ஈரோடு

கோபி:

கோபி வந்த பள்ளிக்கல்வி துறை அமைச்சர் அங்கு பல்வேறு அரசு நலத்திட்டப்பணிகளை தொடங்கி வைத்தார். அப்போது அமைச்சர் செங்கோட்டையன் நிருபர்களிடம் கூறியதாவது.-

மத்திய அரசு கொண்டு வரும் அனைத்து பொது தேர்வுகளையும் சமாளிக்கும் வகையில் கல்வித்தரத்தை மேம்படுத்த முடிவு செய்யப்பட்டுள்ளது.

நீட் தேர்வுக்காக கேள்வி தாள் அடங்கிய 54 ஆயிரம் புத்தகங்கள் அச்சடிக்கப்பட்டு மாணவ-மாணவிகளுக்கு வழங்கப்படும். நீட் தேர்வு குறித்து அழுத்தம் தரும் அரசாக இந்த அரசு செயல்பட்டு வருகிறது.

ஈரோடு மாவட்டத்தில் டெங்கு காய்ச்சல் பற்றி எந்த தகவலும் வரவில்லை. கோபி அருகே உள்ள வேட்டைக்காரன் குளம் தூர் வாரும் பணி நடந்து வருகிறது. அதில் படகு இல்லம் அமைத்து பொதுமக்களின் பயன்பாட்டுக்கு திறந்து வைக்கப்படும்.

இவ்வாறு அவர் கூறினார்.

முன்னதாக வேட்டைக்காரன் குளம் தூர்வாரும் பணியை அமைச்சர் செங்கோட்டையன் பார்வையிட்டார்.

ஈரோடு:

ஈரோடு அகத்தியர் வீதியை சேர்ந்தவர் அப்துல் ரகுமான் இவரது மனைவி ஜான்சா (வயது 40).

ஜான்சாவின் தந்தை லத்தீப் என்பவர் கடந்த 3 ஆண்டுகளுக்கு முன் இறந்து விட்டார். இதனால் ஜான்சா மிகவும் வேதனையுடன் இருந்தாராம்.

இந்த நிலையில் ஜான்சா வீட்டில் இருந்த மண் எண்ணையை தன் உடலில் ஊற்றி தீக்குளித்தார். இதில் வலியால் துடித்த அவரை மீட்டு ஈரோடு அரசு ஆஸ்பத்திரியில் சிகிச்சைக்காக சேர்த்தனர். ஆனால் அங்கு சிகிச்சை பலனின்றி நேற்று இரவு பரிதாபமாக இறந்து விட்டார்.

இது குறித்து அவரது மகன் சாகுல்ஹமீது கொடுத்த புகாரின் பேரில் ஈரோடு டவுன் போலீஸ் இன்ஸ் பெக்டர் ரவிக்குமார் வழக்குப்பதிவு செய்து விசாரணை நடத்தி வருகிறார்.

பெருந்துறை:

பெருந்துறையை அடுத்துள்ள சிப்காட் பகுதியில் உள்ள பல்வேறு நிறுவனங்கள் அதிகளவில் கரும்பு கையை வெளியேற்றுவதாகவும், சுத்திகரிப்பு செய்யாமல் சாயக் கழிவுகளை வெளியேற்றி வருவதாக புகார் எழுந்தது.

இது தொடர்பாக பெருந்துறை சுற்றுச்சூழல் பாதுகாப்பு அறக்கட்டளையின் சார்பில் திங்கட்கிழமை நடைபெற்ற மக்கள் குறை தீர் முகாமில் மனு அளிக்கப்பட்டது.

இதன் அடிப்படையில் ஈரோடு மாவட்ட கலெக்டர் பிரபாகர் பெருந்துறை சிப் காட் பகுதிக்கு வந்து திடீர் ஆய்வு மேற்கொண்டார். சிப்காட் வளாகத்தில் உள்ள 7 டெக்ஸ்டைல் நிறுவனங்களில் இந்த ஆய்வு நடந்தது.

அப்போது 2 நிறுவனங்கள் சுகாதார சீர்கேட்டை விளைவிக்கும் வகையில் அனுமதிக்கப்பட்ட அளவை விட அதிகமான அளவில் கரும்புகை வெளியிட்டது தெரியவந்தது. இதன் பேரில் அந்த 2 நிறுவனங்களுக்கும் நோட்டீஸ் வழங்கப்பட்டது. கலெக்டரின் இந்த ஆய்வுப் பணி அந்த பகுதியில் பெரும் பரபரப்பை ஏற்படுத்தியது.

டி.என்.பாளையம்:

ஈரோடு மாவட்டம் சத்தியமங்கலம் வனப்பகுதி புலிகள் காப்பகத்துக்குட்பட்ட கடம்பூர் மலையிலும் தற்போது புலிகள் எண்ணிக்கை கணிசமாக உயர்ந்து உள்ளது.

இதை உறுதி படுத்தும் வகையில் ரோந்து பணியில் ஈடுபட்டுள்ள வனத் துறையினர் கண்ணில் புலிகள் நடமாட்டம் சிக்கி உள்ளது.

தற்போது பொதுமக்கள் பார்வையிலும் அதுவும் ரோட்டிலேயே புலி நடமாட்டமும் இருப்பது தெரிய வந்துள்ளது.

சத்தியமங்கலம் வனப்பகுதியையொட்டி உள்ள கடம்பூரில் இருந்து ஒரு வேனில் டிரைவர் உள்பட 4 பேர் சத்தியமங்கலம் நோக்கி நேற்று மதியம் வந்தனர்.

கடம்பூர் அடுத்து ரோட்டில் ஒரு சிறிய குகை வடிவில் மல்லியம்மன் கோவில் உள்ளது. இந்த கோவில் அருகே உள்ள ஒரு வளைவில் அந்த வேன் வந்த போது திடீரென விருட்டென்று பெரிய புலி ஒன்று பாய்ந்து ரோட்டை கடந்து ஓடியது.

வேனில் வந்த ஏலாஞ்சி ஊரை சேர்ந்த அங்கியம்மாள், கரளியத்தை சேர்ந்த பெரியசாமி, பழனிசாமி, மற்றும் டிரைவர் ஆகியோர் இந்த அரிய காட்சியை கண்டு அதிர்ச்சி கலந்த பரவசம் அடைந்தனர்.

மலையை விட்டு கீழே இறங்கி நால் ரோடு பகுதியில் உள்ள ஒரு டீக்கடையில் டீ குடித்த இவர்கள் தாங்கள் கடம்பூர் அருகே புலியை பார்த்த திகில் அனுபவத்தை அந்த பகுதி மக்களிடம் கூறி வியப்படைந்தனர்.

இதே போல கடந்த சில தினங்களுக்கு முன் கடம்பூர் மலை அடிவாரம் உள்ள வன சோதனை சாவடி அருகே குட்டிப்புலி ஒன்று நடமாடியதையும் சிலர் பார்த்து வியப்படைந்தனர்.