ஈரோடு

ஈரோடு:

ஈரோடு அடுத்த நசியனூரில் அரசு உதவி பெறும் பள்ளி செயல்பட்டு வருகிறது. இங்கு ஒன்றாம் வகுப்பு முதல் 12-ம் வகுப்பு வரை ஆயிரத்து 500க்கும் மேற்பட்ட மாணவ மாணவிகள் படித்து வருகின்றனர்.

இந்த பள்ளி அருகிலேயே வாரச்சந்தை செயல்பட்டு வருகிறது. இந்த வாரச் சந்தை வளாகத்தில் குப்பை கழிவுகளை பிராய்லர் மூலம் வைத்து எரித்து வந்துள்ளனர். இதனால் ஏற்படும் புகைபள்ளி வளாகத்திற்குள் சென்று பள்ளியில் படிக்கும் குழந்தைகள் மூச்சு விடுவதில் சிரமம் பட்டதாக கூறப்படுகிறது.

இதுகுறித்து அறிந்த பெற்றோர்கள் இந்தப் பகுதிகளில் குப்பைகளை எரிக்க கூடாது என்று எதிர்ப்பு தெரிவித்தனர்.

இந்நிலையில் இந்தக் கோரிக்கையை வலியுறுத்தி இன்று நூற்றுக்கும் மேற்பட்ட பெற்றோர்கள் தங்களது குழந்தைகளுடன் நசியனூர் சாலையில் திடீரென மறியல் போராட்டத்தில் ஈடுபட்டனர்.

இதனால் அந்த பகுதியில் போக்குவரத்து கடுமையாக பாதிக்கப்பட்டது.

இதுகுறித்து தகவல் அறிந்ததும் பெருந்துறை போலீசார் சம்பவ இடத்திற்கு விரைந்து வந்து பெற்றோர்களுடன் பேச்சுவார்த்தையில் ஈடுபட்டனர் .

மேலும் மனசின் ஒரு பேரூராட்சி செயல் அலுவலர் துரை மணியும் சம்பவ இடத்துக்கு விரைந்து வந்து பெற்றோர்களிடம் பேச்சுவார்த்தையில் ஈடுபட்டார். அப்போது இந்த பகுதியில் குப்பை கழிவுகளை எரிப்பதால் குழந்தைகளுக்கு மூச்சுத் திணறல் ஏற்படுகிறது என்று பெற்றோர்கள் குற்றம்சாட்டினர் எனவே இந்த பகுதியில் குப்பைகளை எரிக்க கூடாது என்று கோரிக்கை வைத்தனர். அதற்கு பதிலளித்த செயல் அலுவலர் “தற்போது தற்காலிகமாக இந்தப் பகுதியில் குப்பைகளை எரிக்க விடமாட்டோம். இதுகுறித்து உயர் அதிகாரிகள் கவனத்திற்கு கொண்டு செல்லப்படும்“ என்றார்.

இதனை ஏற்று பெற்றோர்கள் சாலை மறியல் போராட்டத்தை கைவிட்டனர். இதனால் சுமார் 45 நிமிடம் சாலை மறியல் போராட்டம் முடிவுக்கு வந்தது. பின்னர் பெற்றோர்கள் தங்களது குழந்தைகளை பள்ளிக்கு அழைத்துச் சென்றனர்.

சத்தியமங்கலம்:

சத்தியமங்கலம் அடுத்த மேட்டூரை சேர்ந்தவர் ஜெகதீஷ் (வயது 30). திருமணம் ஆகவில்லை. இவர் அப்பகுதியில் உள்ள ஒரு எலக்ட்ரிக் கடையில் எலக்ட்ரீசியனாக வேலை பார்த்து வந்தார்.

நேற்று இரவு அவர் வேலை பார்த்த கடை எதிரே சத்தியமங்கலம்-கோவை தேசிய நெடுஞ்சாலையில் நுகர்பொருள் வாணிப கிடங்கு அருகே நண்பர்களுடன் ஜெகதீஷ் பேசி கொண்டிருந்ததாக கூறப்படுகிறது.

அப்போது அவர்கள் இடையே தகராறு ஏற்பட்டு உள்ளது. கடும் வாக்கு வாதத்தில் ஈடுபட்டுள்ளனர். ஒருவரையொருவர் தாக்கி கொண்டனர்.

இந்த நிலையில் இன்று காலை அந்த பகுதியில் ஜெகதீஷ் பிணமாக கிடந்தார். அவரது மர்ம உறுப்பை கல்லால் தாக்கிச நசுக்கி உள்ளனர். இதில் ஜெகதீஷ் சம்பவ இடத்திலேயே பலியாகி விட்டார்.

அவரை இப்படி கொடூரமாக கொலை செய்தது யார்? என்ன காரணம்? என்று உடனடியாக தெரியவில்லை.

ஜெகதீஷ் கொலை செய்யப்பட்டு பிணமாக கிடந்த இடத்தில் கூட்டம் கூடியது. அவரது உறவினர்கள் திரண்டனர். சம்பவ இடத்துக்கு சத்தியமங்கலம் போலீசார் விரைந்து வந்தனர்.

அவரது உடலை எடுக்க முயன்றபோது உறவினர்கள் திரண்டு உடலை எடுக்க விடாமல் தடுத்தனர். கொலையாளியை கண்டுபிடித்து அவர்களை கைது செய்த பிறகே உடலை எடுக்க வேண்டும் என கூறினர். மேலும் சத்தி-கோலை மெயின் ரோட்டில் அமர்ந்து திடீர் சாலை மறியல் போராட்டத்திலும் ஈடுபட்டனர். இதனால் அங்கு பரபரப்பு ஏற்பட்டது. போலீசார் அவர்களை சமரசம் செய்தனர். கொலையாளியை விசாரணை செய்து விரைவில் பிடித்து கைது செய்வோம் என்று கூறினர்.

இதையொட்டி அவர்கள் கலைந்து சென்றாலும் அப்பகுதியில் பரபரப்பு நிலவி வருகிறது.

இதுகுறித்து போலீசார் தீவிர விசாரணை மேற்கொண்டு வருகிறார்கள். மேலும் அப்பகுதியில் உள்ள சி.சி.டி.வி. கேமிரா மூலமும் போலீசார் துப்பு துலக்கி வருகிறார்கள்.

ஈரோடு:

இந்திய கம்யூனிஸ்ட்டு கட்சியின் மாநில செயலாளர் முத்தரசன் ஈரோட்டில் இன்று நிருபர்களுக்கு பேட்டி அளித்தார். அப்போது அவர் கூறியதாவது:-

தேசிய கல்வி கொள்கை குறித்த விவாதங்கள் நடைபெற்று கொண்டிருக்கும் போதே இத்திட்டம் நடைமுறைபடுத்தப்படும் என மத்திய அமைச்சர் தெரிவித்திருப்பது கண்டனத்திற்குரியது.

பெட்ரோல், டீசல் வாகனங்களுக்கான பதிவு கட்டணம்-புதுப்பித்தல் கட்டணம் அதிகளவில் உயர்த்தப்பட்டுள்ளது. இது கண்டனத்திற்குரியது. மின்சார வாகனத்தை வாங்குவதை அரசு நிர்பந்திப்பதற்காகவே இந்த முறையை ஏற்படுத்தியுள்ளது.

தமிழக அரசு ஒதுக்கிய நிதியில் கல்வி, சாலைவசதி உள்ளிட்ட பல்வேறு தேவைகளுக்காக கடந்த 2017-18ல் ஒதுக்கப்பட்ட நிதி முறையாக பயன்படுத்தாததால் 28ஆயிரம் கோடி ரூபாய் திரும்பியுள்ளது. இது அரசின் நிர்வாக திறமையில்லாததை காட்டுகிறது.

வேலூரில் 3-ம் தேதி மதசார்பற்ற கூட்டணி தலைவர்கள் ஒரே மேடையில் பிரச்சாரம் செய்ய உள்ளனர். அதிமுக கூட்டணியில் உள்ள பாரதிய ஜனதா கட்சியை பிரச்சாரத்திற்கு அக்கட்சியினர் அழைக்கவில்லை. ஏன் அழைக்கவில்லை?

சேலம்-சென்னை 8வழிச்சாலை திட்டத்தை விவசாயிகள் எதிர்ப்பதால் அத்திட்டத்தை தமிழகத்தில் அனுமதிக்கமாட்டோம். 100நாள் வேலை உறுதியளிப்பு திட்டத்தை பாதுகாக்கும் வகையில் நாகையில் ஆய்வு கூட்டம் நடத்தப்பட உள்ளது.

தமிழகத்தில் கொலை, கொள்ளை, ஆணவ படுகொலை சம்பவங்கள் அதிகரித்து வரும் நிலையில் இதனை தடுக்க எவ்வித நடவடிக்கையும் எடுக்கப்படவில்லை. பாலாற்றின் குறுக்கே ஆந்திர அரசு அணை கட்டுவதை உடனடியாக தடுக்க வேண்டும். இதற்கு நடவடிக்கை எடுக்காவிட்டால் வேலூர், காஞ்சிபுரம், திருவள்ளூர் மாவட்டங்கள் அதிகளவில் பாதிக்கப்படும்.

ஆகஸ்ட் 14,15,16 ம் தேதிகளில் தூத்துக்குடியில் இந்திய கம்யூனிஸ்ட் கட்சியின் தேசிய குழு கூட்டம் நடைபெறுகிறது. இதில் பல்வேறு முக்கிய முடிவுகள் எடுக்கப்படும். சேலம் உருக்காலையை தனியார் வசம் ஒப்படைக்கும் முடிவை அரசு கைவிட வேண்டும்.

இவ்வாறு அவர் கூறினார். 

சென்னிமலை:

சென்னிமலை அருகே மேலப்பாளையம் சரவணா நகரை சேர்ந்தவர் வெள்ளியங்கிரி (வயது 53) சலவைத் தொழிலாளி.

இவருக்கு பூபதி (வயது 30), கார்த்தி (வயது 25) மற்றும் செந்தில் குமார் (வயது 20) ஆகிய 3 மகன்கள் உள்ளனர். இதில் செந்தில்குமாருக்கு இன்னும் திருமணம் ஆகவில்லை. செந்தில் குமார் தனது தந்தைக்கு உதவியாக சலவைத் தொழிலில் ஈடுபட்டு வந்தார்.

இந்த நிலையில், செந்தில்குமார் நேற்று இரவு வெள்ளோடு ரோட்டில் சென்னிமலையை நோக்கி மோட்டார் சைக்கிளில் வந்து கொண்டிருந்தார்.

அப்போது குமராபுரி என்ற இடத்தில் சென்று கொண்டிருந்தபோது எதிரே வந்த பொக்லைன் இயந்திரம் செந்தில் குமார் சென்ற மோட்டார் சைக்கிள் மீது நேருக்கு நேர் மோதியது.

இதில் செந்தில்குமார் தூக்கி வீசப்பட்டு தலையில் பலத்த காயம் ஏற்பட்டு சம்பவ இடத்திலேயே பரிதாபமாக செந்தில்குமார் இறந்தார்.

தகவல் கிடைத்ததும் சென்னிமலை போலீசார் சம்பவ இடத்துக்கு வந்து செந்தில்குமாரின் உடலை கைப்பற்றி பெருந்துறை அரசு மருத்துவமனைக்கு பிரேத பரிசோதனைக்காக அனுப்பி வைத்தனர்.

பொக்லைன் எந்திரத்தை ஓட்டி வந்த டிரைவர் தப்பி ஓடி விட்டார். அவரை போலீசார் தேடி வருகிறார்கள்.

ஈரோடு:

ஈரோடு மாவட்டம் சோளங்காபாளையம் பாசூர் பகுதியை சேர்ந்த கோவிந்தன் மகன் ஹரிகிருஷ்ணன்(வயது 20). இவர் ஈரோட்டில் உள்ள தனியார் பொறியியல் கல்லூரியில் பி.இ. இரண்டம் ஆண்டு படித்து வந்தார்.

ஆனால், படிப்பு சரிவர வராததால், அதே கல்லூரியில் டிப்ளமோ முதலாம் ஆண்டு சேர்ந்து படித்து வந்தார். இந்நிலையில், கல்லூரி படிப்பு வராத மனவேதனையில் இருந்த ஹரிகிருஷ்ணன் கடந்த 25-ந் தேதி வீட்டில் இருந்தாராம். எலி மருந்து சாப்பிட்டு தற்கொலைக்கு முயன்றார். இதைப்பார்த்த அக்கம்பக்கத்தினர் அவரை மீட்டு ஈரோடு அரசு ஆஸ்பத்திரியில் சிகிச்சைக்கு சேர்த்தனர்.

பின்னர் மேல் சிகிச்சைக்காக சேலம் அரசு ஆஸ்பத்திரியில் சிகிச்சைக்கு ஹரி கிருஷ்ணன் அனுமதிக்கப்பட்டார்.

அங்கு அவருக்கு தீவிர சிகிச்சை அளிக்கப்பட்டு வந்தது. எனினும் சிகிச்சை பலனின்றி அவர் பரிதாபமாக இறந்தார். இதுதுகுறித்து மலையம்பாளையம் போலீசார் வழக்கு பதிவு செய்து விசாரணை நடத்தி வருகின்றன.

ஈரோடு:

ஈரோடு மாவட்டம் பவானி அருகே உள்ள குருப்பநாயக்கன் பாளையத்தைச் சேர்ந்தவர் சக்திவேல் (வயது47). இவர் பவானி அரசு மகளிர் மேல்நிலைப் பள்ளியில் தாவரவியல் ஆசிரியராக பணியாற்றி வந்தார்.

இவர் 11-ம் வகுப்பு பயிலும் மாணவிகளிடம் சில்மி‌ஷம் செய்ததாக புகார் எழுந்தது. இதுகுறித்து இரண்டு பிளஸ்-1 மாணவிகள் தங்களது பெற்றோர்களிடம் தெரிவித்தனர்.

இதைக்கேட்டு அதிர்ச்சி அடைந்த பெற்றோர்கள் பள்ளி தலைமை ஆசிரியரிடம் நேரில் சென்று புகார் தெரிவித்தனர். இதுகுறித்து விசாரித்து நடவடிக்கை எடுப்பதாக தெரிவிக்கப்பட்டது. ஆனால் புகார் கூறப்பட்ட ஆசிரியர் சக்திவேல் மீது உடனடியாக நடவடிக்கை எடுக்க வேண்டும். என வலியுறுத்தி மாணவிகளின் பெற்றோர் தலைமை ஆசிரியர் அறையில் தர்ணா போராட்டத்தில் ஈடுபட்டனர்.

இந்நிலையில் பள்ளி வளாகத்தில் இருந்து ஆசிரியர் சக்திவேல் நைசாக வெளியேறிவிட்டார். இதுகுறித்து பள்ளி நிர்வாகத்திடம் கேட்டபோது மாணவிகளின் புகாரைத் தொடர்ந்து ஆசிரியர் சக்திவேல் மலையம்பாளையம் அரசு மேல்நிலைப் பள்ளிக்கு இடமாற்றம் செய்யப்பட்டுள்ளதாக தெரிவித்தனர்.

இந்நிலையில் மாணவிகளின் பெற்றோர் ஆசிரியர் மீது நடவடிக்கை வலியுறுத்தி பவானி அனைத்து மகளிர் காவல் நிலையத்தில் புகார் அளித்தனர். அதன்பேரில் பவானி மகளிர் போலீசார் ஆசிரியர் சக்திவேல் மீது வழக்குபதிவு செய்தனர்.

இந்நிலையில் ஆசிரியர் சக்திவேல் மீது துறை ரீதியான நடவடிக்கை மேற்கொள்ளப்பட்டு அவர் தற்காலிகமாக பணியிடை நீக்கம் செய்யப்பட்டுள்ளதாக ஈரோடு முதன்மை மாவட்ட கல்வி அலுவலர் பாலமுரளி தெரிவித்தார். மேலும் அவர் மீது விசாரணை நடைபெற்று வருவதாகவும் தெரிவித்தார்.