நீங்கள் தேடியது "Farmers' Struggle"

அலங்காநல்லூர்:

மதுரை மாவட்டம் அலங்காநல்லூரை அடுத்த கோட்டைமேடு ஊராட்சியை சேர்ந்தது பரளிகண்மாய். இதன் மூலம் கோட்டைமேடு, மற்றும் புதுப்பட்டி கிராமங்களில் சுமார் 260 ஏக்கர் விவாசாய விளை நிலங்கள் பாசன வசதி பெறுகிறது. இதற்கு முல்லை பெரியாறு பிரதான கால்வாய் மூலம் தண்ணீர் வந்து கொண்டிருக்கிறது.

இந்த நிலையில் கண் மாய்க்கு நீர் வரும் பாதையில் தனிநபர்கள் தடுப்பணை அமைத்து நீரினை பயன் படுத்தி வருகின்றனர்.இதனால் கண்மாய்க்கு வரவேண்டிய தண்ணீர் முழுமையாக வரவில்லை. இதனால் கண்மாய் பாசன விவசாயிகள் பாதிக்கப்படுகின்றனர்.

இதுகுறித்து பாசன விவசாயிகள் கலெக்டர், கோட்டாட்சியர், பொதுப் பணித்துறை அலுவலர்கள் உள்ளிட்டவர்களிடம் நடவடிக்கை எடுக்க வலியுறுத்தி கோரிக்கை மனு ஏற்கனவே கொடுத்துள்ளனர்.

மேலும் தடுப்பணைகள் அமைத்துள்ளவர்கள் மீது நடவடிக்கை எடுக்க வலியுறுத்தி அலங்காநல்லூர் நிலையம் முன்பு விவசாயிகள் காத்திருப்பு போராட்டத்தில் ஈடுபட்டனர். அப்போது போலீஸ் அதிகாரிகள் பேச்சு வார்த்தை நடத்தி உரிய நடவடிக்கை எடுப்பதாக தெரிவித்தனர். இதைதொடர்ந்து விவசாயிகள் புகார் மனுவை கொடுத்துவிட்டு சென்றனர்.

ஸ்ரீமுஷ்ணம்:

ஸ்ரீமுஷ்ணத்தில் ஆண்டுதோறும் அரசு நேரடி நெல் கொள்முதல் நிலையம் திறக்கப்பட்டு ஸ்ரீமுஷ்ணம் கீழ் மற்றும் மேல்புளியங்குடி, ஸ்ரீராமன், ரெட்டிபாளையம், கரப்பை போன்ற 10-க்கும் மேற்பட்ட கிராம விவசாயிகள் நெல் கொள்முதல் செய்து பயன்பெற்று வந்தனர்.

இந்த ஆண்டு நெல் கொள்முதல் தாமதமாக கடந்த சனிக்கிழமை தொடங்கப்பட்டது. அதனை தொடர்ந்து ஓரிரு நாட்கள் மட்டும் திறந்து குறைந்த அளவே நெல் கொள்முதல் செய்தனர்.

ஆனால், விவசாயிகள் அந்த நெல் கொள்முதல் நிலையம் முன்பு நெல்களை மூட்டைகளாகவும், குவியல் குவியலாகவும் வைத்தனர். நெல் மூட்டைகளை எடை போடுங்கள் என்றால், எடை மிஷின் சரியில்லை. நெல் நனைந்தால் எடைபோட முடியாது எனவும் கூறி வந்தனர்.

இந்த நிலையில் தினமும் சரியான நேரத்தில் நெல் கொள்முதல் நிலையம் திறக்காததை கண்டித்தும், தற்போது இந்த கொள்முதல் நிலையம் தினமும் இரவு நேரத்தில் மழை பெய்வதால் உடனடியாக நெல் மூட்டைகளை எடை போட வேண்டும் என்று வலியுறுத்தி நெல் குவியல் முன்பு நின்று கொண்டு விவசாயிகள் ஆர்ப்பாட்டம் செய்தனர்.

இது குறித்து நெல் கொள்முதல் நிலையத்துக்கு வந்த விவசாயிகள் கூறியதாவது:-

கடந்த சனிக்கிழமை இந்த நிலையத்துக்கு எடைபோட செல் எடுத்து வந்தேன். இதுவரை எடை போடவில்லை. கடந்த ஆண்டு விருத்தாசலம் செல்லும் சாலையில் நெல் கொள்முதல் நிலையம் பரந்து விரிந்து பாதுகாப்பான இடத்தில் இருந்தது.

இந்த ஆண்டு அரசு இடத்தில் மலைமேடு பகுதியில் பள்ளம்-மேடாக உள்ள இடத்தில் இந்த நிலையத்தை தொடங்கி உள்ளனர். அதனால் நெல் குவியலாக உள்ள இடத்தில் மழைநீர் தேங்கி குட்டைப்போல் காட்சி அளிக்கிறது.

மேலும் இரவு நேரங்களில் பன்றிகள் புகுந்து குவித்து வைத்துள்ள நெல்களை தின்று சேதப்படுத்தி விடுகிறது. கடன் மற்றும் நகை பொருட்களை அடமானம் வைத்து பயிரிட்டு பின்பு அறுவடை செய்து அதில் பணத்தை பெற்று கடன்களை அடைக்கலாம் என்றால் வட்டி கூட கட்ட முடியாத நிலையில் உள்ளோம். எனவே அரசு நேரடி கொள்முதல் நிலையத்தை காலதாமதம் இல்லாமல் திறந்து எங்கள் நெல் மூட்டைகளை எடைபோட்டு தொகையை வழங்க நடவடிக்கை எடுக்க வேண்டும்.

இவ்வாறு அவர்கள் கூறினார்கள்.

பாபநாசம்:

பாபநாசம் ஒன்றியம் பெருமாங்குடி கிராமத்தில் தமிழ்நாடு விவசாயிகள் முன்னேற்ற சங்கத்தின் ஆலோசனை கூட்டம் சங்க மாநில தலைவர் மாலாபுரம் கோ.கண்ணன் தலைமையில் நடைபெற்றது. பாசன கிளை வாய்க்கால்கள் முழுவதும் தூர்வாரவேண்டும். கடை மடை வரை தண்ணீர் செல்லும் வகையில் நீர் திறக்க வேண்டும். விவசாயிகளுக்கு மானிய விலையில் விதைநெல்,பூச்சி மருந்து உரம் வழங்கவேண்டும். தேசிய மயமாக்கப்பட்ட வங்கி மற்றும் கூட்டுறவு வங்கியில் விவசாயிகள் வாங்கிய விவசாய கடனை முழுமையாக தள்ளுபடி செய்யவேண்டும்.

நுகர்பொருள் வாணிப கழகத்தில் கொள்முதல் செய்யும் நெல்லுக்கு தட்டுப் பாடின்றி சாக்கு வழங்க வேண்டும் உள்பட ஆகிய 7 அம்ச கோரிக்கைகளை வலியுறுத்தி பாபநாசம் புதிய பேருந்துநிலையம் அருகில் நாளை (வியாழக்கிழமை) மத்திய, மாநில அரசை கண்டித்து ஆர்ப்பாட்டம் நடத்துவது என தீர்மானிக்கப்பட்டது.

சோழிங்கநல்லூர்:

பள்ளிக்கரணை அருகே உள்ள மேடவாக்கத்தை சேர்ந்தவர்கள் மனோகர், மகாலிங்கம், தேவதாஸ். சகோதரர்களான இவர்கள் அதே பகுதியில் 2 ஏக்கர் நிலத்தில் விவசாயம் செய்து வருகிறார்கள்.

இந்த நிலையில் இவர்களது விவசாய நிலத்தை சுற்றிவிதிமுறையை மீறி கட்டிடம் கட்ட அனுமதி வழங்கப்பட்டதாக தெரிகிறது. இதனால் விவசாய நிலத்திற்கு வரும் கால்வாயை ஆக்கரமித்து கட்டிடங்கள் கட்டப்பட்டு உள்ளன.

இதன் காரணமாக அவர்களால் விவசாயம் செய்ய முடியாத நிலை ஏற்பட்டது. கால்வாய் ஆக்கிரமிப்பு பற்றி அவர்கள் சம்பந்தப்பட்ட அதிகாரிகளுக்கு தெரிவித்தும் நடவடிக்கை எடுக்கப்பட வில்லை என்று தெரிகிறது.

இந்த நிலையில் கால்வாய் ஆக்கிரமிப்பை அகற்ற கோரியும், நடவடிக்கை எடுக்காத அதிகாரிகளை கண்டித்தும் இன்று காலை விவசாயிகள் மனோகர், மகாலிங்கம், தேவதாஸ் ஆகியோர் குடும்பத்துடன் திடீரென மேடவாக்கம் ஊராட்சி அலுவலகம் முன்பு அமர்ந்து தர்ணா போராட்டத்தில் ஈடுபட்டனர். இதனால் அங்கு பரபரப்பு ஏற்பட்டது.

சிட்லபாக்கம் போலீசார் விரைந்து வந்து அவர்களிடம் பேச்சு வார்த்தை நடத்தினர். இதையடுத்து அவர்கள் அங்கிருந்து கலைந்து சென்றனர்.

இது குறித்து விவசாயி மனோகர் கூறும்போது, “அதிகாரிகள் லஞ்சம் பெற்றுக் கொண்டு திட்ட அனுமதி வழங்கியதால் விவசாய நிலத்தை சுற்றி அடுக்குமாடி வீடுகள் மற்றும் மதில் சுவர் கட்டப்பட்டுள்ளது.

கால்வாய் ஆக்கிரமிப்பால் விவசாய நிலத்துக்கு தண்ணீர் வருவதில்லை. அரசு ஆணையை மீறி வழங்கப்பட்ட திட்ட அனுமதியை திரும்ப பெற்று விவசாய நிலத்திற்கு வழிவிட நடவடிக்கை எடுக்க வேண்டும்.

இல்லையெனில் காஞ்சீபுரம் மாவட்ட கலெக்டர் அலுவலகத்தில் போராட்டம் நடத்துவோம்” என்றார்.

சேலம்:

சேலம்-சென்னை இடையே ரூ.10 ஆயிரம் கோடி செலவில் 8 வழி பசுமை சாலை அமைக்கப்பட உள்ளது.

இதற்காக சேலம், தர்மபுரி, கிருஷ்ணகிரி, திருவண்ணாமலை, காஞ்சீபுரம் ஆகிய 5 மாவட்டங்களில் உள்ள 8 ஆயிரம் ஏக்கர் விவசாய நிலங்கள் மற்றும் வீடுகள், மலைகள் கையகப்படுத்தப்பட உள்ளது.

இதனால் சுமார் 6 ஆயிரம் விவசாயிகள் பாதிக்கப்படும் நிலை ஏற்பட்டுள்ளது. இதற்கு சமூக ஆர்வலர்கள் கடும் எதிர்ப்பு தெரிவித்து வருகிறார்கள். மேலும் விவசாயிகள் தொடர் போராட்டங்களிலும் ஈடுபட்டு வருகிறார்கள்.

போராட்டத்தை தூண்டி விட்டதாக ஆச்சாங்குட்ட பட்டியை சேர்ந்த தி.மு.க. நிர்வாகி முத்துக்குமார், அன்னதானப்பட்டியை சேர்ந்த நாம் தமிழர் கட்சி ஒருங்கிணைப்பாளர் மாரிமுத்து ஆகியோர் 15 நாட்களுக்கு முன்பு கைது செய்யப்பட்டனர்.

சேலத்தை சேர்ந்த சமூக ஆர்வலர் பியூஸ்மானூஷ் கடந்த மாதம் 3-ந் தேதி நடிகர் மன்சூர் அலிகானை சேலத்திற்கு அழைத்து வந்து 8 வழி விரைவு சாலை அமையும் பகுதிகளை காண்பித்தார். அப்போது நிரூபர்களிடம் பேசிய நடிகர் மன்சூர் அலிகான் சேலம் - சென்னை பசுமை வழிசாலை திட்டத்தை கைவிடா விட்டால் 8 பேரையாவது வெட்டி கொல்வேன் என ஆவேசமாக பேசினார்.

இது தொடர்பாக விசாரணை நடத்திய தீ வட்டிபட்டி போலீசார் நேற்று முன்தினம் நடிகர் மன்சூர் அலிகானை கைது செய்து சேலம் மத்திய சிறையில் அடைத்தனர். அதுபோல 8 வழி சாலை திட்டத்தை எதிர்த்து போராடுபவர்களையும், போராட்டத்துக்கு தூண்டி விடுபவர்களையும் போலீசார் அதிரடி வேட்டை நடத்தி கைது செய்து வருகிறார்கள்.

இந்த நிலையில் சேலம் மாவட்டத்தில் கையகப்படுத்தப்படும் நிலத்திற்கு ஆட்சேபனை இருந்தால் தங்கள் கருத்தை தெரிவிக்கலாம் என்று மாவட்ட நிர்வாகம் அறிவித்ததை அடுத்து கடந்த 14-ந்தேதி ஆட்சேபனை மனுக்களை விவசாயிகள் கொடுத்தனர். இதையடுத்து ஜூலை மாதம் 10-ந் தேதி கலெக்டர் தலைமையில் அடுத்த கட்ட கூட்டம் நடப்பதாக தெரிவிக்கப்பட்டது.

அந்த கூட்டம் நடக்கும் வரை 8 வழி சாலைக்கு நில எடுப்பு மேல் நடவடிக்கை எதுவும் எடுக்கப்படாது என அதிகாரிகள் விவசாயிகளிடம் உறுதி அளித்தனர். இதனால் விவசாயிகள் சற்று அமைதியாக இருந்தனர்.

ஆனால் அதிகாரிகள் நேற்று திடீரென 8 வழி பசுமை சாலைக்கான திட்டப்பணிகளை அதிரடியாக தொடங்கினார்கள். சேலம் மாவட்டத்தின் எல்லைப் பகுதியான மஞ்சவாடியில் இருந்து அடிமலைப்புதூர், செட்டியார் காடு, ஆச்சாங்குட்டப்பட்டி, வலசையூர் பகுதியில் கையகப்படுத்த கூடிய நிலத்தை அளவீடு செய்து எல்லைக்கல் நடும் பணியில் மாவட்ட வருவாய்துறையினர் ஈடுபட்டனர்.

முன் அறிவிப்பு ஏதும் இல்லாமல் நிலங்களை அளந்து எல்லை கற்கள் நட்டதை பார்த்த விவசாயிகளும், கிராம மக்களும் கடும் எதிர்ப்பு தெரிவித்தனர். அதிகாரிகளுடன் வாக்கு வாதத்தில் ஈடுபட்டனர்.

விவசாயிகளை கண்டு கொள்ளாத அதிகாரிகள் போலீஸ் பாதுகாப்புடன் விவசாய பயிர்களுக்கு நடுவே சாலை அமைப்பதற்கான எல்லை கற்களை நட்டனர். மஞ்சவாடி கணவாய் முதல் வலசையூர் வரை சுமார் 20 கி.மீ. தூரத்திற்கு நேற்று நில அளவீடு செய்யப்பட்டு எல்லைக்கல் நடப்பட்டது.

இந்த சாலைக்காக 70 மீட்டர் அகலத்தில் விவசாய நிலங்கள் எடுக்கப்படுகிறது. பசுமையான தென்னை மரம், பூஞ்செடிகள், மாந்தோப்பு, கொய்யாதோப்பு, நெல் வயல்களுக்கு இடையே அளவீடு செய்ததால் அந்த பகுதி விவசாயிகள் கண்ணீர் விட்டு கதறினர்.

ஆச்சாங்குட்டப்பட்டி பகுதியில் நில அளவீடு செய்யும் பணி நடந்த போது அங்கு திரண்டு வந்த 60-க்கும் மேற்பட்ட விவசாயிகள் அதிகாரிகளை முற்றுகையிட்டு போராட்டத்தில் ஈடுபட்டனர். அப்போது உண்ணாமலை என்பவர் தனது விவசாய நிலத்தில் படுத்து உருண்டு புரண்டு கதறி அழுதார். என்னை கொன்று விட்டு நிலத்தை எடுத்து கொள்ளுங்கள் என்று கதறினார்.

உடனே பாதுகாப்பு பணியில் இருந்த போலீசார் உண்ணாமலை, அவரது மகன் ரவிச்சந்திரன், மருமகள் சுதா, சகுந்தலா, பிரகாஷ், நடராஜ் ஆகிய 6 பேரை கட்டாயப்படுத்தி வேனில் ஏற்றி சென்றனர். பின்னர் அவர்களை இரவில் விடுவித்தனர்.

அங்கு பதட்டமான சூழல் நிலவுவதால் 200-க்கும் மேற்பட்ட போலீசார் குவிக்கப்பட்டனர். மேலும் 25-க்கும் மேற்பட்ட உளவு பிரிவு போலீசாரும் தீவிர கண்காணிப்பில் ஈடுபட்டு உள்ளனர்.

இந்த நிலையில் நேற்று மாலை ஓமலூரை அடுத்த ஆர்.சி. செட்டிபட்டியில் ஓமலூர் போலீசார் வாகன தணிக்கையில் ஈடுபட்டிருந்த போது சமூக ஆர்வலர் பியூஸ் மானுஷ் போலீசாரிடம் சிக்கினார்.

ஏற்கனவே இவரை போலீசார் போராட்டத்தை தூண்டி விடுவதாக தேடி வந்தனர். அவரை கண்டதும் போலீசார் சுற்றி வளைத்து கைது செய்தனர். நேற்றிரவு அவர் சேலம் மத்திய சிறையில் அடைக்கப்பட்டார்.

இந்த நிலையில் சேலத்தை அடுத்த ஆச்சாங்குட்டபட்டி பகுதியில் 2-வது நாளாக இன்றும் பலத்த போலீஸ் பாதுகாப்புடன் நில அளவீடு செய்யும் பணியில் அதிகாரிகள் ஈடுபட்டுள்ளனர். இதற்கு விவசாயிகள் மற்றும் பொது மக்கள் திரண்டு வந்து கடும் எதிர்ப்பு தெரிவித்தனர்.

அந்த பகுதியில் தொடர்ந்து பதட்டம் நீடித்து வருகிறது. இதனால் கூடுதல் போலீசார் குவிக்கப்பட்டுள்ளனர்.

இது குறித்து அந்த பகுதி விவசாயி ஒருவர் கூறியதாவது:- சேலம்- சென்னைக்கு 8 வழி பசுமை சாலை தேவையில்லாத திட்டம், பசுமையான விளை நிலங்களை அழித்து சென்னைக்கு விரைவாக செல்ல வேண்டுமா? தென்னை மரங்களை எவ்வளவு கஷ்டப்பட்டு வளர்த்துள்ளோம்.

தற்போது எனது கண் முன்னே அதனை அழிக்க துடிக்கிறார்கள்.இதனால் மிகவும் மன வேதனையில் தவித்து வருகிறோம். ஜூலை மாதம் 10-ந் தேதி கலெக்டர் தலைமையில் நடக்கும் கூட்டத்தில் ஆட்சேபனை தெரிவிக்கலாம் என்று நினைத்திருந்த நிலையில் திடீரென நில அளவீடு செய்யும் பணி மேற்கொள்வது அத்து மீறிய செயல், எனது நிலத்தில் எல்லை கல்லை நான் நடவிடவில்லை என்றார். #Greenwayroad #Farmersstruggle