நீங்கள் தேடியது "noyyal river"

கோவை:

கோவை சிங்காநல்லூர்-வெள்ளலூர் இடையே நொய்யல் ஆற்றின் மீது தரைப்பாலம் அமைக்கப்பட்டுள்ளது.

ஏற்கனவே இப்பகுதியில் இருந்த பாலம் பழுதடைந்திருந்த நிலையில் அருகிலேயே மற்றொரு தற்காலிக தரைப்பாலம் அமைக்கப்பட்டுள்ளது.மேலும், பழுதடைந்த பாலத்தை இடித்துவிட்டு புதிய பாலம் அமைக்கும் பணிகள் தொடங்கப்பட்டுள்ளது. பாலத்தின் கட்டுமானப்பணிகள் நடைபெற்று வருகிறது.

இதனிடையே கோவையில் தற்போது பருவமழை பெய்து வருவதால் நொய்யல் ஆற்றில் நீர் வரத்து அதிகரித்துள்ளது.இதனால் வெள்ளலூரில் உள்ள தரப்பாலத்தின் மீது ஆற்று நீர் செல்லும் நிலை ஏற்பட்டுள்ளது. இதனால் வாகன ஓட்டிகள் மற்றும் பொதுமக்கள் அந்த வழியாக செல்ல அச்சமடைந்துள்ளனர்.

சிங்காநல்லூரில் இருந்து வெள்ளலூர் செல்லும் பிரதான சாலையாக உள்ள இந்த சாலையில் தரைப்பாலம் அவ்வப்போது ஆற்று நீரில் மூழ்கிவிடுவதால் குறித்த நேரத்திற்குள் பயணிக்க முடியமல் மக்கள் அவதியடைந்து வருகின்றனர்.

நேற்று பெய்த மழையில் தரைப்பாலம் மூழ்கும் அளவுக்கு நொய்யலில் தண்ணீர் சென்றது. இந்த நிலையில் கோவை மாநகராட்சி கமிஷனர் பிரதாப் மற்றும், போலீஸ் கமிஷனர் பாலகிருஷ்ணன் ஆகியோர் ஆய்வு செய்தனர். அப்போது வெள்ளலூரில் மேம்பாலம் விரைந்து அமைக்க மக்கள் கோரிக்கை வைத்தனர்.

காங்கயம் :

திருப்பூர் மாவட்டம் காங்கேயம் ஒன்றியம் நத்தக்காடையூர் அருகே உள்ள மருதுறை கிராமப் பகுதி வழியாக நொய்யல் ஆறு செல்கிறது. இதில் ஈரோடு மாவட்ட பகுதிக்கும், திருப்பூர் மாவட்டத்திற்கும் எல்லையாக உள்ள மருதுறையில் தரைமட்ட பாலம் உள்ளது. இவ்வழியாக சென்னிமலை, அரச்சலூருக்கும், நத்தகாடையூர், முத்தூர் பகுதிக்கும் போக்குவரத்து அதிக அளவில் உள்ளது.

இதில் மருதுறையில் உள்ள நொய்யல் ஆற்று பாலத்தின் உயரம் குறைவாக உள்ளது. மழை காலங்களில் ஆற்றில் தண்ணீர் அதிக அளவில் செல்லும் போது, பாலத்தை மூழ்கடித்தபடி தண்ணீர் செல்வதால் பொதுமக்கள் போக்குவரத்துக்கு தடை விதிக்கப்படும். இதனால் 5 கிலோ மீட்டர் சுற்றி தான் இரு புறங்களில் உள்ள பகுதிக்கு செல்லும் நிலை ஏற்பட்டது. இதையடுத்து மருதுறை பகுதியில் உயர்மட்ட பாலம் அமைக்க வேண்டும் என பொதுமக்கள் கோரிக்கை விடுத்து வந்தனர்.

இந்நிலையில் புதிய பாலம் அமைக்கப்படும் என அரசு அறிவித்தது.இதையடுத்து மருதுறை ஊராட்சியில் நெடுஞ்சாலை துறையின் சார்பில் நொய்யல் ஆற்றின் குறுக்கே ரூ.7.31 கோடி மதிப்பீட்டில் உயர்மட்ட பாலம் கட்டும் பணிக்கு செய்திதுறை அமைச்சர் மு.பெ.சாமிநாதன் அடிக்கல் நாட்டி பணிகளை துவக்கி வைத்தார்.

பாலத்தின் நீளம் 128 மீட்டர் ஆகும். 16மீட்டர் நீளமுள்ள 8 கண்களும், 7.50 மீட்டர் அகலமும், ஒவ்வொரு பக்கமும் 0.725 மீட்டர் நடைபாதை அகலமும். ஒவ்வொரு பக்கமும் 0.50 மீட்டர் விபத்து தடுப்பானும் என 9.95 மீட்டர் பாலத்தின் மொத்த அகலம் மற்றும் திறந்த அடித்தளமும் அமையவுள்ளது. மருதுறை பக்கம் 60 மீட்டர். கே.ஜி.வலசு பக்கம் 155 மீட்டர் அணுகு சாலை அமையவுள்ளது. இந்த பாலம் கட்டும் பணி 12 மாத காலத்தில் முடிவு பெறும் என அமைச்சர் தெரிவித்தார்.

இதில் மாவட்ட ஊரக வளர்ச்சி முகமையின் திட்ட இயக்குனர் லட்சுமணன், நெடுஞ்சாலை துறை செயற்பொறியாளர் சோமசுந்தரம், பொதுக்குழு உறுப்பினர் மோகனசுந்தரம், காங்கேயம் ஒன்றிய செயலாளர் சிதம்பரம், சென்னிமலை கிழக்கு ஒன்றிய செயலாளர் பிறப்பு, மேற்கு ஒன்றிய செயலாளர் எஸ்.ஆர்.எஸ்.செல்வம், மருதுறை ஊராட்சி தலைவர் செல்வி சிவகுமார், கீரனூர் ஊராட்சி தலைவர் ஈஸ்வரமூர்த்தி உள்பட பலர் கலந்து கொண்டனர்.

திருப்பூர் :

திருப்பூரில் நொய்யல் ஆற்றின் கரை மற்றும் நீர் வழிப்பாதையில் உள்ள ஆக்கிரமிப்புகள் அகற்ற உரிய துறை மூலம் நோட்டீஸ் வினியோகிக்கப்பட்டது.காயிதே மில்லத் நகரில் கரையோரம் உள்ள 108 வீடுகளுக்கு சில மாதம் முன், காலி செய்ய நோட்டீஸ் வழங்கப்பட்டது.இங்கு வசித்தோருக்கு வீரபாண்டியில் உள்ள அடுக்குமாடி குடியிருப்பில் வீடு வழங்க நடவடிக்கை எடுக்கப்பட்டது.

இதில் 27 பேர் வீட்டுக்கான தொகையை அவர்களாகவேசெலுத்தினர்.மேலும் 60க்கும் மேற்பட்டோருக்கு கடனுதவி ஏற்பாடு செய்யப்பட்டது. இவர்களுக்கு வீடு ஒதுக்கப்பட்ட நிலையில்ஆக்கிரமிப்பு வீடுகளை காலி செய்ய அதிகாரிகள் அறிவுறுத்தினர்.அதன்படி போலீஸ் பாதுகாப்புடன் மாநகராட்சி, பொதுப்பணித்துறை, மின் வாரியம், வருவாய் துறையினர் அங்கு சென்றனர்.

அடுக்குமாடிக் குடியிருப்பில் வீடு ஒதுக்கீடு பெற்ற சிலர் தங்களுக்கு மின் இணைப்பு கிடைக்கவில்லை.வீடு வெள்ளையடிக்க வேண்டும். சுத்தம் செய்ய வேண்டும். தற்போதுள்ள வீடு காலி செய்ய ஆள் மற்றும் வாகன வசதியில்லை என்று கூறினர்.மின் இணைப்பு பெற உடனடியாக அதே இடத்தில் ஆன்லைன் மூலம் விண்ணப்பிக்கவும், ஒரே நாளில் மின் இணைப்பு வழங்கவும் ஏற்பாடு செய்யப்பட்டது.

ஒரு சிலர் பொருட்களை கொண்டு செல்ல வசதியில்லை என்றபோது அவர்களுக்கு மாநகராட்சி ஊழியர்கள் உதவினர்.வீடு ஒதுக்கீடு பெற்ற 6 பேர் தங்கள் வீடுகளைக் காலி செய்து பொருட்களை எடுத்துச் சென்றனர். அந்த வீடுகள் அடையாளம் காணப்பட்டது.பிற வீடுகளையும் உடனடியாக காலி செய்ய அதிகாரிகள் உரிய அறிவுரை வழங்கினர். அனைத்து வீடுகளும் பொருட்கள் அகற்றி காலி செய்து கொள்ள அதிகாரிகள் சில நாள் அவகாசம் வழங்கினர். அதன் பின் இடித்து அகற்றப்படும் எனவும் தெரிவிக்கப்பட்டது.

திருப்பூர்:

பனியன் தொழில் நகரான திருப்பூரில் சாயப்பட்டறைகளில் இருந்து சாயக்கழிவு நீரை சுத்திகரிப்பு செய்யாமல் நொய்யல் ஆற்றில் வெளியேற்றியதால் விவசாய நிலங்கள் பாழ்பட்டுபோனது.

இதை தடுக்கும் வகையில் சாயக்கழிவுநீரை பொதுக்கழிவுநீர் சுத்திகரிப்பு நிலையத்தில் சுத்திகரிப்பு செய்து அந்த நீரை மறுசுழற்சி முறையில் பயன்படுத்தி வருகிறார்கள்.

இது ஒரு புறம் இருக்க அவ்வப்போது முறைகேடாக சாயப்பட்டறைகளில் இருந்து சாயக்கழிவுநீரை நொய்யல் ஆற்றில் திறந்து விடுவதும் தொடர்கதையாகத்தான் இருந்து வருகிறது.

பொதுவாக மழை பெய்யும் காலத்தில் நொய்யல் ஆற்றில் தண்ணீர் அதிக அளவு செல்லும்போது சாயக்கழிவுநீரை திறந்து விட்டு நுரை பொங்கி பாய்வது வழக்கம். ஆனால் நேற்று இரவு நொய்யல் ஆற்றில் வெள்ளை நுரை பொங்க தண்ணீர் பாய்ந்தது.

திருப்பூர் பெத்திசெட்டிப்புரம், ராயபுரம் பகுதி வழியாக செல்லும் நொய்யல் ஆற்றில் வெள்ளை நுரையோடு தண்ணீர் ஓடியதை பார்த்த அப்பகுதி மக்கள் அதிர்ச்சி அடைந்தனர்.

ரசாயன கழிவுகள் கலக்கும்போது தான் தண்ணீர் நுரை பொங்கி பாயும். ஆனால் நேற்று அதிக அளவில் வெள்ளை நுரையாக நொய்யல் ஆறு காட்சியளித்தது. மாலை நேரத்தில் திடீரென்று நொய்யல் ஆற்றில் கழிவுநீர் திறந்து விட்டுள்ளதாக அப்பகுதி பொதுமக்கள் குற்றம்சாட்டினார்கள்.

இது குறித்து அந்த பகுதியினர் கூறும்போது, நொய்யல் ஆற்றில் கழிவுநீர் கலக்காமல் இருப்பதற்காக ஒருபுறம் தூய்மைப்படுத்தி வருகிறார்கள். ஆனால் மறுபுறம் சாயக்கழிவுநீரை திறந்து விட்டு விடுகிறார்கள். குறிப்பாக இரவு, அதிகாலை நேரத்தில் இவ்வாறு நொய்யல் ஆற்றில் சாயக்கழிவுநீரை திறந்து விடுகிறார்கள். வெள்ளை நுரையோடு தண்ணீர் பாயும்போதே நமக்கு தெரிகிறது.

சில நேரங்களில் பல வண்ணங்களில் சாயநீரையும் அப்படியே திறந்து விட்டு விடுகிறார்கள். இதுகுறித்து மாசுகட்டுப்பாட்டு வாரிய அதிகாரிகளிடம் புகார் தெரிவித்துள்ளோம் என்றனர். #Noyyalriver

திருப்பூர்:

தென்மேற்கு பருவமழை தீவிரம் காரணமாக மேற்கு தொடர்ச்சி மலைப்பகுதியில் கனமழை கொட்டி வருகிறது. கோவை, நீலகிரி, திருப்பூரிலும் தொடர் மழை பெய்து வருகிறது. இதனால் திருப்பூர் நொய்யல் ஆற்றில் கழிவு நீருடன் வெள்ளப்பெருக்கு ஏற்பட்டுள்ளது.

நொய்யல் ஆற்றின் குறுக்கே உள்ள நல்லம்மாள் தடுப்பணை, ராயபுரம் தடுப்பணை, அணைக்காடு மண்ணரை தடுப்பணை, காசிபாளையம் தடுப்பணை ஆகிய தடுப்பணைகள் நிரம்பி வழிந்து வெள்ளம் கரைபுரண்டு ஓடுகிறது. இதனால் ஆனைமேடு, ஆலங்காடு ஆகிய பகுதிகளில் வசிக்கும் பொதுமக்களுக்கு வெள்ள அபாய எச்சரிக்கை விடப்பட்டுள்ளது. பொதுமக்கள் பாதுகாப்பான பகுதிக்கு செல்லுமாறு திருப்பூர் வடக்கு தாசில்தார் சுப்பிரமணியம் எச்சரிக்கை விடுத்துள்ளார்.

வெள்ளப்பெருக்கு காரணமாக அணைப் பாளைத்தில் உள்ள தரைப்பாலம் மூழ்கியது. இதனால் அந்த பகுதியில் போக்குவரத்து முற்றிலும் நிறுத்தப்பட்டது. இருபுறமும் பொதுமக்கள் நுழைந்து விடாதவாறு போலீஸ் பாதுகாப்பு போடப்பட்டுள்ளது. தொடர்ந்து மழை பெய்து வருவதால் நொய்யல் ஆற்றில் வெள்ளம் அதிகரித்துள்ளது.

வருவாய்த்துறையினர் 24 மணிநேரமும் நொய்யல் ஆற்றை தீவிரமாக கண்காணித்து வருகிறார்கள்.