நீங்கள் தேடியது "criminals"

மதுரை

மதுரை மானகிரியை சேர்ந்த வக்கீல் செல்வகுமார், மதுரை ஐகோர்ட்டில் தாக்கல் செய்த மனுவில் கூறியிருப்பதாவது:-

திருமங்கலம் பகுதியில் கடந்த சில மாதங்களுக்கு முன்பு 12 பேர் கும்பல் தாக்குதலில் ஈடுபட்டது. இது தொடர்பாக திருமங்கலம் நகர் போலீசில் புகார் அளித்தோம். ஆனால் குற்றவாளிகள் தப்பிக்க வேண்டும் என்ற நோக்கத்தில் போலீசார் செயல்பட்டனர். பின்னர் இது தொடர்பாக ஐகோர்ட்டில் வழக்கு தொடரப்பட்டது. ஐகோர்ட்டு உத்தரவின் பேரில் 12 பேர் மீதும் ேபாலீசார் வழக்குப்பதிவு செய்தனர். இந்த வழக்கின் சாட்சிகளை எதிர்த்தரப்பினர் மிரட்டி வந்தனர். இது தொடர்பாக அந்த சாட்சிகள் போலீசில் புகார் அளித்த போதும் எந்த நடவடிக்கையும் எடுக்கப்படவில்லை. இது தொடர்பாக அவமதிப்பு நோட்டீஸ் அனுப்பப்பட்டது.

இதற்கிடையே குற்றம் சாட்டப்பட்டவர்களால் தொடர்ந்து சாட்சிகள் மிரட்டப்பட்டு வந்தனர். மேலும் எதிர் தரப்பினர் அளித்த பொய் புகாரின் பேரில் சம்பவ இடத்தில் இல்லாத என் மீது வழக்குப்பதிவு செய்தனர். எனவே குற்றச்செயலில் ஈடுபட்டவர்களுக்கு ஆதரவாக செயல்பட்ட திருமங்கலம் டவுன் போலீசார் மீது துறை ரீதியான நடவடிக்கை எடுக்க உத்தரவிட வேண்டும்.

இவ்வாறு மனுவில் கூறப்பட்டுள்ளது.

இந்த வழக்கு நீதிபதி ரமேஷ் முன்பு விசாரணைக்கு வந்தது. அப்போது இந்த வழக்கு குறித்து பதில் அளிக்க மதுரை மாவட்ட போலீஸ் சூப்பிரண்டு மற்றும் சம்பந்தப்பட்ட போலீஸ் அதிகாரிகளுக்கு நோட்டீஸ் அனுப்பும்படி நீதிபதி உத்தரவிட்டு, வழக்கை ஒத்திவைத்தார்.

நாகப்பட்டினம்:

வேதாரண்யம் அருகே செம்போடை மகாராஜபுரம் கிராமத்தில் கடந்த 2007-ம் ஆண்டு நடைபெற்ற ஒரு கொலை முயற்சி வழக்கில் ராமசாமி, பாலகுரு, முத்துகிருஷ்ணன், தியாகராஜன் ஆகியோருக்கு 3 வருடம் சிறை தண்டனையும், ரூ.10,000 அபராதமும் வழங்கி தலைமை குற்றவியல் நீதிபதி கார்த்திகா உத்தரவிட்டார். இதில் ராமசாமி வயது மூப்பின் காரணமாக ஏற்கனவே இறந்து விட்டார்.

மேலும் இந்த வழக்கிற்கு தண்டனை பெற்று தர உதவியாக இருந்த கூடுதல் அரசு தரப்பு வழக்கறிஞர் கவுதமனை பலர் பாராட்டினர்.

வேடசந்தூர்:

திண்டுக்கல் மாவட்டம் வேடசந்தூர் அருகே உள்ள கெண்டையகவுண்டனூரைச் சேர்ந்தவர் சவடமுத்து (வயது 45). இவருக்கு பூங்கொடி, லெட்சுமி ஆகிய 2 மனைவிகள் உள்ளனர். இவர்களுக்கு 2 மகள்களும் ஒரு மகனும் உள்ளனர்.

சவடமுத்து தி.மு.க. கிளை பிரதிநிதியாக இருந்து வந்தார். சொந்தமாக வேன், லாரிகள் வைத்து ஓட்டி வந்தார். கடந்த வாரம் தனது அலுவலகத்தில் தூங்கிக் கொண்டு இருந்த சவடமுத்துவை மர்ம நபர்கள் இரும்பு கம்பியால் அடித்து கொலை செய்து விட்டு தப்பி ஓடி விட்டனர்.

இது குறித்து வேடசந்தூர் போலீசாருக்கு தகவல் கிடைத்தது. போலீசார் அவரது உடலை மீட்டு விசாரித்து வந்தனர். நகை, பணத்துக்காக இந்த கொலை நடந்ததா? என விசாரணை நடத்தப்பட்டது. ஏனெனில் சவடமுத்து கழுத்தில் அணிந்திருந்த தங்க செயின் மாயமாகி இருந்தது.

அதன் பிறகு அலுவலகத்தில் சோதனை நடத்திய போது அந்த நகையை அவர் அடகு வைத்திருந்தது தெரிய வந்தது. எனவே இந்த கொலை வேறு காரணங்களுக்காக நடந்திருக்கலாம் என போலீசார் தீர்மானித்தனர்.

சவடமுத்துவுக்கு வேறு பெண்கள் யாருடனாவது தொடர்பு இருந்ததா? என விசாரணை நடத்தப்பட்டது. அவரது செல்போனில் அதிக முறை யாரிடம் பேசினார்? கொலை செய்யப்பட்டதற்கு முன்பாக அவருக்கு ஏதேனும் அழைப்புகள் வந்ததா? என விசாரணை நடத்தப்பட்டது.

ஆனால் அதில் எவ்வித தடயமும் சிக்க வில்லை. இதனால் கொலையாளியை பிடிக்க முடியாமல் போலீசார் திணறி வருகின்றனர்.

கம்பைநல்லூர்:

பிளஸ்-2 மாணவி கற்பழித்து கொலை செய்யப்பட்ட சம்பவத்தில் பல்வேறு கிராமங்களை சேர்ந்த 500-க்கும் மேற்பட்டவர்கள் சாலைமறியலுடன் கூடிய உண்ணாவிரதம் இருந்தனர். அவர்களிடம் தருமபுரி மாவட்ட கலெக்டர் மலர்விழி பேச்சுவார்த்தை நடத்தினார்.

அப்போது போராட்டக்காரர்களிடம் அவர் கூறியதாவது:

குற்றவாளிகளான ரமேஷ் மற்றும் சதீஷ் ஆகிய 2 பேரையும் 48 மணிநேரத்தில் கைது செய்வோம். மேலும், அவர்களை கைது செய்து குண்டாஸ் சட்டத்தில் அடைக்கப்படுவார்கள்.

சவுமியாவுக்கு சிகிச்சை அளித்த டாக்டர்கள் மீதும், கோட்டப்பட்டி போலீஸ் இன்ஸ்பெக்டர் மீதும் துறைரீதியான உரிய நடவடிக்கை எடுக்கப்படும்.

மேலும், இந்த சம்பவம் குறித்து தேசிய எஸ்.சி., எஸ்.டி. விசாரணைக்குழுவுக்கு பரிந்துரைக்கப்படும் என்று உறுதி அளித்தார். #DharmapuriGirlStudent #GirlMolested 

போரூர்:

போரூர் மங்களாநகர் நலவாழ்வு சங்கம் சார்பில் மங்களா நகரில் மொத்தம் உள்ள 16 தெருக்களிலும் புதிதாக 54 கண்காணிப்பு கேமராக்கள் பொருத்தப்பட்டு உள்ளது.

இதற்கான தொடக்க விழாவில் சென்னை ஐகோர்ட்டு நீதிபதி டிக்காராம், போலீஸ் கமி‌ஷனர் ஏ.கே.விஸ்வநாதன் ஆகியோர் கலந்து கொண்டனர். கேமராக்களின் செயல் பாட்டினை கமி‌ஷனர் தொடங்கி வைத்தார்.

வடசென்னை கூடுதல் ஆனையர் தினகரன், மேற்கு மண்டல இனை ஆணையர் விஜயகுமாரி, அம்பத்தூர் துணை கமி‌ஷனர் ஈஸ்வரன், போரூர் உதவி கமி‌ஷனர் சந்திரசேகர்,மாநகராட்சி மண்டல உதவி கமி‌ஷனர் சசிகலா, இன்ஸ்பெக்டர்கள் சங்கரநாராயணன், சீத்தாராமன், மங்களா நகர் நலவாழ்வு சங்க தலைவர் நடராஜன் மற்றும் குடியிருப்புவாசிகள் உள்ளிட்டோர் கலந்து கொண்டனர்.

கமி‌ஷனர் ஏ.கே.விஸ்வநாதன் விழாவில் பேசியதாவது :-

சென்னையில் நடைபெறும் பல்வேறு வகையான குற்றசம்பவங்களில் துப்பு துலக்க போலீசாருக்கு கண்காணிப்பு கேமரா பெரும் உதவியாக உள்ளது. அதன் மூலம் குற்றவாளிகளை உடனடியாக பிடிக்க முடிகிறது. சமீபத்தில் கூட வளசரவாக்கம் பகுதியில் முதியவரிடம் செல்போன் பறித்துச் சென்ற குற்றவாளிகளை உடனடியாக பிடிக்க கண்காணிப்பு கேமரா பெருமளவு உதவியாக இருந்தது.

நாம் தூங்கினாலும் தூங்காமல் கண் விழித்து கண்காணிக்கும் மூன்றாவது கண்களாக கண்காணிப்பு கேமராக்கள் உள்ளன.

திருவெண்ணைநல்லூர்:

விழுப்புரம் மாவட்டம் திருவெண்ணைநல்லூர் அருகே உள்ள எடப்பாளையம் பகுதியை சேர்ந்தவர் அப்துல் ஜபார் (வயது65). ஓய்வுபெற்ற சப்- இன்ஸ்பெக்டர். இவர் கடந்த ஜூன் மாதம் 27-ந் தேதி அந்த பகுதியில் உள்ள விவசாய நிலத்துக்கு சென்றார்.

பின்னர் நிலத்தை பார்வையிட்டு விட்டு அங்குள்ள மோட்டார் கொட்டகைக்கு வந்தார். அங்கு அப்துல் ஜபாரை மர்ம மனிதர்கள் சிலர் சரமாரியாக வெட்டி படுகொலை செய்தனர்.

பின்னர் அந்த மர்ம மனிதர்கள் அங்கிருந்து தப்பி ஓடி விட்டனர். இதுகுறித்து அந்த பகுதி பொதுமக்கள் திருவெண்ணைநல்லூர் போலீசாருக்கு தகவல் தெரிவித்தனர். சம்பவ இடத்துக்கு போலீசார் விரைந்து வந்து கொலைசெய்யப்பட்ட அப்துல் ஜபாரின் உடலை கைப்பற்றி பிரேத பரி சோதனைக்காக முண்டியம்பாக்கம் மருத்துவக் கல்லூரி மருத்துவ மனைக்கு அனுப்பி வைத்தனர்.

கொலை நடந்த இடத்தில் போலீசார் சோதனை செய்தபோது 1 ஜோடி செருப்பு மட்டும் கிடைத்தது. வேறு தடயங்கள் எதுவும் கிடைக்கவில்லை. இதனால் குற்ற வாளிகளை கண்டு பிடிப்பது போலீசாருக்கு சிக்கல் ஏற்பட்டது.

விழுப்புரம் மாவட்ட போலீஸ் சூப்பிரண்டு ஜெயக்குமார் உத்தரவின்பேரில் குற்றவாளிகளை பிடிக்க உளுந்தூர்பேட்டை துணை போலீஸ் சூப்பிரண்டு ராஜேந்திரன், குற்றப்பிரிவு துணை போலீஸ் சூப்பிரண்டு வீமராஜ், திருவெண்ணைநல்லூர் இன்ஸ்பெக்டர் ஜோகிந்தர், சப்-இன்ஸ்பெக்டர்கள் நடராஜன், பிரகாஷ், சிவச்சந்திரன், அகிலன், திருமால் ஆகியோர் கொண்ட 5 தனிப்படை அமைக்கப்பட்டது. தனிப்படை போலீசார் கடந்த 2 மாதங்களாக தீவிர விசாரணை மேற்கொண்டனர்.

அப்போது ஓய்வு பெற்ற சப்-இன்ஸ் பெக்டர் அப்துல்ஜபார் கொலை செய்யப்பட்ட இடத்தில் கிடைத்த 1 ஜோடி செருப்பை வைத்து விசாரணையை தொடங்கினர். அப்போது அந்த செருப்பு பெங்களூரில் வாங்கப்பட்டது என்பது தெரியவந்தது. இதைத் தொடர்ந்து பெங்களூரில் குற்றவாளிகள் பதுங்கி இருக்கலாம் என போலீசாருக்கு சந்தேகம் ஏற்பட்டது. உடனே தனிப்படை போலீசார் பெங்களூர் சென்றனர்.

இந்த கொலை வழக்கில் சம்பந்தப்பட்ட குற்றவாளி ஒருவர் அங்கு பதுங்கி இருப்பது தெரியவந்தது. உடனே போலீசார் அங்கு சென்று பெங்களூர் கே.ஆர்.புரம் பகுதியை சேர்ந்த திலீப்குமார் (வயது 23) என்பவரை பிடித்து விசாரித்தனர். விசாரணையில் ஓய்வு பெற்ற சப்- இன்ஸ்பெக்டர் கொலை செய்யப்பட்ட இடத்தில் கிடைத்த செருப்பு திலீப்குமாருடையதுதான் என்று தெரியவந்தது.

அவரிடம் தொடர்ந்து நடத்திய விசாரணையில், திலீப்குமார் திருவெண்ணை நல்லூர் அருகே உள்ள எடப்பாளையம் பகுதியை சேர்ந்த மோகன் என்பவரின் உறவினர் என்பதும் தெரியவந்தது.

திருவெண்ணை நல்லூரில் உள்ள பெண்ணையாற்றில் மோகன் திருட்டுத்தனமாக லாரிகளில் மணல் ஏற்றி விற்பனை செய்து வந்தார். இதை ஓய்வு பெற்ற சப்- இன்ஸ் பெக்டர் அப்துல் ஜபார் போலீசாருக்கு தகவல் தெரிவித்து வந்தார். இதனால் அடிக்கடி மோகனின் மணல் லாரிகளை போலீசார் பிடித்து அபராதம் விதித்து வந்தனர்.

இதனால் ஆத்திரமடைந்த மோகன் ஓய்வு பெற்ற சப்- இன்ஸ் பெக்டர் அப்துல்ஜபாரை கொலை செய்ய முடிவு செய்தார். பின்னர் மோகன் மற்றும் அவரது தம்பி ரவி, டிரைவர் செல்வம் ஆகிய 3 பேரும் சேர்ந்து திட்டம் தீட்டினர். பின்னர் அப்துல்ஜபாரை கொலை செய்வதற்காக பெங்களூரில் உள்ள தனது உறவினர் திலீப்குமாரை திருவெண்ணை நல்லூருக்கு வரவழைத்தனர். பின்னர் அவர்கள் 4 பேரும் சேர்ந்து மோட்டார் கொட்டகையில் இருந்த அப்துல் ஜாபரை சரமாரியாக வெட்டி கொலை செய்துவிட்டு அங்கிருந்து தப்பி சென்று விட்டது விசாரணையில் தெரியவந்தது. இதைத் தொடர்ந்து திலீப்குமாரை போலீசார் கைது செய்தனர். கைது செய்யப்பட்ட திலீப்குமார் கூலிப்படை யை சேர்ந்தவர் என்பதும் பெங்களூரில் நடந்த ஒரு கொலை வழக்கில் போலீசாரால் தேடப்படும் குற்றவாளி என்பதும் குறிப்பிடதக்கது.

இதைத்தொடர்ந்து தனிப்படை போலீசார் திருவெண்ணைநல்லூர் போலீசாருக்கு தகவல் தெரிவித்தனர். போலீசார் மோகன், ரவி, செல்வம் ஆகிய 3 பேரையும் கைது செய்தனர். அவர்களிடம் இருந்து கார் மற்றும் மோட்டார் சைக்கிளை பறிமுதல் செய்தனர்.

சிவகங்கை:

மானாமதுரை அருகே உள்ள மாங்குடி விலக்கில் சிப்காட் போலீசார் வாகன சோதனை மேற்கொண்டனர்.

அப்போது 3 வாலிபர்கள் ஒரு மோட்டார் சைக்கிளில் வேகமாக வந்தனர். அவர்களை நிற்குமாறு போலீசார் சைகை காட்டினர்.

ஆனால் அவர்கள் நிற்காமல் வேகமாகச் சென்றனர். எனவே போலீசார் அவர்களை தங்கள் ஜீப்பில் விரட்டினர்.

சிறிது நேரத்தில் மோட்டார் சைக்கிளை மடக்கி 3 பேரையும் பிடித்து விசாரித்தனர். விசாரணையில் அவர்கள் பெரிய கோட்டையைச் சேர்ந்த பிரதாப் (வயது 29), வைரம் பட்டியைச் சேர்ந்த கனிராஜா (26), சிவகங் கையைச் சேர்ந்த சசிகுமார் (21) என்பது தெரியவந்தது.

மேலும் இவர் மீது பல்வேறு போலீஸ் நிலையங்களில் வழக்குகள் பதிவாகி உள்ளதும், ஜாமீனில் வெளி வந்த இவர்கள் அதன் பின்னர் தலைமறைவானதும் தெரியவந்தது.

இதைத் தொடர்ந்து அவர்கள் 3 பேரையும் கைது செய்து போலீசார் தொடர்ந்து விசாரித்து வருகிறார்கள்.