நீங்கள் தேடியது "vilakku pooja"

குலசேகரன்பட்டினம் முத்தாரம்மன் கோவிலில் புரட்டாசி மாத பவுர்ணமியை முன்னிட்டு திருவிளக்கு பூஜை நடைபெற்றது. இதனை முன்னிட்டு காலை 6 மணிக்கு நடை திறக்கப்பட்டது. 8 மணிக்கு காலசந்தி பூஜை, மதியம் 12 மணிக்கு உச்சிகால பூஜை, மாலை 5.30 மணிக்கு சாயரட்சை பூஜை, இரவு 7.30 மணிக்கு 108 திருவிளக்கு பூஜை நடைபெற்றது. பின்னர் அம்மனுக்கு சிறப்பு தீபாராதனை நடைபெற்றது.

நிகழ்ச்சியில் குலசேகரன்பட்டினம் மற்றும் சுற்று வட்டார பகுதியை சேர்ந்த பெண்கள் ஏராளமானோர் கலந்துகொண்டு திருவிளக்கு பூஜை செய்து அம்மனை தரிசனம் செய்தனர்.

தென்காசி மாவட்டத்தில் பிரசித்தி பெற்ற கோவில்களில் ஒன்றான பாவூர்சத்திரம் அருகே சிவகாமிபுரம் பெரியம்மன் கோவிலில் திருவிழா கடந்த 7-ந்தேதி கணபதி ஹோமத்துடன் தொடங்கியது. தொடர்ந்து மாலையில் நெய்விளக்கு பூைஜ நடைபெற்றது. 8-ந் தேதி மாலையில் அம்மனுக்கு பக்தர்களால் புஷ்பாஞ்சலி நடத்தப்பட்டது. நேற்று முன்தினம் மாலையில் சுமங்கலி பூஜை நடந்தது.

நேற்று மாலையில் உலக நன்மை வேண்டி, திருவிளக்கு பூஜை நடைபெற்றது. இதில் திரளான பெண்கள் கலந்து கொண்டு வழிபட்டனர். தொடர்ந்து கரகாட்டம், நையாண்டி மேளம் நடந்தது. நள்ளிரவு 12 மணிக்கு அம்மன் சப்பரத்தில் எழுந்தருளி, வீதி உலா சென்று பக்தர்களுக்கு அருள்பாலித்தார். பின்னர் வாணவேடிக்கை நடைபெற்றது.

இன்று (செவ்வாய்க்கிழமை) மதியம் 12 மணிக்கு அன்னதானம், மாலை 4 மணிக்கு நையாண்டி மேளத்துடன் குற்றாலத்தில் இருந்து புனித நீர் எடுத்து வரப்படுகிறது. இரவு 8 மணிக்கு அம்மனுக்கு பட்டு உள்ளிட்ட நேர்ச்சை பொருட்கள் ஊர்வலமாக எடுத்து வரப்படுகின்றன. நள்ளிரவு 12 மணிக்கு அம்மனுக்கு சிறப்பு பூஜையை தொடர்ந்து மாவிளக்கு, முளைப்பாரி ஊர்வலமாக எடுத்து வரப்படுகிறது.

நாளை (புதன்கிழமை) மதியம் 12 மணிக்கு சிறப்பு தீபாராதனையை தொடர்ந்து அம்மன் வீதி உலா சென்று பக்தர்களுக்கு காட்சி அளிக்கின்றார். மாலை 5 மணிக்கு மஞ்சள் நீராட்டு விழா நடக்கிறது. விழா நாட்களில் தினமும் மாலையில் சிறுமிகள், பெண்கள் பங்கேற்ற கும்மியடி நிகழ்ச்சி நடைபெற்றது.

விழா ஏற்பாடுகளை சிவகாமிபுரம் ஊர் பொதுமக்கள் மற்றும் விழாக்குழுவினர் செய்துள்ளனர்.

தென்காசி:

பாவூர்சத்திரத்தில் அமைந்துள்ள பிரசித்தி பெற்ற முப்புடாதி அம்மன் கோவில் கொடை விழா நடைபெற்று வருகிறது. இதை முன்னிட்டு 108 விளக்கு பூஜை நடைபெற்றது. இதில் ஏராளமான பெண்கள் கலந்து கொண்டனர்.

தொடர்ந்து நாளை காலை 9 மணிக்கு அபிஷேகம், தீபாராதனையும், மாலை 6 மணிக்கு மாகாப்பு சிறப்பு அலங்காரம், தீபாராதனை அதனைத் தொடர்ந்து மாலை 6.30 மணிக்கு முப்புடாதி அம்மன் சிம்ம வாகனத்தில் திருவீதி உலா, இரவு 12 மணிக்கு சிறப்பு பூஜை, பஞ்சமுக தீபாராதனை நடக்கிறது.

வருகிற 27-ந்தேதி (செவ்வாய்க்கிழமை) காலை 10 மணிக்கு குற்றால தீர்த்தம் பவனி வருதல், பகல் 11 மணிக்கு சிறப்பு ஹோமங்களுடன் அபிஷேகம், சந்தன காப்பு, சிறப்பு அலங்காரம், தீபாராதனை, பிரசாதம் வழங்குதல். மாலை 6 மணிக்கு பக்தி இன்னிசை கச்சேரி, இரவு 12 மணிக்கு சாம பூஜை, பஞ்சமுக தீபாராதனை நடைபெறும். 28-ந்தேதி (புதன்கிழமை) பகல் 11 மணிக்கு பொங்கல் வழிபாடு, பகல் 12 மணிக்கு அம்மனுக்கு அபிஷேகம், மஞ்சள் நீராட்டு விழா தீர்த்தவாரி நடைபெறுகிறது.

மண்டைக்காடு பகவதி அம்மன் கோவிலில் ஆவணித் திருவிழா கடந்த 12-ந் தேதி தொடங்கி மூன்று நாட்கள் நடந்தது. முதல் நாள் சுமங்கலி பூஜை, இரண்டாம் நாள் அஸ்வதி பொங்கல் வழிபாடு நடைபெற்றது. நேற்று திருவிளக்கு பூஜை நடந்தது. இதையொட்டி காலை கணபதி ஹோமம், உற்சவ மூர்த்திக்கு பஞ்சாபிஷேகம், உஷபூஜை, பஜனை, மதியம் உச்சபூஜை நடந்தது. மாலை 5.45 மணிக்கு 201 திருவிளக்கு பூஜை நடைபெற்றது. இதில் திரளான பெண்கள் கலந்து கொண்டனர். 6.15 மணிக்கு தங்கரதம் பவனி, தீபாராதனை நடந்தது.

இரவு 7 மணிக்கு கோவில் சமய வகுப்பு மாணவர்கள் மற்றும் மண்டைக்காடு தேவஸ்தான மேல்நிலைப் பள்ளியில் 10 மற்றும் 12-ம் வகுப்பு பொதுத்தேர்வில் முதல் மதிப்பெண் பெற்ற மாணவர்கள் ஆகியோருக்கு பரிசு வழங்கப்பட்டது. 8 மணிக்கு அத்தாழ பூஜை நடைபெற்றது.

இதற்கான ஏற்பாடுகளை கோவில் நிர்வாகத்தினர் செய்திருந்தனர். விழா நாட்களில் திங்கள்நகர் அரசு போக்குவரத்து கழக பணிமனையில் இருந்து சிறப்பு பஸ்கள் இயக்கப்பட்டன.

திருச்செங்கோடு கைலாசநாதர் கோவில் சொக்கப்ப முதலியார் அரங்கத்தில் ஆடி வெள்ளிக்கிழமையையொட்டி 1,008 திருவிளக்கு பூஜை நடைபெற்றது. அருள்நெறி வார வழிபாட்டு குழு தலைவர் முருகேசன் தலைமை தாங்கினார். அகில பாரத சன்னியாசிகள் சங்க பொறுப்பாளர் ராமானந்தா சுவாமிகள், மயில் முருகேஷ் சுவாமிகள் ஆகியோர் முன்னிலை வகித்தனர்.

தேசிய சிந்தனை பேரவை தலைவர் திருநாவுக்கரசு ஆன்மிகம் குறித்து பேசினார். மீனாட்சி ரவிச்சந்திரன், ரேணுகா லட்சுமண சுவாமி ஆகியோர் லலிதா சகஸ்ரநாமம் பாராயணம் செய்தனர். இதையடுத்து உலக நன்மைக்காகவும், மழை வேண்டியும் 1,008 பெண்கள் மற்றும் சிறுமிகள் அமர்ந்து விளக்கு ஏற்றி பூஜை செய்தனர்.

பூஜை செய்த ஒவ்வொருவருக்கும் மஞ்சள் பிள்ளையார், உதிரி புஷ்பம், லட்டு, ஊதுபத்தி, கற்பூரம், விபூதி, குங்குமம் உள்ளிட்ட மங்களப் பொருட்கள் வழங்கப்பட்டது. மேலும் சுகுந்த குந்தலாம்பிகை சன்னதியில் சாமிக்கு சிறப்பு அபிஷேகம், மகாதீப ஆராதனை நடந்தது.

புளியங்குடி:

புளியங்குடி அரசு மருத்துவமனை அருகில் உள்ள முப்பெரும் தேவியர் பவானி அம்மன் ஆலயத்தில் உள்ள பெரிய பாளையத்து பவானியம்மன், நாககன்னியம்மன், நாகம்மன் கோவிலில் மாதந்திர விளக்கு பூஜை நடைபெற்றது.

அதன்படி வைகாசி மாதம் கடைசி வெள்ளிக்கிழமையை முன்னிட்டு மாலை 6 மணி அளவில் கோவில் குருநாதர் சக்தியம்மா தலைமையில் உலக நன்மைக்காகவும், மழை வேண்டியும், கொரோனா முழுவதும் அழிந்து போகவும், சிறப்பு மந்திரங்களும் சிறப்பு பூஜைகளும் இரவு 7 மணிக்கு 508 சிறப்பு திருவிளக்கு பூஜையும் நடைபெற்றது.

இதில் ஏராளமான பெண்கள் கலந்து கொண்டு பாடல்கள் பாடி திருவிளக்கில் தீபமேற்றி பூஜை நடந்தது. முன்னதாக அதிகாலை 5 மணிக்கு நடை திறக்கப்பட்டு அம்மன்களுக்கு பால், மஞ்சள், தயிர், குங்குமம் உள்பட 18 வகையான அபிஷேகங்கள் நடந்தது.

பின் மஞ்சள் காப்பு அலங்காரம் செய்யப்பட்டு தீபாராதனை காண்பிக்கப்பட்டது. அதனைத் தொடர்ந்து மாலை வரை சிறப்பு அருள் வாக்கு நடைபெற்றது. இரவு 9 மணிக்கு அனைவருக்கும் அறுசுவை அன்னதானம் வழங்கப்பட்டது.

விழா ஏற்பாடுகளை கோவில் குருநாதர் சக்தியம்மா மற்றும் நிர்வாகத்தினர் செய்திருந்தனர்.