ஈரோடு அ.தி.மு.க. எம்.எல்.ஏ கே.வி.ராமலிங்கம் மீது தொழிற்சங்கத்தினர் பரபரப்பு புகார்

ஈரோடு:

ஈரோடு மாவட்ட டாஸ்மாக் அனைத்து தொழிற்சங்கங்களின் கூட்டு நடவடிக்கை குழு சார்பாக ஈரோடு மாவட்ட போலீஸ் சூப்பிரண்டு சிவக்குமாரிடம் ஒரு கோரிக்கை மனு கொடுக்கப்பட்டது. அந்த மனுவில் கூறியிருப்பதாவது:-

ஈரோடு மாவட்டத்தில் செயல்பட்டு வரும் டாஸ்மாக் மதுபானக் கடைகளில் பணிபுரியும் ஊழியர்கள் கடும் பணிச்சுமை, சிரமங்களுக்கு மத்தியில் பணிபுரிகிறார்கள். இவ்வாறு பணிபுரியும் ஊழியர்களின் பாதுகாப்பு பொறுப்பு மாவட்ட டாஸ்மாக் நிர்வாகத்திற்கு உள்ளது. இதன் அடிப்படையில் ஊழியர்களுக்கு ஏற்படும் இடர்பாடுகளை அவர்கள் சார்ந்துள்ள தொழிற்சங்கங்களின் மூலம் மாவட்ட டாஸ்மாக் நிர்வாகத்திற்கு கொண்டு செல்லப்பட்டு, தீர்வு காணப்பட்டும் வருகிறது.

தற்போது ஈரோடு மேற்கு, கிழக்கு சட்டமன்ற தொகுதிகளில் செயல்படும் கடைகளின் மேற்பார்வையாளர்களை மேற்கு தொகுதி எம்.எல்.ஏ. கே.வி.ராமலிங்கம் தனது அலுவலகத்துக்கு அழைத்து கடை ஒன்றுக்கு தினமும் ரூ.700 வீதம் மாதம் ரூ.21,000 தனக்கு கொடுக்க வேண்டும் என கூறி இருக்கிறார்.

கடை மேற்பார்வையாளர்கள் அவ்வாறு ஏதும் தர முடியாது என மறுத்துள்ளனர். ஆயினும் ஈரோடு வட்டாரத்தில் உள்ள டாஸ்மாக் மதுக்கடைகளுக்கு சில நபர்கள் சென்று எம்.எல்.ஏ அலுவலகத்துக்கு பணம் கொடுக்க வேண்டும் என்று கேட்டுள்ளனர்.

எந்த தொகையும் தர முடியாது என்று சொன்னதால் 3 கடைகளுக்கு சில நபர்கள் கும்பலாக சென்று கடை ஊழியர்களிடம் தேவையற்ற வாக்குவாதம் செய்து, தகாத வார்த்தைகளால் மிரட்டி, பணிக்கு இடையூறு செய்துள்ளனர்.

இது குறித்து ஈரோடு தெற்கு, தாலுகா போலீஸ் நிலையங்களில் சம்பந்தப்பட்ட கடை ஊழியர்களால் புகார் செய்யப்பட்டது. மாவட்ட மேலாளருக்கும் தொலைபேசி வாயிலாக தகவல் தெரிவிக்கப்பட்டு உள்ளது.

இந்த பிரச்சினையில் மாவட்ட டாஸ்மாக் நிர்வாகம் தலையிட்டு கடை ஊழியர்களிடம் பணம் கேட்டு தொல்லை கொடுப்பதை தடுத்து நிறுத்தும் முயற்சி எதுவும் எடுக்கவில்லை.

டாஸ்மாக் மாவட்ட நிர்வாகம் ஊழியர்களின் பணிப் பாதுகாப்பு வி‌ஷயத்தில் பாராமுகமாக உள்ளதாக கருத வேண்டியுள்ளது. இந்த நிலை துரதிஷ்டவசமானது. இது குறித்து மாவட்ட நிர்வாகத்திடமும் புகார் கூறி உள்ளோம்.

எனவே தாங்களும் இதில் தலையிட்டு இந்த நிகழ்வுகள் நடக்காமல் தடுத்து நிறுத்த நடவடிக்கை எடுக்க வேண்டும்.

இவ்வாறு அவர்கள் அதில் கூறி உள்ளனர்.