நீங்கள் தேடியது "elephant attack"

பொள்ளாச்சி:

பொள்ளாச்சி ஆழியாறு அணை அருகே நவமலைபதி மலைவாழ் மக்கள் குடியிருப்பு பகுதி உள்ளது. அப்பகுதியை சேர்ந்தவர் ராஜீ என்கிற முருகன் (வயது37). இவர் வனத்துறையில் வேட்டை தடுப்பு காவலராக பணியாற்றி வருகிறார். இவரது மனைவி சித்ரா.

இவர்களின் மகள் ரஞ்சனி (7), அதே பகுதியிலுள்ள அரசு பள்ளியில் 7-ம் வகுப்பு படித்து வந்தார். நேற்று சித்ரா தனது மகளை அழைத்துக் கொண்டு வீட்டிற்கு தேவையான பொருட்களை வாங்குவதற்காக பொள்ளாச்சிக்கு சென்றார். மாலை விரைவில் வீட்டிற்குள் வந்துவிடலாம் என்பதால் மின்விளக்கினை ஒளிரச்செய்யாமல் சென்றுள்ளார்.

தாய்-மகள் இருவரும் இரவு 7.30 மணியளவில் நவ மலைபதிக்கு திரும்பினர்.அங்கிருந்து செல்போனில் டார்ச் விளக்கு அடித்தபடி வீட்டிற்கு சென்றுள்ளனர். அப்போது வீட்டின் முன்பு இருந்த அரிசியினை வனப்பகுதியில் உலா வந்த காட்டு யானை தின்று கொண்டிருந்தது.

இருட்டாக இருந்ததால் யானை நிற்பதை அவர்கள் கவனிக்கவில்லை. திடீரென மின்விளக்கு ஒளியினை பார்த்த காட்டு யானை அவர்களை நோக்கி ஓடிவந்தது. இதனை பார்த்த இருவரும் யானையிடம் இருந்து தப்ப ஓடினர். அப்போது சிறுமி ரஞ்சனியால் ஓட முடியவில்லை.

அவரை காட்டு யானை துதிக்கையால் தூக்கி வீசியுள்ளது. பின்னர் யானை அங்கிருந்து ஓடி புதருக்குள் மறைந்தது. யானை தாக்கியதில் காயமடைந்த சிறுமியை மீட்டு குடியிருப்பு வாசிகள் உதவியுடன் கோட்டூர் அரசு ஆஸ்பத்திரிக்கு அழைத்து சென்றனர்.செல்லும் வழியிலேயே சிறுமி ரஞ்சனி பரிதாபமாக உயிரிழந்தார்.

பின்னர் அவரின் உடல் பிரேத பரிசோதனைக்காக கோட்டூர் அரசு ஆஸ்பத்திரியில் வைக்கப்பட்டது. இது குறித்து வனத்துறை, ஆழியாறு போலீசாருக்கு தகவல் தெரிவிக்கப்பட்டது.வனத்துறை ஊழியர்கள் நவமலைபதி பகுதியில் யானைகள் நடமாட்டம் உள்ளதா? என கண்காணிப்பு பணியில் ஈடுபட்டனர். யானைகள் குடியிருப்பு பகுதிகளுக்குள் நுழையாதவாறு நடவடிக்கைகள் எடுக்கப்படுவதாகவும் தெரிவித்தனர். யானை நடமாட்டம் காரணமாக கிராம மக்கள் பீதியடைந்தனர்.

யானை தாக்கி உயிரிழந்த சிறுமி ரஞ்சனியின் உடல் இன்று காலை பிரேபரிசோதனை செய்யப்படுகிறது. வனத்துறை சார்பில் உடனடி நிவாரணமாக ரூ.50 ஆயிரம் கொடுக்கப்பட்டது. மேலும் ரூ.3.50 லட்சம் அரசு நடைமுறைப்படி விரைவில் ரஞ்சனியின் குடும்பத்தினரிடம் ஒப்படைக்கப்படுவதாக வனத்துறையினர் கூறியுள்ளனர்.

கொழிஞ்சாம்பாறை:

கேரள மாநிலம் பாலக்காடு மாவட்டம் கஞ்சிக்கோடு கண்ணோடு பகுதியை சேர்ந்தவர் மோகனன் (59). இவர் வாளையாறு வனத்துறையில் ஊழியராக வேலை பார்த்து வந்தார்.நேற்று மாலை 5 மணியளவில் கஞ்சிக்கோடு பகுதியில் உள்ள வேலஞ்சேரியில் காட்டு பகுதியில் இருந்து 3 யானைகள் ஊருக்குள் புகுந்தது. இதனை பார்த்த பொதுமக்கள் வாளையாறு போலீசார் மற்றும் வனத்துறையினருக்கு தகவல் கொடுத்தனர். இதனை தொடர்ந்து வன ஊழியர்கள் அங்கு விரைந்து சென்றனர். அவர்களுடன் மோகனனும் சென்று இருந்தார்.

அவர்கள் யானையை விரட்டும் பணியில் ஈடுபட்டு இருந்தனர். அப்போது ஒரு காட்டு யானை திரும்பி வந்து வன ஊழியர் மோகனனை துதிக்கையால் இழுத்து கீழே போட்டு மிதித்தது. இதில் அவர் சம்பவ இடத்திலே பரிதாபமாக இறந்தார்.

யானையை விரட்டும் போது தப்பி ஓடிய மற்ற ஊழியர்களான விஸ்வநாதன், சசி ஆகியோர் கீழே விழுந்து படுகாயம் அடைந்தனர்.

இது குறித்த தகவல் கிடைத்ததும் தலைமை வன அதிகாரி சுரேந்திர நாத் அங்கு விரைந்து சென்றார். வேறு ஊழியர்களை வரவைழத்து யானைகள் காட்டுக்குள் விரட்டப்பட்டது.

யானை தாக்கி உயிர் இழந்த மோகனன் உடல் மீட்கப்பட்டு பாலக்காடு அரசு ஆஸ்பத்திரிக்கு பிரேத பரிசோதனைக்கு அனுப்பி வைக்கப்பட்டது.

யானை தாக்கி பலியான மோகனன் குடும்பத்திற்கு ரூ. 10 லட்சம் நிதி உதவி வழங்கப்படும் எனவும் முதல் கட்டமாக ரூ. 5 லட்சம் இன்று வழங்கப்படும் எனவும் தலைமை வனஅதிகாரி சுரேந்திர நாத் தெரிவித்துள்ளார்.

கோவை:

மதுரை மாவட்டம் மனக்காலகுடியை சேர்ந்தவர் லட்சுமணன் (வயது 40). கூலித் தொழிலாளி. சம்பவத்தன்று இவர் தடாகம் அருகே உள்ள ஆனைகட்டி ரோட்டில் நடந்து சென்றார். அப்போது அந்த வழியாக வந்த யானை லட்சுமணனை தாக்கியது. இதில் படுகாயம் அடைந்து உயிருக்கு போராடிய அவரை அந்த வழியாக சென்றவர்கள் மீட்டு கோவை அரசு ஆஸ்பத்திரியில் சேர்த்தனர். அங்கு சிகிச்சை பலனளிக்காமல் லட்சுமணன் பரிதாபமாக இறந்தார்.

இது குறித்து துடியலூர் போலீசார் வழக்குப்பதிவு செய்து விசாரணை நடத்தி வருகிறார்கள்.

சித்தூர்:

ஆந்திரா, கர்நாடகா, தமிழ்நாடு ஆகிய 3 மாநிலங்கள் சந்திக்கும் இடத்தில் பல கிராமங்கள் உள்ளன. அங்கு, ஆயிரக்கணக்கான மக்கள் வசித்து வருகின்றனர். நேற்று அதிகாலை 4 மணியளவில் தமிழ்நாடு எல்லையையொட்டி, ஆந்திர மாநில பகுதியில் உள்ள நூனேப்பள்ளி கிராமத்தில் காட்டு யானைகள் நுழைந்து அட்டகாசம் செய்தன.

இதுபற்றி ஆந்திரா மற்றும் தமிழ்நாடு வனத்துறை அதிகாரிகளுக்கு கிராம மக்கள் தகவல் தெரிவித்தனர். தகவல் அறிந்ததும், இரு மாநில வனத்துறை அதிகாரிகள், ஊழியர்கள் மற்றும் போலீசார் குழுக்களாக சம்பவ இடத்துக்கு வந்து காட்டு யானைகளை வனப்பகுதிக்குள் விரட்டியடிக்கும் முயற்சியில் ஈடுபட்டனர். ஆனால், காட்டு யானைகள் வனப்பகுதிக்குள் சற்று தூரம் சென்று, அங்குள்ள நீரோடையில் படுத்துக் கொண்டன. அதனை ஏராளமான மக்கள் வேடிக்கை பார்த்தனர்.

அப்போது ஒரு யானை வேகமாக ஓடி வந்து, ஆந்திர மாநில வனத்துறை அதிகாரி மாரப்பா என்பவரை தாக்கியது. அதில் அவர், படுகாயம் அடைந்தார். அவரை, சக ஊழியர்கள் மீட்டு சிகிச்சைக்காக அங்குள்ள ஆரம்ப சுகாதார நிலையத்துக்குக் கொண்டு சென்றனர். அங்கு, சிகிச்சை பலனின்றி மாரப்பா பரிதாபமாக இறந்தார்.

இதுபற்றி நூனேப்பள்ளி கிராம மக்கள் கூறுகையில், தமிழ்நாடு மற்றும் ஆந்திரா, கர்நாடகா ஆகிய 3 மாநில எல்லையோரம் வனப்பகுதியில் பல கிராமங்கள் உள்ளன. அங்கு, ஆயிரக்கணக்கான மக்கள் வசித்து வருகின்றனர். கர்நாடகத்தில் இருந்து வரும் காட்டு யானைகள் நூனேப்பள்ளி கிராமத்தில் நுழைந்து அட்டகாசம் செய்து வருகின்றன. விளை நிலங்களுக்குள் புகுந்து பயிர்களை நாசம் செய்து வருகின்றன. காட்டு யானைகளால் விவசாயிகள், கிராம மக்கள் அவதிப்பட்டு வருகின்றனர். காட்டு யானைகள் ஊருக்குள் வராமல் தடுக்க வனத்துறை அதிகாரிகள் நடவடிக்கை எடுக்க வேண்டும், எனக் கோரிக்கை விடுத்தனர். #Elephant

வடவள்ளி:

கோவை ஆலாந்துறை அருகே உள்ள முள்ளங்காடு ஆதிவாசி கிராமத்தை சேர்ந்தவர் கிட்டி (75). சித்த வைத்தியர். நேற்று இவர் மூலிகை பறிக்க வெள்ளியங்கிரி மலைக்கு செல்வதாக வீட்டில் உள்ளவர்களிடம் கூறி விட்டு சென்றார்.

ஆனால் இரவு நேரமாகியும் கிட்டி வீடு திரும்பவில்லை. இதனால் அதிர்ச்சி அடைந்த உறவினர்கள் அவரை தேடி வெள்ளியங்கிரி மலை பகுதிக்கு சென்றனர்.

இன்று காலை முள்ளங்காடு ஊர் தலைவர் ரமேஷ் அத்தி மரக்குட்டை ஜல்லி மேடு பகுதியில் கிட்டியை தேடி சென்றார். அப்போது அங்கு கிட்டி பிணமாக கிடந்தார். அவரது குடல் வெளியே தள்ளியபடி இருந்தது.

கிட்டியை யானை மிதித்து கொன்றது தெரிய வந்தது. இது குறித்து போளூவாம் பட்டி வனத்துறையினருக்கும் ஆலாந்துறை போலீசாருக்கும் தகவல் தெரிவிக்கப்பட்டது.

வனத்துறையினர் மற்றும் போலீசார் அங்கு விரைந்து வந்தனர். வருவாய் ஆய்வாளர் குபேந்திரன், கிராம நிர்வாக அலுவலர் சரவணன் ஆகியோரும் வந்து விசாரணை நடத்தினார்கள்.

யானை தாக்கி பலியான கிட்டியின் உடலை போலீசார் மீட்டு பிரேத பரிசோதனைக்காக கோவை அரசு ஆஸ்பத்திரிக்கு அனுப்பி வைத்தனர்.

இது குறித்து போலீசார் விசாரணை நடத்தி வருகிறார்கள் இப்பகுதியில் கடந்த 4 வருடத்தில் 7 பேர் யானை தாக்கி இறந்து உள்ளனர். இதனால் ஆதிவாசி மக்கள் பீதியில் உள்ளனர்.

குடியாத்தம்:

குடியாத்தம் தரணம்பேட்டையை சேர்ந்தவர் குத்துஷ் (வயது 56). இவருக்கு சொந்தமாக 5 ஏக்கர் நிலம் தனகொண்ட பள்ளியில் உள்ளது. அந்த 5 ஏக்கரில் வாழை பயிரிடபட்டு வாழைகள் குலைதள்ளி அறுவடைக்கு தயாராக இருந்தது.

இந்நிலையில் ஆந்திர வனபகுதியில் இருந்து 8 பெரிய யானை 3 குட்டியானை உள்பட 11 காட்டு யானைகள் இன்று அதிகாலை 2,30 மணிக்கு அவரது தோட்டத்தில் புகுந்தது. அங்கு 1 மணி நேரம் துவம்சம் செய்த யானைகள் வாழை தோட்டத்தினை நாசப்படுத்தியது.

இதில் வாழை மரங்கள் சாய்ந்தது. சத்தம் கேட்டு அங்கு வந்த விவசாயி குத்துஷ் யானைகளை கண்டு மிரண்டு போனார்.

இது குறித்து குடியாத்தம் வன அலுவலர்களுக்கு தகவல் தெரிவித்தார். வன அலுவலர் மகேந்திரன், வனவர் ரவி, காப்பாளர் பூபதி, வெங்கடேசன் ஆகியோர் சம்பவ இடத்திற்கு சென்று பட்டாசுகள் வெடித்து யானைகளை அங்கிருந்து விரட்டினர்.

அந்த யானைகள் ஆம்பூரான்பட்டி, தீர்த்தமலை பகுதிக்கு சென்றது. செல்லும் வழியில் உள்ள மரங்களையெல்லாம் துவம்சம் செய்தது. தற்போது யானைகள் தீர்த்த மலையில் முகாமிட்டு உள்ளது. இந்த யானைகளை ஆந்திர வனபகுதிக்கு விரட்ட வனத்துறையினர் நடவடிக்கை எடுத்து வருகின்றனர்.

வடவள்ளி:

கோவை தொண்டாமுத்தூர் அருகே உள்ள விராலியூரை சேர்ந்தவர் ரமேஷ் (35). பால் வியாபாரி. நேற்று இரவு பால் எடுக்க தொண்டாமுத்தூரில் இருந்து விராலியூருக்கு மோட்டார் சைக்கிளில் சென்று கொண்டிருந்தார். அப்போது விராலியூர் அருகே வரும் போது சாலையின் எதிர்புறம் திடீரென வந்த ஒற்றை காட்டு யானை சுரேஷை தாக்கி தூக்கி வீசியது. இதில் அவர் படுகாயம் அடைந்தார்.

அந்த பகுதியில் யானையை விரட்டும் பணியில் இருந்த வனத்துறையினர் சத்தம் கேட்டு அங்கு சென்று பார்த்த போது ரமேஷ் மயங்கிய நிலையில் இருந்துள்ளார். உடனே வனத்துறையினர் 108 ஆம்புலன்ஸ் மூலம் ரமேசை மீட்டு கோவை அரசு மருத்துவ கல்லூரி ஆஸ்பத் திரிக்கு அழைத்து சென்றனர். வழியிலேயே ரமேஷ் பரிதாபமாக இறந்தார்.

இதுகுறித்து ஆலாந்துறை போலீசார் வழக்குப்பதிவு செய்து விசாரணை நடத்தி வருகின்றனர். ரமேசின் மோட்டார் சைக்கிளையும் யானை மிதித்து சேதப்படுத்தி உள்ளது. உயிர் பலி வாங்கிய யானை தொடர்ந்து நரசீபுரம் விராலியூர் பகுதியில் முகாமிட்டு இருக்கிறது.

விளைநிலங்களில் பயிர்களை நாசம் செய்து வரும் அந்த யானை தற்போது உயிர் பலி வாங்கி உள்ளது. எனவே கும்கி யானையை கொண்டு உடனடியாக ஒற்றை காட்டு யானையை காட்டுக்குள் துரத்த வேண்டும் என பொதுமக்கள் கோரிக்கை வைத்து உள்ளனர்.