நீங்கள் தேடியது "Kerala Floods"

திருவனந்தபுரம்:

கேரள மாநிலம் திருவனந்தபுரத்தில் உள்ள பிரசித்திப்பெற்ற பத்மநாப சுவாமி கோவிலில் ஏராளமான ரகசிய அறைகள் இருப்பது கண்டுபிடிக்கப்பட்டது.

இந்த அறைகளை திறந்து பார்த்தபோது தங்கம், வைரம் என்று விலை மதிக்க முடியாத பொக்கி‌ஷம் அந்த அறைகளில் நிறைந்து இருப்பது கண்டுபிடிக்கப்பட்டது. இந்த பொக்கி‌ஷங்களை கணக்கெடுத்து பாதுகாக்க வேண்டும் என்று சுப்ரீம் கோர்ட்டில் வழக்கு தொடரப்பட்டது.

சுப்ரீம் கோர்ட்டு உத்தரவுப்படி, அந்த பொக்கி‌ஷங்கள் இருந்த 5 பாதாள அறைகள் திறக்கப்பட்டு அவை கணக்கெடுக்கப்பட்டது. மேலும் சில அறைகளை திறக்க சுப்ரீம் கோர்ட்டு இன்னும் அனுமதி வழங்காததால் அவை திறக்கப்படவில்லை.


கேரளாவில் தற்போது வரலாறு காணாத வெள்ள பாதிப்பு ஏற்பட்டுள்ளதால் அதில் இருந்து கேரளம் மீண்டு வர அவர்களுக்கு ரூ.20 ஆயிரம் கோடிக்கு மேல் பணம் தேவைப்படும் என்று மாநில அரசு கூறி உள்ளது. பத்மநாபசுவாமி கோவிலில் உள்ள பல லட்சம் கோடி மதிப்புள்ள பொக்கி‌ஷங்களை கேரள வெள்ளப்பாதிப்புக்கு பயன்படுத்தலாம் என்ற கருத்து கடந்த சில நாட்களாக சமூக வலைதளங்களில் வைரலாக பரவியது.

இதுபற்றி பத்மநாபசுவாமி கோவிலை நிர்வகிக்கும் திருவிதாங்கூர் மன்னர் ஆதித்தயவர்மா கருத்து தெரிவித்துள்ளார். அவர் கூறும் போது, பத்மநாபசுவாமி கோவிலில் உள்ள பொக்கி‌ஷங்களின் மொத்த மதிப்பு பற்றி எனக்கு தெரியாது. அவசர கால தேவைக்காக எனது முன்னோர் இவற்றை சேகரித்து வைத்துள்ளனர்.

கேரள இயற்கை பேரிடரால் பாதிக்கப்பட்டு உள்ள நிலையில் இந்த பொக்கி‌ஷங்களை நிவாரண பணிக்களுக்கு பயன்படுத்துவது பற்றி நான், எதுவும் கூற முடியாது. சுப்ரீம் கோர்ட்டின் உத்தரவுப்படி தான் எதையும் செய்ய முடியும்.

கேரள மாநில அரசும் இதில் தனது நிலைப்பாட்டை தெரிவிக்கவேண்டும். பத்மநாபசுவாமி கோவில் மட்டுமல்ல அனைத்து மத வழிபாட்டு தலங்களில் இருந்தும் உதவிகளை பெற வேண்டும்.

இவ்வாறு அவர் கூறினார். #KeralaFloods #PadmanabhaswamyTemple

திருவனந்தபுரம்:

கேரளாவில் கடந்த 8-ந் தேதி முதல் 18-ந் தேதி வரை 11 நாட்கள் பெய்த பேய் மழை காரணமாக மாநிலம் முழுவதும் வெள்ளத்தில் மூழ்கியது. மழை, வெள்ளம், நிலச்சரிவு போன்றவற்றால் பாதிக்கப்பட்ட மக்களை காப்பாற்ற மத்திய மற்றும் மாநில அரசு அமைத்து இருந்த மீட்பு குழுக்கள் மற்றும் இராணுவ படையினர் மிகவும் கடுமையாக போராடினர்.

இந்த போராட்டத்தில், கேரள மீனவர்களுக்கும் மிக முக்கிய பங்கு உண்டு. தங்களது படகுகள் போன்ற பல்வேறு வழிகளில் மீனவர்கள் தங்களது மிகச்சிறந்த பங்களிப்பை அளித்தனர். இதையடுத்து கேரளாவில் மழை ஓய்ந்துள்ள நிலையில், தற்போது வெள்ளச் சேதங்களை சீரமைக்கும் பணியில் மாநில அரசு தீவிரம் காட்டி வருகிறது.

இந்நிலையில், கேரள மழை வெள்ள சேதங்களை பார்வையிட இன்று கேரளா வந்தடைந்த அகில இந்திய காங்கிரஸ் தலைவர் ராகுல் காந்தி ஹெலிகாப்டர் மூலம் செங்கனூர் பகுதிக்கு சென்றார். அங்குள்ள ஒரு முகாமுக்கு நேரில் சென்ற ராகுல் காந்தி, அங்கு தங்கியிருந்தவர்களுக்கு ஆறுதல் கூறினார்.

பின்னர், ஆலப்புழா மாவட்டத்துக்கு வந்த ராகுல்காந்தி, கேரள வெள்ளத்தில் இருந்து மக்களை காப்பாற்ற தங்கள் உயிரையும் பொருட்படுத்தாது உதவிய மீனவர்களுக்கு கேடயங்களை வழங்கி, வாழ்த்து கூறி கவுரவித்தார்.

அங்கு திரளாக கூடியிருந்த மீனவ மக்களிடையே பேசிய ராகுல் காந்தி, வரும் பாராளுமன்ற தேர்தலில் வெற்றிபெற்று மத்தியில் காங்கிரஸ் ஆட்சி அமைந்தால், விவசாயிகளுக்கு உள்ளதுபோல் மீனவர்களின் நலனுக்கு தனி அமைச்சகம் உருவாக்கப்படும் என உறுதி அளித்தார்.

போலி வாக்குறுதியாக இதை கூறவில்லை. எவ்வித பாதுகாப்பும் அளிக்கப்படாத மீனவ மக்களுக்கு காங்கிரஸ் கட்சியின் தலைவர் என்ற முறையில் இதை நான் தெரிவித்து கொள்கிறேன் என்றும் ராகுல் குறிப்பிட்டார்.

எண்ணிக்கையில் குறைவான சுமார் 3 ஆயிரம் மீனவ மக்கள் மாநிலம் முழுவதும் 70 ஆயிரம் மக்களை மீட்கும் பணியில் ஈடுபட்டதை பெருமையாக குறிப்பிட்ட அவர், ஒக்கி புயல் பாதிப்பின்போது அனைத்தையும் இழந்துநின்ற மீனவ மக்களுக்கு போதுமான உதவிகளை அரசு செய்து தராதது வருத்தம் அளிப்பதாகவும் தெரிவித்தார். #KeralaFloods #RahulGandhi 

கொச்சி:

கேரளாவில் பெய்த வரலாறு காணாத கனமழையால் மாநிலம் முழுவதும் வெள்ளக்காடாக காட்சியளிக்கிறது. வெள்ளப்பெருக்கு மற்றும் நிலச்சரிவினால் பல்லாயிரக்கணக்கான மக்கள் வீடுகளை இழந்து நிவாரண முகாம்களில் தஞ்சம் அடைந்துள்னர். கனமழை தொடர்ந்து பெய்ததால் போக்குவரத்து அடியோடு பாதிக்கப்பட்டது. கொச்சி விமான நிலையத்தில் வெள்ளம் சூழ்ந்ததால் விமான நிலையம் கடந்த 15-ம் தேதி மூடப்பட்டது. கொச்சி கடற்படை தளத்தில் இருந்து மட்டும் ஒருசில விமானங்கள் இயக்கப்பட்டன.
கொச்சி விமான நிலையத்தில் தேங்கிய தண்ணீரை வெளியேற்றி, சீரமைப்பு பணிகளை முடிப்பதில் காலதாமதம் ஆனதால் விமான நிலையத்தை திறப்பதும் தொடர்ந்து ஒத்திவைக்கப்பட்டது. கடந்த 26-ம் தேதி விமான நிலையத்தை திறக்க திட்டமிடப்பட்டது. ஆனால், ஊழியர்கள் அனைவரையும் பணிக்கு அழைத்து வருவது உள்ளிட்ட சில சிக்கல்கள் காரணமாக மேலும் மூன்று நாட்கள் நீட்டிக்கப்பட்டது. விமான நிலையம் மூடப்பட்டதால் சுமார் 200 கோடி ரூபாய் அளவிற்கு இழப்பு ஏற்பட்டுள்ளது.

இந்நிலையில்  கொச்சி விமான நிலையத்தில் நாளை முதல் விமான சேவை தொடங்கும் என்று விமான நிலையம் அறிவித்துள்ளது. நாளை மதியம் 2 மணியில் இருந்து சர்வதேச மற்றும் உள்நாட்டு முனையங்களில் முழு அளவில் விமானங்களை இயக்க நடவடிக்கை எடுத்திருப்பதாக தெரிவித்துள்ளது. #KochiAirport #KeralaFloods

புதுச்சேரி:

கேரள மாநிலத்தில் பெய்த வரலாறு காணாத மழையால் அங்கு பெரும் சேதம் ஏற்பட்டு மக்கள் கடும் பாதிப்புக்கு உள்ளாகி உள்ளனர்.

கேரள மாநில மக்களுக்கு உதவும் வகையில் நாடு முழுவதும் இருந்து அந்த மாநிலத்துக்கு நிவாரணத் தொகை, பொருட்கள் வழங்கப்பட்டு வருகிறது. குறிப்பாக, அண்டை மாநில மான தமிழகம் அதிகளவு நிவாரணம் மற்றும் உதவிகளை வழங்கி வருகிறது.
தமிழகத்தைப் போல புதுவை மாநிலமும் உதவி செய்ய வேண்டும் என முதல்-அமைச்சர் நாராயணசாமி விருப்பம் தெரிவித்தார். அதற்காக அரசு ஊழியர்கள் அனைவரும் தங்களது ஒரு நாள் ஊதியத்தை வழங்க வேண்டும் என்றும் அவர் வேண்டுகோள் விடுத்தார்.

இதை ஏற்று அரசு ஊழியர்கள் சங்கங்களின் தலைவர்கள் ஊதியத்தை வழங்குவதற்கான ஒப்புதல் கடிதத்தை முதல்-அமைச்சர் நாராயணசாமியிடம் வழங்கினர்.

இந்த நிலையில் கேரள அரசு முல்லைப் பெரியாறில் இருந்து தமிழக அரசு நீரைத் திறந்து விட்டதால் தான் வெள்ள சேதம் ஏற்பட்டது என்றும், முல்லைப் பெரியாறு அணையின் நீர் மட்டத்தைக்குறைக்க தமிழக அரசுக்கு உத்தரவு பிறப்பிக்க வேண்டும் என்றும் உச்ச நீதி மன்றத்தில் மனு தாக்கல் செய்தது.

இதையடுத்து உச்சநீதிமன்றமும் முல்லைப் பெரியாறு அணையின் நீர் தேக்க உயரத்தை குறைக்கும்படி உத்தரவிட்டது. கேரள அரசின் இந்தச் செயல் தமிழர்களிடம் கடும் அதிருப்தியை ஏற்படுத்தி உள்ளது. இதனால் கேரளத்துக்கு தொடர்ந்து உதவ வேண்டுமா? என்ற கேள்வியும் எழுந்துள்ளது.

மேலும் அவ்வாறு உதவினாலும் கேரள மக்கள் தமிழர்கள் மீது அன்பு காட்ட மாட்டார்கள் என்ற எண்ணம் ஏற்பட்டுள்ளது. இதனால் புதுவை அரசு ஊழியர்களில் ஒரு பிரிவினர் தங்களது ஒரு நாள் ஊதியத்தைப் பிடித்தம் செய்து கொள்ள சம்மதம் தெரிவிக்காமல் உள்ளனர்.

முதல்-அமைச்சர் நாராயணசாமியிடம் அரசு ஊழியர்கள் சங்க நிர்வாகிகள் ஒரு நாள் ஊதியத்தைப் பிடித்தம் செய்து கொள்ள அனுமதிக்க கடிதம் கொடுத்திருந்தாலும், ஊழியர்கள் ஒவ்வொருவரும் தங்களது ஊதியத்தைப் பிடித்தம் செய்து விருப்பம் தெரிவித்து தனிப்பட்ட முறையில் கையொப்பமிட்டு கடிதம் வழங்க வேண்டும்.

அவ்வாறான கடித நகல் கடந்த வியாழக்கிழமை துறைத் தலைமை அலுவலகம் சார்பில் அனைத்து ஊழியர்களிடமும் வழங்கப்பட்டது. ஆனால் அரசு ஊழியர்களில் ஒரு பிரிவினர் கேரளத்துக்கு தங்களது ஒரு நாள் ஊதியத்தை வழங்க மாட்டோம் என்று எதிர்ப்பு தெரிவித்து ஒப்புதல் கடிதம் தரமறுத்து வருவதாகவும் தெரிகிறது.

இதனால் கேரள மக்களுக்கு முதல்-அமைச்சர் நாராயணசாமி எண்ணப்படி அதிகளவு நிதி திரட்டுவதில் சிக்கல் ஏற்பட்டுள்ளது. #KeralaFloods #Narayanasamy

சென்னை:

மழை வெள்ளத்தால் கடுமையாக பாதிக்கப்பட்ட கேரள மாநிலத்துக்கு தமிழகத்தில் இருந்து நிவாரண பொருட்கள் அதிக அளவில் சென்றுள்ளன.

நாம் தமிழர் கட்சி சார்பிலும் கேரள மக்களுக்கு உதவி செய்வதற்காக குடிநீர், உடைகள், காய்கறிகள் உள்ளிட்ட அத்தியாவசிய பொருட்கள் திரட்டப்பட்டன. ரூ.15 லட்சம் மதிப்பிலான இந்த நிவாரண பொருட்களுடன் 30-க்கும் மேற்பட்ட வாகனங்களில் அக்கட்சியின் தலைமை ஒருங்கிணைப்பாளர் சீமான் தலைமையில் நேற்று நூற்றுக்கணக்கான நாம் தமிழர் கட்சியினர் கேரளா சென்றனர். கோட்டயம் மாவட்டத்தில் உள்ள சங்கனாசேரி முகாமுக்கு நிவாரண பொருட்களை வழங்கிவிட்டு திரும்பினர்.

நாம் தமிழர் கட்சியினர் சென்ற வாகனங்களில் பிரபாகரன் படத்துடன் கூடிய பதாகைகள் கட்டப்பட்டிருந்தன. இதனை காரணம் காட்டி நாம் தமிழர் கட்சியினரை போலீசார் மடக்கினர். கோட்டயம் கிழக்கு காவல் நிலையத்தில் வைத்து அவர்களிடம் விசாரணை நடத்தப்பட்டது.

இதுபற்றி அறிந்ததும் சீமான் அங்கு விரைந்து சென்றார். போலீஸ் நிலையத்தில் வைத்து சீமான் உள்ளிட்ட நாம் தமிழர் கட்சியினரிடம் போலீசார் கடும் கெடுபிடியுடன் நடந்து கொண்டனர். நீங்கள் கொண்டு வந்திருக்கும் உணவு பொருட்களின் மீது நம்பகத்தன்மை இல்லை என்றும், பிரபாகரன் படத்தை வைத்திருப்பதால் அனைவரும் விடுதலைப்புலிகள் தானோ? என்கிற சந்தேகமும் எழுந்துள்ளதாகவும் கூறியதுடன், இது போன்று தொடர்ச்சியாக குற்றச்சாட்டுகளை கூறினர்.

இதனை கேட்டு சீமான் அதிர்ச்சி அடைந்தார். நாங்கள் கொண்டு வந்திருக்கும் பொருட்களை நன்றாக பரிசோதனை செய்யுங்கள். அதுவரை நாங்கள் இங்கேயே இருக்கிறோம் என்று கூறினார். பின்னர் 4 மணி நேரம் விசாரணைக்கு பின்னர் சீமான் உள்ளிட்ட நாம் தமிழர் கட்சியினர் அனைவரும் விடுவிக்கப்பட்டனர்.

இந்த சம்பவம் குறித்து சீமான் கூறியதாவது:-

நிவாரண பொருட்களை கொண்டு செல்ல, அங்குள்ள பெண் வட்டாட்சியர் மற்றும் போலீஸ் சூப்பிரண்டு ஆகியோரிடம் முறைப்படி அனுமதி வாங்கி இருந்தோம்.

கோட்டயத்தில் உள்ள மாவட்ட போலீஸ் தலைமை அலுவலகத்திற்கு நாங்கள் உணவு பொருட்களை கொண்டு சென்றோம். அம்மாநில காவலர்களே பொருட்களை இறக்குவதற்கு உதவி செய்தனர். ஒத்துழைப்பும் அளித்தனர். கொண்டு சென்ற பொருட்களையெல்லாம் இறக்கும் வரையில் 2½ மணி நேரம் நானும் அங்கேயே இருந்தேன். பின்னர் அங்கிருந்து அனைவரும் புறப்பட்டோம்.

இதன் பிறகுதான் கட்சியினரை போலீஸ் நிலையத்தில் பிடித்து வைத்திருப்பதாக தகவல் கிடைத்தது. அதன் பிறகே நான் அங்கு சென்றேன்.

இதுபற்றி போலீசார் கூறும்போது, எங்களுக்கு மேலிட உத்தரவு. நாங்கள் எங்கள் கடமையை செய்கிறோம் என்று கூறி விசாரித்தனர். 7 மணி நேரம் பயணம் செய்து சாப்பிடாமல் உங்களுக்கு உதவவே நாங்கள் வந்துள்ளோம் என்று தெரிவித்தோம். அதற்கு தமிழர்கள் தான்அதிக அளவில் உதவி இருக்கிறார்கள் என்று பதில் அளித்தனர். யாருடைய தூண்டுதலின் பேரிலோ தான் போலீசார் அவமானப்படுத்தும் விதத்தில் எங்களிடம் நடந்து கொண்டனர்.

புலிக் கொடியையும், பிரபாகரன் படத்தையும் நீங்கள் எடுத்து வந்திருப்பதால் விசாரிக்க சொல்லி உத்தரவு என்று கூறிய போலீசார், எனது முகவரி, செல்போன் எண்ணையும் வாங்கி வைத்துக் கொண்டனர்.

நாங்கள் செல்லும் போது சேவாசங்கத்தினர் சிலர் பொருட்களை தங்களிடம் கொடுக்குமாறு கூறினர். நாங்கள் உரிய அதிகாரிகளிடம்தான் வழங்குவோம் என்று கூறி எடுத்துச் சென்று விட்டோம். நாங்கள் அவமானப்படுத்தப்பட்டதற்கு அதுவும் ஒரு காரணமாக இருக்கலாம்.

இவ்வாறு சீமான் கூறினார். #Seeman

துபாய்:

பிறந்தநாள் பரிசாக மகளுக்கு தந்தை அளித்த ரூ.19 லட்சம் மதிப்புள்ள ‘தங்க கேக்’ கேரள வெள்ள நிவாரணத்துக்கு வழங்கப்பட்டது. துபாய் மாணவி இந்த உதவியை செய்துள்ளார்.

துபாயில் சொந்தமாக கட்டுமான நிறுவனம் நடத்தி வருபவர் விவேக் கல்லிதில். கேரளாவை சேர்ந்த இவருக்கு ஒரே பிரசவத்தில் பிறந்த வர்னிகா, தியூதி, பிரணதி ஆகிய 3 மகள்கள் உள்ளனர். இவர்களுக்கு வயது 12.



3 பேரும் துபாயில் உள்ள டெல்லி தனியார் பள்ளிக்கூடத்தில் படித்து வருகிறார்கள். விவேக் தனது 3 மகள்களின் பிறந்த நாளுக்கு ½ கிலோ தங்கத்தால் உருவாக்கப்பட்ட ‘கேக்’ பரிசளித்துள்ளார்.

துபாய் அல் பர்சாவில் உள்ள மலபார் கோல்டு அண்ட் டயமண்ட் நிறுவனத்தில் தயாரிக்கப்பட்ட இந்த ‘தங்க கேக்’ 22 காரட் ஆபரணத்தங்கத்தில் கைவினை கலைஞர்களால் உருவாக்கப்பட்டது. இந்த ‘கேக்’கின் மேற்புறத்தில் உள்ள மலர் வடிவம் துருக்கியில் இருந்து வரவழைக்கப்பட்டதாகும். அழகிய வேலைப்பாடுகள் நிறைந்த இந்த ‘கேக்’, ரூ.19 லட்சம் மதிப்புடையது.

கேரளாவில் பெய்த கனமழையால் பாதிக்கப்பட்டவர்களுக்கு நிவாரண பொருட்கள் மற்றும் நிதியுதவி சேகரிக்கப்பட்டு வருவதை விவேக் கல்லிதில் மகள்களில் ஒருவரான பிரணதி அறிந்தார். இதைத்தொடர்ந்து அவர் மற்ற சகோதரிகளுடன் பேசி, பிறந்த நாள் பரிசாக தந்தை கொடுத்த ‘தங்க கேக்’கை நிவாரண பொருளாக வழங்க முடிவு செய்து தந்தையிடம் தெரிவித்தார்.

மேலும் ஆடைகள் மற்றும் காலணிகளை நிவாரண பொருட்களாக வழங்கும்படியும் கேட்டுக்கொண்டார். மகளின் உதவும் நோக்கத்தை பார்த்து வியந்த விவேக் கல்லிதில் உடனடியாக அந்த ‘தங்க கேக்’கை பணமாக மாற்றி கேரள முதல்-மந்திரியின் நிவாரண நிதிக்கு அனுப்பிவைத்தார்.

இதுகுறித்து மாணவி பிரணதி கூறியதாவது:-

எனது தந்தையின் அலுவலகத்தில் பணிபுரியும் சில ஊழியர்களின் குடும்பத்தினர் கேரளாவில் ஏற்பட்ட வெள்ளத்தில் சிக்கி வீட்டின் கூரைகளில் தங்கியிருந்ததாக கூறினர். இதனை கேட்ட பிறகுதான் அங்கு துன்பப்படுபவர்களுக்கு உதவி செய்ய வேண்டும் என்ற எண்ணம் வந்தது.

எனவே நான் இந்த ‘கேக்’கை நன்கொடையாக அளித்தேன். எனது வீட்டின் அலமாரியில் வெறுமனே அலங்கார பொருளாக ‘தங்க கேக்’ இருப்பதை விட பல ஆயிரம் பேர்களின் கண்ணீரை துடைத்தால் அதுதான் மதிப்பு.

இவ்வாறு அவர் கூறினார்.

மாணவி பிரணதியின் இந்த மனிதாபிமான உதவிக்கு பாராட்டுகள் குவிந்த வண்ணம் உள்ளன. #KeralaFloods #GoldBirthdayCake