நீங்கள் தேடியது "சைபர் கிரைம்"

சென்னை:

சீனாவை சேர்ந்த கடன் செயலியால் வெளி மாநிலங்களில் பலர் தற்கொலை செய்து கொண்டனர். இதனால் உஷாரான குஜராத் மற்றும் ஒடிசா மாநில போலீசார் நடவடிக்கை எடுத்து மோசடி கும்பலை கைது செய்து உள்ளனர்.

இந்த கடன் செயலிகளுக்கு மூளையாக செயல்பட்டு மேற்பார்வையிட்டு வந்த விருதுநகர் வாலிபரை ஒடிசா போலீசார் கைது செய்து அழைத்துச் சென்று உள்ளனர். சீன நிறுவனத்தில் இயக்குனராக பணியாற்றி வந்த சித்ரவேல் என்பவர் கைது செய்யப்பட்டு ஒடிசாவுக்கு அழைத்துச் செல்லப்பட்டுள்ள நிலையில் சைபர் கிரைம் போலீசார் பொதுமக்கள் உஷாராக இருக்க அறிவுறுத்தியுள்ளனர்.

சீனா மட்டுமின்றி பல்வேறு நாடுகளில் இருந்தும் கடன் செயலிகள் செயல்பட்டு வருகிறது. இதுபோன்ற செயலிகளில் சென்று எளிதாக கடன் வாங்கிக் கொள்ளலாம் என்று எண்ணும் பொதுமக்கள் வங்கியில் இருக்கும் தங்களது பணத்தை இழந்து தவித்து வருகிறார்கள்.

எப்போதுமே இதுபோன்ற அறிமுகம் இல்லாத செயலிகள் மற்றும் நபர்களிடம் கடன் வாங்க வேண்டும் என்று நினைக்கக் கூடாது. உரிய ஆவணங்களை காட்டினால் கடன் கொடுப்பதற்கு அங்கீகாரம் பெற்ற வங்கிகள் வரிசை கட்டி நிற்கின்றன. அது போன்ற வங்கிகளில் கடன் வாங்கி கொள்வதே சிறந்ததாகும்.

தற்போது அனைவரது கைகளிலுமே செல்போன்கள் தவழ்வதால் அறிமுகம் இல்லாத பலர் தொடர்பு கொண்டு பேசுவார்கள்.

அதுபோன்ற நபர்களிடம் எதுவும் பேசாமல் தொடர்பை துண்டித்து விட வேண்டும். இல்லையென்றால் அவர்கள் வீசும் வலையில் நிச்சயம் நீங்கள் சிக்கிக் கொள்வீர்கள்.

எனவே எப்போதுமே ஆன்லைன் தொடர்புகளில் வரும் அறிமுகம் இல்லாத நபர்களிடம் உஷாராக இருப்பதே நல்லது.

இவ்வாறு சைபர் கிரைம் போலீசார் தெரிவித்து உள்ளனர்.

மதுரை

மதுரை மாவட்டத்தில் கடந்த 2021-ம் ஆண்டு தொடங்கப்பட்ட சைபர் கிரைம் போலீஸ் நிலையம் கூடுதல் போலீஸ் சூப்பி ரண்டு மேற்பார்வையில் செயல்பட்டு வருகிறது. இங்கு மதுரை மாவட்டத்தில் பல்வேறு போலீஸ் நிலையங்களில் பதிவான செல்போன்கள் திருட்டு தொடர்பான புகார்கள் விசாரிக்கப்பட்டு வந்தன.

மாவட்ட போலீஸ் சூப்பி ரண்டு சிவபிரசாத் உத்தர வின்பேரில் மாவட்டத்தில் திருட்டுப்போன செல்போன் கள் குறித்து தீவிர விசா ரணை நடத்தப்பட்டது. இதன் மூலம் கடந்த 2 மாதங்களில் திருட்டுப்போன ரூ.13 லட்சத்து 81 ஆயிரத்து 750 மதிப்புள்ள செல்போன் கள் கண்டுபிடிக்கப்பட்டு உரியவர்களிடம் ஒப்படைக்கப்பட்டது.

மாவட்ட போலீஸ் சூப்பி ரண்டு சிவபிரசாத் துரித நடவடிக்கையால் இதுவரை ரூ.1 கோடியே 58 லட்சத்து 42 ஆயிரம் மதிப்புள்ள 1107 செல்போன்கள் கைப்பற்றப் பட்டு உரியவர்களிடம் ஒப்படைக்கப்பட்டது. மேலும் வங்கி மோசடி தொடர்பான புகாரில் துரித நடவடிக்கை எடுக்கப்பட்டு கடந்த 2 மாதத்தில் 2 லட்சத்து 82 ஆயிரத்து 406 ரூபாய் வாடிக்கையாளர் வங்கி கணக்கில் திரும்ப செலுத்தப்பட்டுள்ளது. இது வரை ரூ.44 லட்சத்து 28 ஆயிரத்து 805 உரியவர்க ளுடைய வங்கி கணக்கில் திரும்ப கிடைக்குமாறு நட வடிக்கை எடுக்கப்பட்டு உள்ளது.

வங்கியில் இருந்து பேசுவ தாக கூறி ஏமாற்றும் நபர்க ளிடம் விழிப்புணர்வோடு இருக்கவும், வங்கி கணக்கு எண், சிவிவி மற்றும் ஓடிபி போன்ற விபரங்களை முன் பின் தெரியாதவர்களிடம் கொடுத்து ஏமாற வேண்டாம் என்றும், பணம் இரட்டிப்பு வாக்குறுதி அளிக்கும் மொபைல் ஆப்களை நம்பி யும், ஆன்லைன் வேலை வாய்ப்பு வாக்குறுதியை நம்பியும், முன்பணம் கொடுத்து ஏமாற வேண்டாம் என்றும் பல்வேறு வகையில் பணம் இழக்க நேர்ந்தால் சைபர் கிரைம் எண் 1930 என்ற இலவச அழைப்பு எண்ணிற்கும், https://www.cybercrime.gov.in என்ற இணையதள முகவரியிலும் 24 மணி நேரமும் புகார். அளிக்கலாம் என்று மாவட்ட போலீஸ் சூப்பி ரண்டு சிவபிரசாத் தெரி வித்துள்ளார்.

சென்னை:

தமிழ்நாடு 'சைபர் கிரைம்' பிரிவு கூடுதல் டி.ஜி.பி. சஞ்சய்குமார் வெளியிட்டுள்ள செய்திக்குறிப்பில் கூறி இருப்பதாவது:-

தமிழக போலீஸ்துறையின் 'சைபர் கிரைம்' பிரிவு அவ்வப்போது பொதுமக்களுக்கு புதிய 'ஆன்லைன்' மோசடிகள் குறித்து எச்சரிக்கை விடுத்து வருகிறது. தற்போது இணைய வழி மோசடி நபர்கள் 'இந்தியா போஸ்ட் பேமண்ட்' வங்கியின் வாடிக்கையாளர்களை குறி வைத்து பண மோசடி செய்வதற்காக குறுஞ்செய்தி (எஸ்.எம்.எஸ்.) அனுப்புகின்றனர்.

அந்த குறுஞ்செய்தியில், உங்கள் 'இந்தியா போஸ்ட் பேமண்ட்' வங்கியின் கணக்கு முடக்கப்பட்டு உள்ளது. எனவே குறுஞ்செய்தியில் உள்ள 'லிங்க்'கை கிளிக் செய்து, உங்கள் பான் கார்டு எண்ணை பதிவு செய்யுங்கள் என்று கூறுகின்றனர்.

இதனை உண்மை என்று நம்பி அந்த லிங்க்கை பொதுமக்கள் திறந்தவுடன், 'இந்தியா போஸ்ட் பேமண்ட்' வங்கியின் இணையதளம் போலவே போலியான இணையதளம் தோன்றும். அதில் வாடிக்கையாளர் தங்களது வங்கி சேமிப்பு கணக்கு எண், வாடிக்கையாளர் அடையாள எண், செல்போன் எண், பிறந்த தேதி, பான் மற்றும் ஆதார் எண் ஆகியவற்றை உள்ளீடு செய்ய கேட்கும்.

அந்த தகவல்களை அந்த இணையதளத்தில் பதிவு செய்த பின்னர் ஓ.டி.பி.யை பதிவு செய்ய கேட்கும். அதில் ஓ.டி.பி. எண்ணை பதிவு செய்தவுடன் வாடிக்கையாளரின் 'இந்தியா போஸ்ட் பேமண்ட்' வங்கி கணக்கில் இருந்து மோசடி நபரின் வங்கி கணக்கிற்கு பண பரிவர்த்தனை மேற்கொள்ளப்பட்டு வாடிக்கையாளர் ஏமாற்றப்படுகின்றனர்.

எனவே அறிமுகம் இல்லாத நபர்களிடம் தொலைபேசி, குறுஞ்செய்தி, மின்னஞ்சல், பிஷிங் இணையதளம், வாட்ஸ்அப், டெலிகிராம் மற்றும் இதர சமூக ஊடகங்களை கையாளுதல்கள் மூலமாக வருகிற 'லிங்க்'குகளை தொடர்பு கொள்ள வேண்டாம். ஓ.டி.பி.யையும் பகிர வேண்டாம்.

இவ்வாறு அவர் கூறியுள்ளார்.

கிருஷ்ணகிரி:

கிருஷ்ணகிரி மாவட்டம் ஓசூர் அம்மன் நகர் 6-வது தெருவைச் சேர்ந்தவர் ராஜேந்திரன். இவரது மகன் கலையரசன் (வயது29). இவர் ஓசூர் தனியார் நிறுவனத்தில் வேலை பார்த்து வருகிறார். இவரது செல்போனில் வாஸ் அப்பில் ஒரு மெசேஜ் வந்தது. அதில் பகுதி நேர வேலையில் சிறிய முதலீடு செய்தால், அதிக சம்பளமும், அதிக கமிஷன் தொகையும் தருவதாக தெரிவிக்கப்பட்டு இருந்தது. அதனை நம்பிய கலையரசன் அந்த எண்ணை தொடர்பு கொண்டு விவரத்தை கேட்டபோது, எதிர் முனையில் பேசிய மர்ம நபர்கள் குறிப்பிட்ட தொகையை முதலில் செலுத்த வேண்டும் என்று கூறியுள்ளனர். உடனே அவர்கள் கூறிய வங்கி கணக்கில் கலையரசன் ரூ.13 லட்சத்து 50 ஆயிரத்தை செலுத்தியுள்ளார். அதன் பிறகு அந்த எண்ணை தொடர்பு கொண்டபோது மர்ம நபர்கள் போனை எடுக்கவில்லை. தொடர்ந்து அவர் செல்போனில் தொடர்பு கொள்ள முயன்றபோது மர்ம நபரின் செல்போனை சுவிட்ச் ஆப் செய்துவிட்டனர். இதுகுறித்து கலையரசன் கிருஷ்ணகிரி மாவட்ட சைபர் கிரைம் போலீசாரிடம் புகார் தெரிவித்தார். புகாரின்பேரில் போலீசார் வழக்கு பதிவு செய்து விசாரணை நடத்தி வருகின்றனர்.

இதேபோன்று ஓசூர் பத்தலபள்ளி கிராமத்தைச் சேர்ந்தவர் சென்னையன். இவரது மகன் நவநீதகிருஷ்ணன் (39). இவர் பெங்களூருவில் தனியார் நிறுவனத்தில் வேலை பார்த்து வருகிறார். இவரது செல்போனுக்கு கடந்த சில நாட்களுக்கும் முன்பு அதிக சம்பளத்தில் பகுதி நேர வேலை தருவதாக ஒரு மெசேஜ் வந்துள்ளது. அதனை நம்பிய அவர் அந்த எண்ணை தொடர்பு கொண்டு பேசியபோது, மர்ம நபர் கூறிய வங்கி கணக்கில் ரூ.6 லட்சத்து 32 ஆயிரத்தை செலுத்தியுள்ளார். அதன்பிறகு அவர் அந்த மர்ம நபரின் செல்போன் எண்ணை தொடர்பு கொண்டபோது சுவிட்ச் ஆப் என்று வந்தது. இதுகுறித்து அவர் மாவட்ட சைபர் கிரைம் போலீசாரிடம் புகார் தெரிவித்தார். போலீசார் வழக்குபதிவு செய்து விசாரணை நடத்தி வருகின்றனர்.

கிருஷ்ணகிரி மாவட்டத்தில் தொடர்ந்து படித்த இளைஞர்களை குறிவைத்து இதேபோன்று ஆன்லைன் மூலம் பணமோசடியில் ஈடுபடும் மர்ம கும்பலை விரைந்து பிடிக்க நடவடிக்கை எடுக்க வேண்டும் என்றும், மேலும், ஆன்லைன் மூலம் மோசடி நடைபெறுவதை தவிர்க்க இளைஞர்களுக்கு செல்போன் மூலம், ஒலி பெருக்கி மூலம் அதிகளவில் விழிப்புணர்வு ஏற்படுத்த வேண்டும் என்று சமூக ஆர்வலர்கள் கோரிக்கை விடுத்துள்ளனர்.

ராணிப்பேட்டை:

ராணிப்பேட்டை மாவட்ட போலீஸ் சூப்பிரண்டு கிரண்ஸ்ருதி வழிகாட்டுதல் படி , இணைய வழி குற்றப்பிரிவு கூடுதல் போலீஸ் சூப்பிரண்டு குமார் மேற்பார்வையில் ராணிப்பேட்டை நகராட்சி அலுவலகத்தில் சைபர் கிரைம் குறித்த விழிப்புணர்வு நிகழ்ச்சி நடைபெற்றது.

நிகழ்ச்சியில் இன்ஸ்பெக்டர் ராஜாகுமார் தலைமை தாங்கினார். சப் இன்ஸ்பெக்டர் தியாகராஜன் முன்னிலை வகித்தார்.

இதில் நிதி நிறுவன மோசடி,போலி சமூக ஊடக கணக்குகள் மோசடி,போலி கடன் செயலி ஆகியவை குறித்தும் ,சைபர் கிரைம் உதவி எண் 1930 பயன்படுத்துவது குறித்தும் விளக்கம் அளிக்கப்பட்டது.

மேலும் இந்த நிகழ்ச்சியில் நகராட்சி ஆணையாளர்(பொறுப்பு) ருத்ரகோட்டி உள்பட பலர் கலந்து கொண்டனர். விழிப்புணர்வு வாசகங்கள் அடங்கிய துண்டு பிரசுரங்கள் வழங்கப்பட்டன.

சென்னை:

தமிழகத்தில் போலி சிம்கார்டுகள் மற்றும் மோசடியை தடுக்க சைபர் கிரைம் போலீசார் தீவிர கண்காணிப்பில் ஈடுபட்டு வருகின்றனர்.

தமிழகத்தில் சைபர் கிரைம் போலீசார் தொலைத்தொடர்பு துறையின் முக அடையாளம் காணும் சாப்ட்வேர் மூலம் ஆய்வு செய்தனர்.

இதில் கடந்த ஏப்ரல் மாதம் மட்டும் 55,982 சிம்கார்டுகளை முடக்கியுள்ளனர்.

ஒருவர் 403 சிம்கார்டுகளை வாங்கியுள்ளார். ஒரு பெண்ணுக்கு 34 கார்டுகள் உள்ளது. ஒரு சிறுவன் 5 கார்டுகள் வாங்கியது அம்பலமாகியுள்ளது. இந்த சிம் கார்டுகள் அனைத்தும் வியாபாரிகள் மூலம் விற்பனை செய்யப்பட்டது தெரியவந்தது.

இதை தொடர்ந்து தமிழகம் முழுவதும் 1100 சிம்கார்டு வியாபாரிகளை சைபர் கிரைம் போலீசார் கண்காணித்து வருகின்றனர்.

போலி சிம்கார்டுகளை வியாபாரிகள் எதற்காக விற்பனை செய்தனர் என்பது குறித்து சைபர் கிரைம் போலீசார் ஆய்வு செய்து வருகின்றனர்.

இதுகுறித்து சைபர் கிரைம் ஏ.டி.ஜி.பி சஞ்சய் குமார் கூறியதாவது:-

பல சிம்கார்டுகளை வாங்கியவர்களின் அடையாளம் இன்னும் கண்டுபிடிக்கப்படவில்லை அவர்களை விரைவில் கண்டுபிடித்து விடுவோம்.

யாருடைய சிம்கார்டுகள் முடக்கப்பட்டதோ அவர்கள் அவற்றைத் திரும்பப் பெறுவதற்கு அதிகாரிகளிடம் தொடர்புடைய ஆவணங்களை சமர்ப்பித்து உண்மைத்தன்மையை நிரூபிக்க வாய்ப்பு வழங்கப்படும்.

போலி சிம்கார்டுகள் வாங்கியவர்களின் விவரங்களை ஆராய்ந்து வருகிறோம். அவர்கள் கிரிமினல் அல்லது பயங்கரவாத நடவடிக்கைகளில் ஈடுபட்டதாக கண்டறிந்தால், அவர்களைக் கண்காணிக்க அந்தந்த போலீஸ் பிரிவுகளை எச்சரிப்போம்."

சைபர் கிரைம் போலீசார் விழிப்புணர்வை ஏற்படுத்த பல முயற்சிகளை எடுத்துள்ளது. ஹெல்ப்லைன் 1930 அல்லது நேஷனல் சைபர் கிரைம் ரிப்போர்டிங் போர்டல் (என்.சி.ஆர்.பி) மூலம் சந்தேக நபர்களின் வங்கி கணக்குகள் விரைவாக முடக்கப்பட்டு, மக்கள் கஷ்டப்பட்டு சம்பாதித்த பணத்தை இழக்க விடாமல் தடுப்போம்.

2022-ம் ஆண்டில், போலி மோசடி அழைப்பு மூலம் பொதுமக்கள் ரூ.288 கோடியை இழந்துள்ளனர், அதில் ரூ.106 கோடி முடக்கப்பட்டுள்ளது, 2023-ம் ஆண்டில் முதல் 3 மாதங்களில், ரூ.67 கோடி பொதுமக்களிடமிருந்து போலி மோசடி கும்பல் அபேஸ் செய்துள்ளனர். அதில் ரூ.49 கோடி முடக்கப்பட்டுள்ளது.

1930 ஹெல்ப்லைன் 24 மணிநேரமும் வேலை செய்கிறது. சராசரியாக ஒரு நாளில் 600 அழைப்புகள் வருகிறது. இதில் 250 புகார் பதிவு செய்யப்படுகிறது.

பெரும்பாலான மோசடிகள் தகவல்களை திருடும் புதிய மென்பொருள் மூலம் நடந்துள்ளது.

இதுபோன்ற குற்றங்களில் தொடர்புடைய செல்போன் எண்கள் தொடர்ந்து செயல்படுவதால் சந்தேக நபர்கள் மக்களை எளிதில் ஏமாற்றி வருகின்றனர்.

1930 ஹெல்ப்லைனை விரிவுபடுத்த மாநில அரசு ரூ.9.28 கோடி அனுமதித்துள்ளது. பணியாளர்களின் எண்ணிக்கை 8-ல் இருந்து 30 ஆக உயர்த்தப்பட உள்ளது.

இவ்வாறு அவர் கூறினார்.

சென்னை :

சமூக வலைத்தளங்களில் பகிரப்படும் பதிவுகளில் அவதூறு தகவல்கள், சட்டவிரோத கருத்துகள், பதிவுகளை 'சைபர் கிரைம்' போலீசார் கண்காணித்து அவற்றை முடக்குவதற்கான நடவடிக்கைகளை எடுத்து வருகின்றனர்.

அந்த வகையில் கடந்த ஜனவரி மாதம் 1-ந் தேதி முதல் கடந்த 3-ந் தேதி வரையில் 'பேஸ்புக்', 'இன்ஸ்ட்ராகிராம்', 'டுவிட்டர்', 'யூடியூப்' போன்ற சமூக வலைத்தளங்களில் இருந்து 40 சட்டவிரோத பதிவு கள், கருத்துகள் 'சைபர் கிரைம்' போலீசார் நடவடிக்கை மூலம் நீக்கப்பட்டுள்ளது.

இந்த நிலையில் சமூக வலைத்தளங்களில் முக்கிய பிரமுகர்கள் பற்றி 386 அவதூறு 'வீடியோ' பதிவுகள் இருப்பதை 'சைபர் கிரைம்' போலீசார் கண்டறிந்துள்ளனர். இந்த 'வீடியோ' பதிவுகளை முடக்க வேண்டும் என்று 'யூடியூப்' நிறுவனத்துக்கு 'சைபர் கிரைம்' போலீசார் கோரிக்கை விடுத்து கடிதம் அனுப்பி உள்ளனர்.

தற்போது 'ஸ்மார்ட்' செல்போன்களில் கடன் செயலிகள் ஆதிக்கம் அதிகரித்து வருகிறது. இந்த செயலி மூலம் கடன் வாங்கி கூடுதல் வட்டியை கட்ட முடியாமல் பலர் பரிதவிக்கும் நிலை ஏற்படுகிறது. எனவே 'சைபர் கிரைம்' போலீசார் நடவடிக்கையால் 221 சட்டவிரோத கடன் செயலிகள் கூகுள் பிளே ஸ்டோரில் இருந்து நீக்கப்பட்டு உள்ளன.

ரிசர்வ் வங்கி அனுமதி இல்லாமல் மேலும் 61 கடன் செயலிகள் சட்டவிரோதமாக இயங்கி வருவதை 'சைபர் கிரைம்' போலீசார் கண்டறிந்து உள்ளனர். அந்த செயலிகளையும் முடக்குவதற்கான நடவடிக்கையை மேற்கொண்டு உள்ளனர். தமிழ்நாடு சைபர் கிரைம் பிரிவு கூடுதல் டி.ஜி.பி. சஞ்சய்குமார், போலீஸ் சூப்பிரண்டுகள் தேவரானி, ஸ்டாலின், அசோக்குமார் ஆகிய அதிகாரிகள் இதற்கான நடவடிக்கைகளை எடுத்து வருகின்றனர்.

சென்னை :

தொழில்நுட்ப வளர்ச்சிக்கு ஏற்ப சைபர் குற்றங்கள் அதிகரித்து வருகின்றன. பழைய மோசடி செயல்களுக்கு முற்றுப்புள்ளி வைப்பதற்குள் புதிய மோசடிகள் முளைத்து விடுகின்றன. இந்த மோசடிக்கு மூலதனமே செல்போன் எண்கள் தான். சைபர் மோசடி கும்பல் பல்வேறு செல்போன் எண்கள் மூலம் ஆசைவார்த்தைகளை அள்ளி விடுவது, லிங்குடன் கூடிய குறுந்தகவல் அனுப்புவது என்று அப்பாவி மக்களை மோசடி வலையில் சிக்க வைக்கின்றன.

எனவே இதுபோன்ற 'சைபர் கிரைம்' மோசடி வழக்குகளில் சிக்கும் செல்போன் எண்களை முடக்குவதற்கு மத்திய உள்துறை அமைச்சகம் சார்பில் இந்திய சைபர் கிரைம் ஒருங்கிணைப்பு மைய இணையதளம் உருவாக்கப்பட்டது. இதன் மூலம் சைபர் கிரைம் குற்றவாளிகளின் செல்போன் எண்களை இந்த இணையதளத்தில் 'சைபர் கிரைம்' போலீசார் பதிவேற்றம் செய்யலாம்.

இந்த செல்போன் எண்கள் ஆய்வுக்கு பின்னர் முடக்கப்பட்டு வருகின்றன.

இந்த இணையதளத்தில் தமிழ்நாடு 'சைபர் கிரைம்' போலீஸ் கூடுதல் டி.ஜி.பி. சஞ்சய்குமார், போலீஸ் சூப்பிரண்டுகள் தேவராணி, அசோக்குமார், ஸ்டாலின் ஆகியோரின் முயற்சியால் தமிழ்நாட்டில் நடைபெற்ற சைபர் கிரைம் குற்றங்களில் தொடர்புடைய 20 ஆயிரத்து 197 செல்போன் எண்களை முடக்க வேண்டும் என்று பரிந்துரைக்கப்பட்டது. இதில் 19 ஆயிரத்து 654 செல்போன் எண்கள் முடக்கப்பட்டுள்ளது.

இந்தியாவிலேயே தமிழக 'சைபர் கிரைம்' போலீசார் அதிகமான செல்போன் எண்களை இந்த இணையதளத்தில் முடக்குவதற்கு பதிவேற்றம் செய்துள்ளனர்.

திருவனந்தபுரம்:

கேரள மாநிலம் கொச்சியை சேர்ந்த டாக்டரின் மருத்துவமனைக்கு சம்பவத்தன்று ஒரு பெண் சிகிச்சைக்கு வந்துள்ளார். அவர் டாக்டரிடம் மருந்து-மாத்திரைகள் வாங்கி விட்டு சென்றுவிட்டார்.

அதன்பிறகு சில நாட்கள் கழித்து அந்தப் பெண், டாக்டருக்கு போன் செய்து தனது உடல் நலம் மோசமாக உள்ளதாகவும், வீட்டிற்கு வந்து பார்க்குமாறும் கூறி உள்ளார். இதனை நம்பிய டாக்டர், அந்தப் பெண்ணின் வீட்டிற்கு சென்றார்.

அவர் சிகிச்சை அளித்து விட்டு திரும்பிவிட்டார். இந்நிலையில் அந்தப் பெண், மீண்டும் டாக்டரை வரவழைத்துள்ளார். அப்போது தன்னுடன் டாக்டர் இருப்பது போன்ற படங்களை காட்டி மிரட்டி உள்ளார்.

இதனை பார்த்து டாக்டர் அதிர்ச்சி அடைந்தார். அந்த பெண் படங்களை வெளியிடாமல் இருக்க வேண்டும் என்றால் பணம் தரவேண்டும் என்று கூறி உள்ளார். அப்போது அங்கு பெண்ணுக்கு ஆதரவாக ஒருவர் வந்துள்ளார். அவரும் டாக்டரிடம் பணம் கேட்டு மிரட்டி உள்ளார். அவர்கள் 2 பேரும் சேர்ந்து ஜி.பே. மூலம் டாக்டரிடம் இருந்து ரூ.45 ஆயிரத்தை பறித்துள்ளனர். மேலும் அவரது கார் சாவியையும் பறித்து வைத்துக்கொண்டனர்.

இந்நிலையில் சில நாட்களுக்கு பிறகு அந்த 2 பேரும், டாக்டருக்கு போன் செய்து மேலும் ரூ.5 லட்சம் கேட்டு மிரட்டி உள்ளனர். இதனால் அதிர்ச்சிக்குள்ளான டாக்டர், இது பற்றி போலீசில் புகார் செய்தார். அதில், தன்னை சிகிச்சைக்காக வீட்டுக்கு வரவழைத்த பெண், தான் சிகிச்சை அளித்த போது, அதனை ஆட்டோ டிரைவர் முகமது அமீன் என்பவர் மூலம் படம் பிடித்து பின்னர் பணம் கேட்டு மிரட்டுவதாக குறிப்பிட்டு இருந்தார்.

இதுகுறித்து போலீசார் விசாரணை நடத்தி கூடலூரை சேர்ந்த நசீமா மற்றும் அவரது நண்பர் முகமது அமீன் ஆகியோரை கைது செய்தனர். இது தொடர்பாக போலீசார் கூறுகையில், பணம் பறித்தவர்கள் போனில் உள்ள வீடியோ மற்றும் போட்டோக்கள் சைபர் கிரைம் போலீசார் மூலம் ஆய்வு செய்யப்படும் என்றனர்.

திருப்பதி:

நாடு முழுவதும் 16 கோடியே 80 லட்சம் பேரின் செல்போன் எண்கள், இ-மெயில் ஐடி, முகவரி, அவர்களின் வங்கிக்கணக்கு விவரங்கள் உட்பட எல்லா தகவல்களையும் திருடி, சைபர் கிரைம் மோசடியில் கும்பல் ஈடுபடுவதாக தெலுங்கானா போலீசாருக்கு தெரியவந்தது.

இதையடுத்து, டேட்டா திருட்டு மற்றும் டேட்டா விற்பனை ஆகியவை தொடர்பாக, ஐதராபாத்தில் உள்ள சைபராபாத் பகுதி குற்றத்தடுப்பு போலீசார் வழக்குப் பதிவு செய்து, 7 பேர் கும்பலை கைது செய்தனர்.

அவர்கள் 7 பேரும், டேட்டா மார்க் இண்டஸ்ட்ரி, குளோபல் டேட்டா இன்டக்சன், எம்எஸ் டிஜிட்டல் க்ரோ ஆகிய பெயர்களில் 3 நிறுவனங்களை உருவாக்கி, அவற்றின் மூலமாக ராணுவ அதிகாரிகளின் தனிப்பட்ட விவரங்கள், பொதுமக்களின் செல்போன் எண்கள், பொதுமக்களின் பான் கார்டு விவரங்கள், அரசு ஊழியர்களின் விவரங்கள், பொதுமக்களின் டிமேட் கணக்கு விவரங்கள், வங்கிகளின் டெபிட் கார்டு, கிரெடிட் கார்டு விவரங்கள் உட்பட பல விவரங்களை திருடி, சைபர் கிரைம் மோசடியில் ஈடுபடுபவர்களுக்கு விற்பனை செய்தது கண்டுபிடிக்கப்பட்டது.

மேலும், தாங்கள் திருடிய பல நபர்களின் தனிப்பட்ட தகவல்களை 140 வகையாக பிரித்து, யாருக்கு எது தேவை என்று பட்டியலிட்டு, இந்த கும்பல் விற்பனை செய்ததும் தெரியவந்துள்ளது.

இந்த மோசடியில் ஈடுபட்ட 7 பேரிடமிருந்தும் ஆதார் கார்டுகள், 13 செல்போன்கள் 3 லேப்டாப்கள் மற்றும் திருடப்பட்ட டேட்டா ஆவணங்கள் உட்பட பல பொருட்களை போலீசார் கைப்பற்றியுள்ளனர்.

இந்த மோசடி தொடர்பாக, உத்தரப்பிரதேசத்தைச் சேர்ந்த குமார் நித்திஷ் பூஷன் மற்றும் பூஜா பால், சுஷில் தோமோர், அத்துல் பிரதாப் சிங், முஸ்கான் ஹசன், சந்தீப் பால், ஜியாவுக் ரஹ்மான் ஆகிய 7 பேர் கைது செய்யப்பட்டுள்ளனர்.

இதுகுறித்து சைபராபாத் போலீஸ் ஆணையர் ஸ்டீபன் ரவீந்திரா கூறியதாவது :-

தனி நபரின் விவரங்கள் மட்டுமல்லாது, நாட்டின் பாதுகாப்புக்கே கேடு விளைவிக்கும் வகையில் இந்திய ராணுவத்தில் பணியாற்றும் 2½ லட்சம் பேரின் முழு விவரங்களையும் சைபர் கிரைம் குற்றவாளிகள் திருடி உள்ளனர்.

காப்பீடு மற்றும் வங்கி கடனுக்காக விண்ணப்பித்த 4½ கோடி பேரின் தனிநபர் விவரங்களும் இதில் அடங்கும். பல கோடி பேரின் சமூக வலைதள ஐடி, பாஸ்போர்ட், ஆதார், பான் எண் விவரங்களும் திருடப்பட்டுள்ளன. ஒரு அரசு வங்கியில் கடனுக்காக விண்ணப்பித்தவர்களின் விவரமும் சைபர் முழு கிரைம் குற்றவாளிகளின் கைகளுக்கு போயுள்ளது. அந்த வங்கியில் பணியாற்றும் ஒரு சிலரும் இதற்கு உறுதுணையாக இருந்துள்ளனர்.

டெல்லியில் பணியாற்றும் 35 ஆயிரம் அரசு ஊழியர்களின் தனிநபர் விவரங்களையும் விற்பனை செய்ய தயாராக இருந்துள்ளனர்.

நாம் தேவையில்லாமல் நமது முழு விவரங்களையும் யாருக்கும் கொடுக்கக் கூடாது.

இது தொடர்பாக டெல்லி, மும்பை நகரங்களைச்சேர்ந்த கைதான கும்பலிடம் தொடர்ந்து விசாரணை நடத்தி வருகிறோம்.

இவ்வாறு அவர் தெரிவித்தார்.

நாகர்கோவில்:

கொல்லங்கோடு அருகே உள்ள சூழால் குடயால் விளை பகுதியைச் சேர்ந்தவர் பாதிரியார் பெனடிக்ட் ஆன்றோ (வயது 29).

இளம்பெண்ணுக்கு வாட்ஸ் அப்பில் சாட்டிங் மூலம் பாலியல் தொல்லை கொடுத்ததாக பாதிரியார் பெனடிக்ட் ஆன்றோ கைது செய்யப்பட்டார். கைது செய்யப்பட்ட பெனடிக்ட் ஆன்றோ நாகர்கோவில் ஜெயிலில் அடைக்கப்பட்டுள்ளார்.

பாதிரியார் தெரிவித்த வாக்குமூலம் மற்றும் அவரிடம் இருந்து கைப்பற்றப்பட்ட லேப்-டாப் செல்போனில் உள்ள தகவல்களை வைத்து இந்த வழக்கில் குற்றப்பத்திரிகை தாக்கல் செய்ய நடவடிக்கை எடுக்கப்பட்டு வருகிறது. 2 வார காலத்திற்குள் குற்றப்பத்திரிகை தாக்கல் செய்யப்படும் என்று மாவட்ட போலீஸ் சூப்பிரண்டு ஹரிகிரண் பிரசாத் தெரிவித்துள்ளார்.

இதற்கிடையில் பாதிரியாரின் ஆபாச படங்கள் மற்றும் வீடியோக்களை பரப்பியவர் மீது நடவடிக்கை எடுக்க போலீசார் முடிவு செய்துள்ளனர். இதையடுத்து பாதிரியாரின் ஆபாச படங்கள் மற்றும் ஆபாச சாட்டிங் சம்பவம் குறித்து சமூக வலைதளங்களில் பரப்பியவர்கள் யார் என்பது குறித்த விவரங்களை சேகரித்து வருகிறார்கள்.

ஏற்கனவே பாதிரியாரின் செல்போனை எடுத்து சென்றதாக வாலிபர் கைது செய்யப்பட்டுள்ள நிலையில் மேலும் ஒருவர் தலைமறைவாக இருந்து வருகிறார். அவரை பிடிக்கவும் நடவடிக்கை எடுக்கப்பட்டு வருகிறது. அவரை கைது செய்தால்தான் பாதிரியாரின் மேலும் ஒரு செல்போன் மீட்கப்படும். அந்த செல்போனில் ஏதாவது வழக்கு தொடர்பான ஆதாரங்கள் உள்ளதா என்பது குறித்து போலீசார் விசாரணை நடத்த முடிவு செய்துள்ள னர்.

இந்நிலையில் போலீசார் வெளியிட்டுள்ள செய்தி குறிப்பில் கூறியிருப்பதாவது:-

குமரி மாவட்டத்தில் சமீபத்தில் பதிவு செய்யப்பட்ட பாலியல் துன்புறுத்தல் வழக்கு தொடர்பாக பாதிரியார் பெனடிக்ட் ஆன்றோ கைது செய்யப்பட்டு நீதிமன்ற காவலுக்கு அனுப்பப்பட்டுள்ளார். இந்த வழக்கு தொடர்பாக சமூக வலைதளங்களில் பல்வேறு தவறான தகவல்களை பரப்பி வருவதாக காவல்துறை கவனத்திற்கு வந்துள்ளது.

இந்த வழக்கு தொடர்பாக ஆவணங்கள் ஆதாரங்கள் இருந்தால் சம்பந்தப்பட்ட நபர்கள் 84389 81930 என்ற எண்ணை தொடர்பு கொண்டு தகவல் தெரிவிக்கலாம். வழக்கை திசை திருப்பும் வகையில் சமூக வலைதளங்களில் தவறான தகவல்களை பரப்ப வேண்டாம்.

இவ்வாறு அதில் கூறப் பட்டுள்ளது.

சென்னை:

ஸ்மார்ட்போன் பயன்படுத்துபவர்களிடம் ஆன்லைன் மூலம் மோசடி செய்து பணம் பறிக்கும் கும்பல் அதிகரித்து வருகிறது.

இதுதொடர்பாக போலீசார் தொடர்ந்து எச்சரிக்கை விடுத்து விழிப்புணர்வை ஏற்படுத்தி வருகிறார்கள்.

இந்நிலையில் பகுதி நேர வேலை தருவதாக கூறி யூடியூப் லிங்கை கிளிக் செய்ய வைத்து ஒரு கும்பல் புதுவித ஆன்லைன் மோசடியில் ஈடுபட்டு லட்சக்கணக்கில் பணத்தை பறித்து வருகிறது.

இதுதொடர்பாக சென்னை சைபர் குற்றப் பிரிவு போலீசார் கூறியதாவது:

தற்போது ஆன்லைன் மூலம் புதிய வகை மோசடி நடந்து வருகிறது. பகுதி நேர வேலை தருவதாக வாட்ஸ் அப்பில் குறுந்தகவல் அனுப்புவார்கள். என்ன வேலை என்று ரிப்ளை செய்தால் 'யூடியூப் வீடியோவை லைக் செய்வது' என்று பதில் அளிப்பார்கள்.

அதன்படி அவர்களின் யூடியூப் வீடியோவை லைக் செய்தால் ரூ.50 முதல் ரூ.500 வரை உடனடியாக பணம் வரும். பின்னர் அவர்கள் நம்மை டெலிகிராம் குரூப்பில் இணைத்து விடுவார்கள். அதில் பகுதி நேர வேலை, முதலீடு என்று 2 வாய்ப்பு தருவார்கள். பகுதி நேர வேலையை தேர்வு செய்தால் ஒரு வேலையை கொடுப்பார்கள். அதற்கு மிக குறைந்த அளவு பணம் கட்ட வேண்டும். அதில் பல படிநிலைகள் இருக்கும்.

முதல் 2 படிநிலைகள் எளிதாக இருக்கும். அதை செய்து முடித்தவுடன் முதலீடு செய்த பணம் போக 30 முதல் 60 சதவீதம் பணம் நமக்கு கமிஷனாக கிடைக்கும்.

இப்படி ரூ.13 ஆயிரம் வரை பணத்தை திரும்ப நமக்கு தருவார்கள். அதற்கு அடுத்த படிநிலையில் முதலீடு செய்யும் தொகை ரூ.5 ஆயிரம், ரூ.10 ஆயிரம் என படிப்படியாக ரூ.5 லட்சம் வரை உயர்ந்து கொண்டே செல்லும்.

நாம் அவர்கள் கொடுக்கும் பணியை முடித்துவிட்டால் நமக்கு கமிஷன் தொகை கிடைக்கும் என்று நினைத்திருப்போம். அதாவது நாம் ரூ.10 லட்சம் கட்டி இருந்தால் கமிஷன் தொகை 50 சதவீதத்தையும் சேர்த்து ரூ.15 லட்சம் நமக்கு கிடைக்க இருப்பதாக டிஸ்பிளேயில் காட்டும்.

அதனால் ஆர்வத்துடன் ரூ.10 லட்சத்தை செலுத்தினால் அதன்பிறகு பணத்தை எடுக்க முடியாது. உங்கள் கணக்கு முடங்கிவிட்டது. பணத்தை எடுக்க வேண்டும் என்றால் உங்களுக்கு வர வேண்டிய ரூ.15 லட்சத்துக்கு 20 சதவீதம் வருமான வரி செலுத்த வேண்டும். அதை செலுத்தினால் முழு பணமும் கிடைத்துவிடும் என்பார்கள்.

இல்லாவிட்டால் நீங்கள் செய்த பணி தவறாகிவிட்டது. எனவே நீங்கள் இருக்கும் குழுவில் உள்ளவர்களுக்கு உங்கள் பணம் பகிர்ந்து அளிக்கப்பட்டுவிட்டது என்று கூறுவார்கள். இப்படி ஒவ்வொரு காரணமாக கூறி உங்களிடம் வெவ்வேறு வழிகளில் பணத்தை பறித்துக் கொண்டே இருப்பார்கள். அதன்பிறகு எந்த பணமும் நமக்கு வராது.

நமக்கு கொடுக்கப்பட்ட வாய்ப்பில் பகுதி நேர வேலை என்பதற்கு பதிலாக முதலீடு என்று தேர்வு செய்தால் நமது சேமிப்பு பணம் முழுவதையும் முதலீடு செய்ய வைத்து அதிக வட்டி தருவதாக கூறி நமது பணத்தை மோசடி செய்து விடுவார்கள்.

எனவே, இதுபோன்ற ஆன்லைன் மோசடியில் பொது மக்கள் எப்போதும் கவனமாக இருக்க வேண்டும். அதையும் மீறி நீங்கள் ஏமாற்றப்பட்டால் உடனடியாக 1930 என்ற கட்டணமில்லா தொலைபேசி எண்ணில் புகார் தெரிவிக்கலாம். www.cybercrime.gov.in என்ற இணையதள முகவரியிலும் புகார் அளிக்கலாம்.

இவ்வாறு அவர்கள் கூறினார்கள்.