ஈரோடு

கோபி:

ஈரோடு மாவட்டம் கோபி அருகே உள்ள கரட்டடி பாளையத்தை சேர்ந்தவர் அருள் (வயது 41). இவர் அவினாசியில் கட்டிட வேலை பார்த்து வந்தார்.

நேற்று இரவு இவர் வேலை முடிந்து பஸ்சில் கோபி வந்தார். நள்ளிரவு 11 மணியளவில் கோபி காலேஜ் பிரிவில் ரோட்டோரம் நின்று கொண்டிருந்தார். அப்போது அவரை அழைத்து செல்ல மகன் கோகுல் வந்தார். தந்தையும் மகனும் வீட்டுக்கு செல்ல நடந்து சென்றனர். நள்ளிரவு 11 மணியளவில் கோபியில் இருந்து சத்தியமங்கலத்துக்கு மோட்டார் சைக்கிளில் 3 வாலிபர்கள் வந்தனர்.

இவர்கள் சென்ற மோட்டார் சைக்கிள் திடீரென ரோட்டில் நடந்து சென்ற அருள் மீது வேகமாக மோதி அங்கு ரோட்டோரம் நின்று கொண்டிருந்த ஒரு மினி டோர் ஆட்டோ மீது மோதியது.

இதில் படுகாயம் அடைந்த அருள் மற்றும் மோட்டார் சைக்கிளில் வந்த நல்லகவுண்டன் பாளையத்தை சேர்ந்த தீபன் (17), வினோத்குமார் (17), மணிகண்டன் (18) ஆகியோரும் படுகாயம் அடைந்தனர்.

இவர்கள் கோபி அரசு ஆஸ்பத்திரியில் சேர்க்கப்பட்டனர்.

அங்கு சிகிச்சை பலனின்றி அருள் மற்றும் மோட்டார் சைக்கிளை ஓட்டி வந்த வாலிபர் தீபன் உள்பட 2 பேரும் பரிதாபமாக இறந்தனர்.

இந்த பரிதாப சம்பவம் குறித்து கோபி போலீசார் வழக்கு பதிவு செய்து விசாரணை நடத்தி வருகிறார்கள். #tamilnews

பெருந்துறை:

ஈரோடு மாவட்டம் பெருந்துறை அருகே உள்ள சீனாபுரம் கிழக்கு தோட்டம் பகுதியை சேர்ந்தவர் ஈஸ்வரன் (வயது 76). விவசாயியான இவர் தீவிர அ.தி.மு.க. தொண்டர். அப்பகுதியில் அ.தி.மு.க. கிளை செயலாளராகவும் முன்னாள் கவுன்சிலராகவும் இருந்து உள்ளார்.

மேலும் மறைந்த முதல்வர் எம்.ஜி.ஆர் முதன்முதலாக கட்சி ஆரம்பித்தபோது அவரது ராமாபுரம் வீட்டிலேயே ஈஸ்வரன் தங்கி இருந்து கட்சி பணிகளை கவனித்து வந்தாராம். 2 மாதத்துக்கு பிறகு இதை அறிந்த எம்.ஜி.ஆர். அவரை அழைத்து அறிவுரை கூறி செலவுக்கு பணம் கொடுத்து ஊருக்கு அனுப்பி வைத்தாராம்.

ஊருக்கு வந்த ஈஸ்வரன் தீவிர கட்சி பணியில் ஈடுபட்டு வந்தார். தேர்தல் நேரத்தில் அ.தி.மு.க.வுக்காக பாடுபட்டு வந்தார்.

இந்த நிலையில் சென்னை ஆர்.கே.நகர் இடைதேர்தலில் அ.தி.மு.க. தோல்வி அடைந்ததையொட்டி ஈஸ்வரன் மிகவும் வேதனையில் இருந்தார்.

இந்த நிலையில் வீட்டில் இருந்த அவர் திடீரென வி‌ஷத்தை எடுத்து குடித்து கட்டிலில் படுத்து கொண்டார். சிறிது நேரத்தில் அவர் பரிதாபமாக இறந்தார்.

தற்கொலை செய்து கொண்ட ஈஸ்வரனுக்கு பவளக்கொடி (72) என்ற மனைவியும், 4 மகள்களும், 1 மகனும் உள்ளனர்.

இறந்த ஈஸ்வரன் உடலுக்கு அ.தி.மு.க. கட்சி பிரமுகர்கள், தொண்டர்கள் நேரில் சென்று அஞ்சலி செலுத்தி அவரது குடும்பத்தினருக்கு ஆறுதல் கூறினர். #tamilnews

ஈரோடு:

அந்தியூர் அடுத்த அம்மன் பாளையத்தில் உள்ள சாணார் தோட்டத்தில் 16 ஆயிரம் கிலோ ரே‌ஷன் அரிசி பதுக்கி வைக்கபட்டு கர்நாடக மாநிலத்துக்கு கடத்திய வழக்கில் அந்தியூர் சிந்தகவுண்டன் பாளையம், எட்டிக்குட்டை பாளையத்தை சேர்ந்த பிரகாஷ்(வயது 32) என்பரை போலீசார் கைது செய்து ஈரோடு கிளை சிறையில் அடைத்தனர். 

இந்நிலையில் தொடர்ந்து ரே‌ஷன் அரிசி கடத்தலில் ஈடுபட்டு வந்ததால் பிரகாசை குண்டர் தடுப்பு சட்டத்தின் கீழ் கைது செய்ய போலீசார் பரிந்துரை செய்தனர். 

இதையடுத்து பிரகாசை குண்டர் தடுப்பு சட்டத்தின் கீழ் கைது செய்ய கலெக்டர் பிரபாகர் உத்தரவிட்டார். xஇதையடுத்து பிரகாஷ் கோவை மத்திய சிறையில் அடைக்கப்பட்டார். #tamilnews

ஈரோடு:

ஈரோடு, சூரம்பட்டி வலசு, சங்குநகர் சாலை சேர்ந்தவர் வெங்கடேஷ்(வயது 50). கூலி தொழிலாளி. வெங்கடேஷ் நேற்று இரவு வேலையை முடித்து கொண்டு ஈரோடு பஸ் நிலையத்தில் சூரம்பட்டி வலசுக்கு செல்லும் பஸ்சுக்காக நின்று கொண்டிருந்தார்.

அப்போது அங்கு டவுன் பஸ் ரேக்கில் ஒரு தனியார் பஸ்சை நிறுத்துவதற்காக டிரைவர் பின்னோக்கி இயக்கினார் . வெங்கடேஷ் பஸ் வருவதை கவனிக்காமல் சென்றார். இதனால் பஸ் வெங்கடேஷ் மீது மோதியது.இதில் பலத்த காயம் அடைந்த அவர் உயிருக்காக போராடினார்.

இது குறித்து ஈரோடு டவுன் போலீசாருக்கு தகவல் தெரிவிக்கப்பட்டது. அவர்கள் சம்பவ இடத்துக்கு விரைந்து வந்து வெங்கடேஷை மீட்டு 108 ஆம்புலன்ஸ் மூலம் ஈரோடு அரசு ஆஸ்பத்திரிக்கு சிகிச்சைக்காக கொண்டு சென்றனர்.

அங்கு அவருக்கு தீவிர சிகிச்சை அளிக்கப்பட்டது. எனினும் சிகிச்சை பலனின்றி வெங்கடேஷ் பரிதாபமாக இறந்தார்.

இது குறித்து டவுன் போலீசார் வழக்கு பதிவு செய்து விசாரணை நடத்தி வருகிறார்கள்.

ஈரோடு:

கொங்கு நாடு மக்கள் தேசிய கட்சியின் பொதுச்செயலாளர் ஈஸ்வரன் அளித்த பேட்டியில் கூறியதாவது.-

நடந்து முடிந்த ஆர்.கே.நகர் தேர்தலில் பணம் வெற்றி பெற்றுள்ளது. மத்திய, மாநில அரசுக்கு எதிரான பிரசாரமும் தினகரன் வெற்றி பெற ஒரு காரணமாக அமைந்தது.

தினகரன் வெற்றி பெற்றது அவர் மக்கள் மத்தியில் செல்வாக்கு மிக்க தலைவர் என்பதற்காக இல்லை. தினகரன் வெற்றி பெற்றால் இந்த ஆட்சியை எப்படியாவது கலைத்து விடுவார் என்பதற்காக தான். மேலும் பாரதிய ஜனதாவுடன் தி.மு.க கைகோர்த்துவிடும் என்று சிலர் பொய்யான பிரசாரம் செய்தனர். இதுவும் தினகரன் பெற்றி பெற ஒரு காரணமாக இருந்தது.

அ.தி.மு.க.வினர் பல்வேறு அறிவிப்புகளை அறிவித்தனர். ஆனால் அவை இன்று வரை வெறும் அறிவிப்புகளாகவே உள்ளது. உதாரணமாக அத்திகடவு-அவினாசி திட்டம் ரூ.250 கோடி மதிப்பில் நிறைவேற்றப்படும் என்றனர். ஆனால் அந்த திட்டம் என்னவாயிற்று?

இதே போல் எய்ம்ஸ் ஆஸ்பத்திரி பற்றி பேசினார்கள். அதுவும் அப்படியே தான் இருக்கிறது. ஊராட்சி கோட்டை குடிநீர் திட்டம் இப்படி பல்வேறு அறிவிப்புகள் பற்றி கூறி கொண்டே செல்லலாம்.

தமிழக அரசு உள்ளாட்சி தேர்தலை உடனடியாக நடத்த நடவடிக்கை எடுக்க வேண்டும்.

இவ்வாறு அவர் கூறினார்.

ஈரோடு:

பவானி அடுத்த ஜி.டி.நாயுடு காலனியை சேர்ந்தவர் செல்வராஜ். இவரது மனைவி வசந்தா. இவர்களது மகள் மேரி (வயது 21). இவர் வளையங்காரம் பாளையம் பகுதி ஆரம்ப சுகாதார நிலையத்தில் தற்காலிக நர்சாக பணி புரிந்தார். இவர் கடந்த 5-11-2017 அன்று மர்மமான முறையில் இறந்தார்.

ஆரம்ப சுகாதார நிலையத்தில் இருந்தவர்கள் மேரி தூக்குப்போட்டு தற்கொலை செய்து கொண்டதாக தெரிவித்தனர். ஆனால் மேரியின் தாய் வசந்தா தனது மகள் சாவில் மர்மம் இருப்பதாக கூறினார்.

இது தொடர்பாக ஏற்கனவே கலெக்டரிடம் மனு கொடுத்து இருந்தார். தனது மகள் மர்ம மரணம் குறித்து விசாரிக்க வேண்டும் என்று அந்த மனுவில் அவர்கள் கூறி இருந்தனர்.

இந்த நிலையில் மேரியின் தாய் வசந்தா மற்றும் உறவினர்கள் இன்று ஈரோடு மாவட்ட போலீஸ் சூப்பிரண்டு அலுவலகத்துக்கு வந்து மனு கொடுத்தனர். அந்த மனுவில் தனது மகள் மரணம் குறித்து சி.பி.ஐ. விசாரணை நடத்த வேண்டும் என்று மேரியின் தாய் வசந்தா கூறியுள்ளார்.

கவுந்தப்பாடி:

கவுந்தப்பாடியில் கோபி ரோட்டில் வெளியூர் சுற்று பயணம் சென்று விட்டு ஒரு சுற்றுலா வேன் வந்து நின்றது. இந்த வேன் சூப்பர் கூல் சோமசுந்தரம் என்பவருக்கு சொந்தமானது.

வேனில் இருந்து பயணிகள் இறங்கி சென்று விட்டனர். டிரைவர் செந்தில் வேனை நிறுத்தி விட்டு டீ குடிக்க சென்று விட்டார்.

அப்போது வேனின் என்ஜின் பகுதியில் இருந்து திடீரென தீ பிடித்தது. பதறிய படி டிரைவர் ஓடி சென்று அணைக்க முயன்றார். ஆனால் தீயை அவரால் அணைக்க முடியவில்லை.

இது பற்றி கோபி தீயணைப்பு துறைக்கு தகவல் கொடுக்கப்பட்டது. தீயணைப்பு வீரர்கள் வந்து தீயை அணைத்தனர்.

எனினும் இந்த தீ விபத்தில் வேனின் என்ஜின், சீட்டுகள் உள்பட வேன் முழுவதும் எரிந்து நாசமாகி விட்டது. இதன் சேத மதிப்பு ரூ.18 லட்சம் இருக்கும் என்று கூறப்படுகிறது.

இது குறித்து கவுந்தப்பாடி போலீசார் விசாரணை நடத்தி வருகிறார்கள். ரோட்டோரம் நிறுத்தி வைக்கப்பட்டிருந்த சுற்றுலா வேன் எரிந்த சம்பவம் கவுந்தப்பாடியில் திடீர் பரபரப்பை ஏற்படுத்தியது.

கொடுமுடி -கணபதி பாளையம் நால்ரோடு அருகில் உள்ள சின்னம்மாபுரம் என்ற பகுதியை சேர்ந்தவர் குப்புசாமி (வயத 70). இவர் 23-ம் தேதி இரவு ஈரோடு கருர் மெயின் ரோட்டின் இடது புறமாக நடந்து சென்று கொண்டு இருந்தார். அப்போது பின்னால் வந்த கார் இவர் மீது மோதியதில் பலத்த அடிபட்டு கீழே விழுந்து விட்டார்.

உடனடியாக அவரை 108 ஆம்புலன்ஸ் மூலம் ஈரோடு அரசு மருத்துவமனைக்கு கொண்டு சென்றார்கள். அங்கு சிகிச்சை பலனின்றி பரிதாபமாக இறந்தார்.

இது குறித்து தகவல் அறிந்த மலையம்பாளையம் போலீசார் வழக்கு பதிவு செய்து விசாரணை செய்து வருகின்றனர். குப்புசாமியின் உடல் பிரேத பரிசோதனைக்கு பின்னர் உறவினர்களிடம் ஒப்படைக்கப்பட்டது.