தேர்தல் செய்திகள்

நாகர்கோவில்:

கன்னியாகுமரி பாராளு மன்ற தொகுதி காங்கிரஸ் வேட்பாளர் வசந்தகுமார் சுசீந்திரத்தில் இன்று பிரசாரத்தை தொடங்கினார். அப்போது வசந்தகுமார் பேசியதாவது:-

கூட்டணி கட்சியினரும், பொதுமக்களும் எனக்கு வெற்றி வாய்ப்பை பெற்றுத்தர வேண்டும். பொதுமக்கள் அனைவரும் கை சின்னத்தில் வாக்களித்து என்னை வெற்றி பெற செய்வதுடன் ராகுல்காந்தி பிரதமராவதற்கு துணை நிற்க வேண்டும்.

குமரி மாவட்டத்தில் தொழிற்சாலைகளை கொண்டு வர வேண்டாம் என்று நான் கூறியதாக பாரதீய ஜனதா வேட்பாளர் பொன்.ராதாகிருஷ்ணன் கூறி வருகிறார். நானும் ஒரு தொழில் செய்து வருபவன். தொழிற்சாலை இருந்தால்தான் இளைஞர்களுக்கு வேலைவாய்ப்பு கிடைக்கும். பொன். ராதாகிருஷ்ணன் பொய்யான குற்றச்சாட்டுகளை கூறி வருகிறார்.

கடந்த முறை தேர்தலில் போட்டியிட்ட பாரதீய ஜனதா வேட்பாளர் பொன். ராதாகிருஷ்ணன் இந்து மாணவர்களுக்கு கல்வித் தொகை வழங்குவேன் என்று பொய்யான வாக்கு றுதிகளை கூறி வெற்றி பெற்றார். 2 கோடி பேருக்கு வேலைவாய்ப்பு வழங்கப்படும் என்று பிரதமர் மோடி கூறி இருந்தார். ஆனால் தற்போது இளைஞர்கள் வேலையின்றி தவித்து வருகிறார்கள்.

ஆனால் நான், சமீப காலத்தில் வேலைவாய்ப்பு முகாம்களை நடத்தி 1,500 பேருக்கு வேலை கொடுத்துள்ளேன். மக்களுக்காகவே அரசாங்கம் இருக்க வேண்டும். ஆனால் மோடி அரசு மக்களை வஞ்சிக்கிறது. மோடி அரசை தூக்கி எறிய கை சின்னத்தில் வாக்களித்து என்னை வெற்றி பெற செய்யுங்கள்.

இவ்வாறு அவர் பேசினார்.

கற்காடு, மருங்கூர் பகுதிகளில் திறந்த ஜீப்பில் சென்று பிரசாரம் செய்தார். எம்.எல்.ஏ.க்கள் சுரேஷ்ராஜன், ஆஸ்டின், காங்கிரஸ் மாவட்ட தலைவர் ராதாகிருஷ்ணன், தி.மு.க. நிர்வாகிகள் பார்த்த சாரதி, தாமரைபாரதி, மதியழகன், காங்கிரஸ் நிர்வாகிகள் அசோகன் சாலமன், கால பெருமாள் மற்றும் கூட்டணி கட்சியினர் கலந்து கொண்டனர். #Congress #pmmodi #vasanthakumar

ஈரோடு:

ஈரோட்டில் மார்க்சிஸ்ட் கம்யூனிஸ்ட் கட்சி மாநில செயலாளா கே.பாலகிருஷ்ணன் நிருபர்களுக்கு பேட்டி அளித்தார்.

பெண்கள் மீது நடத்தப்படும் பாலியல் கொடுமைகளை எதிர்த்து ஒட்டு மொத்த தமிழ் சமூகமும் கிளர்ந்து எழ வேண்டிய கட்டாயம் இருக்கிறது. ஒரு பக்கம் காவல் துறையின் மெத்தனமும் தவறும் இருக்கிறது.

சமூக வலைதளங்களில் ஏராளமான ஆபாச படங்கள் வருகின்றன. இது ஒட்டு மொத்த சமூகத்தையே பாழ்படுத்தி விடும் என்ற நிலையை ஏற்படுத்தி இருக்கிறது.

விவசாயிகளை கைது செய்வதற்கு போலீசார் காட்டும் ஆர்வத்தை பொள்ளாச்சி பாலியல் வழக்கில்ஆர்வம் காட்டாதது ஏன்?. பொள்ளாச்சி சம்பவம் நடந்து தமிழ்நாட்டில் உள்ள லட்சக்கணக்கான பெற்றோர்கள் மனதில் பதற்றத்தை ஏற்படுத்தியுள்ளது.

அது அடங்காத நிலையில் கோவையில் மற்றொரு சம்பவம் நடந்துள்ளது. ஆனால் அந்த வழக்கில் இன்னும் சம்பந்தப்பட்ட அனைத்து குற்றவாளிகளையும் கைது செய்ய வில்லை. பாலியல் வன்முறை, சமூக விரோத சக்திகளில் ஈடுபடும் குற்ற வாளிகளை அரசு பாதுகாக்கிறது.

ஜனநாயக உரிமைக்காக போராட கூடியமக்களையும் விவசாயிகளையும் தொழி லாளர்களையும் அடக்கு முறைகளை ஏவி அடக்குகிறது. இதை வன்மையாக கண்டிக்கிறேன். நியாயமான உரிமைக்காக போராட கூடிய விவசாயிகள் மீது வழக்குப் போடுகின்றனர்.

பாராளுமன்ற தேர்தலில் 40 தொகுதிகளுக்கும், 18 சட்ட மன்ற இடைத்தேர்தல் நடைபெறுகிறது. நாளை உச்ச நீதிமன்றத்தில் மீதமிருக்கும் 3 தொகுதிகளுக்கும் தேர்தல் நடத்துவது சம்பந்தமாக வழக்கு விசாரணைக்கு வருகிறது. இதில் 4வது தொகுதியாக சூலூர் தொகுதியையும் சேர்த்து மே மாதம் 13-ந் தேதிக்குள் தேர்தலை நடத்த தேர்தல் ஆணையத்தை கேட்டு கொள்கிறேன்.

ஆளும் கட்சி சார்பில் கோடிக்கணக்கான ரூபாய் பணத்தை வாக்காளர்களுக்கு ஊழியர் கூட்டம் என்ற பெயரில் வழங்க ஆரம்பித்து விட்டார்கள். பல இடங்களில் பணம் வினியோகிப்பதை வாட்ஸ்- அப் மூலமாக படம் வந்திருக்கிறது.

ஆனால் தேர்தல் ஆணையம் எந்த நடவடிக்கையும் எடுக்கவில்லை. தேர்தல் ஆணையம் உரிய நடவடிக்கை எடுக்க வேண்டும். என்ன தான் ஆளுங் கட்சியினர் பண விநியோகம் செய்தாலும், வரம்பு மீறி சலுகைகள் அளித்தாலும் இந்த முறை வாக்காளர்களை பொறுத்தவரை பாஜக- அதிமுக கூட்டணியை தோற்கடிப்பது என்ற உறுதியான நிலைப்பாட்டை மக்கள் எடுத்திருக்கிறார்கள்.

முகிலன் காணாமல் போய் 1½ மாதங்கள் ஆகி இருக்கிறது. அவர் இருக்கிறாரா இல்லையா? என்பதே சந்தேகம் ஏற்பட்டு இருக்கிறது. உடனடியாக முகிலனை கண்டுபிடித்து காவல் துறையினர் அவரது குடும்பத்தினரிடம் ஒப்ப டைக்க வேண்டும்.

இவ்வாறு அவர் பேசினார். #admk #kbalakrishnan

சிதம்பரம்:

கடலூர் மாவட்டம் சிதம்பரத்தில் அ.தி.மு.க. வின் சிதம்பரம் பாராளுமன்ற தொகுதி வேட்பாளரை ஆதரித்து நேற்று முன்தினம் பொதுக்கூட்டம் நடைபெற்றது. இந்த கூட்டத்தில் பா.ம.க. நிறுவனர் டாக்டர் ராமதாஸ் கலந்து கொண்டு பேசினார். அப்போது அவர் இளைஞர்களை திருமாவளவன் தவறாக வழி நடத்துகிறார் என்பது உள்பட பல்வேறு கருத்துகளை கூறி திருமாவளவனை தாக்கி பேசினார்.

இந்த நிலையில் நேற்று சிதம்பரம் சட்டமன்ற தொகுதிக்கு உட்பட்ட தி.மு.க. கூட்டணி கட்சிகளின் செயல்வீரர்கள் கூட்டம் நேற்று சிதம்பரத்தில் நடைபெற்றது. அந்த கூட்டத்தில் விடுதலை சிறுத்தைகள் கட்சி தலைவர் திருமாவளவன் கலந்து கொண்டு ராமதாஸ் தன் மீது கூறிய கருத்துகளுக்கு பதில் அளிக்கும் வகையில் பேசினார். அதில் அவர் கூறியதாவது:-

என்னை தைலாபுரம் தோட்டத்துக்கு அழைத்து வாழை இலையில் சாப்பாடு பறிமாறிய ராமதாஸ் தி.மு.க. ஒரு துரோக கட்சி, அது அழிந்துபோககூடியது. ஆகவே தி.மு.க. வில் இருந்து வெளியே வரவேண்டும் என்று என்னை வற்புறுத்தினார். அதை நான் ஏற்றுக் கொள்ள வில்லை.

அதில் இருந்து என் மீது வீண் பழி சுமத்தி சேற்றைவாரி தூற்றி வருகிறார். நான் ஒளிவு மறைவு இன்றி திறந்த புத்தகமாக வாழ்ந்து வருகிறேன்.

தி.மு.க.வில் கூட்டணி சேர்ந்தால் சீட்டு மட்டும் தான் கிடைக்கும், நோட்டு கிடைக்காது என்று எண்ணி சாதி அடிப்படையில் வாக்கு சதவீதத்தை காட்டி, பேரம்பேசி கூட்டணி அமைத்துள்ளனர். அது வர்த்தக ரீதியான வியாபார கூட்டணி.

நம்மிடம் ஒரே குரல்தான் ஒழிக்க வேண்டும். மோடியை விரட்டி அடிக்க வேண்டும். ராகுலை பிரதமர் ஆக்க வேண்டும் என்பது தான்.

மோடி மறுபடியும் பிரதமராக வந்தால் இனிமேல் நாட்டில் தேர்தல் நடக்காது. மாநில கட்சிகளை ஒழிக்க பா.ஜ.க. அனைத்து வேலைகளையும் செய்துள்ளது. மோடியால் சிறு, குறு தொழில்கள் அழிந்து விட்டன.

விவசாயம், விவசாயிகள் பாதிக்கப்பட்டுள்ளனர். கார்ப்ரேட்டுகளின் செல்லப் பிள்ளையாக மோடி திகழ்கிறார். அம்பானி, அதானிக்கு ஒப்பந்தத்தில் கையெழுத்து போட வெளி நாடு சென்றுவருகிறார். மொத்தத்தில் கார்ப்ரேட் பிரதமராகவே உள்ளார்.

இந்து சமூகத்தின் முதல் எதிரி மோடி. சாதி வாரியாக மக்களை பிரித்து மொத்த வியாபாரியாக செயல்படுகிறார். இந்த தேர்தலில் மதவாதமா? ஜனநாயகமா? என்று முடிவு செய்யவேண்டும். சாதி வெறி தூண்டல்களில் சிக்கவேண்டாம். எந்த காலத்திலும் சாதியவாதம், மதவாதம் உள்ள பா.ஜ.க. வுடன் விடுதலை சிறுத்தைகள் கூட்டணியில் இருக்காது. என்னை சாதியை சொல்லிமட்டுமே குற்றம் சுமத்த முடியும். வேறு எந்த குற்றமும் சொல்ல முடியாது.

இவ்வாறு அவர் பேசினார். #Thirumavalavan #Ramadoss

தூத்துக்குடி:

தூத்துக்குடி சிவன் கோவில் அருகே தமிழிசை சவுந்தரராஜன் பிரசாரம் செய்தார். அப்போது அவர் பேசியதாவது:-

தூத்துக்குடி தூய்மையாக இருக்க வேண்டும், தூத்துக்குடி வளர்ச்சி அடைய வேண்டும், வேலை வாய்ப்பு பெருக வேண்டும், இன்றைய வரைபடத்தில் வளர்ச்சி மிகுந்த நாடாளுமன்றம் என்ற பெயரை தூத்துக்குடிபெற வேண்டும் என்பதற்காகத்தான் இங்கு நாம் போட்டியிடுகிறோம். நான் தூத்துக்குடியை தேர்ந்தெடுத்து இருப்பது நிச்சயமாக தென்பகுதி இன்னும் வளர்ச்சி பெற வேண்டும் என்பதற்காகத் தான்.

தூத்துக்குடியை பொறுத்த வரை யார் யாரெல்லாம் நம்மை எதிர்த்து நிற்கிறார்கள் என்பது தெரியும். ஊழல் கறை படியாத ஒரு தூத்துக்குடியை உருவாக்க வேண்டும். ஊழல் கறைபடிந்தவர்களை தூத்துக்குடி எந்தவிதத்திலும் ஒப்புக்கொள்ளாது. நேர்மையான வேட்பாளரைத்தான் ஒப்புக்கொள்ளும். இந்த மண்ணின் மகள் நான். எதிர் அணியில் உள்ளவர் இறக்குமதி செய்யப்பட்ட வேட்பாளர்தான். என்னை இறக்குமதி செய்யப்பட்டவர் என்று அவர்கள் சொன்னால் நிச்சயம் அது பொய்யாகத்தான் இருக்கும்.

இந்த மண்ணின் சொந்தக்காரி நான். உங்களில் ஒருத்தி நான். எவ்வளவோ சமூக வலைதளங்களில் என்னை கேலியும், கிண்டலும் செய்து என் நிறம் கருப்பு என்று குறிப்பிடுகிறார்கள். இந்த செம்மண் காடு, பனங்காட்டின் நிறம் கருப்பு. ஆகையால் இந்த பனங்காட்டு நரி எந்த சலசலப்புக்கும் அஞ்சாது. என் மீது எந்த குற்ற வழக்கும் கிடையாது.

மோடி பண மதிப்பிழப்பு நடவடிக்கைக்கு பிறகு நாட்டு மக்களிடம் பேசும் போது ஒரு தலைவர் இருந்தால் என்னை பாராட்டி இருப்பார். அது குஜராத்தை சேர்ந்த தலைவர் அல்ல. தமிழ்நாட்டை சேர்ந்த காமராஜர் என்று கூறினார். ஆனால் அந்த காமராஜரை இழிவுபடுத்தியவர்கள் இன்று ஓட்டுக்காக உங்கள் முன்னால் நிற்கிறார்கள் என்பதை நன்றாக புரிந்து கொள்ள வேண்டும்.

நான் எதிரணிக்கு சொல்லிக் கொள்கிறேன் மத்திய, மாநில அரசுகள் இணைந்து செயலாற்ற முடியும் என்றால் பா.ஜனதா, அ.தி.மு.க.வால் மட்டுமே முடியும். காங்கிரஸ், தி.மு.க.வால் முடியாது. ரத்தக்கறை படிந்த கரங்களோடு உங்களிடம் வாக்கு கேட்டு வருகிறார்கள். இலங்கையில் தமிழர்கள் கொல்லப்பட்டார்கள். அப்போது இதே காங்கிரஸ், தி.மு.க.தான் ஆட்சியில் இருந்தது. இவர்கள் தடுத்து நிறுத்தவில்லை. மத்திய, மாநில அரசு இணைந்து செயல்பட்டால் நாட்டு மக்களுக்கு நல்லது கிடைக்கும்.

நான் இன்று கட்சியின் மாநில தலைவராக இருக்கிறேன். எனது அரசியல் வாழ்க்கை கரடு முரடானது. அந்த பாதையில் நடந்து உங்களிடம் வந்து உள்ளேன். என்னை வெற்றி பெறச் செய்யுங்கள். உங்கள் பலத்தோடு தூத்துக்குடியில் தாமரை மலர்ந்தே தீரும்.

இவ்வாறு அவர் கூறினார்.  #tamilisai #bjp