திருப்பூர்:
நீலகிரி உள்ளிட்ட மலைப்பிரதேசங்களில் மேல்நிலைக் கல்வி பயில்வோர் எண்ணிக்கை குறைகிறதா என்பதை கண்காணிக்க வேண்டும் என்ற கோரிக்கை எழுந்துள்ளது. தமிழகத்தில் உள்ள 38 மாவட்டங்களில் 10, பிளஸ் 1, பிளஸ் 2 பொதுத்தேர்வெழுதியோர் எண்ணிக்கையில் நீலகிரி மாவட்டம் தான் கடைசி இடத்தில் உள்ளது. 10-ம் வகுப்பில் 7,090 பேர் தேர்வெழுதியதில் 6,297 பேர், பிளஸ் 1ல் 6,199 பேர் தேர்வெழுதியதில் 5,588 பேர், பிளஸ் 2ல் 7,989 பேர் தேர்வெழுதியதில் 6,559 பேர் தேர்ச்சி பெற்றனர்.
திருப்பூர் மாவட்ட ஜே.இ.இ., மற்றும் ஐ.ஐ.டி., தேர்வு ஒருங்கிணைப்பாளர் சுரேஷ் கூறியதாவது:-
நீலகிரியில் 10ம் வகுப்பு முடிக்கும் மாணவ - மாணவிகள் பலர் துபாய் உள்ளிட்ட வெளிநாடுகளுக்கும், பெங்களூருக்கும் சென்று தங்கி விடுகின்றனர். பலர் 10ம் வகுப்பு முடித்த நிலையில் சுய தொழில் மீது ஆர்வம் கொண்டு மேல் கல்வியை தொடராமல் இருக்கின்றனர்.பள்ளி இடைநிற்றல் வெகுவாக குறைக்கப்பட்டுள்ளது.
இருப்பினும் ஊட்டி, குன்னூர், கோத்தகிரி உள்ளிட்ட இடங்களில் ஏராளமான தோட்ட தொழிலாளர்கள் வேலை வாய்ப்பை இழந்துள்ளனர். அவர்களது குழந்தைகள் பள்ளிக்கல்வியை தொடர்கின்றனரா என்பதை கண்காணித்து உறுதிப்படுத்த வேண்டும். பலர் வேலை தேடி கோவை, திருப்பூர், ஈரோடு உள்ளிட்ட தொழில் நகரங்களுக்கு குடும்பத்துடன் வந்துவிடுகின்றனர்.நீலகிரி மட்டுமின்றி மலை மாவட்டங்கள், சுற்றுலா தலங்களில் மாணவ - மாணவிகளின் மேல்நிலை மற்றும் உயர்கல்வியை உறுதிப்படுத்தும் வகையில் ஆய்வு நடத்தப்படுவது சிறந்தது. இவ்வாறு அவர் கூறினார்.
