காஞ்சிபுரம்

காஞ்சீபுரம்:

பெரிய காஞ்சீபுரம் கூட்டுறவு நகர வங்கியில் கூட்டுறவு தேர்தல் வேட்பு மனுதாக்கல் கடந்த 30-ந்தேதி நடந்தது. 11 நிர்வாகக்குழு உறுப்பினர்களை தேர்ந்தெடுக்கும் தேர்தலுக்கு அ.தி.மு.க., தி.மு.க., பா.ம.க.வினர் மொத்தம் 35 பேர் மனுத்தாக்கல் செய்திருந்தனர்.

இதில் 15 மனுக்கள் மட்டும் பரிசீலனையில் ஏற்றுக்கொள்ளப்பட்டது. வேட்புமனு பரிசீலனை நாளான நேற்று தேர்தல் அதிகாரி வராததையும், முறையாக பரிசீலனை செய்யப்படவில்லை என்று கண்டித்தும் தி.மு.க. மற்றும் பா.ம.க.வினர் வங்கியை முற்றுகையிட்டனர்.

தேர்தல் நடத்தும் அதிகாரியின் அறைக்குள் காஞ்சீபுரம் எம்.எல்.ஏ. எழிலரசன் தலைமையில் தி.மு.க. நகர செயலாளர் சன்பிராண்டு கே.ஆறுமுகம், தலைமை செயற்குழு உறுப்பினர் சி.வி.எம்.அ.சேகர், ஒன்றிய செயலாளர்கள் பி.எம்.குமார், சிறுவேடல் செல்வம் மற்றும் பா.ம.க. மாவட்ட செயலாளர் வ.உமாபதி உள்ளிட்டோர் தரையில் அமர்ந்து போராட்டத்தில் ஈடுபட்டனர்.#CooperativeSocietieselection

மாமல்லபுரம்:

கல்பாக்கம் அணுமின் நிலையத்தில் உள்ள 2 அணு உலையில் தலா 220 மெகாவாட் மின் உற்பத்தி செய்யப்பட்டு வந்தது.

முதல் உலையின் ரியாக்டரில் கடந்த ஜனவரி 31-ந் தேதி நீர்க்கசிவு ஏற்பட்டதால் மின் உற்பத்தி நிறுத்தப்பட்டது.

இதை சரி செய்ய மகாராஷ்டிரா மாநிலம் தாராபூரில் இருந்து அணுமின் நிலைய சிறப்பு ரியாக்டர் என்ஜினீயர்கள் வந்து ஆய்வு நடத்தினர்.

ஆனால் இன்று வரை 3 மாதங்கள் ஆகியும் நீர்க் கசிவை அதிகாரிகளால் கண்டுபிடிக்க முடியவில்லை. இதனால் மின்உற்பத்தி முடங்கி உள்ளது.

பழுதான ரியாக்டர் 35 ஆண்டுகள் பழமையான தொழில்நுட்பம் என கூறப்படுகிறது. முதல் அணுஉலை பழுதால் தமிழகத்துக்கு வழங்கி வந்த 75 சதவீத மின்சாரம் தடைபட்டுள்ளது. எனவே கோடையில் மின்சாரம் பற்றாக்குறை ஏற்படும். அபாயம் ஏற்பட்டுள்ளது. #tamilnews

சென்னை:

தமிழ்நாடு வணிகர் சங்க பேரவை சார்பில் ஒவ்வொரு ஆண்டும் மே 5-ந் தேதி வணிகர் தினவிழா கொண்டாடப்படுகிறது.

35-வது வணிகர் தினவிழா வணிகம், விவசாயம் மற்றும் சுயதொழில்கள் மீட்பு மாநாடு காஞ்சீபுரம் பல்லவன் பொறியியல் கல்லூரி வளாகம் வெள்ளகேட் அருகில் நாளை (5-ந் தேதி) காலை 9 மணிக்கு நடைபெறுகிறது. மாநாட்டுக்கு மாநில தலைவர் த.வெள்ளையன் தலைமை வகிக்கிறார். பொதுச் செயலாளர் கே.தேவராஜ் வர வேற்புரையாற்றுகிறார்.

மாநாட்டில், அகில இந்திய வர்த்தக சங்க தலைவர் ஷியாம் பிகாரி மிஸ்ராம், முன்னாள் மத்திய மந்திரிகள் யஷ்வந்த் சின்ஹா, சத்ருகன் சின்ஹா, வர்த்தக சங்க பொதுச் செயலாளர் விஜய் பிரகாஷ் ஜெயின், உலக தமிழர் பேரமைப்பு நிறுவனர் பழ.நெடுமாறன், பொதுவுடமை இயக்க தலைவர் இரா.நல்லக்கண்ணு.

வங்கி ஊழியர் சம்மேளனம் சி.பி.கிருஷ்ணன், விவசாய சங்க கூட்டு இயக்க தலைவர் பி.கே.தெய்வசிகாமணி, மீத்தேன் எதிர்ப்பு இயக்கம் இரா.லெனின், சட்ட ஆலோசகர் வக்கீல் கே.பாலு, திரைப்பட இயக்குனர் கவுதமன், தமிழ்த் தேசிய பேரியக்கம் பெ.மணியரசன், புதுச்சேரி வர்த்தக சங்க தலைவர் எம்.கே.ராமன், தொலைத்தொடர்பு ஊழியர் சம்மேளனம் மாநில செயலாளர் சி.கே.மதிவாணன், பிளாஸ்டிக் உற்பத்தியாளர் சங்க தலைவர் ஜி.சங்கரன் உள்பட பலர் சிறப்புரையாற்றுகின்றனர்.

மாநாட்டில் கூடங்குளம் சுப.உதயகுமார், தூத்துக்கடி பேராசிரியை பாத்திமா பாபு ஆகியோர் தலைமையில் என்ன செய்யப்போகிறோம்... நாம்? என்ற தலைப்பில் விவாத அரங்கம் நிகழ்ச்சி நடைபெறுகிறது.

முன்னதாக காலை 9 மணிக்கு மாநாட்டு பந்தலில் காஞ்சீபுரம் எம்.கோபால் நாயக்கர் தேசிய கொடி ஏற்றுகிறார். ஆர்.நாராயணன் செட்டியார் வணிகக் கொடி ஏற்றுகிறார். மாநாட்டு பந்தலை பல்லவன் பொறியியல் கல்லூரி தாளாளர் பா.போஸ் திறந்து வைக்கிறார். தங்கம் வெள்ளையன், ஸ்ரீதேவி ராமகிருஷ்ணன், நர்மதா சம்பத், செல்வி விஸ்வநாதன், ஜெயராணி ராஜகோபால் ஆகியோர் குத்துவிளக்கு ஏற்றுகிறார்கள்.

மாநாட்டில் மத்திய சென்னை மாவட்ட தலைவர் ப.தேவராஜ், காஞ்சி மேற்கு மாவட்ட தலைவர் எம்.ராமகிருஷ்ணன், வியாசை மணி, மணலி டி.ஏ.சண்முகம், எச்.ஷாரூண் ரஷித், ஜி.அரிகிருஷ்ணன், மீஞ்சூர் டி.ஷேக் அகமது, பி.தனசேகரன், எஸ்.ஆர்.பி. ராஜன், தங்கதுரை, பெரம்பூர் ரெங்கசாமி நாடார், ஓட்டேரி ஜோதிராம் உள்பட நிர்வாகிகள் பலர் கலந்து கொள்கிறார்கள்.

மாநாடு குறித்து த.வெள்ளையன் கூறியதாவது:-

தமிழ்நாடு வணிகர் சங்கங்களின் பேரவை சார்பில் நாளை காஞ்சீபுரத்தில் நடைபெறும் மாநில மாநாட்டில் தமிழகம் முழுவதும் இருந்து 10 லட்சம் வணிகர்கள் கார், வேன், பஸ்களில் வந்து கலந்து கொள்கிறார்கள்.

மாநாட்டை முன்னிட்டு நாளை (5-ந் தேதி) தமிழகம் முழுவதும் அனைத்து கடைகளுக்கும் விடுமுறை விடப்பட்டுள்ளது. வணிகர்கள், வியாபாரிகள் குடும்பத்தினருடன் பங்கேற்கிறார்கள். மாநாட்டுக்கு வரும் வணிகர்களுக்கு உணவு, குடிநீர், அடிப்படை வசதிகள் ஏற்படுத்தப்பட்டு உள்ளது.

மாநாட்டையொட்டி பல்லவன் பொறியியல் கல்லூரி வளாகத்தில் பிரம்மாண்ட பந்தல், அலங்காரம் செய்யப்பட்டுள்ளது.

மாநாட்டில், அந்நிய ஆதிக்கத்தால் பாதிக்கப்படும் பாரம்பரிய வணிகம், விவசாயம், சுயதொழில்களை பாதுகாக்க முக்கிய தீர்மானங்கள் நிறைவேற்றப் படுகின்றன.

இவ்வாறு த.வெள்ளையன் கூறினார். #tamilnews

மாமல்லபுரம்:

வேலூர் பொன்னை பகுதியை சேர்ந்தவர் போஸ் குமார் (வயது 20). கூவத்தூரை அடுத்த சீக்கினாங்குப்பத்தில் உள்ள தனியார் கல்லூரி விடுதியில் தங்கி 2-ம் ஆண்டு படித்து வந்தார்.

இவர் உடன் படிக்கும் நண்பர் அருண் லோகேசுடன் மோட்டார் சைக்கிளில் அருகே உள்ள கடை வீதிக்கு சென்றுவிட்டு விடுதிக்கு திரும்பி வந்தார். சீக்கினாங்குப்பம் கிழக்கு கடற்கரை சாலையில் வந்த போது பாண்டிச் சேரியில் இருந்து சென்னை நோக்கி வந்த அரசு பஸ் திடீரென பைக் மீது மோதியது.

இதில் தலையில் அடிபட்டு சம்பவ இடத்திலேயே போஸ் குமார் உயிரிழந்தார். படுகாயம்அடைந்த அருண் லோகேஷ் செங்கல்பட்டு அரசு மருத்துவ மனையில் தீவிர சிகிச்சை பிரிவில் சேர்க்கப்பட்டார்.

இது குறித்து கூவத்தூர் போலீசார் விசாரணை நடத்தி வருகின்றனர்.

காஞ்சீபுரம்:

காஞ்சீபுரம் அருகே உள்ள சின்னையன் சத்திரம் பகுதிக்கு நேற்று மதியம் சுமார் 25 வயது மதிக்கத்தக்க வடமாநில வாலிபர் வந்தான். அவன் அங்குள்ள ஒரு வீட்டின் முன்பு விளையாடிய குழந்தையை தூக்கிக் கொண்டு செல்ல முயன்றான்.

குழந்தையின் அழுகுரல் கேட்டு வந்த அக்கம் பக்கத்தினர், வடமாநில வாலிபரிடம் விசாரித்தனர். ஆனால் அவனுக்கு அப்பகுதி மக்கள் பேசியது புரியவில்லை. மேலும் அவன் வடமாநில மொழியில் பதில் கூறினான்.

இதனால் சந்தேகம் அடைந்த அப்பகுதி மக்கள் குழந்தையை கடத்த வந்ததாக கூறி வடமாநில வாலிபரை சுற்றி வளைத்து சரமாரியாக தாக்கினர். இதில் அவனது தலையில் பலத்த காயம் ஏற்பட்டது. உடலிலும் ரத்தம் கொட்டியது.

இதுகுறித்து காஞ்சீபுரம் தாலுகா போலீசுக்கு தகவல் தெரிவிக்கப்பட்டது. போலீசார், படுகாயம் அடைந்த வாலிபரை மீட்டு சிகிச்சைக்காக காஞ்சீபுரம் அரசு ஆஸ்பத்திரியில் சேர்த்தனர்.

இந்த நிலையில் ஆஸ்பத்திரியில் இருந்து அந்த வாலிபர் திடீரென தப்பி ஓடிவிட்டார். அவரை போலீசார் தேடி வந்தனர். இதற்கிடையே ஆஸ்பத்திரியில் இருந்து சிறிது தூரத்தில் ரெயில்வே சாலையில் உள்ள மின் வாரிய அலுவலகம் அருகே வடமாநில வாலிபர் ஒருவர் இறந்து கிடந்தார்.

விசாரணையில் அவன் ஆஸ்பத்திரி யில் இருந்து தப்பி ஓடியவன் என்பது தெரிந்தது. பொது மக்கள் தாக்கியதில் தலையில் பலத்த காயம் அடைந்த அவன் இறந்து இருப்பது தெரியவந்தது.

அவனது உடலை போலீசார் கைப்பற்றி பிரேத பரிசோதனைக்காக காஞ்சீபுரம் அரசு ஆஸ்பத்திரிக்கு அனுப்பி வைத்தனர்.

கொலையுண்ட வாலிபர் ஒடிசா மாநிலத்தை சேர்ந்தவர் என்பது தெரியவந்து உள்ளது. அவரை பற்றிய மற்ற விபரங்கள் தெரியவில்லை.

குழந்தை கடத்தலில் ஈடுபட அவன் கூட்டாளிகளுடன் வந்து இருக்கலாம் என்று போலீசார் சந்தேகிக்கிறார்கள். இதுதொடர்பாக அவனுடன் வந்த கூட்டாளிகள் எங்கே? இதே போல் வேறு எங்கேனும் குழந்தை கடத்தலிலும் ஈடுபட்டு உள்ளனரா? என்று பல்வேறு கோணங்களில் போலீசார் விசாரணை நடத்தி வருகிறார்கள்.

குழந்தையை கடத்த முயன்ற வடமாநில வாலிபர் அடித்து கொல்லப்பட்ட சம்பவம் அப்பகுதியில் பரபரப்பை ஏற்படுத்தி உள்ளது.