நீங்கள் தேடியது "Salem accident"

வாழப்பாடி:

சேலம் மாவட்டம் வாழப்பாடி அடுத்த புழுதிக்குட்டை ஊராட்சி கீரப்பட்டி கிராமத்தைச் சேர்ந்தவர் மணிகண்டன் (வயது 28). இவரது நண்பர் அதே பகுதியை சேர்ந்த கிருஷ்ணன் (வயது 27). போலீஸ் வேலைக்கு தேர்வான இவர், தர்மபுரி காவலர் பயிற்சி பள்ளியில் காவலர் பயிற்சி பெற்று வந்தார். 3 நாள் விடுமுறையில் சொந்த ஊருக்கு வந்திருந்தார்.

நண்பர்களான இருவரும் பேளூர் பகுதியில் இருந்து கீரப்பட்டி நோக்கி நேற்று முன்தினம் இரவு 8 மணி அளவில் மோட்டார் சைக்கிளில் சென்றனர். கீரப்பட்டி பேருந்து நிறுத்தம் சண்முகம் தோட்டத்திற்கு அருகே சென்று கொண்டிருந்தபோது, அதே பகுதியைச் சேர்ந்த அர்ஜுனன்(26). என்பவர் ஓட்டிச் சென்ற மோட்டார் சைக்கிள் இவர்கள் மீது பலமாக மோதியது.

இந்த விபத்தில் தூக்கி வீசப்பட்ட கிருஷ்ணன் உள்ளிட்ட 3 பேரும் படுகாயம் அடைந்தனர். அவர்களை அக்கம்பக்கத்தினர் மீட்டு சிகிச்சைக்காக சேலம் அரசு மருத்துவமனைக்கு அனுப்பி வைத்தனர். இதில் மணிகண்டன் சிகிச்சை பலனின்றி நேற்று முன்தினம் பரிதாபமாக உயிரிழந்தார். இவரை தொடர்ந்து, அவரது நண்பரான பயிற்சி காவலர் கிருஷ்ணனும் நேற்றிரவு பரிதாபமாக இறந்தார். அர்ஜுனன் தொடர்ந்து சிகிச்சை பெற்று வருகிறார். இந்த விபத்து குறித்து வாழப்பாடி போலீசார் வழக்கு பதிவு செய்து விசாரணை நடத்தி வருகின்றனர். விபத்தில் பயிற்சி காவலர் உட்பட 2 பேர் பலியான சம்பவம் இப்பகுதி மக்களிடையே சோகத்தை ஏற்படுத்தியுள்ளது.

சேலம்:

சேலம் மாவட்டத்தில் கடந்த சில நாட்களாக தொடர் மழை பெய்து வருகிறது. நேற்றிரவு 8 மணிக்கு தொடங்கிய மழை ஒரு மணி நேரத்திற்கும் மேலாக நீடித்தது.

இதில் சேலம், மாநகர், எடப்பாடி, சங்ககிரி, ஏற்காடு உள்பட பல்வேறு பகுதிகளில் மழை பெய்தது. இந்த மழையால் சாலைகளில் வெள்ளம் பெருக்கெடுத்து ஓடியது. தாழ்வான பகுதிகளில் தண்ணீர் தேங்கியது.

அப்போது சேலம் மாவட்டம் சிவதாபுரம் பாலம் பகுதியில் மோட்டார் சைக்கிளில் இருந்து விழுந்த நிலையில் வாலிபர் ஒருவர் படுகாயங்களுடன் உயிருக்கு போராடியபடி கிடந்தார். இதை பார்த்த அந்த பகுதியினர் அவரை மீட்டு சேலம் அரசு ஆஸ்பத்திரிக் கு சிகிச்சைக்கு அனுப்பி வைத்தனர்.

அப்போது அவர் போலீசாரிடம் கூறியதாவது:-

எனது பெயர் ஈஸ்வர மூர்த்தி, நானும், எடப்பாடி அருகே உள்ள சித்தூரை சேர்ந்த குமார் (வயது36) என்பவரும் ஒரே மோட்டார் சைக்கிளில் சேலம் நோக்கி வந்தோம். சிவதாபுரம் பாலம் பகுதியில் வந்த போது மழை பெய்து கொண்டிருந்தது. அப்போது எதிரே வந்த ஒரு மோட்டார் சைக்கிள் எங்கள் மீது பயங்கரமாக மோதியது.

இதில் சாலையில் தூக்கி வீசப்பட்ட நானும், என்னுடன் வந்த குமாரும் (வயது 36) படுகாயம் அடைந்தோம். ஆனால் எதிரே வந்தவர்கள் லேசான காயத்துடன் தப்பியதால் அங்கிருந்து சென்று விட்டனர். அந்த பகுதியில் தண்ணீர் சூழ்ந்திருந்தத நிலையில் என்னுடன் வந்த குமாரை திடீரென காணவில்லை என்று கூறினார்.

இதனால் அதிர்ச்சி அடைந்த கொண்டலாம்பட்டி போலீசார் மற்றும் தீயணைப்பு படையினரும் அந்த பகுதிக்கு விரைந்து சென்று நேற்றிரவு குமாரை தேடினர். ஆனால் குமார் கிடைக்கவில்லை.

பின்னர் இன்று அதிகாலை முதல் போலீசாரும், தீயணைப்பு படையினரும் அந்த பகுதியில் தேடுதல் வேட்டையில் ஈடுபட்டனர். அப்போது விபத்து நடந்த சாலையோரம் கிடந்த 5 அடி ஆழ குழியில் நிரம்பியிருந்த மழை தண்ணீரில் மூழ்கி குமார் இறந்து கிடந்தது தெரிய வந்தது.

அவரது உடலை மீட்ட தீயணைப்பு துறையினர் மற்றும் போலீசார் பிரேத பரிசோதனைக்காக சேலம் அரசு ஆஸ்பத்திரிக்கு அனுப்பி வைத்தனர். தகவல் அறிந்த குமாரின் உறவினர்கள் சேலம் அரசு ஆஸ்பத்திரிக்கு விரைந்து வந்தனர். அவர்கள் குமாரின் உடலை பார்த்து கதறி அழுது புரண்டனர்.

மோட்டார் சைக்கிள் விபத்தில் சிக்கியவர் சாலை யோரம் கிடந்த தண்ணீரில் மூழ்கி இறந்த சம்பவம் பெரும் சோகத்தை ஏற்படுத்தி உள்ளது. மேலும் வாகன ஓட்டிகள் நலன் கருதி சாலையோரம் கிடக்கும் குழிகளை மூட வேண்டும் என்றும் பொதுமக்கள் கோரிக்கை விடுத்துள்ளனர்.

காடையாம்பட்டி:

சேலம் மாவட்டம் ஓமலூரை அடுத்துள்ள தாராபுரத்தில் பவர் பிளாக்கல் ஓட்டும் தொழில் நிறுவனம் செயல்பட்டு வருகிறது. இதில் கன்னங்குறிச்சி மன்னார் பாளையம் பகுதியை சேர்ந்த தங்கவேல் சூப்பர்வைசராக வேலை பார்த்து வந்தார்.

இந்நிலையில் அங்கிருந்து தங்கவேல் உட்பட 4 பேர் தீவட்டிப்பட்டியில் உள்ள தனியார் பள்ளிக்கு பவர் பிளாக் செங்கலை கொண்டு வந்தனர். அப்போது அவர் எதிரே உள்ள கடையில் டீ குடிப்பதற்காக சேலம்-தர்மபுரி நெடுஞ்சாலையில் ரோட்டை கடக்க முயனறார். அப்போது அந்த தனியார் பள்ளி வேன் தங்கவேல் மீது மோதியது. இதில் அவர் பலத்த காயம் அடைந்தார். அவரை மீட்டு சேலம் அரசு ஆஸ்பத்திரிக்கு அனுப்பி வைத்தனர். ஆனால் அவர் வரும் வழியிலேயே பரிதாபமாக இறந்தார். இது குறித்து தீவெட்டிப்பட்டி போலீசார் வழக்கு பதிவு செய்து விசாரித்து வருகின்றனர்.

சேலம்:

சேலம் கந்தம்பட்டி திருமகள் பை-பாஸ் ரோட்டில் 40 வயது மதிக்கதக்க வட மாநில வாலிபர் ஒருவர் இன்று காலை நடந்து சென்று கொண்டிருந்தார். அப்போது அவர் ரோட்டை கடக்க முயன்ற போது அந்த வழியாக வந்த அடையாளம் தெரியாத வாகனம் ஒன்று அவர் மீது மோதிவிட்டு நிற்காமல் சென்றது.

இதில் அவர் தூக்கி வீசப்பட்டு ரத்த வெள்ளத்தில் சம்பவ இடத்திலேயே பலியானார். இதை பார்த்த அக்கம் பக்கத்தினர் இது குறித்து சூரமங்கலம் போலீசுக்கு தகவல் தெரிவித்தனர். போலீசார் தகவலின் பேரில் சம்பவ இடத்துக்கு வந்து உடலை மீட்டு சேலம் அரசு ஆஸ்பத்திரிக்கு பிரேத பரிசோதனைக்காக அனுப்பி வைத்தனர். விபத்தில் பலியான வட மாநில வாலிபர் யார்? எந்த ஊரை சேர்ந்தவர்? என்று போலீசார் விசாரணை நடத்தி வருகின்றனர்.