நீங்கள் தேடியது "Kumbakonam"

கும்பகோணம்:

கும்பகோணம் சோலையப்பன் தெருவை சேர்ந்த ராஜி மகன் சரவணன் (வயது 21). இவர் பெருமாண்டி பகுதியில் நடந்து சென்றபோது பெருமாண்டியை சேர்ந்த மணிசங்கர் (26) என்பவர் மீது மோதி விட்டதாக கூறப்படுகிறது.

இது தொடர்பாக மணிசங்கரும், சரவணனுக்கும் இடையே வாய் தகராறு ஏற்பட்டது. அப்போது மணிசங்கரின் நண்பரான சுந்தர் (24) என்பவர் கத்தியால் சரவணனை குத்திவிட்டு தப்பி சென்றுவிட்டார். இதில் காயமடைந்த சரவணன் கும்பகோணம் அரசு ஆஸ்பத்திரியில் அனுமதிக்கப்பட்டு சிகிச்சை பெற்று வருகிறார்.

இதுபற்றிய புகாரின் பேரில் கும்பகோணம் கிழக்கு போலீசார் வழக்குப்பதிவு செய்து சுந்தரை கைது செய்தனர்.

கும்பகோணம்:

கும்பகோணம் அருகே உள்ள புளியம்பேட்டையைச் சேர்ந்தவர் உலகநாதன். இவரது மகன் மணிகண்டன் (வயது24). இவர் திருபுவனத்தில் பி.எஸ்.என்.எல் அலுவலகத்தில் அலுவலராக பணியாற்றி வருகிறார்.

இந்த நிலையில் நேற்று திருபுவணம் கீழவீதியைச் சேர்ந்த 8 வயது மதிக்கத்தக்க ஒரு சிறுமி அந்த பகுதியில் உள்ள ஒரு கடை அருகே விளையாடி கொண்டிருந்தாள் . அப்போது அங்கு வந்த மணிகண்டன் சிறுமிக்கு சாக்லேட் வாங்கி தருவதாக கூறி அந்த பகுதியில் உள்ள ஒரு மறைவான இடத்திற்கு அழைத்து சென்றுள்ளார். பின்னர் பாலியல் பலாத்காரத்தில் ஈடுபட முயன்றுள்ளதாக கூறப்படுகிறது. மணிகண்டனை பார்த்து பயமடைந்த சிறுமி அந்த இடத்தை விட்டு தப்பி சென்று தனது பெற்றோரிடம் நடந்ததை கூறியுள்ளார்.

இதனால் ஆத்திரம் அடைந்த பெற்றோர் திருபுவனம் அனைத்து மகளிர் காவல் நிலையத்தில் புகார் செய்தனர். அதன்பேரில் போலீசார் வழக்கு பதிவு செய்து மணிகண்டனை கைது செய்தனர்.

கும்பகோணம்:

தஞ்சை மாவட்டம் திருவிடைமருதூர் அடுத்த கொத்தங்குடி ஊராட்சி அருளானந்த புரத்தைச் சேர்ந்தவர் அருமைநாதன் இவரது மகன் ஜெயசீலன் (வயது 27 ). இவர் நாச்சியார் கோவிலில் உள்ள ஒரு குத்துவிளக்கு பட்டறையில் தொழிலாளியாக வேலை பார்த்து வந்தார். இவரது நண்பரான மாத்தூரை சேர்ந்த மாதவனும் ( 26) வேலை பார்த்து வருகிறார்.

இந்தநிலையில் இரண்டு பேருக்கும் ஏற்கனவே முன்விரோதம் இருந்து வந்தது. நேற்று மதியம் வீட்டில் ஜெயசீலன் இருந்துள்ளார். பின்னர்மாலை ஜெயசீலனை செல்போனில் தொடர்பு கொண்டு நன்னிலம் மெயின் ரோட்டிற்கு வருமாறு மாதவன் கூறியுள்ளார். இதையடுத்து நன்னிலம் மெயின் ரோட்டுக்கு ஜெயசீலன் சென்றுள்ளார். பின்னர் நீண்ட நேரமாகியும் அவர் வீடு திரும்பவில்லை. அவரது செல்போனிற்கு தொடர்பு கொண்ட போதும் செல்போனை எடுத்து அவர் பேசவில்லை.

இதனால் சந்தேகம் அடைந்த ஜெயசீலனின் உறவினர்கள் நன்னிலம் மெயின் ரோட்டுக்கு சென்று பார்த்துள்ளனர். அப்போது சுற்றுமுற்றும் பார்த்துள்ளனர் ஆனால் அங்கு யாரும் இல்லாததால் அங்கிருந்து ஜெயசீலனின் செல்போன் எண்ணிற்கு தொடர்பு கொண்டுள்ளனர்.

அப்போது செல்போன் சத்தம் சாலையோரம் இருந்த வாய்க்காலில் கேட்டுள்ளது. இதையடுத்து அந்த வாய்க்காலில் சென்று பார்த்துள்ளனர். அங்கு கழுத்து , உடலில் வெட்டுக் காயங்களுடன் ஜெயசீலன் இறந்து கிடந்துள்ளார். அதை பார்த்து அதிர்ச்சி அடைந்த அவர்கள் சத்தம் போட்டுள்ளனர். இதனால் அப்பகுதியில் கூட்டம் கூடியது.

இதுகுறித்து தகவல் அறிந்ததும் நாச்சியார் கோவில் போலீசார் சம்பவ இடத்திற்கு வந்து ஜெயசீலனின் உடலை கைப்பற்றி பிரேத பரிசோதனைக்காக கும்பகோணம் அரசு மருத்துவமனைக்கு அனுப்பி வைத்தனர். டி.எஸ்.பி. ராமச்சந்திரன் சம்பவ இடத்திற்கு வந்து பார்வையிட்டார்.

ஜெயசீலனை செல்போனில் மாதவன் அழைத்தது ஏன்? எதற்காக அவர் தலைமறைவாக உள்ளார்? ஜெயசீலனை மாதவன் கொலை செய்து விட்டு தப்பி சென்றாரா? என்ற கோணத்தில் விசாரித்து வருகிறார்கள்.

மாதவனை பிடித்து விசாரித்தால் தான் கொலைக்கான காரணம் தெரிய வரும் என்பதால் அவரை போலீசார் தொடர்ந்து தேடி வருகிறார்கள்.

கும்பகோணம்:

கும்பகோணம், செட்டி மண்டபம் அருகே உள்ள கணேஷ் நகரை சேர்ந்தவர் வடிவேலன். இவரது மனைவி நாகலட்சுமி. இவருடைய சகோதரி ரேவதி (வயது 19). கும்பகோணத்தில் உள்ள தனியார் மில்லில் வேலை பார்த்து வந்தார்.

ரேவதி, அவரது அக்கா நாகலட்சுமியின் வீட்டில் வசித்து வந்துள்ளார். இவருக்கும், ஒரு வாலிபருக்கும் இடையே திருமணம் நிச்சயிக்கப்பட்டு வருகிற 17-ந் தேதி திருமணம் நடைபெறுவதாக இருந்தது.

இந்த நிலையில் கடந்த 4-ந் தேதி மில்லிற்கு வேலைக்கு சென்ற ரேவதி அதன்பிறகு வீடு திரும்பவில்லை.

இதனால் அதிர்ச்சி அடைந்த நாகலட்சுமி, ரேவதியை பல இடங்களில் தேடி பார்த்தார். ஆனால் எங்கு தேடியும் கிடைக்க வில்லை.

இதையடுத்து நாகலட்சுமி கும்பகோணம் தாலுகா போலீசில் புகார் செய்தார். அதன்பேரில் போலீசார் மாயமான ரேவதியை தேடி வருகின்றனர்.

இதேபோல் மயிலாடுதுறை அருகே காவேரிகரைப் பகுதியைச் சேர்ந்தவர் ரத்தினவேல். இவரது மகள் கவுசல்யா என்கிற ரங்கநாயகி. இவர் கும்பகோணத்தில் உள்ள தனியார் பால்டெக்னிக் கல்லூரியில் 2-ம் ஆண்டு படித்து வந்தார்.

இந்த நிலையில் கடந்த 5-ந் தேதி கல்லூரிக்கு செல்வதாக கூறிவிட்டு சென்ற கவுசல்யா மாலையில் வீட்டிற்கு வரவில்லை. இதனால் அதிர்ச்சி அடைந்த ரத்தினவேல் கவுசல்யா செல்போனிற்கு தொடர்பு கொண்டார். ஆனால் செல்போன் ஆப் செய்திருந்தது. இதனால் அதிர்ச்சி அடைந்த ரத்தினவேல் பல இடங்களில் தேடி பார்த்தார் எங்கும் கிடைக்க வில்லை.

இதனால் ரத்தினவேல் கும்பகோணம் தாலுகா போலீசில் புகார் செய்தார். அதன்பேரில் போலீசார் வழக்கு பதிவு செய்து மாயமான மாணவியை தேடி வருகின்றனர்.

கும்பகோணம்:

தஞ்சை மாவட்டம் கும்பகோணத்தில் செல்வா சாரங்கபாணி சன்னதி தெருவில் மீனாட்சி, பழனியப்பன் ஆகியோருக்கு சொந்தமான ஐம்பொன் சிலைகள் தயாரிக்கும் சிற்பக்கூடம் உள்ளது. இந்த ஐம்பொன் சிலைகள் தயாரிக்க ஆபத்து நிறைந்த கெமிக்கல் பயன்படுத்தப்படுகிறது. இந்த கெமிக்கல் காற்றில் பரவினால் சுவாசக் கோளாறு ஏற்படும் என்று கூறப்படுகிறது.

மீனாட்சி, பழனியப்பன் ஆகியோருக்கு சொந்தமான இந்த சிற்பக்கூடம் நெருக்கமான குடியிருப்புகள் நிறைந்த பகுதியில் அமைந்துள்ளது. மேலும் ஐம்பொன் சிலைகள் தயாரிப்புக்காக இவர்கள் விதிகளை மீறி குடியிருப்பு நிறைந்த தெருவில் அதிகளவில் கெமிக்கல் மூட்டைகளை குடோன் அமைத்து அடுக்கி வைத்திருந்ததாக கூறப்படுகிறது.

இந்நிலையில் இன்று காலை மீனாட்சி, பழனியப்பன் ஆகியோருக்கு சொந்தமான சிற்பக்கூடத்தில் இருந்து கரும்புகை எழுந்துள்ளது. இதைக்கண்ட அப்பகுதி மக்கள் சிற்பக்கூடத்தில் தீவிபத்து ஏற்பட்டுள்ளதாக கருதி அச்சமடைந்தனர். அப்போது ஒருவித கெமிக்கல் வாடை கரும்புகையுடன் கலந்து காற்றில் பரவியதால் மூச்சு விட முடியாமல் அவதிக்கு ஆளாகினர் அப்போது தான் விதிகளை மீறி அமைக்கப்பட்டிருந்த குடோனில் ஆபத்து நிறைந்த கெமிக்கல் குடோனில் தீப்பற்றியது தெரிந்து அதிர்ச்சி அடைந்தனர்.

இதையறிந்ததும் அப்பகுதி மக்களிடையே பெரும் பதற்றம் ஏற்பட்டது. உடனடியாக பலரும் தங்கள் குழந்தைகளையும், வயதானவர்களையும் பாதுகாப்பான இடங்களுக்கு அப்புறப்படுத்தினர். மேலும் தீவிபத்து குறித்து உடனடியாக தீயணைப்பு நிலையத்துக்கு தகவல் தெரிவித்தனர்.

இதையடுத்து சம்பவ இடத்துக்கு கும்பகோணம் தீயணைப்பு நிலைய அலுவலர் முத்துக்குமார் தலைமையில் தீயணைப்பு வீரர்கள் விரைந்து வந்தனர். பின்னர் அந்த சிற்பக்கூடத்துக்கு சென்று பார்த்தபோது அங்கிருந்த ஐம்பொன் சிலைகள் தயாரிப்புக்கு பயன்படும் எந்திர உபகரணங்கள் தீயில் எரிந்து கொண்டிருந்ததும், கெமிக்கல் மூட்டைகளில் தீப்பரவியதால் ஒருவித நாற்றத்துடன் கரும்புகை பரவியதும் தெரியவந்தது. இதையடுத்து தீயணைப்பு வீரர்கள் உடனடியாக தண்ணீரை பீய்ச்சியடித்து போராடி தீயை அணைத்தனர். மின்கசிவு காரணமாக தீவிபத்து ஏற்பட்டது தெரியவந்தது. இதில் ரூ.1½ லட்சம் மதிப்பில் சேதம் ஏற்பட்டதாக கூறப்படுகிறது.

இதுகுறித்து தீயணைப்பு நிலைய அலுவலர் முத்துக்குமார் கூறுகையில், கடந்தாண்டும் இதேபோல் இந்த கெமிக்கல் குடோனில் தீவிபத்து ஏற்பட்டது. அப்போதே சிற்பக்கூட உரிமையாளர்களை எச்சரித்து விட்டு சென்றோம். ஆனால் அவர்கள் அலட்சியம் காட்டியதால் மீண்டும் இங்கு தீப்பற்றியுள்ளது. எனவே மேல் நடவடிக்கை எடுக்க இதுபற்றி மாவட்ட நிர்வாகத்துக்கு தகவல் தெரிவிக்கப்படும். 

இவ்வாறு அவர் கூறினார்.

கெமிக்கல் குடோனில் பற்றிய தீயை விரைந்து அணைத்ததால் அப்பகுதி மக்கள் நிம்மதியடைந்தனர். இந்த சம்பத்தால் அப்பகுதியில் பெரும் பரபரப்பு ஏற்பட்டது.

கும்பகோணம்:

கும்பகோணம் அருகே அரசலாற்றங்கரையில் அனுமதியின்றி திருட்டுத்தனமாக மணல் அள்ளப்படுவதாக கும்பகோணம் தாலுகா போலீசாருக்கு தொடர்ந்து புகார்கள் வந்தது. அதன்பேரில் இன்று அதிகாலை 4 மணியளவில் போலீசார் அரசலாற்றங்கரைக்கு ரோந்து பணிக்கு சென்றனர்.

அப்போது சிலர் மாட்டு வண்டிகளில் திருட்டுத்தனமாக மணல் அள்ளுவது தெரியவந்தது. அவர்கள் போலீசாரை பார்த்ததும் வண்டிகளை விட்டுவிட்டு தப்பி சென்றனர். இதையடுத்து போலீசார் 5 மாட்டுவண்டிகளை கைப்பற்றி போலீஸ் நிலையத்திற்கு கொண்டு வந்து அதன் உரிமையாளர்கள் யார்? என்பது குறித்து விசாரித்து வருகின்றனர்.