தேர்தல் செய்திகள்

சாத்தான்குளம்:

தூத்துக்குடி பாராளுமன்ற தொகுதியில் அ.தி.மு.க. கூட்டணி சார்பில் பா.ஜனதா வேட்பாளர் தமிழிசை சவுந்தரராஜனை ஆதரித்து முதலமைச்சர் எடப்பாடி பழனிசாமி நேற்று 2-வது நாளாக கோவில்பட்டி, கயத்தாறு, செய்துங்கநல்லூர், ஸ்ரீவை குண்டம், ஆழ்வார்திருநகரி, நாசரேத், சாத்தான்குளம் ஆகிய பகுதிகளில் பிரசாரம் செய்தார். அப்போது அவர் கூறியதாவது:-

தி.மு.க. தலைவர் மு.க.ஸ்டாலின் ஆட்சிக்கு வர முடியவில்லை என்பதால் ஏதேதோ சொல்லி வருகிறார். அவர் பெண்களுக்கு பாதுகாப்பு இல்லை என்று சொல்லி இருக்கிறார். அ.தி.மு.க. ஆட்சியில் தமிழகத்தில் சட்டம்-ஒழுங்கு பாதுகாக்கப்பட்டு வருகிறது. அதற்காக விருது வழங்கப்பட்டு உள்ளது. தமிழகத்தில் சட்டம் நல்ல முறையில் பேணி பாதுகாக்கப்படுகிறது. சாதிச் சண்டை, மதச்சண்டை என எந்த சண்டையும் கிடையாது. அதனை வரவும் விட மாட்டோம். வந்தாலும் இரும்பு கரம் கொண்டு அடக்குவோம்.

ஜெயலலிதா மறைந்தவுடன் கட்சி உடைந்து விடும். ஆட்சி கவிழ்ந்து விடும் என்று மு.க.ஸ்டாலின் நினைத்தார். அது நடக்காததால், பித்து பிடித்தவர் போல் என்ன பேசுவது என்று தெரியாமல் பேசிக் கொண்டு இருக்கிறார்.

இப்படிப்பட்ட தலைவர்கள் வந்தால் எதிர்காலத்தில் நாடு என்ன ஆகும். ஒரு எதிர்க்கட்சியாக இருக்கும் போதே, முதலமைச்சர் மீது பொய் குற்றச்சாட்டு கூறுகிறார்கள் என்றால் ஆட்சிக்கு வந்தால் என்ன செய்வார்கள். அவர்களின் அராஜகத்துக்கு அரசு முடிவு கட்டும்.

தமிழகத்தில் ஜெயலலிதா அறிவித்த அனைத்து திட்டங்களையும் செயல்படுத்தி வருகிறோம். ஆனால் மு.க.ஸ்டாலின் எந்த திட்டமும் செய்யவில்லை என்று பொய்யாக பேசி வருகிறார். பொய் பேசுவதற்கு நோபல் பரிசு கொடுக்க வேண்டும் என்றால் மு.க.ஸ்டாலினுக்குத்தான் கொடுக்க வேண்டும்.

ஜெயலலிதா மறைந்தாலும் அவர் மக்களுக்கு கொடுத்த வாக்குறுதிகளை அ.தி.மு.க. அரசு நிறைவேற்றி வருகிறது. ஆனால் தி.மு.க.வினர் சொன்னதை இதுவரை நிறைவேற்றியது இல்லை. நிலமற்ற விவசாயிகளுக்கு 2 ஏக்கர் நிலம் கொடுப்போம் என்று சொன்னார்கள். எந்த விவசாயிக்கு கொடுத்து இருக்கிறார்கள்.

தி.மு.க.வினர் வேண்டும் என்றே திட்டமிட்டு பொய்களை சொல்லி தேர்தல் வாக்குறுதிகளை கொடுத்து மக்களை ஏமாற்றி வாக்கு சேகரிக்கிறார்கள். ஆனால் அ.தி.மு.க. கொடுத்த வாக்குறுதிகள் அனைத்தையும் நிறைவேற்றி உள்ளது. இந்தியாவிலேயே மக்களுக்கு தடையில்லா மின்சாரம் வழங்கும் மாநிலம் தமிழ்நாடு தான். பேரூராட்சி பகுதிகளில் வசிக்கும் வீடு இல்லா ஏழைகளுக்கு அடுக்குமாடி காங்கிரீட் வீடு கட்டி கொடுக்க அரசு நடவடிக்கை எடுத்து உள்ளது. 14 லட்சம் குடும்பங்களுக்கு வீடுகள் கட்டி கொடுக்க திட்டமிடப்பட்டு உள்ளது.

அ.தி.மு.க. ஆட்சியில் சிறுபான்மை மக்களுக்கு முழு பாதுகாப்பு கொடுக்கப்பட்டு வருகிறது. நீர் மேலாண்மைக்காக 4 ஓய்வு பெற்ற தலைமை பொறியாளர்கள் அடங்கிய குழு அமைத்து தமிழகம் முழுவதும் ஆய்வு செய்து வருகின்றனர். அதன் மூலம் நீர் மேலாண்மை திட்டங்கள் செயல்படுத்தப்பட உள்ளன.

இவ்வாறு அவர் கூறினார். #EdappadiPalanisamy #ADMK #MKStalin

திருச்சி:

திருச்சியில் மதசார்பற்ற முற்போக்கு கூட்டணி சார்பில் நடைபெற்ற தேர்தல் பிரசார கூட்டத்தில் தமிழக காங்கிரஸ் கமிட்டி தலைவர் கே.எஸ்.அழகிரி பேசியதாவது:-

தேர்தல் ஆணையம் என்பது நாட்டிற்கு தேவையான சுதந்திரமான அமைப்பு. அமெரிக்காவில் இல்லாத சுதந்திரம் இந்திய தேர்தல் ஆணையத்திற்கு உள்ளது. படிப்பறிவு இல்லாத சமூகத்தில் தேர்தலை நடத்தி மக்கள் பிரதிநிதிகளை தேர்ந்தெடுக்கும் ஜனநாயக மாண்பு இந்திய தேர்தல் ஆணையத்திற்கு உள்ளது. ஆனால் சென்ற முறையும், இந்த முறையும் தேர்தல் ஆணையம் கடுமையான தோல்வியை சந்தித்துள்ளது.

தேர்தலுக்கு முன் விவசாயிகள், வியாபாரிகள், ஏ.டி.எம்.களுக்கு எடுத்து செல்லும் பணம், பெண்கள் அணிந்து செல்லும் நகைகளை கைப்பற்றுவார்கள். ஆனால் தேர்தலுக்கு முதல் நாள், மறுநாள் கண்டுகொள்ள மாட்டார்கள்.


தமிழகத்தில் துரைமுருகன் வீட்டில் மட்டுமே சோதனை நடக்கிறது. முதல்வர் எடப்பாடி பழனிசாமி, துணை முதல்வர் ஓ.பன்னீர் செல்வம், சுகாதாரதுறை அமைச்சர் விஜயபாஸ்கர் வீட்டில் சோதனை நடத்தினீர்களா? அவர்களின் வீடுகளில் எவ்வளவு பணம் உள்ளது என்பது நாட்டிற்கே தெரியும்.

ஆனால் அங்கெல்லாம் சோதனை நடத்தாமல் துரைமுருகன் வீட்டில் சோதனை நடத்துவது, உங்களின் புகழையும் பெருமையையும் கெடுப்பது. அவரை தோல்வி அடைய செய்வதற்கான அனைத்து முயற்சிகளையும் தேர்தல் ஆணையம், வருமான வரித்துறை செய்கிறது. இது நியாயமாகாது.

தேர்தல் ஆணையம் என்பது தன்னாட்சி அமைப்பு. யாருக்கும் கட்டுப்பட வேண்டிய அவசியம் இல்லை. தமிழ்நாடு காங்கிரஸ் கமிட்டி தலைவர் என்ற முறையில் இந்திய தேர்தல் ஆணையத்தை எச்சரிக்கை செய்கிறேன்.‌ இதுபோன்ற ஒரு சார்பான நிலையை எடுத்தால் வருங்காலத்தில் இதற்கான பலனை அனுபவித்தே தீர வேண்டியது இருக்கும்.

அதிகாரம் என்பது சுற்றக்கூடியது. அது மோடி, எடப்பாடி கையில் மட்டும் இருந்து விடாது. அது எங்கள் கைகளுக்கும் நிச்சயம் வரும். எனவே அதிகாரிகள் கவனமாக நடந்து கொள்ள வேண்டும்.

காங்கிரஸ் ஆட்சிக்கு வந்ததும் ஆண்டிற்கு ரூ.72 ஆயிரம் வழங்கும் திட்டம் கொண்டு வரப்பட உள்ளது. மாதத்துக்கு ரூ.6 ஆயிரம் கொடுத்தால் ஏழைகள் வேலை செய்ய மாட்டார்கள் என்று பா.ஜ.க. கூறுகிறது. இது பிற்போக்கான மனநிலை. தேவையானவர்களுக்கு இலவசத்தை வழங்கியே தீர வேண்டும். அதைத்தான் காங்கிரஸ் கட்சி பேசுகிறது.

இவ்வாறு அவர் கூறினார். #LokSabhaElections2019 #KSAlagiri #EC

கோவை:

தமிழகத்தில் பாராளுமன்ற தேர்தல் மற்றும் 18 சட்டமன்ற தொகுதிகளுக்கான இடைத்தேர்தல் வருகின்ற ஏப்ரல் 18ம் தேதி நடைபெற உள்ளது. தேர்தல் பணிகளில் அரசியல் கட்சிகள் தீவிரமாக ஈடுபட்டுள்ளன.

இந்நிலையில் திமுக தலைவர் மு.க.ஸ்டாலின் இன்று கோவையில்  உள்ள தொண்டாமுத்தூர் பகுதியில் வேனில் இருந்து பிரசாரத்தில் ஈடுபட்டு,  மக்களவை தொகுதி  திமுக வேட்பாளர் சண்முக சுந்தரத்தினை ஆதரித்து  பேசியதாவது:

இந்த கோவையைச் சேர்ந்தவர் தான் உள்ளாட்சி துறை அமைச்சர் எஸ்.பி. வேலுமணி. உள்ளாட்சி துறை என்றாலே என்ன என்பது தெரியாதவராவார். நானும் உள்ளாட்சி துறை அமைச்சராக இருந்துள்ளேன். மக்களை வழிநடத்தியுள்ளேன். ஆனால், இந்த துறையில் பல அக்கிரமங்களை வேலுமணி செய்திருக்கிறார்.


திமுக ஆட்சிக்கு வந்தவுடன் வேலுமணி மேலே ஊழல் வழக்கு போடப்படும். ஊழலை விட மிகப்பெரிய துரோகம்,  பொள்ளாச்சி பாலியல் வன்கொடுமை. குற்றவாளிகளை காப்பாற்றும் வகையிலே வேலுமணி மற்றும் அவரது கட்சி அமைச்சர்கள் வேலை செய்கின்றனர். கொடூரமாக பெண்களை சித்திரவதை செய்த பாவிகளை காப்பாற்றுகின்றனர். நிச்சயம் நமது கழக ஆட்சியிலே பொள்ளாச்சி பாலியல் வன்கொடுமை குறித்து சிபிஐ விரைவாக விசாரிக்கும்.

ஆனால், தலைவர் கலைஞர் ஆட்சியிலே,  பெண்களுக்கு வேலைவாய்ப்பில் சம உரிமை, சொத்துகளில் சம பங்கு, விதவைகள் மறு வாழ்வு திட்டம், மகளிர் சுய உதவி குழு திட்டம் என பல திட்டங்களை  கொண்டு வந்து பெண்களின் தரத்தினை உயர்த்தினார்.  உங்கள் வாக்குகளை நம் கழகத்தின் வேட்பாளராக இங்கு நிற்கும் சண்முக சுந்தரத்திற்கு, உதய சூரியன் சின்னத்தில் வாக்களியுங்கள்.

இவ்வாறு அவர் பேசினார்.  #MKStalin #DMK #LoksabhaElections2019

ஓட்டப்பிடாரம்:

தூத்துக்குடி மாவட்டம் பசுவந்தனையில் கனிமொழிக்கு ஆதரவாக உதயநிதி ஸ்டாலின் பிரசாரம் செய்தார். அப்போது அவர் பேசியதாவது:-

மோடி ஆட்சி என்பது மோசடியான ஆட்சியாக இருந்தது. ஒவ்வொரு வங்கி கணக்கிலும் ரூ.15 லட்சம் போடுவேன் என்று சொன்னார். ஆனால் போட்டாரா? அது மாதிரி கருப்பு பணத்தை ஒழிப்பேன் என கூறினார். ஒழித்தாரா? நம்ம பணத்தை கார்ப்பரேட் மூலம் வெளிநாட்டுக்கு அனுப்பி வைத்துவிட்டார்.

இப்போது தேர்தல் வந்ததையொட்டி தமிழகத்திற்கு மூன்று முறை மோடி வந்துள்ளார். தமிழ்நாட்டில் கஜாபுயல் உள்ளிட்ட எவ்வளவோ பிரச்சனையில் வரவில்லை. தூத்துக்குடியில் மக்களே நடத்திய போராட்டத்தை ஒடுக்கவேண்டும் என்று 13 பேரை சுட்டுக்கொன்றார்கள். மறந்து விடுவோமா? இப்படிப்பட்ட ஆட்சி தேவையா? சுட்டுக்கொன்ற போது இரங்கல் அறிக்கை கூட தெரிவிக்கவில்லை. நீங்கள் ஏப்ரல் 18-ந்தேதி உதய சூரியனுக்கு வாக்கு அளித்தால் மோடி மட்டும் அல்ல. மோடியின் அடிமை ஆட்சிக்கும் முடிவு கட்டப்படும்.

ஒரு படத்துக்கு கதாநாயகன், வில்லன் இருப்பர். நம்முடைய தேர்தல் அறிக்கை கதாநாயகன். மோடி வில்லன். தமிழிசை கடலில் தாமரை மலரும் என கூறினார். கடலில் தாமரை மலராது. அழுகிப்போய்விடும். கடலில் தாமரை மலராது. உதயசூரியன் உதிக்கும்.

அ.தி.மு.க. ஆட்சியில் பெண்களுக்கு பாதுகாப்பு கிடையாது. பொள்ளாச்சி சம்பவத்தில் 200-க்கும் மேற்பட்ட பெண்கள் பாதிக்கப்பட்டு உள்ளனர். தூத்துக்குடி பாராளுமன்ற தேர்தலில் கனிமொழி வெற்றி பெற்றார் என்றால் மோடி வீட்டுக்கு போய்விடுவார். அதே போல் விளாத்திகுளம் இடைத்தேர்தலில் ஜெயக்குமாருக்கு ஓட்டு போட்டால் இ.பி.எஸ். வீட்டுக்கு போய்விடுவார்.

இவ்வாறு உதயநிதி ஸ்டாலின் பேசினார். #LoksabhaElections2019 #UdhayanidhiStalin #BJP

கொல்கத்தா:

மேற்கு வங்க மாநிலத்தில் இந்த முறை அதிக தொகுதிகளில் வெற்றி பெறும் முனைப்புடன் பாஜக தீவிர களப்பணியாற்றி வருகிறது. கட்சி நிர்வாகிகள் வீதி வீதியாகச் சென்று மக்களை சந்தித்து வாக்கு கேட்டு வருகின்றனர். பாஜக வேட்பாளர்களை ஆதரித்து பிரதமர் மோடி நேற்று சிலிகுரியில் பிரசாரம் மேற்கொண்டார்.

இந்நிலையில், சிலிகுரியில் உள்ள பாஜக பூத் அலுவலகத்தில் சுமார் 42 வயது மதிக்கத்தக்க நபர் தூக்கில் சடலமாக தொங்கினார். இதுபற்றி இன்று அதிகாலை அந்த பகுதி காவல் நிலையத்திற்கு தகவல் தெரிவிக்கப்பட்டது. போலீசார் சம்பவ இடத்திற்கு வந்து, தூக்கில் தொங்கிய சடலத்தை கீழே இறக்கி பிரேத பரிசோதனைக்கு அனுப்பி வைத்தனர்.

பூத் அலுவலகத்தில் இறந்தவர் யார்? அவர் தற்கொலை செய்தாரா அல்லது கொலை செய்யப்பட்டாரா? என பல்வேறு கோணங்களில் போலீசார் விசாரணை நடத்தி வருகின்றனர். #LokSabhaElections2019 #BJPBoothOffice #Siliguri

கோபி:

திருப்பூர் பாராளுமன்ற தொகுதி அ.தி.மு.க. வேட்பாளராக எம்.எஸ்.எம். ஆனந்தன் போட்டியிடுகிறார். அவரை ஆதரித்து கோபி ஒன்றியம் பொலவக்காளிபாளையம், பெரியார் நகர், இந்திரா நகர், கடுக்காம்பாளையம் பகுதிகளில் தமிழக பள்ளிக்கல்வித்துறை அமைச்சர் கே.ஏ.செங்கோட்டையன் நேற்று தீவிர பிரசாரம் செய்தார். அவருடன் வேட்பாளர் எம்.எஸ்.எம்.ஆனந்தன், அந்தியூர் தொகுதி எம்.எல்.ஏ. ராஜா என்கிற ராஜாகிருஷ்ணன் ஆகியோரும் இருந்தனர்.


அதை கவனிக்காத அமைச்சர் கே.ஏ.செங்கோட்டையன், குழந்தைக்கு ஜெயலலிதா என்று பெயர் சூட்டுகிறேன் என்று அறிவித்தார். அதைக்கேட்டு குழந்தையின் பெற்றோர் அதிர்ச்சி அடைந்து, எங்கள் குழந்தை பெண் குழந்தை அல்ல, ஆண் குழந்தை என்று கூறினார்கள். அருகில் இருந்தவர்களும் அமைச்சரிடம் விவரத்தை கூற, உடனடியாக சமாளித்துக்கொண்ட அமைச்சர், பிரசார வேனை நிறுத்திவிட்டு வாகனத்தில் இருந்து கீழே இறங்கி வந்தார். அவருடன் வேட்பாளர் மற்றும் எம்.எல்.ஏ. ஆகியோரும் வந்தனர். அமைச்சர் குழந்தையை கையில் வாங்கி, ராமச்சந்திரன் என்று மீண்டும் பெயர் சூட்டினார்.

ஆண் குழந்தைக்கு ஜெயலலிதா என்று அமைச்சர் பெயர் சூட்டியதும், பின்னர் ராமச்சந்திரன் என்று பெயர் சூட்டி குழந்தையை வாழ்த்தியதும் ருசிகரமான சம்பவமாக அமைந்தது. #LokSabhaElections2019 #MinisterSengottaiyan

தர்மபுரி:

பாராளுமன்ற தேர்தலில் தமிழகத்தில் இதுவரை இல்லாத அளவுக்கு பணப்பட்டுவாடா நடப்பதாக உளவுத்துறை கண்டுபிடித்து தகவல் கொடுத்துள்ளது.

இதையடுத்து தமிழகம், புதுச்சேரியில் உள்ள 40 தொகுதிகளிலும் நடந்த தீவிரமான வாகன சோதனையில் ரூ.250 கோடிக்கு பணம், நகைகள் பறிமுதல் செய்யப்பட்டுள்ளது.

வாக்காளர்களுக்கு கொண்டு செல்லப்படும் பணம் பற்றிய தகவல்களை சிலர் தேர்தல் அதிகாரிகளுக்கு ரகசியமாக சொல்லி விடுகிறார்கள். அதன்பேரில் அதிகாரிகள் அதிரடி சோதனை நடத்தி பணத்தை பறிமுதல் செய்கிறார்கள்.

காட்பாடி, பெரம்பலூரில் அப்படித்தான் சோதனை நடத்தி ரூ.13 கோடி பறிமுதல் செய்யப்பட்டது.

அதே பாணியில் திருவண்ணாமலையில் இருந்து அரூர் சென்ற பஸ்சில் ரூ.3½ கோடி பணத்தை பறக்கும் படை அதிகாரிகள் கைப்பற்றி இருக்கிறார்கள். இது பற்றிய விபரம் வருமாறு:-

திருவண்ணாமலையில் இருந்து அரூர் நோக்கி நேற்று பிற்பகல் அரசு பஸ் ஒன்று சென்று கொண்டிருந்தது. அந்த பஸ்சில் வாக்காளர்களுக்கு வினியோகிக்க கோடிக்கணக்கில் பணம் கடத்தப்படுவதாக அதிகாரிகளுக்கு ரகசிய தகவல் கிடைத்தது.

இதையடுத்து தேர்தல் பறக்கும் படை அதிகாரிகள் அந்த பஸ்சை தர்மபுரி மாவட்டம் அரூரை அடுத்த நரிப்பள்ளி அருகே உள்ள பையர் நாயக்கன் பட்டியில் வழிமறித்து நிறுத்தி சோதனை செய்தனர்.


அந்த பைகளில் இருந்த பணம் முழுவதையும் அதிகாரிகள் எண்ணி பார்த்தனர். அதில் ரூ.3 கோடியே 47 லட்சத்து 51 ஆயிரத்து 110 இருந்தது. அந்த பணம் அரூர் சட்டமன்ற தேர்தல் அதிகாரி புண்ணிய கோடி மூலம் கருவூலத்தில் ஒப்படைக்கப்பட்டது.

பஸ்சை ஓட்டி வந்த டிரைவர் அரூரை அடுத்த பையர்நாயக்கன அள்ளி கிராமத்தை சேர்ந்த பன்னீர் (45) மற்றும் கண்டக்டர் அரூரை அடுத்த வேடகட்டமடுவு அருகே உள்ள கட்டரசம் பட்டியை சேர்ந்த ராமு (37) ஆகியோரிடம் பறக்கும் படை அதிகாரிகள் விசாரணை செய்தனர்.

அந்த பண கட்டுகள் அருகே அமர்ந்து பயணம் செய்த திருவண்ணாமலை மாவட்டம் கீழ் பென்னாத்தூர் அருகே உள்ள சோமாசிபாடி கிராமத்தை சேர்ந்தவரும், திருவண்ணாமலை அரசு போக்குவரத்து கழக டெப்போவில் கண்டக்டராக பணியாற்றுபவருமான செல்வராஜ் என்பவர் அந்த பார்சல்களை கொண்டு வந்ததாகவும், அவை டிக்கெட் பண்டல் என்று அவர் கூறியதாகவும், அதற்கு அவர் லக்கேஜ் வாங்கவில்லை என்றும் கண்டக்டர் ராமு கூறினார்.

செல்வராஜை அழைத்து அதிகாரிகள் விசாரணை நடத்தினார்கள். ஆனால் தனக்கும் இந்த பணத்திற்கும் சம்பந்தம் இல்லை என்று அவர் கூறினார். ஆனால் அதிகாரிகள் அவரை விடவில்லை. அவரை அழைத்து சென்று கீழ்பென்னாத்தூர் அருகே உள்ள அவரது வீட்டில் சோதனை நடத்தினார்கள்.

நள்ளிரவு வரை அவரது வீட்டில் சோதனை நடந்தது. இதில் பணம் மற்றும் ஆவணங்கள் ஏதேனும் சிக்கியதா என்று தெரியவில்லை.

இதற்கிடையே பஸ்சில் வந்த பணக்கட்டுகள் அடங்கிய 7 பைகளில் ஒரு பையில் ஒரு கட்சியின் கரை உள்ள மப்ளரும், திருவண்ணாமலை மாவட்டம், வேட்ட வலத்தை சேர்ந்த அரசு போக்குவரத்து கழக டிரைவர் ரமேஷ் என்பவரின் பாங்கி பாஸ் புத்தகமும் இருந்தது. அந்த பாஸ் புத்தகத்தில் இருந்த செல் நம்பர் மூலம் ரமேசை வருமானவரித்துறை அதிகாரிகள் தொடர்பு கொண்டு பேசி அவரை அதிகாரிகள் வரவழைத்தனர்.

வேட்டவலத்தில் உள்ள அவரது வீட்டிலும் நள்ளிரவு வரை வருமான வரித்துறை அதிகாரிகள் சோதனை நடத்தினார்கள். அவரது வீட்டில் பணம் மற்றும் ஆவணங்கள் எதுவும் சிக்கவில்லை.

தனது பையும் பாங்கி பாஸ் புத்தகமும் 2 வாரங்களுக்கு முன்பு காணாமல் போய் விட்டதாக அவர் கூறினார். தனக்கும் பஸ்சில் வந்த பணத்துக்கும் எந்த சம்பந்தமும் இல்லை என்றும் கூறினார்.

அவரிடம் இன்று அதிகாலை வரை விசாரணை நடத்தி விட்டு அவரை விடு வித்து விட்டனர். வருமான வரித்துறை விசாரணைக்கு அழைக்கும்போது நேரில் வர வேண்டும் என்று கூறி சென்று விட்டனர்.

கண்டக்டர் செல்வராஜ் மட்டும் அதிகாரிகளின் பிடியில் உள்ளார். அவரிடம் இன்றும் விசாரணை நடந்தது.

முக்கிய அரசியல் பிரமுகர் ஒருவர் அரூர் மற்றும் பாப்பிரெட்டிப்பட்டி சட்டசபை தொகுதி இடைத்தேர்தலில் ஒரு கட்சிக்கு ஆதரவாக வாக்களிக்க வாக்காளர்களுக்கு விநியோகிக்க 7 பைகளில் ரூ.3½ கோடியை கொடுத்து அனுப்பியதாக முதல் கட்ட விசாரணையில் தெரிய வந்துள்ளது. முழுமையான விசாரணைக்கு பிறகுதான் இது உண்மையா என்று தெரியவரும்.  #ElectionComission #MoneySeized