நீங்கள் தேடியது "Lokayukta"

சென்னை:

தமிழக சட்டசபையில் கடந்த மார்ச் மாதம் 2018-2019-ம் ஆண்டுக்கான பட்ஜெட் தாக்கல் செய்யப்பட்ட நிலையில், மே மாதம் 29-ந் தேதி முதல் துறை வாரியாக மானிய கோரிக்கை விவாதம் நடைபெற்று வருகிறது.

இந்நிலையில், கூட்டத் தொடரின் கடைசி நாளான இன்று வழக்கம் போல் காலை 10 மணிக்கு சபை கூடியது. கேள்வி நேரம் முடிந்ததும், 110-வது விதியின் கீழ் முதலமைச்சர் அறிவிப்புகளை வெளியிட்டு பேசினார்.

அவர் உரையாற்றி முடிந்ததும் ஊழலுக்கு எதிரான லோக் ஆயுக்தா சட்ட மசோதாவை அமைச்சர் ஜெயக்குமார் தாக்கல் செய்து பேசினார். அப்போது சட்டத்தின் முக்கிய அம்சங்கள் குறித்து அவர் விளக்கினார். இதையடுத்து சட்ட மசோதா மீது விவாதம் நடைபெறுகிறது.

ஊழலுக்கு எதிரான மசோதா இது என்பதால், எதிர்க்கட்சிகளும் இந்த மசோதாவை ஆதரிக்கும் என்பதால் மசோதா ஒருமனதாக நிறைவேற்றப்படும் என எதிர்பார்க்கப்படுகிறது. #LokayuktaBill 

சென்னை:

தமிழக சட்டசபையில் கடந்த மார்ச் மாதம் 2018-2019-ம் ஆண்டுக்கான பட்ஜெட் தாக்கல் செய்யப்பட்ட நிலையில், மே மாதம் 29-ந் தேதி முதல் துறை வாரியாக மானிய கோரிக்கை விவாதம் நடைபெற்று வருகிறது. இதுவரை 22 நாட்கள் நடைபெற்ற சட்டசபை கூட்டம் இன்று (திங்கட்கிழமை) நிறைவடைகிறது.

இன்றைய கூட்டம் வழக்கம் போல் காலை 10 மணிக்கு கேள்வி நேரத்துடன் தொடங்குகிறது. கேள்வி நேரம் முடிந்ததும், ஊழலுக்கு எதிரான லோக் அயுக்தா சட்ட மசோதாவை சட்டத்துறை அமைச்சர் சி.வி.சண்முகம் தாக்கல் செய்கிறார். அதனைத் தொடர்ந்து, இந்த சட்ட மசோதா மீது விவாதம் நடைபெறுகிறது.

ஊழலுக்கு எதிரான மசோதா இது என்பதால், எதிர்க்கட்சிகளும் இந்த மசோதாவை ஆதரிக்க இருக்கிறது. எதிர்க்கட்சி தலைவர் மு.க.ஸ்டாலின், காங்கிரஸ் தலைவர் கே.ஆர்.ராமசாமி உள்ளிட்டோர் இந்த மசோதாவை ஆதரித்து பேச இருப்பதாக கூறப்படுகிறது. அதனைத் தொடர்ந்து, மசோதா ஒருமனதாக நிறைவேற்றப்பட உள்ளது.

அதன்பிறகு, கடந்த 5-ந் தேதி விவாதத்திற்கு எடுத்துக்கொள்ளப்பட்ட பொதுத்துறை, மாநில சட்டமன்றம், வீட்டுவசதி மற்றும் நகர்ப்புற வளர்ச்சித்துறை, ஆளுநர் மற்றும் அமைச்சரவை, நிதித்துறை, திட்டம், வளர்ச்சி மற்றும் சிறப்பு முயற்சிகள் துறை, ஓய்வூதியங்களும், ஏனைய ஓய்வுக்கால நன்மைகளும், பணியாளர் மற்றும் நிர்வாக சீர்திருத்தத் துறை மீதான பதிலுரை இடம்பெறுகிறது. துணை முதல்-அமைச்சர் ஓ.பன்னீர்செல்வம், பணியாளர் மற்றும் நிர்வாக சீர்திருத்தத் துறை அமைச்சர் டி.ஜெயக்குமார் ஆகியோர் பதிலளித்து பேசுகின்றனர். இறுதியாக, துறை சார்ந்த புதிய அறிவிப்புகளையும் அவர்கள் வெளியிட இருக்கின்றனர்.

இன்றைய சட்டமன்ற நிகழ்வுகளில், லோக் அயுக்தா சட்ட மசோதா நிறைவேற்றப்படுவது முக்கியத்துவம் வாய்ந்ததாக கருதப்படுகிறது. ஏற்கனவே, கடந்த 2013-ம் ஆண்டு பாராளுமன்றத்தில் லோக்பால் மற்றும் லோக் அயுக்தா சட்டங்கள் நிறைவேற்றப்பட்டன. 2014-ம் ஆண்டு நடைமுறைக்கும் வந்தது. இதுவரை, லோக் அயுக்தா விசாரணை மன்றம், மராட்டியம், பீகார், ராஜஸ்தான், உத்தரபிரதேசம், மத்தியபிரதேசம், ஆந்திரா, இமாச்சலபிரதேசம், கர்நாடகா, அசாம், குஜராத், கேரளா, பஞ்சாப், டெல்லி, அரியானா, ஒடிசா ஆகிய 15 மாநிலங்களில் ஏற்படுத்தப்பட்டுள்ளது.

தமிழ்நாடு, தெலுங்கானா, அருணாசல பிரதேசம், திரிபுரா, புதுச்சேரி உள்ளிட்ட மாநிலங்களில் அமைக்கப்படவில்லை.

இந்த நிலையில், சுப்ரீம் கோர்ட்டில் தொடரப்பட்ட ஊழல் வழக்கு ஒன்றில் நீதிபதிகள், “ஊழல் புகார்களை விசாரிக்கும் லோக் அயுக்தாவை தமிழ்நாட்டில் அமைக்காதது ஏன்?. லோக் அயுக்தா அமைப்பை ஏற்படுத்துவதற்கான நடவடிக்கைகள் குறித்து ஜூலை 10-ந் தேதிக்குள் (அதாவது நாளை) அறிக்கை தாக்கல் செய்ய வேண்டும்” என்று உத்தரவு பிறப்பித்துள்ளனர்.

அதன் அடிப்படையில்தான் 16-வது மாநிலமாக தமிழகத்தில் லோக் அயுக்தா சட்டம் நிறைவேற்றப்படுகிறது என்பது குறிப்பிடத்தக்கது.  #TNAssembly #Lokayukta

சென்னை:

பா.ம.க. நிறுவனர் டாக்டர் ராமதாஸ் வெளியிட்டுள்ள அறிக்கையில் கூறியிருப்பதாவது:-

தமிழ்நாட்டில் ஊழலை ஒழிப்பதற்கான ஆயுதங்களில் முக்கியமானதாக கருதப்படும் லோக் ஆயுக்தா அமைப்பு உருவாக்கப்படுவதற்கான அறிகுறிகள் தென்படத் தொடங்கியுள்ளன. தமிழக சட்டப்பேரவையின் நடப்புக் கூட்டத்தொடரிலேயே இதற்கான சட்டமுன்வரைவை நிறைவேற்ற அரசு முடிவு செய்துள்ளதாக செய்திகள் வெளியாகியுள்ளன. இது தாமதமான நடவடிக்கை என்றாலும் வரவேற்கத்தக்கது ஆகும்.

லோக் ஆயுக்தா அமைப்பை உருவாக்குவதற்காக சட்ட முன்வரைவை தாக்கல் செய்து நிறைவேற்ற தமிழக அரசு முன்வந்திருப்பதற்கு காரணம், அரசு நிர்வாகத்தில் ஊழலை ஒழிக்க வேண்டும் என்ற அக்கறை அல்ல. தமிழகம், புதுவை உள்ளிட்ட 12 மாநிலங்கள் மற்றும் யூனியன் பிரதேசங்களில் இன்னும் லோக் அயுக்தா அமைப்பு ஏற்படுத்தாததற்காக கடந்த ஏப்ரல் மாதம் கண்டனம் தெரிவித்த உச்சநீதிமன்றம், அம்மாநிலங்களில் ஜூலை 10ஆம் தேதிக்குள் லோக் அயுக்தாவை அமைக்க ஏற்படுத்த வேண்டும் என்று ஆணையிட்டதால் தான் வேறுவழியின்றி இத்தகைய நிலைக்கு பினாமி அரசு தள்ளப்பட்டுள்ளது.

மராட்டிய லோக் அயுக்தா தான் எதற்கும் பயன்படாத பலவீனமான அமைப்பு ஆகும். தமிழகத்தில் அமைக்கப்படவிருக்கும் லோக் அயுக்தா கர்நாடகத்தில் இருப்பதை விட கூடுதல் அதிகாரங்களைக் கொண்டதாக இருக்க வேண்டுமே தவிர, மராட்டியத்தில் இருப்பதை விட பலவீனமானதாக இருந்து விடக் கூடாது. இதை அரசு கவனத்தில் கொள்ள வேண்டும்.

கர்நாடகத்தில் இருப்பதைப் போலவே முதல்- அமைச்சர், அமைச்சர்கள், சட்டமன்ற உறுப்பினர்கள், உள்ளாட்சி அமைப்புகளின் தலைவர்கள், துணைத் தலைவர்கள், சட்டப்பூர்வ அமைப்புகளின் தலைவர்கள், கூட்டுறவு சங்கத் தலைவர்கள், பல்கலைக்கழக பணியாளர்கள், அனைத்து அரசு ஊழியர்கள் ஆகியோர் லோக் அயுக்தாவின் அதிகார வரம்புக்குள் கொண்டு வரப்பட வேண்டும்.

அதுமட்டுமின்றி, தமிழ்நாடு லோக் அயுக்தாவுக்கு ஊழல் புகார்கள் குறித்து விசாரிக்கும் அதிகாரம் வழங்கப்பட வேண்டும். இவற்றுக்கெல்லாம் மேலாக லோக் அயுக்தாவாக நியமிக்கப்படுவர்கள் அப்பழுக்கற்ற பின்னணி கொண்ட, தமிழகத்தைச் சேர்ந்த ஓய்வு பெற்ற உச்சநீதிமன்ற நீதிபதியாகவோ, உயர்நீதிமன்றத் தலைமை நீதிபதியாகவோ இருக்கும் வகையில் சட்ட முன்வரைவு தயாரிக்கப்பட வேண்டும்.

மாறாக, ஊழல்வாதிகள் தப்பிக்க வசதியாக வலுவற்ற லோக் அயுக்தா அமைக்கப்பட்டால் அதைக் கண்டித்து பா.ம.க. போராட்டம் நடத்தும்.

இவ்வாறு அவர் கூறியுள்ளார்.

2016-ஆம் ஆண்டுக்கான சட்டமன்றத் தேர்தலில் வெற்றி பெற்றால் லோக் அயுக்தா அமைப்பு உருவாக்கப்படும் என்று முதன் முதலில் தேர்தல் அறிக்கையில் வாக்குறுதி அளித்தது பாட்டாளி மக்கள் கட்சி மட்டுமே. அ.தி.மு.க.வும் அதன் தேர்தல் அறிக்கையில் அதே வாக்குறுதியை அளித்திருந்தாலும், ஊழல் ஒழிப்பை விட ஊழல் செய்வதில் தான் பினாமி ஆட்சியாளர்களுக்கு நம்பிக்கை அதிகம் என்பதால், புதிய அரசு பதவியேற்று இரண்டு ஆண்டுகளுக்கு மேலாகியும் லோக் அயுக்தாவை அமைக்க எந்த நடவடிக்கை மேற்கொள்ளவில்லை.

தமிழகத்தில் லோக் அயுக்தா அமைப்பை உருவாக்க வேண்டுமென்பதற்காக பாட்டாளி மக்கள் கட்சி நடத்திய போராட்டங்களும், முன்னெடுப்புகளும் ஈடு இணையற்றவை. மதுரையில் கடந்த ஆண்டு திசம்பர் 30ஆம் தேதி நடைபெற்ற பாட்டாளி மக்கள் கட்சியின் புத்தாண்டு சிறப்புப் பொதுக் குழு கூட்டத்தில் 2018ஆம் ஆண்டை ஊழல் எதிர்ப்பு ஆண்டாக கடை பிடிக்கவும், லோக் அயுக்தா மற்றும் பொதுச் சேவை பெறும் உரிமைச் சட்டத்தை நிறைவேற்ற வலியுறுத்தியும் தீர்மானம் நிறைவேற்றப்பட்டது.

அதன்படி 2018ஆம் ஆண்டில் பா.ம.க. சார்பில் நான் வெளியிட்ட முதல் அறிக்கையும், எனது தலைமையில் நடத்தப்பட்ட முதல் போராட்டமும் லோக் அயுக்தா சட்டமுன்வரைவை நிறைவேற்ற பேரவையின் சிறப்புக் கூட்டத்தை கூட்ட வேண்டும் என்று வலியுறுத்தி தான் என்பது குறிப்பிடத்தக்கது. அந்த வகையில் இப்போது லோக்அயுக்தா சட்ட முன்வரைவு தாக்கல் செய்யப்படுவது பா.ம.க.வுக்கு கிடைத்த வெற்றியாகும். #Lokayukta #Ramadoss