காஞ்சிபுரம்

காஞ்சீபுரம்:

காஞ்சீபுரம் மாவட்டத்தில் டெங்கு ஒழிப்பு நடவடிக்கைகளில் மாவட்ட நிர்வாகம் முழுமுச்சுடன் ஈடுபட்டு வருகிறது.

இந்த நிலையில் இன்று காலை மாவட்ட கலெக்டர் பொன்னையா மற்றும் அதிகாரிகள் மாவட்டத்தின் பல்வேறு இடங்களுக்கும் சென்று டெங்கு கொசு ஒழிப்பு பணிகளை ஆய்வு செய்தனர்.

ஓரிக்கை பகுதியில் உள்ள டாஸ்மாக கிடங்கில் ஆய்வு மேற்கொண்டபோது அங்கு சுகாதார சீர்கேட்டினை ஏற்படுத்தும் வகையிலும், டெங்கு கொசு உற்பத்தியாகும் வகையிலும் குப்பைகள் குவிந்து இருந்தது. இதனை கண்ட கலெக்டர் பொன்னையா உடனடியாக அந்த இடத்தினை சுத்தம் செய்ய வேண்டும் என்று உத்தரவிட்டார்.

மேலும் சுகாதாரம் இல்லாமல் இருந்ததால் டாஸ்மாக் குடோனுக்கு ரூ. 50 ஆயிரம் அபராதமாக விதித்தார்.

இதேபோல் அதே பகுதியில் உள்ள அரசு போக்குவரத்து பணிமனைக்கு சென்று கலெக்டர் அங்கு ஆய்வு மேற்கொண்டார். அப்போது பணிமனை சுகாதாரமற்ற நிலையில காணப்பட்டது. இதையடுத்து அரசுப் போக்குவரத்து பணிமனைக்கு ரூ. 50 ஆயிரம் அபராதமாக விதித்தார்.

இந்த ஆய்வின் போது நகராட்சி ஆணையர் சர்தார், நகர்நல அலுவலர் முத்து உள்ளிட்ட அதிகாரிகள் உடனிருந்தனர்.

மதுராந்தகம்:

மதுராந்தகம் அருகே உள்ள புத்திரம் கோட்டை கிராமத்தை சேர்ந்தவர் ராஜமாணிக்கம் (வயது 65). விவசாயி. இவரது மனைவி ராசாத்தி அம்மாள். இவர்களுக்கு ஒரு மகன் உள்ளான்.

இவர்களது வீட்டின் அருகே ஊராட்சி ஒன்றிய நடுநிலைப்பள்ளி உள்ளது. இரவு நேரத்தில் பள்ளி வளாகத்தில் ராஜமாணிக்கம் தூங்குவது வழக்கம்.

நேற்று இரவு வழக்கம் போல் அவர் பள்ளிக்கு தூங்க சென்றார். இந்த நிலையில் இன்று காலை அவர் கழுத்து அறுத்து கொலை செய்யப்பட்டு கிடந்தார். அவரது தலையில் கட்டையால் தாக்கியதற்கான காயமும் இருந்தது.

இதனை கண்டு அதிர்ச்சி அடைந்த அப்பகுதி மக்கள் சித்தாமூர் போலீசுக்கு தகவல் தெரிவித்தனர். இன்ஸ்பெக்டர் வெங்கடேசன் மற்றும் போலீசார் விரைந்து வந்து உடலை கைப்பற்றி விசாரணை நடத்தினர்.

அப்போது ராஜமாணிக்கம் அணிந்து இருந்த தங்க மோதிரம் மற்றும் அவர் பயன்படுத்திய விலை உயர்ந்த செல்போன் மாயமாகி இருப்பது தெரிந்தது.

நள்ளிரவில் மது அருந்த வந்த கும்பல் மோதிரம், செல்போனுக்கு ஆசைப்பட்டு ராஜமாணிக்கத்தை கொலை செய்து இருக்கலாம் என்று போலீசார் சந்தேகிக்கிறார்கள்.

மேலும் முன் விரோதத்தில் இந்த கொலை நடந்ததா என்ற சந்தேகமும் போலீசாருக்கு எழுந்துள்ளது. ராஜமாணிக்கத்துடன் யாரேனும் மோதலில் ஈடுபட்டனரா? என்ற விவரத்தையும் சேகரித்து வருகிறார்கள்.

இது தொடர்பாக போலீசார் தீவிர விசாரணை நடத்தி வருகின்றனர். பள்ளி வளாகத்தில் முதியவர் கொலை செய்யப்பட்ட சம்பவம் அப்பகுதியில் பரபரப்பை ஏற்படுத்தி உள்ளது.

சென்னை:

வடகிழக்கு பருவ மழை இன்னும் ஒருசில நாட்களில் தொடங்க உள்ளது.

இந்த பருவ மழையின் மூலம் கிடைக்கும் தண்ணீரை முறையாக பயன் படுத்த வேண்டும், அதனை வீணாக்க கூடாது என்று நீர் வளத்துறை திட்டமிட்டுள்ளது.

கடந்த ஆண்டு வார்தா புயலின்போது செம்பரம்பாக்கம் ஏரி நிரம்பியது. இதனை தொடர்ந்து அதில் இருந்து தண்ணீர் திறந்து விடப்பட்டது.

அந்த தண்ணீரை சேமித்து வைக்க எந்த முன் ஏற்பாடுகளையும் செய்யாததால் மழை நீர் கடலில் கலந்து வீணானது. இப்போது குடிப்பதற்கே தண்ணீர் இல்லாமல் அலைய வேண்டிய நிலை ஏற்பட்டுள்ளது.

ஏரி, குளங்கள் எல்லாம் வறண்டு போய்விட்டது. நிலத்தடி நீர் மட்டமும் வெகுவாக குறைந்து விட்டது. கோடை காலத்தை சமாளிக்க பல்வேறு பகுதிகளில் இருந்து தண்ணீர் கொண்டு வரப்பட்டு சென்னை மக்களின் குடிநீர் பிரச்சினை தீர்க்கப்பட்டது.

இதுபோன்ற நிலை மீண்டும் வரக்கூடாது என்பதை கருத்தில் கொண்டு நீர்வளத்துறை முன் எச்சரிக்கை நடவடிக்கைகளை மேற்கொண்டு வருகிறது. செம்பரம்பாக்கம் ஏரியில் 3,645 மில்லியன் கன அடி நீரை சேமித்து வைக்க முடியும்.

உபரி நீரை வீணடிக்காமல் அதனை சேமித்து வைத்து குடிநீருக்கு பயன்படுத்த நீர்வளத்துறை அதிகாரிகள், குடிநீர் வழங்கல் வாரிய அதிகாரிகளுடன் ஆலோசனை நடத்தி புதிய திட்டம் ஒன்றை வகுத்துள்ளனர்.

அதன்படி செம்பரம்பாக்கம் ஏரியின் உபரி நீரை மாற்று ஏற்பாட்டின் மூலம் குவாரிகளுக்கு கொண்டு என்று நிரப்பினால் அது கோடை காலத்திற்கு உதவியாக இருக்கும் என்று முடிவு எடுக்கப்பட்டது.

சிங்கராயபுரம் பகுதியில் உள்ள பயன்படுத்தாத 22 குவாரிகளில் உபரி நீரை சேமித்து வைத்து பயன்படுத்த திட்டமிட்டுள்ளனர். ஏரியில் இருந்து கால்வாய் மூலமாகவும் பைப் லைன் வழியாகவும் குவாரிகளுக்கு தண்ணீரை கொண்டு செல்ல திட்டம் தயாரிக்கப்பட்டுள்ளது.

தான்திகல் மற்றும் மணப்பாக்கம் கால்வாய் மூலம் உபரி நீரை வெளியேற்றி குவாரிகளுக்கு கொண்டு செல்லலாம் என அதிகாரிகள் முடிவு செய்துள்ளனர். இந்த 2 கால்வாய்களும் நீர்ப் பாசனத்திற்கு பயன்படுத்தப்பட்டு வருகிறது. தான்திகல் கால்வாய் போரூர் ஏரியுடன் இணைப்பு கொண்டது. மணப்பாக்கம் கால்வாய் பல்வேறு பகுதிகளில் இருந்து அடையார் ஆற்றில் இணைகிறது.

உபரி நீரை மாற்று திட்டம் மூலம் குவாரிகளுக்கு கொண்டு செல்லும் பணியை பொதுப்பணித்துறை செயலாளர் எஸ்.கே.பிரபாகர் 2 நாட்களுக்கு முன்பு பார்வையிட்டார்.

பருவ மழை தொடங்குவதற்கு முன்பாக 4 ஏரிகளையும் ஆய்வு செய்து முன் ஏற்பாடுகளை தயார்படுத்தினார்.

இதுகுறித்து அதிகாரி ஒருவர் கூறுகையில், “செம்பரம்பாக்கம் ஏரியின் உபரி நீர் மக்களுக்கு பயன் இல்லாமல் வீணாவதை தடுக்க இந்த ஆண்டு மாற்று ஏற்பாடு செய்யப்பட்டுள்ளது.

இதன் மூலம் உபரிநீர் பயனற்று கிடக்கும் குவாரிகளில் சேமித்து வைக்கப்படும். அதில் இருந்து தேவைப்படும்போது எடுத்து பயன்படுத்தலாம். இதன் மூலம் குடிநீர் பிரச்சினை ஏற்படாது. கடலில் வீணாக கலக்கும் தண்ணீரை மக்கள் பயன்படுத்த இத்திட்டம் பேருதவியாக இருக்கும்” என்றார்.

தாம்பரம்:

பல்லாவரத்தை அடுத்த அனகாபுத்தூரை சேர்ந்தவர் மதி. தொழில் அதிபர். இவர் கடந்த சில நாட்களுக்கு முன்பு வீட்டை பூட்டி விட்டு குடும்பத்துடன் புதுக்கோட்டைக்கு சென்று இருந்தார்.

இன்று காலை அவர்கள் திரும்பி வந்த போது வீட்டு கதவு பூட்டு உடைந்து கிடந்தது. பீரோவில் இருந்த 37 பவுன் நகை, ரூ.55 ஆயிரம் ரொக்கம், 1 கிலோ வெள்ளி பொருட்களை மர்ம நபர்கள் கொள்ளையடித்து சென்று இருப்பது தெரிந்தது. இது குறித்து சங்கர் நகர் போலீசார் வழக்குப்பதிவு செய்து விசாரணை நடத்தி வருகிறார்கள்.

ராஜகீழ்ப்பாக்கத்தை சேர்ந்தவர் பானுமதி. இவர் மகாலட்சுமி பஸ் நிறுத்தத்தில் இருந்து வீட்டுக்கு நடந்து வந்தார்.

அப்போது மோட்டார் சைக்கிளில் வந்த 2 வாலிபர்கள் பானுமதி கழுத்தில் கிடந்த 5 பவுன் செயினை பறித்து தப்பி சென்று விட்டனர்.

இது குறித்து சேலையூர் போலீசார் விசாரித்து வருகிறார்கள்.