சிறப்புக் கட்டுரைகள்

மனிதன் என்றாலே மகிழ்ச்சியானவன். பிறரையும் மகிழ்ச்சி அடையச் செய்பவன் என்பது பொருள். ஆனால் இன்று மனிதர்கள் எல்லோரும் மகிழ்ச்சியாக வாழவில்லையே ஏன்? எப்பொழுது மகிழ்ச்சி இருக்குமென்றால் உடல் இயக்கம், மன இயக்கம் சரியாக இருந்து உடலில் ஆரோக்கியம் இருந்தால்தானே மகிழ்ச்சியாக இருக்க முடியும். ஆம், அந்த ஆரோக்கியத்தை தருவது, பெறுவது, அடைவதற்கு ஆசனம் ஒன்று தானே வழி, ஆசனத்தை பிடித்துக் கொண்டால் ஆனந்தம், மகிழ்ச்சி வாழ்வில் தானே வரும்.

ஆசனம் என்றாலே நிலையான இருக்கை, இந்த உடல் எழுந்ததில் இருந்து இரவு படுக்கும் வரை எதாவது ஒரு அசைவு இருந்து கொண்டேதானில் இருக்கிறது. கையை அசைப்போம், கண்ணை மூடி முழிப்போம், தலையை அசைப்போம், உடல் நிலையாக ஒரு நிமிடம் கூட இருப்பதில்லை. இதனால் உடலில் பிராணன் சமமான ஓட்டத்தில் உடல் முழுவதும் இயங்குவதில்லை. பிராணன் சமநிலை இழப்பதால் மனமும் சமநிலை இழந்து பல வகையான எண்ணங்கள் எழுகின்றது.

இந்நிலை மாற வேண்டிதான் உடலை ஒரு ஆசன நிலையில் நிலையாக நிறுத்தும்போது பிராணனும் உடலில் நிலையாக சீராக நடைபெறுகின்றது. இதனால் மனதில் எண்ணங்களும் சீரடைகின்றது. உடல், மனம், பிராணன் சமநிலை அடையும் பொழுது உடலில் உள்ள 72000 நாடி நரம்புகளிலும் ரத்த ஓட்டம், வெப்ப ஓட்டம், காற்றோட்டம் சீராக இயங்குகின்றது. அதனால் ஆரோக்கியமும், ஆனந்தமும் நம்மில் தவழ்கின்றது.

இவ்வளவு பெரிய அற்புத கலையாம் யோகக்கலை இருக்கும் பொழுது இதனை சட்டை பண்ணாமல் வாழ்வதினால் தான் இன்று பல வித நோய்களுக்கு மனிதர்கள் வசப்பட்டு அல்லல்படுகின்றனர். இதோ உடல், மனதிற்கு உற்சாகமளிக்கும், நரம்பு மண்டலத்தை சிறப்பாக இயங்கச் செய்யும் சகல நோய்களையும் நீக்கும் "சப்த கோணாசனம்" செய்முறை பற்றி அறிவோம்.

செய்முறை

விரிப்பில் நேராக அமரவும். இரு கால்களையும் எவ்வளவு தூரம் அகற்ற முடியுமோ அகற்றவும்.

இரு கால் பெருவிரலையும் இரு கைகளால் பிடிக்கவும்.

மெதுவாக இரு கால்களையும் உயர்த்தவும்.

படத்தில் உள்ளது போல் சாதாரண மூச்சில் பத்து முதல் பதினைந்து வினாடிகள் இருக்கவும்.

பின் மெதுவாக கால்களை கீழே வைத்து கைகளை எடுத்து சாதாரணமாக அமரவும்.இரண்டு முறைகள் செய்யவும்

குறிப்பு: இந்த ஆசனத்தை அவசரப்படாமல் நிதானமாக பழகவும்.

அடி முதுகு வலி உள்ளவர்கள், உடலில் அறுவை சிகிச்சை செய்தவர்கள் யோகாசன வல்லுனரின் ஆலோசனைப்படி நேரில் பழகவும்.

படிக்கின்ற மாணவர்கள் உடல் நலமுள்ளவர்கள் எளிமையாக பழகலாம்.

முதலில் காலை ஒரு அடி அகற்றி பழகவும். பின் படிப்படியாக கால்களை இரு அடி, மூன்றடி, பின்பு படத்தில் உள்ளது போல் கால்களை அகற்றி பழகலாம்.

பலன்கள்

மூலம், மலச்சிக்கல், உள்மூலம், வெளிமூலம் நீங்கும். ரத்த மூலமும் நீக்கும்.

உடலில் உள்ள நரம்பு மண்டலம் அனைத்தும் சிறப்பாக இயங்கும். நரம்புகள் வலுப்பெறும், நரம்பு தளர்ச்சி நீங்கும்

சிறுநீரகம் சிறப்பாக இயங்கும். அதில் உள்ள கழிவுகள் அனைத்தும் வெளியேறும். கோனாடு சுரப்பியும் ஒழுங்காக சுரக்கும். பசி எடுக்காமல் வயிறு உப்பிசமாக இருந்தால் சிறுநீரகம் சரியாக இயங்கவில்லை என்று அர்த்தம். இந்த ஆசனத்தால் சிறுநீரகமும் நன்றாக இயங்கும். பசி நன்கு எடுக்கும். வயிறு உப்பிசம் நீங்கும்.

இளமை

தசைகட்டுப்பாடு ஏற்படும். அதிக தொடை, இடுப்பு சதை குறையும், மேலும் என்றும் இளமையுடன் இருக்கலாம். பெண்களுக்கு கால் தொடை, இடுப்பு சதை, வயிறு குறைய நல்ல ஆசனமிது

வாயு சம்மந்தமான பிரச்சினைகள் நீங்கும். அதனால் மூட்டு வாயு நீக்கி மூட்டு வலியும் நீங்குகின்றது

கால் பாதம் வீங்குதல், பாத வலியை நீக்கும்.

ஆண்களின் உயிர் சக்தியை அதிகரிக்க செய்யும். பிறப்புறுப்பில் ஏற்படும் பிரச்சினைகள் நீங்கும்.

இந்த ஆசனத்துடன் மஞ்சள் கரிசலாங்கண்ணி கீரை வாரம் இருமுறை உண்ணுங்கள், ரத்த சுத்திகரிப்பு ஏற்படும். சுறுசுறுப்பாக வாழலாம்.

வாசகர் கேள்வி

நமது தனிப்பட்ட திறமை வெளிப்பட்டு அதன் மூலம் நாம் வாழ்வில் மகிழ்ச்சியாக வாழ என்ன யோக முத்திரைகள் உள்ளது. சில நபர்களுக்கு நல்ல திறமை இருக்கும். ஆனால் அவர் தனது திறமைக்கேற்ற வேலை கிடைக்காமல் வேறு ஒரு தொழில் புரிவார். மன உளைச்சலும் இருக்கும், நமது திறமைக்கேற்ற வாய்ப்புக்கள் கிடைக்க என்ன வழி?

பதில்

இன்று நிறைய நபர்களுக்கு இந்த பிரச்சினை இருக்கிறது. ஒவ்வொரு மனிதனுடைய திறமை வெளிப்படவும், அதனை பயன்படுத்தி முன்னேற வாய்ப்பு கிடைக்க குபேர முத்திரையை பயில வேண்டும். இதன் மூலம் நமது திறமை வெளிப்படும். திறமைக்கேற்ற வேலையிலும் நாம் அமரலாம். தன்னம்பிக்கை கிடைக்கும். இம் முத்திரையை காலை, மதியம், மாலை மூன்று வேளையும் ஐந்து நிமிடங்கள் செய்ய வேண்டும். சாப்பிடுமுன் செய்யவும்.

குபேர முத்திரை செய்முறை

விரிப்பில் நிமிர்ந்து அமரவும். தரையில் அமர முடியாதவர்கள் நாற்காலியில் அமரவும். மோதிரவிரல், சுண்டு விரலை மடித்து உள்ளங்கையில் வைக்கவும். ஆள்காட்டி விரல், நடு விரலை மடித்து அதன் மையத்தில் கட்டை விரலை தொடவும். இரு கைகளிலும் செய்யவும். கைகளை முட்டியின் மேல் வைக்கவும். கண்களை மூடி மிக மெதுவாக மூச்சை இழுத்து மிக மெதுவாக மூச்சை வெளிவிடவும் ஐந்து முறை. பின் இயல்பாக நடக்கும் மூச்சை கவனிக்கவும்.

ஆள் மனதில், எனது திறமை நிச்சயம் வெளிப்படும். என் திறமைக்கேற்ற வேலை கிடைக்கும். அதில் நான் சிறப்பாக பணி செய்வேன், நல்ல பொருளாதார மேன்மை கிட்டும். அதனை நல் வழிக்கு பயன்படுத்துவேன் என்று மூன்று முறை கூறி விட்டு சாதாரண மூச்சில் ஐந்து நிமிடங்கள் இருக்கவும்.

தொடர்ந்து 48 நாட்கள் இடைவிடாமல் காலை / மதியம் / மாலை பயிற்சி செய்யவும். அளவிடற்கரிய பலன்கள் கிட்டும். பண்புகள் மாறும், திறமை வெளிப்படும். திறமைக்கேற்ற வேலை கிடைக்கும். தன்னம்பிக்கையும் அதிகரிக்கும் .இது ஒரு சங்கல்ப முத்திரையாகும். நாம் நினைத்ததை நிச்சயம் அடையலாம்.

தினமும் காலை எழுந்தவுடன் நிமிர்ந்து அமர்ந்து இரு நாசி வழியாக மெதுவாக மூச்சை இழுத்து மிக மெதுவாக மூச்சை வெளியிடுங்கள். பத்து முறைகள், இதே போல் மதியம், மாலை பயிற்சி செய்யுங்கள் நல்ல பிராண சக்தி உடல் முழுவதும் பாயும். தெளிந்த சிந்தனை பிறக்கும். அறிவில் மலர்ச்சி உண்டாகும். அத்துடன் காலை எழுந்து குளித்துவிட்டு கிழக்கு முகமாக ஒரு விரிப்பு விரித்து அமர்ந்து சிறிய நாடிசுத்தி என்ற பயிற்சியை செய்யவும்.

இடது கை சின் முத்திரையில் வைக்கவும். பெருவிரலையும் ஆள்காட்டி விரலையும் இணைக்கவும். மற்ற விரல்கள் தரையை நோக்கி இருக்கட்டும்.

வலது கை கட்டை விரலால் வலது நாசியை மூடவும். இடது நாசி வழியாக மெதுவாக மூச்சை இழுத்து மிக மெதுவாக மூச்சை வெளிவிடவும். பத்து முறைகள் செய்யவும். பின் இடது நாசியை மோதிரவிரலால் அடைத்து வலது நாசியில் மெதுவாக மூச்சை இழுத்து வலது நாசியிலேயே மூச்சை மெதுவாக வெளிவிடவும். இதுபோல் பத்து முறைகள் செய்யவும்.

பின் வலது நாசியை அடைத்து இடது நாசியில் மூச்சை இழுத்து இடதை அடைத்து வலது நாசியில் மூச்சை விடவும். இடதில் இழுத்து வலதில் மூச்சை விடவும். பத்து முறைகள் செய்யவும்.

பின் இடது நாசியை அடைத்து வலதில் இழுத்து இடது நாசியில் வெளிவிடவும். இதுபோல் பத்து முறைகள் செய்யவும். இதனை காலை / மாலை இரு வேளை செய்யவும்.

இந்த பயிற்சியின் மூலமாக மூளை செல்களுக்கு நல்ல ரத்த ஓட்டம் பாயும். சுறுசுறுப்பாகவும். உற்சாகமாகும் இருக்கலாம். சிந்தனை தெளிவு பிறக்கும். அறிவில் மலர்ச்சி உண்டாகும். நமது திறமை நன்கு வெளிப்படும்.

திறமை வெளிப்பட அன்றாட வாழ்க்கைமுறை

அதிகாலை 4 மணிக்கு எழுந்துவிட வேண்டும். காலை கடன்களை முடித்துவிட்டு எளிய குபேர முத்திரை, மூச்சு பயிற்சி செய்துவிட்டு கண்களை மூடி இயல்பாக நடக்கும் மூச்சில் கவனம் செலுத்தவும். பத்து நிமிடம் முதல் பதினைந்து நிமிடங்கள் இருக்கவும். இது ஒரு தியானமாகும். நமது மூச்சில் கவனம் செலுத்தும் பொழுது மனம் ஒருமுகப்படும். மன அமைதி கிடைக்கும். நமக்குள் உள்ள திறமை வெளிப்படும்.

காலை 8 மணி முதல் 8.30 மணிக்குள் காலை உணவு அருந்தவும். மதியம் 1 மணி முதல் 1.30 மணிக்குள் மதியம் உணவு அருந்தவும்.

இரவு 7 மணி முதல் 8 மணிக்குள் இரவு உணவு அரைவயிறு சாப்பிடவும். இரவு 10 மணிக்கு படுத்துவிட வேண்டும். இரவு 10 மணி முதல் காலை 4 மணி வரை ஆழ்ந்த உறக்கம் வேண்டும்.

எண்ணைய் பண்டம், மைதாவினால் ஆன உணவு, அதிக காரம், அதிக புளிப்பு, தவிர்த்து காய்கறிகள், கீரைகள், பழங்கள், உணவில் அதிகம் சேர்க்கவும். இப்படி வாழ்வை அமைத்தால்தான் உடல் ஆரோக்கியம் கிட்டும். உடல் உள் உறுப்புக்கள் நன்கு இயங்கினால்தான் திறமை வெளிப்படும். அதனை பயன்படுத்தி வளமாக வாழலாம்.

பெ.கிருஷ்ணன்பாலாஜி, M.A.(Yoga)

6369940440

pathanjaliyogam@gmail.com

மகா பெரியவாளின் பரிபூரண அருளைப் பெற்ற பல்லாயிரக்கணக்கான பக்தர்களில் நரம்பியல் அறுவை சிகிச்சை நிபுணர் டாக்டர் எஸ்.கல்யாணராமனும் ஒருவர்.

நரம்பியல் தொடர்பான மருத்துவத் துறையில் இவருக்கென்று தனி இடம் உண்டு. எத்தனையோ விருதுகளைப் பெற்றுக் குவித்தவர்.

பெரியவாளின் அத்யந்த பக்தரான இவருக்கு தனிப்பட்ட அனுபவங்கள் ஏராளம் உண்டு.

ஒன்றா? இரண்டா? ஏராளம்.

பூர்வ ஜென்மங்களில் டாக்டர் கல்யாணராமன் செய்த புண்ணியத்தின் விளைவாகவும், பெற்றோரின் ஆசியினாலும் மகா பெரியவாளை அடிக்கடி தரிசிக்க வாய்ப்பு ஏற்பட்டது.

குருவின் அருகே நெருங்குவதற்கு, சம்பந்தப்பட்ட குருவின் ஆசி வேண்டும். அவரது அழைப்பு இல்லாமல், விருப்பம் இல்லாமல் ஒருவர் அத்தனை சுலபத்தில் நெருங்கி விட முடியாது.

டாக்டர் கல்யாணராமனுக்குப் பெரியவாளிடம் இருந்து கிடைத்த அழைப்பும் ஆசியும் அமோகம் என்றே சொல்ல வேண்டும்.

பிரதோஷம் மாமா என்கிற பிரதோஷம் வெங்கட்ராமய்யர் மகா பெரியவாளின் அத்யந்தமான பக்தர் என்பதை நாம் அறிவோம். இவருக்குப் பெரியவாளிடம் இருந்த பக்தியை விவரிப்பதற்கு வார்த்தைகளே இல்லை. ஒவ்வொரு பிரதோஷ தினத்தின்போதும் மகா பெரியவா தரிசனத்துக்குச் சென்று விடுவார். மகான் எங்கே இருந்தாலும் தேடிப் போய் தரிசனம் செய்வார். அப்படிப்பட்ட ஒரு பக்தி இவருக்கு!

ரெயில்வேயில் பணி புரிந்தவர் பிரதோஷம் மாமா. எனவே, சென்னை எழும்பூரில் ரெயில்வே குடியிருப்பில் வசித்து வந்தார். அப்போது அவரது இல்லம் அருகே வசித்து வந்தவர்தான் டாக்டர் கல்யாணராமன்.

மகா பெரியவாளுடன் ஏராளமான அனுபவங்கள் கல்யாணராமனுக்குக் கிடைப்பதற்குக் காரணம் - பிரதோஷம் மாமாதான். பெரியவாளைத் தரிசிக்கத் துவங்கிய பின்தான் தன் வாழ்க்கையில் எத்தனையோ நல்ல மாற்றங்கள் நிகழ்ந்துள்ளதாக இவரே குறிப்பிட்டிருக்கிறார்.

பெரியவாளுடனான பல தரிசனங்களுக்குப் பிறகுதான், பக்தியைப் பற்றித் தன்னால் தெரிந்து கொள்ள முடிந்தது என்பார் கல்யாணராமன்.

மகா பெரியவா பீடாதிபதி ஆனதைக் கொண்டாடும் வகையில் ஒரு விழாவை சிறப்பாக எடுத்து நடத்தினார் பிரதோஷம் மாமா.

சென்னையில் இந்த விழாவை ஹோமம், பாராயணம், அன்னதானம், ஊர்வலம் என்று பலரும் பரவசப்படும்படி விமரிசையாக நடத்தினார்.

இதற்கான ஊர்வலத்துக்கு ஒரு ரதம் ஏற்பாடு செய்யப்பட்டது. அந்த ரதத்தில் அலங்கரிக்கப்பட்ட மகா பெரியவாளின் திருவுருவப் படம் பிரதானமாக வைக்கப்பட்டது. ரதம் முழுக்க வண்ண வண்ணப் பூக்களால் அலங்காரம் செய்யப்பட்டிருந்தது.

எழும்பூரில் பிரதோஷம் மாமா வசிக்கின்ற இல்லத்தில் இருந்து இந்த ஊர்வலம் புறப்பட்டு, புரசைவாக்கம் கங்காதீஸ்வரர் கோயில் வரை சென்று திரும்பி வருவதாக ஏற்பாடு.

மேள தாளம், வாணவேடிக்கை, வேத பாராயணம், திருமுறை பாராயணம் என்று இந்த ஊர்வலம் திரளான பக்தர்களோடு புறப்பட்டது. பெரியவா ரதத்தோடு வந்த பக்தர்கள் எழுப்பிய 'ஜய ஜய சங்கர ஹர ஹர சங்கர' கோஷம் விண்ணையே முட்டியது.

ஊர்வலம் என்றால் அதற்கு யானை, குதிரை போன்றவை அழகு. அதுவும் ஆன்மிகம் சார்ந்து நடக்கின்ற ஊர்வலங்களில் இவற்றை நாம் அதிகம் பார்த்திருக்கிறோம். அதுபோல் இந்த மகா பெரியவா ரத யாத்திரையிலும் யானை, குதிரை இடம் பெற வேண்டும் என்று ஆசைப்பட்டார் பெரியவா பக்தரான முக்கூர் ஸ்ரீநிவாச்சார்யர். இதற்காக சென்னையில் அமைந்துள்ள ஒரு மகாலட்சுமி திருக்கோயிலில் இருந்து இவற்றை ஏற்பாடு செய்து ஊர்வலத்துக்கு அனுப்பி இருந்தார்.

வெகு சிறப்பாக ஊர்வலம் நடந்து முடிந்தது. விழாக் காட்சிகளைப் படம் பிடிக்க ஒரு புகைப்படக்காரர் பிரத்தியேகமாக அமர்த்தப்பட்டிருந்தார். இந்த ஊர்வலக் காட்சிகளை படம் எடுத்துத் தள்ளினார் அவர்.

பொதுவாக பெரியவா தொடர்பான ஏதேனும் வைபவம் பூர்த்தியான பின், அடுத்த நாள் இந்தப் பிரசாதத்தைக் கொண்டு போய் பெரியவாளிடம் சமர்ப்பிப்பார் பிரதோஷம் மாமா. அதன்படி அடுத்த நாள் பிரசாதங்களைக் கொண்டு போய் பெரியவாளிடம் சேர்த்து நமஸ்கரித்தார் பிரதோஷம் மாமா. அவற்றை ஏற்றுக் கொண்டு ஆசிர்வதித்தார் மகான்.

இதை அடுத்த ஒரு சில நாட்கள் கழித்து, இந்த வைபவத்தில் எடுக்கப்பட்ட புகைப்படங்கள் ஒரு ஆல்பத்தில் போட்டு பிரதோஷம் மாமாவிடம் கொண்டு வந்து சேர்ப்பித்தார் புகைப்படக்காரர்.

ஆல்பத்தைப் புரட்டிப் பார்த்த பிரதோஷம் மாமா பெரிதும் மகிழ்ந்தார். இந்த ஆல்பத்தை உடனடியாக பெரியவாளிடம் கொண்டு போய்க் காண்பிக்க வேண்டும் என்று விருப்பப்பட்டார். யாரிடம் கொடுத்து அனுப்பலாம் என்று யோசித்த பிரதோஷம் மாமாவுக்கு டாக்டர் கல்யாணராமன் நினைவுக்கு வந்தார்.

உடனே அவரை வரவழைத்து ஆல்பத்தைக் கொடுத்தார். பெரியவாளிடம் இதைக் காண்பித்து விட்டு வருமாறு கல்யாணராமனிடம் சொன்னார் பிரதோஷம் மாமா.

ஆல்பத்தைக் கையில் வாங்கிய கல்யாணராமனுக்கு சந்தோஷமான சந்தோஷம். காரணம் மகா பெரியவாளின் அருகே செல்வதற்கும், அந்த மகானுடன் சம்பாஷணை நிகழ்த்துவதற்கும் தனக்கு ஒரு வாய்ப்பு கிடைத்திருக்கிறதே என்கிற பூரிப்புதான்!

பெரியவா திருச்சந்நிதிக்கு ஒருவரை அனுப்ப நேர்கிறது என்றால், அதற்குத் தகுதியான ஒருவரைத்தானே பிரதோஷம் மாமா தேர்வு செய்து அனுப்புவார்! அந்த வகையில் டாக்டர் கல்யாணராமன் தேர்வானார்.

பெறற்கரிய பொக்கிஷமான அந்த ஆல்பத்தை எடுத்துக் கொண்டு பெரியவா திருச்சந்நிதிக்குப் புறப்பட்டார்.

'பிரதோஷம் மாமாவிடம் இருந்து வருகிறார்... சென்னையில் நடந்த விழா ஆல்பத்தைப் பெரியவாளிடம் காண்பிப்பதற்கு வருகிறார்' என்ற காரணத்தால், நேராக மகானிடம் அழைத்துச் செல்லப்பட்டார் டாக்டர் கல்யாணராமன்.

பெரியவா தரிசனத்துக்குத் திரளான பக்தர்கள் காத்துக் கொண்டிருந்தனர். மகானின் பார்வை தங்கள் பக்கம் திரும்பாதா என்று ஏங்கிக் காத்துக் கொண்டிருந்தார்கள்.

'பிரதோஷம் மாமாவிடம் இருந்து டாக்டர் கல்யாணராமன் மூலமாக புகைப்பட ஆல்பம் வந்துள்ளது' என்கிற தகவல் தொண்டர்கள் மூலமாக பெரியவாளுக்குத் தெரிவிக்கப்பட்டது.

புன்னகையுடன் கல்யாணராமனை அருகே அழைத்து அவரிடம் இருந்த ஆல்பத்தை வாங்கிக் கொண்டார் மகான்.

அதில் இருக்கின்ற புகைப்படங்களை ஒவ்வொரு பக்கமாகப் புரட்டிப் பார்த்தார் பெரியவா. பார்த்து முடித்ததும், ஆல்பத்தைத் திரும்பக் கொடுத்தார் கல்யாணராமனிடம்.

அதைப் பெற்றுக் கொண்ட டாக்டர், சென்னை திரும்புவதற்கு உத்தரவு கேட்டார்.

டாக்டர் கல்யாணராமனை தன் விழிகளால் ஊடுருவிப் பார்த்தார் பெரியவா. பிறகு, ''இந்த ஆல்பத்துல இருக்கிற படங்களை எல்லாம் நீ பாத்தியா?'' என்று கேட்டார்.

''பார்த்தேன் பெரியவா...'' - பவ்யமாகச் சொன்னார் கல்யாணராமன்.

''ஊர்வலத்துல ஒரு யானை போனதே... அந்த யானையோட நெற்றியில நாமம் இருந்ததா?''

''நாமம் இருந்தது பெரியவா...'' - பதற்றத்தின் காரணமாக சற்றுத் தயங்கியபடி பதில் வந்தது டாக்டர் கல்யாணராமனிடம் இருந்து.

''அந்த ஆல்பத்தை நீ இன்னும் ஒரு தடவை வேணா பாத்துட்டு சரியா சொல்லு...'' என்றார் பெரியவா புன்னகையுடன்.

ஆல்பத்தைப் புரட்டிப் பார்த்தார் கல்யாணராமன். யானையின் நெற்றியில் நாமம் காணப்பட்டது (காரணம் - சென்னையில் அமைந்துள்ள மகாலட்சுமி ஆலயத்தில் இருந்து அழைத்து வரப்பட்ட யானை இது).

''யானைக்கு நாமம் இருக்கு பெரியவா'' என்றார் கல்யாணராமன்.

''அந்த ஆல்பத்துல குதிரையைப் பாத்தியோ?'' - பெரியவாளின் அடுத்த கேள்வி இது.

''பாத்தேன் பெரியவா... அன்னிக்கு யானையோடு குதிரையும் வந்திருந்தது.''

''குதிரையைப் பாத்தியோல்யோ... அதுல ஏதாவது விசேஷம் தெரிஞ்சுதா உனக்கு?'' என்று டாக்டர் கல்யாணராமனிடம் கேட்டார் பெரியவா. என்ன பதில் சொல்வதென்று சட்டென்று தெரியவில்லை கல்யாணராமனுக்கு.

'என்ன பதில் சொல்லப் போகிறார்' என்று இவரையே தீர்க்கமாகப் பார்த்துக் கொண்டிருந்தார் பெரியவா.

(தொடரும்)

swami1964@gmail.com

திருமணம் செய்வதற்கு முன்பு வது, வரனின் ஜாதகத்திற்கு பொருத்தம் பார்க்கும் வழக்கம் இந்து மதத்தை சார்ந்தவர்களிடம் காணப்படுகிறது.

திருமணத்திற்கு வரன் பார்க்கும் பெற்றோர்கள் குடும்பம், வயது, படிப்பு, அழகு, வசதி ஆகியவற்றுடன் ஜோதிடத்தில் நம்பிக்கை உள்ளவர்கள் ஜாதகமும் பார்ப்பார்கள். ஜாதகம் பொருந்தவில்லை என்றால் திருமணம் செய்யமாட்டார்கள். அதுவும் பெற்றோர்களால் நிச்சயிக்கப்படும் திருமணங்களில் பொருத்தம் பார்த்துதான் திருமணம் செய்வார்கள். இன்னாருக்கு இன்னார் என்று நிச்சயித்த விதிப்படி தான் திருமண வாழ்க்கை அமையும். அப்படி இருக்க திருமணப் பொருத்தம் ஏன் பார்க்க வேண்டும் என்பது சில சமூக ஆர்வலர்களின் கேள்வியாக உள்ளது.

திருமணம் என்பது இரு உடல் மட்டும் அல்ல, இரு மனங்கள் இரண்டறக் கலப்பதாகும். கணவன்-மனைவி உறவு என்பது ஆயிரம் காலத்துப் பயிர். ஒருவருக்கு நல்ல வாழ்க்கை துணை கிடைத்தால் திருமண வாழ்க்கை இனிமையாகும். அதே நேரம் பொருத்தம் இல்லாத வாழ்க்கைத் துணை அமைந்தால் வாழ்க்கையே நரகமாகும். ஒரு பெண்ணின் பெற்றோர்கள் ஒரு மாப்பிள்ளையின் படிப்பு, உத்தியோகம், சொத்து, சுகம் பற்றி எளிதாகஅறிந்து கொள்ள முடியும். ஆனால் அவன் பண்புள்ளவனா? அன்புள்ளவனா? தன் பெண்னை கண் கலங்காமல் வைத்துக் காப்பாற்றத் தகுதியள்ளவனா என்பதை பழகிப் பார்த்தால் தான் அறிய முடியும். இதை அவர்களுக்கு தெளிவாக தெரிவிப்பதுதான் ஜனன ஜாதகம். திருமணம் நல்ல முறையில் சிறந்து விளங்க ஜாதகப்பொருத்தம் எவ்வாறு உதவுகிறது. அதை ஜாதகத்தின் மூலம் எப்படி அறிவது என பார்க்கலாம்.

திருமணம்

இன்னாருக்கு இன்னார் என்று பிரபஞ்சம் விதித்த விதியின் படி தான் திருமணம் நடக்கும் என்பது நிதர்சனமான உண்மை.

ஒருவருக்கு அழகான, படித்த, வசதியான, நல்ல உத்தியோகத்தில் உள்ள பெண்ணை வாழ்கைத் துணையாக தேர்வு செய்யும் ஆர்வம் இருக்கலாம். 2,7,10 சம்பந்தம் இருந்தால் சம்பாதிக்கும் மனைவி அமைவார். 7-ம் அதிபதி தனம் ஸ்தானத்து சம்பந்தம் பெறாத ஒருவருக்கு மனைவி மூலம் பொருள் கிடைக்காது. விதியில் இல்லாத அமைப்பு உள்ள வரனைத் தேடி காலம், நேரம், பொருள் விரயமாகும். இந்த இடத்தில் ஜோதிடம் உங்களுக்கு உறுதுணையாக நின்று விதி வழி வாழ்க்கையை அமைக்க உதவுகிறது.

குழந்தைப் பேறு

சிலருக்கு திருமணம் முடிந்தவுடன் குழந்தை பிறக்கும் , சிலருக்கு சிறிது காலம் கடந்த பிறகு புத்திர பிராப்தம் கிடைக்கும். பலருக்கு இயற்கையாக குழந்தை உருவாகும். சிலருக்கு மருத்துவ உதவிக்குப் பிறகு கரு தங்கும்.

விதிப்படி புத்திர பாக்கியம் உருவாகும் காலத்தை கணித்துக் கொடுப்பது தான் ஜோதிடம்.

சொத்து

தற்காலத்தில் சொத்து, சுகத்துடன் உள்ள வரனை தேர்வு செய்வதையே அனைவரும் விரும்புகிறார்கள். அசையும், அசையாச் சொத்துக்கள் இல்லாத இடத்தில் யாரும் பெண் எடுக்கவும் கொடுக்கவும் விரும்புவதில்லை.

மனிதனின் வாழ்நாள் லட்சியமான சொத்து எல்லோருக்கும் கிடைப்பதில்லை. சிலர் பிறக்கும் போதே சொத்துடன் பிறக்கலாம். சிலர் பிறந்த பிறகு பெற்றோர் சொத்து சேர்க்கலாம். சிலருக்கு சுய உழைப்பில் சொத்து உருவாகலாம். சிலரின் சொத்து தலை முறைக்கும் நிலைத்து நிற்கும். சிலரின் சொத்துக்கள் குறிப்பிட்ட காலத்தில் கைவிட்டுப் போகும். அந்த கால கட்டத்தில் மனைவி அல்லது பிள்ளைகளின் பெயரில் சொத்தை மாற்றி எழுதினால் இழப்பைத் தவிர்க்கலாம். இக்கட்டான சூழ்நிலையில் கரையைக் கடக்கும் கலங்கரை விளக்கமாக இருப்பது தான் ஜோதிடம்.

தொழில்

சிலர் நல்ல உத்தியோக வரனை எதிர்பார்கலாம். சிலர் சுய தொழில் வரனை விரும்பலாம்.

சிலரின் விதிப்படி சொந்த தொழில் சிறப்பாக இருக்கும். சிலருக்கு குலத்தொழில் அமையும், சிலருக்கு அடிமைத் தொழில் தான் நன்றாக இருக்கும், சிலருக்கு அரசு உத்தியோகம் அல்லது தனியார் வேலை என ஒருவரின் வாழ்வாதாரத்தில் பல்வேறு வகை உள்ளது. சொந்த தொழில் அமைப்பு இல்லாத ஒருவர் தொழிலால் கடன் படலாம் அல்லது தொழில் வளராது. இது போன்ற காலகட்டத்தில் வரப்போகும் வாழ்க்கைத் துணையின் வாழ்வாதாரம் சுய தொழிலா?

அடிமைத் தொழிலா என்பதை விதிப்படி உணர்த்துவதே ஜோதிடம்.

நோய், கடன்

இவை இரண்டும் இரட்டைப் பிறவிகள். சிலருக்கு ஒரு சில குறுகிய காலம் மட்டும் கடன் இருக்கும். சிலருக்கு வாழ்நாள் முழுவதும் தொடரும். சிலருக்கு கடனை நினைத்து பயந்து நோய் வரும். ஒருவருக்கு எதிர்காலத்தில் வரக்கூடிய ஒரு நோயை துல்லியமாக ஜோதிடத்தில் கணக்கிட முடியும். ஒருவரின் ஜாதகப்படி கடன் உருவாகும் காலம், அடைபடும் காலம், நோய் உருவாகும் காலம், நோயில் இருந்து விடுபடும் காலம்,நோய்க்கு எந்த முறை சிகிச்சையை தேர்வு செய்வது இது போன்ற பல்வேறு விஷயங்களை அறிவுறுத்தி விதியை சுமூகமாக கடக்க உதவி செய்வது ஜோதிடம். தம்பதிகள் எதிர்காலத்தில் நோய், கடனால் பாதிக்கப்படுவார்களா என்பதை அவசியம் திருமணத்திற்கு முன்பு தெரிந்து கொள்ள வேண்டும். பல குடும்பங்களை பிரிக்கும் நோய், கடன் பற்றிய தெளிவு நல்லது.

கோட்சாரம்

ஒருவருக்கு ஏழரைச் சனி காலத்தில் ராசிக்கு 12-ல் சனி வரும் போது விரயச் சனி நடக்கும்.

அவரவரின் தசா புத்தி ரீதியாக திருமணம், வீடு, வாசல் என சுப விரயம் உண்டாகலாம். அல்லது தொழில் நட்டம், வைத்தியம் என அசுபமாக விரையமாகலாம்.

அதை முழு சுப விரயமாக மாற்றுவதும், அசுப விரயமாக மாற்றுவதும் அவரவர் தனிப்பட்ட வினைப்பயனே. ஏழரை சனி ஆரம்பிப்பதற்கு முன்பே சனி லாபஸ்தானத்தை கடக்கும் முன்பு கோட்சார சனி பாதிக்காது என்றால் இயல்பான வாழ்க்கை வாழலாம். பாதிப்பு இருக்கும் என்ற நிலை இருந்தால் சொத்தோ, பணமோ மறைமுகமாக இருக்க வேண்டும் அதாவது மனைவி பிள்ளைகள் பெயரில் இருக்க வேண்டும். கடுமையான கால கட்டத்தில், இந்த மாதிரி வினைப்பயனை ஓரளவு மாற்றி விட்டால், தீய பலனின் தாக்கத்திலிருந்து ஓரளவு தப்பித்துக் கொள்ளலாம். அதே போல் ராகு/கேது, குரு போன்ற வருட கிரகங்களின் பெயர்ச்சி திருமண காலத்தில் அல்லது திருமணம் நடந்த குறுகிய காலத்திற்கு பாதிப்பை ஏற்படுத்தாமல் இருக்கும்.

தசா ரீதியான பொருத்தம்

மானிட வாழ்வில் நன்மை, தீமைகளை தீர்மானிப்பதில் தசா- புத்தியின் பங்கு அளப்பரியது.

ஒருவர் ஜாதகத்தில் உள்ள நன்மை தீமைகளை கிரகங்களின் தசா காலங்களில் மட்டுமே அனுபவிப்பார்கள். இருவர் ஜாதகத்திலும் நன்மை தரும் தசா ஒருசேர வருவது போலும் தீமை தரும் தசா வரும் காலங்களில் ஒருவருக்கு வரும் தீமை மற்றவரின் தசாவால் சரிசெய்யக் கூடியதாக இருக்க வேண்டும்.

அத்துடன் ஒரே கிரகத்தின் தசா இல்லாமல் இருப்பதுடன் இருவருக்கும் ஒரே தசா இருந்தால் 3 வருட இடைவெளி இருக்கும் படி அமைக்க வேண்டும். தசாநாதர், சாரநாதர் பகை கிரகமாக இல்லாமல் இருப்பது தம்பதியரிடையே ஒற்றுமையை ஏற்படுத்தும்.

ஒவ்வொருவரும் அவருடைய சுய ஜாதகத்தை அந்தந்த காலகட்டத்திற்கு ஆராய்ந்து விதியோடு ஒன்றி வாழப் பழகினால் வாழ்வில் பெரும் துன்பம் நிகழாது. இது போன்று பல்வேறு பிரச்சினைகளை வரப்போகும் சுப, அசுபத்தை ஜோதிடம் மூலம் உணர முடியும்.

ஒருவருக்கு விதிக்கப்பட்டதை ஜாதகரைத் தவிர யாராலும் மாற்ற முடியாது. அதை அனுபவித்து தான் ஆக வேண்டும். ஆனால் அதை எப்படி அனுபவிக்க வேண்டும் என்பதையும் இறைவன் அவரவர் கையில் தான் கொடுத்துள்ளார்.

அதுதான் ஆறாம் அறிவு எனும் திருமணப் பொருத்தம்.

உளவியல் ரீதியாக கடந்த நூற்றாண்டு வரை பெண்களுக்கு எந்தவிதமான சுதந்திரமும் இருக்கவில்லை. பெண்ணானவள் முழுக்க முழுக்க ஆண்மகனையே சார்ந்து வாழும் சூழ்நிலை இருந்தது. ஒரு ஆண் தன் மனைவியை உதறித் தள்ளி விட்டுவேறு பெண்ணை சேர்த்துக் கொள்ளும் வழக்கம் சர்வசாதாரணமாக இருந்து வந்தது. இதனால் பெண்ணின் வாழ்க்கைக்கு எந்த வித உத்தரவாதமும் பாதுகாப்பும் இல்லாத நிலை இருந்து வந்தது. இதனால் பெண்ணை பெற்றவர்கள் தங்கள் மகளை கைபிடிப்பவன் தன் மகளுடன் எல்லா விதத்திலும் இணக்கமுடன் நடந்து கொள்வானா? தன் பெண்ணுக்கு உறுதுணையாக இருப்பானா? எந்த சூழ்நிலையிலும் தன் மகளை கைவிடாமல் இருப்பானா? தன் மகளின் விருப்பங்களை பூர்த்தி செய்வானா? என்பது போன்ற வினாக்களுக்கு விடைகாண வழிமுறைகளை தேடினார்கள்அதற்கென நம் முன்னோர்கள் கண்ட வழிமுறைகள் தான் பொருத்தம் பார்க்கும் முறையாகும். மேலும் பொருத்தம் பார்க்கும் முறையை ஆராய்ந்து பார்த்தால் இது தெளிவாக விளங்கும். அதில் பெண் நட்சத்திரத்திற்கு ஆண் நட்சத்திரம் பொருந்துமா? என்று தான் பார்க்கப்படுகிறது ஆண் நட்சத்திரத்திற்கு பெண் நட்சத்திரம் பொருந்துமா? என்று பார்க்கப்படுவதில்லை. அதாவது இந்த பெண்ணுக்கு இந்த ஆண் பொருத்தமானவரா என்றுதான் பார்க்கப்படுகிறது இந்த ஆணுக்கு இந்தப் பெண் பொருத்தமானவரா என்று பார்ப்பதில்லை.

அறம், பொருள், இன்பம் இவற்றின் வாயிலாக பேரின்ப நிலையை அடைவது தான் மனித வாழ்வின் நோக்கம். மனித வாழ்வின் நோக்கத்தை எட்டிப் பிடிப்பதற்காக திருமணம் செய்யப்படுகிறது. மனிதனைத் தவிர பிற உயிரினங்களின் வாழ்வில் எந்த குறிக்கோளும் இல்லை. மனிதர்கள் மட்டுமே பிறவிப் பயனை அடைய விரும்புகிறார்கள். மன நிறைவான திருமண வாழ்வே மனிதனை பிறவிப் பயனை அடையச் செய்கிறது. ஜோதிடரிடம் பொருத்தம் பார்க்க வருபவர்கள் திருமணத்திற்கு பிறகு வளர்ச்சி எப்படி இருக்கும் என்ற கேள்வியை கேட்காமல் போவதில்லை. திருமணத்திற்கு பிறகு ஏற்படும் வளர்ச்சி மன நிறைவான சுவையுடைய திருமண வாழ்வை தரும். இன்னாருக்கு இன்னார் என்ற தீர்ப்பு கர்ம கணக்குப்படி எழுதி வைத்து இருந்தால் கூட தவறான திருமணப் பொருத்தம் பலரின் வாழ்வை கேள்விக்குறி ஆக்கியுள்ளது.எந்த வினையையும் பரிகாரம் செய்தால் தீர்த்து விடலாம் என்பது பலரின் நம்பிக்கை. திருமணத்தைப் பொறுத்த வரை ஒரு ஜாதகத்தில் உள்ள குறையை சரி செய்யக் கூடிய மற்றொரு ஜாதகத்தை இணைப்பதே தகுந்த பரிகாரமாகும்.

திருமணத்தின் மூலம் புதிய உறவால் தனக்கு நன்மை ஏற்படுவதையே அனைவரும் விரும்புவர் என்பதால் முறையான திருமண பொருத்தமே சரியில்லாத ஜாதகத்தை சரி செய்ய பிரபஞ்சம் வழங்கிய கொடை , பரிகாரம். எத்தனை கோவிலுக்கு சென்றாலும் தீர்க்க முடியாத பிரச்சினையை முறையான திருமணப் பொருத்தம் சரி செய்யும்.

சுதந்திரம், சமத்துவம், சகோதரத்துவம் ஆகிய மூன்று மந்திரங்களை உலகிற்கு வழங்கிய நாடு!

உனது எதிரி தவறுகளைச் செய்யும் போது குறுக்கிடாதே, முடியாது என்பது முட்டாள்களின் அகராதியில் மட்டுமே உள்ளது - இப்படி ஏராளமான முத்துப் போன்ற பொன்மொழிகளை உதிர்த்த மாவீரன் நெப்போலியன் நேசித்த பிரான்ஸ் நாட்டிற்குள் நுழைவோம்!

பிரான்ஸ் என்ற வார்த்தை ஜெர்மானிய பழங்குடி மக்கள் கூறிய பிராங்க் (frank) என்ற வார்த்தையில் இருந்து வந்தது. இதற்கு அவர்கள் மொழியில் பொருள் சுதந்திரம் என்பதாகும்.

இதன் தலைநகர் உலக பிரசித்தி பெற்ற பாரிஸ் நகரம்! 17-ம் நூற்றாண்டில் இருந்தே நிதி, வர்த்தகம், ராஜதந்திரம், பேஷன், அறிவியல் உள்ளிட்ட பலவற்றின் தலைமையகமாகத் திகழும் இதை, ஒரு காலத்தில் உலகின் தலை நகரம் என்றே சொல்லி வந்தார்கள்.

இங்கு வாழ்க்கைச் செலவு உலகின் அதிகபட்ச செலவில் இரண்டாம் இடத்தில் இருக்கிறது.

பிரெஞ்சு புரட்சி

உலகிற்கே மூன்று தாரக மந்திரங்களை வழங்கியது பிரெஞ்சு புரட்சி. சுதந்திரம், சமத்துவம், சகோதரத்துவம் என்ற மூன்று மந்திரங்களை வழங்கிய பிரெஞ்சு புரட்சி 1789-ல் நடைபெற்ற ஒன்று. பல்வேறு மாற்றங்களுக்கு உட்பட்ட இந்த மூன்று மந்திரங்கள் 1958-ல் பிரெஞ்சு அரசியல் சட்டத்திலேயே இடம் பெற்று விட்டன.

பதினாறாம் லூயி காலத்தில் மக்கள் வறுமையில் மிதமிஞ்சி வாடி வதங்கவே மக்கள் எழுச்சி உருவாகி புரட்சி வெடித்தது. மக்கள் சுதந்திரம், சமத்துவம், சகோதரத்துவம் என்ற மூன்று அடிப்படைக் கொள்கைகளை வைத்து வெற்றி பெற்று உலகெங்கும் முடியாட்சியை அகற்றி குடியரசை நிறுவ வழி வகுத்தனர்.

ஈபிள் டவர்

பாரிஸ் என்றவுடனேயே நினைவுக்கு வரும் ஒரு இடம் ஈபிள் டவர் தான்!

1889-ம் ஆண்டு பிரெஞ்சு புரட்சியின் நூற்றாண்டு விழாவை ஒட்டி கஸ்டாவ் ஈபிள் என்ற வடிவமைப்பாளர் தந்த வடிவமைப்பை ஏற்றது பிரெஞ்சு அரசாங்கம். அது தான் ஈபிள் டவர்! சேனி நதியில் தெற்குப் பக்கம் உள்ள இந்த டவர் உலகின் அதிக மக்களால் விரும்பி பயணிக்கப்படும் ஒன்று!

பதினேழு அடி உயரமுள்ள அடித்தளத்தின் மேல் கம்பீரமாக நிற்கும் இதன் உயரம் 984 அடி. வலுவான இரும்பினால் கட்டப்பட்டது இது. கோபுரத்தின் மேல் ஒரு டெலிவிஷன் ஆண்டெனாவும் உள்ளது. ஆக இதன் மொத்த உயரம் 1063 அடி!

சுற்றுலாப் பயணிகளுக்காக இது மூன்று பகுதிகளாகப் பிரிக்கப்பட்டுள்ளது. முதல் இரு பகுதிகளில் உணவு விடுதிகள் உள்ளன. மூன்றாம் மட்டத்தில் அதாவது தரை மட்டத்தில் இருந்து 906 அடி உயரத்தில் உள்ள ஒரு மேடையில் இருந்து பாரிைசப் பார்க்க முடியும். டிக்கெட் உண்டு. லிப்ட் மூலம் இங்கு செல்லலாம்.

சேனி நதியில் சொகுசுக்கப்பல் பயணம்

ஈபிள் டவர் பார்த்து முடித்தவுடன் சேனி நதியில் சொகுசுக் கப்பலில் பயணம் செய்து மகிழலாம். பாரிஸ் நகரப் பாலங்களின் அடி வழியாகச் சென்று நகர் முழுவதையும் பார்ப்பது ஒரு பெரிய சுகமான அனுபவமாகும். ரிகார்டு செய்யப்பட்ட விரிவுரை ஒலிபரப்பப்பட ஒரு மணி நேரப் பயணத்தை அனைவரும் விரும்பி மேற்கொள்கின்றனர்.

இரவு நேரத்திலோ ஒளிரும் மின் விளக்குகளால் தேவ லோகம் போல அமையும் இந்தப் பகுதி!

இரவு நேர உணவுடன் ஒரு பயணம், பாரிஸ் பகுதிகளைப் பார்க்கும் பயணம் என பல்வேறு பயணங்கள் நடந்து கொண்டே இருப்பதால் நமது நேரத்திற்கும் விருப்பத்திற்கும் ஏற்ற வகையில் ஏதேனும் ஒன்றை மேற்கொள்ளலாம்! ஆயிரம் ரூபாய் முதல் இருபதினாயிரம் ரூபாய் வரை டிக்கெட் உண்டு. பட்ஜெட்டுக்கு ஏற்ப நமது பயணம் அமையும்!

லூவர் அருங்காட்சியகம்

லூவர் மியூசியம் உலகின் பிரசித்தி பெற்ற அருங்காட்சியகங்களுள் ஒன்று. 35000 கலைப் பொருள்கள் 73000 சதுர மீட்டர் பரப்பில் இங்கு உள்ளன. மூன்று பகுதிகள் கொண்ட இதில் ஒவ்வொரு பகுதியிலும் எழுபதுக்கும் மேற்பட்ட அறைகள் உள்ளன. அரும் வண்ண ஓவியங்கள், சிற்ப வேலைப்பாடுகள் உள்ளிட்ட அனைத்து கலைப் பொருட்களும் இங்கு அற்புதமாகக் காட்சிப் படுத்தப்பட்டுள்ளன.

மாடி பஸ் டூர்

டபுள் டெக்கர் பஸ்சில் அமர்ந்து 24 மணி நேரம் அல்லது 48 மணி நேரம் டூரை மேற்கொள்ளலாம். பாரிசில் பார்க்க வேண்டிய அனைத்து இடங்களையும் இந்த டூரில் (கப்பல் பயணம் உட்பட இதில் உண்டு) கண்டு மகிழலாம்.சுற்றுலாப் பயணிகளுக்காக வகுக்கப்பட்ட திட்டம் இது.

ஏராளமான வாகனப் போக்குவரத்து இங்கு உண்டென்றாலும் ஸ்டாப், டூ நாட் எண்டர் போன்ற போக்குவரத்து அறிவிப்புப் பலகைகளே இங்கு கிடையாது. அவ்வளவு கட்டுப்பாட்டை வாகன ஓட்டிகள் கடைப்பிடிக்கின்றனர்!

வேர்செல்ஸ் அரண்மனை

பாரிசில் பார்க்க வேண்டிய முக்கிய இடங்களுள் ஒன்று வேர்செல்ஸ் பாலஸ்! பதிமூன்றாம் லூயி மன்னனால் 1623-ம் ஆண்டு அமைக்கப்பட்டது இது. பாரிசுக்கு தென்மேற்கே பத்து மைல் தொலைவில் இது உள்ளது. மன்னர்களால் பெரிதும் விரும்பப்பட்ட அரண்மனை இது. தலைநகரின் அருகில் இருந்த போதிலும் சந்தடி இல்லாத தனிப்பட்ட ஒரு அமைதியைத் தந்ததால் 1789 பிரெஞ்சு புரட்சி ஏற்படும் வரை இது மன்னர்கள் விரும்பித் தங்கும் அரண்மனையாகத் திகழ்ந்தது.

பதிமூன்றாம் லூயிக்கு வேட்டையாடுவது என்றால் மிகவும் பிடிக்கும். ஆகவே வேட்டையாடுவதற்காக தனது தந்தையுடன் சிறு பையனாக இந்தப் பகுதிக்கு வந்த லூயி இதன் அழகில் மயங்கினார். இங்கே தங்கி வேட்டையாடினால் சிறப்பாக இருக்கும் என்று அவருக்குத் தோன்றியது. 1610-ல் தந்தை இறக்கவே லூயி முடி சூடினார். 1623-ல் இதை வேட்டையாடும் 'ஹண்டிங் லாட்ஜாக' முதலில் கட்ட ஆரம்பித்தார். இவரை அடுத்து வந்த இவரது மகனான பதிநான்காம் லூயி இதை பிரமாண்டமாக அழகுற மேம்படுத்தினார்.

பின்னால் வந்த பதினாறாம் லூயி மற்றும் அவரது மனைவியான மேரி அண்டாய்னெட்டைப் பற்றிய வரலாறு மிகப் பெரியது. இவர்களது கொடுங்கோன்மை முடியாட்சியை வெறுத்த மக்கள் புரட்சியில் ஈடுபட்டனர். 1789-ல் ஏற்பட்ட பிரெஞ்சு புரட்சியில் அரச குடும்பத்தினர் அரண்மனையிலிருந்து விரட்டப்பட்டனர்.

புரட்சிவீரர்களில் சிலர் இதை அழிக்க நினைத்தாலும், ஒரு வழியாக அழிவில் இருந்து இது தப்பிப் பிழைத்தது. 1793-ல் மேரி அண்டாய்னெட்டின் தலை கில்லடீனில் துண்டிக்கப்பட்டது. அரண்மனையோ பின்னால் ஒரு ஆயுதக் கிடங்கானது.

இப்போது சுற்றுலாப் பயணிகளுக்குத் தன் வரலாறைச் சொல்லிக் கொண்டிருக்கிறது இது! உலகின் பாரம்பரிய இடங்களுள் ஒன்றாக இப்போது அறிவிக்கப்பட்டிருக்கிறது.

அதிசய இடங்கள்!

'கிளியோபாட்ரா நீடில்' எனப்படும் சதுரக் கூம்பகத் தூண் பாரிசில் பார்க்க வேண்டிய ஒன்று. நாட்டர்டாம் கதீட்ரல், கர்னாவலெட் மியூசியம், ரோடின்ஸ் கார்டன் உள்ளிட்ட ஏராளமான இடங்கள் இங்கு பார்ப்பதற்கு உள்ளன.

இதையடுத்து இன்னொரு அதிசய வடிவமைப்பு நான்கு பரிமாண கியூப் ஆகும். பிரெஞ்சு புரட்சியின் 200 ஆண்டு நிறைவை ஒட்டி டேனிஷ் கட்டிட விற்பன்னரான ஜோஹன் ஆட்டோ வான் ஸ்ப்ரெக்கெல்சன் இதை வடிவமைத்தார். நாம் வாழும் மூன்று பரிமாண உலகில் நான்கு பரிமாணத்தைக் காட்டும் ஒரு அதிசய முயற்சி இது!

பாரிசில் நைட் கிளப்

பாரிஸ் என்றவுடனேயே நினைவுக்கு வருவது ஒய்னும் இரவு கிளப்புகளும் அங்கு நடக்கும் கேளிக்கை பார்ட்டிகளும் தான். 21 வகையான ஒய்ன் வகைகள் பாரிசில் மட்டுமே கிடைக்கும்.

பாரிஸ் நகரில் அமைந்துள்ள ஏராளமான நைட் கிளப்புகள் அந்தி வேளையில் விளக்குகள் ஒளிர ஆரம்பித்தவுடன் சுறு சுறுப்பாக இயங்க ஆரம்பிக்கும். விதவிதமாக நடக்கும் பார்ட்டிகள், இப்படிப்பட்ட பார்ட்டிகளை விரும்புவோருக்கு உற்சாகம் தரும் இடமாக அமையும்.

ஒவ்வொரு உணவு வேளையிலும் முன்னாலோ அல்லது பின்னாலோ தனியாக அருந்தாமல் உணவுடன் இணைந்து ஒய்னை அருந்துவது பிரான்ஸ் தேசப் பழக்கம்!

என்ன வாங்கலாம்? எங்கே வாங்கலாம்?!

பாரிஸ் செல்பவர்களுக்கு வாங்குவதற்கான சிறப்பு நினைவுப் பரிசுப் பொருள்கள் பல உண்டு. ஈபிள் டவரின் மாதிரி அமைப்புகள், தலையில் அணிவதற்கான விதவிதமான தொப்பிகள், வாசனை திரவியங்கள் மற்றும் செண்ட் பாட்டில்கள், சீஸ், பாதாம் பருப்புகள், ஒய்ன், ஸ்கார்ப் போன்றவை பயணிகள் விரும்பி வாங்குபவை. பெண்களுக்கு என்றால் விதவிதமான நகைகளும், மேக்-அப் சாதனங்களும் மேக்-அப் பொருள்களும் கிடைக்கும்; குறிப்பாக பெண்மணிகள் இங்கு ஹாண்ட் பேக் வாங்காமல் திரும்புவதில்லை.

கான் திரைப்பட விழா ஆண்டு தோறும் இங்கு கான் நகரில் 1946ல் இருந்து நடந்து வருவதை அனைவரும் அறிவர். உலகின் மதிப்பு மிக்கத் திரைப்படத் திருவிழாவான இந்த நிகழ்வில் உலகின் சிறந்த ஆவணப்படங்கள் உள்ளிட்ட அனைத்தும் திரையிடப்படுகின்றன. சிறந்த படங்கள் தேர்வு செய்யப்பட்டு விருது அளிக்கப்படுகின்றன.

தமிழ்நாட்டுக் கவிஞரும் பிரெஞ்சு தேசீய கீதமும்

பிரான்ஸ் நாட்டிற்கும் தமிழ் நாட்டிற்கும் ஒரு முக்கியமான தொடர்பு உண்டு. மகாகவி பாரதியார் பிரெஞ்சு மொழியை நன்கு அறிந்தவர். புதுவையில் அவர் தங்கி இருந்த போது பிரான்ஸ் நாட்டின் தேசிய கீதமான 'லா மார்செலேஸ்' என்ற கீதத்தை தமிழில் மொழி பெயர்த்துள்ளார்.

பாரிஸ் நகரில் பிறந்த மிரா அல்பாசா புதுவையில் ஆன்மீகத்தில் ஈடுபட்ட மஹரிஷி அரவிந்தரால் ஈர்க்கப்பட்டு அவரிடம் தன்னை ஒப்படைத்து ஆசிரமப் பணியை மேற்கொண்டார். அன்னை என்றும் மதர் என்றும் பல்லாயிரக்கணக்கானோரால் அழைக்கப்பட்டு அவர்களுக்கு ஆன்மீக நெறியை போதித்தார். ஆக பிரான்ஸ் நாடு புதுவைக்கு ஒரு ஆன்மீகச் செல்வத்தை அளித்ததும் குறிப்பிடத்தகுந்த ஒரு சுவையான செய்தி!

ஒரு வரியில் பிரான்ஸ்

பிரான்ஸ் நாட்டைப் பற்றி ஒரு வரியில் சொல்லுங்களேன் என்றால் பிரெஞ்சுக்காரர்கள் தங்கள் தாய்நாடு எதிர் கொண்ட சவால்களையும் அதை அது சமாளித்து முன்னேறும் நிலையையும் நினைத்துக் கூறுவது இது தான் : ''அலைகளால் அவள் அடித்துச் செல்லப்பட்டாலும் ஒரு நாளும் அவள் மூழ்கி விட மாட்டாள்."

தொடர்புக்கு:-

snagarajans@yahoo.com

நாம் நம் குழந்தைகளை அறிவாளிகளாக, திறமை உள்ளவர்களாக, புத்தி கூர்மை உடையவர்களாக உருவாக்க ஆசைப்படுகின்றோம். அது சரிதான். அதற்காக நல்ல பள்ளியில் சேர்க்கின்றோம். செஸ் போன்ற விளையாட்டுகளில் சேர்க்கின்றோம். கூடுதல் நேர வகுப்புகளில் சேர்க்கின்றோம். கூடவே நாமும் அலைந்து, விழித்து, நொந்து நூலாகி, பின் மதிப்பெண் வரும் பொழுது அவர்களைத் திட்டுகின்றோம்.

ஆனால் நாம் செய்யும் முயற்சி அவனை ஒரு தன்னம்பிக்கை உடைய, சிந்திக்கும் திறன் கொண்ட, உலகை அறிந்து எதிர் கொள்ளும் மனிதனாக உருவாக்குகின்றதா? என்றால் சற்று யோசிக்க வேண்டி உள்ளது.

பிறந்த குழந்தை முதல் புத்தகம் வைத்து பல கதைகளை இன்றைய நாகரீக உலகத்திற்கேற்ப கற்றுக் கொடுக்கும் தாய்மார்கள் ஏராளம். 3-4 வயதில் குழந்தை புரிந்து பேச ஆரம்பிக்கும் பொழுது கீழ்க்கண்டவாறு சில கேள்விகளைக் கேட்டு அக்குழந்தையின் சிந்தனைத் திறனையும் கூட்டலாமே.

உதாரணமாக இந்த கதையின் முக்கிய கதாநாயகன் இவ்வாறு எதிரியினை வென்றான். நீ இந்த ஹீரோவாக இருந்தால் எந்த முறையில் எதிரியினை வெல்வாய் என்று என்றாவது கேட்டிருக்கிறோமா? அக்குழந்தை எந்த வயதாயினும் சிந்திக்க வைத்திருக்கிறோமா? அதனை எழுதச் சொல்லி படித்திருக்கிறோமா? இல்லையே!

உலகத்தினையே சிறு பெட்டிக்குள் கொண்டு வந்து உலக நாடுகளைப் பற்றி பேசியிருக்கின்றோமா? பலர் செய்திருக்கலாம். வாய்ப்பிருந்தால் நீ எங்கு வசிக்க விரும்புகின்றாய்? ஏன்? என கேட்டிருக்கின்றோமா? 18 வயது ஆனாலும் கொஞ்சம் அம்மா புடவை தலைப்பும், அப்பாவின் பாதுகாப்பும் தேடும் பிள்ளைகளாகத்தான் நம் நாட்டு பிள்ளைகள் உள்ளனர். இத்தகைய கேள்விகள் உலகினைப் பற்றி அவர்களை அறிய வைக்கும்.

வீட்டில் ஒரு அவசரம், விபத்து, ஒருவருக்கு உடம்பு சரியில்லை என்றால் எப்படி கையாள வேண்டும்? எந்தெந்த எண்களை அவசர உதவிக்கு தொடர்பு கொள்ள வேண்டும் என சொல்லிக் கொடுத்திருக்கின்றோமா? வளரும் குழந்தைகளின் மனதில் அவனுக்குப் பிடித்த பிரபலம் யார் இருக்கின்றார்? என்ன காரணத்திற்காக அவரை பிடிக்கும் என உங்கள் குழந்தைகளின் ஆர்வத்தை தெரிந்து கொண்டவர்களா? இல்லையே!

வாழ்க்கையில் 40-50 வயதினை கடந்தவர்களாகிய நாம் எந்த கால கட்டத்தில் துணிச்சலாக, தன்னம்பிக்கையுடன் ஒரு சவாலை, ஒரு சோதனையை ஏற்று சாதித்தோம் என எண்ணி பார்த்தோமா? அதனை இன்னும் கூடுதல் சிறப்பாக செய்திருக்க முடியுமா? மன கலக்கம் எப்படி கீழே தள்ளியது என்று ஆராய்ந்தால் ஒரு முறை உங்கள் பிள்ளைகளிடம் (ஓயாமல் நான் கஷ்டப்பட்டேன், உழைத்தேன் என்று சொல்லி நச்சரிக்க வேண்டாம்) எடுத்துச் சொன்னால் அவர்களும் கற்றுக் கொள்வார்கள். உங்கள் மீதான மதிப்பும் உயரும்.

இளம் வயது குழந்தைகளிடம் அவர்கள் நாட்டின் தலைவராக ஆனால் நாட்டிற்காக என்னென்ன செய்வார்கள் என்று கேலி செய்யாது கேட்டிருக்கின்றீர்களா? உங்களைப் பற்றி உங்களுக்கு பிடித்தது என்ன என்ற கேள்வியினை முதலில் உங்களிடமே நீங்கள் கேட்டுப் பாருங்கள். நம் திறமை என்ன என்று முதலில் நம்மை நாமே கேட்டுக் கொண்டால் நம் லட்சணம் நமக்கு புரியும். அடுத்தவரிடம் சதா குறை காண்பது வெகுவாய் குறையும். முன் பின் அறியாதவர் பிள்ளைகளை அணுகும் பொழுது என்ன செய்ய வேண்டும் என விவரமாக நன்கு மனதில் பதியும் அளவு சொல்லிக் கொடுத்திருக்கின்றீர்களா?

ஒரு நண்பனுக்கு என்னென்ன குணங்கள் இருக்க வேண்டும் என உங்கள் பிள்ளைகள் விரும்புகின்றார்கள் என தெரிந்து கொள்ளுங்கள். கல்லூரி படிப்பை முடித்தாலும் கூட இனிய நாட்களாக அவர்கள் படிக்கும் காலத்தில் இருந்தது எது? என்று கேளுங்கள்.

வகுப்பில் ஆசிரியர் என்றால் எவ்வளவு மரியாதையுடன் அணுக வேண்டும், பண்போடு பேசி கற்க வேண்டும் என உருட்டி மிரட்டி பிள்ளைகளிடம் வலியுறுத்துங்கள். பொங்கல், தீபாவளி, இப்படி எந்த விடுமுறையினை அவர்கள் அதிகம் விரும்புகிறார்கள்? டி.வி. முன் அமர்வதற்காக மட்டும் தானா? அல்லது தன் உறவுகளை சந்திக்கும் மகிழ்ச்சியால் விரும்புகிறார்களா? என்று தெரிந்து கொள்ளுங்கள். யாரை அவர்களுக்கு ரொம்ப பிடிக்கும்? உங்களுக்கு பிடிக்காத நபராக கூட இருக்கலாம். ஆனால் அவர்கள் மனதில் என்ன உண்மைகள் இருக்கின்றது என்பதனை உண்மையாய் அறிந்து கொள்ளுங்கள்.

சிலர் அவர்களுக்கு பிடித்த சிறுவயது பொம்மையினை தொடர்ந்து வைத்துக் கொண்டே இருப்பார்கள். அதன் ஆழமான காரணத்தினை நீங்கள் அறிந்திருக்கிறீர்களா? உங்கள் மீது வீண்பழி, தவறு சுமத்தப்பட்ட போது நீங்கள் எத்தனை வேதனையினை அனுபவித்தீர்கள். அதனை சற்று யோசித்தால் உண்மை தெரியாமல் பிறர் மீது வீண் பழி போட மாட்டீர்கள்.

உங்களுக்கு பிடிக்கும் இசை, அதன் தன்மை இது கூட உங்கள் மனநிலையினை காட்டும் அளவுகோள்தான். ஒரு ஹீரோ என்பவர் உங்கள் பிள்ளைகளின் மனதளவில் என்ன எண்ணங்களாய், கருத்தாய் இருக்கிறார் என என்றாவது கேட்டுள்ளீர்களா? இங்கு ஹீரோ என குறிப்பிடுவது வாழ்வின் ஹீேராவினை பற்றியதாகின்றது. வாழ்நாளில் நாம் எதற்கு மிகவும் நன்றியுடையவர்களாக இருக்கின்றோம் என்று எண்ணிப் பார்க்கின்றோமா? முதலில் நம் பெற்றோர்களுக்கு நன்றி உடையவர்களாக இருக்கின்றோமா என்று நினைத்துப் பாருங்கள். பல நன்றியாய் இருக்க வேண்டிய விஷயங்களை நாம் நினைத்து பார்க்கின்றோமா?

* நீங்கள் ஒரு பிரச்சினை என்று வரும் பொழுது யாருடன் பேசுவீர்கள் என்று நினைத்துப் பாருங்கள். நமக்கு ஒருவராவது இருக்கின்றார்களா என்று நினைத்துப் பாருங்கள். உங்களது பிள்ளைகள் பிரச்சினை என வரும்பொழுது அவர்கள் உங்களது குடும்பத்தில் யாரை அணுகுகின்றார்கள் என்று கவனியுங்கள். இது உங்கள் பிள்ளைகளை மேலும் புரிந்து கொள்ள உதவும்.

* சதா எதனைப் பற்றியாவது நீங்கள் கவலைப்படுகின்றீர்களா என்று உங்களையே ஆராய்ந்து கொள்ளுங்கள். அதுபோல உங்கள் பிள்ளைகள் எந்நேரமும் எந்த பயத்தினை, கவலையை மனதில் கொண்டுள்ளார்கள் என்று கவனியுங்கள். பணம் சேமிப்பின் அவசியம் பற்றி உங்கள் பிள்ளைகள் எவ்வளவு புரிந்து கொண்டு உள்ளார்கள்? ஆரோக்கியமான உணவு என்பது அவர்களின் மனதில் எந்த அளவு பதிந்து உள்ளது என்பதனை நீங்கள் அறிந்து கொள்ளுங்கள்.

* திடீரென அதிக பணம் வழியில் கண்டெடுத்தால் எப்படி நீங்களும், உங்கள் பிள்ளைகளும் சிந்திப்பீர்கள்? பேசிப் பாருங்கள். இதில் இருக்கும் ஆபத்தினையும் அவர்கள் உணர வேண்டும். உதாரணம் 100 ரூபாயில் 99 ரூபாயினை திருப்பிக் கொடுத்தாலும் ஒரு ரூபாயினை இவன் எடுத்து விட்டானோ என்ற சந்தேகம் தான் தலை தூக்கும். எனவே முதலில் யாருடைய பணமும் நமக்கு வேண்டாம். இன்றைய சின்ன ஆசை நாளைய பெரிய ஆசையினைத் தூண்டி ஒருவரை அழிக்கும். முறைப்படி ஒப்படைப்பது நமக்கு புகழ் தர வேண்டாம். இகழ் இல்லாமல் இருந்தால் போதும் என்பதனை புரிய வைக்க வேண்டும்.

* நாம் நம்மை மாற்றிக் கொள்ள வேண்டும் என்று நினைத்தால் எந்த விதத்தில் எந்த விஷயத்தில் என சற்று அமைதியாய் யோசித்துப் பாருங்கள். பிள்ளைகளுக்கு பிடிக்காத பிரிவு பாடம் எது? அதனை சரி செய்ய பெற்றோர் என்ன செய்ய வேண்டும்? நமக்கு பிடித்த எழுத்தாளர் இவர் என சொல்லும் அளவு பல புத்தகங்களை நாம் படித்து இருக்கின்றோமா?

* நேர்மை என்பதன் பலத்தினை பிள்ளைகள் உணர்ந்து செயல்படுத்த முனைகின்றார்களா? இல்லையெனில் அதனை அவர்களே உணர எப்படி வழிகாட்ட வேண்டும் என்பதை தெரிந்து கொள்ளுங்கள். இன்னமும் இப்படி பல கேள்விகள் நாம் நம்மையே கேட்டுக் கொள்ளலாம். நம் பிள்ளைகளிடமும் கேட்கலாம். உண்மையில் முழு முயற்சியுடன் இதனை செய்து பாருங்கள். வாழ்வை பற்றிய நம் குறுகிய எண்ண ஓட்டம் நிச்சயமாய் மாறும். நம்மை நாமே அதிகமான தீய எண்ண ஓட்டங்களில் இருந்து சுத்தம் செய்து கொள்வோம். இன்று பிள்ளைகளை வளர்ப்பதற்குள் பெற்றோர் பெரும்பாடு பட்டு விடுகின்றனர். உயிரை கொடுத்து செய்யும் எதனையும் தன் பிள்ளைகள் உணரவில்லை என கண்ணீர் சிந்துகின்றனர்.

இதற்கு ஒரு முக்கிய காரணம் சக்திக்கு மீறிய பெரும் பள்ளியில் என் பிள்ளை படிக்க வேண்டும். அவன் நினைப்பதெல்லாம் நான் வாங்கி கொடுத்து விட வேண்டும். நான் ஆசைப்படும் படி படிப்பு, வேலை, வாழ்வு என்று அவன் பெற வேண்டும் என்ற கண் மூடித்தனமான அதிக அன்பு தான். அன்பு என்பது அமைதியான அருவி போல் இருக்க வேண்டும். கட்டுக்கடங்கா காட்டு வெள்ளம் போல் இருக்க கூடாது.

அவர்களுக்கும் தன் வாழ்வை தன் சுய விருப்பப்படி முறையாய் அமைத்து கொள்ள உரிமை உண்டு. அது தடம் மாறி செல்லாது வழிகாட்டியாக அமைய செய்வதும், நல்லவைகளை அடையாளம் காட்டி கொடுப்பது மட்டும் தான் பெற்றோரின் முக்கிய பொறுப்பு.

இந்த கால கட்டம் பல கல்லூரிகளுக்கு 'சீட்' தேடி பெற்றோர் அலைகின்றனர். வருவாய் பெற்றுத் தரும் அநேக கல்வி படிப்புகளை பலர் ஏனோ ஒதுக்குகின்றனர். தானும் மனம் நொந்து பிள்ளைகளும் சில ஏமாற்றங்களை சந்திப்பதால் தன்னம்பிக்கை இழக்கின்றனர். வருங்கால சமுதாயம் இப்படி உருவாக கூடாது. நம்மை நாமே பல கேள்விகளை கேட்டுக் கொண்டால் பல பிரச்சினைகளுக்கு தீர்வு கிடைக்கும். பல வெளிநாடுகளில் பல கேள்விகள் மூலம் பிள்ளைகளை சிந்திக்க செய்து அவர்களின் தவறுகளை அவர்களே திருத்தி கொள்ள வழி காட்டுகின்றனர். அவைகளை படிக்க நேர்ந்த பொழுது நமக்கும், நம் பிள்ளைகளுக்கும் சுயமாய் சிந்தித்து அவர்கள் கால்களில் அவர்கள் நிற்க இத்தகு கேள்விகள் உதவுமே என்ற ஆர்வத்தினால் உருவான ஒரு துளியே இந்த கட்டுரை ஆகும். ஆக வாழ்வில் இதுபோல் சிந்தித்து செயல்பட்டு வெற்றியாளராக வாழ்வோம்.

தேர்தல் பிரசாரம் என்றால் கட்சியில் இருந்து பயணத்திட்டம் வகுத்து தருவார்கள். எந்த நாள் எந்த நேரம் என்பதை குறிப்பிட்டு குறிப்பிட்ட நேரத்தில் குறிப்பிட்ட இடங்களுக்கு மட்டும் சென்று பிரசாரம் செய்ய வேண்டும். பிரசாரம் செய்வதற்கு தேவையான வாகன வசதி, உதவி செய்வதற்கு உதவியாளர்கள், கொஞ்சம் நேரம் பிரசாரம் செய்தால் ஓய்வெடுக்க ஏற்பாடுகள், தொண்டை கட்டிக்கொண்டால் சோடாவோ, தண்ணீரோ கொண்டு வந்து நீட்டுவார்கள்.

எவ்வளவு நேரம் பிரசாரம் செய்தாலும் அலுப்பு தெரியாது. அது ஒரு சொகுசான வசதியாகத்தான் தெரியும். அதுமட்டுமா...வெயில் அதிகமாக இருந்தால் ஓய்வெடுத்துக்கொள்வோம். எங்கு கூட்டம் சேர்கிறதோ அங்குதான் பிரசாரம் செய்வோம். அதிலும் கட்சி ஆட்சிக்கு வந்தால் என்ன செய்யும் என்ற பொதுவான திட்டங்களையும், கட்சியின் கொள்கைகளையும் பற்றி மக்கள் மத்தியில் பேசிவிட்டு சென்று விடலாம். இதுதான் 4 தேர்தல்களில் என் பிரசார அனுபவமாக இருந்தது.

ஆனால் 2021-ம் ஆண்டு தேர்தல் பிரசாரம் முற்றிலும் புதுமையாக இருந்தது. ஏனெனில் நான் எனக்காக பிரசாரம் செய்த தேர்தல். எனக்கு வாக்கு அளியுங்கள், என்னை வெற்றி பெற செய்யுங்கள் என்று மக்களிடம் கட்சியை மட்டுமல்லாமல், அதையும் தாண்டி என்னை வெற்றி பெறச்செய்யுங்கள் என்று வாக்கு கேட்டது.

எனவே ஓய்வெடுக்க நேரமில்லை. நேரமில்லை என்று சொல்வதைவிட ஓய்வெடுக்க மனமில்லை என்பதுதான் உண்மை. எப்படியாவது வெற்றிபெற வேண்டும் என்ற எண்ணம் தூங்கவிடாமல் துரத்திக்கொண்டிருந்தது. இரவு எத்தனை மணிக்கு தூங்க சென்றோம் என்பது கூட தெரியாது. அதற்குள் விடிந்தது போல் இருக்கும். உடனே பிரசாரத்துக்கு புறப்பட்டு விடுவேன்.

தொகுதி முழுவதும் நடந்தே செல்ல வேண்டும். வீடு வீடாக சென்று மக்களை சந்தித்து ஆதரவு கேட்க வேண்டும் என்ற எனது திட்டப்படித்தான் ஒவ்வொரு நாளும் பிரசாரத்தை வடிவமைத்தேன்.

ஆயிரம் விளக்கு தொகுதி சென்னையின் மையப்பகுதியில் இருந்தாலும் அடித்தட்டு மக்கள் வாழும் பகுதிகள் நிறையவே இருந்தது. சின்ன சின்ன தெருக்கள், குட்டி, குட்டி வீடுகள் ஒவ்வொரு வீடாக தேடிச்சென்று உங்களை நம்பித்தான் தேர்தலில் நிற்கிறேன். எனக்கு வாக்களித்து வெற்றி பெறச்செய்யுங்கள் என்று அவர்களிடம் கேட்பேன். வீடுகளில் இருந்து ஆண்களும், பெண்களும் ஓடி வருவார்கள். குஷ்பு வருகிறார். அவரை பார்க்க வேண்டும் என்ற ஆர்வத்தோடு பலர் ஓடி வருவார்கள். அவர்களிடம் உங்கள் குஷ்பு வந்திருக்கிறேன். உங்களை நாடி வருகிறேன். உங்களை நம்பித்தான் தேர்தலில் நிற்கிறேன் என்று வாக்குகளை கேட்பேன்.

வாவ்... குஷ்பு... என்று ஆர்வத்தோடு என் அருகில் வருவார்கள். செல்பி எடுப்பார்கள். என்னோடு கைகுலுக்கி மகிழ்ந்தார்கள். பல வயதான பெண்கள் நீ ஜெயிப்பே என்று கட்டிப்பிடித்து அன்போடு வாழ்த்தியதெல்லாம் நெகிழ வைத்தது. சாமானிய மக்களின் அந்த அன்பு சாதாரணமானது அல்ல. விலைமதிக்க முடியாத வாக்குகளைவிட விலைமதிக்க முடியாதது அது.

மக்களின் பிரச்சினைகளை நேரடியாக அறிந்து அதற்கான தீர்வுகளை காண வேண்டும் என்ற எண்ணத்தில்தான் தெரு, தெருவாக நடந்து சென்றோம். ஒவ்வொரு தெருக்களிலும் பல பிரச்சினைகள். அன்றாடம் வேலை செய்தால்தான் சாப்பிட முடியும் என்ற சூழ்நிலையில் இருக்கும் அந்த மக்கள் எனக்கு அதை வாங்கி தாருங்கள், இதை வாங்கி தாருங்கள் என்று என்னிடம் எந்த கோரிக்கையும் வைக்கவில்லை.

அவர்கள் கேட்டதெல்லாம் இந்த சாலை சரியில்லை, ஒழுங்காக குடிநீர் வரவில்லை. தெருவிளக்கு சரியில்லை கழிப்பிட வசதி இல்லை என்ற பொதுவான பிரச்சினைகளுக்கு தீர்வு காணத்தான் ஆர்வப்பட்டார்கள்.

எல்லோரும் இப்படித்தான் தேர்தல் நேரங்களில் வருவார்கள். "நான் வெற்றி பெற்றால் எல்லா பிரச்சினைகளுக்கும் தீர்வு கண்டுவிடுவேன் என்று வாக்குறுதி தருவார்கள். ஆனால் ஜெயித்தபிறகு அவர்களை பார்த்ததில்லை". ஒவ்வொரு தேர்தல்களிலும் இப்படித்தான் எங்கள் அனுபவம் இருந்து வருகிறது என்று அவர்கள் பேசியதில் இருந்து எந்த அளவுக்கு வெறுத்து போய் இருக்கிறார்கள் என்று என்னால் உணர முடிந்தது.

அப்போதுதான் இந்த மக்களுக்கு நிச்சயம் உதவி செய்ய வேண்டும். தனிப்பட்ட குஷ்புவாக இருந்து அவர்கள் எதிர்பார்க்கும் பிரச்சினைகளுக்கு தீர்வு காண்பது சுலபமல்ல. ஒரு எம்.எல்.ஏ.வாக இருந்தால் நிச்சயம் தீர்க்க முடியும் என்ற நம்பிக்கை எனக்குள் ஆழமாக பதிந்தது.

வெற்றி பெற்றால் தொகுதியிலேயே ஒரு அலுவலகம் திறந்து தொகுதி மக்கள் முன் வைத்த அடிப்படை பிரச்சினைகளை தீர்த்து வைத்து அவர்களிடம் பேர் வாங்க வேண்டும் என்ற நம்பிக்கையோடுதான் அந்த தேர்தலை சந்தித்தேன்.

தேர்தலில் வெற்றி, தோல்வி என்பது சகஜமானது. எல்லா கட்சிகளும், எல்லா இடத்திலும் வெற்றி பெறவும் முடியாது.  அதேபோல் போட்டியிடும் வேட்பாளர்கள் அனைவரும் வெற்றி பெறவும் முடியாது.

ஒரு தொகுதியில் ஒருவருக்குத்தான் வெற்றி கிடைக்கும். எனவே தேர்தலில் வெற்றி என்பதைவிட மக்கள் மனங்களில் இடம் பிடித்தோம் என்ற எண்ணமே மிகப்பெரிய வெற்றிதான் என்பதே எனது எண்ணம்.

ஆயிரம் விளக்கு தொகுதியில் நான் வெற்றி வாய்ப்பை இழந்தாலும், மக்கள்மனங்களில் இடம் பிடித்துவிட்டேன் என்ற எண்ணம் எனக்கு மிகப்பெரிய சந்தோஷத்தை தந்தது.

எத்தனையோ வீடுகளில் அக்கா வாங்க.... மேடம் எங்கள் வீட்டுக்கு வாங்க... என்று அன்போடு அழைத்தது, தேநீர், குளர்பானங்கள் தந்து உபசரித்தது... போன்ற அனுபவங்கள் தங்கள் வீட்டு பிள்ளையை போல அல்லது தங்களில் ஒருவராக என்னையும் நினைத்து உபசரித்தது வாழ்க்கையில் கிடைத்த மிகப்பெரிய வெற்றி. இது தேர்தல் பிரசாரத்தில் எனக்கு புது அனுபவமும் கூட.

மிகப்பெரிய நகரத்தில் வசித்தாலும் இன்னும் அடிப்படை வசதிகள்கூட இல்லாமல் ஏராளமான பேர் வாழ்கிறார்கள் என்பது என் மனதை உறுத்தியது.

வெற்றியில் கிடைப்பதை விட கூடுதல் சந்தோசம் தோல்வியிலும் கிடைத்தது

பிரசாரத்தின் போது ஒருநாள் ஒரு சிறுமி என்னை பார்க்க ஆசைப்பட்டு இருக்கிறார். அவரை என்னிடம் அழைத்து வந்தார்கள். 12 வயதே நிரம்பிய அந்த சிறுமிக்கு. இரு கண்களிலும் பார்வை இல்லை. ஆனால் அந்த சிறுமி என்னிடம் வந்ததும், அக்கா... நீங்கள்தான் குஷ்புவா என்றதும் ஆமாம்டா... என்றபடி அவளது கைகளை பற்றி அருகே அணைத்துக் கொண்டேன்.

அந்த சிறுமி பாசத்தோடு என் கைகளை தடவியபடி ரொம்ப சந்தோஷம் அக்கா... என்றாள். என் முகத்தை கூட பார்க்க முடியாதவள் என் பெயரை அறிந்து வைத்து அவள் காட்டிய பாசம் என்னை நெகிழ வைத்தது. என்னை அறியாமலேயே என் கண்களையும் கலங்க செய்தது.

உனக்கு என்னடா வேணும் என்றேன். பொதுவாக ஒரு சிறுமி என்ன கேட்பாள். சாப்பிடுவதற்கு சாக்லெட் அல்லது வேறு ஏதாவது உதவிகள் கேட்பாள். ஆனால் அந்த சிறுமி என்னிடம் எதுவும் கேட்கவில்லை. ஆனால் அக்கா ஒரே ஒரு உதவி செய்வீர்களா என்றார். சொல் செய்கிறேன் என்றேன்.

நான் தெருவில் நடந்து செல்லும் போது குண்டு குழிகளில் கிடக்கும் கற்கள் என் காலை குத்துகின்றன. நடப்பதற்கு கஷ்டமாக இருக்கிறது. நல்ல ரோடு போட்டு தருவீங்களா என்றாள். அதை கேட்டதும் உண்மையிலேயே நெகிழ்ந்து போனேன். ஒரு பார்வையற்ற சிறுமி அவள் தனக்காக கேட்கவு மில்லை. அவளுக்கு நடந்து செல்வதற்கு தகுதியான சாலை இல்லை என்பதையே கேட்டாள். நான் அவளிடம் நான் வெற்றி பெற்றால் நிச்சயம் நல்ல சாலை போட்டுத்தருவேன் என்றேன். ரொம்ப சந்தோஷம் அக்கா என்று என்னிடம் இருந்து விடைப்பெற்று சென்றாள். அவள் விடைபெற்று சென்றாலும் அவளை விட்டு மனம் பிரிய மறுத்தது. அந்த சிறுமிக்கு கண்டிப்பாக உதவ வேண்டும் என்று ஆசைப்பட்டு அவளை மிகச்சிறந்த கண் மருத்துவரிடம் அழைத்து சென்றோம். எப்படியாவது அவளது பார்வையை மீட்க வேண்டும். அதற்கு எவ்வளவு பெரிய சிகிச்சை, எவ்வளவு செலவானாலும் பரவாயில்லை என்றேன்.

ஆனால், அவளது துரதிருஷ்டம் பிறவியிலேயே ஏற்பட்ட கோளாறு காரணமாக சரிப்படுத்த முடியாது என்றார்கள் மருத்துவர்கள். ஒரு கண்ணாடியை சொல்லி அந்த கண்ணாடியை போட்டால் மங்கல் போல் லேசாக பார்வை தெரிய வாய்ப்பு உண்டு என்று சொன்னார்கள். அவர்கள் ஆலோசனைப்படி அந்த மூக்கு கண்ணாடியை வாங்கி கொடுத்தேன். அந்த கண்ணாடியை போட்டுவிட்டு நடக்கும் போது மங்கலாக தெரிவது போல் உள்ளது என்றாள். இப்போதும் அந்த சிறுமி அந்த கண்ணாடியோடுதான் நடமாடி கொண்டிருக்கிறாள்.

அவள் வசிக்கும் தெருவில் மட்டுமல்ல. அவள் நேசிக்கும் இந்த குஷ்புவின் இதயத்திலும் நடமாடுகிறாள். வெற்றி பெற்றால் கிடைக்கும் சந்தோசத்தை விட பல இதயங்களை வென்ற சந்தோசம் எனக்கு கிடைத்தது என்பதே உண்மை.

ttk200@gmail.com

நண்பா்களே, சமீபத்துல கண்ணிலே பட்ட சில செய்திங்க என்னை ரொம்பவே நிலை குலையப் பண்ணிடிச்சி. தென் மாவட்டத்தைச் சேர்ந்த 14 வயசு சிறுமி. அம்மா சர்க்கரை நோயால இறந்து போயிடுறாங்க. அப்பா, அந்தச் சிறுமியை 37 வயசு பழ வியாபாரிக்குக் கட்டாயப்படுத்தி, கல்யாணம் செஞ்சு வெச்சுடுறாரு. கல்யாணம் நடந்து மூணே நாள்ல அந்தக் குழந்தை இறந்துபோயிடுது. அதுவும் அதிர்ச்சி தாங்காம இறந்துபோயிடுது. இது நடந்தது போன வருஷம்.

அதே வருஷம் செப்டம்பர் மாசத்துல நடந்த இன்னொரு பரிதாபமான சம்பவத்தையும் சொல்லியாகணும். வேலூர் மாவட்டத்துல இருக்காரு டைல்ஸ் ஒட்டுற அந்தக் கூலித்தொழிலாளி. அவருக்கு வயசு 37. அவரு கல்யாணம் செஞ்சுகிட்ட பொண்ணுக்கு வயசு 23. கணவனைவிட 14 வயசு இளையவங்க. 16 வயசுலயே அந்தப் பொண்ணுக்குக் கல்யாணம் நடந்துட்டதா சொல்றாங்க. கல்யாணம் நடந்த ஏழு வருஷத்துல அஞ்சரை வயசுல ஒரு பொண்ணு, நாலு வயசுல ஒரு பையன், ஆறு மாச ஆண் குழந்தைன்னு மொத்தம் மூணு குழந்தைங்க. அந்தத் தொழிலாளிக்குக் குடிப்பழக்கம் இருந்திருக்கு. தினமும் வீட்டுக்கு வந்து மனைவியோட சண்டை போடுறது, அடிக்கிறது, குடும்பச் செலவுக்குப் பணம் தராம இருக்கறதுன்னு இருந்திருக்காரு மனுஷன்.

அந்தப் பொண்ணு அடி தாங்காம அம்மா வீட்டுக்குப் போறது, பெரியவங்க சமாதானம் செஞ்சதும் திரும்பி கணவன் வீட்டுக்கு வர்றதுன்னு இருந்திருக்கு. ஒரு நாள் அம்மாகிட்ட `வீடு வரைக்கும் போயிட்டு வந்துடுறேன்'னு சொல்லிட்டு கணவன் வீட்டுக்குப் போயிருக்காங்க. சாயந்தரம் ஆகியும் திரும்பி வரலை. போன்ல கூப்பிட்டா போனையும் எடுக்கலை. பயந்துபோனவங்க, மாப்பிள்ளை வீட்டுக்குப் போய் பார்த்திருக்காங்க. வீட்டுக்குள்ள அந்தப் பொண்ணு தூக்குல தொங்கியிருக்காங்க. மூணு குழந்தைகளும் கழுத்தை இறுக்கிக் கொலை செய்யப்பட்டிருந்தாங்க. இந்தக் கொடூரமான சம்பவத்துக்குக் காரணம் அந்தப் பொண்ணோட கணவன்தான். அதைவிட முக்கியமான காரணம், இவ்வளவு வயசு வித்தியாசத்துல அந்தப் பொண்ணுக்குக் குழந்தைத் திருமணம் செஞ்சுவெச்சதுதான்.

இது மாதிரி எத்தனையோ சம்பவங்கள்... தம்பியோட மனைவி பிரிஞ்சு போயிடுறாங்க. தம்பி மனம் உடைஞ்சுடக் கூடாதாம். அதனால அக்காவே தன்னோட 14 வயசு மகளைத் தம்பிக்குக் கல்யாணம் பண்ணிக் கொடுத்திருக்காங்க.

வீட்டுல வறுமை. கணவன் இல்லை. மூணு பொண்ணுங்க. அம்மா தன்னோட 13 வயசு மகளை 40 வயசு பணக்காரருக்குக் கட்டிவெச்சுட்டாங்க. நம்ம நாட்டுல மட்டுமில்லை. ஆப்கானிஸ்தான்ல நடக்குறது பயங்கரம். சாப்பாட்டுக்கே வழியில்லாம பெண் குழந்தைகளை வயசான முதியவர்களுக்குக் கல்யாணம் பண்ணிவெக்கிற கொடுமையெல்லாம் நடந்துக்கிட்டு இருக்கு.

நண்பர்களே... நான் உடனே இது சம்பந்தமாக தேடிப் பாா்த்தேன். ஒரு புள்ளிவிவரத்தை பார்த்ததும் மனசு அப்படியே நொறுங்கிப் போயிடுச்சு போங்க. `உலக அளவுல ஒவ்வொரு நிமிடமும் 23 குழந்தைத்திருமணங்கள் நடக்குது'ன்னு சொல்லுது அந்தப் புள்ளிவிவரம். அதாவது மூணு விநாடிக்கு ஒரு திருமணம். நினைச்சாலே மலைப்பா இருக்கு. பல நேரங்கள்ல வறுமை, குடும்பச் சூழல் காரணமாக கட்டாயப்படுத்தித்தான் குழந்தைகளுக்குத் திருமணம் செஞ்சுவெக்கறாங்க.

குழந்தைத் திருமணங்கள் நடக்குறதுக்கான காரணங்கள் ஏராளம். வீட்டுல வயசான பாட்டியோ, தாத்தாவோ படுத்த படுக்கையா இருப்பாங்க. அவங்க கண்ணை மூடுறதுக்குள்ள பேத்திக்குக் கல்யாணம் செஞ்சு பார்த்துடணும்னு ஆசைப்படுவாங்க. அதுக்காக நடக்கும். சொந்தம், சொத்து விட்டுப்போயிடக் கூடாதுன்னு கல்யாணம் பண்ணிவெக்கறதும் நடக்குது. பொண்ணோ, பையனோ காதலிக்கிறாங்களா... குடும்ப மானம், சாதி கவுரவம் போயிடக் கூடாதுன்னு கல்யாணம் பண்ணி வெச்சுடுவாங்க. ஜோசியக்காரங்க சொல்றாங்கங்கறதுக்காகவும் சில கல்யாணங்கள் நடக்குது. இவ்வளவு ஏன்... நம்ம கடமையை முடிச்சா போதும்னு குழந்தைக்குக் கல்யாணம் பண்ணிவெக்கறவங்களும் இருக்காங்க. இந்தியாவுல கொரோனா காலத்துல மிக அதிக எண்ணிக்கையில குழந்தைத் திருமணங்கள் நடந்திருக்குன்னு சொல்றாங்க.

`15 வயதுக்குட்பட்ட ஒரு சிறுமியை வளர்ந்த அல்லது முதிர்ந்த ஆணுக்குத் திருமணம் செய்து கொடுப்பதுதான் குழந்தைத் திருமணம்'னு ஒரு காலத்துல வரையறுக்கப்பட்டிருந்தது. குழந்தைத் திருமணத் தடைச் சட்டம் - 2006, `18 வயசுக்குக் கீழ் இருக்குற பொண்ணுக்கும், 21 வயசுக்குக் கீழ் உள்ள ஆணுக்கும் நடைபெறும் திருமணங்களை `குழந்தைத் திருமணம்'னு சொல்லுது.

இந்தியாவுலயே மத்தியப் பிரதேசத்துலதான் குழந்தைத் திருமணங்கள் அதிகமாக நடக்குதுன்னு ஒரு புள்ளிவிவரம் சொல்லுது. சமீபத்துல தேசிய குடும்ப நல கணக்கெடுப்பு ஆய்வறிக்கை, தென்னிந்தியாவுல அதிகமாகக் குழந்தைத் திருமணங்கள் நடக்கும் ஐந்து மாநிலங்களின் பட்டியலை வெளியிட்டிருக்கு. அதுல முதல் இடத்துல ஆந்திர மாநிலம் இருக்கு. நாலாவது இடத்துல தமிழ்நாடு இருக்கு. முதல் இடத்துல இருக்குற ஆந்திராவுல நடக்கும் குழந்தைத் திருமணங்களின் சதவிகிதம் 29.3. இரண்டாவதா இருக்குற தெலுங்கானா சதவிகிதம் 23.5. மூணாவதா கர்நாடகா - 21.3 சதவிகிதம். நாலாவதா தமிழ்நாடு - 12.8 சதவிகிதம். கடைசியா கேரளா - 6.3 சதவிகிதம். 15-ல் இருந்து 19-வயசுக்குட்பட்ட குழந்தைகளுக்குக் கல்யாணமாகி குழந்தைகள் இருக்கறதும் இந்த ஆய்வுல தெரியவந்திருக்கு.

ஒரு காலத்துல சொந்தம் விட்டுப்போயிடக் கூடாது; பையன் கட்டுக்குள்ள இருக்கணும்; கெட்ட சகவாசம் சேர்ந்துடக் கூடாதுன்னு குழந்தைத் திருமணங்கள் நடந்துச்சு. ஏன்... பாரதியாருக்கே குழந்தைத் திருமணம்தான் நடந்துச்சு. அப்போ செல்லம்மாவுக்கு ஏழு வயசு. இப்போ பெண்கள் நல்லா படிச்சு, கைநிறைய சம்பாதிக்கிற இந்தக் காலத்துலயும், நகரங்களில் கூட குழந்தைத் திருமணங்கள் நடக்குறது அதிர்ச்சியா இருக்கு. சரி... எப்படியும் பையனுக்கோ, பொண்ணுக்கோ கல்யாணம் பண்ணிவெச்சுத்தானே ஆகணும். அதை சின்ன வயசுலயே செஞ்சு வெச்சுடலாமேன்னு ஒரு கேள்வி எழலாம். ஆனா, அதேநேரத்துல குழந்தைத் திருமணத்தால ஏற்படுற விளைவுகளையும் பார்க்கணுமில்லையா?

சின்ன வயசுலயே நடக்குற கல்யாணத்தால பெண்ணோட உடல்நலம் ரொம்பவும் பாதிக்கப்படும். பக்குவமில்லாத வயசுல ஏற்படுற உடலுறவு, குழந்தைப்பேறு அந்தப் பெண்ணோட உடலையும் மனசையும் ரொம்பவே பாதிச்சுடும். கர்ப்பப்பையில புண் ஏற்பட்டு, அது பாதிக்கப்படலாம். கருச்சிதைவு ஏற்படலாம். அறிவு முதிர்ச்சியோ, சமூகத்துல உரிய அங்கீகாரமோ கிடைக்காத அந்த வயசுல நடக்குற கல்யாணத்தால பெண் குழந்தைகள் குடும்ப வன்முறைக்கு ஆளாவாங்க. சில சமயம் பாலியல் துன்புறுத்தலும் அவங்களுக்கு நடக்கும். இந்தக் காரணங்களால அவங்க தனிமைப்படுத்தப்படுவாங்க.

ஒரு பொண்ணுக்கு சின்ன வயசுலயே கல்யாணம் நடக்குதா... `இனிமே நீ படிச்சு என்ன ஆகப்போகுது... படிப்பை விட்டுடு'ன்னு சொல்லிடுவாங்க பெற்றோர். கல்வியும் போய், அது மூலமா கிடைக்கிற வேலைவாய்ப்பும் போய் அந்தப் பொண்ணு சொந்தக் கால்ல நிக்க முடியாம, காலம்பூரா கணவனையோ, பெற்றோரையோ சார்ந்து வாழுற நிலைமைக்குத் தள்ளப்படுவாங்க. வறுமையில் இருந்து அவங்களால மீளவே முடியாது. முழு உடலும் வளர்ச்சியடையாத அந்தச் சூழ்நிலையில ஒரு பொண்ணு குழந்தை பெத்துக்கறதால தாயும் சேயும் மகப்பேறின்போது இறக்கும் சதவிகிதமும் அதிகமாகுதுன்னு சில புள்ளிவிவரங்கள் சொல்லுது.

குழந்தைத் திருமணம்கிறது குழந்தைகளின் மேல நிகழ்த்தப்படுற ஒரு வன்முறை. அது, அந்தத் தலைமுறையை மட்டும் பாதிக்கிறதில்லை. அடுத்தடுத்த தலைமுறையையும், அவங்களோட வாரிசுகளோட வாழ்க்கையையும் பாதிச்சுடும். பல தன்னார்வலர்களும், அரசும் பல குழந்தைத் திருமணங்களைத் தடுத்து நிறுத்தியிருந்தாலும், அது முழுசுமா நின்னு போயிடலை. கிராமங்கள்ல, பழங்குடியினச் சமூகங்கள்ல, தலித் குடும்பங்கள்ல குழந்தைத் திருமணம் நடக்குறதுக்குக் காரணம் அவங்க கல்வி கற்கும் சூழல் இல்லாததுதான்னு சொல்றாங்க சமூக ஆர்வலர்கள். பல மலைவாழ் கிராமங்கள்லயும், உள்ளடங்கியிருக்குற கிராமங்கள்லயும் போக்குவரத்து, கல்வி இதுக்கெல்லாம் வசதி செஞ்சு குடுத்தா குழந்தைத் திருமணங்கள் நடக்குறது குறையும்.

பொதுவாவே நம்ம மக்களுக்குப் பெண் குழந்தைன்னா ஒரு அலட்சியம். அவங்களோட முன்னேற்றத்துலயும், அவங்களுக்கான உரிமையிலயும் யாரும் அக்கறை காட்டுறதே இல்லை. இதுவும் இந்த மாதிரி திருமணங்களுக்கு ஒரு காரணம். ஒரு பெண் குழந்தைக்கு நிகழ்த்தப்படுற திருமணம் சமூக அநீதி. இதை முதல்ல புரிஞ்சுக்கணும். ஆணும் பெண்ணும் சமம்கிற எண்ணம் முதல்ல பெற்றோருக்கு வரணும். ஆண் குழந்தைன்னா ஒரு நியாயம், பெண் குழந்தைன்னா ஒரு நியாயம்கிற எண்ணத்தை அவங்க மாத்திக்கணும். இருபால் குழந்தைகளையும் சமமா வளர்க்கணும்.

`பொம்பளைப் புள்ள வெச்சுருக்கே... காலா காலத்துல கல்யாணம் செஞ்சு குடுக்குற வழியைப் பாரு...' என்று பலரும் சொல்வதைக் கேட்டிருப்போம். பல காலமாக சீக்கிரமே பெண் குழந்தைகளுக்கு கல்யாணம் செஞ்சுவெக்கணும்கிற எண்ணம் வேரூன்றி ப்போய் கிடக்கு.

`குழந்தைத் திருமணத்துல ஈடுபடுறவங்களுக்கு இரண்டு வருஷம் சிறைத் தண்டனை, ஒரு லட்சம் ரூபாய் வரைக்கும் அபராதம் விதிக்கப்படும்'னு குழந்தைத் திருமணத் தடைச் சட்டம் 2006 சொல்லுது. ஆனா, அதைப் பலரும் கண்டுக்கறதே இல்லை. பல இடங்கள்ல இப்படியான திருமணங்கள் நடக்குறப்போ, விவரம் தெரிஞ்சவங்ககூட `நமக்கென்ன வந்துச்சு'ங்குற மனோபாவத்தோட அதை வெளியில சொல்லாம விட்டுடுறாங்க. இந்த மனநிலை மாறணும். இந்த சமூக அநீதியை வெளிச்சத்துக்குக் கொண்டு வர ஒவ்வொருத்தரும் முன்வரணும்.

இந்தத் திருமணங்களைத் தடுக்கணும்னா பள்ளிக்கூடத்துலயே இதனால ஏற்படுற பாதிப்புகளை விளக்கிச் சொல்லணும். பல குழந்தைகளுக்கு சரியான வழிகாட்டுதல் இல்லை. பள்ளிகள்ல குழந்தைகளுக்கு வழிகாட்டுறதுக்காகவே அரசு கவுன்சிலர்களை நியமிக்கலாம். வளரிளம் பருவத்துல எப்படி இருக்கணும், வாழ்க்கைத்திறனை எப்படி மேம்படுத்திக்கறது, எதிர்காலத்தை சிறப்பாக ஆக்கிக்க லட்சியம்னு ஒண்ணு இருக்கணும்னு மாணவர்களுக்கு வழிகாட்டலாம். முக்கியமா அனைத்துத் திருமணங்களையும் பதிவு செய்யறதைக் கட்டாயமாக்கணும்.

பத்து, பதினஞ்சு வயசு குழந்தைக்கு என்ன தெரியும்? ஓடி, ஆடி விளையாடுற வயசு. பல புதுப் புது விஷயங்களைக் கத்துக்குற பருவம். அவங்களுக்குள்ள எதிர்காலத்தை எப்படி வடிவமைச்சுக்கணும்னு ஒரு லட்சியத்தை விதைக்கிறதை விட்டுட்டு, அவங்களுக்குக் குழந்தைத் திருமணம் செஞ்சுவெக்கிறதுங்கறது நிச்சயம் வன்முறைதான். நீங்களே கொஞ்சம் யோசிச்சிப் பாருங்க இவங்களே குழந்தைங்க இவங்களுக்கு குழந்தை பொறந்தா அதை இவங்க எப்படி வளா்ப்பாங்க, பாா்த்துக்கங்க. பெற்றோா் ஓரளவு உடல், அறிவு முதிா்ச்சியோட இருந்தாத்தானே பொறக்கிற குழந்தையுடைய ஆரோக்கியம், அறிவு வளா்ச்சி, கல்வி, விளையாட்டுன்னு பல துறையில் மேம்பாடுடைய குழந்தைகளை உருவாக்குவாங்க நல்ல சமுதாயம் அப்பதான் உண்டாகும் இல்லையா.

அவங்க உரிய வயசுக்கு வந்த பிறகு, வாழ்க்கையோட நெளிவு சுளிவுகளைத் தெரிஞ்சுக்கிட்டதுக்குப் பிறகு அவங்களுக்குக் கல்யாணம் செஞ்சு வெப்போமே... என்ன குறைஞ்சு போச்சு? முதல்ல குழந்தைகளைக் குழந்தைகளா இருக்கவிடுவோமே... அவங்களோட உரிமையிலயும் சுதந்திரத்துலயும் நாம தலையிடாம இருப்போமே... இதுக்கான உறுதிமொழியை இப்போவே எடுத்துக்குவோம் நண்பர்களே!

தொடர்புக்கு:

drpt.feedback@gmail.com

கடவுளின் படைப்புக்கள் அனைத்துமே அற்புதமானவை. இந்த உலகை இயங்கச் செய்வது பஞ்ச பூதங்களே. நிலம், நீர், காற்று, நெருப்பு, ஆகாயம் எனும் ஐந்து மாபெரும் சக்திகளில் ஒன்று குறைந்தாலும் இந்த உலகம் இயங்காது.

அதே போன்று தான் 'காலம்' என்னும் அற்புதப் படைப்பையும் கடவுள் நமக்கு வழங்கி உள்ளார். காலம் என்பது ஒரு சக்கரம் போன்றது. இருபத்தி நான்கு மணி நேரமும் சுழன்று கொண்டே இருப்பது. காலம் ஒரு பம்பரம் போன்றது. மனித குலத்தையே ஆட்டுவிப்பது என்றும் பொருள் கொள்ளலாம்.

காலத்தை 'காலதேவன்' என்னும் ஆண் வடிவத்திலும் அழைக்கலாம். 'காலமகள்' என்னும் பெண் வடிவத்திலும் அழைக்கலாம். அது ஆண் வடிவமாக இருந்தாலும், பெண் வடிவமாக இருந்தாலும், அவர்களின் கரங்களிலும் நன்மை, தீமைகள் எடைபோட்டுப் பார்க்கின்ற ஒரு துலாக்கோல் என்னும் தராசையும் இறைவன் கொடுத்துள்ளான் என்பதே உண்மையாகும்.

நீதிதேவன் கைகளில் உள்ள தராசைப்போல் தான் இதுவும். நீதியை, நியாயத்தை, தர்மத்தை எடை போட்டுப்பார்த்து நீதிதேவன் எப்படி பரிபாலனம் செய்கிறானோ, அதைப்போலவேதான் இந்தக் 'காலம்' என்னும் சக்தியும் நாம் செய்யும் நன்மை, தீமைகளுக்கு ஏற்ப நம்மை இயக்குகிறது. அந்த தராசிற்கு இறைவன் சூட்டியுள்ள பெயர் 'விதி' என்பதாகும்.

கருவில் குழந்தை கருவாகி உருவாகும் பொழுது அதன் விதி எழுதப்பட்டு விடுகிறது. அந்தக் கணக்கை யாராலும் மாற்ற முடியாது. ஜனனம் ஆகும் முன்பே விதிக்கப்படுவதால் அது விதியாயிற்று.

நமக்கு நல்லது நடக்கும் போது மகிழ்ச்சியோடு அதை ஏற்றுக்கொள்கிறோம். ஆனால் துன்பமும், துயரமும் நம்மைத் துரத்தும் பொழுது விதி செய்த சதி என்று விதியின் மீது எறிந்து விழுகிறோம்.

கோபம் வந்து விட்டால் கண்ணதாசன் யாரையும் விட்டு வைக்க மாட்டார். ஒரு பிடி பிடித்து விட்டுத்தான் மறுவேலை பார்ப்பார். ஒரு கவிதையிலே கோபக்கனல் கொப்பளிக்க.

'விதி என்னும் படுபாவி வாவென்று

விடுக்கின்ற கடிதம் வருமுன்'-என்று

விதியை படுபாவி என்றே அழைக்கிறார் கண்ணதாசன். ஆக நன்மை செய்யும் போது கண்டுகொள்ளாமல் இருப்பதும், துன்பம் வரும்போது விதியைச் சபிப்பதும் எல்லா மனிதர்களுக்கும் வழக்கமான ஒன்று தான். இருந்தாலும், நமது கவியரசர் எல்லா நிலைகளையும் சீர்தூக்கிப் பார்த்து 'காலமகள் போடுகிற கோலம்' எப்படி எல்லாம் இருக்கும் என்பதை அருமையாய்ப் படம்பிடித்துத் தருகிறார்.

காலமகள் தேவமகள்

கையிலுள்ள துலாக் கோலில்

எந்த எடை எப்பொழுது

எவ்வளவென் றாறிவார்

மன்னுமொரு காலம் உனை

மலையேற்றி வைத்தாலும்

பின்னுமொரு காலமதில்

பெருவெள்ளம் தோன்றிவிடும்

வளமான காலம்வரின்

வணிகருக்கு வரவு வரும்

அழிவாகும் காலம்வரின்

அத்தனையும் ஓடிவிடும்.

ஒருநாள் உடல் உனக்கு

உற்சாக மாயிருக்கும்..

மறுநாள் தளர்ந்து விடும்

மறுபடியும் தழைத்து விடும்... என்று நம்பிக்கை ஊட்டுகிறார். அதே சமயம் கால மகள் கையில் உள்ள துலாக்கோல் எந்தப் பக்கம், தூக்கும் எந்தப் பாக்கம் சரியும் என்று எவருக்கும் தெரியாது. உன்னை மலையேற்றி வைத்து அழகு பார்த்த அடுத்த நாளே வெள்ளம் வந்து அடித்துக் கொண்டு போனாலும் ஆச்சரியப்படுவதற்கு இல்லை என்கிறார் கண்ணதாசன்.

வணிகர்களுக்கு ஓகோ என்று சொல்லுகிற அளவுக்கு வரவு வருவதற்கும் வாய்ப்பிருக்கிறது. ஆனால் நேரம் சரியில்லை என்றால் வந்த வரவெல்லாம் காணாமல் ஓடி விடுவதற்கும் வாய்ப்பிருக்கிறதென்கிறார். இன்று தங்கம் போல் மிணுமிணுக்கிற உடம்பு. நாளையே தளர்ந்து விடுவதற்கும் பின்னாளில் தழைத்து விடுவதற்கும் நேரம்தான் காரணம் என்கிறார் கண்ணதாசன்.

ஆளம்பு சேனையுடன்

அழகான வாழ்வு வரும்

நாள்வந்து சேர்ந்து விட்டால்

நாலும் குருகி விடும்

ஜாதகத்து ராசியிலே

சனிதிசையே வந்தாலும்

பாதகத்தைப் பார்க்காமல்

பரிசு தரும் காலம் வரும்

எல்லோர்க்கும் ஏடெழுதி

இறைவனவன் வைத்திருக்க

பொல்லாத காலமெனப்

புலம்புவதில் லாபமென்ன...

எவனோ ஒருவன் உனை

ஏமாற்றிப் புகழ்வதுண்டு

மகனே தலை எழுத்தாய்

மாற்றம் பெறுவதுண்டு

சுட்டு விரலை நீட்டினால் போதும். ஐயா கூப்பிட்டீர்களா? என்று கேட்டு ஒரு சேனைப்படையே உனது சேவைக்காக காத்திருக்கும். ஆனால் அதே சமயம் உனக்குச் சோதனையாக நாெளான்று வந்து விட்டால் இந்த ஆள், அம்பு, சேனை அத்தனையும் காணாமல் போய் விடும் என்கிறார் கவியரசர்.

ஜாதகத்திலே சனி திசை என்றாலே எல்லோருக்கும் ஒருவிதமான பயம்தான். அப்படிப்பட்ட சனி திசையிலும் உனக்கு நேரம் நல்லபடி அமைந்து விட்டால், சனி திசையே உனக்கு அள்ளிக் கொடுக்கும் காலம் வரவும் வாய்ப்பு உண்டு என்கிறார் கண்ணதாசன்.

பிறந்த உடனே ஒவ்வொரு மனிதனுக்கும் சித்திர குப்தன் என்ற நீதிமான் தலையெழுத்தை நிர்ணயம் செய்து ஏடு தயாரித்து விடுகிறார். அப்படியிருக்க இடையிலே... பொல்லாத காலம் வந்து விட்டதே என்று வருந்துவதில் எந்த லாபமும் ஏற்படப் போவதில்லை.

எவனோ ஒருவன் வந்து புகழ்ந்து பேசி உனை ஏமாற்றி விட்டுப் போனாலும், நேரம் சரியாக அமைந்தால் உனது மகன் தலை எடுத்து மாற்றத்தை ஏற்படுத்துவான் கவலைப்படாதே என்கிறார் கண்ணதாசன்.

அடுத்து வரும் கவிதையிலும் எதையும் நிரந்தரம் என நினைக்காதே நாம் வாழும் வாழ்க்கை நீர்க்குமிழி வாழ்க்கை என்பதை ஒருபோதும் நீ மறந்து விடாதே என்பதை தெள்ளத் தெளிவாகவே எழுதி இருக்கிறார்.

பழிகாரன் கூட உந்தன்

பாதம் பணிவதுண்டு

பலகாலம் தின்றவனே

பகையாகிப் போவதுண்டு

மழைக்காலம் மாறிஒரு

மார்கழியில் வருவதுண்டு

வெயிற்காலம் ஐப்பசிக்கும்

விரிந்து பரப்பதுண்டு

பல்லாயிரம் ஆண்டு

பாராண்ட தலைமுறையும்

செல்லாத காசாகித்

தெருவில் அலைவதுண்டு

மன்னவர்கள் போனதுண்டு

மந்திரிகள் வந்ததுண்டு

மந்திரியைத் தீர்த்து விட்டு

மாசேனை ஆள்வதுண்டு என்று காலமகள் கோலத்தை வரிசைப்படுத்து கிறார்.

உன் மீது தீராத பழி கொண்டு ஜென்ம விரோதியாக இருப்பவனே கூட, ஒருநாளில் மனந்தி ருந்தி நமக்குள்ளே எதற்குச் சண்டை. இந்தச் சண்டையால் எந்த பலனும் விளையப் போவதில்லை என்று நட்பு பாராட்டும் காலம் வருவதற்கும் வாய்ப்பு இருக்கிறது.

உன்னிடமே இருந்து மூன்று வேளையும் மூக்குப்பிடிக்கத் தின்று விட்டு உண்ட வீட்டுக்கு துேராகம் செய்கிற ஈனச் செயலைச் செய்து விட்டு அவன் பகைவனாகிப் போவதற்கும் வாய்ப்பு உண்டு என்கிறார் கண்ணதாசன்.

ஐப்பசியோடு மழைக்காலம் முடிந்து விடும் என்பது பொதுவான நம்பிக்கை. ஆனால் திடீரென மார்கழியில் மழை பெய்கிறதே? அது மட்டுமல்ல வெயில் காலம் என்பது ஆவணி மாதத்தோடு முடிந்து விடும் என்பது தானே நாட்டிலே உள்ள வழக்கு.

ஆனால் ஐப்பசியில் கூட வெயில் கொளுத்து கிறதே அது எப்படி? இவை அனைத்துமே "காலம் போடுகிற கோலம்" என்கிறார் கண்ணதாசன்.

இந்தியாவையே தன் கைக்குள் வைத்திருந்த கட்சி எதிர்க்கட்சி அந்தஸ்து கூட பெற முடியாமல் தவிக்கிறதே? குறைவான உறுப்பினர்களைப் பெற்று எதிர்க்கட்சி அந்தஸ்தை தட்டுதடுமாறி பெற்ற கட்சியெல்லாம் இன்று எட்ட முடியாத அளவுக்கு உயர்ந்திருக்கிறதே?

ஆங்கிலேயர் இந்தியாவை ஆண்ட போது மன்னராட்சி முறை தானே இங்கு இருந்தது. பண்டித் நேருவின் காலத்தில் மன்னராட்சியும், மானியமும் ஒழிக்கப்பட்டு, மந்திரிகள் ஆளுகிற மக்களாட்சி மலர்ந்து விட்டதே. இவை எல்லாமே காலத்தின் கோலம்தான்.

பாகிஸ்தானில் ராணுவ அதிகாரியாய் இருந்த முஷ்ரப் மந்திரிகளை எல்லாம் நீக்கி விட்டு, கணநேரத்தில் ஆட்சியைக் கைப்பற்றி நீண்ட காலம் பதவியில் இருந்தாரே? இவை அனைத்தும் "காலம் போட்ட கோலம் இல்லாமல் வேறு என்ன என்கிறார் கண்ணதாசன்.

இந்தக் கவிதையில் காலம் எழுதுகிற தீர்ப்புக்கு யாராயிருந்தாலும் கட்டுப்பட்டுத் தானே ஆக வேண்டும் என்பதை அழுத்தம் திருத்தமாகப் பதிவு செய்துள்ளார் கண்ணதாசன்.

இதை எல்லாம் படிக்கும் போது சொந்தமாக கப்பல் கம்பெனி வைத்திருந்த "கப்பலோட்டிய தமிழன் வ.உ.சி." தனது மகனுக்கு வேலை கேட்டு அலைந்ததும், அவரே மளிகைக் கடை நடத்தியது எல்லாம் நம் நினைவுக்கு வருகிறது.

கூட்டிக் கழித்துப் பார்க்கும் போது காலமகள் "எதுவும் செய்வாள்" என்ற கண்ணதாசனின் கருத்து அனைத்தும் முழுக்க முழுக்க உண்மைதானே.

அடுத்த வாரம் சந்திப்போம்.

தூத்துக்குடியை சேர்ந்தவர் பிச்சாண்டி. தங்களது பாரம்பரிய தொழிலான உப்பளம் தொழிலை செய்தவர். இவரது மகன் செல்வராஜ். இவரும் உப்பளம் தொழிலில் ஈடுபட்டுள்ளார். சென்னை வந்த இவர் எண்ணூர்-மீஞ்சூர் இடையே உள்ள அத்திப்பட்டு புதுநகர் பகுதியில் அரசு நிலத்தை 99 ஆண்டுகளுக்கு குத்தகைக்கு பெற்று உப்பள தொழிலை மேற்கொண்டார்.

அந்த காலகட்டத்தில் அந்த இடம் கதம்ப பூக்கள் நிறைந்த அடர்ந்த காட்டுப்பகுதியாக இருந்தது. அதை சீரமைத்து தனது தந்தை பெயரின் ஒரு பகுதியான 'சாண்டி' என்ற பெயரில் நிறுவனத்தை தொடங்கி உப்பு தயாரிக்கத் தொடங்கினார். அதில் அந்த பகுதியை சேர்ந்த வர்கள் பணிபுரிந்தனர்.

1993-ம் ஆண்டு ஆவணி மாதம் செவ்வாய்க்கிழமை தினத்தன்று நண்பர் ஒருவருடன் திருப்பதி ஏழுமலையானை வழிபட செல்வராஜ் சென்றிருந்தார். அங்கு அவர் தூங்கிக்கொண்டிருந்தபோது அவரது கனவில் சில காட்சிகளும், உத்தரவு ஒன்றும் வந்தது. 'நீ உப்பளம் நடத்திவரும் பகுதியில் நான் இருக்கிறேன். அங்கு 3 சுயம்பு உள்ளது. அவற்றை எடுத்து வழிபடவும்' என்று கனவில் அசரிரீயாக கூறப்பட்டது.

உப்பளத்தின் காட்சிகளும் அவரது கனவில் பதிந்தன. அதே நினைவோடு சென்னை திரும்பிய செல்வராஜ், தனது உப்பளம் பகுதிக்கு சென்றார். கனவில் கண்ட இடத்தில் சிறிது தூரம் நடந்ததும் அவர் முன்பு பிரகாசமாக ஒளி தோன்றியது. அந்த இடத்தில் 2 பெரிய நல்ல பாம்புகள் இருந்தன. அந்த 2 பாம்புகளும் கிழக்கு பக்கம் ஒன்றும், மேற்கு பக்கம் ஒன்றுமாக இரண்டு பக்கம் பிரிந்து சென்றன. அந்த இடத்தில் நிச்சயம் ஏதோ ஒரு மகத்துவம் இருப்பதாக செல்வராஜ் நினைத்தார்.

அந்த இடத்தை தோண்ட உத்தரவிட்டார். அங்கு 3 பெரிய சுயம்புகள் வெளிப்பட்டன. அதில் ஒரு சுயம்பை எடுத்து சற்று நகர்த்தி முத்தாரம்மனுக்கு கருவறை உருவாக்கி பெரிய ஆலயம் ஒன்றை கட்டினார். அந்த ஆலயத்தின் ஒரு பகுதியில் மற்றொரு சுயம்பை வைத்து விநாயகர் ஆலயமும், இன்னொரு சுயம்பை வைத்து ஆதிசேஷன் ஆலயமும் அமைத்தார்.

முத்தாரம்மன் கருவறையில் வைக்கப்பட்ட சுயம்பு தற்போது கொஞ்சம் கொஞ்சமாக வளர்ந்தபடி உள்ளது. இதன்மூலம் அந்த சுயம்பும், சுயம்பு முத்தாரம்மனும் மிக மிக சக்தி வாய்ந்தது என்பது உறுதிப்படுத்தப்பட்டுள்ளது. திருச்செந்தூர் அருகே உள்ள குலசை முத்தாரம்மனின் அம்சமாக இந்த முத்தாரம்மன் கருதப்படுகிறாள். திருவேற்காடு ஐயப்பசாமி அறிவுறுத்தலின் பேரில் திருமுருகன் பூண்டியில் தயாரான இந்த முத்தாரம்மனின் சிலை அமைப்பு கம்பீரமானது. நிறையபேரின் கனவில் இந்த அம்மன் சென்று தனது ஆலயத்துக்கு வரவழைத்துள்ளாள் என்பது மெய் சிலிர்ப்புடன் இன்றும் பேசப்படுகிறது.

கோதண்டபானி குருக்கள் என்பவரை அங்கு பூஜைகள் செய்வதற்காக செல்வராஜ் நியமனம் செய்துள்ளார். இதன் மூலம் அந்த முத்தாரம்மன் ஆலயத்தில் ஆகம விதிகளுடன் சிறப்பான பூஜைகள் தினமும் நடந்து வருகின்றன.

உப்பளம் இருந்த இடம் ஆலயமாக மாறிய நிலையில் அங்கு பணிபுரிந்து வந்த உப்பள தொழிலாளர்கள் சாண்டி நிறுவன கோவில் என்று அதை அழைக்கத் தொடங்கினார்கள். நாளடைவில் அது சாண்டி கோவில் என்று மாறிப்போனது. இந்த ஆலயத்துக்கு செல்லும் நுழைவுப்பாதையில் ராஜ கணபதி விநாயகர் கோவில் மற்றும் புற்றுக்கோவில் தனித்தனியாக உள்ளன.

முத்தாரம்மன் ஆலயத்தின் நுழைவுவாயில் அருகே பெருமாள் பாதம் வைக்கப்பட்டுள்ளது. திருப்பதி ஏழுமலையான் ஆலய கருவறையில் சுமார் 4 மணிநேரம் வைக்கப்பட்டு பூஜைகள் செய்து கொண்டுவரப்பட்டு இந்த பாதம் பிரதிஷ்டை செய்யப்பட்டுள்ளது. இந்த பாதத்தின் கீழ் திருப்பதி, ஸ்ரீரங்கம் ஆலயங்களில் இருந்து எடுத்துவரப்பட்ட மண்ணும் வைக்கப்பட்டுள்ளது.

முத்தாரம்மன் ஆலயத்தின் எதிரே நவக்கிரகங்களுக்கு தனி கோவில் கட்டியுள்ளனர். டெல்டா மாவட்டங்களில் உள்ள நவக்கிரக ஆலயங்களில் இருந்து மண் எடுத்து வந்து இந்த நவக்கிரகங்களின் சிலைகளுக்கு கீழ் வைக்கப்பட்டுள்ளது. இங்கு நவக்கிரகங்கள் தங்கள் மனைவியுடன் சேர்த்து பிரதிஷ்டை செய்யப்பட்டுள்ளனர்.

இப்படி பல்வேறு சிறப்புகளுடன் இந்த முத்தாரம்மன் ஆலயம் திகழ்கிறது. சென்னையின் பல்வேறு பகுதிகளில் இருந்து இந்த ஆலயத்துக்கு தினமும் ஏராளமானோர் சென்று வழிபட்டு வருகிறார்கள். இந்த ஆலயத்தின் ஒரு பகுதியில் சித்தர் ஒருவர் தன்னை வெளிப்படுத்திக்கொண்ட ஆச்சரிய சம்பவம் கடந்த 2001-ம் ஆண்டு மார்கழி மாதம் உத்திரம் நட்சத்திரம் தினத்தன்று நடைபெற்றது.

 முத்தாரம்மன் ஆலயம் கட்டப்பட்டு சுமார் 7 ஆண்டுகள் கடந்த நிலையில் ஒருநாள் செல்வராஜ் அங்கு வழிபாடுகளை முடித்துவிட்டு வெளியில் வந்துகொண்டு இருந்தார். அப்போது சற்று தொலைவில் முள்காட்டுப்பகுதியில் பளீரென மஞ்சள் நிறத்தில் ஒளி வீசியது. அதை பார்த்ததும் செல்வராஜுக்கு ஆச்சரியமாக இருந்தது. 'அது என்ன மஞ்சள் நிறத்தில் ஒளி வருகிறது' என்று கேட் டார். பிறகு அந்த பகுதிக்கு செல்ல முடிவு செய்தார்.

அடர்ந்த முள் காடாக இருந்த அந்த பகுதியில் தொழிலாளர்கள் சுத்தம் செய்து வழி ஏற்படுத்தி கொடுத்தனர். முத்தாரம்மன் ஆலயத்தில் இருந்து சுமார் 150 மீட்டர் தொலைவில் மஞ்சள் ஒளி ஏற்பட்ட பகுதிக்கு பாதை அமைக்கவே சுமார் 2 மணிநேரம் ஆகிவிட்டது. அந்த பாதை வழியாக செல்வராஜ் சென்று பார்த்தபோது ஒரு இடத்தில் சாமந்தி பூ மாலைபோட்டு யாரோ வழிபாடு செய்திருப்பது போன்று தெரிந்தது. ஆச்சரியமடைந்த செல்வராஜ் இதில் ஏதோ மகிமை இருக்கிறது என்பதை உணர்ந்தார்.

அந்த இடத்தில் விளாமரம் ஒன்று வளர்ந்து இருந்தது. பொதுவாக விளாமரத்தின் கீழ் அமர்ந்து சித்தர்கள் பூஜை செய்வது வழக்கம் என்று சொல்வார்கள். எனவே அங்கு ஏதோ ஒரு சித்தர் வந்திருக்கலாம் என்று நினைத்தார். அங்கு காணப்பட்ட சாமந்திப்பூ புத்தம் புதிதாக அன்றுதான் போடப்பட்டது போன்று இருந்ததால் அவரது ஆர்வம் அதிகரித்தது. அங்கு பூமியை தோண்டச்செய்தார். சிறிது பள்ளம் தோண்டியதுமே சித்தர்கள் பயன்படுத்தும் தண்டம், இருக்கை, மான் தோல், புலித்தோல், ஆகியவை ஒவ்வொன்றாக கிடைத்தன. இதன்மூலம் அங்கு சித்தர் ஒருவர் வாழ்ந்தது உறுதியானது.

இந்த சித்தர் யார்? அவர் பெயர் என்ன? எந்த காலக்கட்டத்தில் அவர் வாழ்ந்தார்? என்னென்ன அற்புதங்கள் செய்தார்? என்பன போன்ற எந்த தகவல்களும் தெரியவில்லை. ஆனால் அந்த சித்தர் சுமார் 800 முதல் 1000 ஆண்டுகளுக்கு முன்பு அந்த பகுதியில் மிகப்பெரிய ஆசிரமம் அமைத்து வாழ்ந்திருக்க வேண்டும் என்பது மட்டும் தெள்ளத்தெளிவாக உறுதியானது.

அந்த பகுதியில் சித்தர் பயன்படுத்திய பொருட்கள் கிடைத்த இடத்தில் மேலும் 3 அடி தோண்டியபோது செங்கல் கட்டுமான அமைப்புகள் தெரிந்தன. அந்த செங்கல்கள் 2 இஞ்ச் அகலம் கொண்டதாக இருந்தது. தற்போது நாம் பயன்படுத்தும் செங்கல்கள் 4 இஞ்ச் அகலம் கொண்டவை. இந்த 4 இஞ்ச் செங்கல் ஆங்கிலேயர்களால் சென்னையில் அறிமுகப்படுத்தப்பட்டதாகும்.

அதற்கு முன்பு தமிழர்கள் 2 இஞ்ச் அகல செங்கலைத்தான் பயன்படுத்தினார்கள். இந்த வகை செங்கல் தயாரிக்கப்படுவது நிறுத்தப்பட்டே சுமார் 400 ஆண்டுகள் ஆகிறது. எனவே அந்த இடத்தில் சித்தரின் ஆசிரமம் 800 ஆண்டுகளுக்கு முன்பு இருந்தது தொல்லியல் சான்று மூலமும் உறுதியானது. என்றாலும் அங்கு தவம் இருந்து சித்திபெற்ற சித்தர் யார் என்பது மட்டும் இன்று வரை தெரியவில்லை.

அந்த சித்தர் யார் என்பதை கண்டுபிடிக்க ஆய்வு செய்தபோது பல ஆச்சரியமான தகவல்கள் வெளிப்பட்டன. 18 சித்தர்களில் ஒருவரான குதம்பை சித்தர் (மயிலாடுதுறையில் இவர் ஐக்கியமானார்) இந்த இடத்துக்கு வந்து நீண்ட நாட்கள் தங்கி இருந்து இந்த சித்தரை வழிபட்டு பூஜைகள் செய்ததாக தெரியவந்துள்ளது. இதன்மூலம் இந்த இடம் 800 ஆண்டுகளுக்கு முன்பு மிகப்பெரிய புண்ணிய பூமியாக திகழ்ந்தது உறுதிப்படுத்தப்பட்டுள்ளது. செல்வராஜுக்கு ஞானம் வழங்கிய சாக்கு சித்தரும் அந்த இடத்தில் சக்தி வாய்ந்த சித்தர் வாழ்ந்ததை உறுதிப்படுத்தினார்.

அந்த இடத்தில் சிறிய குடில் அமைத்து சித்தருக்கு தனி ஆலயத்தை செல்வராஜ் உருவாக்கி இருக்கிறார். அங்கு தினசரி காலை 7 மணி முதல் வழிபாடுகள் நடைபெற்று வருகின்றன. ஆங்கிலேயர்கள் காலத்தில் அந்த இடத்தில் தென்னிந்தியாவின் உப்பு தயாரிப்பு நிறுவன தலைமை அலுவலகத்தை ஆங்கிலேயர்கள் அமைத்து இருந்தனர். இதில் வேலைபார்த்த தமிழர்கள் சித்தர் வாழ்ந்த இடத்தில் காணப்பட்ட ஒரு கல்லுக்கு தினமும் பூஜை செய்து வழிபாடுகள் நடத்தி வந்ததாக கூறப்படுகிறது.

இப்படி அந்த சித்தர் பல நூற்றாண்டுகள் அந்த இடத்தில் புதைந்து கிடந்துள்ளார். செல்வராஜுக்கு தைப்பூசம் தினத்தன்று அவர் காட்சி கொடுத்து தன்னை வெளிப்படுத்திக்கொண்டதை சிறப்பாக சொல்கிறார்கள். சாக்கு சித்தர், பாலகணபதி சுவாமிகள் ஆகியோர் இங்கு நீண்ட நாட்கள் தங்கி தவம் இருந்துள்ளனர். அவர்களையும் செல்வராஜ் பராமரித்து அவர்கள் பரிபூரணம் ஆனபிறகு சாக்கு சித்தருக்கு தூத்துக்குடியிலும், பாலகணபதி சுவாமிகளுக்கு ராமநாதபுரம் அருகில் சாத்தான்குளம் என்ற கிராமத்தில் அதிஷ்டானம் அமைத்தார் என்பது குறிப்பிடத்தக்கது.

திருவேற்காட்டில் 116 வயது வரை வாழ்ந்த புகழ்பெற்ற மகான் ஐயப்ப சுவாமிகள் அடிக்கடி அத்திப்பட்டு புதூருக்கு வந்து இந்த சித்தரை வழிபடுவார். குறிப்பாக பவுர்ணமி நாட்களில் வந்து தன் கைப்பட பிரசாதம் தயாரித்து படைத்து சித்தரை வழிபட்டு செல்வார். அவர் 35-க்கும் மேற்பட்ட தடவை அந்த சித்தர் கூடத்தில் அமர்ந்து நீண்ட தியானம் செய்துள்ளார்.

சமீபத்தில் ஷீரடி சாய்பாபாவின் வளர்ப்பு மகளான 108 வயது பெண்மணி இந்த ஆலய நிர்வாகத்தை தொடர்புகொண்டு பேசினார். சித்தர் வாழ்ந்த பகுதி தனது கனவில் வந்ததாக தெரிவித்தார். அதோடு தனது இறுதி காலத்தில் அத்திப்பட்டு புதூருக்கு வந்து சித்தர் பீடம் அருகே தங்கி விட விரும்புவதாகவும் கூறியுள்ளார். அவரது கனவில் அடிக்கடி இந்த சித்தர் காட்சி கொடுப்பதாக கூறப்படுகிறது. இதில் இருந்து பெயர் தெரியாத அந்த சித்தர் எந்த அளவுக்கு மகிமை பெற்றவராக இருக்கிறார் என்பதை உணர்ந்து கொள்ளலாம்.

இவர்களை போல ஏராளமான ஆன்மீகவாதிகள் அந்த சித்தர் பீடத்துக்கு வந்து தங்களை மேம்படுத்தியுள்ளனர். அந்த சித்தர் வாழ்ந்த இடத்துக்கு செல்லும்போதே அதிர்வலைகளை உணர முடியும். மிகச்சிறப்பாக இந்த சித்தர் சன்னதி பராமரிக்கப்பட்டு வருகிறது. அங்கு தியானம் செய்ய நல்ல வசதி இருக்கிறது. காலை 7 மணி முதல் மாலை 6 மணிக்குள் சென்று வழிபட்டு வரலாம். இரவில் அங்கு செல்வதை தவிர்ப்பது நல்லது.

பவுர்ணமி நாட்களில் இங்கு சித்தர் சன்னதியிலும், முத்தாரம்மன் சன்னதியிலும் சிறப்பு பூஜைகள் நடத்தப்படுகின்றன. குறிப்பாக பவுர்ணமி தினத்தன்று காலையில் குழந்தை பாக்கியத்திற்காக சிறப்பு வழிபாடு செய்யப்படுகிறது. அங்கு பூஜை செய்து தரப்படும் வெண்ணையை பயன்படுத்தினால் குழந்தை பாக்கியம் உறுதி என்று நம்புகிறார்கள். அந்த பாக்கியத்தை பெற்ற பல பெண்கள் தங்கள் குழந்தையுடன் வந்து நன்றி செலுத்திவிட்டு செல்வதை காண முடிந்தது.

வருகிற 6-ந்தேதி இந்த சித்தர் பீடத்தில் வருசாபிஷேகம் செய்ய உள்ளனர். ஆனி மாதம் அஸ்தம் நட்சத்திரம் நாளில் இந்த சித்தருக்கு மகா குருபூஜை நடத்தப்படுகிறது. வாய்ப்பு இருப்பவர்கள் சுயம்பு சித்தரை சித்தரை வணங்கி வந்தால் நிச்சயம் நல்லதே நடக்கும்.

இந்த முத்தாரம்மன் ஆலயம் மற்றும் சுயம்பு நாதர் சித்தர்பற்றி மேலும் தகவல்களை கோதண்ட பாணி குருக்களிடம் 9840529611, 7401453839 என்ற எண்களில் தொடர்புகொண்டு பெறலாம்.