கர்நாடகா மாநிலத்தில் இருந்து மாநிலங்களவை எம்.பி.யாக தேர்வு செய்யப்பட்ட ராஜீவ் கவுடா, பி.கே. ஹரிபிரசாத் (இருவரும் காங்கிரஸ் கட்சி), பிரபாகர் கோர் (பா.ஜனதா), டி. குபேந்த்ரா ரெட்டி (ஜே.டி.எஸ்.) ஆகியோரின் பதவிக்காலம் வருகிற 25-ந்தேதியுடன் முடிவடைகிறது.
இதனால் வருகிற 19-ந்தேதி தேர்தல் நடைபெற இருக்கிறது. வருகிற 9-ந்தேதி வேட்புமனு தாக்கல் செய்யப்படுகிறது. இந்நிலையில் மல்லிகார்ஜுன் கார்கே காங்கிரஸ் சார்பில் போட்டியிடுவார் என்று காங்கிரஸ் தலைமை தெரிவித்துள்ளது.
காங்கிரஸ் கட்சிக்கு 68 எம்.எல்.ஏ.-க்கள் இருக்கின்றனர். இதனால் நான்கு இடங்களில் ஒன்றை எளிதாக வென்றுவிடும். இதனால் மல்லிகார்ஜுன் கார்கே வெற்றி உறுதியாகியுள்ளது.
பாராளுமன்ற தேர்தலில் 77 வயதாகும் மல்லிகார்ஜுன் கார்கே 95,452 வாக்குகள் வித்தியாசத்தில் பா.ஜனதா வேட்பாளர் உமேஷ் ஜாதவிடம் தோல்வியடைந்தார்.
9 முறை எம்.எல்.ஏ.-வாகவும், இரண்டு முறை மக்களவை எம்.பி.யாகவும் இருந்துள்ளார். காங்கிரஸ் தலைமையிலான மத்திய அமைச்சரவையில் ரெயில்வே மந்திரியாக இருந்துள்ளார்.
மாநில அளவிலும் பலமுறை மந்திரியாக இருந்துள்ளார். கர்நாடக மாநில காங்கிரஸ் கட்சி தலைவராகவும், சட்டசபை எதிர்க்கட்சி தலைவராகவும் இருந்துள்ளார்.
