நீங்கள் தேடியது "kuladeivam"

ஒரு வீட்டின் முன்னேற்றத்திற்கு குலதெய்வ வழிபாடு என்பது மிகவும் அவசியமான ஒன்று. தினம்தோறும் இஷ்ட தெய்வத்தை வேண்டி வழிபட்டாலும், குலதெய்வத்தின் நாமத்தை ஒரு முறையாவது உச்சரித்து, தீபம் ஏற்றுவது நம்முடைய வீட்டிற்கு மிகவும் நல்லது.

குலதெய்வத்தை வியாழக்கிழமை அன்று, இந்த முறைப்படி விரதமிருந்து வழிபடும் போது, நீங்கள் என்ன நினைத்து விரதத்தை தொடங்குகிறீர்களோ, அந்த வேண்டுதலானது 14வது வாரம் நிச்சயம் நிறைவேறும் என்பது நம்பிக்கை.

வியாழக்கிழமை காலையிலேயே வீட்டை துடைத்து சுத்தம் செய்துவிடுங்கள். அதன் பின்பு குளித்து முடித்துவிட்டு, இறைவனுக்கு பூக்களை அணிவித்து, ஒரே ஒரு தீபம் ஏற்றி வைத்து, உங்களின் குலதெய்வத்தின் பெயரை உச்சரித்து, உங்களுடைய வேண்டுதலை சொல்லி உங்களது விரதத்தை தொடங்க வேண்டும். சில பேருக்கெல்லாம் வாழ்க்கையில் தீர்க்கவே முடியாத கஷ்டம் என்று ஒன்று கட்டாயம் இருக்கும். அந்த கஷ்டம் தீர வேண்டும் என்று கூட, வேண்டுதலை வைக்கலாம். 14 வாரமும் அந்த வேண்டுதலை நினைத்துதான் விரதத்தை மேற்கொள்ள வேண்டும். ஒரே ஒரு குறிக்கோளை வைத்துதான் வேண்டுதல் மேற்கொள்ளப்பட வேண்டும். வேண்டுதலை மாற்றக்கூடாது.

காலையில் உங்களது விரதத்தை தொடங்கலாம். உடலில் எந்தப் பிரச்சினையும் இல்லாதவர்கள், உடல் ஆரோக்கியத்தோடு இருப்பவர்கள், அந்த நாள் முழுவதும் ஒரு வேளை மட்டும் சாப்பிட வேண்டும். அதுவும், குறிப்பாக நாட்டு பசும்பாலால் செய்யப்பட்ட தயிர் சாதத்தை மட்டும் சாப்பிட்டு விரதம் இருப்பது கோடி புண்ணியத்தை உங்கள் குலத்திற்கே தேடித் தரும் என்பதில் எந்த ஒரு சந்தேகமும் இல்லை. அந்த தயிர் சாதத்தில் உப்பு சேர்க்காமல் சாப்பிட்டால் இன்னும் உத்தமம். பிடிக்காதவர்கள் உப்பு சேர்த்துக் கொள்ளலாம் தவறில்லை.

வேலைக்கு செல்லாமல் வீட்டிலேயே இருக்கும் பெண்களாக இருந்தால், இந்த வியாழக்கிழமை நாள் முழுவதுமே குலதெய்வத்தை நாமத்தை உச்சரித்துக் கொண்டே இருக்கலாம். அதாவது நீங்கள் வேலை செய்தது போக மீதம் இருக்கும் நேரத்தில். மாலை நேரம் வழக்கம் போல் ஒரு தீபத்தை ஏற்றி வைத்து உங்கள் வீட்டில் இருக்கும் வெள்ளிக்கிண்ணமாக இருந்தாலும் சரி, அல்லது பித்தளை பாத்திரமாக இருந்தாலும் சரி. கண்ணாடிக் கிண்ணமாக இருந்தாலும் சரி. ஏதாவது ஒரு கிண்ணத்தை எடுத்து வைத்துக்கொள்ளுங்கள். எச்சில் படாத பாத்திரமாக இருக்க வேண்டும். சில்வர் பாத்திரத்தை பயன்படுத்த வேண்டாம்.

அந்த சிறிய கிண்ணத்தில் ஒரு ரூபாய் நாணயத்தை வைத்து, உங்கள் மனதில் இருக்கும் வேண்டுதல் நிறைவேற வேண்டும் என்று சொல்லி, மனமுருகி, மாலையும் குலதெய்வத்தை நினைத்து மனதார வேண்டிக்கொள்ளுங்கள். மாலை தீபம் ஏற்றிவைத்து உங்களது விரதத்தை முடித்துக் கொள்ளுங்கள். அதனால் இரவு நிச்சயம் சாப்பிடக் கூடாது. ஒரு வேலை தயிர் சாதம் சாப்பிடுவதோடு மட்டும் விரதம் இருக்கலாம்.

14வது வாரம் உங்களது விரதம் முடியும்போது, அந்த ஒரு ரூபாய் நாணயங்களை குலதெய்வக் கோவில்களில் கொண்டுபோய் செலுத்திவிடலாம். குலதெய்வக் கோயில் தூரமாக உள்ளவர்கள், ஒரு மஞ்சள் துணியை எடுத்து, அந்த நாணயங்களை, முடிந்து வைத்து விடுங்கள். எப்போது குலதெய்வ கோயிலுக்கு செல்கிறீர்களோ, அப்போது அந்த நாணயங்களை குலதெய்வ கோயிலில் சேர்த்து விடுங்கள்.

வாரம் தோறும் வரும் வியாழக்கிழமை அன்று, மேல் சொல்லப்பட்ட முறைப்படி சுலபமான முறையில் குலதெய்வ வழிபாட்டை நம்பிக்கையோடு செய்தால் போதும். 14வது வாரம் வியாழக்கிழமை அன்று, உங்களது இந்த விரதம் முடியும் போது, உங்களது வேண்டுதல் நிச்சயம் நிறைவேறும். நம்பிக்கையோடு பிரார்த்தனை வைத்து குல தெய்வத்தை வேண்டி தான் பாருங்களேன்! ரொம்ப நாளா உங்க வீட்ல இருக்கிற பிரச்சினை கூட விரைவில் ஒரு முடிவுக்கு வரும். இந்த விரதத்திற்கு அவ்வளவு சக்தி இருக்கிறது என்பதை, உங்கள் வேண்டுதல் நிறைவேறிய பின்பு தான், உங்களால் உணர முடியும். ஆனால், நீங்கள் வைக்கும் வேண்டுதல் நிறைவேறுவதற்கான முயற்சியை, நீங்கள்தான், இடைவிடாமல் தொடர்ச்சியாக செய்ய வேண்டும் என்பதை மட்டும் மறந்துடாதீங்க! உங்களை கைதூக்கி விடும் ஒரு ஊன்றுகோல் தான் உங்கள் குலதெய்வம்.

ஒருவருக்கு குல தெய்வம், இஷ்ட தெய்வம், வழிபடு தெய்வம், மந்திரத்திற்குரிய தெய்வம் என்று பல்வேறு நிலைகளில் வழிபாட்டுக்கு உரிய தெய்வங்கள் இருக்கலாம். பல்வேறு தெய்வங்களை வழிபட்டு வந்தாலும், அந்த தெய்வங்களில் மிகவும் வலிமையானதாக ஒருவரது குல தெய்வமே குறிப்பிடப்படுகிறது. காரணம், பாரம்பரியமாக அதற்கு முன்னோர்கள் வழிபாடுகளை செய்து வந்துள்ளதால் குலம் காக்கும் தெய்வமாக போற்றப்படுவது ஐதீகம். தனது அருளை குலதெய்வம் அளிப்பதுடன், மற்ற தெய்வ வழிபாடுகளுக்கான பலன்களையும் அளிப்பது ஒருவரது குல தெய்வம்தான் என்பதை ஆன்மிக சான்றோர்கள் குறிப்பிட்டுள்ளனர். நாள் செய்யாததை கோள் செய்யும் என்றும், கோள் செய்யாததை குலதெய்வம் செய்யும் என்றும் சொல்லப்படுகிறது.

ஒரு குடும்பத்தின் முன்னோர்களில் தெய்வமாக மாறிய புண்ணிய ஆன்மாக்கள், சம்பந்தப்பட்ட குலத்தை சார்ந்தவர்களைக் காக்கும் வல்லமை பெற்றவை என்பது ஆன்மிக ரகசியமாகும். அவை, ஒருவரது பூர்வ கர்ம வினைகளையும் கூட அகற்றி விடும் சக்தி பெற்றவை என்றும் சொல்லப்படுகின்றன. குல தெய்வங்கள் இல்லாத குடும்பத்தினர் எந்த தெய்வத்தையும், எந்த ஆலயத்திலும் சென்று வழிபட்டு, பூர்வ ஜென்ம கர்மாக்களின் தாக்கத்தை ஓரளவுக்கு நிவர்த்தி செய்து கொள்ளலாம். ஆனால், முற்றிலும் நிவர்த்தி செய்ய இயலாது என்ற ஆன்மிக சூட்சுமத்தை சான்றோர்கள் குறிப்பிட்டுள்ளனர். அதாவது, ஒவ்வொருவருக்கும் இரண்டு விதமான பூர்வ ஜென்ம கர்ம வினைகள் இருக்கின்றன. அவை, முன்னோர் செய்த பாவ, புண்ணியங்களால் வரும் நன்மை, தீமைகள் மற்றும் அவரவர் வாழ்கையில் செய்துள்ள பாவ, புண்ணியங்களால் ஏற்படும் நன்மை, தீமைகள் ஆகியவையாகும்.

பொதுவாக, குறிப்பிட்ட ஒரு பரம்பரையில் வழிகாட்டியாய் வாழ்ந்து, மறைந்த முன்னோர்கள் அல்லது கன்னியாக இருந்து மறைந்த பெண்களை தங்கள் வீட்டுத் தெய்வமாக வழிபடுவது தமிழர் கிராமிய பண்பாடாக இன்றும் உள்ளது. பெரும்பாலும், பெண் வடிவமாகவே இருக்கும் அவற்றை வீட்டுச் சாமி, குடும்பத் தெய்வம், கன்னித் தெய்வம், குல சாமி என்று பல்வேறு பெயர்களால் அழைப்பர். அந்த நிலையில் குலதெய்வம் என்பது ஒருவரது நலன்களில் அக்கறை காட்டும் இறை சக்தியாக இருந்து வருகிறது. குல தெய்வ தோஷம் இருந்தால், மற்ற தெய்வங்களின் அருள் கிடைக்காது. குல தெய்வத்தின் அனுக்கிரகம் இல்லை என்றால் ஒருவர் எவ்வளவு சக்தி வாய்ந்த ஹோமம் அல்லது யாகம் செய்தாலும், ஆலயங்களுக்கு சென்றாலும் எதிர்பார்த்த பலன் கிடைப்பதில்லை என்பதை ஆன்மிக சான்றோர்கள் குறிப்பிட்டுள்ளனர்.

முன்னோர் ஏற்படுத்திய பல பழக்கவழக்கங்களை பல நூறு ஆண்டுகளாக தொன்றுதொட்டு கடைப்பிடித்து வந்துள்ளோம். ஆனால், அவற்றில் பலவற்றை காலப்போக்கில் பலரும் மறந்துவிடுகிறோம். இருப்பினும் ஆங்காங்கே பழமையான பழக்க வழக்கங்களை மறக்காமல் பின்பற்றுபவர்கள் நிறைய பேர் உள்ளனர். அந்த வகையில் சிறுதெய்வ வாக்கினை பின்பற்றும் வகையில் ஒரு கிராமத்தில் உள்ள மக்கள், பல நூறு ஆண்டுகளாக ஒரு பழக்கத்தை கடைப்பிடித்து வருகின்றனர். அதுபற்றிய சுவாரசியமான தகவலை இங்கே பார்க்கலாம்.

விருதுநகர் மாவட்டம் வத்திராயிருப்பு அருகே உள்ளது, இலந்தைகுளம் என்ற கிராமம். இங்கு வசிக்கும் குறிப்பிட்ட சமூகத்தினர், பல தலைமுறைகளாக வெள்ளை உடைகளை மட்டுமே உடுத்தி வருகின்றனர். ஒரு காலத்தில் கணவனை இழந்த பெண்கள்தான் வெள்ளை ஆடையை அணிவார்கள் என்ற நிலை இருந்தது. அந்த நிலை இப்போது வெகுவாக மாறியிருக்கிறது.

ஆனால் இலந்தைகுளம் கிராமத்தில் பெண்கள் மட்டுமின்றி, ஆண்கள் மற்றும் குழந்தைகளும் கூட தங்களின் வாழ்நாள் முழுவதும் வெள்ளை நிற ஆடைகளையே அணிந்து வருவது பெரும் ஆச்சரியத்தை ஏற்படுத்துகிறது. இதுபற்றி அந்த கிராமத்தைச் சேர்ந்த புஷ்பலதா என்ற பெண் கூறும்போது, "பல தலை முறைகளுக்கு முன்பு பொம்மியம்மாள் என்ற பெண், தெய்வீகத் தன்மையுடன் வாழ்ந்துள்ளார். அவரை எங்களின் மூதாதையர்களும் அவர்களைத் தொடர்ந்து நாங்களும் தெய்வமாக வணங்கி வருகிறோம்.

அந்த பொம்மியம்மாள், 'என்னை நினைத்து வெள்ளை உடை உடுத்தி தொடர்ந்து வணங்குபவர்களை, சகல வசதிகளையும், நன்மைகளையும் தந்து காத்தருள்வேன்' என்று கூறியுள்ளார். அவரது வாக்கின்படி, பல தலைமுறைகளாக நாங்கள் வெள்ளை உடைகளை உடுத்தி, அவரை வணங்கி வருகிறோம்" என்றார்.

பொம்மியம்மாளுக்கு, சேடபட்டி சின்னக்கட்டளை பகுதியில் பீடம் அமைக்கப்பட்டு உள்ளது. அழகர் மலை அடிவாரத்தில் வீற்றிருக்கும் கள்ளழகரின் தங்கைதான் பொம்மியம்மாள் என்று சொல்கிறார்கள். ஆண்டுதோறும் சித்திரை மாத பவுர்ணமி அன்று வைகை ஆற்றில் கள்ளழகர் இறங்கும் விழாவின்போது, இலந்தைகுளம் கிராமத்தில் உள்ளவர்கள், பொம்மியம்மாளை சின்னக்கட்டளையில் உள்ள அவரது பீடத்தில் வழிபடுவதை வழக்கமாகக் கொண்டுள்ளனர்.

இலந்தைகுளத்தில் இருப்பவர்கள் பொம்மியம்மாளை நினைத்து வெள்ளை நிற ஆடை அணிவதைப் போல, பல்வேறு கிராமங்களில் இருந்தபடி அந்த குலதெய்வத்தை வழிபடும் மக்களும் கூட அங்கு வெள்ளை நிற ஆடைகளையே அணிகிறார்கள். பொம்மியம்மாளை குலதெய்வமாக வழிபடுபவர்கள், தங்கள் குடும்பத்தில் பிறக்கும் குழந்தைக்கு அரைஞாண் கயிறைக் கூட, வெள்ளை துணியில்தான் கட்டுகிறார்கள். அவர்கள் பயன்படுத்தும் துணிகள் அனைத்தும் வெள்ளை நிறத்தில் மட்டுமே இருக்கின்றன.

பள்ளிக்கூடம் செல்வதற்கு சீருடை அவசியம் என்பதால் அந்த நேரத்தில் மட்டும், பள்ளி செல்லும் பிள்ளைகள் சீருடை அணிகிறார்கள். பள்ளி முடிந்து வந்ததும், அவர்களும் வெள்ளை நிற ஆடைக்கு மாறிவிடுகிறார்கள். பொம்மியம்மாளை வணங்கும் பெண்கள், பூ, பொட்டு, நகை அணிகிறார்கள். ஆனால் வீட்டில் இருந்தாலும், வேலைக்குச் சென்றாலும், விசேஷ நிகழ்வுகளுக்குச் சென்றாலும் வெள்ளை நிற ஆடைதான் அவர்கள் மகிழ்வுடன் அணியும் ஆடையாக இருக்கிறது.

குலதெய்வம் என்பது ஆண்கள் வழியில் வரும் வழிபாடு என்பதால், இங்கிருந்து திருமணமாகி வேறு வீட்டிற்குச் செல்லும் பெண்கள், புகுந்த வீட்டின் பழக்க வழக்கப்படி இருக்கலாம். அவர்களுக்கு இந்த வெள்ளை நிற ஆடை கட்டுப்பாடு கிடையாது. அதே நேரம், வேறு ஒரு இடத்தில் இருந்து திருமணாகி பொம்மியம்மாளை குலதெய்வமாக ஏற்று வரும் பெண்கள், வெள்ளை நிற ஆடையை அணிந்துதான் ஆக வேண்டும் என்பது அவர்களது குல வழக்கமாக இருக்கிறது.