காஞ்சிபுரம்

காஞ்சீபுரம்:

சின்ன காஞ்சீபுரம் கூட்டுறவு அர்பன் வங்கியில் கூட்டுறவு சங்க நிர்வாககுழு உறுப்பினர்களின் தேர்தல் நேற்று நடந்தது. அப்போது யாரோ மர்ம நபர்கள் உள்ளே நுழைந்து வாக்கு சீட்டுகளை சேதப்படுத்தி, ஓட்டிப்பெட்டியில் மை ஊற்றி சேதப்படுத்தி, தேர்தல் பணியாளர்களை தாக்கியதாக கூறப்படுகிறது.

இதனால் கூட்டுறவு சங்க தேர்தல் ரத்து ஆனதாக தேர்தல் அதிகாரி ராஜ் நந்தினி அறிவித்தார். இதனால் ஆத்திரம் அடைந்த தி.மு.க.வினர் ஆளும் கட்சியினர்தான் ஓட்டுப்பெட்டியை சேதப்படுத்தியதாக கூறி காஞ்சீபுரம் எம்.எல்.ஏ. எழிலரசன் தலைமையில் நகர செயலாளர் சன் பிராண்டு கே.ஆறுமுகம், மாவட்ட பொருளாளர் ஜி.சுகுமார், தலைமை செயற்குழு உறுப்பினர் சி.வி.எம்.அ.சேகர் உள்பட ஏராளமான தி.மு.க.வினர் வங்கியை முற்றுகையிட்டு போராட்டத்தில் ஈடுபட்டனர். #cooperativesocietieselection

தாம்பரம்:

தாம்பரம் சண்முகம் சாலை பாரதி திடலில் 100-க்கும் மேற்பட்ட நடைபாதை கடைகள் உள்ளன. இங்கு காய்கறிகள், பழங்கள், வளையல்கள், பாசிமணிகள் போன்றவை விற்பனை செய்யப்பட்டு வந்தன. நேற்று இரவு வழக்கம் போல் கடைகளை மூடிவிட்டு அனைவரும் வீட்டுக்கு சென்றுவிட்டனர். இரவு 12 மணியளவில் அங்குள்ள கடைகள் திடீரென தீப்பிடித்து எரிந்தது. காற்று வேகமாக வீசியதால் அடுத்தடுத்த கடைகளுக்கு தீ பரவியது.

இதற்கிடையே தீயணைப்பு படையினர் 2 வண்டிகளில் வந்து தீயை போராடி அணைத்தனர். இந்த தீ விபத்தில் 25 கடைகள் எரிந்து சாம்பலாயின. ரூ.20 லட்சம் மதிப்புள்ள பொருட்கள் தீயில் எரிந்தன. மின்கசிவு காரணமாக தீ விபத்து ஏற்பட்டிருக்கலாம் என கருதப்படுகிறது. தீ விபத்தில் எரிந்த கடைகளை எஸ்.ஆர்.ராஜா எம்.எல்.ஏ. நேரில் சென்று பார்த்தார்.

ஆலந்தூர்:

புதுவை முதல்-மந்திரி நாராயணசாமி சென்னை விமான நிலையத்தில் நிருபர்களிடம் கூறியதாவது:-

தமிழகத்தில் 11 எம்.எல்.ஏ.க்களை தகுதி நீக்கம் செய்யக்கோரிய வழக்கில் சென்னை ஐகோர்ட்டு நேற்று கூறிய தீர்ப்பில் சபாநாயகர் அதிகாரத்தில் கோர்ட்டு தலையிட முடியாது என்று தெரிவித்துள்ளது.

ஆனால் புதுவை மாநிலத்தை பொறுத்தவரை சபாநாயகர் உத்தரவில் கோர்ட்டு தலையிட முடியும் என்று கூறியுள்ளது. ஒரே மாதிரியான பிரச்சினையில் நீதிமன்றத்தில் 2 விதமான தீர்ப்பு வந்துள்ளது. இதுபற்றி வாட்ஸ்-அப், பேஸ்புக்கில் விமர்சனங்கள் எழுந்த வண்ணம் உள்ளன.

காவிரி மேலாண்மை வாரியம் தொடர்பாக புதுவை கொறடா மத்திய அரசு மீது சுப்ரீம் கோர்ட்டில் அவதூறு வழக்கு தொடர்ந்துள்ளார். இந்த வழக்கு விசாரணைக்கு வரும் போது இந்த முரணான தீர்ப்பு பற்றி நாங்கள் வலியுறுத்துவோம். 2 விதமான தீர்ப்பு பற்றி மக்கள் மன்றம் தான் முடிவு செய்ய வேண்டும்.

காவிரி மேலாண்மை வாரியம், காவிரி நதிநீர் ஒழுங்காற்று குழு அமைக்க வேண்டும் என்று தமிழகத்தில் தி.மு.க., காங்கிரஸ் மற்றும் மதசார்பற்ற கட்சிகள் போராட்டம் நடத்தி வருகின்றன. அதே போல் புதுவையிலும் நாங்கள் பல போராட்டங்கள் நடத்தியுள்ளோம்.

பிரதமர் மோடி புதுவை வந்த போது காவிரி மேலாண்மை வாரியம் அமைப்பது தொடர்பாக நானும், அமைச்சர்களும் கடிதம் கொடுத்துள்ளோம்.

சட்டமன்றத்திலும் தீர்மானம் நிறைவேற்றி இருக்கிறோம். பிரதமர் மோடி எதற்கும் செவி சாய்க்கவில்லை. பிரதமர் நினைத்திருந்தால் ஒரே நாளில் காவிரி மேலாண்மை வாரியம் அமைத்திருக்கலாம். ஆனால் காலம் தாழ்த்தி வருகிறார்.

இவ்வாறு அவர் கூறினார். #CMNarayanasamy #MLADisqualifycase

காஞ்சீபுரம்:

காஞ்சீபுரத்தை அடுத்த குருவிமலை பள்ளத்தெரு பகுதியில் 100-க்கும் மேற்பட்ட குடும்பங்கள் உள்ளன.

இங்குள்ள மக்களுக்கு கடந்த 8 மாதங்களாக முறையாக குடிநீர் வழங்கப்பட வில்லை. இதனை கண்டித்து அப்பகுதி பெண்கள் உள்ளிட்ட 100-க்கும் மேற்பட்டோர் காலி குடங்களுடன் காஞ்சீபுரம்- உத்திர மேரூர் சாலையில் மறியலில் ஈடுபட்டனர். இதனால் போக்குவரத்து பாதிக்கப்பட்டது. சம்பவ இடத்திற்கு மாகரல் போலீசார் விரைந்து வந்து மறியலில் ஈடுபட்டவர்களுடன் பேச்சு வார்த்தை நடத்தினர். இதனால் கல்லூரி மாணவர்கள் மற்றும் அலுவலகத்திற்கு செல்வோரும் சிரமத்திற்கு உள்ளாகினர்.

இந்த திடீர் சாலை மறியல் காரணமாக அப்பகுதியில் சிறிது நேரம் பரபரப்பு ஏற்பட்டது.

ஆலந்தூர்:

பிரேசிலில் இருந்து துபாய் வழியாக சென்னை வரும் விமானத்தில் பெரிய அளவில் கடத்தல் நடைபெறுவதாக மத்திய வருவாய் புலனாய்வு பிரிவினருக்கு தகவல் கிடைத்தது.

இதையடுத்து பிரேசிலில் இருந்து சென்னை வந்த விமானத்தில் வந்திறங்கிய பயணிகளிடம் அதிகாரிகள் அதிரடி சோதனை நடத்தினர்.

அப்போது போர்ச்சுக் கல்லை சேர்ந்த ஒருவர் கொண்டு வந்த கம்ப்யூட்டர் யூ.பி.எஸ். அதிக எடை இருந்தது. அதனை பிரித்து பார்த்த போது 6 பண்டல்களில் போதைப் பொருளான கோஹைன் இருந்தது.

வெளியில் தெரியாமல் இருக்க பண்டல்களை கம்பியால் சுற்றி யூ.பி.எஸ்.சில் மறைத்து கடத்தி வந்தது தெரிந்தது.

மொத்தம் 3 கிலோ கோஹைன் பறிமுதல் செய்யப்பட்டது. இதன் மதிப்பு ரூ.9 கோடி ஆகும். அதனை போதைப் பொருள் தடுப்பு பிரிவில் அதிகாரியிடம் ஒப்படைத்தனர்.

இதையடுத்து போர்ச்சுக்கல் நாட்டுக்காரரை அதிகாரிகள் கைது செய்தனர். பிரேசிலில் இருந்து போதைப் பொருளை வாங்கி சென்னை கடத்தி வந்துள்ளார்.

இது தொடர்பாக அவரிடம் விசாரணை நடந்து வருகிறது. சென்னையில் யார்? யாருக்கு போதைப் பொருள் சப்ளை செய்யப்பட இருந்தது என்ற விபரத்தையும் அவரிடம் சேகரித்து வருகிறார்கள். #Drugs

மதுராந்தகம்:

அச்சிறுபாக்கம் பெரியார் நகரைச் சேர்ந்தவர் சீனிவாசன் (வயது50). மதுராந்தகம் போலீஸ் நிலையத்தில் தலைமை காவலராக பணி புரிந்து வந்தார்.

இவர் கடந்த 20-ந்தேதி அதிகாலை அச்சிறுபாக்கம் தேசிய நெடுஞ்சாலையில் மோட்டார் சைக்கிளில் சென்றார். அப்போது எதிரே வந்த மோட்டார் சைக்கிள் மோதியது. இதில் சீனிவாசன் பலத்த காயம் அடைந்தார்.

அவரை மேல் சிகிச்சைக்காக சென்னையில் உள்ள தனியார் ஆஸ்பத்திரியில் சேர்த்து இருந்தனர். அவருக்கு தீவிர சிகிச்சை அளிக்கப்பட்டு வந்தது. இந்த நிலையில் நேற்று இரவு சிகிச்சை பலனின்றி சீனிவாசன் பரிதாபமாக இறந்தார்.