ஈரோடு

ஈரோடு:

ஈரோடு அரசு ஆஸ்பத்திரி ரவுண்டானாவில் தோண்டப்பட்ட குழியால் வாகன ஓட்டிகள் அவதிப்பட்டனர். வாகன சிரமத்தை போக்க போக்குவரத்து இன்ஸ்பெக்டர் யாருடைய உதவியையும் எதிர்பாராமல் மம்பட்டியை எடுத்து களமிறங்கி குழியை மூடினார்.

ஈரோடு மாநகராட்சிக்குட்பட்ட பல்வேறு இடங்களில் குடிநீர் பைப் லைன் பதிக்கும் பணி, பாதாள மின் கேபிள் பதிக்க ரோடுகள் தோண்டப்பட்டுள்ளதால் குண்டும் குழியுமாக சாட்சி தருகிறது.

குண்டும் குழியுமான ரோட்டில் வாகனங்கள் செல்லும்போது, பறக்கும் புழுதிகளால் கடைகளில் அமர்ந்திருப்போர் பெரும் அவதிப்படுகின்றனர்.

இதேபோன்று போக்குவரத்து நெரிசல் மிகுந்த அரசு ஆஸ்பத்திரி ரவுண்டானா அருகே மேட்டூர் ரோட்டில் குழிகள் தோண்டப்பட்டு மூடப்பட்டாமல் உள்ளதால், வாகனங்கள் செல்ல முடியாமல் இருந்தது.

நேற்று மதியம் வடக்கு போக்குவரத்து இன்ஸ்பெக்டர் தனசேகரன், அங்கு பணியில் இருந்தார். நசியனூர் பகுதியில் இருந்து வாகனங்கள் குழி இருந்த பகுதியில் வர முடியாமல் சிரமப்பட்டன. திடீரென பணியில் இருந்த இன்ஸ்பெக்டர் தனசேகரன் யாருடைய உதவியையும் எதிர்பார்க்காமல் தாமாகவே முன் வந்து மம்பட்டியை எடுத்து குழியை மூடினார்.

அந்த வழியாக சென்றவர் இந்த காட்சியை பார்த்து ஆச்சரியமாக பார்த்தனர். குழியை சீரமைக்க போக்குவரத்து இன்ஸ்பெக்டர் நேரடியாக களமிறங்கி குழியை மூடியதை அங்கிருந்த சிலர் செல்போனில் படம் பிடித்து அதனை சமூக வலை தலங்களில் பரப்பிபினர்.

தற்போது அந்த வீடியோ சமூக வலைதளங்களில் வைரலாக பரவி வருகிறது பொதுமக்கள் அவரை பாராட்டி வருகின்றனர்.

கோபி:

ஈரோடு மாவட்டம், கோபி அடுத்த அவ்வையார் பாளையத்தை சேர்ந்தவர் விஜயகுமார் (வயது 37). ரிக்வண்டி லாரி டிரைவர் அதே ஊரை சேர்ந்தவர் மணிமோகன். விவசாயி.

சம்பவத்தன்று இரவு மணிமோகனும் அவரது மனைவி செல்வியும் வீட்டில் தூங்கி கொண்டிருந்தனர். அப்போது அங்கு வந்து விஜயகுமார் மணிமோகனின் மனைவியை தட்டி எழுப்பி தகாத முறையில் நடந்து கொண்டதாக கூறப்படுகிறது.

இதை கண்டு அதிர்ச்சி அடைந்த செல்வி சத்தம் போட்டார். உடனே சுதாரித்த விஜயகுமார் அங்கிருந்து தப்பி ஓடிவிட்டார். இதனால் ஆத்திரம் அடைந்த மணிமோகனும் அவரது நண்பர்களும் விஜயகுமாரை பல இடங்களில் தேடியும் கிடைக்கவில்லை.

இந்த நிலையில் நேற்று மதியம் 2 மணியளவில் அவ்வையார் பாளையம் பக்கம் வந்தார். இதை கண்ட மணிமோகன் மற்றும் 3 பேரும் சேர்ந்து விஜயகுமாரை பிடிக்க விரட்டினர். இதை கண்டு அவரும் ஓட்டம் பிடித்தார்.

சின்னகுளம்பிரிவு மாரியம்மன் கோவில் அருகே விஜயகுமாரை மணிமோகன் உள்பட 4 பேரும் சேர்ந்து பிடித்து சரமாரியாக தாக்கினர். இரும்பு கம்பி மற்றும் பிளாஸ்டிக் தடியால் அடித்தனர்.

இதில் நிலை குலைந்து கீழே விழுந்த விஜயகுமார் வாயில் அவர்கள் வி‌ஷத்தை ஊற்றினர். அத்துடன் விடாமல் மேலும் விஜயகுமார் வந்த மோட்டார் சைக்கிளால் அவரது கழுத்தில் ஏற்றினர். இதில் சிறிது நேரத்தில் விஜயகுமார் சம்பவ இடத்திலேயே பரிதாபமாக இறந்தார். பிறகு அனைவரும் தப்பி ஓடிவிட்டனர்.

அக்கம் பக்கத்தினர் விஜயகுமார் இறந்து கிடந்த இடத்தை கண்டு கோபி போலீசாருக்கு தகவல் கொடுத்தனர்.

உடனடியாக சம்பவ இடத்துக்கு விரைந்து வந்த போலீசார் இறந்து கிடந்த விஜயகுமார் உடலை மீட்டு கோபி அரசு ஆஸ்பத்திரிக்கு அனுப்பி வைத்து விசாரணை நடத்தி வருகிறார்கள்.

இந்த கொடூர கொலையில் தலைமறைவாக உள்ள மணிமோகன் மற்றும் சதிஸ்குமார் பூபதிராஜா, நாகராஜ்ஆகிய 4 பேரை போலீசார் வலைவீசி தேடி வருகிறார்கள்.

இந்த சம்பவம் அப்பகுதியில் பெரும் பரபரப்பை ஏற்படுத்தி உள்ளது. 

டி.என்.பாளையம்:

டி.என்.பாளையம் அடுத்த கணக்கம்பாளையம், சின்னகாளியூர் சேர்ந்தவர் ரஞ்சித் (எ)தங்கராஜ் (வயது30). மெக்கானிக் கடை வைத்துள்ளார். அதே பகுதியைச் சேர்ந்தவர் ரமேஷ் (35). தங்கராஜ், ரமேஷ் இருவரும் நண்பர்கள்.

இன்று அதிகாலை 3 மணி அளவில் தங்கராஜிம், ராமேசும் மோட்டார் சைக்கிளில் கணக்கம் பாளையத்திலிருந்து கள்ளிப்பட்டி செல்வதற்காக பவானி-சக்தி ரோட்டில் வந்துகொண்டிருந்தனர்.

கணக்கம்பட்டி அருகே பழைய பிரபு குமார் தியேட்டர் அருகே வந்தபோது மோட்டர் சைக்கிள் நிலைதடுமாறி சாலையோரம் இருந்த மின் கம்பத்தில் மோதியது.

இதில் தங்கராஜிக்கும், ரமேசுக்கும் பலத்த காயம் ஏற்பட்டு உயிருக்காக போராடினர். அந்த வழியாக வந்தவர்கள் இதுகுறித்து 108 ஆம்புலன்சுக்கு தகவல் தெரிவித்தனர்.

ஆம்புலன்ஸ் ஊழியர்கள் சம்பவ இடத்துக்கு விரைந்து வந்து இருவரையும் மீட்டு சிகிச்சைக்காக கோபி அரசு ஆஸ்பத்திரிக்கு கொண்டு சென்றனர். ஆனால் வரும் வழியிலேயே ரமேஷ் இறந்துவிட்டார். தங்கராஜிக்கு தொடர்ந்து சிகிச்சை அளிக்கப்பட்டு வந்தது. எனினும் சிகிச்சை பலனின்றி தங்கராஜ் பரிதாபமாக இறந்தார்.

இந்த விபத்து குறித்து பங்களாபுதூர் போலீசார் வழக்கு பதிவு செய்து விசாரணை மேற்கொண்டு வருகின்றனர்.

ஈரோடு:

ஈரோடு மாநகர் மாவட்ட காங்கிரஸ் தலைவர் ஈ.பி.ரவி தலைமையிலான காங். நிர்வாகிகள் இன்று ஈரோடு எஸ்.பி. அலுவலகத்திற்கு வந்து எஸ்.பி. சக்திகணேசனை சந்தித்து மனு கொடுத்தனர். அதில் அவர்கள் கூறியிருப்பதாவது:-

காங்கிரஸ் கட்சியின் தலைவராக 19 ஆண்டுகளாக பதவி வகித்து வருபவரும், 22 ஆண்டுகளாக மக்களவை உறுப்பினராக பணியாற்றி வருபவருமான, சோனியா காந்தி பற்றியும் காங்கிரஸ் கட்சியின் தலைவராகவும் 10 ஆண்டுகளுக்கு மேலாக மக்களவை உறுப்பினராகவும் இருக்கும் ராகுல் காந்தி பற்றியும் அவர்கள் குடி உரிமை பற்றியும் தமிழக அமைச்சர் ராஜேந்திர பாலாஜி கடந்த 18-ந் தேதி தனியார் தொலைக்காட்சிக்கு அளித்த பேட்டியில் சர்ச்சைக்குரிய வகையில் கருத்து வெளியிட்டிருந்தார்.

அமைச்சரின் பேட்டியானது காங்கிரஸ் கட்சியின் கோடிக்கணக்கான தொண்டர்கள் கொதிப்படைய செய்துள்ளது.

எனவே அமைச்சர் ராஜேந்திர பாலாஜி மீது காவல்துறையினர் உரிய நடவடிக்கை எடுக்க வேண்டும். இவ்வாறு அந்த மனுவில் கூறியிருந்தார். முன்னாள் தலைவர் ராஜேந்திரன், விவசாய பிரிவு பெரியசாமி, மண்டல தலைவர் திருச்செல்வம், எஸ்.டி பிரிவு சின்னசாமி, முன்னாள் கவுன்சிலர் விஜயபாஸ்கர் பாபு என்கிற வெங்கடாச்சலம் மாவட்ட பொதுச் செயலாளர்கள் கனகராஜ் வின்சென்ட் கண்ணப்பன் சிறுபான்மை பிரிவு துணைத் தலைவர் பாட்சா உள்பட பல்வேறு நிர்வாகிகளும் உடன் இருந்தனர்.

ஈரோடு:

மத்திய அரசின் புதிய கல்வி கொள்கையை எதிர்த்து விடுதலை சிறுத்தைகள் கட்சியினர் விழிபுணர்வு பிரச்சாரம் பவானி நகரம் ஒன்றிய பகுதி மற்றும் இருபதுக்கும் மேற்பட்ட கிராமங்களில் ஈரோடு வடக்கு மாவட்ட விடுதலைச் சிறுத்தைகள் கட்சி மாவட்ட செயலாளர் சிறுத்தை வள்ளுவன் தலைமையில் நடைபெற்றது.

பிரச்சார பயணத்தில் மத்திய அரசின் புதிய கல்விக் கொள்கையால் ஏழை எளிய மாணவர்களுக்கு ஏற்படும் பாதிப்புகள் குறித்தும் அதனால் ஏற்படும் விளைவுகள் குறித்தும் பொதுமக்களிடையே துண்டுப்பிரசுரம் வழங்கி விழிப்புணர்வு ஏற்படுத்தப்பட்டது.

குறிப்பாக 5, 8 -ம் வகுப்பு பயிலும் குழந்தைகளுக்கு பொதுத்தேர்வு வந்தால் ஏழை குழந்தைகளின் படிப்பு பாதிக்கப்படும் என பிரச்சாரத்தில், மாநில கொள்கை பரப்பு துணைச் செயலாளர் அமுதன் துரையரசன், கோவை மாணிக்கம் ஆகியோர் பொதுமக்களுக்கு துண்டு பிரசுரம் வழங்கி விழிப்புணர்வு ஏற்படுத்தினர்கள்.

இந்நிகழ்ச்சியில் பவானி ஒன்றிய செயலாளர் பால்ராஜ் . பேரூர் செயலாளர் வேலு, அந்தியூர் ஒன்றிய செயலாளர் தங்கராஜ், ஈரோடு மேற்கு தொகுதி செயலாளர் .சண்முகம், துணைச் செயலாளர் கே.கே.மூர்த்தி, வணிகர் அணி அமைப்பாளர் சக்தி வேந்தன், .மாநில துணைச்செயலாளர் குருநாதன் உள்பட நிர்வாகிகள் கலந்து கொண்டனர்.

ஈரோடு:

ஈரோடு மாவட்டத்தில் கடந்த சில நாட்களாக மாலை மற்றும் இரவு நேரங்களில் மழை பெய்து வந்தது.

இதைத்தொடர்ந்து நேற்று மாலை ஈரோட்டில் மேக மூட்டத்துடன் காணப்பட்டது. இதை அடுத்து மழை பெய்ய தொடங்கியது. நேற்று மாலை தொடங்கிய மழை இரவு வரை கொட்டி தீர்த்தது. ஒரு சில இடங்களில் சாரல் மழையும், ஒரு சில இடங்களில் பலத்த மழையும் கொட்டியது.

மேலும் மாவட்டத்தில் கோபி, சத்தியமங்கலம், பவானி, பெருந்துறை, கவுந்தபாடி உள்பட பல்வேறு இடங்களில் பலத்த மழை பெய்தது. இதனால் நிலத்தடி நீர் மட்டம் கூடி வருகிறது. இதனால் விவசாயிகள் மகிழ்ச்சி அடைந்தனர்.

மழையையொட்டி ஈரோடு கொல்லம் பாளையம், ஆணைக்கல் பாளையம், 46 புதூர், சோலார், லக்காபுரம் உள்பட பல்வேறு இடங்களில் மின்சாரம் தடைபட்டது. இதனால் பொதுமக்கள் அவதிப்பட்டனர்.

கவுந்தப்பாடி சுற்று வட்டாரத்தில் இடியுடன் கூடிய கனமழை பெய்தது. மழைவெள்ளம் ஆறாக சாலையில் ஓடியது. கடந்த ஒருவாரமாக கவுந்தப்பாடி சுற்றுவட்டாரத்தில் விட்டு விட்டு மழை பெய்து வந்தது.

இரவு நேரங்களில் விடிய விடிய சாரல் மழை பெய்தது. கீழ்பவானி பாசனத்திட்டத்தில் விவசாயிகள் நாற்றங்கள் அமைத்து விதை நெல் விட்டு வருகிறார்கள். தொடர்ந்து பெய்து வரும் மழையால் விவசாயிகள் உழவு போடும் பணிகளில் தீவிரம் காட்டி வருகிறார்கள்.

வயலை பதப்படுத்தி வரப்பமைத்து நாற்று நடுவதற்கு ஏற்ற வகையில் அமைக்கும் பணி நடந்து வருகிறது. மழையால் இந்த பணிகளை செய்ய ஏற்றதாயுள்ளது.

கவுந்தப்பாடியில் கொட்டிதீர்த்த மழையால் மழைவெள்ளம் ஆறாக சாலையின் இருபுறத்தையும் தொட்ட படி மழை வெள்ளம் சென்றது. வாகனங்கள் மழை வெள்ளத்தில் மிதந்து சென்றது. இருசக்கர வாகனங்கள் மழை நீரில் சென்றதால் மழை தண்ணீர் எஞ்ஜனில் புகுந்ததால் பழுதாகி நின்றது.

இரு சக்கர வாகனங்களை ஓட்டிவந்தவர்கள் மழைநீரில் வண்டியை தள்ளிக்கொண்டு சென்றனர். இதனால் 2 மணிநேரம் மின்தடை ஏற்றபட்டது. மழைக்கு பின் குளிந்த காற்று வீசியது.

ஈரோடு மாவட்டத்தில் நேற்று பெய்த மழை அளவு மி.மீட்டரில் வருமாறு:-

ஈரோடு-36

பவானி-16.2

கொடுமுடி-15.8

கவுந்தப்பாடி-75.2

எலந்தகுட்டைமேடு-33.2

கொடிவேரி-31.2

வரட்டுபள்ளம்-4.2

குண்டேரிபள்ளம்-3