வேடசந்தூர்:
திண்டுக்கல் மாவட்டம் வேடசந்தூர் அருகில் உள்ள கல்வார்பட்டி பூனூத்துபகுதியை சேர்ந்த சுப்பிரமணி மகன் பிரவீன்குமார்(15). சுப்பிரமணி ஜவுளி வியாபாரம் செய்து வருகிறார். கடந்த பல மாதங்களுக்கு முன்பு குடும்பத்துடன் கும்பகோணத்தில் குடியேறிவிட்டார். பிரவீன்குமார் 9-ம் வகுப்பு முடித்து 10-ம் வகுப்பு செல்கிறார்.
பள்ளி விடுமுறை என்பதால் பூனூத்தில் உள்ள தனது தாத்தா வீட்டிற்கு வந்தார். நேற்று அதேபகுதியை சேர்ந்த ஹேமநாதன்(17) என்பவருடன் மோட்டார் சைக்கிளில் ராமநாயக்கனூர் அருகே சென்று கொண்டிருந்தார்.
திடீரென பைக் கட்டுப்பாட்டை இழந்து சாலையோரம் இருந்த புளியமரத்தில் மோதியது. அப்போது 2 பேரும் தூக்கிவீசப்பட்டு படுகாயமடைந்தனர். திண்டுக்கல் அரசு ஆஸ்பத்திரிக்கு கொண்டு வரும் வழியில் பிரவீன்குமார் பரிதாபமாக உயிரிழந்தார். மற்றொருவர் சிகிச்சை பெற்று வருகிறார். இதுகுறித்து கூம்பூர் போலீசார் வழக்குபதிவு செய்து விசாரணை நடத்தி வருகின்றனர்.
தற்போது பள்ளி விடுமுறை என்பதால் மாணவர்கள் இதுபோல மோட்டார் சைக்கிளில் சென்று விபத்தில் சிக்கி விடுவது தொடர் கதையாகி வருகிறது. எனவே பெற்றோர்கள் இதனை கண்காணித்து சிறுவர்களிடம் மோட்டார் சைக்கிளை ஓட்டிச் செல்ல அனுமதி வழங்க கூடாது எனவும் போலீசார் அறிவுறுத்தினர்.
