நீங்கள் தேடியது "திரவ நைட்ரஜன்"

சென்னை:

அமிலம் கலந்து உணவுப் பொருட்கள் வினியோகம் என்றது அதிர்ச்சியை ஏற்படுத்தியது. வாடிக்கையாளர்களை கவர ஐஸ்கிரீம், பிஸ்கெட் ஆகியவற்றின் மீது திரவ நைட்ரஜனை கலப்பது சாப்பிடும் போது புகையை வரவழைக்கும்.

இதனால் ஆர்வமுடன் அதை வாங்கி சாப்பிடுகிறார்கள். ஆனால் இது உடலுக்கு ஆபத்தை ஏற்படுத்தும் என்பதால் ஸ்மோக் பிஸ்கெட், ஸ்மோக் பீடா, ஸ்மோக் ஐஸ்கிரீம் விற்பனைக்கு சென்னையில் தடை விதிக்கப்பட்டுள்ளது.

உணவு உட்கொள்ளும் தருணத்தில் திரவ நைட்ரஜனை அதன் மீது கலந்தால் வாயில் இருந்து புகை அதிக அளவில் வரும். இதை சுவாசிப்பதால் ஜீரண மண்டலத்தில் பாதிப்பை ஏற்படுத்தி உயிருக்கே ஆபத்தை ஏற்படுத்தி விடும்.

இதுதொடர்பாக சென்னை உணவு பாதுகாப்புத்துறை நியமன அதிகாரி சதீஷ்குமார் வெளியிட்டுள்ள அறிக்கையில் கூறியிருப்பதாவது:-

பால், தயிர், க்ரீம்கள், விப்பிங் க்ரீம்கள், கொழுப்பு குறைவான க்ரீம்கள், பதப்படுத்தப்பட்ட பழங்கள், பழ ரசங்கள், காய்கறிச் சாறுகள், காபி, தேநீர், மூலிகை பானங்கள் உள்ளிட்டவற்றை நுரைக்கச் செய்வதற்கும், கெட்டுப்போகாமல் பொட்டலமிடுவதற்கும் திரவ நைட்ரஜனை பயன்படுத்தலாம்.

அதே போல, திராட்சை ஒயினில் இருந்து ஆக்ஸிஜனை வெளியேற்றுவதற்கும் அதை பயன்படுத்தலாம். மற்றபடி வேறு எந்த வகையிலும் வணிகர்கள் திரவ நைட்ரஜனை உணவில் சேர்க்கக் கூடாது.

இந்த விதியை மீறினால் ரூ.2 ஆயிரம் முதல் 10 ஆயிரம் வரை அபராதம் விதிக்கப்படும். குற்றம் நிரூபணமானால் உரிமம் ரத்து செய்யப்படுவதுடன் ரூ.2 லட்சம் வரை அபராதம் விதிக்கப்படும்.

அதுமட்டுமின்றி, திரவ நைட்ரஜன் கலந்த உணவுப் பொருளை உட்கொண்டு பாதிக்கப்பட்டவர் அல்லது அவரது குடும்பத்தினருக்கு சம்பந்தப்பட்ட வணிகரிடம் இருந்து இழப்பீடு பெற்றுத் தரப்படும்.

இவ்வாறு அதில் கூறி உள்ளார்.

திரவ நைட்ரஜன் உட்கொள்ளப்படும் போது உதடு, நாக்கு, தொண்டை, நுரையீரல் மற்றும் வயிற்று பகுதியை சேதப்படுத்துகிறது. நுரையீரலுக்குள் புகுந்தால் சுயநினைவும் இழக்க வாய்ப்பு உண்டு என்று எச்சரித்துள்ளார்கள்.

அதே நேரம் தொழில் துறை நோக்கங்களுக்காக திரவ நைட்ரஜன் பயன்பாட்டை அனுமதித்துள்ளார்கள். உணவுப் பொருட்களை உறைய வைக்க, குளிரூட்ட, பேக்கிங் செய்ய பயன்படுத்தப்படுகிறது. இதன் மூலம் அந்த உணவு பொருட்கள் பல மாதங்கள் வரை கெட்டுப்போகாமல் இருக்குமாம்.

6 மாதங்களுக்கு முன்பே திருச்சியில் நடைபெற்ற ஒரு கண்காட்சியில் ஸ்மோக்கிங் பிஸ்கெட் விற்றவர் கைது செய்யப்பட்டிருக்கிறார். அதே போல் சென்னையில் நடைபெற்ற வர்த்தக கண்காட்சியிலும் பயன்படுத்தி இருக்கிறார்கள். ஆனால் இப்போதுதான் தடை வந்துள்ளது.

உணவில் கலந்து பதப்படுத்தி வைத்திருந்தால் அதை சாப்பிடும் போது உடலை பதம் பார்க்காதாம். இதமாக இருக்குமாம். ஆனால் சாப்பிடும் போது அதன் மீது தெளித்து சாப்பிட்டால்தான் ஆபத்தாம்.

மதுரை:

கர்நாடக மாநிலத்தில் கடந்த வாரம் திரவ நைட்ரஜன் பயன்படுத்தப்பட்ட ஸ்மோக் பிஸ்கட் சாப்பிட்ட சிறுவனின் உடல் நிலை பாதிக்கப்பட்டது. தீவிர சிகிச்சைக்கு பிறகு அவரது உடல்நிலை தேறி வரும் நிலையில் தமிழகத்தில் இந்த திரவ நைட்ரஜன் பயன்பாட்டிற்கு தடை விதித்து அரசு உத்தரவிட்டுள்ளது.

திரவ நைட்ரஜனை நேரடியாக உணவுப்பொருட்களில் கலந்து விற்பனை செய்யக்கூடாது, அதனை மீறுபவர்கள் மீது கடுமையான நடவடிக்கை எடுக்கப்படும் என்றும் எச்சரிக்கை விடுக்கப்பட்டுள்ளது. உணவு பாதுகாப்புத்துறை மற்றும் தர நிர்ணய சட்டத்தின்படி உறைதல் பணிக்கு மட்டுமே இந்த திரவ நைட்ரஜனை பயன்படுத்த வேண்டும் என்றும் அறிவுறுத்தப்பட்டு உள்ளது.

இந்தநிலையில் மதுரை நகர் பகுதி முழுவதும் திரவ நைட்ரஜன் பயன்படுத்தும் கடைகளை ஆய்வு செய்து நடவடிக்கை எடுக்க உணவு பாதுகாப்புத் துறை அதிகாரிகளுக்கு உத்தரவு பிறப்பிக்கப்பட்டது. அதன்படி நேற்று மதியம் முதல் இரவு வரை மதுரை தெப்பக்குளம் பகுதியில் செயல்பட்டு வரும் உணவு கடைகளை உணவு பாதுகாப்பு துறை அதிகாரிகள் அதிரடி சோதனை மேற்கொண்டனர்.

அதில் திரவ நைட்ரஜன் பயன்படுத்தும் ஸ்மோக் பிஸ்கட் கடையின் உணவு பாதுகாப்பு பதிவு சான்றிதழை ரத்து செய்து அதிகாரிகள் உத்தரவிட்டனர். மேலும் கடை சுற்றியும் ஒட்டப்பட்டுள்ள விளம்பர ஸ்டிக்கர்களும் அகற்றப்பட்டு உரிமையாளருக்கு எச்சரிக்கை விடுக்கப்பட்டது.

இந்த ஆய்வு மதுரை முழுவதும் தொடர்ந்து நடைபெறும் என உணவு பாதுகாப்புத்துறை அதிகாரி தெரிவித்துள்ளார்.

திரவ நைட்ரஜன் ஒழுங்காக கையாளப்படாவிட்டால் ஆபத்தானது. இது உடம்பில் ஏதாவது இடத்தில் பட்டால் உறைபனி அல்லது தீக்காயங்களை ஏற்படுத்தும். இந்த திரவ நைட்ரஜன் ஐஸ்க்ரீம் தயாரிக்கும் பொருட்கள் உறைவதுக்கு பயன்படுத்துவது.

நைட்ரஜன் ஆக்ஸைடு என்றால் என்ன? அதன் விளைவுகள்

இந்த திரவ நைட்ரஜன் என்பது மிகக்குறைந்த வெப்பநிலையில் திரவ நிலையில் இருக்கும் நைட்ரஜன் ஆகும். இது ஒரு நிறமற்ற, வாசனையற்ற திரவ நிலையில் உள்ள நைட்ரஜன் திரவம் ஆகும்.

இதன் டெம்பரேச்சர் மைனஸ் 190 டிகிரி செல்சியஸ். இதனுடைய முக்கியமான பயன்பாடு என்னவென்றால் ஐஸ்கிரீம், இறைச்சி வகைகளை படுத்துவதற்கு பெரிதும் பயன்படுகிறது.

இந்த திரவ நைட்ரஜனை பயன்படுத்தி எல்லா பொருட்களையும் பதப்படுத்தி பாதுகாக்க முடியும். திரவ நிலையில் இருந்து வாயுவாக வெளிவரக்கூடியது. இது திரவ நிலையில் இருது வாயுவாக மாறும்போது அதன் தன்மை மிகவும் ஆபத்தானது என்கின்றனர் மருத்துவர்கள்.

அதே நைட்ரஜன் வாயுக்கள் நம் உடலுக்குள் செல்லும் போது கடும் உடல் உபாதைகளை உண்டுபண்ணுகிறது. வயிற்றுவலி, மூச்சுத்திணறல் மற்றும் மரணம் ஏற்படுவதற்கு கூட அதிக வாய்ப்புகள் உண்டு. இந்த திரவ நைட்ரஜன் இன்ஸ்டண்ட்டாக எந்த பொருளையும் உறைய வைக்கும் தன்மை கொண்டது. அதுமட்டுமல்லாமல் திரவ நைட்ரஜன் ஆவியாகும் போது காற்றில் உள்ள ஆக்சிஜன் அளவை குறைக்கக்கூடியது. இதனால் தான் மூச்சுத்திணறல் ஏற்படுகிறது.

ஒரு லிட்டர் திரவ நைட்ரஜன் 700 லிட்டர் கியாஸ் வாயுவை வெளிப்படுத்தும் தன்மை கொண்டது. இதனால் திரவ நைட்ரஜனில் இருந்து வரும் நீராவி உடல் உள்ளுறுப்புகளுக்குள் சென்று திசுக்களை உறைய வைக்கும் தன்மை கொண்டது. இதனை அளவுக்கு அதிகமாக எடுத்துக்கொள்ளும் போது உடல் உறுப்புகளில் துளையை கூட ஏற்படுத்தக் கூடும். அந்த அளவிற்கு குளிர்ந்த உறைபனி தன்மையை உருவாக்கக் கூடியது.

பெரும்பாலும் உணவுத்துறையில் ஐஸ்கிரீம் துறையில் மட்டுமே இந்த நைட்ரஜனை பயன்படுத்தி வந்தனர். ஆனால் தற்போது ஒரு கேளிக்கையாக திரவ நைட்ரஜனை பயன்படுத்தி நைட்ரோ ஸ்நாக் என்ற பேரில் கேக், பிஸ்கெட், சாக்லேட் ஆகிய உணவுப்பொருட்களில் இதனை ஊற்றி விற்பனை செய்து வருகின்றனர். இதன் ஆபத்து தெரியாமலேயே மக்கள் இதனை பயன்படுத்தி வருகின்றனர்.

இந்த திரவ நைட்ரஜன் அளவுக்கு அதிகமாக சேர்க்கப்படும் போது அது பல பின்விளைவுகளை ஏற்படுத்தி மரணத்தை கொடுக்கும் என்று டாக்டர்கள் எச்சரிக்கிறார்கள்.

உணவுவகைகளில் இந்த நைட்ரஜனை பயன்படுத்தி நைட்ரோ பிஸ்கெட், நைட்ரோ கார்ன் போன்றவைகளில் பயன்படுத்துகின்றனர்.

 நிறைய பேர் இந்த திரவ நைட்ரஜனை ஒரு கொண்டாட்டத்தின் பேரில் கேளிக்கையாக சென்று சாப்பிட்டு வருகின்றனர். அப்படியே உணவினை சாப்பிடும் போது நைட்ரஜன் வாயு முழுவதும் உணவில் இருந்து வெளியேறிய பிறகு சாப்பிட்டால் ஆபத்து எதுவும் இல்லை.

ஆனால் இந்த திரவ நைட்ரஜனை உணவில் கலந்து சாப்பிடும் போது அந்த வாயுக்கள் வாய் மற்றும் மூக்கு வழியாக வெளியேறுவதை நாம் பார்த்திருப்போம். இந்த உணவுகளை நாம் சாப்பிடும் போது இந்த வாயுக்கள் நம் உடலில் எங்கெல்லாம் படுகிறதோ அந்த உறுப்புகள் எல்லாம் பாதிப்படைய வாய்ப்புகள் அதிகம். அதனால் உறுப்புகள் சேதம் அடையும்.

இந்த திரவ நைட்ரஜன் ஒரு துளி கண்களில் படும்போது கண்பார்வையை இழந்துவிடும் அபாயம் உண்டு. இதனால் நைட்ரோ ஸ்நாக்ஸ் சாப்பிடும் போது மிகவும் கவனமாக இருக்க வேண்டும். இதன் பாதிப்பு என்னவென்றால் எந்த அளவுக்கு நைட்ரோ ஸ்நாக்ஸ் சாப்பிடுகிறோமோ அந்த அளவிற்கு உடலின் உள் உறுப்புகளில் பாதிப்புகள் இருக்கும்.

இந்த திரவ நைட்ரஜன் உணவுகளில் இவ்வளவு தீங்குகள் இருக்கிறது என்பதை அறியாமலேயே மக்கள் அதனை ஒரு கேளிக்கை பொருளாக நினைத்து சாப்பிட்டு வருகின்றனர். இனியாவது இந்த மாதிரி உணவுகளை தவிர்ப்பது உடலுக்கு நல்லது.