காஞ்சிபுரம்

தாம்பரம்:

கடந்த 2015-ம் ஆண்டு பெய்த தொடர் மழையால் சென்னை மற்றும் புறநகர் பகுதியில் கடும் வெள்ளப் பெருக்கு ஏற்பட்டது. தாம்பரம், முடிச்சூர் பகுதிகள் கடுமையாக பாதிக்கப்பட்டன.

ஏராளமானோர் தண்ணீரில் மூழ்கி பலியானார்கள். பலரது நிலைமை என்ன ஆனது என்றே இதுவரை தெரியாமல் உள்ளது.

இந்த பெருவெள்ளத்தின் போது முடிச்சூர் பகுதியில் தனியார் நிறுவனத்தில் ஏ.சி.மெக்கானிக்காக பணியாற்றி வந்த அருண்குமார் (வயது 24) தண்ணீரில் அடித்து செல்லப்பட்டார். அவரை தேடியும் கண்டுபிடிக்க முடியவில்லை.

இதுகுறித்து அவர் வேலை பார்த்த நிறுவனத்தினர் பீர்க்கண்கரணை போலீசில் புகார் செய்து இருந்தனர்.

இந்த நிலையில் தாம்பரத்தை அடுத்த பெருங்களத்தூர் சமத்துவபெரியார் நகர் பகுதியில் உள்ள அடையாறு ஆற்று கரையோர முட்புதரில் மனித எலும்புக்கூடு கிடந்தது.

இதுபற்றி அப்பகுதி மக்கள் பீர்க்கண்கரணை போலீசுக்கு தகவல் தெரிவித்தனர். போலீசார் விரைந்து வந்து எலும்புக் கூடுகளை கைப்பற்றி விசாரணை நடத்தினார்.

அப்போது அங்குள்ள முட்புதரில் கிடந்த அடையாள அட்டையை கைப்பற்றினார். அதில் அருண் குமார் என்று குறிப்பிட்டு இருந்தது.

எனவே மீட்கப்பட்ட எலும்புக்கூடு பெருவெள்ளத்தின்போது மாயமான அருண்குமாருடையதாக இருக்கலாம் என்று போலீசார் நம்புகிறார்கள். மாயமாகி 3 ஆண்டுகளுக்கு பிறகு எலும்புக்கூடுகள் சிக்கி உள்ளது.

அருண்குமாரின் சொந்த ஊர் புதுக்கோட்டை ஆகும். இதுபற்றி அங்குள்ள அவரது உறவினர்களுக்கு போலீசார் தகவல் தெரிவித்து உள்ளனர்.

மீட்கப்பட்ட எலும்புக் கூடுகள் பரிசோதனைக்காக ராயப்பேட்டை அரசு ஆஸ்பத்திரிக்கு அனுப்பி வைக்கப்பட்டு உள்ளது. ரசாயன பரிசோதனைக்கு பின்னர் அவை அருண்குமாரின் உறவினர்களிடம் ஒப்படைக்கப்படும் என்று தெரிகிறது.

பெருவெள்ளத்தின் போது மாயமானவரின் எலும்புக் கூடுகள் 3 ஆண்டுகளுக்கு பிறகு சிக்கி இருப்பது பரபரப்பை ஏற்படுத்தி உள்ளது. #ChennaiFloods  #chennairains

தாம்பரம்:

பல்லாவரம் அடுத்த திருநீர்மலை, புலி கொரடு சாலையில் புதிதாக ‘டாஸ்மாக்’ மதுக்கடை திறக்க அதிகாரிகள் முடிவு செய்தனர்.

இதற்கு அப்பகுதி மக்கள் கடும் எதிர்ப்பு தெரிவித்தனர். எனினும் மதுக்கடை திறப்பதற்கான பணிகள் தொடர்ந்து நடந்து வந்தன.

நேற்று இரவு 10.30 மணியளவில் புதிதாக அமைக்கப்பட்டு உள்ள மதுக்கடைக்கு, மதுபாட்டில்களை லாரியில் கொண்டு வந்து ஊழியர்கள் இறக்கினர்.

இது பற்றி அறிந்த அப்பகுதி பெண்கள் 50-க்கும் மேற்பட்டோர் அங்கு திரண்டனர். அவர்கள் மதுக்கடையை முற்றுகையிட்டு கோ‌ஷங்கள் எழுப்பினர்.

திடீரென அவர்கள் மதுக்கடைக்குள் புகுந்து அங்கிருந்த ஊழியர்களை வெளியே விரட்டியடித்தனர். பின்னர் மதுக்கடையை அடித்து நொறுக்கினர்.

மதுபாட்டில்களை உடைத்து சாலையில் வீசி எறிந்தனர். இதனால் அப்பகுதியில் பெரும் பரபரப்பு ஏற்பட்டது. தகவல் அறிந்ததும் சங்கர் நகர் போலீசார் விரைந்து வந்து போராட்டத்தில் ஈடுபட்டவர்களிடம் சமாதான பேச்சு வார்த்தை நடத்தினர். இதையடுத்து அவர்கள் அங்கிருந்து கலைந்து சென்றனர். சுமார் ரூ.1½ லட்சம் மதுப்பாட்டில்கள் சேதம் அடைந்தன.

இது குறித்து அப்பகுதி மக்கள் கூறும் போது, திருமுடிவாக்கத்தில் செயல்பட்ட மதுக்கடையை மூடிவிட்டு அதனை இங்கு திறக்க ஏற்பாடு நடக்கிறது. மதுக்கடை வேண்டாம் என்று அதிகாரிகளுக்கு தெரிவித்தும் கேட்கவில்லை. எங்களுக்கு மதுக்கடை வேண்டாம். உடனே அகற்ற வேண்டும்” என்றனர்.

இது குறித்து டாஸ்மாக் கடை சூப்பர்வைசர் சிவக்குமார் சங்கர்நகர் போலீசில் புகார் செய்தார். போலீசார் விசாரணை நடத்தி வருகிறார்கள். #Tasmac

செங்கல்பட்டு:

கூடுவாஞ்சேரியை அடுத்த நந்திவரம் கூடுவாஞ்சேரி. திரவுபதி அம்மன் கோவில் தெருவை சேர்ந்தவர் ஜெகன் (வயது 25). ஆந்திராவில் கவரிங் நகை கடை நடத்தி வந்தார். இவரது மனைவி ரோஜா. இவர்களுக்கு 3 மாத ஆண் குழந்தை உள்ளது.

இவர்கள் ஆந்திராவில் தங்கி வியாபாரம் செய்து வந்தனர். மாதத்துக்கு ஒருமுறை நந்திவரம் கூடுவாஞ்சேரியில் உள்ள பெற்றோரை பார்க்க ஜெகன் குடும்பத்துடன் வருவது வழக்கம்.

கடந்த 21-ந் தேதி ஜெகன், குடும்பத்துடன் பெற்றோரை பார்க்க இங்கு வந்து இருந்தார். இந்த நிலையில் நேற்று இரவு வீட்டின் மாடியில் ஜெகன் மட்டும் இருந்தார். வீட்டில் உள்ள அறையில் அவரது மனைவி மற்றும் குடும்பத்தினர் டி.வி. பார்த்துக் கொண்டு இருந்தனர்.

அப்போது ஜெகனை பார்ப்பதற்காக அவரது நண்பர்கள் குட்டா கார்த்திக் உள்பட 10 பேர் வீட்டுக்கு வந்தனர். ஜெகன் மாடியில் இருப்பதை அறிந்து அங்கு சென்றனர்.

திடீரென ஜெகனுக்கும், அவரது நண்பர்களுக்கும் இடையே வாக்குவாதம் ஏற்பட்டு மோதல் உருவானது. ஆத்திரம் அடைந்த நண்பர்கள் ஜெகனை சரமாரியாக வெட்டி விட்டு தப்பி சென்று விட்டனர்.

இதில் சம்பவ இடத்திலேயே ஜெகன் பரிதாபமாக இறந்தார்.

அலறல் சத்தம் கேட்டு வீட்டில் இருந்த குடும்பத்தினர் மாடிக்கு வந்து பார்த்தனர். அப்போது ஜெகன் கொலை செய்யப்பட்டு கிடப்பதை கண்டு கதறி துடித்தனர்.

இது குறித்து கூடுவாஞ்சேரி போலீசுக்கு தகவல் தெரிவிக்கப்பட்டது. போலீசார் உடலை கைப்பற்றி விசாரணை நடத்தினர்.

கடந்த 2 நாட்களுக்கு முன்பு ஜெகன் நண்பர்களுடன் மது அருந்த சென்று உள்ளார். அப்போது ஏற்பட்ட தகராறில் நண்பர் ஒருவரை தாக்கியதாக தெரிகிறது.

இந்த மோதலில் ஜெகனை நண்பர்களே தீர்த்து கட்டி விட்டதாக போலீசார் தெரிவித்தனர். இது தொடர்பாக குட்டா கார்திக் உள்பட சிலரை போலீசார் தேடி வருகிறார்கள். குட்டா கார்த்திக் மீது ஏற்கனவே பல வழக்குகள் உள்ளதாக தெரிகிறது.