புது டெல்லி:
பிரதமர் மோடி இன்று தனது 69-வது பிறந்த நாளை கொண்டாடுகிறார். பிரதமர் மோடியின் பிறந்த நாளை, கடந்த 14 ஆம் தேதி முதல் பாஜக தொண்டர்கள் சேவை வாரமாக கொண்டாடி வருகின்றனர்.
இதனை முன்னிட்டு பல்வேறு அரசியல் கட்சி தலைவர்கள், பிரதமர் மோடிக்கு தங்கள் வாழ்த்துக்களை தெரிவித்துள்ளனர். சமூக வலைத்தளங்கள் வாயிலாக #HappyBdayPMModi என ஹேஷ்டாக்கினை பதிவிட்டு, பிரதமர் மோடிக்கு நெட்டிசன்கள் வாழ்த்துக்களை தெரிவித்து வருகின்றனர்.
இந்நிலையில் காங்கிரஸ் கட்சியின் இடைக்கால தலைவர் சோனியா காந்தி தனது வாழ்த்துச் செய்தியில், ‘நாட்டை ஆளும் பிரதமர் மோடி ஆரோக்கியத்துடனும், மகிழ்ச்சியுடனும் நீண்ட காலம் வாழ வேண்டும்’ என கூறியுள்ளார்.
இதையடுத்து திமுக தலைவர் மு.க.ஸ்டாலின் தனது வாழ்த்துச் செய்தியில், ‘திராவிட முன்னேற்ற கழகத்தின் சார்பில் மரியாதைக்குரிய பிரதமர் திரு. நரேந்திர மோடிக்கு என் மனமார்ந்த பிறந்தநாள் வாழ்த்துக்களை தெரிவித்துக் கொள்கிறேன். மேலும் இன்னும் பல ஆண்டுகள் பொது சேவையை தொடரவும் வாழ்த்துக் கூறுகிறேன்’ என குறிப்பிட்டுள்ளார்.
