கடலூர்

ஸ்ரீமுஷ்ணம்:

கடலூர் மாவட்டம் ஸ்ரீமுஷ்ணம் வெள்ளாளர் தெருவைச் சேர்ந்தவர் சேகர். இவரது மனைவி சுந்தரி (வயது 35). இவர் அங்குள்ள தனியார் பள்ளியில் ஆசிரியையாக வேலை பார்த்து வருகிறார்.

நேற்று மாலை இவர் வீட்டில் குழந்தைகளுடன் சாப்பிட்டு கொண்டு இருந்தார். அப்போது அவரது வீட்டுக்குள் திடீரென்று 5 அடி நீளமுள்ள கருநாக பாம்பு புகுந்தது.

இதைப்பார்த்ததும் சுந்தரி மற்றும் குழந்தைகள் கூச்சலிட்டு வீட்டை விட்டு வெளியே வந்தனர். அவர்களது அலறல் சத்தம் கேட்டு அக்கம் பக்கத்தினர் ஓடிவந்தனர்.

அவர்கள் தீயணைப்பு படையினருக்கு தகவல் தெரிவித்தனர். தீயணைப்பு வீரர்கள் விரைந்து வந்து வீட்டுக்குள் புகுந்த கருநாக பாம்பை பிடித்தனர். பின்னர் அந்த பாம்பு கருவேப்பிலங்குறிச்சி காட்டில் கொண்டு விடப்பட்டது.

பிடிபட்ட கருநாகபாம்பு வி‌ஷத்தன்மை கொண்டதாகும். பாம்பு பிடிபட்டதால் பொதுமக்கள் நிம்மதி அடைந்தனர்.

சேத்தியாத்தோப்பு:

கடலூர் மாவட்டம் சேத்தியாத்தோப்பு அருகே உள்ளது வெய்யலூர் கிராமம். இந்த கிராமத்தில் சுமார் 10 ஏக்கர் நிலத்தை மத்திய அரசின் ஓ.என்.ஜி.சி. நிறுவனம் கடந்த 2 ஆண்டுகளுக்கு முன்பு குத்தகைக்கு எடுத்தது. பின்னர், அங்கு ஆழ்துளைகிணறு அமைத்து, எண்ணெய் மற்றும் இயற்கை எரிவாயு ஆய்வுகழகம் என்ற பெயரில் அந்த நிறுவனம் ஆராய்ச்சி பணியை மேற்கொண்டு வருகிறது.

கடந்த 2 ஆண்டுகளாக ஒப்பந்ததேதி முடிவடைந்த பிறகும், அந்த இடத்தில் ஆய்வு கழகம் தங்களது ஆராய்ச்சி பணியை தொடர்ந்து நடத்தி வருகிறது. இதற்கிடையே கடந்த சில மாதமாக ஆய்வு கழகத்தில் இருந்து துர்நாற்றம் வீச தொடங்கியது. இதன் காரணமாக அப்பகுதி மக்கள் அச்சம் அடைந்தனர்.

இதையடுத்து, வெய்யலூர், மடப்பாக்கம், வாழக்கொல்லை, ஓடாக்கநல்லூர், பரிபூரணநத்தம் உள்ளிட்ட கிராமங்களை சேர்ந்த கிராம மக்கள் துர்நாற்றம் வீசுவதாகவும், நிலத்தடி நீர்மட்டம் குறைந்துவிட்டதாகவும் குற்றம்சாட்டினர். மேலும், வெய்யலூரில் இயங்கி வந்த இயற்கை எரிவாயு ஆய்வு கழகத்தின் ஆராய்ச்சி பணியை நிறுத்த வேண்டும் என்று கோரிக் கை விடுத்தனர். இந்த நிலையில், 10-க்கும் மேற்பட்ட கிராம மக்கள் வெய்ய லூரில் உள்ள எண்ணெய் மற்றும் இயற்கை எரிவாயு ஆய்வு கழகம் முன்பு ஒன்று திரண்டு திடீரென ஆர்ப்பாட்டத்தில் ஈடுபட்டனர்.

ஆய்வு கழகத்தின் ஆராய்ச்சி பணியை நிறுத்தி, அங்குள்ளவர்கள் வெளியேறவேண்டும் என்ற கோரிக்கையை முன் வைத்து நடைபெற்ற இந்த ஆர்ப்பாட்டத்திற்கு பா.ம.க. ஒழுங்கு நடவடிக்கைக்குழு தேவதாஸ் படையாண்டவர் தலைமை தாங்கினார்.

இந்த ஆர்ப்பாட்டம் அப்பகுதியில் பரபரப்பை ஏற்படுத்தியது.

விருத்தாசலம்:

கடலூர் மாவட்டம் விருத்தாசலம் வானொலி திடல் அருகில் நகராட்சிக்கு சொந்தமான காலியிடம் உள்ளது. இந்த இடத்தில் 60 ஆண்டுகாலமாக தனிநபர் சிலர் வீடுகள் கட்டி குடியிருந்து வருகின்றனர்.

நகராட்சிக்கு சொந்தமான இடத்தில் கட்டப்பட்ட வீடுகளை அகற்றக் கோரி சிலர் நகராட்சி அலுவலகத்தில் புகார் செய்திருந்தனர். இதனைத் தொடர்ந்து நகராட்சி சார்பில் ஆக்கிரமித்து வீடுகள் கட்டிய நபர்களுக்கு நோட்டீஸ் அனுப்பப்பட்டது.

அதில் நகராட்சிக்கு சொந்தமான இடத்தில் கட்டப்பட்ட வீடுகளை காலிசெய்து வெளியேர வேண்டும். இல்லையென்றால் அகற்றப்படும் என்று கூறப்பட்டிருந்தது.

இந்தநிலையில் இன்று விருத்தாசலம் நகராட்சி ஆணையாளர் அசோக்குமார், துப்புரவு அலுவலர் குமார், நகரஅமைப்பு ஆய்வாளர் சேகர், வருவாய் ஆய்வாளர் மணிவண்ணன், துப்புரவு ஆய்வாளர் சிவப்பிரகாசம் ஆகியோர் சம்பவ இடத்துக்கு வந்தனர்.

மேலும் ஆக்கிரமிப்புகளை அகற்ற ஜே.சி.பி.எந்திரம் கொண்டுவரப்பட்டது. இதை அறிந்ததும் அந்த வீடுகளில் வசித்தவர்கள் திரண்டு வந்தனர். அவர்கள் அதிகாரிகளிடம் நாங்கள் பல ஆண்டுகளாக குடியிருந்து வருகிறோம். அதனால் எங்கள் வீடுகளை இடிக்கக்கூடாது என்று வாக்குவாதத்தில் ஈடுபட்டனர். மேலும் வீடுகளை இடித்தால் தீக்குளிக்கப்போவதாக மிரட்டலும் விடுத்தனர்.

இதுபற்றி தகவல் அறிந்ததும் விருத்தாசலம் இன்ஸ்பெக்டர் ராஜ.தாமரைபாண்டியன், சப்-இன்ஸ்பெக்டர் பொட்டா மற்றும் ஏராளமான போலீசார் அங்கு வந்தனர். அவர்கள் அதிகாரிகளுடன் வாக்குவாதத்தில் ஈடுபட்ட பொதுமக்களிடம் பேச்சுவார்த்தை நடத்தினர்.

அதன்பின்பு அங்கு கட்டப்பட்டிருந்த 3 வீடுகளையும் ஜே.சி.பி. எந்திரம் மூலம் இடித்து தரைமட்டமாக்கப்பட்டது.

ஆக்கிரமித்து கட்டப்பட்ட வீடுகள் அகற்றப்பட்டதால் அந்த பகுதியில் பெரும் பரபரப்பை ஏற்படுத்தியது.

கடலூர் மாவட்டம் பண்ருட்டியில் கடந்த 2011-ம் ஆண்டு நடைபெற்ற சட்டசபை தேர்தல் பிரசாரத்தின்போது தேர்தல் நடத்தை விதிமுறைகளை மீறியதாக பா.ம.க. நிறுவனர் டாக்டர்.ராமதாஸ், விடுதலை சிறுத்தைகள் கட்சி தலைவர் திருமாவளவன், தமிழக வாழ்வுரிமை கட்சி தலைவர் வேல்முருகன், நடிகர் நெப்போலியன், முன்னாள் காங்கிரஸ் எம்.பி.கே.எஸ்.அழகிரி, சபா.ராஜேந்திரன் எம்.எல்.ஏ. சுபவீரபாண்டியன் உள்பட 50-க்கும் மேற்பட்டோர் மீது பண்ருட்டி போலீசார் வழக்கு பதிவு செய்தனர்.

இந்த வழக்கு விசாரணை பண்ருட்டி குற்றவியல் நீதிமன்றத்தில் நீதிபதி கணேஷ் முன்னிலையில் நடைபெற்றது. இதில் பா.ம.க. நிறுவனர் டாக்டர்.ராமதாஸ், தமிழக வாழ்வுரிமை கட்சி தலைவர் வேல்முருகன், முன்னாள் காங்கிரஸ் எம்.பி.கே.எஸ்.அழகிரி, சபா.ராஜேந்திரன் எம்.எல்.ஏ. மற்றும் சுபவீரபாண்டியன் ஆகியோர் நீதிமன்றத்தில் ஆஜராகினர்.

இந்த வழக்கு விசாரணையின்போது விடுதலை சிறுத்தைகள் கட்சி தலைவர் திருமாவளவன், நடிகர் நெப்போலியன் ஆகியோர் நேரில் ஆஜராகவில்லை. இவர்களது தரப்பில் அவர்களது வக்கீல்கள் ஆஜராகினர்.

திருமாவளவனும், நெப்போலியனும் கோர்ட்டில் ஆஜராக முடியாதது குறித்து அவரது வக்கீல்கள் கோர்ட்டில் மனுதாக்கல் செய்தனர். இவர்களது மனுவை நீதிபதி கணேஷ் தள்ளுபடி செய்தார்.

மேலும் கோர்ட்டில் ஆஜராகாத திருமாவளவன் மற்றும் நெப்போலியன் ஆகியோருக்கு பிடிவாரண்டு உத்தரவு பிறப்பித்தார். வழக்கு விசாரணையை ஜூலை 1-ந் தேதிக்கு ஒத்தி வைத்தார்.

பண்ருட்டி:

பண்ருட்டியில் கடந்த 2011ல் நடைபெற்ற சட்டமன்ற தேர்தல் பிரச்சாரத்தின்போது தேர்தல் நடத்தை விதி முறைகளை மீறி நடந்து கொண்டதாக பாமக நிறுவனர் டாக்டர்.ராமதாஸ், விடுதலை சிறுத்தைகள் கட்சி தலைவர் தொல்.திருமாவளவன், தமிழக வாழ்வுரிமை கட்சி தலைவர் வேல்முருகன், உள்பட 50-க்கும் மேற்பட்டோர் மீது பண்ருட்டி போலீசார் வழக்கு பதிவு செய்தனர்.

இந்த வழக்கு விசாரணை பண்ருட்டி குற்றவியல் நீதிமன்றத்தில் இன்று நடைபெற்றது. குற்றவியல் நீதித்துறை நடுவர் நீதிமன்ற நீதிபதி கணேஷ் விசாரணை நடத்தினர்.

இதில் பா.ம.க. நிறுவனர் டாக்டர்.ராமதாஸ், தமிழக வாழ்வுரிமை கட்சி தலைவர் வேல்முருகன், முன்னாள் காங்கிரஸ் எம்.பி.கே.எஸ்.அழகிரி, எம்.எல்.ஏ.சபா.ராஜேந்திரன் சுபவீர பாண்டியன் ஆகியோர் நீதிமன்றத்தில் ஆஜராகி நீதிபதி கேள்விகளுக்கு பதில் அளித்தனர்.

கோர்ட்டில் ஆஜராகி விட்டு வெளியே வந்த பா.ம.க.நிறுவனர் ராமதாஸ் நிருபர்களுக்கு பேட்டியளித்தார்.

கடந்த 2011ல் நடைபெற்ற சட்டமன்ற தேர்தல் பிரச்சாரத்தின்போது தேர்தல் நடத்தை விதிமுறைகளை மீறியதாக என் மீது வழக்கு போடப்பட்டது. இது எதிர்கட்சியினரை அலைக்கழிக்கவே போடப்பட்ட வழக்காகும்.

தமிழகத்தில் பாரதீய ஜனதாவின் ஊதுகுழலாக அ.தி.மு.க.அரசு மாறிவிட்டது. பாரதீய ஜனதாவின் பினாமியாகவும் உள்ளது.

ஆர்.கே.நகர் இடைத்தேர்தலில் பணப்பட்டுவாடா நடைபெற்றதாக முதல்-அமைச்சர் மற்றும் 6 அமைச்சர்கள் மீது வழக்கு பதிவு செய்ய தலைமை தேர்தல் ஆணையம் உத்தரவிட்டும் இதுவரையில் அவர்கள் மீது நடவடிக்கை எடுக்கப்படவில்லை.

ஜனாதிபதி தேர்தலில் பாரதீய ஜனதாவும் எதிர்கட்சிகளும் வேட்பாளர்களை அறிவித்துள்ளது. பா.ம.க.யாரை ஆதரிக்கும் என்பதை விரைவில் அறிவிப்போம்.

ஜனாதிபதி தேர்தலில் பாரதீய ஜனதா வேட்பாளரை ஆதரிக்க போவதாக அ.தி.மு.க. தாமாகவே முன்வந்து அறிவித்துள்ளது.தமிழகத்தில் சட்டம்-ஒழுங்கு கெட்டு விட்டது.

நெய்வேலியில் என்.எல்.சி.நிறுவனத்துக்கு நிலம் வழங்கியவர்களுக்கு வேலை வழங்கக்கோரி வருகிற 29-ந் தேதி பா.ம.க. சார்பில் ஆர்ப்பாட்டம் நடைபெறும். இதில் ஏராளமான பா.ம.க.வினர் கலந்து கொள்வார்கள்.

இவ்வாறு அவர் கூறினார்.

தமிழக வாழ்வுரிமை கட்சி தலைவர் வேல்முருகன் கூறியதாவது:-

தமிழக சட்டசபை கூட்டம் தற்போது நடந்து வருகிறது. இந்த கூட்டத்தொடரில் 10 ஆண்டுகளுக்கு மேல் சிறையில் இருக்கும் ஆயுள் கைதிகளை விடுதலை செய்ய சட்டம் இயற்ற வேண்டும். ராஜீவ்கொலை வழக்கில் குற்றம்சாட்டப்பட்ட பேரறிவாளன், நளினி, ராபர்ட் உள்பட 7 பேரை மத்திய, மாநில அரசுகள் விடுதலை செய்ய வேண்டும்.

தமிழகத்தில் கடும் வறட்சி ஏற்பட்டுள்ளது. எனவே பாதிக்கப்பட்ட விவசாயிகளுக்கு உரிய நிவாரணம் வழங்க வேண்டும். விவசாய விளைபொருள்களுக்கு நியாயமான விலை கிடைக்க உரிய நடவடிக்கை எடுக்க வேண்டும்.

இவ்வாறு அவர் கூறினார்.

பல்வேறு அரசியல் கட்சி தலைவர்கள் வருகையால் பண்ருட்டி நீதிமன்ற வளாகம் மிகுந்த பரபரப்புடன் காணப்பட்டது. பண்ருட்டி டிஎஸ்பி சுந்தரவடிவேல் தலைமையில் பலத்த போலீஸ் பாதுகாப்பு போடப்பட்டிருந்து.