விராட் கோலி தலைமையிலான இந்திய கிரிக்கெட் அணி இங்கிலாந்தில் சுற்றுப்பயணம் மேற்கொண்டு 5 போட்டிகள் கொண்ட டெஸ்ட் தொடரில் பங்கேற்றுள்ளது. இந்த தொடரில் இங்கிலாந்து 2 - 1 என்ற கணக்கில் முன்னிலை வகிக்கிறது.
சவுத்தாம்டனில் உள்ள ரோஸ் பவுல் ஸ்டேடியத்தில் 4-வது டெஸ்ட் போட்டி நடைபெற்று வருகிறது. டாஸ் வென்ற இங்கிலாந்து அணி முதல் இன்னிங்சில் 76.4 ஓவரில் 246 ரன்களுக்கு ஆல் அவுட் ஆனது. இந்தியா சார்பில், பும்ரா 3 விக்கெட்டும், ஷமி, இஷாந்த் சர்மா, அஷ்வின் ஆகியோர் தலா 2 விக்கெட்டுக்களையும் வீழ்த்தினர்.
இதையடுத்து, இந்தியா தனது முதல் இன்னிங்சை தொடங்கியது. புஜாராவின் சிறப்பாக சதத்தால் இந்தியா முதல் இன்னிங்சில் 273 ரன்களுக்கு ஆல் அவுட்டாகி, இங்கிலாந்தை விட 27 ரன்கள் முன்னிலை பெற்றது. இங்கிலாந்து சார்பில் மொயின் அலி 5 விக்கெட்டும், பிராடு 3 விக்கெட்டும் வீழ்த்தினர்.
இதைத்தொடர்ந்து, இங்கிலாந்து அணி இரண்டாவது இன்னிங்சில் விளையாடி வருகிறது. நேற்று மூன்றாம் நாள் ஆட்டநேர முடிவில் அந்த அணி 8 விக்கெட் இழப்புக்கு 260 ரன்கள் எடுத்து 233 ரன்கள் முன்னிலை பெற்றுள்ளது.
இந்நிலையில், இந்தியாவின் முதல் இன்னிங்சில் விக்கெட் கீப்பர் பேட்ஸ்மேன் ரிஷாப் பாந்த் 5-வது விக்கெட் ஆக களமிறங்கினார். ரன் எடுப்பதை விட விக்கெட்டை தற்காத்துக்கொள்ள வேண்டும் என்ற நிலை இருந்ததால், அவர் மெதுவாகவே பந்துகளை சந்தித்தார். ரன்கள் எடுக்க முயற்சிக்கவில்லை.
29 பந்துகள் சந்தித்த பாந்த் மொயின் அலி பந்தில் அவுட் ஆனார். 29 பந்துகள் சந்தித்து டக் அவுட் ஆன பாந்த் இர்பான் பதான், ரெய்னா உடன் இணைந்துள்ளார். கடந்த 2005-ம் ஆண்டு பாகிஸ்தானுக்கு எதிரான டெஸ்டில் பதான் 29 பந்துகள் சந்தித்து டக் அவுட் ஆனார். 2011-ம் ஆண்டு இங்கிலாந்துக்கு எதிரான டெஸ்டில் ரெய்னா 29 பந்துகள் சந்தித்து டக் அவுட் ஆனார். மேற்கண்ட இரு போட்டிகளிலுமே இந்திய அணி தோல்வியை சந்தித்தது.
மேலும், ஒரு சுவாரஸ்யம் என்னவென்றால் பதான், ரெய்னா, பாந்த் ஆகிய மூவருமே இடக்கை பேட்ஸ்மேன்கள். மூவருமே சுழற்பந்து வீச்சாளர்களிடம் விக்கெட்டுகளை பறிகொடுத்துள்ளனர் என்பது குறிப்பிடத்தக்கது.
