நீங்கள் தேடியது "ration card"

நாகப்பட்டினம்:

நாகை நகராட்சி 14 வார்டுக்கு உட்பட்ட காடம்பாடி சவேரியார் கோவில் தெரு பகுதியில் சுமார் 1000 ரேஷன் கார்டுகள் உள்ளன. இந்த பகுதியில் உள்ள 5-ம் எண் அரசு நியாய விலைக்கடையில் வழங்கபடும் அரிசி தரமற்று உணவிற்கு பயன்படுத்த முடியாத நிலையில் வழங்கபடுவதாக கூறப்படுகிறது.

மேலும் பழுத்த சிவப்பு நிற கலர்களில் வண்டுகள் மொய்த்து துர்நாற்றம் வீசுவதாகவும் இதனால் சமைத்து உண்ணும் போதும் துர்நாற்றம் வீசுவதாகவும் தங்கள் குழந்தைகள் உணவை சாப்பிட முடியவில்லை என்றும் இந்தஅரிசியை வாங்க வேண்டும் என ஊழியர்கள் பொதுமக்களை நிர்பந்தி பதாகவும் வேதனை தெரிவிக்கின்றனர்.

இதனால் பொதுமக்கள் தரமற்ற அரிசியை சாலையில் கொட்டி போராட்டத்தில் ஈடுபட்டனர். இதனால் அப்பகுதி பரபரப்பு நிலவியது.

எனவே தங்கள் பகுதிக்கு தரமான அரிசி வழங்க நடவடிக்கை எடுக்க வேண்டும் என தமிழக அரசிற்கு கோரிக்கை விடுத்துள்ளனர்.

திருப்பூர் :

திருப்பூர் மாவட்டத்தில் முன்னுரிமை பெற்ற 2 லட்சத்து 86 ஆயிரம் ரேஷன் கார்டுகளில் குடும்ப தலைவராக பெண்கள் பெயர் இடம்பெறுவது அவசியம். அதற்காக பெண் பெயர்களில் மாற்றம் செய்ய அறிவிக்கப்பட்டுள்ளது. ரேஷன் கார்டுகள் திருப்பூர் மாவட்டத்தில் 9 தாலுகாவில் 7 லட்சத்து 74 ஆயிரத்து 583 ரேஷன் கார்டுகள் உள்ளன. இதன் மூலமாக 21 லட்சத்து 83 ஆயிரத்து 449 பேர் ரேஷன் பொருட்களை பெற்று பயன் அடைந்து வருகிறார்கள். முன்னுரிமை பெற்ற ரேஷன் கார்டுகள் 2 லட்சத்து 50 ஆயிரத்து 769 கார்டுகள் உள்ளன. முன்னுரிமை இல்லாத கார்டுகள் 5 லட்சத்து 23 ஆயிரத்து 814 இருக்கிறது.

மத்திய அரசின் உத்தரவுப்படி, முன்னுரிமை பெற்ற கார்டுகளில் பெண்களே குடும்ப தலைவராக இருக்க வேண்டும். தமிழகத்தில் பி.எச்.எச். என்ற முன்னுரிமை பெற்ற கார்டுகள் மற்றும் அந்தியோதயா அன்ன யோஜனா (ஏ.ஏ.ஓய்.) கார்டுகளில் பெண் குடும்ப தலைவர் இருக்க வேண்டும் என்று முடிவு செய்யப்பட்டுள்ளது. அதன்படி மாவட்டம் வாரியாக கணக்கெடுப்பு நடத்தி குடும்ப தலைவர் மாற்ற வேண்டிய கார்டுகள் கண்டறியப்பட்டுள்ளன.

திருப்பூர் மாவட்டத்தில் 1,135 ரேஷன் கடைகளிலும் முன்னுரிமை பெற்ற கார்டுகளில் பெண் குடும்ப தலைவர் மட்டுமே இருக்க வேண்டும் என்று அறிவிப்பு செய்யப்பட்டுள்ளது. இந்த மாத இறுதிக்குள் முன்னுரிமை பெற்ற கார்டுகளில் குடும்ப தலைவராக பெண் இருக்கும் வகையில் திருத்தம் செய்யும் பணி நடக்கிறது. பி.எச்.எச். என்று கார்டு வைத்துள்ள குடும்பங்களில் தலைவராக பெண் இடம் பெற வேண்டும். ஆண்கள் தலைவராக இருந்தாலும் ரேஷன் கடைகளில், அந்த குடும்பத்தின் தலைவியாக உள்ள பெண் புகைப்படத்தை கொடுத்து மாற்றி அமைக்க வேண்டும். பி.எச்.எச். மற்றும் ஏ.ஏ.ஓய். கார்டுகள் என 2 லட்சத்து 86 ஆயிரம் கார்டுகளில் குடும்ப தலைவராக பெண் இருக்கும் நிலை ஏற்பட்டுள்ளது. மத்திய, மாநில அரசுகள் திட்டங்கள் அறிவிக்கும்போது பெண்கள் அதிகம் பயன் பெற வேண்டும் என்ற அடிப்படையில் இந்த மாற்றம் செய்யப்படுவதாக குடிமைப்பொருள் வழங்கல் அதிகாரிகள் தெரிவித்தனர்.

திருப்பூர் :

திருப்பூர் மாவட்டத்தில் உள்ள 9 தாலுகாக்களில், கூட்டுறவு சங்கம் சார்பில் 22 கடைகள், நுகர்பொருள் வாணிப கழகம் சார்பில் 773 முழு நேரம் மற்றும் 326 பகுதி நேர கடைகள், மகளிர் குழுவினர் நடத்தும் 14 கடைகள், 77 நகரும் ரேஷன் கடைகள் என 1,135 ரேஷன் கடைகள் உள்ளன.மாவட்டத்தில் 2 லட்சத்து 50 ஆயிரத்து 769 முன்னுரிமை பெற்ற ரேஷன் கார்டுகள்,5லட்சத்து 23 ஆயிரத்து 814 முன்னுரிமையற்ற ரேஷன் கார்டுகள் என, 7 லட்சத்து 74 ஆயிரத்து 583 கார்டுகள் பயன்பாட்டில் உள்ளன. அவற்றின் மூலம் 21 லட்சத்து 83 ஆயிரத்து 449 பேர் பயன்பெற்று வருகின்றனர்.

பொது வினியோக திட்டத்தில் ஆதார் இணைப்பு கட்டாயமாக்கப்பட்டுள்ளது. குடும்பத்தில் உள்ள, அனைவரும்ஆதார் எண்ணை இணைத்திருக்க வேண்டும். குழந்தைகள் இருந்தாலும் பிறப்பு சான்றிதழை கொண்டு, பெயர் சேர்த்துவிடலாம். ஆனால் அடுத்த ஓராண்டுக்குள், ஆதார் பதிவு செய்து ஆதார் எண்ணை இணைக்க வேண்டும்.மாவட்டத்தில் 15 ஆயிரத்துக்கும் அதிகமான சிறுவர் - சிறுமியர் ஆதார் எண் இணைக்கப்படாமல் இருக்கிறது. விரைவில் ஆதார் இணைக்காதபட்சத்தில் 3 வயதுக்கு மேற்பட்ட குழந்தைகளின் பெயர்கள் ரத்தாகும் அபாயம் உருவாகியுள்ளது.

இந்நிலையில்குழந்தைகளுக்கு ஆதார் பதிவு செய்து, அந்த விவரங்களை பொது வினியோக திட்டத்தில் இணைக்க வேண்டுமென உத்தரவிடப்பட்டுள்ளது. அதன்படி ஒவ்வொரு ரேஷன் கடையிலும் ஆதார் எண் இணைக்கப்படாத சிறுவர் -சிறுமியர் விவரம் வெளியிடப்பட்டுள்ளது. வெகுவிரைவாக ஆதார் விவரங்களை இணைக்காவிட்டால் பெயர்கள் ரத்தாகும் அபாயம் உருவாகியுள்ளது.

இதுகுறித்து குடிமைப்பொருள் வழங்கல் துறை அதிகாரிகள் கூறுகையில், மாவட்டத்தில் 15 ஆயிரம் சிறுவர் -சிறுமியர் ஆதார் இல்லாமல்ரேஷன் கார்டில் இடம்பெற்றுள்ளனர். 7 வயது வரையில் பெற்றோரின் 'பயோமெட்ரிக்' அடிப்படையில் குழந்தைகளுக்கு ஆதார் அட்டை பெறலாம். அதற்கு பிறகு குழந்தைகளின் 'பயோமெட்ரிக்' பதிவு செய்யப்படும்.இதுவரை விடுபட்டவர்கள் கலெக்டர் அலுவலகம், தாலுகா அலுவலகங்களில் உள்ள ஆதார் மையத்தில் சிறுவர் -சிறுமியருக்கு ஆதார் பதிவு செய்து ஆதார் எண்ணை இணைக்க வேண்டும் என்றனர்.

சென்னை:

சென்னையில் சாலை மறியல், ஆர்ப்பாட்டம், தர்ணா என்றால் நூறு பேராவது திரண்டு இருப்பதைத்தான் பார்க்க முடியும்.

ஆனால் மைலாப்பூரில் இளம்பெண் ஒருவர் தனது குழந்தையுடன் நடுரோட்டில் அமர்ந்து தர்ணா போராட்டம் நடத்தியது பரபரப்பை ஏற்படுத்தியது.

தகவல் அறிந்து அந்த பெண்ணை அப்புறப்படுத்துவதற்காக போலீசார் விரைந்து வந்தனர்.

தர்ணாவில் ஈடுபட்ட அந்த பெண்ணின் பெயர் மனோன்மணி (34). நொச்சிக் குப்பத்தைச் சேர்ந்தவர்.

கடந்த 3 மாதங்களுக்கு முன்பு மனோன்மணி அதே பகுதியில் வேறு வீட்டுக்கு குடிபெயர்ந்துள்ளார்.

இதையடுத்து தனது ரே‌ஷன் கார்டை புதிய முகவரிக்கு மாற்றித் தரும்படி கேட்டு விண்ணப்பித்து இருக்கிறார். அதற்கு தேவையான ஆவணங்கள், ஆதார் கார்டு எல்லாவற்றையும் சமர்ப்பித்து இருக்கிறார். அதிகாரிகளும் அதை சரி பார்த்து விட்டு விரைவில் கார்டு வந்து விடும் என்று கூறி இருக்கிறார்கள்.

ரேசன் கடைகளில் பொருட்களை வாங்கி சாப்பிடும் சாதாரண குடும்பத்தைச் சேர்ந்த மனோன்மணி ரேசன் கார்டு கிடைக்காததால் மிகவும் சிரமப்பட்டுள்ளார். பலமுறை குடிமைப் பொருள் வழங்கல் அலுவலகத்துக்கு அலைந்துள்ளார். ஒவ்வொரு முறையும் மழுப்பலான பதிலே கிடைத்துள்ளது.

சில தினங்களுக்கு முன்பு சென்று கேட்டபோது இன்னும் கார்டு தயாராகவில்லை என்று கூறி இருக்கிறார்கள். இதனால் அதிர்ச்சி அடைந்த மனோன்மணி இ.சேவை மையத்துக்கு சென்று கார்டு நிலவரத்தை விசாரித்துள்ளார். அப்போது கார்டு தடை செய்யப்பட்டுள்ளதாக தகவல் கிடைத்துள்ளது.

எல்லா தகவல்களும் சரியாக கொடுத்த பிறகும் ஏன் முடக்கி வைத்துள்ளார்கள் என்று புரியாமல் மனோன்மணி தவித்து இருக்கிறார்.

ஏற்கனவே மனோன்மணி விண்ணப்பித்தபோது அதே பகுதியைச் சேர்ந்த ஒருவரும் விண்ணப்பித்து இருக்கிறார். அவர் இடைத்தரகர் ஒருவர் மூலம் ரூ.14 ஆயிரம் கொடுத்து உடனடியாக கார்டு பெற்றது தெரிய வந்தது.

தன்னால் அவ்வளவு பணம் கொடுக்க முடியாததால்தான் மனோன்மணி இந்த தர்ணாவை கையில் எடுத்துள்ளார். தனது 3 வயது குழந்தையை எடுத்து மடியில் வைத்தபடி நடுரோட்டில் அமர்ந்து விட்டார்.

நிலைமை விவகாரம் ஆன பிறகு விரைவில் கார்டு வழங்கப்படும் என்று அதிகாரிகள் உறுதி அளித்து இருக்கிறார்கள். #Rationcard

நிலக்கோட்டை:

தமிழகம் முழுவதும் ரேசன் அட்டை தாரர்களுக்கு ஸ்மார்ட் ரேசன் கார்டு வினியோகம் செய்யும் பணி நடைபெற்றது. திண்டுக்கல் மாவட்டத்தில் சுமார் 14 லட்சம் கார்டுகள் வினியோகம் செய்யப்பட்டது. இதில் 10-ல் இருந்து 15 ஆயிரம் வரை ரேசன் கார்டுகளில் பிழை இருப்பதாக குற்றச்சாட்டு எழுந்தது.

ஒரு சில இடங்களில் குடும்ப தலைவர் படத்திற்கு பதிலாக சாமி படங்கள், நடிகர்-நடிகைகள் படம் இடம் பெற்று பரபரப்பை ஏற்படுத்தியது. இதனால் கணினி பிழை ஏற்பட்ட ஸ்மார்ட் ரேசன் கார்டுகளை நிலக்கோட்டை உள்பட மாவட்டத்தில் உள்ள 7 தாலுகாவிலும் வினியோகம் செய்யவில்லை.

இதனால் பொதுமக்கள் ரேசன் பொருட்கள் வாங்க முடியாமல் அவதியடைந்து வந்தனர். இது குறித்து அவர்கள் அதிகாரிகளுக்கு புகார் தெரிவித்தனர். இதனைத் தொடர்ந்து பிழை இருந்தாலும் ஸ்மார்ட் ரேசன் கார்டுகளை பொது மக்களுக்கு வினியோகம் செய்ய அதிகாரிகளுக்கு மாவட்ட நிர்வாகம் உத்தர விட்டது. ஆனால் அதற்கான பணிகளை அதிகாரிகள் மேற் கொள்ளாமல் அலட்சியமாகவே உள்ளனர்.

கடந்த 1 வருடமாகவே நிலக்கோட்டை தாலுகாவில் சுமார் 1500 ஸ்மார்ட் ரேசன் கார்டுகளை பெற முடியாமல் பொதுமக்கள் தவிப்புக்கு உள்ளாகி வருகின்றனர். இது குறித்து பல்வேறு புகார் மனுக்கள் கொடுக்கப்பட்ட போதும் எந்த நடவடிக்கையும் எடுக்கப்படவில்லை.

இ-சேவை மையங்களிலும் ஸ்மார்ட் ரேசன் கார்டுகள் பிழை திருத்தும் பணி நடைபெறவில்லை. எனவே இந்த கார்டுதாரர்கள் ஒரு வருடத்துக்கும் மேலாக ரேசன் பொருட்கள் வாங்க வில்லை. இதன் காரணமாக தங்கள் ஸ்மார்ட் ரேசன் கார்டுகள் ரத்தாகி விடுமோ? என பொதுமக்கள் அச்சமடைந்துள்ளனர். எனவே மாவட்ட நிர்வாகம் ஸ்மார்ட் ரேசன் கார்டுகளை உடனே பொதுமக்களுக்கு வினியோகம் செய்ய உத்தரவிட வேண்டும் என அவர்கள் வலியுறுத்தியுள்ளனர்.