சென்னை:
தமிழ்நாட்டில் இந்த ஆண்டு முன்பு எப்போதும் இல்லாத அளவுக்கு தென்மேற்கு பருவமழை அதிக அளவில் பெய்து வருகிறது.
கர்நாடகா மற்றும் கேரளாவிலும் மிக பலத்த மழை பெய்கிறது.
இதனால் அங்குள்ள அணைகள் நிரம்பியதால் உபரி நீர் திறந்து விடப்பட்டுள்ளது. கர்நாடக அணைகள் நிரம்பி வழிவதால் 2005-ம் ஆண்டுக்கு பிறகு இந்த ஆண்டு மேட்டூர் அணை 2 முறை நிரம்பியது.
காவிரியில் தற்போது வினாடிக்கு 2 லட்சம் கனஅடி தண்ணீர் திறந்து விடப்பட்டுள்ளது. இதனால் கிருஷ்ணகிரி, தர்மபுரி, சேலம், ஈரோடு, நாமக்கல், கரூர், திருச்சி, நாகப்பட்டினம், திருவாரூர், தஞ்சாவூர் மற்றும் அரியலூர் ஆகிய 11 டெல்டா மாவட்டங்களுக்கு வெள்ள அபாய எச்சரிக்கை விடுக்கப்பட்டுள்ளது.
பெய்து வரும் தொடர் மழை மற்றும் வெள்ளப்பெருக்கு காரணமாக தமிழ்நாட்டில் உள்ள 15 பெரிய அணைகளில் 9 அணைகள் முழு கொள்ளளவை எட்டி நிரம்பிவிட்டன.
மேட்டூர், பவானிசாகர், முல்லைப்பெரியாறு, அமராவதி, பாபநாசம், பெருஞ்சாணி, சோலையாறு, பரம்பிக்குளம், ஆழியாறு ஆகிய 9 அணிகள் நிரம்பி வழிகின்றன. முல்லை பெரியாறு அணை முழு கொள்ளளவான 152 அடிக்கு தண்ணீரை தேக்கி வைக்க முடியும். ஆனால் கோர்ட்டு உத்தரவுபடி தற்போது 142 அடி தண்ணீர் மட்டுமே தேக்கி வைக்கப்பட்டுள்ளது.
இவை தவிர வைகை மற்றும் திருமூர்த்தி அணைகள் நிரம்பி வருகின்றன. நேற்றைய நிலவரப்படி 71 அடி உயரம் கொண்ட வைகை அணையில் 63.74 அடி தண்ணீர் உள்ளது. 60 அடி உயரமுள்ள திருமூர்த்தி அணையில் 52.21 அடியும், 118 அடி உயரம் கொண்ட மணிமுத்தாறு அணையில் 79.6 அடியும் தண்ணீர் உள்ளது.
நீர்ப்பிடிப்பு பகுதியில் தொடர்ந்து மழை பெய்து வருவதால் அணைக்கு நீர்வரத்து அதிகரித்துள்ளது. இதனால் இந்த 3 அணைகளும் வேகமாக நிரம்பி வருகின்றன. பேச்சிப்பாறை அணையில் பராமரிப்பு பணி நடை பெறுவதால் அங்கு முழுகொள்ளளவு தண்ணீர் தேக்கி வைக்கப்படவில்லை.
கிருஷ்ணகிரி அணையில் பழுதடைந்த ஒரு மதகு இன்னும் சரிசெய்யப்படவில்லை. எனவே அங்கும் முழு கொள்ளளவு தண்ணீர் தேக்கி வைக்கப்படவில்லை.
தமிழ்நாட்டில் வெள்ள அபாய எச்சரிக்கை விடுக்கப்பட்டுள்ள 11 காவிரி டெல்டா மாவட்டங்களில் தீவிர கண்காணிப்பு பணியில் அதிகாரிகள் ஈடுபட்டுள்ளனர். மேட்டூரில் 10 முகாம்கள் அமைக்கப்பட்டுள்ளன. அவற்றில் எடப்பாடியில் 3 முகாம்களும், சங்ககிரியில் 3 முகாம்களும் பொதுமக்கள் தங்குவதற்கு தயார் நிலையில் வைக்கப்பட்டுள்ளது.
மேட்டூர் அணையில் இருந்து அதிக அளவில் உபரி நீர் திறந்து விடப்படுவதால் காவிரி கரையோரம் தங்கியிருக்கும் மக்கள் முகாம்களில் வந்து தங்குமாறு சேலம் மாவட்ட கலெக்டர் ரோகிணி வேண்டுகோள் விடுத்துள்ளார்.
ஒகேனக்கல் அருவியில் இருந்து 1 லட்சத்து 70 ஆயிரம் கனஅடி நீர் திறக்கப்படுவதால் காவிரி கரையோரம் கட்டப்பட்டு வரும் 31 வீடுகளை வெள்ளம் சூழ்ந்தது. 46 பேர் அங்கிருந்து வெளியேற்றப்பட்டனர்.
நாமக்கல், பள்ளிப்பாளையம் மற்றும் குமாரபாளையம் பகுதிகளில் கடும் வெள்ளப்பெருக்கு ஏற்பட்டுள்ளது. கோவையில் குறிச்சி அணையில் இருந்து திறக்கப்பட்ட உபரி நீர் நொய்யல் ஆற்றின் வழியாக வெளியேற்றப்பட்டு வருகிறது. இதன் காரணமாக அப்பகுதியில் 3 வீடுகள் இடிந்து தரைமட்டமாயின.
கன்னியாகுமரி மாவட்டத்தில் தொடர்ந்து பலத்த மழை கொட்டுகிறது. தாமிரபரணி மற்றும் பரளியாறுகளின் வெள்ளப்பெருக்கு ஏற்பட்டுள்ளது. இதனால் தாழ்வான பகுதிகளில் உள்ள நூற்றுக்கணக்கான வீடுகள் தண்ணீரில் மூழ்கி கிடக்கின்றன. அங்கிருந்து மக்கள் வெளியேற்றப்பட்டு பாதுகாப்பான இடங்களில் தங்க வைக்கப்பட்டுள்ளனர். #MetturDam #MullaPeriyar #Vaigai
