சிவகங்கை

சிவகங்கை:

தமிழகத்தில் அரசு அலுவலகங்கள் மற்றும் அரசு பள்ளிகளில் 10 லட்சத்திற்கும் மேற்பட்ட அரசு ஊழியர்கள் பணியாற்றி வருகின்றனர்.

ஊழியர்களுக்கு பழைய ஓய்வூதிய திட்டத்தை உடனே அமல்படுத்த வேண்டும். 8-வது ஊதியக்குழு பரிந்துரைகளை நடைமுறைப் படுத்த வேண்டும். 20 சதவீத இடைக்கால நிவாரணம் அளிக்க வேண்டும் என்பன உள்பட பல்வேறு கோரிக்கைகளை வலியுறுத்தி மாநிலம் முழுவதும் இன்று ஒரு நாள் அடையாள வேலை நிறுத்த போராட்டம் நடைபெறும் என அறிவிக்கப்பட்டு உள்ளது.

தமிழக அரசு ஊழியர்களின் பல்வேறு சங்கங்கள் இணைந்த ஜாக்டோ-ஜியோ அமைப்பு நிர்வாகிகள் வேலை நிறுத்தம் குறித்து தீவிர பிரசாரம் மேற்கொண்டனர். வேலை நிறுத்தத்துக்கு பெரும்பாலான சங்கங்கள் ஆதரவு தெரிவித்தன. தமிழ் நாடு ஆசிரியர் சங்க கூட்டமைப்பும் வேலை நிறுத்தத்தில் பங்கேற்கும் என அறிவித்தது.

அதன்படி இன்று ஒரு நாள் வேலை நிறுத்த போராட்டம் நடந்தது. சிவகங்கை மாவட்டத்தில் 20 ஆயிரத்துக்கும் மேற்பட்ட அரசு ஊழியர்கள், ஆசிரியர், ஆசிரியைகள் பங்கேற்றனர். இதன் காரணமாக மாவட்ட கலெக்டர் அலுவலகம், வருவாய் அலுவலகம் வெறிச்சோடி காணப்பட்டன.

90 சதவீதத்துக்கும் மேற்பட்ட ஊழியர்கள் வேலை நிறுத்தத்தில் பங்கேற்றனர். பெரும்பாலான பள்ளிகளில் ஆசிரியர்கள் வரவில்லை. இதனால் மாணவ -மாணவிகள் ஏமாற்றத்துடன் வீட்டுக்கு திரும்பி சென்றனர். சில பள்ளிகளில் விடுமுறை என அறி விக்கப்பட்டு இருந்தது.

ராமநாதபுரம் மாவட்டத்தில் அரசு ஊழியர்கள் 8 ஆயிரம் பேர், ஆசிரியர்கள் 4 ஆயிரம் பேர் என 12 ஆயிரம் பேர் வேலை நிறுத்தத்தில பங்கேற்றனர். 80 சதவீத அரசு ஊழியர்கள் பணிக்கு வரவில்லை. அரசு பள்ளிகளிலும் இதே நிலைமை நீடித்தது.

கோரிக்கைகளை வலியுறுத்தி ஜாக்டோ-ஜியோ ஒருங்கிணைப்பாளர் கருணாநிதி, தமிழ்நாடு ஆசிரியர்கள் சங்க மாவட்ட தலைவர் முருகேசன் தலைமையில் ஆர்ப்பாட்டம் நடந்தது. தாலுகா அலுவலகங்களிலும் ஊழியர்கள் ஆர்ப்பாட்டம் செய்தனர். வேலை நிறுத்தம் காரணமாக அரசு பணிகள் முடங்கின.

விருதுநகர் மாவட்டத்தில் 10 ஆயிரத்துக்கும் மேற்பட்ட அரசு ஊழியர்கள், ஆசிரியர்கள் வேலை நிறுத்தத்தில் ஈடுபட்டனர். வருவாய்த் துறை, ஆசிரியர்கள், வளர்ச்சி துறை உள்பட பல்வேறு துறைகளில் முழு அளவில் வேலை நிறுத்தம் நடைபெற்றது.

அரசு ஊழியர்கள் வேலை நிறுத்தம் காரணமாக பொது மக்கள் கடுமையாக பாதிக்கப்பட்டனர்.

சிவகங்கை:

சிவகாசி அரசு கல்லூரியில் 18 வயது இளம்பெண் முதலாம் ஆண்டு படித்து வருகிறார். அதே கல்லூரியில் பி.ஏ. 3-ம் ஆண்டு படித்து வருபவர் சுபாஷ் (வயது 21).

இவர் அந்த மாணவியை ஒரு தலையாக காதலித்துள்ளார். இதனை மாணவியிடம் தெரிவித்தபோது அவர் காதலை ஏற்க மறுத்துவிட்டார். ஆனாலும் சுபாஷ், தொடர்ந்து வற்புறுத்தி வந்துள்ளார்.

நேற்று கல்லூரி வாசலில் மாணவியை வழிமறித்த சுபாஷ், துப்பட்டாவை பிடித்து இழுத்ததாகவும், அதில் துப்பட்டா கிழிந்து விட்டதாகவும் கல்லூரி முதல்வரிடம், மாணவி புகார் செய்தார்.

இது குறித்து சிவகங்கை நகர் போலீசில் கல்லூரி முதல்வர் அழகுபாண்டி புகார் செய்தார். இன்ஸ் பெக்டர் மோகன் வழக்குப் பதிவு செய்து விசாரணை நடத்தி கல்லூரி மாணவர் சுபாஷை கைது செய்தார்.

சிவகங்கை:

சிவகங்கையில் இந்திய கம்யூனிஸ்டு கட்சியின் மாநில செயலாளர் முத்தரசன் இன்று நிருபர்களிடம் கூறியதாவது:-

தமிழகத்தில் ஜெயலலிதா மறைவுக்கு பிறகு அமைந்த அரசு முழுவதுமாக மக்கள் நம்பிக்கையை இழந்து விட்டது. அ.தி.மு.க.வில் நடப்பது பதவி சண்டைதான். கொள்கைக்காக அல்ல.

தற்போது அ.தி.மு.க. அணிகள் இணைப்பு என்பது வெறும் கண்துடைப்பு நாடகம். ஜெயலலிதாவின் போயஸ் கார்டனை நினைவில்லமாக்குவது, ஜெயலலிதா மரணம் குறித்த நீதிவிசாரணை போன்றவை ஓ.பி.எஸ். அணியினர் வைத்த நிபந்தனைதான்.

ஓ.பன்னீர்செல்வம் முதல்வராக இருந்தபோது ஏன் மரணம் குறித்து நீதிவிசாரணை அமைக்க வில்லை. இரு அணியினரும் நன்றாக நாடகமாடி வருகிறார்கள்.

ஆனால் இயக்குநர் யார் என்பதுதான் தெரிய வில்லை. விரைவில் அதுவும் தெரியும். போயஸ் கார்டனை மட்டும் நினைவில்லாமாக்க கூடாது. ஜெயலலிதாவின் சொத்துக்கள் அனைத்தையும் அரசுடமையாக்க வேண்டும்.

மத்திய-மாநில அரசுகள் மக்கள் பிரச்சினைகள் பற்றி கவலைப்படாமல் தனியார்மயத்தை ஆதரித்து வருகிறது. மேகதாதுவில் அணை கட்டுவது குறித்து தமிழக அரசு சார்பில் சுப்ரீம் கோர்ட்டில் தெரிவித்த கருத்துக்களே மக்கள் பிரச்சினையில் அக்கறை இல்லை என்பதை காட்டுகிறது.

அனைத்து மாநிலங்களிலும் பா.ஜ.க. அரசு அமைய வேண்டும் என்ற நோக்கத்தில் மோடி ஜனநாயக விரோத போக்கை கடைபிடித்து வருகிறார். இதற்கு உதாரணம் பீகாரில் நடந்த சம்பவங்களே.

நீட் தேர்வுக்கு முழுமையாக விலக்கு அளிக்க வேண்டும் என்பதே மாணவர்கள் மற்றும் பொதுமக்களின் கோரிக்கை. ஜி.எஸ்.டி. வரியால் ஏழை, எளிய மக்கள் கடுமையாக பாதிக்கப்பட்டுள்ளனர்.

தி.மு.க. செயல் தலைவர் ஸ்டாலினின் மக்கள் பணி பாராட்டுக்குரியது. பொதுமக்களின் பிரச்சினைகளை முன்வைத்து வருகிற செப்டம்பர் மாதம் 1-ந்தேதி முதல் 10-ந்தேதி வரை மாவட்டந்தோறும் நகரம் முதல் கிராமம் வரை இந்திய கம்யூனிஸ்டு கட்சி சார்பில் நடை பயண இயக்கம் நடத்தப்படும்.

இவ்வாறு அவர் கூறினார்.

பேட்டியின்போது மாவட்ட செயலாளர் குணசேகரன், முன்னாள் எம்.எல்.ஏ. தங்கமணி, நகர செயலாளர் ராஜேஷ் ஆகியோர் உடன் இருந்தனர்.

சிவகங்கை:

சிவகங்கை மாவட்ட த்தில், சிவகங்கை நகர் காரைக்குடி, இளையான்குடி, திருப்பத்தூர், புதுவயல் ஆகிய பகுதிகளில் மர்ம காய்ச்சலால் பலர் பாதிக்கப்பட்டனர். இதையொட்டி மாவட்ட நிர்வாகம் சார்பில் காய்ச்சல் தடுப்பு பணிகள் தீவிரப்படுத்தப்பட்டன.

மேலும் டெங்கு காய்ச்சலுக்கு சிகிச்சை அளிப்பதற்காக சிவகங்கை அரசு ஆஸ்பத்திரியில் தனி வார்டுகளும் அமைக்கப்பட்டன.

இந்நிலையில் இளையான்குடியைச் சேர்ந்த முபாரக் அலியின் 1 வயது மகள் மரியம், புதுவயலைச் சேர்ந்த தனியார் பள்ளி ஆசிரியை சூர்யா, அவரது சகோதரி வனஜா மற்றும் 5 ஆண்களுக்கு டெங்கு அறிகுறி இருப்பது கண்டறியப்பட்டது.

உடனடியாக அவர்கள் சிவகங்கை அரசு ஆஸ்பத்திரியில் அனுமதிக்கப்பட்டனர். அவர்களை தனி வார்டில் வைத்து டாக்டர்கள் சிகிச்சை அளித்து வருகின்றனர். டெங்கு அறிகுறியால் சிகிச்சை பெறுபவர்கள் 24 மணி நேரமும் டாக்டர்களின் கண்காணிப்பில் உள்ளனர்.

சிவகங்கை:

சிவகங்கை தாலுகா மதகுபட்டி அருகே உள்ள தட்டம்பட்டியைச் சேர்ந்தவர் காந்திமதி. இவரது மகள் பார்வதி (வயது 17).

சம்பவத்தன்று பார்வதி மதகுபட்டிக்கு செல்வதாக கூறிவிட்டுச் சென்றார். அதன் பின்னர் அவர் வீடு திரும்பவில்லை. பல இடங்களில் தேடியும் பார்வதியை காணவில்லை.

இது குறித்த புகாரின் பேரில் மதகுபட்டி போலீஸ் சப்-இன்ஸ்பெக்டர் ஜான் பிரிட்டோ வழக்குப்பதிவு செய்து விசாரித்து வருகிறார்.

தேவகோட்டையைச் சேர்ந்தவர் சித்ரா. இவரது மகள் கவுசிகா (17). இவர் அதே பகுதியில் உள்ள தனியார் பள்ளியில் பிளஸ் -2 படித்து வந்தார்.

நேற்று பள்ளிக்கு செல்வதாக கூறிச் சென்ற கவுசிகா பின்னர் வீடு திரும்பவில்லை. பல இடங்களில் தேடியும் கிடைக்கவில்லை.

இது குறித்து தேவகோட்டை நகர் போலீஸ் இன்ஸ்பெக்டர் முத்துக்குமார் வழக்குப்பதிவு செய்து மாணவியை தேடி வருகிறார்.

மானாமதுரை தாலுகா குக்குடியைச் சேர்ந்தவர் மீனாள். இவரது மகன் விக்னேஷ் (16). இவர் சிவகங்கையில் உள்ள பள்ளியில் 10-ம் வகுப்பு படித்து வருகிறார். நேற்று பள்ளிக்குச் சென்ற விக்னேஷ் மாயமானார். பல இடங்களில் தேடியும் பலன் இல்லை.

இது குறித்து மானாமதுரை போலீஸ் இன்ஸ்பெக்டர் முகம்மது பரகத்துல்லா வழக்குப்பதிவு செய்து விசாரித்து வருகிறார்.

சிவகங்கை:

தேவகோட்டை அருகே உள்ள முப்பையூரை சேர்ந்தவர் சுப்பிரமணியன் (வயது 42), இவர் அதே பகுதியில் பலசரக்கு கடை நடத்தி வருகிறார். சம்பவத்தன்று இரவு வழக்கம்போல் கடையை பூட்டிவிட்டு சுப்பிரமணியன் வீட்டுக்கு சென்று விட்டார்.

நள்ளிரவு நேரத்தில் அங்கு வந்த மர்மநபர்கள் கடையின் கதவை உடைத்து உள்ளே புகுந்தனர். பின்னர் கல்லா பெட்டியில் இருந்த ரூ. 10 ஆயிரம் ரொக்கம், ரூ. 2ஆயிரம் மதிப்புள்ள செல்போன் ஆகியவற்றை திருடிக் கொண்டு தப்பினர்.

இதுகுறித்து தேவகோட்டை தாலுகா போலீசில் சுப்பிரமணியன் புகார் செய்தார். சிறப்பு சப்-இன்ஸ்பெக்டர் முத்துராமன் வழக்குப்பதிவு செய்து கொள்ளையர்களை தேடிவருகிறார்.

காரைக்குடி:

காரைக்குடியில் புதிதாக நியமனம் செய்யப்பட்ட தி.மு.க. இளைஞரணி நிர்வாகிகளின் ஆலோசனைக்கூட்டம் நடை பெற்றது.

சிவகங்கை மாவட்டம் முழுவதும் இருந்து நகர,ஒன்றிய இளைஞரணி நிர்வாகிகள் கலந்து கொண்டனர். மாவட்ட செயலாளர் பெரியகருப்பன் தலைமை தாங்கினார். முன்னாள் அமைச்சர் தென்னவன்,மாவட்ட பொருளாளர் துரைராஜ், நகர செயலாளர் குண சேகரன் முன்னிலை வகித்தனர்.

புதிதாக தேர்ந்தெடுக்கப்பட்ட நிர்வாகிகளுக்கு தி.மு.க. மாநில இளைஞரணி துணை அமைப்பாளர் அன்பில் மகேஷ் பொய்யாமொழி இளைஞரணியின் பங்கு குறித்தும் செயல்பட வேண்டிய விதம் குறித்தும் நகரம், ஒன்றியம் வாரியாக ஆலோசனை வழங்கினார்.

இதில் சாக்கோட்டை மேற்கு ஒன்றிய பொறுப் பாளர்குழு தலைவர் ஆனந்த், மகளிர் அமைப்பாளர் ஹேமாசெந்தில்,காரைக்குடி நகர இளைஞரணி அமைப்பாளர் மூர்த்தி,துணை அமைப்பாளர் சக்தி, தேவகோட்டை இளைஞரணி அமைப்பாளர் பிரகாஷ், துணை அமைப்பாளர் அப்துல் ஜாபர், காளையார்கோவில் ஒன்றிய துணை அமைப்பாளர் சாய் கார்த்திக், காரைக்குடி நகர துணை செயலாளர் கண்ணன்,மாவட்ட பிரதிநிதி சேவியர் உள்பட பலர் கலந்து கொண்டனர்.

ஆலோசனை கூட்டத்திற்கான ஏற்பாடுகளை மாவட்ட இளைஞரணி அமைப்பாளர் நாகனி செந்தில்குமார் சிறப்பாக செய்திருந்தார்.