காஞ்சிபுரம்

ஸ்ரீபெரும்புதூர்:

விடுதலை சிறுத்தை கட்சி தலைவர் தொல். திருமாவளவன் பிறந்த நாளை முன்னிட்டு திருப்பெரும்புதூர் செங்காட்டில் ஒன்றிய துணை செயலாளர் தினகரன் தலைமையில் பொதுகூட்டம் நடைபெற்றது.

ஒன்றிய பொருளாளர் பூவரசன் வரவேற்றார். ஒன்றிய செயலாளர் தியாகராஜன், நிர்வாகிகள் கலைவடிவன், கட்சிப்பட்டு பழனி, சமத்துவன், ராமராஜன் முன்னிலை வகித்தனர். தமிழரசன், சுடர்வளவன், விஜய், இன்பசேகரன், ஒருங்கிணைத்தனர். காஞ்சீபுரம் மைய மாவட்ட செயலாளர் தமிழரசன், தொகுதி செயலாளர் மேனகா தேவி கோமகன் நலத்திட்ட உதவிகளை வழங்கினர்.

சிறப்பு அழைப்பாளராக கலந்து கொண்ட மாநில நிர்வாகிகள் சிபிசந்தர், நீலவானத்து நிலவன், திராவிட மணி ஆகியோர் பேசினர். நிர்வாகிகள் கராத்தே பாண்டி, தளபதி சுந்தர், கெளதம், சித்தார்த்தன், யோகா, தமிழ்வளவன், ஈசன், சாந்தன், வெற்றி வளவன், ரவி, ஸ்ரீதர், மணிகண்டன், துளசி, இளங்கோவன், வீரராகவன், பிரபாகரன், கிரி, முருகன், அய்யப்பன், அருண், குமார், ஈட்டி, ராஜிகுமார், முருகன், செந்தமிழன், கமல் கலந்து கொண்டனர். ஒன்றிய பொருளாளர் விநாயகம் நன்றி கூறினார்.

தாம்பரம்:

சேலையூரை அடுத்த சந்தோசபுரத்தை சேர்ந்தவர் ராஜன் (வயது 31). தனியார் பள்ளியில் பஸ் டிரைவராக இருந்தார். இவரது மனைவி சீதாலட்சுமி. இவர்களுக்கு ஒரு மகனும், மகளும் உள்ளனர்.

கடந்த சனிக்கிழமை ராஜன் திடீரென வீட்டில் தூக்குப்போட்டு தற்கொலை செய்து கொண்டார். சேலையூர் போலீசார் விசாரணை நடத்திய போது ராஜன் எழுதி வைத்து இருந்த கடிதம் சிக்கியது.

அதில், தனது தற்கொலை முடிவுக்கு மனைவி சீதாலட்சுமி, மற்றும் அவரது கள்ளக்காதலன் அதே பகுதியில் ஜெராக்ஸ் கடை நடத்தி வரும் ஐவர்ராஜ் என்று குறிப்பிட்டு இருந்தார்.

இது குறித்து போலீசார் வழக்குப்பதிவு செய்து சீதாலட்சுமி அவரது கள்ளக்காதலன் ஐவர்ராஜை கைது செய்தனர். அவர்கள் மீது தற்கொலைக்கு தூண்டியதாக வழக்கு பதிவு செய்யப்பட்டு உள்ளது.

கைதான சீதாலட்சுமி போலீசில் அளித்துள்ள வாக்கு மூலத்தில், “எனக்கும் ஐவர்ராஜிக்கும் கள்ளக்காதல் ஏற்பட்டது. இதனை அறிந்த கணவர் ராஜன் கள்ளக்காதலை கைவிட கூறினார். இதற்கு நான் மறுத்தேன்.

மேலும் கணவரை பிரிந்து பனையூரில் உள்ள பெற்றோர் வீட்டுக்கு சென்று விட்டேன்.

இதுபற்றி நான் ஐவர்ராஜிடம் கூறினேன். அவர் கணவர் ராஜனை செல்போனில் பேசி மிரட்டினார் என்று கூறியுள்ளார்.

சோழிங்கநல்லூர்:

நீலாங்கரையை அடுத்த வெட்டுவங்கேணி கற்பக விநாயகர் நகரைச் சேர்ந்தவர் பூங்காவனம் . இவரது மகள் வெண்ணிலா (13).

தனியார் பள்ளியில் 9-ம் வகுப்பு படித்து வந்தாள். கடந்த 3 நாட்களாக மாணவிக்கு காய்ச்சல் இருந்தது. இதற்கு தனியார் ஆஸ்பத்திரிக்கு சென்று சிச்சை பெற்றனர்.

நேற்று திடீரென்று வெண்ணிலா மயங்கி விழுந்தாள். உடனே மாணவியை சென்னை ராயபேட்டை அரசு ஆஸ்பத்திரிக்கு கொண்டு சென்றனர்.

வெண்ணிலாவை பரிசோதித்த டாக்டர்கள் அவர் இறந்து விட்டதாக தெரிவித்தனர். மர்ம காய்ச்சலுக்கு மாணவி பலியானதால் நீலாங்கரையில் பரபரப்பு நிலவுகிறது.

அப்பகுதியில் சாக்கடை நீர் தேங்குவதால் கொசுக்கள் தொல்லை இருப்பதாக பொதுமக்கள் குற்றம் சாட்டி உள்ளனர்.

திருப்போரூர்:

துரைப்பாக்கம், கண்ணகி நகரை சேர்ந்தவர் வீரமணி (வயது 24). ரவுடி. இவர் மீது கொலை வழக்கு உள்ளிட்ட பல்வேறு வழக்குகள் உள்ளன.

இவர் துரைப்பாக்கத்தை அடுத்த கீரப்பாக்கத்தில் உள்ள சகோதரி வீட்டுக்கு வந்து இருந்தார். நேற்று இரவு சாப்பிட்டு முடிந்ததும் வீட்டின் வெளியே சிறிது தூரம் நடந்து சென்றார்.

அப்போது மோட்டார் சைக்கிளில் வந்த 3 வாலிபர்கள் வீரமணியை வழிமறித்தனர். கண் இமைக்கும் நேரத்தில் மறைத்து வைத்திருந்த அரிவாளால் அவரை சரமாரியாக வெட்டினர்.

கழுத்து, தலையில் பலத்த காயம் அடைந்த வீரமணி ரத்த வெள்ளத்தில் சம்பவ இடத்திலேயே பரிதாபமாக இறந்தார். உடனே கொலை கும்பல் மோட்டார் சைக்கிளில் தப்பி சென்று விட்டனர்.

இதனை பார்த்து அதிர்ச்சி அடைந்த அப்பகுதி மக்கள் காயார் போலீசுக்கு தகவல் தெரிவித்தனர். போலீசார் விரைந்து வந்து உடலை கைப்பற்றி விசாரணை நடத்தினர்.

கொலையுண்ட வீரமணி ஒரு கொலை வழக்கில் கைதாகி கடந்த சில நாட்களுக்கு முன்புதான் வெளியே வந்து இருந்தார். எதிரிகள் அவரை தீர்த்து கட்ட நோட்டமிடுவது தெரிந்ததும், அவர் கீரப்பாக்கத்தில் உள்ள சகோதரி வீட்டில் தங்கி இருந்தார். அங்கு வந்ததும் வீரமணியை எதிர் தரப்பினர் கொலை செய்து விட்டனர்.

காஞ்சீபுரம்:

காஞ்சீபுரம் மாவட்ட போலீசார் மற்றும் விநாயகர் சதுர்த்தி விழா குழுவினர் கலந்து கொண்ட ஆலோசனை கூட்டம் காஞ்சீபுரத்தில் உள்ள தனியார் திருமண மண்டபத்தில் நடைபெற்றது.

மாவட்ட உதவி போலீஸ் சூப்பிரண்டு முகிலன், இன்ஸ்பெக்டர்கள் பழனி, பிரபாகர், மணிமாறன், வெற்றிச்செல்வன் கலந்து கொண்டனர்.

அப்போது அவர் கூறும் போது, ‘விநாயகர் சிலை வைக்கும் இடத்தின் உரிமையாளரிடம் முறையான அனுமதி பெற வேண்டும்.

சிலை நனையாதவாறு தகறத்தால் மேற்கூரை அமைக்க வேண்டும். சிலைக்கு இரவும், பகலும் பாதுகாப்பு அளிக்க வேண்டும்.

கூம்பு வடிவ ஒலிபெருக்கியை பயன்படுத்த கூடாது. சிலை பாதுகாப்பு குழுவினர் மது அருந்துபவர்களை சேர்க்க கூடாது. மேலும் சிலை வைக்கப்படும் இடத்தில் தீயணைப்பு சாதனங்கள் இருக்க வேண்டும். போலீசார் அனுமதியில்லாமல் சிலையை எடுத்துச் செல்லக்கூடாது.

ஊர்வலத்தின்போது கலர்பொடி தூவுதல், பட்டாசு வெடித்தல், மேளம் போன்றவைகளை பயன் படுத்தகூடாது. முக்கியமாக விநாயகர் சிலை வைக்கப்பட்டுள்ள இடத்தில் கண்காணிப்பு கேமிராவை அவசியம் பொருத்த வேண்டும் என்பது உள்ளிட்ட பல்வேறு ஆலோசனைகள் வழங்கினர்.

விநாயகர் சதுர்த்தி விழாவையொட்டி திருவள்ளூர் மாவட்டத்தில் முன் எச்சரிக்கை ஏற்பாடு குறித்த ஆலோசனை கூட்டம் கலெக்டர் அலுவலக கூட்டரங்கத்தில் நடைபெற்றது. மாவட்ட கலெக்டர் சுந்தர வல்லி தலைமை தாங்கினார். அப்போது அவர் பேசியதாவது:-

நீர்நிலைகளை பாதுகாக்கும் வகையில் விநாயகர் சதுர்த்தி விழாவை கொண்டாடும் போது விநாயகர் சிலைகளை மாவட்ட நிர்வாகத்தினால் குறிப்பிடப்பட்டுள்ள இடங்களில் மட்டும் கரைத்து சுற்றுச் சூழலை பாதுகாக்க ஒத்துழைப்பு வழங்க வேண்டும்.

ரசாயன வண்ணம் பூசப்பட்ட சிலைகளை நீர்நிலைகளில் கரைக்க அனுமதிக்கப்படமாட்டாது. நிகழ்ச்சியில் போலீஸ் சூப்பிரண்டு சி.பி.சக்கரவர்த்தி, மாவட்ட வருவாய் அலுவலர் முத்து, மாசு கட்டுப்பாட்டு அலுவலர்கள் வாசுதேவன், பிகாஷ் பங்கேற்றனர்.

காக்களூர் ஏரி (திருவள்ளூர்), எம்.ஜி.ஆர். நகர் ஏரி (திருவள்ளூர் டவுன்), கூவம் ஏரி (மப்பேடு), திருமழிசை குளம் (வெள்ளவேடு), ஊத்துக்கோட்டை குளம்,) சித்தேரி (பெரியபாளையம்), கொசத்தலை ஆறு (வெங்கல்).

காந்தி சாலை குளண் (திருத்தணி), வண்ணான்குளம் (ஆர்.கே.பேட்டை), கரீம்பேடுகுளம் (பள்ளிப்பட்டு), பாண்டரவேடு குளம் (பொதட் டூர்பேட்டை), பராசக்தி நகர் குளம் (திருவாலங்காடு).

கனகம்மாசத்திரம் குளம் (கனகம்மாசத்திரம்), ஏழுக்கண் பாலன் (கும்மிடிப்பூண்டி), பக்கிம்ஹாம் கால்வாய் (மீஞ்சூர்), பழவேற்காடு ஏரி (திருப்பாலைவனம்), கொசஸ்தலை ஆறு (சீமா வரம்) ஆகிய 17 இடங்களில் மட்டும் விநாயகர் சிலைகளை கரைக்க அனுமதி அளிக்கப்பட்டு உள்ளது.

இவ்வாறு அவர் பேசினார்.

மதுராந்தகம்:

அச்சரப்பாக்கம், வண்டிக்குப்பம் நகரை சேர்ந்தவர் தசரதன் (வயது 35). இன்று காலை அவர் மோட்டார் சைக்கிளில் வெங்கடேசபுரம் சாலையில் சென்றார்.

அப்போது ரெயில் வருவதையொட்டி அங்குள்ள ரெயில்வே கேட் மூடப்பட்டு இருந்தது. ஆனால் தசரதன் மோட்டார் சைக்கிளோடு தடுப்பை தாண்டி தண்டவாளத்தை கடக்க முயன்றார்.

அப்போது அவ்வழியே வந்த எக்ஸ்பிரஸ் ரெயில் தசரதன் மீது மோதியது. இதில் அவர் சம்பவ இடத்திலேயே பலியானார்.

மதுராந்தகத்தை அடுத்த மோச்சேரியை சேர்ந்தவர் தமிழ்ச்செல்வன் (வயது 32) கூலித் தொழிலாளி. இவர் மதுராந்தகம் - சூனாம்பேடு சாலையில் உள்ள மேம்பாலத்தின் கீழ் தடை செய்யப்பட்ட பகுதியில் தண்டவாளத்தை கடக்க முயன்றார். அப்போது அவ்வழியே வந்த எக்ஸ்பிரஸ் ரெயில் தமிழ்ச்செல்வன் மீது மோதியது. இதில் அவர் சம்பவ இடத்திலேயே பலியானார்.

ஆலந்தூர்:

தமிழக பாரதீய ஜனதா மேலிட பொறுப்பாளர் முரளிதரராவ் சென்னை விமான நிலையத்தில் நிருபர்களிடம் கூறியதாவது:-

பா.ஜனதா தேசிய தலைவர் அமித்ஷாவின் தமிழகம் வருகை தற்போது ஒத்தி வைக்கப்பட்டுள்ளது. அவரது அலுவல் காரணமாக பயணம் ஒத்திவைக்கப்பட்டு இருக்கிறது. மீண்டும் அவரது தமிழகம் வருவதற்கான தேதி பின்னர் அறிவிக்கப்படும்.

அமித்ஷா வருகையின் போது முதல்-அமைச்சர் எடப்பாடி பழனிசாமி மற்றும் ஓ.பன்னீர்செல்வத்துடன் சந்திப்பு நடைபெறுமா? என்பது குறித்து தெரியவில்லை.

அ.தி.மு.க.வை பா.ஜனதா இயக்குவதாக எதிர்க்கட்சிகள் குற்றம் சாட்டுவதில் உண்மையில்லை. அது முட்டாள்தனமானது.

தமிழகத்தில் மட்டுமல்ல, எந்த ஒரு மாநிலத்திலும், மாநில கட்சிகளின் உள் பிரச்சினையில் பா.ஜனதா தலையிட வேண்டிய அவசியமில்லை.

அ.தி.மு.க.வின் இரு அணிகள் இணைவது என்பது அவர்களது தொண்டர்களின் விருப்பம். இணைந்தால் வெற்றியே. இல்லையென்றால் அவர்களுக்குள் சில பிரச்சினைகள் ஏற்படலாம். இதில் பாரதீய ஜனதா தலையீடு இல்லை.

இவ்வாறு அவர் கூறினார்.

ஆலந்தூர்:

மடிப்பாக்கம் மூவரசம் பேட்டை மெயின் ரோட்டில் உள்ள பால கணபதி கோவிலில் உள்ள உண்டியல் உடைக்கப்பட்டு இருப்பதை இன்று காலை பார்த்த அப்பகுதி மக்கள் போலீசுக்கு தகவல் தெரிவித்தனர். போலீசார் அங்கு வந்து விசாரணை நடத்தினர். மர்ம நபர்கள் உண்டியலை உடைத்து ரூ.10 ஆயிரத்தை கொள்ளையடித்து சென்றிருப்பது தெரிந்தது.

இதேபோல் அருகில் உள்ள அம்மன் கோவிலில் உண்டியலை உடைத்து உள்ளனர். அதில் பணம் குறைவாக இருந்ததால் கருவரை கதவை உடைத்து அங்கு பீரோவில் இருந்த ரூ.10 ஆயிரத்தை திருடி சென்று விட்டனர். இதுகுறித்து போலீசார் வழக்கு பதிவு செய்து விசாரிக்கிறார்கள்.

ஆலந்தூர்:

சென்னையில் நேற்று மாலை முதல் விடிய விடிய மழை பெய்தது. இதனால் விமான சேவைகள் பெரிதும் பாதிக்கப்பட்டன.

விமான ஓடு பாதையில் மழை நீர் தேங்கியதால் வெளிநாட்டில் இருந்து வந்த விமானங்கள் தரை இறங்குவதில் சிரமம் ஏற்பட்டது. இதையடுத்து வானில் வட்டமடித்து இருந்தன.

ஊழியர்கள் ஓடு பாதையில் தண்ணீரை அகற்றிய பிறகு விமானங்கள் ஒன்றன் பின் ஒன்றாக தரை இறங்கின.

மழையால் சென்னையில் இருந்து புறப்படும் விமான சேவை தாமதம் ஏற்பட்டது. சிங்கப்பூர், கொழும்பு, கோலாலம்பூர், துபாய், ஆங்காங், லண்டன் உள்ளிட்ட வெளிநாட்டு விமானங்கள், உள்நாட்டு விமானங்கள் என 28 விமானங்கள் புறப்படுவதில் 1 மணி நேரம் முதல் 3 மணி நேரம் வரை தாமதம் ஏற்பட்டது. இதனால் பயணிகள் அவதி அடைந்தனர்.