நீங்கள் தேடியது "farmers happy"

போச்சம்பள்ளி:

கிருஷ்ணகிரி மாவட்டத்தில் கடந்த 2 நாட்களாக கடும் வெயில் வாட்டி வதைத்து வந்தது. இந்நிலையில் நேற்று இரவு 7மணி அளவில் திடீரென மழை பெய்ய துவங்கியது. இந்த மழையால் சாலையில், தெருக்களில் மழைநீர் பெருக்கெடுத்து ஓடியது. 

இதையடுத்து பூமி குளிர்ச்சியடைந்து, வெப்ப காற்று தணிந்து, குளிர்காற்று வீச துவங்கியது. இதனால் பொதுமக்கள் மகிழ்ச்சியடைந்தனர். குறிப்பாக விவசாயிகள் மகிழ்ச்சியடைந்தனர். மேலும் இன்று அதிகாலை கிருஷ்ணகிரி பகுதியில் லேசான தூறல் மழை இருந்தது. இன்று காலை 8 மணி நிலவரப்படி பதிவான மழை அளவு விவரம் வருமாறு: கிருஷ்ணகிரி மாவட்டத்தில் அதிகபட்சமாக நெடுங்கல்லில் 86.20 மி.மீ., மழை பதிவாகியிருந்தது. பாரூர் - 37.80 மி.மீ., போச்சம்பள்ளி - 20.40 மி.மீ., கிருஷ்ணகிரி - 10 மி.மீ., ஊத்தங்கரை - 1 மி.மீ., என மொத்த மழை அளவு 155.40 மி.மீ பதிவாகியிருந்தது.

தருமபுரி மாவட்டத்தில் இன்று அதிகாலை முதல் சாரல் மழை பெய்து வருகிறது. ஒகேனக்கல் -பென்னாகரத்திலும் மழை பெய்து வருகிறது. தருமபுரி நகரில் இன்று காலை 6 மணி முதல் சாரல் மழை பெய்து வருகிறது.

கிருஷ்ணகிரி மாவட்டம் போச்சம்பள்ளி மற்றும் அதன் சுற்றுப்பகுதிகளில் கடந்த இரு நாட்களாக வெயில் அதிகரித்து காணப்பட்டது.

இதனால் பொதுமக்கள் வெயிலின் தாக்கத்தால் மிகுந்த அவதிப்பட்டனர். மாலை நேரத்திலும் வெயிலின் தாக்கம் அதிகமாக இருந்தது. இந்த நிலையில் நேற்று இரவு திடீரென மழை பெய்ய தொடங்கியது. தொடர்ந்து சுமார் 4 மணி நேரம் மிதமான மழை பெய்தது. மழையானது தற்போது காலைவரை நீடித்த நிலையில் காணப்பட்டது.

இதனால் வானம் பார்த்து பூமியில் பயிரிடப்பட்ட மானாவாரி பயிர்களான சோளம், கம்பு, கேழ்வரகு ஆகிய பயிர்களுக்கு இந்த மழை சற்று ஆறுதல் தருவதாக விவசாயிகள் தெரிவித்தனர். இதனால் விவசாயிகள் மகிழ்ச்சி அடைந்துள்ளனர்.

கொடைக்கானல்:

மலைகளின் இளவரசி என அழைக்கப்படும் கொடைக்கானலில் ஆண்டு முழுவதும் இதமான சீசன் நிலவி வருகிறது. எனவேதான் இந்தியா மட்டுமின்றி பல்வேறு பகுதிகளில் இருந்தும் ஏராளமான சுற்றுலா பயணிகள் வந்த வண்ணம் உள்ளனர்.

இவர்கள் கொடைக்கானலில் உள்ள கோக்கர்ஸ் வாக், குணா குகை, பசுமை பள்ளத்தாக்கு, பேரிஜம் ஏரி உள்ளிட்ட பல்வேறு சுற்றுலா தலங்களை ரசித்து தங்களது கேமராக்களில் படம் பிடித்து வருகிறார்கள். அதோடு ஏரியில் படகு சவாரி செய்தும் மகிழ்கின்றனர்.

தென் மேற்கு பருவமழை ஓரளவு கைகொடுத்தது. எனவே இந்த தண்ணீரை வைத்து விவசாயிகள் உருளை, கேரட், பீன்ஸ் ஆகிய பயிர்களை சாகுபடி செய்துள்ளனர். அதன் பின்னர் மழை ஓய்ந்து விட்டது.

இன்று கொடைக்கானல் பகுதியில் மேகமூட்டம் காணப்பட்டது. காலையிலேயே கரு மேகம் சூழ்ந்ததால் கொடைக்கானல் நகரம் இருளாக காட்சியளித்தது. அதன் பின்னர் லேசானது முதல் மிதமான சாரல் மழை பெய்து கொண்டே இருந்தது.

மழையில் நனைந்தபடி சுற்றுலா பயணிகள் கொடைக்கானலில் உள்ள இடங்களை ரசித்து பார்த்தனர். இந்த சாரல் மழை பட்டர் பீன்ஸ், கேரட் ஆகியவற்றுக்கு உகந்தது என விவசாயிகள் மகிழ்ச்சி தெரிவித்தனர்.

முதுகுளத்தூர்:

முதுகுளத்தூரில் நேற்று மாலை தொடர்ந்து பெய்த மழையால் பருத்தி போன்ற சிறு தானிய வகைகளை விவசாயம் செய்து வரும் விவசாயிகள் மகிழ்ச்சி அடைந்தனர்.

சில வாரங்களாக அவ்வப்போது மழை பெய்து வந்தபோதிலும், வெப்ப சலன காற்று பலமாக வீசி வருகிறது. இதனால் கடுமையான வெயிலால் கடும் தண்ணீர் தட்டுப்பாடு இருந்த போது, நேற்று மாலை பெய்த மழையால் வெப்பம் குறைந்து, தரிசு நிலங்களில் புற்கள் முளைத்து ஆடு, மாடு போன்ற கால்நடைகளுக்கு போதுமான நீர் ஆதாரங்கள், மேய்ச்சல் வசதி கிடைத்துள்ளதால் விவசாயிகள், பொதுமக்கள் மகிழ்ச்சியடைந்துள்ளனர்.

கோடைமழை இந்த ஆண்டு பஞ்சாங்கத்தில் குறிப்பிட்டபடி குறித்த நேரத்தில் பெய்து வருவதால், பருவமழை சீசன் ஆடி மாதத்திலேயே பெய்யும் என விவசாயிகள் எதிர்பார்ப்பில் உள்ளனர்.

நேற்று மாலை பெய்த கன மழையால், முதுகுளத்தூர் பஸ் நிலையம் உள்பட முக்கிய பகுதிகளில் மழைநீர் தேங்கியது. இதனால் பள்ளி முடிந்து வீட்டிற்கு செல்லும் மாணவர்கள் அவதிபட்டனர்.

தொடர்ந்து மழை பெய்ததால் வாகன ஓட்டிகள் விளக்குகளை எரியவிட்டுச் சென்றனர்.