சிவகங்கை

காரைக்குடி:

சிவகங்கை மாவட்டம், காரைக்குடி அருகே உள்ள சங்கராபுரம் ஊராட்சிக்குட்பட்ட என்.ஜி.ஓ. காலனியில் நாகாத்தம்மன் கோவில், தேவாலயம் உள்ளன. இங்கு தினமும் பலர் வந்து வழிபாடு செய்து வருகின்றனர்.

இந்த நிலையில் கோவில் மற்றும் தேவாலயம் இருக்கும் இடம், அரசுக்கு சொந்தமான புஞ்சை நிலம் என்றும், அனுமதியின்றி கோவில், தேவாலயம் கட்டப்பட்டு உள்ளதாக கிராம நிர்வாக அலுவலர் புகார் தெரிவித்தார்.

இது தொடர்பாக தொடரப்பட்ட வழக்கை விசாரித்த ஐகோர்ட்டு, கோவில் மற்றும் தேவாலயத்தை அகற்ற உத்தரவிட்டது.

இது தொடர்பாக சம்பந்தப்பட்ட நிர்வாகங்களுக்கு நோட்டீசு அனுப்பப்பட்டது. இருப்பினும் கோவில் மற்றும் தேவாலயம் அகற்றப்படவில்லை.

இதனைத் தொடர்ந்து இன்று காலை காரைக்குடி வட்டாட்சியர் மகேஷ்வரன், போலீஸ் துணை சூப்பிரண்டு கார்த்திகேயன் தலைமையில் வருவாய்த்துறையினரும் போலீசாரும் என்.ஜி.ஓ. காலனி சென்றனர். அவர்கள் கோர்ட்டு உத்தரவை காட்டி கோவில் மற்றும் தேவாலயத்தை புல்டோசர் மூலம் இடித்து அகற்றினர்.

முன்னதாக கோவிலில் இருந்த அம்மன் மற்றும் சுவாமி சிலைகள், தேவாலயத்தில் இருந்த ஏசு, மாதா சிலைகள் இருக்கைகள் போன்றவை எடுத்து வெளியே வைக்கப்பட்டன.

கோவில் மற்றும் தேவாலயம் இடிப்பு காரணமாக அந்தப்பகுதியில் பதட்டமான சூழ்நிலை காணப்பட்டது. #tamilnews

தேவகோட்டை:

சிவகங்கை மாவட்டம் கல்லல் குறிஞ்சி நகரைச் சேர்ந்தவர் விஜயன் (வயது 50). இவரது மனைவி பிச்சை பாண்டி (45). இவர்களுக்கு 2 மகன்களும், ஒரு மகளும் உள்ளனர்.

நேற்று இரவு கணவன்- மனைவிக்கு இடையே திடீரென தகராறு ஏற்பட்டது. இதில் ஆத்திரம் அடைந்த விஜயன் அரிவாளால் மனைவியை வெட்டினார். படுகாயம் அடைந்த பிச்சைபாண்டி ரத்த வெள்ளத்தில் மயங்கி விழுந்தார். இதை தொடர்ந்து விஜயன் வெளியே சென்று விட்டார்.

இந்த நிலையில்உயிருக்கு போராடிக்கொண்டிருந்த பிச்சைபாண்டியை அக்கம் பக்கத்தினர் மீட்டு அரசு ஆஸ்பத்திரிக்கு கொண்டு சென்றனர்.

சிறிது நேரத்தில் குடிபோதையில் வீட்டுக்கு வந்த விஜயன், தனது மனைவியை கொலை செய்து விட்டோமே என வருந்தி தூக்குப்போட்டு தற்கொலை செய்து கொண்டார்.

இதுகுறித்து கல்லல் போலீசார் வழக்குப்பதிவு செய்து விசாரணை நடத்தி வருகிறார்கள்.

தற்போது பிச்சைபாண்டி மதுரை அரசு ஆஸ்பத்திரியில் சிகிச்சை பெற்று வருகிறார். #tamilnews

சிவகங்கை:

சிவகங்கை மாவட்டம், சிங்கம்புணரி தாலுகாவில் உள்ள பிரான்மலையைச் சேர்ந்தவர் பாண்டியன். இவரது மனைவி நித்யா (வயது 32). கணவன்-மனைவி இடையே ஏற்பட்ட கருத்து வேறுபாடு காரணமாக நித்யா தனது கணவரை பிரிந்து வாழ்கிறார்.

பலமுறை தன்னுடன் சேர்ந்து வாழ வருமாறு பாண்டியன் அழைத்தும் பலன் இல்லை. இதனால் மனைவி மீது மிகவும் ஆத்திரத்தில் இருந்தார்.

இந்த நிலையில் பாண்டியன், அவரது சகோதரி பிரியா, தாயார் காந்திமதி மற்றும் உறவினர்கள் தங்கத்துரை, சுப்பிரமணியன் ஆகியோர் நித்யா வீட்டுக்குச் சென்றனர்.

பாண்டியனுடன் குடும்பம் நடத்த வருமாறு அழைத்தனர். அதற்கு அவர் மறுத்து விட்டார். இதனால் ஆத்திரமடைந்த 5 பேரும் சேர்ந்து நித்யாவை கொடூரமாக தாக்கினர்.

படுகாயம் அடைந்த அவர், சிங்கம்புணரி அரசு ஆஸ்பத்திரியில் சேர்க்கப்பட்டார். அங்கு அவருக்கு தீவிர சிகிச்சை அளிக்கப்படுகிறது.

தாக்குதல் குறித்து எஸ்.வி. மங்கலம் போலீசில் நித்யா புகார் செய்தார். நித்யாவை தாக்கியதாக அவரது கணவர் உள்பட 5 பேர் மீது சப்-இன்ஸ்பெக்டர் சேதுராஜ் வழக்குப்பதிவு செய்து விசாரித்து வருகிறார். #tamilnews

சிவகங்கை:

சிவகங்கை மாவட்டம் இளையான்குடி தாலுகா தாயமங்கலம் தெற்கு தெருவைச் சேர்ந்தவர் சேகர். இவரது மகன் ஆனந்தசெல்வம் (வயது25). அதே பகுதியைச் சேர்ந்தவர் வாணிஜெயராம். இருவரும் நண்பர்கள்.

கடந்த சில ஆண்டுகளுக்கு முன்பு வாணிஜெயராமின் தங்கையை ஆனந்தசெல்வம் காதலித்து வந்ததாக கூறப்படுகிறது. இதனால் நண்பர்களுக்குள் பிரச்சினை ஏற்பட்டது.

அதனை தொடர்ந்து ஆனந்தசெல்வம் வெளி நாட்டிற்கு வேலைக்கு சென்று விட்டார். கடந்த தீபாவளிக்கு சொந்த ஊருக்கு வந்த ஆனந்த செல்வம் இங்கேயே தங்கி விட்டார்.

மீண்டும் ஆனந்தசெல்வம் தனது காதலியை சந்தித்து பழகி வந்துள்ளார். இதனை வாணிஜெயராமன் கண்டித்தார். ஆனால் அவர்களது பழக்கம் நீடித்தது.

இதனால் ஆத்திரம் அடைந்த அவர் நண்பனை கொலை செய்ய திட்டமிட்டார். நேற்று அவர்களுக்குள் பிரச்சினை ஏற்பட்டபோது வாணிஜெயராமன் தான் மறைத்து வைத்திருந்த கத்தியால் ஆனந்தசெல்வத்தை சரமாரியாக குத்தினார்.

இதில் படுகாயம் அடைந்த அவர் சிவகங்கை அரசு ஆஸ்பத்திரிக்கு கொண்டு செல்லப்பட்டார். ஆனால் அங்கு சிகிச்சை பலனின்றி ஆனந்தசெல்வம் பரிதாபமாக இறந்தார்.

இதுகுறித்து அவரது தந்தை சேகர் கொடுத்த புகாரின் பேரில் இளையான்குடி போலீஸ் இன்ஸ்பெக்டர் கண்ணதாசன் வழக்குப் பதிவு செய்து வாணிஜெயராமனை கைது செய்தார்.

சிவகங்கை:

ராமநாதபுரம் மாவட்டம் ஆர்.எஸ்.மங்கலத்தைச் சேர்ந்தவர் கமலஜோதி (வயது28). இவரது சொந்த ஊர் சிவகங்கை மாவட்டம் காளையார்கோவில் அருகே உள்ள பெரியநரிக்கோட்டை கிராமம் ஆகும்.

சம்பவத்தன்று கமல ஜோதி தனது 2½ வயது மகன் முக்சித்துடன் சொந்த ஊருக்கு புறப்பட்டார். சிவகங்கை பஸ் நிலையத்தில் காளையார்கோவில் செல்வதற்காக காத்திருந்தார்.

அப்போது சிவகங்கையை சேர்ந்த ஆண்டிச்சாமி (25), அலெக்ஸ் ஆகிய 2 பேர் குழந்தையை ஊருக்கு மோட்டார் சைக்கிளில் அழைத்து செல்வதாக கூறி கடத்தி சென்று விட்டதாக கமலஜோதி சிவகங்கை நகர் போலீசில் புகார் செய்தார்.

சப்-இன்ஸ்பெக்டர் கார்த்திகேயன் வழக்குப்பதிவு செய்து கடத்தப்பட்ட குழந்தையை மீட்டு ஆண்டிச்சாமியை கைது செய்தார். அலெக்சை தேடி வருகிறார்.

குழந்தையை எதற்காக இருவரும் கடத்தினார்கள் என போலீசார் விசாரணை நடத்தி வருகிறார்கள். #tamilnews

சிவகங்கை:

திருப்புவனம் தாலுகா கஜினிபட்டியைச் சேர்ந்தவர் ஆறுமுகம் (வயது 50), விவசாயி. இவரது மகள் முத்துக் கருப்பாயி (வயது 18). இவர், பூவந்தியில் உள்ள தனியார் மில்லில் வேலை பார்த்து வந்தார்.

இந்த நிலையில் வீட்டில் யாரும் இல்லாத நேரத்தில் முத்துக் கருப்பாயி தூக்குப் போட்டு தற்கொலை செய்தார்.

இது குறித்து பூவந்தி போலீஸ் இன்ஸ்பெக்டர் உமா தேவி வழக்குப்பதிவு செய்து விசாரணை நடத்தி வருகிறார். பக் கத்து வீட்டினருடன் ஆறுமுகத்திற்கு தகராறு ஏற்பட்டதாகவும், அப்போது எதிர்தரப்பினர் முத்துக்கருப்பாயி குறித்து தரக்குறைவாக பேசியதால், மன வேதனை அடைந்து அவர் தற்கொலை செய்ததாகவும் கூறப்படுகிறது. தொடர்ந்து போலீசார் விசாரணை நடத்தி வருகின்றனர்.