சிவகங்கை

சிவகங்கை:

சிவகங்கை மாவட்டத்தில் வருவாய் அலுவலர் சங்கத்தினர் இரு தரப்பினராக உள்ளனர். இதில் ஒரு பிரிவினர் தமிழ்நாடு வருவாய்த்துறை அலுவலர் சங்கம் என்றும், மற்றொரு பிரிவினர் வருவாய்த்துறை அலுவலர் சங்கம் (விடியல்) என்றும் செயல்பட்டு வருகின்றனர்.

சிவகங்கை மாவட்ட கலெக்டர் அலுவலக வளாகத்தில் வருவாய்த்துறையைச் சேர்ந்த இரு சங்கத்தினர்களிடையே மோதல் ஏற்பட்டது. இதில் 7 பேர் காயம் அடைந்தனர். இந்த மோதலால் கலெக்டர் அலுவலகத்தில் பலத்த போலீஸ் பாதுகாப்பு போடப்பட்டது.

தாக்குதல் குறித்த புகாரின்பேரில் சிவகங்கை நகர் போலீசார் விசாரணை நடத்தி இருதரப்பைச் சேர்ந்த 22 பேர் மீது வழக்குப்பதிவு செய்துள்ளனர்.

இந்நிலையில் மோதலில் ஈடுபட்டதாக வருவாய்த் துறை அலுவலர் சங்கத்தை (விடியல்) சேர்ந்த தாசில்தார்கள் பாலாஜி, பாலகுரு ஆகிய 2 பேரை சஸ்பெண்டு செய்து மாவட்ட கலெக்டர் மலர்விழி அதிரடி உத்தர விட்டுள்ளார்.

இதற்கிடையே மோதலில் ஈடுபட்டவர்களை கைது செய்யக்கோரியும், பொய் வழக்கை திரும்ப பெறக்கோரியும் தமிழ்நாடு வருவாய்த்துறை அலுவலர் சங்கத்தினர் கலெக்டர் அலுவலகம் முன்பு காத்திருப்பு போராட்டத்தில் ஈடுபட்டனர்.

கலெக்டர் அலுவலகத்தில் வருவாய்த்துறையினரின் இந்த போராட்டத்தால் அரசு பணிகள் பாதிக்கப்பட்டது.

திருப்பத்தூர்:

திருப்பத்தூரில் உள்ள காந்திநகரை சேர்ந்தவர் முருகேசன் (வயது 73), ஓய்வு பெற்ற ராணுவ வீரர். இவரது மனைவி செல்வி (58). இவர்களுக்கு கோபி என்ற மகன் உள்ளார்.

இந்த நிலையில் நேற்று முன்தினம் திடீரென முருகேசனுக்கு மாரடைப்பு ஏற்பட்டது. உடனே அவரது குடும்பத்தினர் சிகிச்சைக்காக அவரை திருப்பத்தூர் அரசு ஆஸ்பத்திரிக்கு அழைத்து வந்தனர். அங்கு முருகேசனை பரிசோதித்த டாக்டர்கள் அவர் ஏற்கனவே இறந்துவிட்டார் என கூறினர்.

இதனால் அதிர்ச்சியடைந்த செல்வி சோகமாக காணப்பட்டார். மேலும் யாரிடமும் பேசாமல் பித்து பிடித்தது போல வீட்டில் இருந்தார். இந்த நிலையில் வாழ்க்கையில் வெறுப்படைந்த செல்வி நேற்று காலை வீட்டில் உள்ள கிணற்றில் குதித்தார். உடனடியாக அக்கம்பக்கத்தில் இருந்தவர்கள் திருப்பத்தூர் தீயணைப்பு படையினருக்கு தகவல் தெரிவித்தனர்.

அதன்பேரில் தீயணைப்பு படையினர் சம்பவ இடத்திற்கு விரைந்து வந்து, நீண்ட நேரம் போராடி செல்வியை உயிருடன் கிணற்றில் இருந்து மீட்டனர். பின்னர் 108 ஆம்புலன்ஸ் மூலம் செல்வி சிகிச்சைக்காக திருப்பத்தூர் அரசு ஆஸ்பத்திரிக்கு அனுப்பி வைக்கப்பட்டார். அங்கு சென்ற சிறிது நேரத்தில் மூச்சு திணறல் ஏற்பட்டு செல்வி பரிதாபமாக இறந்தார்.

இதுகுறித்து திருப்பத்தூர் டவுன் போலீசார் வழக்குப்பதிவு செய்து, விசாரணை நடத்தி வருகின்றனர்.

கணவர் இறந்த சோகத்தில் மனைவி கிணற்றில் குதித்து தற்கொலை செய்து கொண்ட சம்பவம் அப்பகுதியில் பெரும் சோகத்தை ஏற்படுத்தி உள்ளது.

திருப்பத்தூர்:

வேலூர் மாவட்டம் ஜோலார்பேட்டை ஏலகிரி மலையில் கோட்டூர் என்ற பகுதியில் வனத்துறைக்கு சொந்தமான நச்சுத் காப்புக் காடு உள்ளது.

இதில் சந்தன மரங்கள் மற்றும் தேக்கு மரங்கள் உள்பட பல்வேறு வகை மரங்கள் ஏராளமாக அடர்ந்து வளர்ந்துள்ளன.

நச்சுத் காப்புக் காட்டில் நள்ளிரவு 1 மணியளவில் மரங்கள் வெட்டி கடத்தப்படுவதாக திருப்பத்தூர் வனத்துறையினருக்கு ரகசிய தகவல் கிடைத்தது.

இதையடுத்து, வனவர் பரமசிவம் தலைமையில் உதவி வன பாதுகாவலர் முகம்மது ரபீக், வனவர்கள் பிரபு, பரந்தாமன் உள்ளிட்ட வனத்துறையினர் ஏலகிரி மலைக்கு விரைந்து சென்றனர்.

காப்புக் காட்டிற்குள் வனத்துறையினர் நுழைந்த போது, ஆயுதப்படைக்கு சொந்தமான போலீஸ் வேன் நின்று கொண்டிருந்தது. 10-க்கும் மேற்பட்ட கும்பல், தேக்கு மரங்களை வெட்டி போலீஸ் வேனில் அடுக்கி கடத்துவதற்கு தயாராகி கொண்டிருந்தனர்.

வனத்துறையினர் நெருங்கி சென்றபோது, மரங்களை வெட்டிய கும்பல் தலைத்தெறிக்க தப்பி ஓட முயன்றது. வனத்துறையினர் விரட்டியதில் 2 பேர் மட்டுமே பிடிபட்டனர். மற்றவர்கள் தப்பிவிட்டனர்.

பிடிபட்டவர்கள் ஏலகிரி மலை நிலாவூரை சேர்ந்த கோவிந்தராஜ் மகன் வேல்முருகன் (வயது 28), தர்மபுரி மாவட்டம் பாப்பி ரெட்டிப்பட்டி அருகே உள்ள இருளபட்டி கிராமத்தை சேர்ந்த பால கிருஷ்ணன் மகன் தம்பிதுரை (27) என்பது தெரியவந்தது.

இருவரும் கிருஷ்ணகிரி மாவட்டம் போச்சம்பள்ளியில் ஆயுதப்படை பிரிவு 7-வது பட்டாலியனில் போலீஸ்காரர்களாக பணியாற்றுகிறார்கள்.

காவல்துறைக்கு தேவையான தேக்கு மரங்களை உயர் அதிகாரிகள் உத்தரவின் பேரிலேயே வெட்டியதாக கூறி வனத்துறையினரிடம் அவர்கள் கடும் வாக்குவாதம் செய்தனர்.

வனத்துறைக்கு சொந்தமான மரங்களை வெட்டுவதற்கு காவல் துறைக்கு அதிகாரம் இல்லை. மரங்களை வெட்ட சொன்ன அதிகாரி யார்? நள்ளிரவில் மரங்களை வெட்டியது ஏன்? என்று கேட்டு வனத்துறையினரும் பதிலுக்கு வாக்குவாதம் செய்தனர்.

பதில் அளிக்க முடியாமல் திணறிய 2 போலீஸ்காரர்களிடம் கிடுக்கிப்பிடி விசாரணை மேற்கொண்டனர். அதில், பிடிபட்ட போலீஸ்காரர் வேல்முருகனின் வீடு ஏலகிரி மலையில் இருப்பதால், அவர் மூலமே தேக்கு மரங்களை வெட்டி கடத்த திட்டமிட்டுள்ளனர்.

ஆயுதப்படையில் தன்னுடன் பணிபுரியும் தம்பிதுரையிடம், சந்தன மற்றும் தேக்கு மரங்களை கடத்தி விற்றால் மாத சம்பளத்தை விடமும் அதிக பணம் கிடைக்கும். சொகுசு வாழ்க்கை வாழலாம் என்று வேல்முருகன் ஆசை வார்த்தை கூறியுள்ளார்.

பணத்திற்கு ஆசைப்பட்டு தம்பிதுரையும் மரங்களை கடத்துவதற்கு ஒப்புக் கொண்டார். நேற்றிரவு பணி நேரம் முடிந்தவுடன், உயர் அதிகாரிகளுக்கு தெரியாமல் போலீஸ் வேனை 2 பேரும் ஏலகிரிக்கு ஓட்டி வந்தனர். போலீஸ் வேனில் மரங்களை கடத்தினால் யாருக்கும் சந்தேகம் வராது.

வழியில் வனத்துறையினரோ? அல்லது போலீசாரோ? மடக்கி சோதனை செய்ய மாட்டார்கள் என்று நினைத்தனர்.

மரங்களை கடத்துவது போலீஸ்காரர்கள் என்பதால் 10-க்கும் மேற்பட்டோர் கூட்டு சேர்ந்தனர். சந்தன மரங்களை கடத்த முயன்றனர். ஆனால் இவர்கள் கண்ணில் தேக்கு மரங்கள் மட்டுமே தென்பட்டன. இதையடுத்து கட்டர், கத்தி உள்ளிட்ட ஆயுதங்களை கொண்டு தேக்கு மரங்களை வெட்டி சாய்த்தனர்.

சுமார் 2 டன் எடையுள்ள தேக்கு மரங்களை 40 துண்டுகளாக வெட்டி போலீஸ் வேனில் அடுக்கி கடத்துவதற்கு தயாராகி கொண்டிருந்தபோது, வனத்துறையினரிடம் சிக்கி கொண்டது தெரியவந்தது.

இதையடுத்து, போலீஸ்காரர்கள் வேல்முருகன் மற்றும் தம்பிதுரையை வனத்துறையினர் கைது செய்தனர். அவர்கள் பயன்படுத்திய போலீஸ் வேனும், 2 டன் தேக்கு மரங்களுடன் பறிமுதல் செய்யப்பட்டது.

மேலும், தப்பி ஓடிய கும்பல் ஏலகிரியை சேர்ந்த கைது செய்யப்பட்ட போலீஸ்காரர் வேல்முருகனின் உறவினர்களா? அல்லது ஆயுதப்படையை சேர்ந்த போலீசாரா? என்பது குறித்தும் தீவிர விசாரணை நடத்தினர்.

இதையடுத்து, 2 பேரையும் குடியாத்தம் சப்-கோர்ட்டில் ஆஜர்படுத்தி ஜெயிலில் அடைத்தனர். இந்த சம்பவம் ஏலகிரியில் பரபரப்பை ஏற்படுத்தியது.

காரைக்குடி:

காரைக்குடி செஞ்சை அவ்வையார் தெருவில் வசித்து வருபவர் ஆறுமுகம். இவரது மனைவி ஆதம்மை(52) இருவரும் காரைக்குடி கீழவூரணி பகுதியில் கரும்புச்சாறு கடை நடத்தி வருகின்றனர்.

நேற்று மதியம் கரும்புச்சாறு தயாரிக்கும்போது ஆதம்மையின் வலது கை விரல்கள் எந்திரத்தின் நடுவில் சிக்கிக்கொண்டன.தகவல் அறிந்த தீயணைப்பு மீட்பு படையினர் பல்வேறு முயற்சி செய்தும் கையை மீட்க முடியவில்லை. 108 ஆம்புலன்சில் வந்த செவிலியர் வலி தெரியாமல் இருக்க அருகில் உள்ள சுகாதார நிலையத்தில் இருந்து ஊசி எடுத்துவந்து செலுத்தினார். பின்னர் கட்டர் மெசினால் கரும்புச்சாறு எந்திரத்தை வெட்டியபிறகே கையை மீட்க முடிந்தது.பிறகு ஆதம்மை மயங்கியநிலையில் சிகிச்சைக்காக காரைக்குடி அரசு மருத்துவமனைக்கு அனுப்பி வைக்கப்பட்டார்.

எந்திரத்தில் சிக்கிய கையோடு சுமார் ஒருமணி நேரமாக ஆதம்மை வலியால் துடித்தது காண்போர் கண்களில் கண்ணீரை வரவழைத்தது.

சிவகங்கை:

பாரதிய ஜனதா கட்சியின் மூத்த தலைவர் சுப்பிரமணிய சாமி அண்மையில் தனது டிவிட்டர் பக்கத்தில் நடிகர் ரஜினிகாந்த் அரசியலுக்கு வருவது தொடர்பாக சில சர்ச்சையான கருத்துகளை தெரிவித்து இருந்தார். இதற்கு ரஜினி ரசிகர்கள் கடும் எதிர்ப்பு தெரிவித்தனர்.

இந்நிலையில் சிவகங்கை மாவட்ட ரஜினி ரசிகர் மன்ற தலைவர் ராஜ்குமார் தலைமையில் 15 பேர் சிவகங்கை பஸ் நிலையம் முன்பு திரண்டனர்.

அவர்கள் ரஜினியை கீழ்தரமாக விமர்சித்த சுப்பரமணியசாமியை கைது செய்யவேண்டும் என கோ‌ஷமிட்டவாறு அவரது உருவப்பொம்மையை எரிக்க முயன்றனர்.

அப்போது அங்கு வந்த நகர் போலீஸ் இன்ஸ் பெக்டர் மோகன் மற்றும் போலீசார் விரைந்து வந்து உருவப்பொம்மையை பறிமுதல் செய்து ரஜினி ரசிகர்களை கைது செய்தனர். இதனால் அங்கு சிறிது நேரம் பரபரப்பு ஏற்பட்டது.

சிவகங்கை:

சிவகங்கை நகர் செந்தமிழ் நகரை சேர்ந்தவர் பிரபாகரன் (வயது 27). இவர் சம்பவத்தன்று வீட்டை பூட்டிவிட்டு சாவியை கதவு அருகில் வைத்துவிட்டு வெளியே சென்றார்.

இந்நிலையில் இதை நோட்டமிட்ட மர்ம நபர் சாவியை எடுத்து கதவை திறந்து வீட்டுக்குள் புகுந்தார். பின்னர் பிரோவில் இருந்த 2½ பவுன் நகையை எடுத்துக் கொண்டு தப்ப முயன்றார்.

அப்போது பிரபாகரன் வீட்டுக்குள் வரவே திருடனை கையும் களவுமாக பிடித்து நகர் போலீசில் ஓப்படைத்தார். இன்ஸ்பெக்டர் மோகன் விசா ரணை நடத்தியதில் மதுரை சம்பக்குளத்தை சேர்ந்த பிரதீப்ராஜன் (38) என தெரியவந்தது. இதையடுத்து போலீசார் அவரை கைது செய்து நகையை பறிமுதல் செய்தார்.