சிவபெருமான் திருநீறணிய முற்பட்டார். அப்போது, அவர் தம் விரல்களில் எடுத்த அந்தத் திருநீற்றின் துகள் அவர் கழுத்திலிருந்த பாம்பின் கண்ணில் சிறிது விழுந்து விட்டதாம். அதனால் அந்தப் பாம்பு கோபம் கொண்டு சீறியதாம். பாம்பு ஏன் சீறுகிறது என்றறிய விழித்துப் பார்த்ததாம் நெற்றிக் கண்.

நெற்றிக் கண் திறந்தால் நெருப்புப் பொறி தோன்றுமே? அப்படி நெற்றிக் கண்ணிலிருந்து புறப்பட்ட நெருப்புப் பொறி சிவபெருமான் தலையில் அணிந்திருந்த பிறை நிலவின் மேல் பட்டுவிட்டதாம்!

அமுதைப் பொழியும் நிலவு என்றல்லவா அது சொல்லப்படுகிறது? அந்தப் பிறை நிலவு, நெருப்புப் பொறிபட்ட உஷ்ணத்தால் சற்று உருகியதாம். அப்போது அதன் அமுதத் துளி சிவபெருமான் இடையில் கட்டியிருந்த புலித்தோலில் பட்டதாம்.

அமுதத் துளி பட்டால், உயிரிழந்தவை கூட உயிர் பெற்றுவிடுமே? அதன்பின் புலித்தோல் வெறும் தோலாகவா இருக்கும்? அமுதத்தால் அதற்கு உயிர் கிட்டிவிட்டது. எனவே புலித்தோல் உண்மையான புலியாகவே மாறி விடுகிறது!

அந்த நிஜப் புலியைப் பார்த்த சிவபெருமானின் வாகனமான காளை மாடு மிரண்டு ஓடுகிறது என்று தன் கற்பனைச் சித்திரத்தைத் திருநீறில் தொடங்கி சிவன்மேல் வைத்துப் தீட்டியுள்ளார் தமிழ்த் தாத்தாவின் ஆசிரியரான மீனாட்சி சுந்தரம் பிள்ளை.

சுவாமி விவேகானந்தரின் சிஷ்யையான நிவேதிதா தேவிக்கு இந்துமதச் சடங்குகளில் தீவிர ஈடுபாடும் நம்பிக்கையும் இருந்தன. சரஸ்வதி பூஜையன்று ஹோம குண்டத்தில் இருக்கும் திருநீற்றுச் சாம்பலை நெற்றியிலும் கைகளிலும் பூசிக் கொண்டு செருப்பணியாத பாதங்களோடு அவள் கொல்கத்தா நகர வீதிகளில் வெய்யிலில் நடந்து செல்வாள் என்பதை நிவேதிதையின் புனித வரலாறு நமக்குச் சொல்கிறது.

எம்.பி. சிவம் எழுதி டி.எம். சவுந்தரராஜன் பாடியுள்ள பக்திப் பாடல் ஒன்று திருநீற்றின் பெருமைகளை விரிவாகப் பேசுகிறது.

`கந்தன் திருநீறணிந்தால் கண்டபிணி

ஓடிவிடும்

குந்தகங்கள் மாறி இன்பம் குடும்பத்தை

நாடிவரும்

சுந்தரவேல் அபிஷேக சுத்தத் திரு

நீறணிந்தால்

வந்தமர்ந்த மூத்தவளும் வழிபார்த்துப்

போய்விடுவாள்

அந்தநேரம் பார்த்திருந்த அன்னை

செல்வம் ஓடிவந்து

சிந்தை குளிர வைத்து சொந்தம்

கொண்டாடிடுவாள்

மணம் மிகுந்த சாம்பலிலே மகிமை

இருக்குதடா

மனமுடன் அணிவோர்க்கு மகிழ்ச்சியைப்

பெருக்குதடா

தினம்தினம் நெற்றியிலே திருநீறு

அணிந்திடடா

தீர்ந்திடும் அச்சமெலாம் தெய்வம் துணை

காக்குமடா!'

நெற்றியில் திருநீறு அணிவதால், மூத்தவளான மூதேவி நம்மை விட்டு விலகிச் சென்று விடுவாள் என்றும் அந்த நேரத்தில் இளையவளான திருமகள் நம் இல்லம் தேடிவந்து நம் சிந்தையைக் குளிரவைப்பாள் என்றும் சொல்கிறது இந்தப் பாடல்.

வாரியார் சுவாமிகள் நெற்றி நிறையத் திருநீறு பூசும் வழக்கமுடையவர். அவர் தோற்றமே அவர் சிவனடியார் என்பதைப் புலப்படுத்தும்.

ஒருவன் அவரிடம் நெற்றியில் வெள்ளை அடித்திருக்கிறீர்கள் போலிருக்கிறதே எனக் குறும்பாய் வினவினான்.

`நன்கு கட்டப்பட்ட வீட்டுக்குத்தான் வெள்ளையடிப்பார்கள், உன்போன்ற குட்டிச் சுவருக்கு வெள்ளை அடிக்க மாட்டார்கள்!` என்று சொல்லி வாரியார் சுவாமிகள் அவன் வாயை அடக்கினார்!

எல்லா மங்கலங்களையும் தரவல்ல திருநீற்றை நெற்றியில் அணிந்து, இறைவனை வழிபட்டு, அதன்மூலம் மனத்தில் சாந்தியும் நிம்மதியும் அடைவோம்.

தொடர்புக்கு-thiruppurkrishnan@gmail.com

வெறுப்புப் பேச்சு என்பதற்கு ஒற்றை வரையறை இல்லை.

"இனம், மதம், பாலினம் அல்லது பாலியல் நோக்குநிலை போன்றவற்றின் அடிப்படையில் ஒரு நபர் அல்லது குழுவிற்கு எதிரான வெறுப்பை வெளிப்படுத்தும் அல்லது வன்முறையை ஊக்குவிக்கும் பொதுப் பேச்சு" என்று கேம்பிரிட்ஜ் அகராதி கூறுகிறது.

"பொதுவாக இனம், நிறம், தேசியத் தோற்றம், பாலினம், இயலாமை, மதம் போன்றவற்றின் காரணமாகத் தனிநபரை அல்லது ஒரு குழுவை இழிவுபடுத்தும் தகவல்தொடர்புகளை உள்ளடக்கியதே வெறுப்புப் பேச்சு!" என்கிறது அமெரிக்க அரசியலமைப்பின் கலைக்களஞ்சியம் பேச்சு சுதந்திரம், வெறுக்கத்தக்க பேச்சு மற்றும் வெறுப்பு பேச்சுச் சட்டம் பற்றி உலகெங்கிலும் நிறைய விவாதங்கள் நடந்து வருகின்றன. பாதிக்கப்பட்ட ஒருவர் சிவில் மற்றும் குற்றவியல் சட்டம் அல்லது இரண்டின் கீழும் பரிகாரம் தேடலாம்.

இரண்டாம் உலகப் போருக்குப் பிறகு, நாசிசம் "மீள் எழுச்சி" பெற்றுவிடாமல் தடுக்க ஜெர்மனியில் வெறுப்பூட்டும் பேச்சு தண்டனைக் குற்றமாக்கப்பட்டது. இது தொடர்பாக பெரும்பாலான ஐரோப்பிய நாடுகள் பல்வேறு சட்டங்கள் மற்றும் ஒழுங்கு முறைகளை நடைமுறைப்படுத்தி உள்ளன.

ஐக்கிய நாடுகளின் சர்வதேச மனித உரிமைகள் சட்டங்கள் கருத்துச் சுதந்திரத்தைப் பாதுகாத்து வருகின்றன. 1948ல் ஐ.நா பொதுச் சபையால் உருவாக்கப்பட்ட "மனித உரிமைகளுக்கான உலகளாவிய பிரகடனம்" மிக அடிப்படையான ஆவணங்களில் ஒன்று. ஆனால் வெறுப்புப் பேச்சு கருத்துச் சுதந்திரம் ஆகாது.

இன்டர்நெட் பயன்பாடு அதிகரித்த பிறகு இணையத்தில் வெறுப்புப் பேச்சை உருவாக்குவதற்கும் அது நிலைத்திருப்பதற்கும் ஏராளமான வழிகள் தோன்றின. குறைந்த செலவு மற்றும் முயற்சியுடன் வெறுப்புப் பேச்சைப் பரப்புவதற்கு இணையத்தின் பரவலான பயன்பாடு மற்றும் அணுகல் வசதியை ஏற்படுத்தியது.

இணையத்தின் போலி அநாமதேயத் தன்மை காரணமாக நிஜ வாழ்வின் பின்விளைவுகளுக்குப் பயந்தவர்கள் வெறுப்புப் பேச்சைப் பரப்பும் துணிச்சல் பெற்றனர். அத்தகைய நச்சுக் கருத்துகள் இன்டர்நெட்டின் முக்கிய உள்ளடக்கம் ஆனது.

அரசாங்கங்களும் நிறுவனங்களும் இணைய வெறுப்புப் பேச்சை எதிர்த்துப் போராட முயற்சி செய்தன. ஆனால் ஆன்லைனில் அடையாளங்களைச் சரிபார்ப்பதில் உள்ள சிரமங்கள் எதிர்பார்த்த பலனைக் கொடுக்கவில்லை.

வெறுப்பு பேச்சு என்பதற்கு சட்டரீதியான துல்லிய வியாக்கியானம் இல்லை. சர்வதேச விளக்கங்களும் நாட்டுக்கு நாடு மாறுபடும். அமெரிக்காவில் நிறஅடிப்படையிலான அவதூறு வெறுப்புப் பேச்சாகக் கொள்ளப்படுகிறது. இந்தியாவில் அது மதஅடிப்படையிலான அவதூறு.

வெறுப்புப் பேச்சை அடையாளப்படுத்த ஒரு சர்வதேச கருத்தரங்கு 16. 12. 2020-ல் அமெரிக்காவின் லாஸ் வேகாஸ் நகரில் நடைபெற்றது. வெறுப்பு பேச்சின் வரி வடிவத்தை கணினி மூலம் உள்ளீடு செய்து அறியும் இயந்திர வாசிப்பு அதில் இறுதி செய்யப்பட்டது. அதற்கு "வரிசை வகைப்பாடு மாதிரி" என்று நிபுணர்கள் பெயர் சூட்டினார்கள்.

வெறுப்புப் பேச்சுகள் அடங்கிய திறவுகோல் வார்த்தை அகராதி உருவாக்கப்படுகிறது பிறகு வீடியோ வடிவத்திலும் வரி வடிவத்திலும் சர்ச்சைக்குரிய வெறுப்புப் பேச்சு உள்ளீடு செய்யப்படுகிறது.

அதில் கிடைக்கும் தரவுகள் அடிப்படையில் சாதாரண விமர்சனப் பேச்சு, வெறுப்புப் பேச்சு, அதி தீவிர வெறுப்புப் பேச்சு, உள்நோக்கத்துடன் கூடிய வெறுப்புப் பேச்சு என்று பல்வேறு விதமாக வகைப்படுத்தப்படுகின்றன. இது கணினி நிபுணர்களால் "கணக்கிட்டு நுண்ணறிவு" என்று அழைக்கப்படுகிறது

இந்திய அரசமைப்பில் வெறுப்புப் பேச்சு சட்டங்கள் உள்ளன. இனம், மொழி, பண்பாடு, வாழும் பகுதி, சமூகம் போன்ற ஏதோ ஒரு காரணத்திற்காகக் கேலி பேசுபவர்கள் மற்றும் ஏசுபவர்கள் இந்தியாவில் தண்டிக்கப்படுவார்கள். சமய நம்பிக்கைகளைப் புண்படுத்துவோர் குற்றவாளிகள்.

"வெறுப்புப் பேச்சாளர்களின் நோக்கமே அவர்களின் வெறுப்பின் இலக்குகள் வாழ்வதற்காக வேறொரு உலகத்தை உருவாக்குவது தான்!" என்று ஜெர்மி வால்ட்ரான் தனது புத்தகமான "வெறுப்புப் பேச்சின் தீமைகள்" (The Harm in Hate Speech) என்ற நூலில் கூறுகிறார்.

வெறுப்புப் பேச்சின் ஆதரவாளர்கள் சமூகத்தில் கண்ணியத்துடன் வாழ்வதை கடினமாக்குகிறார்கள். யதார்த்தத்தை எதிர்மறையாக மாற்றும் நிகழ்வே வெறுப்புப் பேச்சு என்கிறார் ஜெர்மி.

சமீபத்தில் சர்ச்சைக்கு உள்ளாகியிருக்கும் பிரதமர் மோடியின் பல்வேறு தேர்தல் பரப்புரைப் பேச்சுகளின் சாராம்சங்கள் என்னென்ன?

தராசு ஷ்யாம்

*காங்கிரஸ் கட்சி ஆட்சிக்கு வந்தால் தேசத்தின் செல்வத்தை முஸ்லிம்களுக்கு கொடுத்து விடுவார்கள். அதிக குழந்தைகள் பெற்றவர்களுக்கும் ஊடுருவல்காரர்களுக்கும் பிரித்துக் கொடுத்து விடுவார்கள்.

*இந்திய அரசமைப்பில் பெண்கள் வைத்திருக்கும் தங்கத்தைக் கணக்கிட்டு அதை பங்கீடு செய்வோம் என்று காங்கிரஸ் தேர்தல் அறிக்கை கூறுகிறது. இது நகர்ப்புற நக்சல் சிந்தனை.

*என் தாய்மார்கள் மற்றும் சகோதரிகளின் தாலியை கூட இவர்கள் விட்டு வைக்க மாட்டார்கள்.

*சுதந்திர போராட்ட காலத்தில் முஸ்லிம் லீக்குக்கு இருந்த அதே சிந்தனையைக் காங்கிரஸ் கட்சியின் தேர்தல் அறிக்கை பிரதிபலிக்கிறது.

பிரதமர் மோடி ஆதாரமாகக் காட்டுவது 18 வருடங்களுக்கு முன் 2006-ல் அன்றைய பிரதமர் மன்மோகன் சிங் தேசிய வளர்ச்சிக் கவுன்சில் கூட்டத்தில் ஆற்றிய பின்வரும் உரை:

*நமது கூட்டு முன்னுரிமைகள் மிகத் தெளிவாக உள்ளன என்று நான் நம்புகிறேன்.

*விவசாயம், நீர்வளங்கள், கல்வி, கிராமப்புற முதலீடுகள், பொது உள்கட்டமைப்பு முதலீடுகள் ஆகியவற்றுடன் தலித், பழங்குடி, பிற்படுத்தப் பட்ட, சிறுபான்மை மக்கள் மற்றும் பெண்கள், குழந்தைகளின் நலன்களே நமது முன்னுரிமை''.

*தேச வளர்ச்சியின் பலன்கள் சிறுபான்மை மக்களுக்கும் போய்ச் சேரும் வகையில் பொருத்தமான முறையில் திட்டங்கள் தீட்டப்பட வேண்டும்.

உரையின் தொடர்ச்சியாக, ''அவர்கள் நமது வளங்களில் முன்னுரிமை பெறுகின்றனர்'' என்று நிறைவு செய்துள்ளார் மன்மோகன்சிங். இங்கு ''அவர்கள்'' என்று அவர் குறிப்பிட்டது: "அனைத்து தலித், பழங்குடி, பிற்படுத்தப்பட்ட, சிறுபான்மை மக்கள் மற்றும் பெண்கள், குழந்தைகள் ஆகிய அனைவரையும் சேர்த்துத்தான்!" இது மிகத் தெளிவாக பதிவாகியிருக்கிறது.

ஆனால் பிரதமர் மோடி தனது ராஜஸ்தான் உரையில் மன்மோகன் சிங் அன்றைக்குப் பேசியது முஸ்லிம் மக்களுக்காக மட்டுமே என்று திரித்துக் கூறுகிறார்.

தேர்தல் பிரசாரத்தில் ஒருவர் பேசாத விஷயத்தை பேசியதாகச் சொல்வது கேவலம். அதுவும் மன்மோகன்சிங் மாதிரியான ஒரு மென்மையான அரசியல்வாதி சொல்லாத கருத்துகளைத் திணிப்பது அபத்தம். அதற்குப் பொது மேடைகளில் எதிர்வினை ஆற்றும் உடல்நிலையில் கூட மன்மோகன் இல்லை.

வெறுப்புப் பேச்சுகளுக்கான சமீபத்திய எடுத்துக்காட்டுகள்:

ஹரித்வார் நகரில் 'தர்ம் சன்சத்' நடத்தப்பட்டது. அதில் பங்கெடுத்தவர்கள் சரமாரியாக வெறுப்புப் பேச்சுகளை நடத்தினார்கள். இனப்படுகொலைக்கான அழைப்புகளும் விடப்பட்டன. இந்த விவகாரம் தற்போது இந்திய உச்ச நீதிமன்றத்தில் உள்ளது.

சுதர்சன் டிவி என்ற தனியார் தொலைக்காட்சி "இலவச பேச்சு" என்ற நிகச்சியை நடத்தி வந்தது. யு.பி.எஸ்.சியில் ஐ.ஏ.எஸ்., ஐ.பி.எஸ். மற்றும் மத்திய அரசுப் பணிகளில் தேர்ச்சி பெற்ற முஸ்லீம் வேட்பாளர்களுக்கு எதிராக வெறுக்கத்தக்க கருத்துகள் அதில் வெளியிடப்பட்டன. இதுவும் நீதிமன்ற வழக்காக இப்போது உள்ளது.

"முஸ்லிம்களுக்கு எதிரான வெறுப்புப் பேச்சு" தொடர்பாக, பிரதமர் நரேந்திர மோடி மீது உடனடியாக எப்.ஐ.ஆர். பதிவு செய்து கடுமையான நடவடிக்கை எடுக்கக் கோரி மக்கள் சிவில் உரிமைகளுக்கான சங்கம் புகார் அளித்துள்ளது. ஆனால், இதுவரை எப்.ஐ.ஆர். பதிவு செய்யப்படவில்லை.

வெறுப்பு பேச்சுக்கு எதிராக பங்கேற்று ஐபிசி 153 A, 294, 295, 505 போன்ற பல பிரிவுகளின் கீழ் நடவடிக்கை எடுக்க முடியும். சமூக வேறுபாடுகளை ஊக்குவிக்கும் வகையிலும் பரஸ்பர வெறுப்பை வளர்க்கும் வகையில் அரசியல்வாதிகள் எந்த நடவடிக்கையிலும் ஈடுபடக் கூடாது என்று தேர்தல் நடத்தை விதிகள் தெளிவாகக் கூறுகின்றன

பிரதமரின் வெறுப்பு பேச்சு குறித்து தேர்தல் ஆணையத்தில் புகார்கள் தரப்பட்டுள்ளன. உச்ச நீதிமன்றத்திற்கும் தாவா எடுத்துச் செல்லப்பட்டுள்ளது.

வேலை இன்மை, பொருளாதார வீழ்ச்சி, விலைவாசி உயர்வு போன்ற முக்கியப் பிரச்சினைகளைத் திசை திருப்பவே இரண்டாம் கட்டப் பரப்புரைகளின்போது பிரதமர் மோடி மதரீதியான பிரசாரத்தை முன்னெடுத்துள்ளார் என்ற பார்வையும் உள்ளது.

பன்முகத் தன்மை கொண்ட நாடு இந்தியா. வேற்றுமையில் ஒற்றுமை தான் நம் நாட்டின் அழகே.

முப்பது கோடி முகமுடையாள்

உயிர் மொய்ம்புற ஒன்றுடையாள்

இவள் செப்பு மொழிபதினெட்டுடையாள்

எனில் சிந்தனை ஒன்றுடையாள்!

-(பாரதி)

மகாகவியின் மேற்படிப் பாடலை "மன் கி பாத்" நிகழ்ச்சியில் (24.9.2019) மேற்கோள் காட்டிச் சிலாகித்தார் பிரதமர் மோடி.

ஒற்றுமை வலியுறுத்தல் வானொலிக்கு மட்டுந்தானா? தேர்தல் மேடைக்குக் கிடையாதா?

தேர்தல்கள் வரும்.. போகும். தோற்றவர்கள் திரும்ப நின்று ஜெயிப்பதுண்டு. ஆனால் பரப்புரைகள் நிரந்தரப் பிளவுக்கு வித்திட்டுவிடக் கூடாது.

அது அபாயத்தின் கட்டியம், பிரதமர் அவர்களே!

காலம் பருவங்கள் மாறுதல் அடைவதற்கு ஏற்ப நம் உடலும் அதற்கேற்றவாறு மாறுதல் அடைகிறது.

கோடை காலங்களில் அதிகரித்த வெப்பநிலை சரி செய்வதற்கான உணவு, உடை, பானங்கள், பழக்கவழக்கங்கள் சீர் செய்வதன் மூலம் நம்மை தற்காத்துக் கொள்ளலாம்.

கோடை காலம் என்பது மார்ச் மாதம் தொடங்கி ஜூன் மாதம் வரை உள்ள காலமாகும். இக்காலத்தில் பூமியானது வெப்பம் அதிகரித்து காணும். அதற்கு ஏற்ப உடலின் தட்ப வெப்ப நிலையானது மாறுபட்டு பல இன்னல்களை நமக்கு அளிக்கிறது.

உணவு:

* அதிக புளிப்பு, உப்பு, கார்ப்பு சுவைகளை நீக்க வேண்டும். திரவ வடிவம் உள்ளதும் எளிதில் சீரணம் ஆகும் உணவுகளையும் எடுத்துக்கொள்ள வேண்டும். அறுசுவை உணவு சிறந்தது எனினும் கோடை காலத்தில் கசப்பு, இனிப்பு, துவர்ப்பு சுவையுள்ள பொருட்களை அதிகம் சேர்ப்பதனால் பித்தம் சமப்படும்.

* குளிர்காலங்கள் போல் அல்லாமல் கோடை காலங்களில் பசி குறைவாக காணப்படுவதால் உணவில் கார்போஹைட்ரெட் அளவு குறைத்து நீர் அதிகம் எடுத்துக் கொள்ள வேண்டும்.

* இதன் மூலம் நீர் சத்து மட்டுமல்லாமல் உப்பு சத்துக்களான சோடியம், பொட்டாசியம், கால்சியம் மற்றும் வைட்டமின்கள் கிடைத்து தாது உப்பு சத்து சீராக இருக்கும்.

தர்பூசணி:

நீர் சத்து அதிகமாக உள்ளது உடல் சூட்டை குறைக்கும். இதில் ஏராளமான சத்துக்கள் நிறைந்துள்ளன. இதில் உள்ள இரும்பு சத்தின் அளவு 0.2 மி.கி. வைட்டமின் ஏ, சி, பி1, பி6, பொட்டாசியம், மெக்னீசியம் போன்ற தாது உப்புகளும் உள்ளன.

* சிட்ருலின் என்ற புரதச்சத்து தர்பூசணியில் அதிக அளவில் உள்ளது. இது ரத்த நாளங்களை விரிவடைய செய்து ரத்த ஓட்டத்தை அதிகரிக்கும்.

* இதில் உள்ள சிட்ருலின் வேதியல் மாற்றம் அடைந்து அர்ஜினைன் என்ற வேதிப்பொருளாக மாறுகிறது. அது இதயத்தையும் ரத்த ஓட்டம் சம்பந்தமான உடல் உறுப்புகளையும் ஊக்குவிக்கிறது.

முலாம்பழம்:

* முலாம்பழம் நல்ல அளவு நீர் சத்து கொண்ட சிறந்த பழங்களில் ஒன்றாகும். முலாம் பழத்தை உண்டுவர மூலநோய், மலச்சிக்கல் நீங்கும். சிறுநீர் தாரை எரிச்சல், நீர் கடுப்பு நீங்கும்.

இளநீர்:

* இளநீர் உடலில் உள்ள பி.எச். அளவை சமன் செய்கிறது. அமிலத்தன்மை, நெஞ்செரிச்சலை குறைக்கும்.

வெள்ளரிக்காய்:

* முகம், கண்கள், கழுத்து பகுதியில் வெள்ளரிக்காய் மசித்த விழுதை தடவி 5 முதல் 10 நிமிடம் வரை விட்டு குளிர்ந்த நீரில் கழுவி எடுத்தால் சருமத்தில் சுருக்கங்களை தடுக்கிறது.

பானங்கள்:

வெப்பத்தின் அளவு அதிகரித்து உள்ளதால் உடலின் நீர் சத்தானது குறைந்து காணும். இதனால் மயக்கம், நாவறட்சி, சருமம் வறட்சி, சோர்வு, பசியின்மை, தலைவலி, அதிக தாகம், அடர்ந்த சிறுநீர் போன்ற உபாதைகள் காணும்.

* ஒரு நாளைக்கு இரண்டு முதல் மூன்று லிட்டர் தண்ணீர் எடுத்துக்கொள்ள வேண்டும்.

* சிறுநீரக பாதிப்பு உள்ளவர்கள் மருத்துவரின் அறிவுரைக்கேற்ப தண்ணீர் அளவு எடுத்து கொள்ள வேண்டும்.

* நீர் மட்டுமே அதிக அளவு எடுத்துக்கொள்வதை தவிர்த்து பழச்சாறு வகைகளையும் சேர்த்துக் கொள்ள வேண்டும். காபி, மதுபானம் உட்கொள்ளும்போது அவை சிறுநீர் அளவை அதிகரித்து உடலில் நீர் அளவை குறைக்கிறது. அதிக அளவு காபி உட்கொள்ளுவதை தவிர்க்க வேண்டும்.

* வெட்டிவேர் சேர்ந்த குடிநீர் எடுத்துக் கொள்ளலாம்.

* அதிக குளிர்ச்சி நிறைந்த பானம் எடுத்துக்கொள்ளும்போது அவை ரத்த நாளங்களை சுருங்க செய்வதால் குளிர்ச்சி நிறைந்த பானங்களை தவிர்க்க வேண்டும். மிதமான சூடு உள்ள நீரை பருகலாம். இவை ரத்த நாளங்களை விரிவடைய செய்யும் வியர்வையை வெளியேற்றி உடல் வெப்பநிலையை குறைக்கும்.

* மோர், இளநீர், எலுமிச்சை, பானகம், பழச்சாறு போன்றவற்றை சேர்க்கவும்.

நீர் மோர்- தயிரை நன்றாக கடைந்து வெண்ணெய் எடுத்தபின் தெளி நீருடன் உப்பு சேர்த்து நீர்மோராக பருக உடல் சூடு, வயிற்று வலி சரியாகும்.

பானகம்- பனை வெல்லம், இலவங்கபட்டை, ஏலக்காய், சுக்கு இவற்றை தண்ணீரில் கலந்து பானையில் தண்ணீரை ஊற்றி பயன்படுத்தவும். இதனால் உடலில் நீரிழப்பு தவிர்க்கப்படும்.

ரசாலா - தயிரை நன்றாக கடைந்து சர்க்கரை சேர்த்து அதில் மிளகுத்தூள் கலந்து பருகவும்.

பானக மஞ்சாசரா - உலர் திராட்சை, பேரிச்சம்பழம் சம அளவு ஏலக்காய், வாழை இலை, தண்ணீர் இவற்றை மண் பானையில் போட்டு புளிக்க வைத்து மறுநாள் வடிகட்டி பயன்படுத்தவும்.

பார்லி தண்ணீர் - பார்லியுடன் தண்ணீர் சேர்த்து கொதிக்க வைத்து அதனோடு தேன் மற்றும் எலுமிச்சை சாறு சேர்த்து குடிக்கவும். இதில் தாதுக்காரம், வைட்டமின்கள் உள்ளது. நீரிழப்பால் ஏற்பட்ட திரவங்களை இதன் மூலம் மீட்டெடுக்கலாம்.

ஓ.ஆர்.எஸ். கரைசல் - தண்ணீர் 4 கப், உப்பு ½ டீஸ்பூன், சர்க்கரை 6 டீஸ்பூன் இவை அனைத்தையும் ஒன்றாக கலந்து அவ்வப்போது குடித்து வர உடலின் உப்பு மற்றும் சர்க்கரை அளவை சரி செய்யும்.

எலுமிச்சை சாறு - இது நீரிழிவால் ஏற்படும் பொட்டாசியம், சோடியம் மற்றும் மெக்னீசியம் அளவு குறைப்பாட்டை சரி செய்யும்.

நீராகாரம்- நீராகாரத்தில் வைட்டமின்கள், தாதுக்கள், கால்சியம், மெக்னீசியம், பொட்டாசியம், சோடியம், இரும்பு சத்து, வைட்டமின் B காம்ப்ளக்ஸ் மற்றும் வைட்டமின் E போன்ற பல்வேறு சத்துக்கள் உள்ளதால் உடல் ஆரோக்கியத்திற்கு மட்டுமல்லாமல் முடி மற்றும் முக பராமரிப்பிற்கு பயன்படுத்தப்படுகிறது. நீராகாரத்துடன் சின்ன வெங்காயம், கிச்சிலி காய் மற்றும் நாரத்தை ஊறுகாய்களை சேர்த்து பருகும்போது உடல் சூட்டை தணிக்கும்.

கேழ்வரகு கூழ் - கேழ்வரகில் உடலுக்கு நன்மை தரும் அமினோ அமிலங்களும், கால்சியம், இரும்புச்சத்து, நியாசின், தையமின், ரிபோபிளவின் ஆகியவை உள்ளன. இதில் உள்ள கால்சியம் நம் எலும்பு, பற்கள் உறுதிக்கு உதவும். மோருடன் கலந்து இந்த கூழை அருந்தும்போது உடலை குளிர்ச்சியாக்கும். உடலுக்கு வலுவையும் தரும். உடல் எடையை குறைக்க நினைப்பவர்களுக்கு அருமருந்து. இதில் இருக்கும் நார்ச்சத்து நம் உடலில் கொலஸ்ட்ரால் அளவை குறைக்க உதவும்.

கம்பு கூழ் - கோடை காலங்களில் ஏற்படும் உடல் சூட்டால் முகம் மற்றும் அந்தரங்கப் பகுதியில் சீழ் கலந்த கட்டிகள் ஏற்படும். இந்த உடல் சூட்டை குறைப்பதற்கு கம்பு கூழை குடிக்கலாம். கம்பு உடலுக்கு தேவையான அனைத்து ஆற்றலையும் வழங்கும்.

வெந்தய நீர், கஞ்சி - வெந்தயத்தை வறுத்து நீருடன் கலந்து அருந்துவதன் மூலம் அல்லது வெந்தயம் ஊறிய குடிநீரை அருந்துவதன் மூலம் உடல் வெப்பத்தை குறைக்கலாம். வெந்தய கஞ்சி உட்கொள்வதன் மூலம் உடல் சூடு தணியும் மற்றும் ரத்த விருத்தி ஆகும்.

சீரகத் தண்ணீர் - சீரகத்தை நீரில் போட்டு காய்ச்சி குடிக்க இக்காலத்தில் அதிகரிக்கும் பித்தம் குறைந்து, பித்தத்தால் உண்டாகும் நோய்களான மூலநோய், பவுத்திரம், ஆசனவாயில் ஏற்படும் கட்டிகள், வேர்க்குரு, வயிற்றுப் புண்கள் ஏற்படுவதை தடுக்கலாம்.

* இரவில் கருப்பு உலர்ந்த திராட்சையை ஊறவைத்து காலை வெறும் வயிற்றில் சாப்பிட உடல் அனல் தணிந்து ரத்தம் சம்பந்தமான நோய்கள் வராமல் பாதுகாக்கலாம்.

மண்பானை நீர் - மண்பானையில் இயற்கையாகவே சில தாது உப்புக்கள் நிறைந்திருப்பதால் அதில் சேகரித்த நீரை பருகும்போது உடல் குளிர்ச்சி அடைந்து உப்புக்களின் சத்தும் நமக்கு கிடைக்கும். மண்பானையில் நீர் விட்டு அதில் வெட்டிவேர், நன்னாரி வேர் சேர்த்து பருக உடல் குளிர்ச்சி அடையும்.

ஆடைகள்: கோடை காலத்தில் மிக இறுக்கமான ஆடைகளை தவிர்த்து தளர்வான ஆடைகளை அணிய வேண்டும். கருப்பு மற்றும் பிற பிரகாசமான நிறங்கள் வெப்பத்தை கிரகிக்கும் தன்மை கொண்டதால் அவைகளை தவிர்த்து, வெள்ளை மற்றும் லேசான நிறங்களில் உடைகளை அணியலாம்.

* பருத்தி ஆடைகளை அணிவது சிறப்பு. பருத்தி உடையானது காற்றோட்டமாகவும், உடலை குளிர்ச்சியாகவும் வைத்துக்கொள்ள உதவும். பருத்தியில் உள்ள வைட்டமின், ஆன்டி ஆக்சிடென்ட், ஒமேகா-3 பேட்டி ஆசிட் சருமத்தை மிருதுவாகவும் அலர்ஜி போன்றவைகளில் இருந்து நம்மை காக்கும். பருத்தி உடைகள் உடலுக்கு குளிர்ச்சியை தந்து வியர்வையை உறிஞ்சி கொள்கிறது.

* உள்ளாடைகளும் பருத்தி உடைகளாக இருக்க வேண்டும். அவற்றை நல்ல வெயிலில் காயவைத்து உலர்த்தி பயன்படுத்த வேண்டும். குழந்தைகளுக்கு டயப்பர் போடுவதை இந்த கோடை காலத்தில் தவிர்ப்பது நல்லது.

ஜன்னல் திரை: வெயிலை சமாளிக்க வீடுகளில் மூங்கில் திரை பயன்படுத்தலாம். வெட்டிவேர் திரை காற்றை குளிர்விக்கும் தன்மை உடையது.

மெத்தை: கோரைப்பாய், பனை ஓலை பாய், பருத்தி மெத்தை பயன்படுத்தலாம். போம் மெத்தை தவிர்ப்பது நல்லது.

கோடைக்காலத்தில் பகல் தூக்கத்தை தவிர்த்தல் நல்லது. இரவில் கண்விழித்தல் கூடாது.

அஞ்சனம்: சித்த மருத்துவத்தில் குறிப்பிட்டுள்ள அஞ்சனம் (கண்மை தீட்டுதல்) பல நோய்களுக்கு தற்காப்பாக உள்ள ஒன்று. இதற்கு கரிசாலையால் செய்யப்பட்ட இயற்கையான மை சிறந்தது.

இயற்கை மருத்துவர் நந்தினி, 95006 76684

உடற்பயிற்சி:

* கடினமான உடற்பயிற்சி செய்வதை தவிர்க்க வேண்டும். அதிகாலையில் அல்லது மாலை நேரங்களில் பயிற்சி மேற்கொள்ள வேண்டும். உடற்பயிற்சி மேற்கொள்ளும்போது உடலில் உள்ள நீர் சத்து வெளியேறுவதால் அதற்கு ஏற்ப பானங்கள் உட்கொள்ள வேண்டும்.

* கோடை காலத்தில் எப்பொழுதும் ஏசி அறையில் அடைந்து கிடக்காமல் சிறிது நேரம் மர நிழல் அதிகமாக உள்ள இடங்களில் காலார நடப்பது, புங்கன் மர நிழலில் இளைப்பாறுவது இயற்கையாகவே நம் உடல் சூட்டை தணிக்கும்.

வேனில் கட்டி, பொடுகு தடுக்கும் முறை:

* உடலில் வெப்பம் அதிகரிப்பதால் பொதுவாக தலையில் கட்டி அல்லது பொடுகு ஏற்படுகிறது. அவற்றிற்கு சீரகம், பசும் பால், மிளகு இவற்றை அரைத்து தலையில் தேய்த்து குளிக்கவும்.

* இரவில் உறங்குவதற்கு முன்பு இரண்டு உள்ளங்கால்களில் பசு நெய் தடவி உறங்கவும். இதனால் உடலின் வறட்சி நிலை குறையும். வாரம் இரு முறை எண்ணெய் குளியல் எடுப்பதன் மூலம் வேனில் கட்டி பொடுகு வருவதை தடுக்கலாம். எண்ணெய் குளியல் செய்வதற்கு பசு நெய் அல்லது நல்லெண்ணெய் பயன்படுத்தலாம். மேலும் மா, நெல்லி இலைகள் ஊறிய நீரினை குளிப்பதற்கு பயன்படுத்தலாம். உடலை தேய்த்து குளிப்பதற்கு நலங்குமா பயன்படுத்தலாம்.

நலங்குமா பாசிப்பயிறு, வெட்டிவேர், சந்தனம், கோரைக்கிழங்கு, கிச்சிலிக் கிழங்கு, கார்போகி அரிசி, விலாமிச்சு வேர் சேர்த்து செய்யப்படுகிறது. வெட்டிவேர், விலாமிச்சு வேர், சந்தனம் இருப்பதால் உடலுக்கு நன்கு குளிர்ச்சி தருகிறது.

அது மட்டுமன்றி உடலின் வியர்வையின் மூலம் வரும் கற்றாழை நாற்றத்தை போக்கும். நன்னாரி, நுங்கு, இளநீர் போன்றவற்றை பருகுவதால் உடலுக்கு குளிர்ச்சி ஏற்பட்டு வேர்க்குரு வருவதை தடுக்கும்.

* உடலில் ஏற்படும் வேர்க்குருவிற்கு இளநீர் வழுக்கை, நுங்கு ஆகியவற்றை தோலில் பூசலாம்.

* தேங்காய் பால் தேய்த்து குளிக்கலாம். அதில் உள்ள எண்ணெய் பசை காரணமாக தோல் வறட்சி அடைவதை தடுக்கும்.

ஹீட் ஸ்ட்ரோக்:

* கோடை காலத்தில் உள்ள வெப்பத்தின் தாக்கத்தால் ஹீட் ஸ்ட்ரோக் ஏற்படுகிறது. உடல் வெப்பநிலை உயர்வு, குழப்பமான மனநிலை, வேர்வையில் மாற்றம், குமட்டல், வாந்தி, வேகமான இதய துடிப்பு, சருமம் நிறமாற்றம், தலைவலி போன்ற அறிகுறிகள் தோன்றும். இதனை தடுக்க வெப்பம் அதிகமாக இருக்கும் நேரங்களில் வெளியே செல்வதை தவிர்க்க வேண்டும். தளர்வான ஆடைகளை அணியலாம்.

அதிக அளவு நீர் சத்துள்ள பழம் உணவுகளை எடுத்துக் கொள்ளவும். சூரிய வெப்பத்தினால் தோலில் சிவப்பு நிற தடுப்புகள், கண்கள் சிவப்பு நிறமாதல், முகத்தில் சிவப்பு நிற தடுப்புகள் ஏற்படலாம். அவற்றை தடுக்க படிகார நீர் கொண்டு கண்களை கழுவ வேண்டும். கற்றாழை அல்லது சந்தன பூச்சிகளை தோல் மற்றும் முகத்தில் பூசலாம். மூக்கு துவாரங்கள் வறண்டு விடுவதால் ரத்தம் வழிய நேரிடும். அருகம்புல் சாறு குடிப்பதன் மூலம் மூக்கில் வடியும் ரத்தம் நிற்கும்.

கோடைகாலத்தில் குளிர்ச்சியை தக்க வைக்க விரும்பினால் உங்களுக்கு ஏற்றது ரோஜா குல்கந்து. இதில் இயற்கையாகவே கால்சியம் சத்து நிறைந்துள்ளது. இது இரைப்பை அழற்சி, தோல் பராமரிப்பு, அசீரணம், மன அழுத்தம் போன்றவைகளுக்கு நன்மை அளிக்கக் கூடியது. வெயில் காலத்தில் மூக்கில் இருந்து ரத்தம் வடிதல், தலைச்சுற்றல் போன்றவற்றை சரி செய்யும். குழந்தைகளுக்கு வெயில் நேரத்தில் வயிற்று வலி பிரச்சனை வராமல் இருக்க குழந்தையின் தொப்புளில் விளக்கெண்ணெய் தடவி வரலாம். இதனை பெரியவர்களும் பின்பற்றலாம்.

* இவ்வழிமுறைகளை பின்பற்ற கோடை காலத்தில் வரும் நோய்களை தவிர்த்து நலம் பெறலாம்.

கும்பகோணத்தில் இருந்து 9 கிலோ மீட்டர் தொலைவில் உள்ள வலங்கைமானில் மாரியம்மன் ஆலயம் உள்ளது. நீடாமங்கலம் செல்லும் சாலை ஓரத்திலேயே இந்த ஆலயம் அமைந்து இருக்கிறது. இந்த ஆலயத்தில் தமிழகத்தில் எங்கும் இல்லாத வகையில் வித்தியாசமான ஒரு வழிபாடு நடத்தப்படுகிறது.

அதாவது இந்த அம்மனிடம் வேண்டிக்கொண்டு பலன் பெறுபவர்கள் பாடையில் படுத்து வித்தியாசமான முறையில் அம்மனுக்கு நன்றி செலுத்துகிறார்கள். இதனால் இந்த அம்மனுக்கு பாடைக்கட்டி அம்மன் என்ற பெயர் வந்தது.

இந்த அம்மன் உருவான வரலாறு வித்தியாசமானது. அதை தெரிந்துக்கொண்டால் கும்பகோணம் யாத்திரை செல்பவர்கள் நிச்சயம் இந்த ஆலயத்துக்கு சென்று வருவார்கள். இந்த ஆலய வரலாறு வருமாறு:-

வலங்கைமானில் சுமார் இருநூறு ஆண்டுகளுக்கு முன்னர் காதக்கவுண்டர், கோவிந்தம்மாள் என்ற தம்பதியர் வாழ்ந்து வந்தனர். எல்லா செல்வங்களும் பெற்றிருந்தாலும் கொஞ்சி விளையாட ஒரு குழந்தை இல்லையே என்பது மட்டுமே இந்தத் தம்பதிகளின் ஒரே குறையாக இருந்து வந்தது.

வலங்கைமானுக்குத் தெற்கில் உள்ள புங்கஞ்சேரி என்னும் கிராமத்தில்தான் கோவிந்தம்மாள் தினமும் சென்று வியாபாரம் செய்வது வாடிக்கை. வழக்கம் போல ஒரு வெள்ளிக்கிழமை கோவிந்தம்மாள் வியாபாரம் முடிந்து அந்த ஊர்க்குளத்தில் குளித்து விட்டுக் கரையேறியபோது குழந்தை அழும் குரல் கேட்டு அதிர்ச்சி அடைந்தாள். சத்தம் எங்கு இருந்து வருகிறது என்று பார்த்தாள். ஐயனார் கோவில் வாசலில் ஒரு குழந்தை அழும் குரல் கேட்பதை அறிந்தாள். அந்த குழந்தை சத்தம் வந்த திசை நோக்கி ஓடினாள். ஊர்க்காரர்களும் ஓடி வந்தனர்.

அழுது கொண்டிருந்த குழந்தையை கோவிந்தம்மாள் வாரி எடுத்தாள். உடனே அழுகையை நிறுத்திய அந்தப் பெண் குழந்தை, அவளைப் பார்த்துச் சிரித்தது. குழந்தையைக் கொண்டு வந்து அங்கு விட்டுச் சென்றது யார் என்று யாருக்கும் தெரியவில்லை. ஊரார் அனைவரும் சேர்ந்து அந்த குழந்தையை விட்டவர்களைத் தேடிப் பார்த்தனர். யாரும் தென்படவில்லை. அதன் அழகில் மயங்கினர் ஊர்க்காரர்கள்.

இறுதியில் குழந்தையை ஊர் நாட்டாண்மைக்காரரே எடுத்து வளர்க்க வேண்டும் என்று முடிவு எடுக்கப்பட்டது. அந்தக் குழந்தையை வளர்க்கும் பொறுப்பு தனக்கே கிடைக்கும் என்று எதிர்பார்த்த கோவிந்தம்மாளுக்கு இது கடும் ஏமாற்றத்தைக் கொடுத்தது. அவளுக்கு ஏற்பட்ட வருத்தமும், ஏக்கமும் வார்த்தைகளால் சொல்லி மாளாது.

இந்த சம்பவத்துக்கு பிறகு புங்கஞ்சேரியில் கோழிகளும், ஆடு மாடுகளும் மர்மமான முறையில் இறக்கத் தொடங்கின. ஊர் மக்கள் பலருக்கு அம்மை போட்டது.

ஐயனார் கோவிலில் கிடைக்கப்பெற்ற அந்தப் பெண் குழந்தைக்கும் அம்மை நோய் வார்த்து விட்டது. அப்போது ஊர்க்காரர் ஒருவர் மீது அருள் வந்து, அந்தப் பெண் குழந்தையை கோவிந்தம்மாளிடம் கொடுத்துவிட வேண்டும்... அப்போது தான் ஊர் நலம் பெறும் என்ற வாக்கு வெளிப்பட்டது.

இதனால் ஊர்க்காரர்கள் பயந்து போனார்கள். குழந்தையால் எந்த கெட்டதும் நடந்து விடக் கூடாதே என்று நினைத்தனர். எனவே அந்த குழந்தையை கோவிந்தம்மாளிடம் ஒப்படைக்க முடிவு செய்தனர்.

அதன்படி அந்த குழந்தை கோவிந்தம்மாளிடம் ஒப்படைக்கப்பட்டது. சீதளா என அதற்குப் பெயரிட்டு கோவிந்தம்மாள் அகமகிழ்ந்தாள், ஆனால் கடுமையான அம்மை நோய் காரணமாக, மூன்றாம் நாளே அந்தக் குழந்தை இறந்து விட்டது. ஆறாத் துயரமடைந்த கோவிந்தம்மாளும் அவள் கணவரும் இறுதிச் சடங்குகளைச் செய்து, குழந்தையின் உடலைத் தம் வீட்டு பின்புறத்தில் அடக்கம் செய்து விட்டனர்.

அதன் பின்னர்தான் அந்த அதிசயம் நிகழ்ந்தது குடமுருட்டி ஆற்றில் நீராடிவிட்டு வருவோரில் சிலர் கோவிந்தம்மாள் வீட்டு பின்புறத்தின் அருகே வந்தபோது, அவர்களில் ஒருவர் மீது அருள் வந்து, "நான் குழந்தை வடிவில் வந்த மாரியம்மன். எனக்கு உடல் இல்லையே தவிர உயிர் உள்ளது. என்னை வழிபடுவோர்க்கு அருள் புரிவேன்" என்று குழந்தை சீதளா சொன்னாள்.

அதன்படி குழந்தையை சமாதி செய்த இடத்தில் கீற்றுக்கொட்டகை போடப்பட்டது. அங்கு தினமும் மக்கள் வழிபடத் தொடங்கினர். இதனால் அந்த இடத்தில் கோவிலும் எழுப்பப்பட்டது. சீதளாதேவி மகாமாரியம்மன் கோவிலாகப் பெயர் கொண்டு வரம் தரும் தெய்வமான அன்னை பராசக்தி அங்கே விளங்கலானாள்.

உடல் இன்றிப் போனாலும் உயிரோடு உள்ளேன்' என்று அம்மன் அருள்வாக்கு வழங்கியதால் இந்த அம்மனிடம் குறைதீர்க்கக் கோரி வரும் பக்தர்கள், தம் உடலையே காணிக்கையாக அளிக்கும் பாடைக்காவடி பிரார்த்தனையை நிறைவேற்ற ஆரம்பித்தனர். இதனை, 'பாடைக்கட்டித் திருவிழா' என்றும் சொல்கிறார்கள். ஒவ்வொரு ஆண்டும் பங்குனி மாதத்தில் இந்த விழா நடைபெறும். அன்னை பராசக்தியே உலகின் வெப்பம் நீக்கி உயிர்களைக் காக்கும் மழையைப் பொழிய வைக்கும் மாரியம்மனாக இங்கு தோற்றம் கொண்டிருக்கிறாள்.

வலங்கைமான வளம் செறிந்த ஊர். குடமுருட்டி ஆற்றின் தென்திசையில் உள்ளது. ஊரின் ஈசான்ய திசையில் மகா மாரியம்மன் திருக்கோவில் அமைந்துள்ளது. ஆலய முகப்பின் முன் மண்டபம் அடைப்புச் சுவர் ஏதுமின்றி திறந்த அரங்கமாக அமைந்து உள்ளது. பக்தர்கள் பகலில் ஓய்வெடுக்கவும், இரவில் தங்கவும் வசதியாகக் கட்டப்பட்டுள்ள இந்த மண்டபத்தின் தூண்களில் அஷ்ட லட்சுமிகளின் சுதைச் சிற்பங்கள் உள்ளன. தலவிருட்சமாக வேல்பி மரம் கோவிலின் பின்னால் அமைந்து உள்ளது.

முன்மண்டபத்தைக் கடந்து உள்ளே சென்றால் மகா மண்டபம். இதன் தென்புறத்தில் விநாயகர் எழுந்தருளியுள்ளார். வடபுறத்தில் இருளன், பேச்சியம்மன், வீரன், வீரனின் தேவியர் இருவர் என கிராம தேவதைகள் சுருங்கல் திருவுருவங்களாக அருள்கின்றனர், முன்மண்டபத்தை அடுத்து அம்மன் துலங்கும் அர்த்த மண்டபம் உள்ளது. இதையடுத்து பிரதானமான கருவறை இருக்கிறது. கருவறையில் மின்னும் விளக்கொளியில் மகாமாரியம்மன் அமர்ந்த நிலையில் கொலுவிருக்கிறாள்.

நான்கு திருக்கரங்கள் கொண்ட இத்தேவி வலது மேற்கரத்தில் உடுக்கையும், இடது மேற்கரத்தில் சூலமும், வலது கீழ்க்கரத்தில் கத்தியும், இடது கீழ்க்கரத்தில் கபாலமும் தாங்கி அருள்கிறாள். இடது காலை மடித்து, வலது காலைத் தொங்க விட்டு அன்னை வீர சிம்மாசனத்தில் அமர்ந்துள்ளாள். இரு தோள்களின் மீதும் இரு நாகங்கள் உள்ளன. அன்னையின் முகத்தில் மாறாத புன்னகை தவழ்கிறது. எத்தனை முறை பார்த்து வழிபட்டாலும் அதில் சலிப்பே வராது. எத்தனையோ உயிர்களை மீட்டுத் தந்த அம்மன் என்பதால் அவள் முன்னிலையில் நிற்கும்போது நம் நோய், நொடி, குறைகள் எல்லாம் நம்மை விட்டு உருகி ஓடுவதை சிலிர்ப்புடன் உணர முடியும். ஏராளமான பக்தர்கள் இதை அனுபவப்பூர்வமாக உணர்ந்துள்ளனர்.

பங்குனி மற்றும் ஆவணி மாதங்களில் 2 தடவை இந்த ஆலயத்தில் பாடை கட்டும் திருவிழா நடத்தப்படுகிறது. பங்குனி மாதம் முதல் ஞாயிறன்று திருவிழா தொடங்கி, ஒன்பது நாட்களுக்கு நடைபெறுகிறது. எட்டாம் நாளான அடுத்த ஞாயிறன்று பாடைகட்டித் திருவிழா நடைபெறும். இந்தத் திருவிழாவின்போது வலங்கைமானே மக்கள் வெள்ளத்தில் மூழ்கி விடும். அன்று தமிழ்நாடு முழுவதிலும் இருந்து பக்தர்கள் அங்கு திரண்டு வருவார்கள்.

இத்திருத்தலத்தின் மகிமையே பாடைக்காவடித் திருவிழாதான். மருத்துவரால் கைவிடப்பட்டு எந்த பக்தன் அன்னையிடம் 'எனக்கு உயிர்ப்பிச்சை தா. உனக்கு பாடைக்காவடி எடுக்கிறேன்' என்று வேண்டிக் கொள்கிறானோ, அவனுக்கு உயிர்ப்பிச்சை அளித்து நல்வழியில் வாழ வைக்கிறாள் அன்னை. வேண்டுதல் நிறைவேறிய பிறகு, பக்தர்கள் இங்கு வந்து பாடைக்காவடி எடுத்துத் தங்களின் நேர்த்திக் கடனைச் செலுத்துகிறார்கள்.

பாடைக்காவடி எடுக்க இருக்கும் பக்தர்கள் ஒரு வாரம் அல்லது இரு வாரங்கள் அன்னையை வேண்டி விரதம் இருப்பர்.

காவடி எடுக்கும் நாளன்று, ஒருவர் இறந்தால் எவ்வாறு அவருக்குப் பாடை கட்டி இறுதிச் சடங்கு செய்கிறோமோ அதுபோல நேர்த்திக்கடன் செலுத்தும் பக்தரை ஆற்றில் குளிக்க வைத்து, பாடையில் படுக்கச் செய்து, அவரை நான்கு பேர் தூக்கிக் கொண்டு திருக்கோவிலை மூன்று முறை வலம் வருவர். பின் கோவிலின் முகப்பில் பாடையை இறக்குவர்.

கோவிலில் பூசாரி வேண்டிக்கொண்டு பிணம் போலக் கிடக்கும் பக்தர் மேல் அபிஷேக நீர் தெளித்து அன்னையின் பிரசாதமான விபூதியைப் பூசி அவரை எழச் செய்வார். இதனாலேயே மக்கள் அன்னையை 'பாடைக்காவடி மாரியம்மன்' என்றும் போற்றுகின்றனர்.

ஆலயம் காலை 6 மணி முதல் மதியம் 1 மணி வரையும், மாலை 4 மணி முதல் இரவு 9 மணி வரையும் திறந்திருக்கும்.

'முதியோர் நலனில் சித்த மருத்துவம்' என்ற நலத்திற்கான பயணத்தில் கிட்டத்தட்ட ஒரு வருடம் நெருங்கிவிட்டது. அநேகமாக பல்வேறு முக்கிய நோய்நிலைகளைப் பற்றியும், அதற்கான தீர்வுகளைப் பற்றியும் குறிப்பிட்டு எழுதியது முதுமையில் பலருக்கும் பயனுள்ளதாக இருந்திருக்கும். இருப்பினும் முதுமையில் நலமாய் வாழ முடியுமா? என்ற ஐயப்பாடு பலருக்கு உண்டு.

முதுமை என்பது எண்ணற்ற மாற்றங்களும், சவால்களும் நிறைந்தது. அத்தகைய மாற்றங்கள் மற்றும் சவால்களை கடந்து ஆரோக்கியத்தை உறுதியாக்க வேண்டியது முதுமைக்கு அத்தியாவசியமான ஒன்று. ஆரோக்கியம் என்பது உடலளவில் மட்டுமல்லாது மனதளவிலும் இருக்க வேண்டியது முதுமைக்கு மட்டுமல்ல அனைத்து வயதினருக்கும் பொதுவானதே. அத்தகைய ஆரோக்கியம் முதுமைக்கு கூடுதல் சவாலாக உள்ளது.

முதுமையில் சிலருக்கு பல்வேறு உடல் வியாதிகள். சிலருக்கு ஒரு சில நோய்நிலைகள் மட்டுமே. ஏன் இவ்வளவு மாற்றம்? முதுமை அனைவருக்கும் பொதுவானதாக இருந்தாலும் துன்பங்களும், துயரங்களும் நபருக்கு நபர் மாறுபடுகிறது என்ற எண்ணம் பலருக்கு உண்டு.

இது எனக்கு மட்டும் ஏன் ஏற்பட்டது? என்று புலம்பும் சூழலும் உண்டாகிவிடும். முதுமையில் நோய்கள் என்பது சாதாரணம் தான். நோய்நிலைகள் எவ்வாறு இருப்பினும், எதையும் தாங்கும் மன தைரியம் முதுமையில் இருந்தால், வாழும் வரை ஆரோக்கியமாக வாழலாம்.

முதுமையில் நலமாய் வாழ, சில வழிமுறைகளை தெரிந்துகொள்வது மிக மிக அவசியம். அதன்படி முதலில் நோய் பாதிப்புள்ளவர்கள் தங்களுக்கான மருந்துகளை பட்டியலிட்டு அவ்வப்போது மருத்துவர் ஆலோசனைப்படி எடுத்துக்கொள்ள வேண்டும்.

மருந்துகளை ஒரு போதும் தவற விடக்கூடாது. அதிலும் குறிப்பாக சர்க்கரை நோய், இதய நோய், ரத்த அழுத்தம் சார்ந்த மருந்துகளை மறவாமல் எடுத்துக்கொள்வது அவசியம். 'நோய் வந்தது வந்துவிட்டது, பிறகு என்ன ஒரு கை பார்த்துவிடலாம்' என்ற மனதிடம் அவசியம் வேண்டும். நோய் வந்து விட்டதே என்று அதையே எண்ணி புலம்புவதால் கெடப்போவது தனது ஆரோக்கியம் தான் என்பதை உணர வேண்டும்.

முதுமையில் நோயால் பாதிக்கப்படுவது என்பது சாதாரணம் என்ற எண்ணமும், மருந்து மாத்திரைகளை எடுத்துக்கொண்டால் சரியாகி விடும் என்ற எண்ணமும் உருவாக வேண்டும். சில சமயங்களில் தொடர்ச்சியான மருத்துவப் பரிசோதனைகளும், மருந்து மாத்திரைகளும் மன சலிப்பை உண்டாக்கக்கூடும். இருப்பினும் அதை அனைத்தையும் புறந்தள்ளி வாழ்க்கையில் தன்னம்பிக்கை நடைப்பயணத்தை தொடர வேண்டும். அவ்வப்போது நடைப்பயிற்சியும், தியானப்பயிற்சியும், யோகாசனப்பயிற்சியும் முதுமையின் தன்னம்பிக்கையை கூட்ட உதவும்.

முதுமையில் பல்வேறு மருந்துகளை எடுத்துக்கொண்டிருக்கும் சூழலில், சித்த மருந்துகளை தாங்கள் ஏற்கனவே எடுத்துக்கொள்ளும் மருந்து மாத்திரைகளுடன் சேர்த்து எடுத்துக்கொள்ளலாமா? என்ற ஐயப்பாடும் பலருக்கு ஏற்படும். அந்த ஐயத்தைப் போக்க எடுத்துக்கொள்ளும் மருந்து மாத்திரைகளை சித்த மருத்துவரிடம் காட்டி ஆலோசனைப் பெற்று எடுத்துக்கொள்வதும் நல்லது.

முக்கியமாக தலைவலி, உடல் வலி, மூட்டு வலி போன்ற தொந்தரவுகளுக்கு முதுமையில் பலர் தாங்களாகவே மருந்துகளை எடுத்துக்கொள்ளும் நிலை உள்ளது. ஆனால் மருத்துவர் ஆலோசனை இல்லாமல் மாத்திரைகளை எடுத்துக்கொள்ளக் கூடாது. இச்செயல் முதுமையில் செயல் குறைந்த முக்கிய உள்ளுறுப்புகளை மேலும் பாதிக்கும்.

சித்த மருந்துகளில் சில மருந்துகளை முதியோர்கள் அனைவரும் கைவசம் வைத்துக்கொள்வது நல்லது. அமுக்கரா கிழங்கு சூரணம், திரிபலை சூரணம், திரிகடுகு சூரணம், தாளிசாதி சூரணம், நிலாவாரை சூரணம், ஏலாதி சூரணம், பிண்ட தைலம், அருகன் தைலம் ஆகியன அவற்றில் சில. மேற்கூறிய மருந்துகளை சாதாரண உடல் உபாதைகளுக்கு எடுத்துக்கொள்ளலாம்.

கை, கால், மூட்டு, உடல், முதுகுத்தண்டுவட வலிகளுக்கு அமுக்கரா சூரண மருந்தை பாலில் கலந்து எடுக்கலாம். இது தூக்கமின்மை நிலையிலும் பலன் தரும். திரிபலா சூரணத்தை ஐம்பது வயதைக் கடக்கும் அனைவரும் எடுத்துக்கொள்ள பழக வேண்டும். இரவில் திரிபலா சூரணத்தை வெந்நீரில் கலந்து எடுத்துக்கொள்வது ஐம்பது வயதுக்கு பின்னர் வரும் பெரும்பாலான நோய்நிலைகளில் பலன் தரும். அதோடு என்றும் பதினாறு மார்கண்டேயனைப் போல் இருக்க வழிவகை செய்யும். சாதாரண சுவாசப்பாதை தொற்றுக்கு ஆன்டிபயாட்டிக் மருந்துகளை நாடுவதைக் குறைத்து திரிகடுகு சூரணம், தாளிசாதி சூரணம் ஆகிய மருந்துகளை நாடலாம். இவற்றில் ஒன்றை தேனில் கலந்து எடுத்துக்கொள்ளலாம். ஒரு வாரம் தொடர்ந்து ஆன்டி பயாட்டிக் மருந்துகளை எடுத்துக்கொள்வதால் பாதிக்கப்படும் குடல் மீண்டும் சீராக ஒரு ஆண்டு கூட ஆகலாம் என்கின்றன நவீன அறிவியல் ஆய்வுகள். ஆகவே ஆன்டிபயாட்டிக் மருந்துகள் பயன்பாட்டைக் குறைப்பது நல்லது.

அத்துடன் இருமல், சளி தொந்தரவுக்கு ஆடாதோடை மணப்பாகும், பித்தம் கூடின வெயில் காலத்தில் மாதுளை மணப்பாகும், நன்னாரி மணப்பாகும் நற்பலன் தரும். மலச்சிக்கல் தீரவும், குடல் சுத்தம் பேணவும் அவ்வப்போது நிலாவாரை சூரணம் இரவில் வெந்நீரில் கலந்து எடுக்கலாம். இது இன்ன பிற நோய்நிலைகளையும் தடுக்க உதவும்.

சித்த மருத்துவத்தில் சொல்லப்பட்டுள்ள எளிய மருந்துகளை நாடுவதால், தேவையின்றி ஏற்படும் மருந்துகளின் பக்கவிளைவுகளை குறைக்க முடியும். இதுவும் ஒருவகையில் ஆயுளை நீட்டிக்க உதவும். அஞ்சறைப்பெட்டி சரக்குகளையும் மருத்துவர் ஆலோசனைப்படி மருந்தாய் பயன்படுத்துவது நல்லது.

உணவைக் குறைப்பது முதுமைக்கு நல்லது. மூன்று வேளை உண்பவன் ரோகி (நோயாளி) என்பதால் முதுமையில் உணவைக் குறைத்து உடல் எடையை பேணிக்காப்பது நோய்களை வராமல் தடுக்கும் எளிய யுக்தி முறை.

தேரையர் சித்தர் கூறும் பிணியணுகாமல் தடுக்கும் விதிமுறைகளை கடைபிடித்து வருவது முதுமைக்கு நல்லது. "நீர் சுருக்கி, மோர் பெருக்கி, நெய் உருக்கி உண்பவர் தம் பேருரைக்கிற் போமே பிணி" என்கிறது தேரையர் சித்தரின் பாடல். அதன்படி எக்காலத்தும் குடிக்கும் நீரை கொதிக்க வைத்து ஆற வைத்து குடித்து வருவதும், அன்றாட உணவில் நெய் சேர்த்து வருவதும், மோரினை நீர் அதிகம் சேர்த்து பயன்படுத்துவதும் உடலுக்கு நல்லது.

மேலும் அதில் கருணைக்கிழங்கை தவிர பிற கிழங்குகளை தவிர்ப்பது நல்லது என்றும் கூறப்பட்டுள்ளது. ஏனெனில் பிற கிழங்குகள் சர்க்கரை சத்து அதிகம் உள்ளதாகவும், வாதத்தைக் கூட்டி எல்லா நோய்நிலைகளையும் அதிகரிப்பதாகவும் உள்ளது குறிப்பிடத்தக்கது. இவற்றை கடைபிடிக்கும் இடத்தில் எமனுக்கு வேலை இல்லை என்கிறது தேரையர் சித்தரின் பாடல் வரிகள். எனவே முதுமையில் ஆயுளை நீட்டிக்க அனைவரும் இவற்றை பின்பற்ற வேண்டும்.

சரியான உணவு, பசித்த பின் புசித்தல், அத்துடன் மருந்து மாத்திரைகள், அளவான தூக்கம், அவ்வப்போது உடற்பயிற்சி மற்றும் மனப்பயிற்சி இவையே முதுமைக்கு அத்தியாவசியம். இவற்றை பின்பற்றுவது முதுமையின் ஆயுளுக்கு பக்க பலம். 

சிரிப்பு, தூக்கம் , மன மகிழ்ச்சி இவை மூன்றும் முதுமைக்கு மிகவும் அவசியம். இவற்றை யாருக்காகவும் விட்டுத்தராமல் இருப்பது நல்லது. நல்ல தூக்கமே ஒரு வகையில் புத்துணர்ச்சியோடு மன மகிழ்ச்சி தரும். மதிய நேரத்தில் சற்று ஓய்வு, இரவு நேரங்களில் குறைந்தது 7 மணிநேரம் ஆழ்ந்த தூக்கம் பல வியாதிகளை ஓட்ட உதவும். இவை இரண்டும் இல்லாவிட்டால் மருத்துவமனை வாசலை தேடி ஓட வேண்டி இருக்கும். ஆக, எவையெல்லாம் முதுமைக்கு அவசியம் என்பதை பட்டியலிட்டு பின்பற்றுவது சிறந்தது.

இவ்வாறு ஆரோக்கியத்திற்கான பாதையில் தான் நடப்பதோடு மட்டுமின்றி, அடுத்த தலைமுறைக்கு வழிகாட்டுதலும் முதுமைக்கான கூடுதல் பொறுப்பு. ஆகவே தனது வாழ்க்கை அனுபவங்களையும், சமூக பொறுப்புகளையும், ஆரோக்கியத்துடன் சேர்த்து அடுத்த தலைமுறைக்கு கொண்டு சேர்ப்பது முதுமையின் கடமை. தன் காலம் முடிந்து விட்டது, இனி நம்மால் எந்த பயனும் இல்லை என்று தங்களாவே நினைத்துக்கொண்டு மனம் உடைவது சரியல்ல. ஏனெனில் முதியவர்கள் நாட்டின் வளர்ச்சிக்கு மிகப்பெரும் தூண்கள். ஆகவே முதுமையை பாரமாய் நினைக்காமல் முதியோர்களை அடுத்த தலைமுறையினரின் வழிகாட்டியாய் நினைத்து பாவித்து அவர்களின் அத்தியாவசிய தேவைகளை பூர்த்தி செய்வது சமூகத்தின் கடமை.

மருத்துவர் சோ.தில்லைவாணன், 8056040768

சுருக்கமாக, முதுமையில் நாட்பட்ட நோய்களை நிர்வகிப்பது, அதற்கான மருந்துகளை கையாள்வது, அடுத்து வரப்போகும் நோய்களை தடுப்பது, வாழ்வியல் முறை ஆதரவு, முற்றிலும் இயலாத நிலையில் பிறரின் உதவி, ஆகிய ஐந்தும் மிக மிக அவசியமாகின்றன.

முடிவாக "வீடு வரை உறவு, வீதி வரை மனைவி" ஆகிய தத்துவப் பாடல்களை எல்லாம் முதுமையில் ஓரம்கட்டிவிட்டு, "இளமை எனும் பூங்காற்று" எனும் பாடலை மனதில் நிறுத்தி, மன தைரியத்துடன் அன்பினை கைகோர்த்து, அக்கறையோடு பெயரன் பெயர்த்திகளோடு கொஞ்சி விளையாடி, நண்பர்களுடன் பேசி மகிழ்ந்து, மனதிற்கு இதமான பழங்கால நினைவுகளோடு நாட்களைக் கழித்தால், முதுமையில் இளமையோடு நலமாய் வாழ முடியும். முதுமை என்பது சாபம் அல்ல. முதுமை என்பது நிச்சயம் வரம் தான்.

-முற்றும்-

தொடர்புக்கு:

drthillai.mdsiddha@gmail.com

என்ன வீட்டை பத்திரமா பூட்டியாச்சா?

வீட்டை விட்டு வெளியூர் செல்லும் போது குடும்ப உறுப்பினர்கள் ஒருவருக்கொருவர் உறுதி செய்து கொள்வது "வீட்டை நல்லா பூட்டியாச்சா?", கோத்ரெஜ் பூட்டு தானே? என்பது தான்!

பாடுபட்டு உழைத்து நகைகளை வாங்கி திருமணம் நடத்தத் தயாராக இருக்கும் குடும்பத்தினர், "நகையெல்லாம் பத்திரமா ?", கோத்ரெஜ் லாக்கரில் தானே வச்சிருக்கே?" என்று கேட்கும் போது, பெருமையுடன் பதில் இப்படி வரும்: "கவலையே பட வேண்டாம். கோத்ரெஜ் லாக்கர் தான், சுவரோடு பதிக்கப்பட்டது, யாரும் தூக்கிக் கொண்டு போக மூடியாது. டிஜிடல் லாக் கொண்டது" என்று பதில் வரும்.

ஆம். நமது சொத்துக்களையும் பத்திரங்களையும் விலை உயர்ந்ததாக நாம் கருதுவதையும் பத்திரமாகப் பாதுகாப்பது கோத்ரெஜ் நிறுவனத்தின் தயாரிப்புகளே.

இதை நிறுவியவர் வணிக நிறுவனத்தில் உயர்ந்த நெறிகளைக் கடைப்பிடிக்க வேண்டும் என்ற உயரிய கோட்பாட்டைக் கொண்ட சிறந்த தேசபக்தி கொண்ட தேசபக்தரான அர்தேஷிர் கோத்ரெஜ் ஆவார்.

பிறப்பும் இளமையும்: பாரம்பரியம் மிக்க பார்சி குடும்பத்தில் 1868-ம் ஆண்டு புரி

யோர்ஜிக்கும் தோஷிபாய் கூத்தராஜிக்கும் ஆறு குழந்தைகளில் முதலாவதாகப் பிறந்தார் அர்தேஷிர் கோத்ரெஜ். அவரது தந்தையார் வீடு, நில உடமைகளை விற்கும் தொழிலில் ஈடுபட்டிருந்தார். 1871-ல் அவர் குடும்பப் பெயரை கோத்ரெஜ் என்று மாற்றிக் கொண்டார்.

திருமணமும் பேரிழப்பும்: 1890-ல் பதினெட்டே வயதான ஆர்தேஷிருக்கும் பச்சுபாய் என்பவருக்கும் திருமணம் நடந்தது. ஆனால் திருமணத்தைத் தொடர்ந்து ஒரு பெரிய சோக நிகழ்வு அவர் வாழ்வில் நடைபெற்றது.

1891, ஏப்ரல் மாதம் 25-ம் நாள் பச்சுபாயும் அவரது நெருங்கிய உறவினரான பிரோஜ்பாய் ஷொராப்ஜி கம்டினும் ராஜாபாயும் கோபுரத்தில் ஏறிப் பார்ப்பது என்று தீர்மானித்தனர். அந்த கோபுரம் 279 அடி உயரம் கொண்ட பெரிய கோபுரம். அதில் இருவரும் ஏறி உச்சிக்குச் சென்ற போது இரண்டு பொல்லாத போக்கிரிகளான அழகிகள் அவர்களை அணுகி தவறாக நடக்க முயற்சித்தனர். உடனே இருவரும் அந்த கோபுரத்தில் இருந்து கீழே குதித்தனர். மரணமடைந்தனர். இது பெரிய அதிர்ச்சியையும் இழப்பையும் அர்தேஷிர் கோத்ரெஜுக்குத் தந்தது. தன் வாழ்நாள் முழுவதும் அவர் மறுமணம் செய்து கொள்ளவே இல்லை.

வக்கீல் படிப்பு: 1894-ல் வக்கீல் படிப்பை முடித்த அவருக்கு நல்ல கேஸ்கள் வந்தன. ஜான்ஜிபாரில் ஒருவருக்கு வக்காலத்து வாங்க ஒத்துக்கொண்ட கோத்ரெஜ் அந்த கேசில் உண்மைக்கு அல்லாதவற்றைச் சொல்ல வேண்டிய நிர்பந்தத்திற்கு உள்ளானார். இது அவருக்குப் பிடிக்கவில்லை. தனது மனசாட்சியின் படி நடந்து கொள்ளத் தீர்மானித்த அவர் கேசிலிருந்து விலகினார். "கேசில் எனது பக்கத்தை மட்டும் நான் பார்க்கவில்லை, இரண்டு பக்க உண்மைகளையும் பார்த்தேன், விலகினேன்" என்று பின்னால் அவர் கூறினார்.

மருந்து தயாரிப்புகள்: அடுத்து என்ன செய்வது? மெர்வான்ஜி முன்செஞ்சர்ஜி என்பவர் ஒரு சிறந்த வணிகர். அவரிடம் சென்று கோத்ரெஜ் தொழில் தொடங்க 3000ரூபாய் கடனாகக் கேட்டார். இதனால் வியந்து போன அவர் எதற்காக என்று கேட்டார். சர்ஜிகல் கருவிகள் செய்வதற்காக என்று பதில் வந்தது. "இதை உங்கள் தந்தையாரே சந்தோஷமாகத் தருவாரே, என்னிடம் எதற்கு வர வேண்டும்" என்று வியப்புடன் அவர் கேட்டார்.

"என் தந்தையாரிடம் நான் கேட்டால் அவர் அதை இனாமாகத் தந்து விடுவார். எனக்குத் திருப்பிக் கொடுக்கும்படியான கடன் தான் வேண்டும்" என்றார் கோத்ரெஜ்..

மனம் மகிழ்ந்த மெர்வான்ஜி 3000 ரூபாயைக் கொடுத்தார். மருத்துவக் கருவிகளைத் தயாரிக்க ஆரம்பித்தார் கோத்ரெஜ். தயாரிப்புகள் தரத்துடன் பிரமாதமாக அமைந்தன. அவர் தான் வேலை பார்த்த கம்பெனி உரிமையாளரிடம் அவற்றைக் காட்டவே அவர் பிரமித்தார். ஆனால் அவர், "இதை 'மேட் இன் இண்டியா' என்று போடக் கூடாது என்று நிபந்தனை விதித்தார்.

இதை உடனே மறுத்த தேசபக்தரான கோத்ரெஜ் இந்தத் தொழிலே வேண்டாம் என்ற முடிவுக்கு வந்தார். அடுத்து என்ன செய்வது என்ற யோசனையில் அவர் ஆழ்ந்தார்.

போலீஸ் கமிஷனரின் அறிவிப்பு: அப்போது பம்பாய் போலீஸ் கமிஷனர் ஒரு அறிவிப்பை வெளியிட்டிருந்தார். ஏராளமான வீடுகளில் பூட்டுகள் உடைக்கப்பட்டு திருட்டுப் போகின்றன. நல்ல பாதுகாப்பை அளிக்க அனைவரும் உதவி செய்ய வேண்டும் என்பதே அவர் அறிவிப்பு.

சிந்தனையில் ஆழ்ந்தார் கோத்ரெஜ்: நேராக மெர்வான்ஜியிடம் சென்றார். தனக்கு நல்ல பாதுகாப்பான பூட்டைத் தயாரிக்க வேண்டும் என்ற எண்ணம் தோன்றியிருப்பதாகக் கூறினார்.

ச.நாகராஜன்

'இதற்கு முன்னர் யாருமே பூட்டு செய்யவில்லையா என்ன?' என்று கேட்டார் மெர்வான்ஜி.

அதற்கு பதிலாக, "நான் சிறந்த நல்ல பூட்டைச் செய்ய வேண்டும் என்று நினைக்கிறேன்" என்றார் அவர்.

உடனே தேவையான பண உதவியைச் செய்தார் மெர்வான்ஜி.

215 சதுர அடியே கொண்ட ஒரு சிறிய ஷெட்டில் தன் தொழிற்சாலையை ஆரம்பித்தார் கோத்ரெஜ்.

மிகுந்த உழைப்பின் பேரில் தினசரி ஆராய்ச்சி செய்து யாரும் திறக்க முடியாத நான்கு லீவர் கொண்ட பூட்டு ஒன்றை அவர் தயாரித்தார்.

சந்தையில் அது நல்ல வரவேற்பைப் பெற்றது. உடனே அடுத்தபடியாக இரண்டு சாவிகள் கொண்ட ஒரு பூட்டைத் தயாரித்த அவர் இரண்டாவது சாவி தேவையான மாற்றங்களை பூட்டின் உள்ளே செய்யக் கூடிய வகையில் புதுமையாக வடிவமைப்பைச் செய்தார்.

இதைத் தொடர்ந்து யாருமே எளிதில் திறக்க முடியாத பாதுகாப்பைக் கொண்ட பல வடிவமைப்புகளைக் கொண்ட பூட்டுகளை அவர் தயாரிக்க ஆரம்பித்தார்,

ஒவ்வொரு பூட்டுக்கும் ஒரு சிறப்பான பெயர் சூட்டப்பட்டது. ஒன்றின் பெயர் கார்டியன் லாக். இன்னொன்றின் பெயர் டிடெக்டர் லாக்.

நிறுவனம் படிப்படியாக உயர்ந்தது. பலர் வேலையில் அமர்த்தப்பட்டனர்.

சேப் தயாரிப்பு: 1901-ல் கோத்ரெஜ் பாதுகாப்பான 'சேப்' (SAFE) பக்கம் தன் பார்வையைத் திருப்பினார்.

அப்போது சான்பிரான்சிஸ்கோவில் ஒரு பூகம்பம் நிகழ்ந்தது. அதைத் தொடர்ந்து ஒரு பெரிய தீ விபத்தும் ஏற்பட்டது. அனைத்து சேப்களும் அழிந்து போயின.

இதைக் கவனத்தில் கொண்ட கோத்ரெஜ் அருமையான ஒரு சேபை வடிவமைத்தார்.

இந்த அனைத்திலும் அவருக்கு உதவி செய்தது அவரது சகோதரரான பிரோஜ் ஷா.

தொழிலில் நன்கு புதிய உத்திகளைத் தெரிந்து கொள்ள வேண்டும் என்பதற்காக 1910-ல் அவர் இங்கிலாந்து, பிரான்ஸ், ஜெர்மனி உள்ளிட்ட வெளிநாடுகளுக்குச் சென்றார். புதிய உத்திகளைப் பார்த்தறிந்தார்.

கோத்ரெஜ் அண்ட் பாய்ஸ்: ஒருநாள் அவருக்கு மெர்வான்ஜியிடம் தான் வாங்கிய கடன் தொகை 3000 ரூபாய் ஞாபகத்திற்கு வரவே ஓடோடிச் சென்று அவரிடம் தொகையைத் திருப்பித் தந்தார். நோய்வாய் படுக்கையில் இருந்த அவர் அதை வாங்க மறுத்தார். ஆனால், 'ஒரு உதவி செய்ய முடியுமா?' என்று கேட்டார்.

'எது வேண்டுமானாலும் செய்கிறேன்' என்று வாக்களித்தார் கோத்ரெஜ்.

எனது உறவினாரான பாய்சிற்கு ஒரு வேலை போட்டுத் தர முடியுமா என்பதே அவர் கேட்ட உதவி.

நெகிழ்ந்து போன கோத்ரெஜ். அவரை எனது நிறுவனத்தில் கூட்டாளியாகவே ஆக்குகிறேன் என்றார்.

அப்படித் தோன்றியது தான கோத்ரெஜ். அண்ட் பாய்ஸ் (GODREJ & BOYCE) கம்பெனி.

ஆனால் சிறிது காலத்தில் ஆர்வமின்றி நிறுவனத்தில் இருந்து விலகி விட்டார் பாய்ஸ். என்றாலும் பெயர் தொடர்ந்தது.

சோப் தயாரிப்பு: 1928 மே முதல் நாள் தனது நிறுவனத்தை தனது தம்பி பெயருக்கு மாற்றினார் கோத்ரெஜ். நேராக நாசிக்கிற்குச் சென்று அங்கு விவசாயத்தை மேற்கொண்டார்.

ஆனால் இயல்பான அவரது "எதையாவது புதிதாகக் கண்டுபிடிக்கும் ஆர்வம்" அவரை உந்த அவர் சோப் தயாரிப்பதில் ஈடுபட்டார். சோப்பை மிருகக் கொழுப்பின்றி சைவ முறையில் தயாரிப்பதே அவர் எண்ணம். தாவர எண்ணெய்களை வைத்து மிருகக் கொழுப்புகளைத் தவிர்த்து அவர் தயாரித்த சோப்புகள் பிரபலமாயின. நல்ல வரவேற்பைப் பெற்றன. இந்த சோப்பை நோபல் பரிசு பெற்ற கவிஞரான ரவீந்திரநாத் தாகூரும் அன்னிபெசண்ட் அம்மையாரும் பெரிதும் போற்றி வரவேற்றனர்.

இந்திய விடுதலை இயக்கம் கோத்ரெஜை ஈர்க்கவே அவர் தாதாபாய் நவுரோஜியின் உரையால் ஈர்க்கப்பட்டார். நம் நாடு எதிலும் தனித்து சொந்தக் காலில் நிற்கவேண்டும் என்பதே அவரது கருத்து.

ஆனால் சுதேசித் தயாரிப்புகள் நிச்சயமாக உயர்ந்த தரத்துடன் இருக்க வேண்டும் என்பதையும் அவர் வலியுறுத்தினார்.

சாதாரண 215 சதுர அடி ஷெட்டில் ஆரம்பிக்கப்பட்ட் கோத்ரெஜ் நிறுவனம் இன்று 28000 பணியாளர்களைக் கொண்டு பிரம்மாண்ட வளர்ச்சியைப் பெற்றிருக்கிறது. 5.7 பில்லியன் கோடி ரூபாய் வருமானத்தைக் கொண்டுள்ளது. (ஒரு பில்லியன் என்றால் நூறு கோடி)

எலிசபத் மகாராணியாரே ஒரு முறை கோத்ரெஜ் தயாரிப்புகளைப் பகிரங்கமாகப் போற்றிப் புகழ்ந்தார்.

ஆதி கோத்ரெஜ்: இன்று இந்த நிறுவனத்தின் தலைமையில் இருப்பவர் ஆதி கோத்ரெஜ். அவருக்கு வயது 82 . இப்போது இந்த நிறுவனம் பல்வேறு துறைகளில் முத்திரை பதித்து இந்தியாவின் பெருமையை உலககெங்கும் பறை சாற்றி வருகிறது.

சமீபத்தில் விண்ணில் பறந்த சாட்டிலைட்டில் விகாஸ் எஞ்ஜினை உருவாக்குவதில் பெரும் பங்கு வகித்தது கோத்ரெஜ் நிறுவனம்.

வீட்டில் உபயோகிக்கும் எந்த ஒரு பொருளாக இருந்தாலும் உலகில் பெரும்பகுதியில் வசிக்கும் நாடுகளின் மக்கள் ஏதோ ஒரு கோத்ரெஜ் தயாரிப்பைப் பயன்படுத்துகிறார்கள் என்பதே உண்மை.

இந்தியாவிலோ கேட்கவே வேண்டாம் - சிந்தால் சோப், ஹிட், குட் க்னைட், நூபுர் ஹென்னா, ஹேர் கேர், கோத்ரஜ் பர்னிச்சர், கோத்ரஜ் கட்டும் வீடுகள், சிசிடிவி, ரெப்ரிஜரேட்டர், குளிர்சாதனப்பெட்டிகள், எலக்ட்ரிக் ஓவன்,- மிக மிக நீண்ட கோத்ரெஜ் என்று தொழில்துறையின் பட்டியல் தொடரும்.

கோத்ரெஜ் நிறுவனத்தின் வெற்றிக்கு காரணம் என்ன?

மிக சுருக்கமாக இரண்டே வார்த்தைகளில் அது விளக்கப்படுகிறது.

ENTERPRISE AND ETHICS

- THE TWO PILLARS OF THE EMPIRE!

வணிகம் - நன்னெறி இவை

சாம்ராஜ்யத்தின் இரு தூண்கள்!

தொடர்புக்கு:- snagarajans@yahoo.com

உலகில் மனிதர்களாய் பிறந்த அனைவரும் பிறவிப்பயனை அடையவும் தங்களது வம்சம் தலைக்கவும் தமது வாரிசுகளை விருத்தி செய்ய வேண்டும். பிரபஞ்ச நியதி இவ்வாறு இருக்க திருமணமான தம்பதிகளில் அறுபது சதவிகிதத்தினருக்கு உடனே குழந்தை பாக்கியம் கிடைத்து விடுகிறது.

எஞ்சிய நாற்பது சதவிகிதத்தினர் குழந்தை பாக்கிய மின்மையால் சங்கடத்துடன் வாழ்கிறார்கள். ஒரு காலத்தில் எண்பது சதவிகிதமாக இருந்த குழந்தை பிறப்பு தரமற்ற உணவு பழக்கம், சுதந்திரமான முற்போக்கு வாழ்க்கை போன்ற பல்வேறு காரணங்களால் அறுபது சதவிகிதமாக குறைந்து விட்டது வருத்தப்பட வேண்டிய செயல் என்றே கூற வேண்டும். ஜோதிட ரீதியாக ஒருவரின் புத்திர பாக்கியத்தை புத்திரக்காரகரான குருவும் ஐந்தாமிடமெனும் பூர்வ புண்ணிய ஸ்தானமும் ஒன்பதாமிடமெனும் பாக்கிய ஸ்தானமுமே தீர்வு செய்கிறது.

குழந்தை பாக்கியத்தை தடை செய்வதற்கான கிரக அமைப்புகளை காணலாம்.

லக்னத்திற்கு ஐந்தாம் அதிபதி நீசம், வக்ரம், அஸ்தமனம் அடைதல். ஐந்தாம் அதிபதிக்கு லக்ன ரீதியான பாதகாதிபதி சம்பந்தம் இருப்பது. ஐந்தாம் அதிபதி 6, 8, 12-ல் மறைதல் ஐந்தாம் அதிபதி நின்ற வீட்டின் அதிபதி நீசம் பெறுவது அல்லது 6,8,1-2ல் மறைவது.

ஐந்தாம் அதிபதிக்கு சனி, ராகு/கேதுவின் சம்பந்தம் இருப்பது. ஐந்தாம் இடத்திற்கு செவ்வாய், சனி, புதன், ராகு / கேது போன்ற கிரகங்கள் சம்பந்தம். ஐந்தாம் இடத்தில் தனித்த குரு நிற்பது. புத்திரகாரகன் குருவிற்கு செவ்வாய், புதன், சனி, ராகு/கேதுவின் சம்பந்தம் குரு லக்ன பாதகாதிபதி சம்பந்தம் பெறுவது குரு வக்ரம், அஸ்தங்கம் அடைதல்.

குரு மற்றும் ஐந்தாம் அதிபதிக்கு திதி சூன்ய பாதிப்பு. செவ்வாய் தோஷம் உள்ள ஜாதகத்தை செவ்வாய் தோஷம் இல்லாத ஜாதகத்துடன் இணைப்பது. ராகு/கேது தோஷம் உள்ள ஜாதகத்தை ராகு/கேது தோஷம் இல்லாத ஜாதகத்துடன் இணைப்பது. ஆண், பெண் ராசி சஷ்டாஷ்டகமாக அமைவது குடியிருக்கும் வீட்டில் வடகிழக்கு பாதிப்பது போன்ற பல்வேறு ஜோதிட ரீதியான காரணங்களால் குழந்தை பிறப்பு தடைபடுகிறது. பலரிடம் குரு நீசம் பெற்றால் குழந்தை பிறக்காது என்ற தவறான கருத்து இருந்து வருகிறது. குரு நீசம் பெற்றவர்கள் பலர் குழந்தைகளை பெற்று மகிழ்சியாக வாழ்ந்து வருகிறார்கள் என்பது மறுக்க முடியாத உண்மை.

நவகிரகங்களில் முதன்மை சுப கிரகமான குரு பகவானுக்கு மனித வாழ்வில் பல்வேறு உன்னதமான சுபபலன்களை உண்டாக்கக்கூடிய ஆற்றல் உண்டு. குருவின் பார்வைக்கு பல தோஷங்களை போக்கும் சக்தி உள்ளது. சுய ஜாதகத்தில் குரு பலமாய் அமைந்திருந்தால் மட்டுமே வாழ்க்கை சுபிட்சமாகவும் மகிழ்ச்சி கரமானதாகவும் இருக்கும். தனக்காரகனாகவும், புத்திரகாரகனாகவும் விளங்கும் குரு பகவான் இறை வழிபாட்டிற்கும் ஞானத்திற்கும் காரகனாகிறார்.

அது மட்டுமின்றி ஒழுக்கம், மற்றவர்களுக்கு உதவி செய்யும் மன நிலை, சுகவாழ்வு, புத்திரர்கள், பேரன்கள், பெருந்தன்மையான குணம், தூய்மை, புனிதமான நீர், இறை வழிபாடு, அறிவு, செல்வம், செல்வாக்கு, இறைவழிபாடு, மதகுருமார்கள், பெரியோர்கள் கல்வித்துறை, குதிரை, யானை, அழகிய வீடு, பிரம்மா, ஞானம், யோகப்பியாசம், ஆசிரியர் தொழில், அஷ்டமா சித்திகளை அடைதல், புரோகிதம், மதிநுட்பம், பெரியோர்களின் ஆசி, அரசாங்க அனுகூலங்கள், பாராட்டுகள், விருதுகள் ஏற்படுதல், சாந்தமான கபாவம்,, வாக்கு நிறைவேற்றுதல், ரிஷி உபதேசம் பெற்றல் ஆகியவற்றிற் கெல்லாம் குரு காரகனாவார்.

நவகிரகங்களில் ஒரு மனிதருக்கு புத்திரப் பேறு அருளும் சக்தி வாய்ந்த கிரகமாக குருபகவான் இருக்கிறார். அதாவது குழந்தை பிறப்பிற்கு காரக கிரகம் குருபகவான்.

ஒரு சிலருக்கு ஜாதகத்தில் குரு பகவானால் புத்திர தோஷம் ஏற்பட்டு குழந்தை பிறக்காத நிலை உண்டாகிறது. குரு என்றால் குழந்தை. குருவிற்கு ராகு, கேது, சனி மற்றும் அஷ்ட மாதிபதி, பாதகாதிபதி சம்பந்தம் இருந்தால் திருமணத்திற்கு பின் குழந்தையின்மை ஏற்படுகிறது.

இதனால் சிலருக்கு மணமுறிவும் ஏற்படுகிறது. குழந்தை நல்ல நிலையில் உருவாக காரணமாக குரு இருப்பதால் சுய ஜாதகத்தில் குரு பலவீனமாக இருந்தால் குழந்தை பிறக்காமல் இருத்தல் அல்லது பிறந்த குழந்தையை வளர்க்க முடியாமை, கால தாமத புத்திர பாக்கியம், குழந்தை பாக்கிய மின்மை, குழந்தைகளால் விரயம், பொருளாதார இழப்பு, குழந்தைகளால் மன வேதனைப்படும் நிகழ்வுகள் ஏற்படுகிறது. சிலருக்கு செயற்கை கருத்தரிப்பு முறையில் வாரிசு உருவாகும். சிலருக்கு அடிக்கடி கரு உருவாகி கலையும். சென்ற ஜென்மத்தில் கருக்கலைப்பு, பண ஏமாற்றம் மற்றும் குரு துரோகம், பசுவதை செய்தவர்களுக்கு இது போன்ற வினைப் பதிவு ஏற்படுகிறது.

ஜோதிட சாஸ்திரத்தில் ஜாதகம் கணிக்கும் போதும் பலன்கள் சொல்லும்போதும் 'பதவி பூர்வ புண்ணியானாம்' என்ற முக்கியமான சொற்றொடரைச் சொல்வார்கள்.

அதாவது நம்முடைய இந்தப் பிறவிப் பயன், யோகம், அதிர்ஷ்டம், பாக்யம், அம்சம் எல்லாம் நம் பூர்வ ஜென்ம புண்யத்தால் ஏற்பட்ட கர்ம வினைப்படியே அமையும் என்பதாகும். பூர்வ புண்ணியம் 5, 9-ம் அதிபதியின் தசா புத்தியோடு சம்பந்தம் பெற்று கோச்சார குரு கீரீன் சிக்னல் கொடுக்கும் காலமே குழந்தை பேறு கிடைக்கும் என்பதால் செயற்கை முறையை நாடுபவர்கள் பொருள் விரயம் , உடல் வேதனை, மன வேதனையை தவிர்க்க முறையான ஜோதிட ஆலோசனை பெறுவது உத்தமம்.

பொதுவாக குழந்தையின்மையால் மன வேதனை அனுபவிப்பவர்கள் குல தெய்வ வழிபாட்டையும், பித்ருக்கள் பூஜையையும் முறைப்படுத்த வேண்டும். அத்துடன் லக்னரீதியான ஐந்தாம் அதிபதிக்கு பரிகாரம் செய்தாலே பாதிப்பு நீங்கும். அதன்படி ஐந்தாம் அதிபதி அல்லது ஐந்தில் கிரகத்தி ற்கான பரிகாரங்கள் கீழே பரிந்துரைக்கப்பட்டுள்ளது.

5-ம் இடத்துடன் சூரியன் சம்பந்தம் பெற்றால் ஞாயிற்றுக்கிழமை சிவனுக்கு சூரிய உதயத்தில் பொங்கல் வைத்து சிவப்பு வஸ்திரம் சாற்றி ஒற்றைப்படை எண்ணிக்கையில் காணிக்கை செலுத்த (10,100,1000) வேண்டும். 10 பேருக்கு சிவப்பு நிற ஆடையும் கோதுமையும் தானம் தர நன்மை உண்டாகும்.

ஐ.ஆனந்தி

 5-ம் இடத்திற்கு சந்திரன் சம்பந்தம் பெற்றால் திங்கட்கிழமை அம்பாளுக்கு அபிசேக ஆராதனை செய்வதுடன் பச்சரிசி மாவு வெல்லம் கலந்த பிரசாதம் படைக்க வேண்டும். (20, 200, 2000)இரட்டைப் படை எண்ணிக்கையில் காணிக்கை செலுத்த வேண்டும். 2 நபர்களுக்கு வெண்மை நிற உடையும் நெல்லும் தானம் தர வேண்டும்.

5-ம் இடத்திற்கு செவ்வாய் சம்பந்தம் இருந்தால் செவ்வாய் கிழமை முருகனுக்கு சிவப்பு நிற வஸ்திரம், புஷ்பம் அணிவித்து துவரம் பருப்பு சாதம் படைத்து 9 என்ற எண்ணிக்கையில் காணிக்கை செலுத்தவும். 9 நபர்களுக்கு சிவப்பு நிற துணியும் சிவப்பு துவரையும் தானம் தர மாற்றம் உண்டாகும்.

5-ம் இடத்திற்கு புதன் சம்பந்தம் பெற்றால் புதன்கிழமை நரசிம்மருக்கு பச்சை வஸ்திரம், துளசி மாலை சாற்றி வெண் பொங்கல் படைக்க வேண்டும். 5 எண்ணிக்கையில் காணிக்கை செலுத்த வேண்டும். 5 பேருக்கு பச்சை நிற ஆடையுடன் பாசிப்பயிறு தானம் தருவது சிறப்பு.

5-ம் இடத்திற்கு குரு சம்பந்தம் பெற்றால் வியாழக்கிழமை தட்சிணாமூர்த்திக்கு மஞ்சள் வஸ்திரம் சாற்றி கொண்டைக்கடலை மாலை அணிவித்து 3 எண்ணிக்கையில் காணிக்கை செலுத்த வேண்டும். 3 நபர்களுக்கு மஞ்சள் நிற ஆடையும் கொண்டைக் கடலையும் தானம் வழங்கவும்.

5-ம் இடத்திற்கு சுக்கிரன் சம்பந்தம் பெற்றால் வெள்ளிக்கிழமை சக்ரத்தாழ்வாருக்கு வெண்பட்டு அணிவித்து கல்கண்டு அல்லது வெள்ளை மொச்சை பிரசாதம் படைப்பதுடன் ஆறு எண்ணிக்கையில் காணிக்கை செலுத்த வேண்டும். ஆறு நபர்களுக்கு வெள்ளை நிற ஆடையும், இனிப்பு உணவும் தானம் தர நல்லது நடக்கும்.

5-ம் இடத்திற்கு சனி சம்பந்தம் இருந்தால் சனிக்கிழமை சனி பகவானுக்கு கறுப்பு வஸ்திரம் சாற்றி எள்ளுருண்டை நிவேதனம் செய்து 8 எண்ணிக்கையில் காணிக்கை செலுத்த வேண்டும். 8 ஊனமுற்றோர்களுக்கு உணவு, உடை தானம் வழங்க வேண்டும்.

5-ம் இடத்திற்கு ராகு சம்பந்தம் இருந்தால் ஞாயிற்றுக்கிழமை மாலை 4.30 மணி முதல் 6 மணிக்குள் புற்றுக்கோவிலில் அல்லது வளரும் புற்றில் அரை மணி நேரம் அமர்ந்து ஆத்மார்த்தமாக பிரார்த்தனை செய்ய வேண்டும். அல்லது துர்க்கை, காளிக்கு பால் அபிசேகம் செய்து வழிபடலாம். 4 எண்களில் காணிக்கை செலுத்தலாம். 4 பேருக்கு நீல நிற ஆடையும் கருப்பு உளுந்தம் பருப்பு தானம் தரலாம்.

5-ம் இடத்திற்கு கேது சம்பந்தம் இருந்தால் திங்கட்கிழமை விநாயகருக்கு பால் அபிசேகம் செய்து அருகம்புல் மாலை அணிவிக்கவும். 7 எண்களில் காணிக்கை செலுத்த வேண்டும். 7 பேருக்கு பல வண்ண ஆடையும் கொள்ளும் தானம் தர வேண்டும்.

மனிதர்களின் வாழ்க்கையில் தடைபட்ட அனைத்து இன்பங்களையும் வழங்கும் அதிகாரம் கோட்சார குருபகவானுக்கு உள்ளது. அந்த வகையில் மே1, 2024 அன்று ரிஷப ராசிக்கு பெயர்ச்சியாகும் குருபகவான் ரிஷபம், கடகம், கன்னி, மகரம், மீனம் ராசியினருக்கு தனது சுபத்துவம் நிறைந்த பார்வையால் சுய ஜாதக ரீதியான குழந்தையின்மை குறைபாடுகளை நீக்கி புத்திர பிராப்தத்தை வழங்க உள்ளார்.

செல்: 98652 20406

ஒரு மனிதனுக்கு வாழ்க்கையில் 5 விதமான தோஷங்கள் ஏற்படலாம் என்று ஆதி தமிழர்கள் கணித்து எழுதி வைத்துள்ளனர். ஒருவர் செய்யும் பாவங்கள், தவறுகள் எல்லாம் இந்த 5 வகை தோஷத்துக்குள் வந்து விடுகிறது.

அந்த தோஷங்கள் 1.வஞ்சித தோஷம், 2.பந்த தோஷம் 3.கல்பித தோஷம் 4.வந்தூலக தோஷம் 5. பிரணகால தோஷம் எனப்படும்.

1. வஞ்சித தோஷம்:

பார்க்கக் கூடாத படங்கள், வெறியூட்டும் காட்சிகள் காம சிந்தனைகள் உடலில் சூட்டை உண்டாக்கி. அவை பித்த நாடிகளைப் பாதிக்கச் செய்கிறது. இது உடலில் பல வியாதிகளை உண்டாக்குகிறது. இதற்கு வஞ்சிததோஷம் எனப்பெயர். உடன் பிறந்த சகோதரிகளை வணங்கி அவர்களுக்கு வேண்டிய உதவிகளைச் செய்ய வேண்டும். சகோதரிகள் இல்லாதவர்கள் ஏழைப் பெண்களுக்குத் தானம் அளிக்க வேண்டும். இவ்வாறு செய்தால் வஞ்சித தோஷம் விலகிவிடும்.

2. பந்த தோஷம்:

நம்மிடம் பழகியவர்களுக்குத் துரோகம் செய்வது அல்லது பழிவாங்குதல் பந்த தோஷமாகும்.

இந்த தோஷத்துக்கு தந்தை,தாய் வழிகளில் உள்ள மாமா, அத்தை, சித்தப்பா, பெரியப்பா ஆகியோருடைய பெண்களுக்குத் தான தர்மங்கள் செய்ய வேண்டும். இவ்வாறு செய்தால் பந்த தோஷம் விலகும்.

3. கல்பித தோஷம்:

பிறர் தன்னை விரும்புவதாக எண்ணிக் கொண்டு முறை தவறிப் பழகுதல் கல்பித தோஷமாகும்.

இத்தகைய தோஷம் ஏற்பட்டால் தன்னை விட வயதில் மூத்த பெண்களுக்குத் தன்னால் இயன்ற உதவிகளைச் செய்ய வேண்டும். இவ்வாறு செய்தால் கல்பித தோஷம் உடனடியாக விலகி விடும்.

4. வந்தூலக தோஷம்:

ஒருவர் தன்னைவிட வயது அதிகமுள்ள பெண்ணை திருமணம் செய்தால், அவருக்கு சுவாசக் கோளாறுகள், நரம்பு பாதிப்பு ஏற்படலாம். இவ்வாறு உருவாகும் தோஷம் வந்தூலக தோஷம் எனப்படும். வந்தூலக தோஷம் நீங்க வேண்டுமானால் வயதான தம்பதிகளுக்குத் தான தர்மங்கள் செய்ய வேண்டும். வேஷ்டி, புடவை, துண்டு, ரவிக்கைத் துணி ஆகியவற்றைத் தானமாக வழங்க வேண்டும். அறுபடை வீடுகளில் ஒன்றான பழமுதிர்ச் சோலைத் தலத்திற்குச் சென்று முருகனைத் தரிசித்துப் பின் ஏழைத் தம்பதிகளுக்குத் தான தர்மங்கள் செய்ய வேண்டும்.

5. பிரணகால தோஷம்:

திருமணப் பொருத்தங்கள் பார்க்காமல், பணம், புகழ், அந்தஸ்து, பதவி ஆகியவற்றுக்கு ஆசைப்பட்டு ஒருவர், திருமணம் செய்து கொண்டால், அவருக்கு பிரணகால தோஷம் ஏற்படும். இதனால் வாழ்க்கையில் பிடித்தம் இல்லாத நிலை காணப்படும். இந்த தோஷத்தை தவிர்க்க வேண்டுமானால் அநாதை விடுதியில் உள்ள பெண்களுக்குத் தான தர்மங்கள் செய்ய வேண்டும். இவ்வாறு செய்தால் பிரணகால தோஷங்கள் நிவர்த்தியாகும்.

இதே போன்று மேலும் சில தோஷங்கள் உள்ளன.

தீட்டு தோஷம்

சுபகாரியம் நடக்கும் வேளையில் அல்லது ஆலயத்தில் பெண்களுக்குத் தீட்டு ஏற்பட்டு விட்டால் அதனை ஒரு தோஷமாக நினைத்து இறைக்குற்றத்திற்கு ஆளாகி விட்டதாகப் பெண்கள் நிலை குலைந்து போவார்கள்.

தீட்டு ஏற்பட்டுவிட்டால் அதனால் தோஷம் எதுவும் வராமல் இருக்க, கீழ்க்கண்ட எளிய பரிகாரத்தைச் செய்து பெண்கள் நிம்மதி காணலாம்.

ஆலயத்துக்குள் இருக்கும் போது தீட்டு ஏற்பட்டுவிட்டால், அந்த தோஷம் விலக ஆலயத்துக்கு வெளியில் வந்து ஆலய வாசலில் ஒரு கைப்பிடி மண் எடுத்து, வீட்டிற்குக் கொண்டு வந்து பசும்பாலில் போட வேண்டும். அதனைத் தேய்த்துக் குளிக்க வேண்டும். தீட்டு முடிந்த மறுநாளே எந்த ஆலயத்தில் தீட்டு ஏற்பட்டதோ அந்த ஆலயத்துக்கு ஒரு லிட்டர் பசும்பாலை அபிஷேகத்துக்காக கொடுத்து விட்டு வரவேண்டும். இப்படிச் செய்வதால் ஆலயத்துக்குள் ஏற்பட்ட தீட்டு தோஷம் விலகும்.

ஆலயத்துக்குச் செல்ல முடியாதவர்கள் தீட்டு முடிந்த பிறகு ஒன்பது நாட்களுக்குத் தொடர்ந்து சூரிய நமஸ்காரம் செய்து வர தீட்டு தோஷம் விலகும்.

பிறரிடம் ஏமாறும் தோஷம்

ஒருவரது ஜாதகத்தில் சந்திரன் நின்ற ராசிக்கு முன்னும் பின்னும் கிரகங்கள் இல்லாமல் இருந்தால் அது அவயோகம் அல்லது கேமத்துருவ யோகம் என்று அழைக்கப்படும். இத்தகையோர் பலரால் ஏமாற்றப்படுவர்.

மகாபாரதத்தில் தர்மர் இந்த அவயோகத்தில் பிறந்ததால் துரியோதனனிடம் சூதாட்டத்தில் நாட்டை இழந்தார். துரியோதனர்களால் ஏமாற்றப்பட்ட தர்மர். பகவான் கிருஷ்ணனைத் தஞ்சமடைந்தார். அவயோகத்தை நீக்கி மீண்டும் தர்மரிடம் நாட்டை மீட்டுக் கொடுப்பதற்காக, அவல் பொரி பாயாசம் வைத்து நைவேத்தியம் செய்து யாகம் செய்தார் கிருஷ்ண பகவான். அதன் பலனாக தர்மர் முற்பிறவி தோஷம் நீங்கி போர் செய்து நாட்டை மீட்டார்.

எனவே தாங்கள் தங்கள் ஜாதகத்தை ஆராய்ந்து சந்திரனுக்கு முன்னும் பின்னும் கிரகங்கள் இல்லாமல் இருந்தால் கிருஷ்ணன் கோவிலில், வளர்பிறை ஏகாதசி திதியில் அவல் பொரி பாயாசம் வைத்து நைவேத்தியம் செய்து, பக்தர்களுக்கு வழங்கி, அவயோக தோஷம் நீங்க பெறலாம்.

கோவிலுக்குச் சென்று பரிகாரம் செய்ய முடியாதவர்கள் வளர்பிறை ஏகாதசி திதியில் தங்கள் வீட்டிலேயே அவல் பொறி பாயாசம் வைத்து நைவேத்தியம் செய்து, பாயாசத்தை முதலில் பசுமாட்டிற்குக் கொடுத்து விட்டு தனக்குத் தெரிந்தவர்களுக்கும் அயலாருக்கும் கொடுத்தால் தோஷம் நீங்கும்.

கடன் தோஷம்

லக்கனத்துக்கு 1 முதல் 12 வரை உள்ள கிரகங்கள் 6-வது வீட்டில் அமர்வதால் கடன் தொல்லை ஏற்படுகிறது. எளிய பரிகாரங்களைச் செய்வதன் மூலம் கடன் தோஷத்தை நிவர்த்தி செய்து கொள்ளலாம்.

பரிகாரம்-1

சென்ற பிறவியில் செய்த தவறுகளால் இந்தப் பிறவியில் ஏற்பட்ட கடன் தொல்லையில் இருந்து மீள, 3 பவுர்ணமி நாட்களில் அவரவர் குலதெய்வங்களை வழிபட்டு வந்தால் கடன் தொல்லை படிப்படியாகக் குறையும். கடனை அடைத்துவிடலாம்.

பரிகாரம் -2

குலதெய்வம் அருகில் இல்லாமல் வெகு தூரத்தில் வசிப்பவர்கள் அவர்கள் வீட்டிலேயே குலதெய்வ படத்தை வைத்து அல்லது குலதெய்வம் உள்ள ஊர் திசையை நோக்கி 5 முக நெய்விளக்கு ஏற்றி, 9 பவுர்ணமி நாட்கள் தொடர்ச்சியாக வழிபட்டு வந்தால் கடன் சுமை குறையும். 90 நாட்களுக்குள் கடனை அடைத்துவிடலாம். உங்களுக்கு வர வேண்டிய பாக்கி இருந்தாலும் வசூலாகிவிடும்.

பரிகாரம்-3

9 பவுர்ணமி நாட்கள் குலதெய்வப் பூஜை செய்வதோடு, படித்தவர்களாக இருந்தால் கீழ்க்கண்ட சுலோகத்தை தினமும் காலையில் ஒரே நேரத்தில் 9 முறை சொல்லி வழிபட்டு வந்தால், கடன் சுமை படிப்படியாகக் குறைந்து, 90 நாட்களில் பெருமளவு கடனைக் கட்டி நிம்மதி பெறலாம். வரவேண்டிய பாக்கிகளும் வசூலாகி விடும்.

கல்வி மந்த தோஷம்

கல்வியில் மந்தம் உள்ள பிள்ளையை அருகில் உள்ள ஆஞ்சநேயர் ஆலயத்துக்கு சனிக்கிழமை தோறும் அழைத்துச் சென்று வணங்கச் செய்யுங்கள்.

கிரக தோஷங்கள்

சோழிங்கரில் தக்கான் திருக்குளத்தில் நீராடி ஸ்ரீசுமிந்த பலவல்லி தாயார் சமேத ஸ்ரீயோக நரசிம்மரை. ஸ்ரீயோக ஆஞ்சநேயரை தரிசிக்க வேண்டும். அதர்வண வேதத்தில் அடங்கியுள்ள அனைத்து மந்திர சக்திகளும் ஸ்ரீநரசிம்மனின் வலது கால் கட்டை விரலின் நுனியில் அடங்கியுள்ளதாக புராதன நூல்கள் விளக்கியுள்ளன

ஆதலால் மனநலம் பாதிக்கப்படுவதற்கு காரணமாக உள்ள அனைத்து கிரக தோஷங்கள் மற்றும் பில்லி, சூன்யம், வைப்பு ஆகிய அனைத்து செய்வினை தோஷங்களும் இந்த தாயார், ஸ்ரீயோக நரசிம்மர், ஸ்ரீயோக ஆஞ்சநேயர் ஆகிய மூவரையும் ஒரே தினத்தில் அதுவும் கார்த்திகை ஞாயிறு தினத்தில் தரிசிப்பதால் நீங்கி விடும்

பல்லியை கொல்வதால் ஏற்படும் தோஷம்

மனிதர்களுக்கு நல்லது எது? கெட்டது எது? என்று எடுத்து கூறும் சக்தியும். தகுதியும் பல்லிக்கு உள்ளது. எனவே மதிக்கத் தகுந்த ஜீவராசியாக பல்லி கருதப்படுகிறது. ஆதலால் அதனைக் கொன்றால் தோஷம் ஏற்படும்.

அத்தகைய தோஷம் ஏற்பட்டால், காஞ்சி புரம் வரதராஜப் பெருமாள் கோவிலில் சந்திர, சூரியர்களாக காட்சி தரும் பல்லி உருவங்களை தொட்டு வணங்குவதும், மூகாம்பிகை கோவில்களில் உள்ள பல்லி உருவத்தை தொட்டு வணங்குவதும் இதற்கு பரிகாரமாக கூறப்படுகிறது. பொதுவாக எந்த ஜீவராசிகளையும் கொல்லாது இருப்பது சந்ததிக்கு சிறப்பையும், மேன்மையையும் தரும்.

தோஷங்கள் தொடர்ச்சி

அடுத்த வாரம் தொடரும்....

வில்லனாக தூள் பறத்தியவர்... கதாநாயகனாவும் கலக்கியவர் சத்யராஜ் சார். அவர் சாதாரணமாக வேட்டி-சட்டையில் நடித்தால் எப்படி இருக்கும்?

வள்ளல் படத்தில் அப்படித்தான் நடித்து இருப்பார். அந்த படத்தில் என்னுடன் ரோஜா, சங்கீதா, கவுண்டமணி, செந்தில், மணிவண்ணன், லட்சுமியம்மா, மனோரமா ஆச்சி ஆகியோரும் உண்டு.

படம் முழுக்க கலகலப்பாக இருக்கும்.

ஒற்றை வரியில் படத்தின் கதையை பற்றி சொல்வதென்றால் காதலிக்காக தனது வாழ்க்கையை தியாகம் செய்த வள்ளல் என்பது தான்.

வள்ளலாக வரும் சத்யராஜ் சாருக்கு வயதான 'கெட்-அப்' அந்த கெட்-அப்பில் அவரை பார்ப்பதில் எனக்கு சந்தோசம். ஏனெனில் அடிக்கடி என்னை அவர் வாரி விடுவார். எனக்கும் அவரை வாருவதற்கு ஒரு சான்ஸ். உனக்கு மேக்-அப். காஸ்ட்யூம் நல்லாயிருக்கு... ஆனால் எனக்கு பார்... என்பார்.

நான் ஆமாம் சார், உங்கள் வயதுக்கு ஏற்ற கெட்-அப் உங்களுக்கு. என் வயதுக்கு ஏற்ற கெட்-அப் எனக்கு, அவ்வளவுதான் என்பேன்.

அதை கேட்டதும் 'நக்கலா... நீ ரொம்ப தேறிட்டே...' என்பார். படமும் ஜாலியா இருந்தது. இப்படி, ஒருவரை ஒருவர் கிண்டல் அடித்ததும் ஜாலியாக இருந்தது. மணிவண்ணன் சார், சத்ய ராஜ் சாரெல்லாம் எங்கு படப்பிடிப்புக்கு போனாலும் எல்லோரையும் கிண்டல் அடிப்பார்கள். அதில் என்னையும் விடுவதில்லை.

அவர்களோடு பழகவிட்டதால் வாய்ப்பு கிடைக்கும் போது நானும் விடுவதில்லை. சின்ன குழந்தையில் இருந்தே அவர்களோடு விளையாடியவள் நான். எனவே அவர்கள் என்னை வாரினாலும் அதில் வாஞ்சை இருக்கும்.

அந்த படத்தின் கிளைமாக்ஸ் காட்சிகள் காரைக்குடியில் படமாக்கப்பட்டது. குதிரை பூட்டிய சாரட் வண்டியில் நான் இருப்பேன். சத்யராஜ் சார்தான் வண்டியை ஓட்டுவார்.

அப்போது சண்டை காட்சி வரும். காட்சி முடிந்ததும் மீண்டும் சாரட் வண்டியை வேகமாக ஓட்டுவார். அப்போது வண்டியே சாய்ந்து விடும். அப்போது நாங்கள் பயந்த பயம் இருக்கே... அப்பப்பா... எப்படியோ தப்பிச்சுட்டோம்.

பஞ்சரம்

இதே காலக்கட்டத்தில் பஞ்சரம் என்ற தெலுங்கு பட வாய்ப்பு வந்தது. குடும்பங்களில் நடக்கும் யதார்த்தமான நிகழ்வுகளை மையமாக வைத்து எடுக்கப்பட்ட வித்தியாசமான படம். கோடி ராமகிருஷ்ணா டைரக்டர். அவர்தான் கதை, திரைக்கதை, வசனம் எல்லாமும்.

கோட்டாசீனிவாசராவ் முதியவர் வேடத்தில் முக்கியமான கதாபாத்திரத்தில் நடித்தார்.

கதைப்படி நான் மிகவும் ஏழ்மையான குடும்பத்தை சேர்ந்தவள். நான் என் வயதை ஒத்த வினோத் குமாரை காதலிப்பேன். ஆனால் குடும்ப சூழல் காரணமாக என்னை விட வயதான ஜமீன்தாருக்கு கட்டாய கல்யாணம் செய்து வைத்து விடுவார்கள். அவர் என்னை கொடுமைப்படுத்துவதும், வேலைக்காரி மூலம் நான் தப்புவதும் கதைதான்.

வித்தியாசமான பாத்திரங்கள். எனக்கு கட்டி வைத்தவருக்கு இரவு கண் தெரியாது. பகலில் காது கேட்காது. சின்ன பெண்ணான என்னை கொடுமைப்படுத்தும் காட்சிகள்தான் 'அய்யோ பாவம்' என்று பார்ப்பவர்களை பேச வைத்தது. படத்தின் டைரக்டரோ செட்டுக்கு வந்து சுட சுட டயலாக் எழுதி தருவார். அதை உடனே பேச வேண்டும். தெலுங்கு நான் பேசினாலும் சரளமாக பேசவும், படிக்கவும் அப்போது தெரியாது. இதனால் உடனடியாக வசனங்களை பேசுவது கடினமாக இருந்தது. ஆனாலும் சமாளித்து நடித்தது மறக்க முடியாதது.

முதுல்ல மொகுடு

இதுவும் அந்த கால கட்டத்தில் நான் நடித்து வெளியான தெலுங்கு படம்தான். இந்த படத்தில் லட்சுமி அம்மாதான் என் அம்மா பாத்திரத்தில் நடித்தார். முழுக்க குடும்ப பாங்கான படம். அம்மா பேச்சை கேட்டு கணவரை பிரிவது. பின்னர் புரிந்து ஒன்று சேர்வதுதான் கதை.

தெலுங்கு சினிமா சாம்ராஜ்யத்தை கட்டி ஆண்ட என்.டி.ராமா ராவின் மகன் நடிகர் பாலகிருஷ்ணாதான் அந்த படத்தில் கதாநாயகன். பால கிருஷ்ணாவை பொறுத்தவரை நன்றாகபழகும், பேசும் சுபாவம் கொண்டவர். எப்போதும் சுறுசுறுப்பாக இருப்பவர். அவர் தனது தந்தை மீது வைத்தி ருக்கும் மரியா தையை நான் பார்த்து ரொம்ப ஆச்சரியப்பட்டிருக்கிறேன்.

அவர் என்.டி.ஆர்.மீது முரட்டுத் தனமான பக்தியே வைத்திருக்கிறார். சிறிது நேரம் ஓய்வு கிடைத்தாலும் பேசிக் கொண்டிருக்கும் போது தந்தையின் பெருமையை சொல்ல தவற மாட்டார். ஜாலியாக எங்களோடு சீட்டாடுவார். என் அம்மா தான் அவருக்கு முக்கிய கை. சிறிது நேரம் காணவில்லை என்றாலும் 'எங்கே அம்மா... எங்கே அம்மா... என்று பரபரப்பாகி விடுவார். அவ்வளவு தீவிரமாக தேடுவதற்கு என்ன காரணம் தெரியுமா? சீட்டு விளையாடத்தான்.

சும்மா இருக்கும் போதும், காரில் பயணம் செய்யும் போதும் தனது தந்தை நடித்த படப்பாடல்களை கேட்க தவறமாட்டார். படிப்பிடிப்பு ஜெய்ப்பூரில் நடந்தது. அங்கு ஒட்டக சவாரி பிரபலம். படக்காட்சியிலும் நானும், பாலுவும் ஒட்டகத்தின் மீது சவாரி செய்ய வேண்டும்.

ஒட்டக சவாரி ஈசியானதல்ல. படுத்திருக்கும் ஒட்டகத்தின் மீது ஏறி அமர்ந்ததும் அது எந்திருக்கும் போது பின்னாடியும், முன்னாடியும் வளைந்து பேலன்ஸ் பண்ணி கொள்ள வேண்டும். இல்லா விட்டால் ஒட்டகம் எழுந்து நிற்கும். நாம் தரையில் மல்லாந்து கிடக்க வேண்டியது தான். ஷூட்டிங் லேட்டாக வருவார். கேட்டால் 'ஷேவ்' பண்ண ஆள் வரவில்லை என்று சாதாரணமாக சொல்வார்.

இந்த சிக்கலுக்காகவே நான் பார்லரில் இருந்து ஒரு பெண்ணை ஏற்பாடு செய்து இருந்தேன். அவர் நான் தங்கி இருந்த அறைக்கே வந்து விடுவார்.

அந்த படத்தில் ஒரு பாடலில் முஸ்லிம் பெண் போல் வேடமிட்டு நடித்தேன்.

அதற்காக புருவங்களுக்கு இடைய தனியே மேக்-அப் போட்டு கற்பனையில் அந்த கெட்-அப்பை வைத்து நான் தான் மும்தாஜ் என்று என்னையே நான் நினைத்து பெருமை பட்டுக் கொண்டேன். ஜெய்ப்பூர் அரண்மனைதான் எனக்காக கட்டப்பட்ட தாஜ்மகால் என்று நினைத்துக் கொண்டு நடித்தேன். கற்பனை குதி ரைக்கு பறப்ப தற்கு சொல்லி யா கொடுக்க வேண்டும்?

இன்னும் எத்த னையோ கன வுகள்... கற்ப னை கள்... நினை வுகள்... பகிர்ந்து கொள்ள வருகிறேன் அடுத்த வாரம்...!

(தொடரும்)

ஓரையைப் பார்த்து வேலையினை செய்தால் முழு வெற்றி" என சித்தர்கள் முன்பே கூறி வைத்துள்ளார்கள் என்றார் அந்த பெரியவர். ஓரைப் பார்த்து ஒரு செயலை செய்து பல பிரச்சனைகளை தவிர்த்துள்ளனர் நம் முன்னோர். ஆம், சித்தர்களே ஓரை பார்க்கச் சொல்லும் போது நாம் கடை பிடிக்காமல் இருப்போமா என்ன?

7 கிரகங்களுக்கு மட்டும்தான் ஓரை உண்டு. ராகு, கேதுவிற்கு ஓரை கிடையாது. சாயா கிரகங்கள் என்பதால் ஓரை கிடையாது.

சூரியன் அருகில் இருக்கும் கிரகங்கள், அதன் ஈர்ப்பு சக்தி, அதன் ஒளி கதிர்கள், பூமியை அடையும் காலம் இவற்றினை வைத்துதான் ஓரைகள் உருவாக்கப்படுகின்றன. ஞாயிறன்று முதல் ஓரை சூரியனுக்குரியது ஆகும். இந்த ஓரை கால அட்டவணையை பஞ்சாங்கம், காலண்டர் என இப்போது ஜாதகங்களில் கூட அச்சடித்து எளிதாகக் கொடுக்கின்றனர்.

இந்த ஓரை என்பது சுப காரியம் செய்வதற்கு ஆரம்பிப்பதற்கு பார்க்கப்படும் காலங்களாகும். இந்த ஓரை சூரிய உதயத்தினை வைத்துதான் கணக்கிடப்படுகின்றது.

சூரிய ஓரை என்றால் மேல் அதிகாரிகளை சந்தித்தல், கோர்ட்டு வழக்கு விவரங்களை கவனித்தல், அரசு சம்பந்தப்பட்ட பணிகள் போன்றவற்றை எடுத்துச் செய்யும் போது சாதகமாக அமையும் என்கின்றனர். ஆனால் இந்த ஓரையில் ஒப்பந்தங்கள் மற்றும் சுப காரியங்களை செய்வது இல்லை.

சுக்கிர ஓரை: சகல சுப காரியங்களுக்கும் உகந்த ஓரை என்பர். நகை, பொருள், வீடு, ஆடை வாங்கலாம்.

புதன் ஓரை: எழுத்து, கல்வி தொடர்பான செயல்களைச் செய்யலாம்.

சந்திர ஓரை: பொதுவில் வளர்பிறை சந்திரனுக்குத்தான் அதிக முக்கியத்துவம் கொடுக்கின்றார்கள். பெண் பார்த்தல், கல்யாணம், காது குத்தல், சீமந்தம் அனைத்தும் செய்வர்.

சனி ஓரை: இந்த ஓரையில் கடனை திருப்பி செலுத்த ஆரம்பிப்பர்.

குரு ஓரை: அனைத்தும் சுபமே. ஆனால் நியாயமற்ற எந்த வேலையை இந்த ஓரையில் செய்தாலும் செய்பவர் திண்டாடி, சீர் குலைவார். பொதுவில் எந்த நியாயமற்ற செயலையும் எந்த ஓரையிலும் செய்யாது இருப்பது நல்லது.

செவ்வாய் ஓரை: சொத்து பிரிப்பது, சொத்து விற்பது, வாங்குவது போன்ற செயல்கள் வெற்றி தரும். பொதுவில் அதிகாரம், சண்டை, வம்பு இவற்றினை இந்த ஓரையில் தவிர்த்து விட வேண்டும்.

வெள்ளிக்கிழமை-குரு ஓரையில் செயல்களை தவிர்க்க வேண்டும்.

செவ்வாய்-சனி ஓரையில் வாக்குவாதமே வேண்டாம்.

வாழ்க்கை என்பது சில ரகசியங்களை உட்கொண்டது. அதில் இதுவும் ஒன்று என்பதால் உங்களுடன் நானும் இதனை பகிர்ந்து கொள்கிறேன்.

ஏன் இந்த ஓரையினைப் பற்றி இங்கு குறிப்பிட்டு உள்ளோம். வாழ்வில் நேரம், காலம் என்பதுதான் மிக முக்கியமாக உள்ளது. கொஞ்ச நேரம் பிரண்டோடு அரட்டை அடிக்கலாம் என்றால் அந்த நேரம், காலத்தினை நாம் இழந்து விடுகின்றோம். சில நொடிகள் கூட வாழ்க்கைக்கு மிக முக்கியமானதுதான். அப்படியிருக்க பல மணி நேரங்களை நாம் வீணடிக்கின்றோம். கேட்டால் நேரம் சரியில்லை என்கின்றோம். முயன்றால் முடியாதது இல்லை-இது தன்னம்பிக்கை. கூடவே நம்பிக்கை இருப்பவர்கள் ஓரை பார்த்து செய்யலாமே. முயன்று பார்க்கலாமே. இது நமக்கு சித்தர்கள் காட்டிய வழிதானே.

எல்லாம் மாயைதான். எல்லாம் மாறும். எதுவும் நிலையானது இல்லை என்று சொல்லப்படுகின்றது. இது முற்றிலும் உண்மையே. ஆனால் இந்த பொறாமை மட்டும் வளர்ந்து கொண்டே போகின்றது. அடுத்த தலைமுறையினரையும் தொற்றிக் கொள்கின்றது. இதனின் முடிவு மிகப் பெரிய அழிவுகளை ஏற்படுத்தி விடுகின்றது.

ஒருவர் சற்று சிரித்தால் கூட அடுத்தவரால் அதனை பொறுத்துக் கொள்ள முடிவில்லை. ஒரு வீட்டில் அமைதி இருந்தால் மற்றவர் அதனை தானே முனைந்து வந்து கெடுப்பார்.

மகாபாரதத்தில் இதற்கான விளக்கத்தினை பார்த்தால் புரியும். திருதிராஷ்டிரனின் மனைவி காந்தாரை கர்ப்பமாக இருந்தாள். அந்நேரம் காட்டில் பாண்டுவின் மனைவி குந்தி பிள்ளைகளை பெற்றாள். தனக்கு முன்பே குந்தி பிள்ளைகளைப் பெற்றது காந்தாரியால் பொறுத்துக் கொள்ள முடியவில்லை. மனம் பொறாமையால் தகித்தது. காந்தாரி ஒரு உலக்கையை எடுத்து வயிற்றில் இடிக்க அவை 101 பிண்டங்களாக வெளியே வந்தன. அவற்றினை வியாசபிரான் 101 கலசங்களில் இட்டு பாதுகாக்க 100 கவுரவர்களும், ஒரு சகோதரியும் பிறந்தனர். பொறாமையின் உச்சத்தில் பிறந்த காரணத்தினால் பிறந்ததில் இருந்தே தீய எண்ணங்கள், தீய செயல்கள் இப்படியே வளர்ந்தனர். இதன் காரணமாகவே மகாபாரத போர் மூண்டது. அதன் அழிவு என்ன என்பதை அனைவரும் அறிவர். ஆக ஒருவரின் பொறாமை எந்த அளவு நாட்டினையே அழித்தது என்பதனைப் பாருங்கள். ஆக எந்த காரணம் கொண்டும் பொறாமை கொள்ளக் கூடாது. அது பொறாமை கொள்பவரையும், மற்றவர்களையும் அழித்து பாவ மூட்டைகளை குவித்து விடும்.

கமலி ஸ்ரீபால்

பொறாமை கிட்டே வந்து விடாமல் இருக்க அனைத்தும் மாயையே என்று மனதில் பதிய வைத்துக் கொண்டால் போதும்.

பசி இல்லாத போது எந்த உணவும் ருசியாகத் தெரியாது. அது போலத்தான் ஆன்மீக பசி இல்லாமல் மிகப்பெரிய செய்திகள் மனதில் பதியாது.

'பிறருக்கு நன்மையே நினைத்தால் நமக்கும் நன்மையே வந்து சேரும். இது பிரபஞ்ச விதி. இயற்கையின் சட்டம்'

பொறாமை தீ என்பதனை ஆன்மிகத் தேடல் மூலம் கட்டுப்படுத்த முடியும். பொதுவில் மருத்துவ ரீதியான தியான பயிற்றுவிப்பில், கோபம், பொறாமை 'பாதிப்பில்' அதிகம் உள்ளவர்களை ஒரு செயலினைச் செய்யச் சொல்வார்கள். அவர்கள் மனதிற்கு பிடிக்காதவர்களை நினைத்து 'வாழ்க வளமுடன்' என்று முழு கவனத்துடன் வாழ்த்தச் சொல்லுவார்கள். பல முறை அதாவது குறைந்தது பத்து நிமிடம் இவ்வாறு சொல்ல வேண்டும். கண்களை மூடி கைகளால் ஆசிர்வதித்து வாய்விட்டு சொல்ல வேண்டும். முதலில் ஆரம்பிக்கும் கால கட்டத்தில் அவர்கள் சொல்லும் 'வாழ்க வளமுடன்' என்ற சொல்லிலேயே எதிராளி மண்டை நொறுங்கி விழுந்து விடுவது போல் ஒலிக்கும். அத்தனை குரோதம் மனதிலும், உடலில் ஒவ்வொரு செல்களிலும் பரவி உள்ளது. ஒரு சில வாரங்களில் மெதுவாக இது கட்டுப்பட்டு மனம் அமைதி ஆகி விடும். இவர்களும் ஆன்மிகத் தேடலோ (அ) தன்னை நம்பி முன்னேறுதல் என ஏதாவது ஒரு வகையில் முன்னேறுவார்கள். உடல் நலமும் கூடும். பிறருக்கு நன்மை நினைப்பர். தீமை, கோபம், இவை இல்லாது இருப்பர். இத்தகைய நிம்மதி எத்தனை கோடிகள் கொடுத்தாலும் கிடைக்காது. செய்வோமே!

இந்த நிம்மதிக்கு மேலும் சில விதிமுறைகளை கடைபிடிக்கலாம். யாரும் நம்மை பார்க்க வேண்டும். கவனிக்க வேண்டும் என்று முயற்சி செய்யாதீர்கள். இது மிகப்பெரிய தீரா தலைவலியாகும்.

தேவைக்கு அதிகமாக பேசாதீர்கள்.

வம்பு செய்வது, ஒருவர் இல்லாத நேரத்தில் அவரைப்பற்றி பேசுவது போன்றவை நம் வாழ்க்கையில் வேண்டவே வேண்டாம். எப்பவும் நேர்த்தியாய் ஆடை உடுத்தி, கம்பீரமாய் இருங்கள். ஆடம்பரம் இல்லாமல் எளிமையிலும் இவ்வாறு இருக்க முடியும். உங்களின் நேரம் உங்களுக்கு முக்கியமானது.

சிறிதளவாவது தானம் தர்மம் செய்யுங்கள் 'மதியாதார் தலை வாசல் மிதியாதே' இதனை நினைவில் கொள்ளுங்கள். பாதி நிம்மதி இழப்பது இதனால்தான். இவற்றினையும் பழக்கத்தில் கொண்டு வருவோமே.

* பொதுவில் எதிலும், எவரிடத்திலும் சற்று தள்ளி இருப்பதே தெளிவாக இருக்கச் செய்யும்.

* அமைதி நமக்கு தேவைப்படும் போது பல உறவுகள் நம்மை விட்டு தள்ளிதான் இருக்கும்.

* பொய்யான வாக்குறுதிகளைக் கூறுவதனை விட நேராக எதனையும் முடியாது என்று கூறி விட வேண்டும்.