ஈரோடு

ஈரோடு:

டி.டி.வி. தினகரனின் அணியை சேர்ந்த பெருந்துறை எம்.எல்.ஏ தோப்பு வெங்கடாசலத்துக்கு டி.டி.வி. தினகரன் கழக அமைப்பு செயலாளர் பொறுப்பை வழங்கி உள்ளார். இதையொட்டி சென்னையில் டி.டி.வி. தினகரனை சந்தித்து தோப்பு வெங்கடாச்சலம் வாழ்த்து பெற்றார்.

தோப்பு வெங்கடாச்சலம் எம்.எல்.ஏ. இன்று பெருந்துறையில் நிருபர்களுக்கு பேட்டி அளித்தார்.

மறைந்த ஜெயலலிதா அவர்கள் எனக்கு பெருந்துறை தொகுதியில் போட்டியிட 2 முறை வாய்ப்பு அளித்தார். 2முறையும் நான் வெற்றி பெற்றேன். முதல் தடவை வெற்றி பெற்ற எனக்கு மாவட்ட செயலாளர் பதவியும், அமைச்சர் பதவியும் கொடுத்து அழகு பார்த்தார்.

நான் ஈரோடு மாவட்ட அமைச்சராக இருந்தபோது ஈரோடு மாவட்டத்தில் உள்ள அனைத்து தொகுதிகளையும் அ.தி.மு.க.வே வெற்றி பெற செய்தோம். மேலும் உள்ளாட்சி - எம்.பி. தேர்தல்களில் அ.தி.மு.க.வே வெற்றி பெற்றது.

ஓராண்டாக கட்சி நிர்வாகிகள் சிலர் கட்சியை பற்றி தவறாக பேசி வருகிறார்கள். கட்சிக்கும் ஆட்சிக்கும் புத்துணர்ச்சி ஏற்படுத்தவே புதிய நிர்வாகிகளை கழக துணை பொதுசெயலாளர் டி.டி.வி.தினகரன் நியமித்துள்ளார்.

கடந்த தேர்தலின்போது ஈரோட்டில் மேம்பாலம், ரவுண்டானா மற்றும் ரூ.86 கோடியில் குடிநீர் திட்டம் கொண்டு வர முன்பே நான் முயற்சி செய்திருந்தேன். பெருந்துறையில் எய்ம்ஸ் மருத்துவமனை கொடிவேரி கூட்டு குடிநீர் திட்டம் ஆகியவற்றை மறைந்த முதல்வர் ஜெயலலிதா இருந்தபோதே அவரிடம் பேசி இருந்தேன். அவரும் விரைவில் செயல்படுத்த கூறி இருந்தார்.

கூவத்தூரில் தங்கி இருந்தபோது எடப்பாடி பழனிச்சாமி எனக்கு மாவட்ட செயலாளர் பதவி வழங்குவதாக கூறி இருந்தார். ஆனால் நான் எனக்கு அந்த பதவி வேண்டாம். பெருந்துறைக்கு எய்ம்ஸ் மருத்துவமனை, கொடிவேரி குடிநீர் திட்டம் தான் வேண்டும் என்றேன். ஆனால் மூத்த அமைச்சர்கள் இதற்காக முயற்சியை எடுக்கவில்லை.

அமைச்சர்கள் ஜெயக்குமார், உதயகுமார் ஆகியோர் தினகரனை பற்றி பேசி வருவது அவர்களது சொந்த கருத்தாகும். தினகரன் பற்றி முதல்- அமைச்சர் எடப்பாடி பழனிச்சாமி எந்த கருத்தும் சொல்லவில்லை.

டி.டி.வி.தினகரன் கட்சியை பலப்படுத்தவும், நல்ல திட்டங்களை கொண்டு வரவும் எங்களை போன்றவர்களுக்கு சிறப்பாக பணியாற்ற பொறுப்புகளை வழங்கி உள்ளார். கட்சி தலைமை கழக பேச்சாளர்கள் கடந்த ஓராண்டாக எந்தவித கூட்டமும் இல்லாததால் வறுமைக்கு தள்ளப்பட்டு உள்ளனர். இந்த புதிய நிர்வாகிகளை நியமித்ததால் பொதுக் கூட்டங்கள் போட்டு கட்சியை பலப்படுத்தலாம்.

கட்சியை பற்றி ஒரு சிலர் கூறி வருவது சொந்த கருத்து என்றுதான் கூறி வருகிறார்கள். ஓ.பன்னீர்செல்வம் ஆட்சிக்கு எதிராக போராட்டம் நடத்த முயற்சிப்பது அவரின் கோபத்தின் வெளிப்பாடு. ஆட்சியில் இருப்பவர்கள் அவரை சமாதானப்படுத்த வேண்டும்.

இவ்வாறு தோப்பு வெங்கடாச்சலம் எம்.எல்.ஏ. கூறினார்.

முன்னதாக தோப்பு வெங்கடாச்சலம் எம்.எல்.ஏ. கட்சி தொண்டர்களுடன் ஊர்வலமாக சென்றார். பிறகு எம்.ஜி.ஆர் மற்றும் அண்ணா சிலைக்கு மாலை அணிவித்து மரியாதை செலுத்தினார்.

ஈரோடு:

தமிழ் மாநில காங்கிரஸ் தலைவர் ஜி.கே.வாசன் ஈரோடு மாவட்டத்தில் பல்வேறு இடங்களில் நடைபெற்ற கட்சி கொடி யேற்று விழாவில் கலந்து கொள்வதற்காக நேற்று ஈரோட்டிற்கு வந்தார்.

அவர் நிருபர்களுக்கு பேட்டி அளித்தார். அப்போது அவர் கூறியதாவது.-

ஈரோடு மாவட்டத்தில் அனைத்துப் பகுதியிலும் வறட்சி ஏற்பட்டு குடிநீர் தட்டுப்பாடு ஏற்பட்டுள்ளது. ஈரோடு மாவட்டம் விவசாயிகள் நிறைந்த மாவட்டம். குடிநீருக்காகவும், விவசாயத்துக்காகவும் அவர்கள் பவானிசாகர் அணையை நம்பியே உள்ளனர்.

உடனடியாக பவானி சாகர் அணையில் இருந்து கீழ்பவானி வாய்க்காலுக்கு உயிர்நீர் திறந்து விவசாயிகளின் வாழ்வாதாரத்தை காக்க தமிழக அரசு நடவடிக்கை எடுக்க வேண்டும். ஈரோடு மாவட்டத்தை பொறுத்த வரை டெங்கு காய்ச்சல் பீதியிலேயே மக்கள் வாழ்ந்து வருகிறார்கள்.

சுகாதாரத்துறை அது போன்ற பகுதிகளுக்கு எல்லாம் நடமாடும் ஆம்புலன்ஸ்களை அனுப்பி தேவையான பாதுகாப்பு நட வடிக்கை எடுக்க வேண்டும். நீட் தேர்வுவை பொறுத்த வரை தமிழக அரசு, மத்திய அரசுக்கு அழுத்தம் கொடுத்து அதிலிருந்து விலக்கு பெற வேண்டும்.

பிரதமரை சந்தித்து நீட் தேர்வில் இருந்து விலக்கு பெற தமிழக அரசு அனைத்து கட்சி கூட்டத்தை உடனடியாக கூட்ட வேண்டும்.

ஆளுங்கட்சியை பொறுத்த வரை மக்கள் பிரச்சினையில் அதிகம் கவனம் செலுத்த வேண்டியது போய், தங்கள் ஆட்சியையும், அதிகாரத்தையும் காப்பாற்றி கொள்ள வேண்டும் என்பதிலேயே கவனம் செலுத்தி வருகிறார்கள்.

இவ்வாறு அவர் கூறினார்.

ஈரோடு சாஸ்திரி நகரில் நடந்த கொடியேற்று விழாவுக்கு ஈரோடு மத்திய மாவட்ட தலைவர் விஜயகுமார் தலைமை தாங்கினார். மாநில இளைஞரணி தலைவர் யுவராஜா, மாநில துணைத் தலைவர் ஆறுமுகம், மாநில பொதுச்செயலாளர் விடியல்சேகர், மாநில செயற்குழு உறுப்பினர் சந்திரசேகர் ஆகியோர் முன்னிலை வகித்தனர்.

நெசவாளர் அணி மாநில தலைவர் எம். ராஜேஷ், மாநில துணை தலைவர் கிளப்மேலாஞ்ச் எஸ்.ரமேஷ் உள்பட பலர் கலந்து கொண்டனர்.

ஈரோடு மாவட்டத்தில் சிவகிரி, கணபதிபாளையம், சாஸ்திரிநகர், ராஜாஜிபுரம், கனிராவுத்தர்குளம், நசியனூர் உள்ளிட்ட 6 இடங்களில் கட்சியின் கொடியை ஏற்றியும், பெயர் பலகையையும் திறந்து வைத்தார்.

மேலும் காமராஜர் பிறந்த நாளையொட்டி த.மா.கா. சார்பில் நடந்த பேச்சு போட்டியில் வெற்றி பெற்ற மாணவ-மாணவிகளுக்கு நினைவு பரிசுகளையும் வழங்கினார்.

ஈரோடு:

ஈரோடு தெற்கு மாவட்ட காங்கிரஸ் கட்சியின் அலுவலகம் ஈரோடு மணல்மேட்டில் அமைக்கப்பட்டு உள்ளது. இதன் திறப்பு விழா நடந்தது. முன்னாள் எம்.எல்.ஏ. ஆர்.எம். பழனிச்சாமி தலைமை தாங்கினார். தெற்கு மாவட்ட காங்கிரஸ் தலைவர் மக்கள் ராஜன் வரவேற்றார்.

தமிழ்நாடு காங்கிரஸ் கமிட்டி தலைவர் திருநாவுக்கரசர் அலுவலகத்தை திறந்து வைத்து பேசினார். அவர் கூறியதாவது:-

காங்கிரஸ் கட்சி பாரம்பரியம் மிக்க கட்சி. பிரதமராக இருந்த இந்திராகாந்தி, ராஜீவ்காந்தி ஆகியோர் நாட்டுக்காக தங்கள் உயிரை தந்துள்ளனர்.இருப்பினும் எதற்கும் பயப்படாமல் சோனியாவும், ராகுல்காந்தியும் காங்கிரஸ் கட்சிக்காகவும், நாட்டுக்காகவும் பாடுபட்டு வருகிறார்கள்.

எந்த கட்சியையும் நான் பெயர் சொல்ல விரும்ப வில்லை. சில கட்சிகள் ஜாதி, மத உணர்வுடன் செயல்படுகிறது. ஆனால் ஜாதி, மதத்துக்கு அப்பாற்பட்டு அனைத்து தரப்பு மக்களும் ஏற்கும் வகையில் காங்கிரஸ் செயல்படுகிறது.

தற்போது இளைஞர்கள் புதிய மாவட்ட காங்கிரஸ் தலைவர்களாக நியமிக்கப்பட்டு உள்ளனர். அவர்கள் புத்துணர்வுடனும், வேகத்துடனும் செயல்பட்டு கட்சியை வளர்க்க வேண்டும். 50 லட்சம் உறுப்பினர்களை காங்கிரசில் சேர்க்க வேண் டும்.

இவ்வாறு திருநாவுக்கரசர் பேசினார்.

அந்தியூர்:

ஈரோடு மாவட்டம் அந்தியூரில் வக்பு வாரிய இட ஆக்கிரமிப்பு சம்பந்தமாக கேட்டறிய மனித நேய ஜனநாயக கட்சி பொதுச் செயலாளரும், நாகை தொகுதி எம்.எல்.ஏ.வுமான தமீம் அன்சாரி அந்தியூர் வந்தார்.

இட ஆக்கிரமிப்பு சம்பந்த மாக சுமூகமாக பேசி தீர்க்க நடவடிக்கை எடுக்கப்படும். மத்தியில் ஆளும் பாரதீய ஜனதா கட்சி ஜனநாயகத்தை சீர் குழைத்து வருகிறது.

பாரதிய ஜனதா கட்சி தவிர இந்தியாவில் எந்த கட்சிகளும் ஜனநாயக சுதந்திரத்தோடு செயல்படக்கூடாது என்று கங்கணம் கட்டிக் கொண்டு எல்லா கட்சி தலைவர்கள் மீதும் வழக்குகளை பாய்ச்சுகிறார்கள்.

எதிராக பேசுபவர்கள் மீது பலி வாங்கும் போக்கோடு கட்சி தலைமை செயல்பட்டு கொண்டிருக்கிறது. காங்கிரஸ் கட்சி இதனை முறியடிக்க வேண்டும்.

ராகுல்காந்தி முழு நேர அரசியலுக்கு வந்து ஜனசக்தி, மதசார்பற்ற சக்தி, சமூக நீதி சக்தி, இடதுசாரிகள் என அனைவரையும் ஒருங்கிணைத்து பாரதீய ஜனதாவுக்கு எதிராக ஜனநாயக போரை அறிவிக்க வேண்டும்.

தமிழ்நாட்டில் அ.தி.மு.க. வின் பிளவிற்கும், இரு அணிகள் சேராதிருப்பதற்கும் பாரதிய ஜனதா கட்சியின் கைங்கரியம் தான் மூலக்காரணம் ஆகும்.

பெங்களூருவில் இருக்கும் குஜராத் மாநில காங்கிரஸ் கட்சி எம்.எல்.ஏ.க்கள் காங்கிரசுக்கு வாக்களிக்கக் கூடாது என்பதற்காக வருமான வரித்துறை சோதனை நடத்தப்பட்டுள்ளது.

எனவே மத்திய வருமான வரித்துறை பாரதீய ஜனதா கட்சியின் கிளை அமைப்பாக மாறியிருக்கிறது என்ற சந்தேகம் ஏற்பட்டுள்ளது.

எதிர் காலத்தில் இந்தியாவில் ரேசன் பொருட்களை நிறுத்துவதற்கான முன்னேற்பாடாக மத்திய அரசு தற்போது செயல்படுகிறது. ரேசன் பொருட்கள் மீதுள்ள கெடுபிடிகளை திரும்ப பெற வேண்டும்.

இவ்வாறு அவர் கூறினார். அப்போது துணை பொது செயலாளர் பாபு ஷாகின்ஷா, மாவட்ட செயலாளர் ஷாநவாஸ், கோவை மாவட்ட செயலாளர் அப்பாஸ் மற்றும் நிர்வாகிகள் உடன் இருந்தனர்.