சிவகங்கை

சிவகங்கை:

புயல் காரணமாக “ஒக்கி” தமிழகத்தின் பல பகுதிகளிலும் மழை பெய்தது. கடலோர மாவட்டங்களில் கனமழை நீடித்தது.

“ஒக்கி” புயலை தொடர்ந்து சாகர் புயல் மிரட்டல் விடுத்து வருகிறது. இதன் காரணமாக 3 நாட்களுக்கு மழை நீடிக்கும் என வானிலை மையம் அறிவித்துள்ளது.

சிவகங்கை மாவட்டத்தில் நேற்று பரவலாக மழை பெய்தது. தேவகோட்டை, திருப்பத்தூர் பகுதிகளில் பலத்த மழை பெய்தது. இன்று காலை 8 மணி வரை மாவட்டத்தில் பெய்த மழை அளவு (மில்லிமீட்டரில்) வருமாறு:-

தேவகோட்டை-49.4

திருப்பத்தூர்-48.3

சிங்கம்புணரி-8.20

சிவகங்கை-8.5

காளையார்கோவில்-3.4

மானாமதுரை-2.4

சிவகங்கை:

திருப்புவனம் தாலுகா வெள்ளிக்குறிச்சி கிராமத்தைச் சேர்ந்தவர் செல்லச்சாமி (வயது 65), விவசாயி. இவரது தம்பி சேதுராமன் (48). இவர் ஆவாரங்காடு பகுதியைச் சேர்ந்த சுப்பிரமணியன் (48) என்பவரிடம் ரூ. 50 ஆயிரம் கடன் வாங்கினாராம்.

நீண்ட நாட்களாகியும் கடனை திருப்பிக் கொடுக்காததால் சுப்பிரமணியன், சேதுராமனின் அண்ணன் செல்லச்சாமியிடம் சென்று கேட்டார்.

அப்போது சுப்பிரமணியன் கொலை மிரட்டல் விடுத்ததாக திருப்பாச்சேத்தி போலீசில் சேதுராமன் புகார் செய்தார்.

இன்ஸ்பெக்டர் முருகன் வழக்குப்பதிவு செய்து விசாரணை நடத்தினார். தொடர்ந்து பணம் கேட்டு மிரட்டல் விடுத்ததாக சுப்பிரமணியன் கைது செய்யப்பட்டார்.

சிவகங்கை:

தென்மேற்கு வங்கக் கடலில் உருவான காற்றழுத்த தாழ்வு நிலை புயல் சின்னமாக மாறியுள்ளது. இதன் காரணமாக கன்னியாகுமரி, தூத்துக்குடி, நெல்லை மாவட்டங்கள் பெரிதும் பாதிக்கப்பட்டுள்ளன. மற்ற மாவட்டங்களிலும் பரவலாக மழை பெய்து வருகிறது.

சிவகங்கை மாவட்டத்தில் சிவகங்கை, காளையார் கோவில், இளையான்குடி, மானாமதுரை, திருப்புவனம் மற்றும் சுற்று வட்டார பகுதிகளில் நேற்று காலை சாரல் மழை பெய்யத் தொடங்கியது. நேரம் செல்லச் செல்ல மழையின் வேகம் அதிகரித்தது.

கொட்டித் தீர்த்த கன மழை காரணமாக சாலைகளில் மழை நீர் வெள்ளம் போல் பெருக்கெடுத்து ஓடியது.

கனமழையால் குளங்கள், கண்மாய்களுக்கு நீர்வரத்து அதிகரித்துள்ளது. விடிய, விடிய மழை நீடித்தது. தொடர்ந்து மழை பெய்து கொண்டே இருக்கிறது.

தொடர்மழை காரணமாக சிவகங்கை, காளையார்கோவில், இளையாங்குடி, மானாமதுரை, திருப்புவனம் தாலுகாக்களில் உள்ள பள்ளி, கல்லூரிகளுக்கு இன்று விடுமுறை விடப்படுவதாக கலெக்டர் லதா அறிவித்துள்ளார்.

ராமேஸ்வரம், தங்கச்சி மடம், பாம்பன் பகுதிகளில் கடந்த 4 நாட்களாக கன மழை கொட்டியது. நேற்று சற்று ஓய்வெடுத்தது.

இந்த நிலையில் நேற்று மாலை பலத்த சூறாவளி வீசியது. அந்த சமயத்தில் பாம்பன், தனுஷ்கோடி பகுதியில் கடல் உள் வாங்கியது.

சூறாவளி காற்று காரணமாக தனுஷ்கோடி அரிச்சல்முனை சாலையை மணல் மூடியது. இன்று அதிகாலை 4 மணிக்கு பெய்யத் தொடங்கிய சாரல் மழை 6 மணி வரை நீடித்தது. தொடர்ந்து மேகமூட்டமாக காணப்படுகிறது.

புயல் எச்சரிக்கையைத் தொடர்ந்து இன்று மீனவர்கள் கடலுக்கு மீன் பிடிக்கச் செல்லவில்லை.

சிவகங்கை:

சிவகங்கை மாவட்டம், தேவகோட்டை தாலுகாவில் உள்ள நடராஜபுரத்தை சேர்ந்தவர் முனியாண்டி. இவரது மகன் மருது (வயது 20). கட்டிடத் தொழிலாளி.

அதே பகுதியில் உள்ள சின்னமாரியம்மன் கோவில் தெருவைச் சேர்ந்தவர் முத்துக்குமார் (26). கட்டிட வேலை செய்து வருகிறார்.

நண்பர்களான இவர்கள் இருவரும் கடந்த 24-ந்தேதி வேலை முடிந்து வீட்டுக்கு திரும்பிக் கொண்டிருந்தனர். நடராஜபுரத்தில் உள்ள மதுக்கடைக்கு சென்று மது குடித்தபோது அவர்களிடையே தகராறு ஏற்பட்டது. இதில் முத்துக் குமார் ஆத்திரம் அடைந்து தன்னிடம் இருந்த கத்தியால் மருதுவை குத்தினார். பின்னர் அங்கிருந்து தப்பிச் சென்றுவிட்டார்.

படுகாயம் அடைந்த மருதுவை சிவகங்கை அரசு ஆஸ்பத்திரியில் சேர்த்தனர். பின்னர் மேல் சிகிச்சைக்காக மதுரை அரசு ஆஸ்பத்திரியில் சேர்க்கப்பட்டார். அங்கு தீவிர சிகிச்சை அளிக்கப்பட்டது. எனினும் சிகிச்சை பலனின்றி மருது பரிதாபமாக இறந்தார்.

இதுகுறித்து மருதுவின் தாயார் அம்மாசெல்வி தேவகோட்டை தாலுகா போலீசில் புகார் செய்தார். இன்ஸ்பெக்டர் முத்துக் குமார், சப்-இன்ஸ்பெக்டர் முகமதுஎசப் ஆகியோர் வழக்குப்பதிவு செய்து தலைமறைவான மருதுவை தேடி வருகிறார்கள்.

சிவகங்கை:

சிவகங்கையில் மாவட்ட மார்க்சிஸ்ட் கம்யூனிஸ்டு அலுவலக திறப்பு விழா நடைபெற்றது. இதில் கலந்து கொண்ட மாநில செயலாளர் ஜி. ராமகிருஷ்ணன் நிருபர்களிடம் கூறியதாவது:-

சிவகங்கை, விருதுநகர், ராமநாதபுரம் ஆகிய 3 மாவட்டங்கள் தொடர்ந்து 4 ஆண்டுகளாக கடுமையான வறட்சியால் பாதிக்கப்பட்டுள்ளது. 5 ஏக்கருக்கு விவசாயிகள் பயிர் இன்சூரன்ஸ் திட்டத்திற்கு பணம் கட்டினால் 2 ஏக்கருக்கு தான் பணம் தரப்படுகிறது. இதில் முறைகேடுகள் நடைபெற்று வருகிறது. எனவே விவசாயிகளுக்குரிய இன்சூரன்ஸ் தொகை வழங்கப்பட வேண்டும்.

மத்திய, மாநில அரசுகள் வறட்சி நிவாரணப் பணியை தொடங்க வேண்டும். தற்போது புதுவித மணல் கொள்ளை சிவகங்கை மாவட்டத்தில் நடைபெற்று வருகிறது. விவசாய நிலத்தில் ரூ. 15 ஆயிரம் கொடுத்து 3 அடிக்கு சவடுமண் எடுப்பதாக கூறுகிறார்கள். ஆனால் 15-ல் இருந்து 20 அடி வரை மணல் தோண்டப்படுகிறது.

இது பிற மாநிலங்களுக்கு விற்கப்படுகிறது. எனவே விவசாயிகள் பாதிக்கப்படுகிறார்கள். இதை தட்டிக்கேட்கும் விவசாயிகள் அடித்து விரட்டப்படுகிறார்கள். இதில் மாநில அரசு மாவட்ட நிர்வாகம் உரிய நடவடிக்கை எடுக்க வேண்டும். இல்லையெனில் விவசாயிகளை ஒன்றுதிரட்டி மிகப்பெரிய போராட்டம் நடத்தப்படும்.

மாநில அரசு புதிதாக 70 இடங்களில் மணல் குவாரிகள் திறப்பதாக அறிவித்துள்ளது. இதை மறுபரீசிலனை செய்ய வேண்டும். செயற்கை மணலை உருவாக்க வேண்டும். அல்லது மணல் இறக்குமதி செய்ய வேண்டும். இதனால் கட்டிடப்பணிகள் பாதிக்கக்கூடாது.

கந்துவட்டி சட்டத்தின் நடவடிக்கையை தீவிரப்படுத்த வேண்டும். ஆர்.கே. நகர் இடைத்தேர்தல் குறித்து வருகிற 30-ந் தேதி காலையில் நடைபெறும் மாநில நிர்வாகக்குழு கூட்டத்தில் முடிவு எடுக்கப்படும். ஆர்.கே. நகர் தேர்தல் நியாயமாக, நேர்மையாக நடத்தப்பட வேண்டும்.

மேற்கண்டவாறு அவர் கூறினார்.

சிவகங்கை:

சிவகங்கை தாலுகாவில் உள்ள புதுப்பட்டியைச் சேர்ந்தவர் ரேவதி. இவர் அந்தப்பகுதியில் உள்ள கடைக்கு நடந்து சென்று கொண்டிருந்தார்.

அப்போது அந்த வழியாக மோட்டார் சைக்கிளில் வந்த 2 வாலிபர்கள் ரேவதியிடம் ஒரு முகவரியை காட்டி இந்த இடத்துக்கு எப்படி செல்ல வேண்டும் என்று கேட்டனர்.

அவர் பதில் சொல்லிக் கொண்டிருந்த போதே அவர்கள் ரேவதி கழுத்தில் கிடந்த 2 பவுன் தங்கச் சங்கிலியை பறித்துக் கொண்டு தப்பிவிட்டனர்.

இது குறித்து சிவகங்கை தாலுகா போலீசில் ரேவதி புகார் செய்தார். இன்ஸ்பெக்டர் மோகன் வழக்குப்பதிவு செய்து நகையை பறித்துச் சென்ற வாலிபர்களை தீவிரமாக தேடி வருகிறார்.

சிவகங்கை:

சிவகங்கை ரெயில் நிலையம் அருகே கடந்த 15 ஆண்டுகளுக்கும் மேலாக சாம்பவிகா உயர் நிலைப்பள்ளி செயல்பட்டு வருகிறது. இதன் தாளாளர் மற்றும் செயலாளராக இருந்து வருபவர் சேகர்.

இந்த பள்ளியில் ஆயிரத்துக்கும் மேற்பட்ட மாணவ, மாணவிகள் பயின்று வருகின்றனர். நேற்று வழக்கம் போல் பள்ளி செயல்பட்டது.

இந்த நிலையில் பகல் 12 மணியளவில் திடீரென பள்ளி வளாகத்திற்குள் மதுரை, காரைக்குடி வருமான வரித்துறை அதிகாரிகள் 5-க்கும் மேற்பட்ட கார்களில் வந்து இறங்கினர்.

அவர்கள் நேராக பள்ளியின் செயலர் அறை, பதிவறை, கணினி அறை ஆகியவற்றுக்கு சென்று அதிரடி சோதனை நடத்தினர். இதனால் பள்ளியில் பரபரப்பு ஏற்பட்டது.

பள்ளியில் தனியாக இருந்த ஓய்வு அறையிலும் வருமான வரித்துறையினர் சோதனை நடத்தினர். சோதனை தொடர்பாக பள்ளியின் நிர்வாகிகளிடமும் கேள்விகள் கேட்டு பதில்களை பதிவு செய்தனர். தொடர்ந்து அங்கிருந்த பல்வேறு ஆவணங்களை சேகரித்தனர். இந்த சோதனை நள்ளிரவு 12 மணி வரை நீடித்தது.

அதன் பிறகு 2 பைகளில் ஆவணங்கள், பென்-டிரைவ்கள் போன்றவற்றை எடுத்துக் கொண்டு அதிகாரிகள் சென்று விட்டனர்.

முன்னதாக அண்ணா மலைநகரில் உள்ள பள்ளியின் செயலர் சேகர் வீட்டிலும் வருமான வரித் துறையினர் சுமார் 2 மணி நேரம் சோதனை நடத்தினர்.