ஈரோடு

ஈரோடு:

கொங்க நாடு மக்கள் தேசிய கட்சி சார்பில் நதிநீர் இணைப்பு மாநாடு ஈரோடு வ.உ.சி.பூங்கா மைதானத்தில் நடந்தது. மாநாட்டுக்கு கொ.ம.தே.க. பொதுச்செயலாளர் ஈஸ்வரன் தலைமை தாங்கினார். அவைத்தலைவர் சென்னியப்பன், கொங்கு வேளாளர் கவுண்டர்கள் பேரவை தலைவர் தேவராஜன், பொருளாளர் கே.கே.சி.பாலு, துணைத்தலைவர் சக்தி கோச் நடராஜன் மாநகர் மாவட்ட தலைவர் ஜெக நாதன்ஆகியோர் முன்னிலை வகித்தனர்.

94-வது பிறந்த நாளை கொண்டாடும் தி.மு.க. தலைவர் கருணாநிதியை இந்த மாநாடு வாழ்த்துகளையும், பாராட்டுகளையும் தெரிவித்து கொள்கிறது.

வட இந்திய நதிகளை தண்ணீரே இல்லாமல் வறண்டு கிடக்கின்ற தென்னிந்திய நதிகளோடு இணைக்கும் திட்டத்தை உடனடியாக மத்திய அரசு துவங்கி இதன் மூலம் நீர் வழிபாதை திட்டத்தை செயல்படுத்த வேண்டும்.

விவசாய விளை நிலங்களுக்கு இடையே கொண்டு செல்லப்படும் எரிவாயு திட்டத்தை கைவிட வேண்டும்.விவசாய துறையை முன்னேற்ற பாதைக்கு கொண்டு செல்லும் வகையில் மத்திய -மாநில அரசுகள் விவசாயத்திற்கு என்று தனி பட்ஜெட்டை கொண்டு வர வேண்டும் என்பன உள்பட பல்வேறு தீர்மானங்கள் நிறைவேற்றப்பட்டன.

கூட்டத்தில் கொ.ம.தே.க. பொதுச் செயலாளர் ஈஸ்வரன் பேசியதாவது.-

தமிழகத்தின் நம்பிக்கை நட்சத்திரமாக தி.மு.க.செயல் தலைவர் மு.க.ஸ்டாலின் உள்ளார். யாரை அழைத்தால் எங்கள் கோரிக்கைகள் நிறைவேறும் என்று பார்த்தால் அது சட்ட மன்ற எதிர் கட்சி மு.க.ஸ்டாலினால் மட்டுமே முடியும். எனவே அவரை இந்த மாநாட்டிற்கு அழைத்தோம்.

நாங்கள் எங்கு மாநாடு போட்டாலும் அங்கு மழை வந்து விடுகிறது. இன்று தமிழகத்தில் எங்கு மழை இல்லை என்று சொல்லுங்கள் அங்கு நாங்கள் மாநாடு போடுகிறோம்.

கடந்த 20 ஆண்டுகள் முன்பு இத்தனை வெயில் இல்லை. இப்போது ஏன் இந்த வெயில்? மழை குறைந்தது ஏன்? சாய கழிவு பிரச்சனை ஏன்?. அப்போது 200 அடி தோண்டினாலே தண்ணீர் வந்தது. ஆனால் இப்போது 2ஆயிரம் அடி தோண்டினாலும் தண்ணீர் வருவது இல்லை.

நதிநீர் இணைப்பை மூன்று வகையாக பிரிக்கலாம். தேசிய அளவில் நதிநீர் இணைப்பு, தமிழகத்துக்குள் உள்ள தென் இந்திய நதிகளை இணைப்பது, தமிழ்நாட்டில் உள்ள நதிகளை நமக்கே திருப்பி விடுவது. இவ்வாறு செய்தால் நிலத்தடி நீர் உயரும்.

மு.க.ஸ்டாலின் தூர்வாருவதை பார்த்து முதல்-அமைச்சர் எடப்பாடி பழனிச்சாமி மேட்டூர் அணையை தூர்வாருகிறார். அதனால் உங்களிடம் (மு.க.ஸ்டாலின்) ஒரு கோரிக்கை வைக்கிறேன்.அத்திகடவு- அவினாசி திட்டத்திற்கு போராட நாங்கள் ரெடி. அதன் அடிக்கல் நாட்டு விழாவுக்கு முதல் ஆளாக ஸ்டாலின் வர வேண்டும்.

இவ்வாறு ஈஸ்வரன் பேசினார்.

தென்னிந்திய நதிகள் இணைப்பு இயக்க தலைவர் அய்யாகண்ணு, கீழ் பவானி முறைநீர் பாசன விவசாயிகள் சங்க தலைவர் காசியண்ணன் உள்பட பலர் கலந்து கொண்டனர்.

பு.புளியம்பட்டி:

பு.புளியம்பட்டி அருகே உள்ள காரப்பாடி தொட்டிபாளையம் பகுதியை சேர்ந்தவர் தீபா (வயது 32).

இவர் தொட்டிபாளையம் பகுதியில் திருமண வீட்டுக்கு போய்விட்டு இரவு 10.30 மணியளவில் நடந்துசென்று கொண்டிருந்தார்.

அப்போது ஒரு மோட்டார் சைக்கிளில் வந்த 2 மர்ம ஆசாமிகள் தீபாவை வழிமறித்தனர்.

பிறகு கத்தி முனையில் மிரட்டி அவர் கழுத்தில் அணிந்திருந்த தாலி செயின் மற்றும் காலில் அணிந்திருந்த கொலுசையும் பறித்து சென்று தப்பிவிட்டனர்.

இதேபோல் அதே பகுதியில் செண்பகப்புதூரை சேர்ந்த ஜெயமணி (40) என்ற பெண்ணும் ஒரு திருமணத்துக்கு சென்று விட்டு நடந்து சென்று கொண்டிருந்தார்.

அப்போது அதே மோட்டார் சைக்கிளில் வந்த ஆசாமிகள் அவரிடமும் காதில் அணிந்திருந்த கம்மலை மிரட்டி அபகரித்து விட்டு தப்பி சென்று விட்டனர்.

இப்படி அடுத்தடுத்து நடந்த 2 சம்பவம் குறித்து பு.புளியம்பட்டி போலீசார் வழக்கு பதிவு செய்து மர்ம ஆசாமிகளை வலைவீசி தேடிவருகிறார்கள்.

பெருந்துறை:

கிருஷ்ணகிரி மாவட்டம் ஊத்தங்கரையை சேர்ந்தவர் சுந்தர் (வயது 31). இவர் ஈரோடு மாவட்டம் பெருந்துறை அருகே உள்ள பெத்தாம்பாளையம் பைபாஸ் ரோட்டில் உள்ள ஒரு தனியார் நிதி நிறுவனத்தில் ஊழியராக பணி புரிந்து வந்தார்.

இவரும் இவரது நண்பர் பிரபுவும் (28) மோட்டார் சைக்கிளில் அந்த பகுதியில் உள்ள ஒரு ஓட்டலுக்கு நேற்று இரவு சாப்பிட சென்றனர்.

சாப்பிட்டு விட்டு நிதி நிறுவனத்துக்கு சென்று கொண்டிருந்தனர். பைபாஸ் வழியாக சென்ற போது பின்னால் வந்த ஒரு கார் அவர்கள் சென்ற மோட்டார் சைக்கிள் மீது எதிர் பாராத விதமாக மோதியது.

இதில் மோட்டார் சைக்கிளில் இருந்து 2 பேரும் தூக்கி வீசப்பட்டு படுகாயம் அடைந்தனர். உடனடியாக ஆம்புலன்சு மூலம் பெருந்துறை அரசு ஆஸ்பத்திக்கு கொண்டு சென்றனர். அங்கு பரிசோதனை செய்த டாக்டர்கள், சுந்தர் ஏற்கனவே இறந்து விட்டார் என கூறினார். அவரது நண்பர் பிரபுவுக்கு தொடர்ந்து தீவிர சிகிச்சை அளிக்கப்பட்டு வருகிறது.

விபத்தில் பலியான ஊழியர் சுந்தருக்கு நந்தினி என்ற மனைவியும், ஸ்ரீமதி (5) என்ற ஒரு மகளும், தர்‌ஷன் (2) என்ற ஒரு மகனும் உள்ளனர்.

இந்த விபத்து குறித்து பெருந்துறை போலீஸ் சப்- இன்ஸ்பெக்டர் துரை சாமி வழக்குப்பதிவு செய்து விசாரணை நடத்தி வருகிறார்.

அம்மாபேட்டை:

அம்மாபேட்டை மற்றும் பவானி அருகே குட்ட முனியப்பன் கோவில் பகுதி உள்ளது. இந்த பகுதி மக்களுக்கு கடந்த 3 மாத காலமாக குடிநீர் வினியோகம் சரியாக செய்ய வில்லையாம்.

இது குறித்து பொதுமக்கள் புகார் கொடுத்தும் நடவடிக்கை எடுக்க வில்லையாம்.

இந்த நிலையில் இன்று (திங்கட்கிழமை) அந்த பகுதி மக்கள் குடிநீர் ஒழுங்காக வழங்க கோரி பவானி-மேட்டூர் ரோட்டில் திடீரென சாலை மறியல் போராட்டத்தில் ஈடுபட்டனர். இதனால் பரபரப்பும், போக்கு வரத்து பாதிப்பும் ஏற்பட்டது.

சம்பவ இடத்துக்கு அதிகாரிகள் வரும் வரை மறியலை கைவிட மாட்டோம் என மக்கள் கூறினர். இந்த நிலையில் சம்பவ இடத்துக்கு அம்மாபேட்டை வட்டார வளர்ச்சி துணை அலுவலர் லதா மற்றும் பவானி போக்குவரத்து இன்ஸ்பெக்டர் கோவிந்த ராஜ் ஆகியோர் விரைந்தனர்.

அவர்கள் பொதுமக்களிடம் சமரச பேச்சு வார்த்தை நடத்தினர். இதைத் தொடர்ந்து சுமார் 2 மணி நேரம் கழித்து சாலை மறியலை கைவிட்டு பொதுமக்கள் கலைந்து சென்றனர்.

ஈரோடு:

ஈரோடு முத்தம்பாளையம் வீட்டு வசதி வாரியம் பகுதி-3 சேர்ந்தவர் மங்கயர்கரசி (வயது68). இவரது மகன் பரந்தாமன். இவரது மகள் காயத்ரி.

பரந்தாமன் தற்போது பெங்களூரில் உள்ள தனியார் நிறுவனத்தில் சாப்ட்வேர் என்ஜினீயராக வேலை பார்த்து வருகிறார். மகள் காயத்ரி திருமணமாகி அமெரிக்காவில் வசித்து வருகிறார்.

மங்கயர்கரசியின் கணவர் சில வருடத்துக்கு முன் இறந்துவிட்டார். இதனால் மங்கயர்கரசி மட்டும் தனியாக வசித்து வந்தார். அதே பகுதியில் உள்ள தனது தம்பிக்கு வீட்டிற்கு மங்கயர்கரசி செல்வது வழக்கம்.

அதே போன்று நேற்று காலையும் மங்கயர்கரசி தனது தம்பி வீட்டிற்கு சென்று விட்டார். இரவு திரும்பி வீட்டுக்கு வந்தார். அப்போது வீட்டின் பூட்டு உடைந்து இருப்பதை கண்டு அதிர்ச்சி அடைந்தார்.

வீட்டுகுள் சென்று பார்த்த போது பொருட்கள் சிதறிகிடந்தது. பீரோ திறந்திருந்தது. பீரோவில் இருந்த 15 பவுன் நகைகள் மற்றும் 50 ஆயிரம் ரொக்க பணத்தையும் மர்ம ஆசாமிகள் கொள்ளையடித்து சென்றது தெரியவந்தது.

இதுகுறித்து ஈரோடு தாலுகா போலீசாருக்கு தகவல் தெரிவிக்கப்பட்டது. அவர்கள் சம்பவ இடத்துக்கு விரைந்து சென்று பார்வையிட்டனர். மேலும் இதுகுறித்து வழக்கு பதிவு செய்து விசாரித்து வருகிறார்கள்.

ஆள்நடமாட்டம் அதிகம் உள்ள இடத்தில் நடந்த இந்த கொள்ளை சம்பவத்தால் அப்பகுதி மக்களிடையே பரபரப்பை ஏற்படுத்தி உள்ளது.