ஈரோடு

கோபி:

ஈரோடு மாவட்டத்திலும் அரசு போக்குவரத்து ஊழியர்களின் போராட்டம் இன்று 5-வது நாளாக தொடர்கிறது.

போராட்டத்தில் பங்கேற்காமல் இயக்கப்படும் அரசு பஸ்கள் மீது சில இடங்களில் தாக்குதல் நடத்தப்பட்டு வருகிறது.

எனவே போராட்டத்தில் பங்கேற்காமல் பஸ்களை இயக்கும் டிரைவர்கள் பாதுகாப்பாக இயக்கி வருகிறார்கள்.

கோபி அரசு போக்குவரத்து பணிமனையில் பணிபுரியும் அண்ணா தொழிற்சங்க டிரைவரான எஸ்.எஸ். சிவக்குமார் ஹெல்மெட் அணிந்து பணியில் ஈடுபட்டார்.

கோவையில் இருந்து கோபிக்கு வந்த பஸ்சில் அவர் ஹெல்மெட் அணிந்து வந்ததை பயணிகள் வித்தியாசமாக பார்த்தனர்.

இந்த நிலையில் இன்று அவர் கண்டக்டராக மாறினார். ஊழியர்கள் வேலை நிறுத்தம் காரணமாக கண்டக்டர் பற்றாக்குறை ஏற்பட்டது.

எனவே வேலைக்கு வந்திருந்த டிரைவர் எஸ்.எஸ். சிவக்குமார் இன்று ஈரோடு- சத்தியமங்கலம் செல்லும் பஸ்சில் கண்டக்டர் வேலை பார்த்தார்.

கோபி பஸ் நிலையத்தில் கண்டக்டர் பையை தோளில் தொங்கவிட்டபடி எஸ்.எஸ் சிவக்குமார் பயணிகளுக்கு டிக்கெட் கொடுத்ததை பார்த்த மக்கள் அவரை பற்றி பரபரப்பாக பேசிக் கொண்டனர்.

அந்த பஸ்சில் தற்காலிக ஊழியர் ஒருவர் டிரைவராக பணிபுரிந்தார் என்பது குறிப்பிடத்தக்கது. #tamilnews

ஈரோடு:

ஊதிய ஒப்பந்த பேச்சு வார்த்தையில் உடன்பாடு ஏற்படாததால் போக்குவரத்து ஊழியர்கள் வேலை நிறுத்த போராட்டத்தில் ஈடுபட்டு உள்ளனர். நேற்று முன்தினம் மாலை முதலே வேலை நிறுத்த போராட்டத்தில் குதித்தனர்.

நேற்று 2-வது நாளாக போராட்டம் தீவிரம் அடைந்தது. ஈரோடு மாவட்டத்தில் மொத்தம் 833 அரசு பஸ்கள் உள்ளன. இதில் 750 பஸ்கள் நேற்று இயங்கவில்லை. இதனால் மக்கள் அவதி அடைந்தனர்.

இன்றும் போக்குவரத்து ஊழியர்கள் வேலைநிறுத்த போராட்டம் 3-வது நாளாக நீடித்தது. மாவட்டத்தில் இன்று 833 பஸ்களில் 112 பஸ்கள் அதாவது 14 சதவீத பஸ்கள் இயக்கப்பட்டு வருகின்றன.

மக்கள் பாதிக்காத வகையில் பஸ்களை இயக்க மாவட்ட போக்குவரத்து கழகம் மாற்று ஏற்பாடுகளை செய்து வருகிறது. அண்ணா தொழிற்சங்க ஊழியர்கள், தற்காலிக ஓட்டுனர்களை கொண்டு பஸ்கள் இயக்கப்பட்டு வருகின்றன.

குறைந்த அளவே அரசு பஸ்கள் இயக்கப்பட்டதால் இன்றும் மாணவ-மாணவிகள், வேலைக்கு செல்வோர் பஸ்கள் கிடைக்காமல் பாதிக்கப்பட்டனர்.

ஈரோடு பஸ் நிலையத்தில் இன்றும் காலை பள்ளிக்கு செல்லும் மாணவர்கள், வேலைக்கு செல்லும் பணியாளர்கள் என பலர் பஸ்கள் கிடைக்காமல் காத்திருந்தனர். பலர் தனியார் பஸ்களில் பயணம் செய்தனர்.

அரசு பஸ்கள் ஸ்டிரைக்கை தொடர்ந்து ஈரோட்டில் தனியார் பஸ்களின் சேவை வழக்கத்தை விட அதிகமாக இருந்தது. இன்று தனியார் பஸ்கள் ஈரோட்டில் இருந்து பல்வேறு பகுதிக்கு அதிக எண்ணிக்கையில் இயக்கப்பட்டன.

ஈரோடு பஸ் நிலையத்தில் இருந்து சேலம், கோவைக்கு அதிகளவில் தனியார் பஸ்கள் இயக்கப்பட்டன. பஸ்களில் பயணிகள் கூட்டம் அதிகமாக காணப்பட்டது. கல்லூரி மாணவர்கள், பள்ளிக்கு செல்லும் மாணவர்கள் பஸ்சின் படிக்கட்டில் தொங்கி கொண்டு பயணம் செய்வதை காண முடிந்தது.

86 சதவீத பஸ்கள் இயக்கப்படாதால் சென்னிமலை ரோட்டில் அரசு பஸ் டெப்போவில் பஸ்கள் வரிசையாக நிறுத்தி வைக்கப்பட்டுள்ளன. அங்கு தாலுகா இன்ஸ்பெக்டர் (பொறுப்பு) சேகர் தலைமையிலான போலீசார் பாதுகாப்பு பணியில் ஈடுபட்டுள்ளனர்.

இதே போல் ஈரோடு பஸ் நிலையத்தில் டவுன் போலீஸ் இன்ஸ்பெக்டர் விஜயன் தலைமையிலான போலீசார் பாதுகாப்பு பணியில் ஈடுபட்டுள்ளனர். இவர்களுடன் அதிவிரைவு படை போலீசாரும் பாதுகாப்பு பணியில் ஈடுபட்டுள்ளனர்.

போராட்டம் குறித்து ஈரோடு போக்குவரத்து தொழில் சங்கத்தினர் கூறும் போது, ‘‘எங்கள் நியாயமான கோரிக்கைகளை அரசு ஏற்காததால் தான் நாங்கள் வேலை நிறுத்த போராட்டத்திற்கு தள்ளப்பட்டோம்.

ஈரோடு மாவட்டத்தில் இன்று 3-வது நாளாக எங்கள் போராட்டம் தொடர்ந்து நடந்து வருகிறது. எங்கள் போராட்டம் குறித்து உயர் நீதிமன்றம் கண்டனம் தெரிவித்துள்ளது. எங்கள் தரப்பு கோரிக்கைகளையும், வாதத்தையும் வரும் திங்கட்கிழமை நீதிமன்றத்தில் எடுத்து கூறி முறையிடுவோம்.

இவ்வாறு அவர்கள் தெரிவித்தனர்.

கோபி:

தமிழகம் முழுவதும் அரசு போக்குவரத்து கழக ஊழியர்கள் வேலை நிறுத்தத்தில் ஈடுபட்டு உள்ளனர். ஈரோடு மாவட்டத்திலும் இந்த போராட்டம் நீடித்து வருகிறது.

கோபி போக்குவரத்துக் கழக பணிமனையில் 80 அரசு பஸ்கள் உள்ளன. இன்று மொத்தம் 50 பஸ்கள் இயக்கப்பட்டன.

இந்த பஸ்கள் சத்தியமங்கலம், ஈரோடு, கோவை, பவானி, திருப்பூர், மதுரை, புளியம்பட்டி உள்பட பல்வேறு பகுதிகளுக்கு இயக்கப்பட்டன. பயணிகளும் அதிக அளவில் பஸ்களில் செல்ல வந்திருந்தனர்.

இந்த நிலையில் இன்று காலை 8.45 மணிக்கு கோவையில் இருந்து புறப்பட்ட அரசு பஸ் கோபி பஸ் நிலையத்துக்குள் வந்தது. அந்த பஸ்சின் டிரைவர் எஸ்.எஸ்.சிவக்குமார் ஹெல்மெட் அணிந்திருந்தார்.

அண்ணா தொழிற்சங்கத்தை சேர்ந்த அவர் நேற்று முதல் கோவைக்கு பஸ் இயக்கி வருகிறார். ஹெல்மெட் அணிந்தபடி பஸ் இயக்கியது ஏன்? என்று சிவக்குமாரிடம் கேட்ட போது அவர் கூறியதாவது:-

அரசு போக்குவரத்து கழக ஊழியர்களின் போராட்டத்துக்கு நடுவே நான் பஸ்சை இயக்கி வருகிறேன். எனவே என்னை யாரும் தாக்கி விடக்கூடாது என்பதற்காகவே நான் ஹெல்மெட் அணிந்தபடி பஸ்சை இயக்கி வந்தேன்.

நான் ஹெல்மெட் அணிந்து வந்ததை மக்கள் வித்தியாசமாக பார்த்தனர். கோவை பஸ் நிலையம், கருமத்தம்பட்டி அருகே உள்ள சுங்கச்சாவடி ஆகிய இடங்களில் மக்கள் என்னை செல்போனில் படம் பிடித்தனர்.

இவ்வாறு அவர் கூறினார்.  #tamilnews

சத்தியமங்கலம்:

கடம்பூரை அடுத்த அட்டணை மலை கிராமத்தில் 60-க்கும் மேற்பட்ட குடும்பத்தினர் வசித்து வருகின்றனர். கடந்த 20 நாட்களுக்கும் மேலாக இவ்வூரில் உள்ள ஆழ்துளை கிணறு மோட்டார் பழுது ஏற்பட்டுள்ளது.

இதனை சரி செய்ய ஊராட்சி நிர்வாகத்தினர் முன் வராததால் பொதுமக்கள் ஊரில் உள்ள பழைமையான பொது கிணற்றில் தண்ணீரை எடுத்து குடித்துள்ளனர்.

இதனால் இந்த ஊரை சேர்ந்த அரப்புளியம்மாள் (வயது 70) முருகன் (55) சுமதி (25) துரைசாமி (55) பழனிச்சாமி (45) அன்பரசு (16) சுதாகர் (12) சாந்தி(30) தருண்(2) ரசித் (3) அபீஸ் வரி (7) முரளி (4) ராமர் (50) செல்லம்மாள் (62) குப்புசாமி (60) உள்ளிட்ட 20-க்கும் மேற்பட்டோருக்கு வயிற்று போக்கு-வாந்தி ஏற்பட்டது.

இதில் பல பேர் சத்தி தனியார் மருத்துவமனைகளுக்கு சென்று சிகிச்சை பெற்று தேறியுள்ளனர். இதில் செல்லம்மாள் என்பவருக்கு அதிகபடியான வயிற்று போக்கு ஏற்பட்டதால் நேற்று மாலை பசுவனா புரம் அரசு ஆரம்ப சுகாதார நிலையத்தில் சேர்க்கப்பட்டு பின் வீடு திரும்பியுள்ளார்.

எங்களுக்கு குடிநீர் மோட்டார் பழுது ஏற்பட்ட தால் பழைய கிணற்று நீரை குடித்தோம். அதனால் எங்கள் ஊரில் உள்ள பெரும்பாலானோருக்கு வயிற்று போக்கு ஏற்பட்டு அவதிப்பட்டுள்ளனர்.

நேற்று மாலைதான் நட மாடும் மருந்துவ குழுவினர் மாத்திரைகள் வழங்கி விட்டு பவுடரை இரைத்து சென்றனர். இந்த ஊரை சேர்ந்த மாதி (65) என்பவர் கடந்த 15 நாட்களுக்கு முன்பு இறந்துள்ளார்.

கடந்த 20 நாட்களாக அவதிப்படுகிறோம். 2 நடமாடும் மருந்துவ குழு உள்ளன. இவர்கள் யாரும் ஊர் பக்கமே வரவில்லை. குடிநீர் மோட்டார் பழுதை உடனே சரி செய்ய வேண்டும்.

இவ்வாறு அவர்கள் வேதனையோடு தெரிவித்தனர்.