நீங்கள் தேடியது "Election commission"

6 மாநிலங்களில் காலியாக உள்ள 7 சட்டசபை தொகுதிகளுக்கும் நவம்பர் 3-ம் தேதி இடைத்தேர்தல் நடத்தப்படும் என்று தேர்தல் ஆணையம தெரிவித்துள்ளது. இந்த தேர்தலில் மின்னணு வாக்குப்பதிவு இயந்திரங்கள் பயன்படுத்தப்படும் என்றும் தெரிவிக்கப்பட்டுள்ளது.

நவம்பர் 6-ம் தேதி வாக்குகள் எண்ணப்பட்டு முடிவுகள் அறிவிக்கப்படுகிறது. இடைத்தேர்தல் குறித்த அதிகாரப்பூர்வ அரசு அறிக்கை அக்டோபர் 7-ம் தேதி வெளியிடப்படும் என்றும் தேர்தல் நடைபெறும் அந்தந்த தொகுதிகளில் தேர்தல் நடத்தை விதிமுறைகள் அன்றிலிருந்து அமலுக்கு வரும் என்றும் கூறப்பட்டுள்ளது.

மேலும், வேட்புமனு தாக்கல் செய்வதற்கான காலக்கெடு அக்டோபர் 14ம் தேதி வரை என நிர்ணயிக்கப்பட்டுள்ளது. வேட்புமனுக்கள் மீதான பரிசீலனை அக்டோபர் 15ம் தேதி நடைபெறுகிறது. வேட்புமனுவை வாபஸ் பெற அக்டோபர் 17ம் தேதி கடைசி நாள் எனவும் அறிவிக்கப்பட்டுள்ளது.

அதன்படி, பீகார் (மோகமா, கோபால்கஞ்ச்), மராட்டியம் (அந்தேரி கிழக்கு), அரியானா (அதம்பூர்), தெலுங்கானா (முனுகோட்), உத்தரபிரதேசம் (கோலா கோக்கர்நாத்), ஒடிசா (தாம்நகர்) ஆகிய 6 மாநிலங்களில் காலியாக உள்ள 7 சட்டசபை தொகுதிக்கு இடைத்தேர்தல் நடைபெறுகிறது என்பது குறிப்பிடத்தக்கது.

எடப்பாடி பழனிசாமிக்கு ஆதரவாக ஜூன் 23 மற்றும் ஜூலை 11-ந்தேதிகளில் நடந்த அ.தி.மு.க. பொதுக்குழு கூட்டத்தில் தீர்மானங்கள் நிறைவேற்றப்பட்டன. இது தொடர்பான வழக்கு விசாரணை சென்னை ஐகோர்ட்டில் நாளை மறுநாள் விசாரணைக்கு எடுத்துக்கொள்ளப்பட உள்ளது.

இந்த வழக்கில் சென்னை ஐகோர்ட்டு எப்படி தீர்ப்பு வழங்கும் என்ற எதிர்பார்ப்பு அனைவரிடமும் ஏற்பட்டுள்ள நிலையில் அ.தி.மு.க. மூத்த தலைவர்கள் அனைவரும் தேர்தல் ஆணையத்தின் முடிவைத்தான் மலைபோல் நம்பிக் கொண்டிருக்கிறார்கள்.

தேர்தல் ஆணைய அதிகாரிகள் இதுவரை அ.தி.மு.க. உள்கட்சி சண்டை விவகாரத்தை கண்டு கொள்ளவே இல்லை. பொதுவாக அரசியல் கட்சிகள் தீர்மானங்கள் நிறைவேற்றி அனுப்பி வைத்தால் ஒரு வாரம் அல்லது இரண்டு வாரத்தில் தேர்தல் ஆணையத்தின் பதில் தெரிந்து விடும். ஆனால் அ.தி.மு.க. மோதல் விவகாரத்தில் மூன்று மாதம் ஆகப்போகும் நிலையில் தேர்தல் ஆணையம் 'கப்-சிப்' என்று இருக்கிறது.

இது என்ன... கிணற்றில் போட்ட கல் மாதிரி இருக்கிறார்கள் என்று, சமீபத்தில் எடப்பாடி பழனிசாமி தரப்பினர் அ.தி.மு.க. பொதுக்குழு உறுப்பினர்கள் கையெழுத்து போட்ட பட்டியலை கொண்டுபோய் கொடுத்தனர். இதையும் தேர்தல் ஆணையம் ஏற்க மறுத்து விட்டதாம். என்ன காரணம் என்று எடப்பாடி பழனிசாமி தரப்பு விசாரித்த போது ஒரு புதிய தகவல் வந்துள்ளது.

அதாவது அ.தி.மு.க. தொடங்கப்பட்ட காலத்தில் இருந்து பொதுக்குழு மற்றும் செயற்குழு கூட்டம் நடத்தப்படும் போது மாவட்டம் வாரியாக உறுப்பினர்களிடம் கையெழுத்து வாங்குவார்களாம். அதை தனித்தனி புத்தகமாக தொகுத்து அதன் நகலைத்தான் டெல்லிக்கு கொண்டு போய் கொடுப்பார்களாம். அதனுடன் பொதுக்குழுவில் நிறைவேற்றப்பட்ட தீர்மானங்கள் இணைக்கப்பட்டு இருக்குமாம்.

இந்த நடைமுறை தற்போது இல்லை என்ற காரணத்தினால்தான் தேர்தல் ஆணைய அதிகாரிகள் மவுனமாக இருக்கிறார்களாம்.

இதை அறிந்த எடப்பாடி பழனிசாமி தரப்பு தலைவர்கள் சற்று அதிருப்தி அடைந்ததாக கூறப்படுகிறது.

அடுத்த பொதுக்குழு கூட்டத்தில் எந்த தவறும் இல்லாமல் கச்சிதமாக செயல்பட ஆலோசித்து வருகிறார்கள்.

புதுடெல்லி:

அரசியல் கட்சிகள் தற்போது 20 ஆயிரம் ரூபாய் வரை ரொக்கமாக நன்கொடை பெறலாம். அதற்கு மேல் காசோலை அல்லது மின்னணு பரிமாற்றம் மூலமாக மட்டுமே நன்கொடை பெற முடியும். மேலும், ரூ.20 ஆயிரத்துக்கு மேல் பெறப்பட்ட நன்கொடை விவரங்களை தேர்தல் ஆணையத்துக்கு அறிக்கை மூலம் தெரிவிக்க வேண்டும்.

சில அரசியல் கட்சிகள் ரூ.20 ஆயிரத்துக்கு மேல் நன்கொடை பெறவில்லை என அறிக்கை அளிக்கின்றன. ஆனால் ரூ.20 ஆயிரத்துக்கு குறைவாக ஒவ்வொருவரிடமும் ரொக்கமாக நன்கொடை பெற்று பெரும் பணம் திரட்டி விடுகின்றன.

இந்நிலையில், இந்த முறைகேடுகளைத் தடுக்கும் வகையில் மக்கள் பிரதிநிதித்துவ சட்டத்தில் புதிய திருத்தங்களை மேற்கொள்ளுமாறு மத்திய சட்ட அமைச்சகத்துக்கு தேர்தல் ஆணையம் யோசனை தெரிவித்துள்ளது.

இதுதொடர்பாக மத்திய சட்ட மந்திரி கிரண் ரிஜிஜுவுக்கு தலைமை தேர்தல் ஆணையர் ராஜீவ் குமார் ஒரு கடிதம் எழுதி உள்ளார். அதில் அவர் கூறியதாவது:

அரசியல் கட்சிகள் ரொக்கமாக நன்கொடை பெறுவதற்கான உச்சவரம்பை ரூ.20 ஆயிரத்தில் இருந்து ரூ.2 ஆயிரமாக குறைக்க வேண்டும்.

அப்படிச் செய்தால், ரூ.2 ஆயிரத்துக்கு மேல் பெற்ற அனைத்து நன்கொடை விவரங்களையும் அரசியல் கட்சிகள் தேர்தல் கமிஷனிடம் தெரிவிக்க வேண்டும். இதன்மூலம், நன்கொடை பெறுவதில் வெளிப்படைத்தன்மை உருவாகும் என்று கருதப்படுகிறது.

ஒரு அரசியல் கட்சி பெறும் மொத்த நன்கொடையில் 20 சதவீதமோ அல்லது ரூ.20 கோடியோ இதில் எது குறைவோ அந்த தொகைக்குள்தான் ரொக்கமாக பெறப்பட வேண்டும்.

அரசியல் கட்சிகள் பெறும் நன்கொடையில் வெளிநாட்டு நன்கொடைகள் புகுந்து விடாமல் தடுக்க விவாதம் நடத்தப்பட்டு சீர்திருத்தம் கொண்டுவர வேண்டும்.

தேர்தலில் போட்டியிடும் ஒரு வேட்பாளர், ஒரு நபருக்கு ரூ.2 ஆயிரத்துக்கு மேல் அளிக்கும் தொகையை காசோலையாகவோ அல்லது மின்னணு பரிமாற்ற முறையிலோ மட்டுமே அளிப்பதை கட்டாயமாக்க வேண்டும் என தெரிவித்துள்ளார்.

இந்த யோசனைகளை தேர்தல் நடத்தை விதிமுறைகளில் சேர்த்தால், ஒவ்வொரு வேட்பாளரும் தேர்தலுக்கென தனி வங்கிக்கணக்கு தொடங்கி, அதன் வழியாகவே வரவு, செலவு கணக்குகளை மேற்கொள்ள வேண்டி இருக்கும்.

சமீபத்தில் செயல்படாத நிலையில் உள்ள 284 அங்கீகரிக்கப்படாத அரசியல் கட்சிகளின் பதிவை தேர்தல் ஆணையம் ரத்து செய்தது குறிப்பிடத்தக்கது.

புதுடெல்லி :

மக்கள் பிரதிநிதித்துவ சட்டம் 1951-ன் தொடர்புடைய பிரிவுகளின்படி, தேர்தல் கமிஷனில் பதிவு செய்யப்பட்ட அரசியல் கட்சிகள், கட்சியை பதிவு செய்ததில் இருந்து 5 ஆண்டுகளுக்குள் தேர்தல் கமிஷன் நடத்தும் தேர்தல்களில் பங்கேற்க வேண்டும்.

இல்லாவிட்டால் அந்த கட்சி நீக்கப்படும். இந்தியாவில் சுமார் 2,800 கட்சிகள் தேர்தல் கமிஷனில் பதிவு செய்யப்பட்டு, தேர்தலில் உரிய பிரதிநிதித்துவம் பெறாமல் அங்கீகரிக்கப்படாத கட்சிகளாக உள்ளன. இவற்றில் சுமார் 2,100 கட்சிகள் மேற்கண்ட விதிகளை பின்பற்றாதது கண்டுபிடிக்கப்பட்டது.

தமிழ்நாடு, தெலுங்கானா, கர்நாடகா, பீகார், டெல்லி உள்ளிட்ட மாநில தலைமை தேர்தல் அதிகாரிகள் இதுகுறித்து இந்திய தேர்தல் கமிஷனுக்கு புகார் தெரிவித்தனர்.

இதன் அடிப்படையில் அந்த கட்சிகள் மீது நடவடிக்கை எடுக்கப்பட இருப்பதாக கடந்த மே மாதம் இந்திய தேர்தல் கமிஷன் அறிவிப்பு வெளியிட்டது. ஆனால் அதன்பிறகும் சம்பந்தப்பட்ட பல கட்சிகள், தவறுகளை சரி செய்வது தொடர்பாக தேர்தல் கமிஷனை நாடவில்லை.

இதனால் தலைமை தேர்தல் கமிஷனர் ராஜீவ்குமார், தேர்தல் கமிஷனர் அனுப் சந்திரபாண்டே ஆகியோரது தலைமையிலான இந்திய தேர்தல் கமிஷன் குறிப்பிட்ட அந்த கட்சிகள் மீது நடவடிக்கை எடுத்துள்ளது.

அதாவது 86 கட்சிகள், பதிவு செய்யப்பட்ட அங்கீகரிக்கப்படாத கட்சிகளின் பதிவேட்டில் இருந்து நீக்கப்படும் என்றும், 253 கட்சிகள் செயல்படாதவை என பதிவேட்டில் குறிப்பிடப்படும் என்றும் தேர்தல் கமிஷன் நேற்று அறிவித்தது. இந்த கட்சிகள் தேர்தல் சின்னங்கள் பெற தகுதியற்றதாக ஆக்கப்பட்டு உள்ளன.

ஏற்கனவே 198 கட்சிகள் இதுதொடர்பாக நீக்கம் செய்யப்பட்டு உள்ளன. தற்போது நீக்கம் செய்யப்படும் 86 கட்சிகள் மற்றும் செயல்படாத 253 கட்சிகளையும் சேர்த்து கடந்த மே 25-ந் தேதிக்கு பிறகு இதுவரை 537 கட்சிகள் மீது தேர்தல் கமிஷன் நடவடிக்கை எடுத்துள்ளது குறிப்பிடத்தக்கது.

புதுடெல்லி:

நாடு முழுவதும் தேர்தல் ஆணையத்தில் பதிவு செய்யப்பட்டு அங்கீகாரம் பெறாத கட்சிகளாக 2 ஆயிரத்திற்கும் மேற்பட்ட கட்சிகள் உள்ளன.

இதற்கிடையே, தேர்தல் ஆணையத்தில் பதிவு செய்துள்ள 2,796 கட்சிகளில் 623 கட்சிகள் மட்டுமே கடந்த 2019 மக்களவை தேர்தலில் களமிறங்கின.

இந்நிலையில், கட்சிகள் மீது எழுந்த பல்வேறு புகார்களை அடுத்து உரிய விசாரணை நடத்தி அதனடிப்படையில் பல்வேறு மாநிலங்கள், யூனியன் பிரதேசங்களில் கட்சிகளை பதிவுசெய்தும், அங்கீகாரம் பெறாத 86 கட்சிகளை பட்டியலில் இருந்து தேர்தல் ஆணையம் இன்று அதிரடியாக நீக்கியுள்ளது.

மேலும், தேர்தல் ஆணையத்தில் பதிவுசெய்து 6 ஆண்டுகள் தேர்தலில் போட்டியிடாத கட்சிகளின் பதிவு நீக்கப்படும் என தெரிவித்துள்ளது.

புதுடெல்லி:

பாரதிய ஜனதா கட்சியின் செய்தி தொடர்பாளரும் வழக்கறிஞருமான அஸ்வினி உபாத்தியா உச்ச நீதிமன்றத்தில் பொதுநல வழக்கு தொடர்ந்துள்ளார். அதில் தேர்தல் வாக்குறுதிகளாக இலவசங்களை அறிவிக்கும் அரசியல் கட்சிகளுக்கு எதிராக கிரிமினல் வழக்குகளை பதிவு செய்ய வேண்டும் எனவும் இலவசங்கள் தொடர்பான வாக்குறுதிகளை அரசியல் கட்சிகள் பயன்படுத்துவதற்கு தடை விதிக்கப்பட வேண்டும் எனவும் கோரிக்கை வைத்திருந்தார். இந்த வழக்கை உச்ச நீதிமன்ற தலைமை நீதிபதி ரமணா தலைமையிலான அமர்வு விசாரித்து வருகிறது.

தேர்தல் பிரசாரங்களின் போது இலவசங்கள் வழங்குவது தொடர்பான பிரச்சினைக்கு தீர்வு காண நிதி ஆயோக், சட்ட ஆணையம், ரிசர்வ் வங்கி, ஆளுங்கட்சி மற்றும் எதிர்க்கட்சி உறுப்பினர்கள் போன்ற பல்வேறு தரப்பினரைக் கொண்ட நிபுணர் குழு ஆலோசனைகளை வழங்க வேண்டும் என்று ஆகஸ்ட் 3 ஆம் தேதி நீதிமன்றம் கருத்து தெரிவித்தது. மேலும், அத்தகைய அமைப்பை உருவாக்குவது தொடர்பான உத்தரவை பிறப்பிக்க ஏதுவாக, மனுதாரர், மத்திய அரசு மற்றும் தேர்தல் ஆணையம் பரிந்துரைகளை வழங்குமாறு நீதிமன்றம் உத்தரவிட்டது.

மேலும், மனுவில் உள்ள விவகாரம் தீவிரமானது என்று கூறிய தலைமை நீதிபதி என்வி ரமணா, தேர்தல் ஆணையம் மற்றும் அரசு எதுவும் செய்ய முடியாது என்று கூறி ஒதுங்கிவிட முடியாது என்றார்.

இந்த வழக்கில் தேர்தல் ஆணையம் தரப்பில் பதில் மனு தாக்கல் செய்யப்பட்டுள்ளது. அதில், தற்போதுள்ள சட்டதிட்ட விதிகளைக் கொண்டு இலவச திட்டங்களை வரையறுக்க முடியாது என்றும், இலவச திட்ட அறிவிப்புகள் சமூக பொருளாதார ரீதியாக பல்வேறு தாக்கங்களை ஏற்படுத்தி வருவதாகவும் தெரிவிக்கப்பட்டுள்ளது.

இதேபோல் இலவச அறிவிப்புகள் தொடர்பான பிரச்சனைகளை ஆய்வு செய்ய உச்ச நீதிமன்றத்தால் அமைக்கப்படும் நிபுணர் குழுவில் தேர்தல் ஆணையம் இடம் பெற மறுத்துவிட்டது.

மும்பை :

கடந்த ஜூன் மாத இறுதியில் நடந்த மகாராஷ்டிரா அரசியல் சூறாவளியால் சிவசேனாவில் பிளவு ஏற்பட்டது.

சிவசேனாவை சேர்ந்த ஏக்நாத் ஷிண்டே 40 ஆதரவு எம்.எல்.ஏ.க்களுடன் தனி அணியை உருவாக்கினார். இதனால் உத்தவ் தாக்கரே தலைமையில் செயல்பட்டு வந்த சிவசேனா- தேசியவாத காங்கிரஸ்- காங்கிரஸ் கூட்டணி அரசு கவிழ்ந்தது. மேலும் பா.ஜனதாவுடன் சேர்ந்து ஏக்நாத் ஷிண்டே கூட்டணி ஆட்சி அமைத்துள்ளார்.

இந்தநிலையில் மகாராஷ்டிராவில் நடந்த அரசியல் நெருக்கடிகள் தொடர்பாக உத்தவ் தாக்கரே மற்றும் ஏக்நாத் ஷிண்டே தரப்பினர் சுப்ரீம் கோர்ட்டில் மனுக்களை தாக்கல் செய்தனர்.

குறிப்பாக ஏக்நாத் ஷிண்டே அணியினர் தாங்கள் தான் உண்மையான சிவசேனா என்றும், கட்சியின் 'வில் அம்பு' சின்னத்தை தங்களுக்கு ஒதுக்க வேண்டும் என்றும் இந்திய தேர்தல் ஆணையத்துக்கு அனுப்பிய கடிதத்தை அடுத்து, இரு தரப்பினரும் வருகிற 8-ந் தேதிக்குள் உரிய ஆவணங்களை தாக்கல் செய்ய வேண்டும் என்று தேர்தல் ஆணையம் உத்தரவிட்டதற்கு எதிராகவும் உத்தவ் தாக்கரே தரப்பு சுப்ரீம் கோர்ட்டில் மனு தாக்கல் செய்திருந்தது.

இந்த மனுக்களை தலைமை நீதிபதி என்.வி. ரமணா தலைமையிலான அமர்வு விசாரித்து வருகிறது.

நேற்று மீண்டும் விசாரணைக்கு வந்தபோது, ஷிண்டே தரப்பு சார்பில் ஆஜரான மூத்த வக்கீல் ஹரிஷ் சால்வே, "கட்சி தாவல் தடை சட்டம், கருத்து வேறுபாடுகளுக்கு எதிரான சட்டமாக இருக்க முடியாது. தகுதி நீக்கம் கண்டறியப்படும் வரை, சட்டத்திற்கு புறம்பான செயல் எதுவும் இல்லை" என்று வாதிட்டார்.

உத்தவ் தாக்கரே தரப்பில் ஆஜரான மூத்த வக்கில் கபில் சிபல், "40 அதிருப்தி எம்.எல்.ஏ.க்களும் தங்கள் நடத்தை காரணமாக தகுதி நீக்கம் செய்யப்படும் நிலையில் உள்ளனர். அந்த சந்தர்ப்பத்தில் அவர்கள் தங்களை உண்மையான சிவசேனா என்று எப்படி உரிமை கோர முடியும்?.

ஏக்நாத் ஷிண்டே தலைமையிலான எம்.எல்.ஏ.க்கள் வேறு அரசியல் கட்சியுடன் இணைவதன் மூலம் மட்டுமே அரசியல் சாசனத்தின் 10-வது அட்டவணையின் கீழ் தகுதி நீக்கத்தில் இருந்து தங்களை காப்பாற்றிக்கொள்ள முடியும்" என்றார்.

தேர்தல் ஆணையமும் தனது தரப்பு வாதத்தை முன் வைத்தது.

அனைத்து தரப்பு வாதத்தையும் பதிவு செய்து கொண்ட நீதிபதிகள் பிறப்பித்த உத்தரவு வருமாறு:-

மகாராஷ்டிரா அரசியல் குழப்பநிலை தொடர்புடைய மனுக்களை அரசியலமைப்பு சாசன அமர்வுக்கு மாற்றுவதா?, வேண்டாமா? என்பது குறித்த உத்தரவு வருகிற திங்கட்கிழமை பிறப்பிக்கப்படும்.

அதுவரை தங்களையே உண்மையான சிவசேனா என அறிவிக்க கோரும் ஏக்நாத் ஷிண்டேவின் மனு மீது எந்தவித அவசர நடவடிக்கையையும் தேர்தல் ஆணையம் எடுக்கக்கூடாது. ஏக்நாத் ஷிண்டேவின் மனுவுக்கு பதிலளிக்க உத்தவ் தாக்கரே தரப்பு அவகாசம் கோரினால் அதை தேர்தல் ஆணையம் பரிசீலிக்க வேண்டும்.

இவ்வாறு நீதிபதிகள் உத்தரவிட்டனர்.

சுப்ரீம் கோர்ட்டின் இந்த அதிரடி உத்தரவு ஷிண்டே அணிக்கு பின்னடைவாக அமைந்துள்ளது.

புதுடெல்லி:

அ.தி.மு.க.வில் ஒற்றை தலைமை விவகாரம் இன்னும் முடிவுக்கு வந்த பாடில்லை. இது தொடர்பாக அ.தி.மு.க. இடைக்கால பொதுச்செயலாளர் எடப்பாடி பழனிசாமிக்கும், முன்னாள் முதல்-அமைச்சர் ஓ.பன்னீர் செல்வத்துக்கும் இடையே மோதல் ஏற்பட்டது.

அ.தி.மு.க.வில் 90 சதவீத தொண்டர்கள் தங்கள் பக்கம் தான் உள்ளனர் என எடப்பாடி தரப்பினர் கூறி வருகின்றனர். ஆனால் ஓ.பன்னீர்செல்வம் தரப்பினரோ எங்கள் பக்கம் தான் அ.தி.முக.வினர் உள்ளனர் என தெரிவித்து வருகின்றனர். அ.தி.மு.க. பொதுக்குழு தொடர்பாக அவர்கள் சட்ட ரீதியாகவும் போராடி வருகிறார்கள்.

இந்த நிலையில் அ.தி.மு.க ஒருங்கிணைப்பாளர் பதவியில் இருந்து ஓ.பன்னீர் செல்வம் நீக்கப்பட்டதாக எடப்பாடி பழனிசாமி அறிவித்தார். இதற்கு போட்டியாக ஓ.பன்னீர் செல்வம் இணை ஒருங்கிணைப்பாளர் பதவியில் இருந்து எடப்பாடி பழனிசாமியை நீக்கி விட்டு புதிய இணை ஒருங்கிணைப்பாளராக முன்னாள் அமைச்சர் வைத்திலிங்கம் நியமிக்கப்படுவதாக அறிவித்தார்.

மேலும் எடப்பாடி பழனிசாமியும், ஓ.பன்னீர் செல்வமும் போட்டி போட்டிக்கொண்டு மாவட்ட செயலாளர் மற்றும் நிர்வாகிகளை நீக்கி விட்டு புதிய நிர்வாகிகள் பெயர்களை அறிவித்தனர்.

இப்படி அ.தி.மு.க.வினர் இரு அணிகளாக செயல்படுவதால் தொண்டர்கள் மத்தியில் குழப்பமான நிலை உருவாகி உள்ளது.

இந்த சூழ்நிலையில் தேர்தல் ஆணையத்திற்கு ஓ.பன்னீர்செல்வம் கடிதம் அனுப்பி உள்ளார். அதில் அ.தி.மு.க. இணை ஒருங்கிணைப்பாளர் பதவியில் இருந்து எடப்பாடி பழனிசாமியை நீக்கிவிட்டதாகவும், அவருக்கு பதில் புதிதாக வைத்திலிங்கம் நியமிக்கப்பட்டு உள்ளதாகவும் தகவல் தெரிவிக்கப்பட்டு உள்ளது. இதனை தேர்தல் ஆணையம் ஏற்றுக்கொள்ளுமா? இல்லையா என்பது தெரியவில்லை.

எடப்பாடி பழனிசாமி தரப்பில் ஏற்கனவே ஓ. பன்னீர்செல்வம் நீக்கப்பட்டது குறித்தும் பொதுச்செயலாளராக எடப்பாடி பழனிசாமி நியமனம் குறித்தும் பொதுக்குழுவில் எடுக்கப்பட்ட முடிவு குறித்தும் தெரிவிக்கப்பட்டது என்பது குறிப்பிடத்தக்கது.

தமிழக தலைமை தேர்தல் அதிகாரி சத்யபிரதா சாகு தலைமையில் நாளை மறுநாள் (1-ந்தேதி) சென்னையில் அனைத்து கட்சி கூட்டம் நடைபெறுகிறது. இந்த கூட்டத்தில் அங்கீகரிக்கப்பட்ட அரசியல் கட்சிகள் கலந்து கொள்ள தேர்தல் ஆணையம் அழைப்பு விடுத்துள்ளது.

இந்த கூட்டம் தொடர்பாக ராயப்பேட்டையில் உள்ள அ.தி.மு.க. தலைமைக் கழக முகவரிக்கு தேர்தல் ஆணையம் சார்பில் கடிதம் அனுப்பப்பட்டுள்ளது.  எடப்பாடி பழனிசாமி தரப்பில் பொள்ளாச்சி ஜெயராமன், இன்பதுரை ஆகியோர் இந்த கூட்டத்தில் பங்கேற்க உள்ளனர்.

இந்நிலையில் தேர்தல் ஆணையம் நடத்தும் அனைத்து கட்சி கூட்டத்தில் பங்கேற்க போவதாக ஒ.பன்னீர் செல்வமும் அறிவித்துள்ளார். அவரது தரப்பில் கோவை செல்வராஜ் கூட்டத்தில் பங்கேற்பார் என்று தலைமைத் தேர்தல் அதிகாரிக்கு எழுதியுள்ள கடிதத்தில் ஓ.பன்னீர்செல்வம் தெரிவித்துள்ளார்.

சென்னை:

தமிழக தலைமை தேர்தல் அதிகாரி சத்யபிரதா சாகு தலைமையில் நாளை மறுநாள் (1-ந்தேதி) சென்னையில் அனைத்து கட்சி கூட்டம் நடைபெறுகிறது.

இந்த கூட்டத்தில் அங்கீகரிக்கப்பட்ட அரசியல் கட்சிகள் கலந்து கொள்ள தேர்தல் ஆணையம் அழைப்பு விடுத்துள்ளது.

தி.மு.க., அ.தி.மு.க., காங்கிரஸ், பாரதிய ஜனதா உள்பட அனைத்து அங்கீகரிக்கப்பட்ட அரசியல் கட்சிகளின் பிரதிநிதிகளும் இந்த கூட்டத்தில் கலந்து கொள்கின்றனர். அ.தி.மு.க. சார்பில் பங்கேற்க யாருக்கு அழைப்பிதழ் அனுப்பப்படும் என்ற எதிர்பார்ப்பு ஏற்பட்டது. தேர்தல் ஆணையம் அழைக்கும் அணிதான் அங்கீகரிக்கப்பட்ட அ.தி.மு.க.வாக கருதப்படும் என்று கூறப்பட்டது. இந்த நிலையில் எடப்பாடி பழனிசாமி தரப்புக்கு தேர்தல் ஆணையம் அழைப்பு கடிதம் அனுப்பி உள்ளது.

ராயப்பேட்டையில் உள்ள அ.தி.மு.க. தலைமைக் கழக முகவரிக்கு தேர்தல் ஆணையம் சார்பில் இந்த கடிதம் அனுப்பி வைக்கப்பட்டு உள்ளது. இதன்படி தேர்தல் ஆணைய கூட்டத்தில் அ.தி.மு.க. இடைக்கால பொதுச்செயலாளரான எடப்பாடி பழனிசாமி தரப்பில் பொள்ளாச்சி ஜெயராமன், இன்பதுரை ஆகியோர் இந்த கூட்டத்தில் பங்கேற்க உள்ளனர்.

வாக்காளர் பட்டியலுடன் ஆதார் அட்டையை இணைக்கும் பணி தொடர்பாக தேர்தல் ஆணையம் இந்த ஆலோசனை கூட்டத்துக்கு ஏற்பாடு செய்துள்ளது. இந்த கூட்டத்துக்கு எடப்பாடி தரப்பை தேர்தல் ஆணையம் அங்கீகரித்து அழைத்திருப்பது முக்கியத்துவம் வாய்ந்ததாக கருதப்படுகிறது.

மும்பை :

சிவசேனா கட்சிக்கு உரிமை கோரி, மராட்டிய முதல்-மந்திரி ஏக்நாத் ஷிண்டே மற்றும் முன்னாள் முதல்-மந்திரி உத்தவ் தாக்கரே ஆகிய இருவரும் தலைமை தேர்தல் ஆணையத்துக்கு கடிதம் எழுதியுள்ளனர்.

மகாராஷ்டிராவில் சிவசேனா, காங்கிரஸ், தேசியவாத காங்கிரஸ் கட்சிகள் இணைந்த மகா விகாஸ் அகாடி கூட்டணி ஆட்சி கடந்த மாதம் கவிழ்ந்தது.

சிவசேனாவின் அதிருப்தி எம்.எல்.ஏ.க்கள் ஏக்நாத் ஷிண்டே தலைமையில் பிரிந்து பாஜகவுடன் இணைந்து ஆட்சியை அமைத்துள்ளனர்.

முன்னதாக, ஏக்நாத் ஷிண்டே தலைமையிலான அதிருப்தி குழுவை சிவசேனாவாக அங்கீகரிக்கக் கூடாது என்றும் உத்தவ் தாக்கரே தலைமையிலான சிவசேனா கட்சி தலைமை தேர்தல் ஆணையத்துக்கு கடிதம் எழுதியுள்ளது. மேலும் தாங்கள்தான் உண்மையான சிவசேனா என்றும், இந்த விவகாரத்தில் முடிவு எடுக்கும் போது தங்கள் தரப்பு வாதத்தையும் கேட்க வேண்டும் என்று கேவியட் மனுவையும் உத்தவ் தாக்கரே தரப்பு அளித்துள்ளது.

இந்நிலையில், 12 சிவசேனா எம்.பி.க்கள் சேர்ந்து தங்களை தனியாகச் செயல்பட அங்கீகரிக்குமாறு , மக்களவைத் தலைவர் ஓம் பிர்லாவிடம் தனியாக மனு அளித்து உள்ளனர். இதனையடுத்து, சிவசேனா கட்சிக்கு உரிமை கோரி தலைமைத் தேர்தல் ஆணையத்துக்கு ஏக்நாத் ஷிண்டே தரப்பு கடிதம் எழுதியுள்ளது.