தேர்தல் செய்திகள்

கோபி:

பாராளுமன்ற தேர்தலையொட்டி தேர்தல் பறக்கும் படையினர் ஈரோடு மாவட்டம் முழுவதும் தொடர்ந்து வாகன சோதனை நடத்தி வருகிறார்கள்.

கோபி அருகே உள்ள குருமந்தூர் மேட்டில் நேற்று நள்ளிரவு 12 மணி அளவில் தேர்தல் பறக்கும்படை அதிகாரி உமாபதி தலைமையில் சப்-இன்ஸ்பெக்டர்கள் துரைசாமி, முருகசாமி அடங்கிய குழுவினர் அதிரடி வாகன சோதனையில் ஈடுபட்டு கொண்டிருந்தனர்.

அப்போது கிருஷ்ணகிரி நோக்கி சென்று கொண்டிருந்த ஒரு லாரியை நிறுத்தி சோதனை நடத்தினர்.

அப்போது லாரியில் இருந்த மாரிமுத்து என்பவரிடம் ரூ.1 லட்சத்து 39 ஆயிரம் இருந்தது தெரிய வந்தது. அந்த பணத்ததில் அவர் தக்காளி பழம் வாங்க செல்வதாக கூறினார். ஆனால் அந்த பணத்துக்கு உரிய ஆவணம் இல்லாததால் பறிமுதல் செய்யப்பட்ட பணத்தை பறக்கும் படையினர் தாசில்தார் முன்னிலையில் ஆர்.டி.ஓ. அசோகனிடம் ஒப்படைத்தனர்.

பனப்பாக்கம்:

வேலூர் மாவட்டம் காவேரிப்பாக்கத்தை அடுத்த திருப்பாற்கடல் கிராமத்தில் உள்ள பிரசித்திபெற்ற பிரசன்ன வெங்கடேசபெருமாள் கோவிலில் தே.மு.தி.க. பொருளாளர் பிரேமலதா விஜயகாந்த் நேற்று சாமி தரிசனம் செய்தார். தொடர்ந்து அவர் கோவிலை சுற்றி வலம் வந்து வணங்கினார்.

அதனை தொடர்ந்து பிரேமலதா விஜயகாந்த் நிருபர்களுக்கு பேட்டியளித்தார். அப்போது அவர் கூறியதாவது:-

வேலூர் தொகுதி உள்பட 40 பாராளுமன்ற தொகுதிகளிலும் எங்கள் கூட்டணிக்கு வெற்றி வாய்ப்பு பிரகாசமாக இருக்கிறது. மத்தியில் எங்கள் கூட்டணி ஆட்சி உறுதியாக அமையப்போகிறது. நான் இதுவரை 10 தொகுதிகளில் சுற்றுப்பயணம் செய்து பிரசாரம் செய்துள்ளேன். செல்லும் இடங்களெல்லாம் எங்கள் கூட்டணிக்கு வெற்றிவாய்ப்பு பிரகாசமாக இருப்பது தெரிகிறது.

தேர்தல் ஆணையத்துக்கு கிடைத்த தகவலின் அடிப்படையிலேயே தி.மு.க. பொருளாளர் துரைமுருகன் வீட்டில் வருமான வரித்துறை சோதனை நடைபெற்றுள்ளது. இதில் மத்திய, மாநில அரசுகளின் தூண்டுதல் எதுவுமில்லை. இதற்கு முன்பு தலைமை செயலாளர் வீட்டிலும் சோதனை நடந்துள்ளது.

தே.மு.தி.க. தலைவர் விஜயகாந்த் உடல்நிலை நன்றாக உள்ளது. அவருடைய தேர்தல் பிரசாரம் குறித்து கட்சி தலைமை அறிவிக்கும்.

இவ்வாறு அவர் கூறினார்.

கிழக்குமாவட்ட செயலாளர் நித்யா உள்பட நிர்வாகிகள் உடனிருந்தனர்.

மேட்டுப்பாளையம்:

மேட்டுப்பாளையம் காரமடை ரோட்டில் ஆசிரியர் காலனியில் பறக்கும் படை அலுவலரும் எஸ்.எஸ்.குளம் வட்டார வளர்ச்சி அலுவலருமான லதா தலைமையில் சப்- இன்ஸ்பெக்டர் பாலசுப்பிரமணியம் மற்றும் குழுவினர் வாகன தணிக்கையில் ஈடுபட்டிருந்தனர். அப்போது மாலை சுமார் 5.30 மணிக்கு மேட்டுப்பாளையத்தில் இருந்து கோவை பச்சாபாளையத்திற்கு சென்ற ஆவின் பால் லாரியைநிறுத்தி சோதனை செய்தனர்.

சோதனையில் மேட்டுப்பாளையம் ராஜீவ் நகரைச்சேர்ந்த டிரைவர் ரத்தினசபாபதி(21) என்பவர் உரிய ஆவணங்கள் இன்றி கொண்டு வந்த ரூ.3லட்சத்து 32 ஆயிரத்து 120ஐ கைப்பற்றி பறிமுதல் செய்தனர். பறிமுதல் செய்யப்பட்ட பணத்தை கூடுதல்தேர்தல் நடத்தும் அலுவலர் தாசில்தார் புனிதாவிடம் ஒப்படைத்தனர். #LokSabhaElections2019

விருதுநகர்:

திருப்பூர் மாவட்டம் தாராபுரத்தைச் சேர்ந்தவர் சரவணகுமார், தேங்காய் வியாபாரி. இவர் லாரியில் தேங்காய் பாரம் ஏற்றிக் கொண்டு விருதுநகர் வந்தார்.

பின்னர் விற்பனை பணம் ரூ.80 ஆயிரத்துடன் லாரியில் ஊருக்கு புறப்பட்டார். அல்லம்பட்டி முக்கு ரோடு பகுதியில் வந்த போது பறக்கும் படை அதிகாரி மாரியப்பன் தலைமையிலான குழுவினர் லாரியை நிறுத்தி சோதனை செய்தனர்.

அவர்கள் சரவணகுமாரிடம் இருந்த ரு.80 ஆயிரத்தை பறிமுதல் செய்தனர். அந்த பணத்துக்கு முறையான ஆவணம் இல்லை எனகூறி வட்டாட்சியர் அலுவலகம் அனுப்பி வைக்கப்பட்டது.

அருப்புக்கோட்டை கோபாலபுரத்தைச் சேர்ந்தவர் தமிழ்மணி. இவர் தனது மகள் திருமணத்திற்காக திருச்சி சென்று பொருட்கள் வாங்கி விட்டு காரில் ஊருக்கு திரும்பினார். நள்ளிரவு ஒரு மணி அளவில் ஆவியூர் சோதனை சாவடி வந்தபோது பறக்கும் படை அதிகாரி ராமராஜி காரை நிறுத்தி சோதனை செய்தார். அப்போது உரிய ஆவணம் இல்லை என கூறி தமிழ்மணி வைத்திருந்த ரூ.80 ஆயிரத்தை பறிமுதல் செய்தார்.

மானாமதுரை 4 வழிச் சாலையில் உள்ளது குட்வில் மெட்ரிக் மேல்நிலைப்பள்ளி. இந்த பள்ளியின் தாளாளர் பூமிநாதன் காரில் சென்றார். திருப்பாச்சேத்தி சோதனை சாவடி அருகே வந்தபோது பறக்கும் படை தாசில்தார் செந்தில்வேல், சிறப்பு சப்-இன்ஸ்பெக்டர் சோமசுந்தரபாரதி தலைமையிலான குழுவினர் காரை நிறுத்தி சோதனை செய்த னர்.

அப்போது உரிய ஆவணங்கள் இல்லாமல் பூமிநாதன் வைத்திருந்த ரூ.1 லட்சத்து 52 ஆயிரத்து 500 பறிமுதல் செய்யப்பட்டது. #LokSabhaElections2019

திருப்போரூர்:

காஞ்சி பாராளுமன்ற வேட்பாளர் மரகதம் குமரவேலுக்கு ஆதரவாக தே.மு.தி.க. பொருளாளர் பிரேமலதா விஜயகாந்த் செங்கல்பட்டு, உத்திரமேரூர், மதுராந்தகம், திருப்போரூர், கேளம்பாக்கம், கூடுவாஞ்சேரி உள்ளிட்ட இடங்களில் வாக்குகள் சேகரித்தார். அவர் பேசியதாவது:-

காஞ்சிபுரம் பாராளுமன்றத்திற்கு போட்டியிடும் மரகதம்குமரவேல், மற்றும் திருப்போரூர் சட்டமன்ற இடைத்தேர்தலுக்கு போட்டியிடும் ஆறுமுகம் ஆகியோரை பெருவாக்குகள் வித்தியாசத்தில் வெற்றி பெறசெய்ய வேண்டும். இவர்கள் வெற்றி பெற்றால் காஞ்சிபுரம் மாவட்டத்தை இரண்டாக பிரித்து செங்கல்பட்டை தனி மாவட்டமாக உருவாக்குவது, கடல்நீரை குடிநீராக்கும் திட்டத்தை விரிவுபடுத்தி குடிநீர் பிரச்சனைகள் தீர்க்கப்படும்.

மேலும் தொகுதிமக்களுக்காக பாராளுமன்றத்திலும், சட்டமன்றத்திலும் கேட்டு பெற்று தொகுதிவளர்ச்சிக்கு தேவையானவற்றை செய்துகொடுப்பார்கள். எங்களின் கூட்டணி பலம் வாய்ந்த கூட்டணி. மீண்டும் மோடி பிரதமரானால் ஜிஎஸ்டி வரிகுறைப்பு, வேலைவாய்பை அதிகரித்தல். இன்னும் எண்ணற்ற திட்டங்கள் நிறைவேற்ற வலியுறுத்தப்படும். சதிகாரர்கள், சூழ்ச்சிகாரர்களுக்கு இந்த தேர்தலில் தக்கபாடம் புகட்டுங்கள். 40 பாராளுமன்ற தொகுதிகள், 18 சட்டமன்ற தொகுதிகளில் நம் கூட்டணி வெற்றிபெறும்.

இவ்வாறு அவர் பேசினார்.

அ.தி.மு.க. முன்னாள் எம்.எல்.ஏ. தண்டரை மனோகரன், ஒன்றிய செயலாளர் குமரவேல், அ.தி.மு.க. நிர்வாகிகள், பா.ஜனதா, பா.ம.க., தே.மு.தி.க, புரட்சிபாரதம்,த.மா.க உள்ளிட்ட கூட்டணி கட்சி நிர்வாகிகள் கலந்து கொண்டனர். கூட்டணிகட்சி தொண்டர்கள் கட்சிகொடியுடன் வீதி வீதியாக பிரசாரத்தில் ஈடுபட்டனர். #PremalathaVijayakanth #DMDK #ADMK

சென்னை:

அம்மா மக்கள் முன்னேற்ற கழக பெரம்பூர் சட்டமன்ற தொகுதி வேட்பாளர் பி.வெற்றிவேல் மீண்டும் இத்தொகுதியில் போட்டியிடுவதால் மிகுந்த பரபரப்பும் எதிர்பார்ப்பும் ஏற்பட்டுள்ளது. தொகுதியில் நன்கு அறிமுகமான இவர் பரிசு பெட்டி சின்னத்தில் வாக்களிக்கும்படி ஆதரவு திரட்டி வருகிறார். கொடுங்கையூர், முத்தமிழ் நகர் பவானி அம்மன் கோவிலில் சாமி கும்பிட்டு விட்டு நேற்று பிரசாரத்தை தொடங்கிய அவர் மார்க்கெட் பகுதி முழுவதும் வாக்கு சேகரித்தார்.

1 முதல் 8 வரை உள்ள பிளாக்குகளில் அனைத்து தெருக்களிலும் ஜீப்பிலும், ஆட்டோவிலும் சென்று வாக்கு சேகரித்தார். கருணாநிதி தெரு, அம்பேத்கர் தெரு, காமராஜர் சாலை, காந்தி நகர், டீச்சர் காலனி உள்ளிட்ட பகுதிகளில் பரிசு பெட்டி சின்னத்தில் வாக்களித்து வெற்றி பெற செய்யுமாறு வேட்பாளர் வெற்றிவேல் கேட்டுக் கொண்டார். அவருக்கு சிறுபான்மை மக்களும், பொது மக்களும் உற்சாக வரவேற்பு அளித்தனர். பெண்கள் ஆரத்தி எடுத்து வெற்றி திலகமிட்டனர்.

பிரசாரத்தில் நிர்வாகிகள் பழனி, லட்சுமி நாராயணன் உள்பட ஏராளமானவர்கள் கலந்து கொண்டனர். #AMMK

ஆரணி:

ஆரணி பாராளுமன்ற தொகுதியில் போட்டியிடும் அ.தி.மு.க. வேட்பாளர் செஞ்சி வி.ஏழுமலையை ஆதரித்து ஆரணியில் துணை முதல் - அமைச்சர் ஓ.பன்னீர்செல்வம் நேற்று இரவு திறந்த வேனில் பிரசாரம் மேற்கொண்டார். அப்போது அவர் பேசியதாவது:-

நல்லவர்கள் எல்லாம் இணைந்த கூட்டணி தான் அ.தி.மு.க. எதிரணியில் தி.மு.க., காங்கிரஸ் கூட்டணியில் உள்ளவர்கள் அனைவருமே அடாவடி. மத்தியில் 10 ஆண்டுகாலம் அமைச்சரவையில் இருந்த தி.மு.க.வினர் என்ன திட்டங்களை கொண்டு வந்தார்கள். மறைந்த முன்னாள் முதல்- அமைச்சர் ஜெயலலிதா, கடந்த முறை சட்டமன்றத்திலும், பாராளுமன்றத்திலும் அதிக இடங்களில் வெற்றி பெற்றதன் பயனாக காவிரி நடுவர் நீதிமன்ற தீர்ப்பினை அரசிதழில் வெளியிட செய்தார்.

நமது ஆட்சியின் போதே எதிர்கட்சியில் இருப்பவர்கள் வியாபாரிகளை மிரட்டுகிறார்கள். அவர்கள் ஆளுங்கட்சியாக வந்துவிட்டால் என்ன நடக்கும் என்று உங்களுக்கே தெரியும்.

இந்த தேர்தலோடு நாங்கள் காணாமல் போவோம் என்று கூறுகிறார்கள். தி.மு.க.வால் எந்த தேர்தலிலும் வெற்றி பெற முடியாது. மறைந்த முன்னாள் முதல் - அமைச்சர் ஜெயலலிதா கொண்டு வந்த அத்தனை திட்டங்களும் தற்போது தொடர்வதுடன், கூடுதலாகவும் மக்களுக்கு திட்டங்கள் வழங்கப்படுகிறது’’ என்றார்.

இதனையடுத்து துணை முதல்-அமைச்சர் ஓ.பன்னீர்செல்வம் செங்கம் பகுதியில் தேர்தல் பிரசாரத்தில் ஈடுபட்டார். திருவண்ணாமலை பாராளுமன்ற தொகுதியில் போட்டியிடும் அக்ரி.கிருஷ்ணமூர்த்தியை ஆதரித்துப் பிரசாரம் செய்தார். அப்போது அவர் பேசியதாவது:-

திருவண்ணாமலை பாராளுமன்ற தொகுதியில் போட்டியிடும் அக்ரி.கிருஷ்ணமூர்த்தியை அதிக வாக்குகள் வித்தியாசத்தில் வெற்றி பெற செய்ய வேண்டும். அ.தி.மு.க. அரசு ஏழை எளிய தொழிலாளிகள் பயன்பெறும் வகையில் அவர்களுக்கு ரூ.2 ஆயிரம் ரூபாய் வழங்கியது. அதைக் கொடுக்கக்கூடாது என, தி.மு.க.வினர் கோர்ட்டில் வழக்குப்போட்டு தடை செய்து விட்டனர். தமிழக அரசு, ஏழை எளிய மக்களுக்கு 2 ஆயிரம் ரூபாயை மீண்டும் வழங்கும்.

மத்தியில் காங்கிரஸ் கட்சி ஆட்சி செய்தபோது, அதன் கூட்டணியில் தி.மு.க.சார்பில் 9 மந்திரிகள் இருந்தார்கள். அவர்கள், தமிழகத்துக்கு எந்தவொரு நலத்திட்டங்களையும் செய்யவில்லை. செங்கம் விவசாயம் சார்ந்த பகுதி. இங்குத் தொழிற்சாலைகள் எதுவும் இல்லை. இந்தப் பகுதி வளர்ச்சிக்கு தமிழக அரசு பாடுபடும்.

சமீபகாலமாக தி.மு.க.வினர் அராஜகத்தில் ஈடுபட்டு வருகின்றனர். டீக்கடை முதல், புரோட்டாக்கடை வரை வன்முறையில் ஈடுபட்டு வருகின்றனர். வன்முறையை தூண்டி விட்டு, பொதுமக்களின் அமைதியை கெடுக்கிறார்கள். நானும் ஒரு டீக்கடை நடத்தி வருகிறேன். இதுபோல நடந்ததில்லை.

இவ்வாறு ஓ.பன்னீர்செல்வம் பேசினார்.

திருவண்ணாமலை மாடவீதியில் உள்ள கடலைக்கடை சந்திப்பு அருகில் இரவு 9 மணி அளவில் துணை முதல் - அமைச்சர் ஓ.பன்னீர்செல்வம் பிரசாரம் செய்வதற்காக ஏற்பாடு செய்யப்பட்டிருந்தது.

செங்கத்தில் பிரசாரம் செய்துவிட்டு இரவு 10.35 மணி அளவில் திருவண்ணாமலைக்கு வந்தார். பிரசாரம் நேரம் முடிந்துவிட்டதால் ஓ.பன்னீர்செல்வம் பொதுமக்களுக்கு இரட்டை விரலை காட்டிவிட்டு சென்றார்.  #LokSabhaElections2019