நாகப்பட்டினம்

வேதாரண்யம்:

நாகை மாவட்டம் வேதாரண்யத்தை அடுத்த தோப்புத்துறையை சேர்ந்தவர் மன்சூர் (வயது40). ஜவுளி கடை உரிமையாளர். இவரும், அதே பகுதியை சேர்ந்தவர் முகமது யூசுப் (22) என்பவரும் நேற்று மதியம் அந்த பகுதியில் உள்ள ஒரு பெட்ரோல் விற்பனை நிலையத்துக்கு சென்று மோட்டார் சைக்கிளுக்கு பெட்ரோல் போட்டுள்ளனர்.

இதற்கு அவர்கள் 2 ஆயிரம் ரூபாய் நோட்டை கொடுத்து சில்லறையை வாங்கி சென்றுள்ளனர். பின்னர் அவர்கள் மீண்டும் அந்த பெட்ரோல் விற்பனை நிலையத்துக்கு வந்து மற்றொரு 2 ஆயிரம் ரூபாய் நோட்டை கொடுத்து சில்லறை கேட்டுள்ளனர். அப்போது அந்த நோட்டை வாங்கி பார்த்து போது கள்ளநோட்டு போல் இருந்ததால் சந்தேகம் அடைந்த பெட்ரோல் விற்பனை நிலைய காசாளர் டேனியல் பிரபாகரன் போலீசாருக்கு தகவல் தெரிவித்தார்.

அதன்பேரில் வேதாரண்யம் துணை போலீஸ் சூப்பிரண்டு பாலு, இன்ஸ்பெக்டர்கள் அருணாச்சலம், ராஜசேகரன் மற்றும் போலீசார் சம்பவ இடத்துக்கு விரைந்து சென்று அவர்கள் 2 பேரையும் பிடித்தனர்.

பின்னர் அவர்களிடம் இருந்த ஒரு 2 ஆயிரம் ரூபாய் நோட்டையும், மோட்டார் சைக்கிளுக்கு பெட்ரோல் போட்டதற்காக கொடுத்த நோட்டு மற்றும் சில்லறை மாற்ற கொடுத்த நோட்டு என மொத்தம் மூன்று 2 ஆயிரம் ரூபாய் நோட்டுகளை பறிமுதல் செய்து ஆய்வு செய்தனர். இதில் 3 நோட்டுகளும் கள்ளநோட்டுகள் என்பது தெரியவந்தது.

இதை தொடர்ந்து மன்சூர், முகமதுயூசுப் ஆகிய 2 பேரிடம் போலீசார் விசாரணை நடத்தினர். இதில் அவர்கள் அந்த பகுதியில் உள்ள ஒரு டாஸ்மாக்கடையில் இரண்டு 2 ஆயிரம் ரூபாய் நோட்டுகளை கொடுத்து சில்லறை மாற்றியது தெரியவந்தது.

இதையடுத்து போலீசார் அந்த டாஸ்மாக்கடைக்கு சென்று அவர்கள் கொடுத்த 2 ஆயிரம் ரூபாய் நோட்டுகளை பறிமுதல் செய்து ஆய்வு செய்த போது அவையும் கள்ள நோட்டுகள் என்பதும் தெரியவந்தது.

இதுகுறித்து வேதாரண்யம் போலீசார் வழக்குப்பதிவு செய்து மன்சூர், முகமதுயூசுப் ஆகிய 2 பேரையும் கைது செய்து அவர்களை வேதாரண்யம் கோர்ட்டில் ஆஜர்படுத்தினர்.

வேதாரண்யம், மே. 10-

வேதாரண்யத்தில் மின்னல் தாக்கி மீனவர் பலியானார்.

நாகை மாவட்டம் வேதாரண்யம் நகராட்சி ஆறுகாட்டுத்துறை பகுதியில் நேற்று பலத்த மின்னலுடன் லேசான மழை பெய்தது.

அப்போது அதே பகுதியை சேர்ந்த மீனவர் முருகன் (38) தனது படகை கடற்கரையில் ஓரமாக நிறுத்த சென்றார். அவரை மின்னல் தாக்கியது. அவர் படகில் இறந்தார்.

வேதாரண்யம் கடலோர காவல் குழுமத்தினர் முருகன் உடலை மீட்டு வேதாரண்யம் அரசு ஆஸ்பத்திரிக்கு பிரேத பரிசோதனைக்காக அனுப்பி வைத்தனர்.

மின்னல் தாக்கி பலியான முருகனுக்கு மனைவி, 2 மகள்கள், ஒரு மகன் உள்ளனர்.

தஞ்சை மற்றும் சுற்றுப் புற பகுதிகளிலும் நேற்று நள்ளிரவு மழை பெய்தது. தஞ்சை அருகே உள்ள பூதலூர், செங்கிப்பட்டி பகுதியிலும் மழை பெய்தது.இதனால் பூதலூர் கீழ் பாலம், நடுத்தெருவில் தண்ணீர் தேங்கி நின்றது.இதே போல் மாவட்டத்தின் மற்ற பகுதிகளிலும், திருவாரூர் மாவட்டத்திலும் மழை பெய்தது.

இந்த மழை அக்னி நட்சத்திர வெயிலில் தவித்த மக்களுக்கு சற்று ஆறுதல் அளிப்பதாக இருந்தது.

வேதாரண்யம்:

வேதாரண்யத்தை அடுத்த கத்தரிப்புலம் தெற்குகுத்தகை பகுதியை சேர்ந்தவர் மதியழகன். இவர் மலேசியாவில் வேலை பார்த்து வருகிறார். இவரது மகள் சசிலாமேரி (வயது 20) இவர் வேதாரண்யம் தணியார் கல்லூரியில் பட்டப்படிப்பு படித்துள்ளார். இவரது தாய் மஞ்சுளா தன் இன்னொரு மகள் லீனாவை அழைத்துக் கொண்டு அருகிலுள்ள மருத்துவமணைக்கு சென்றுள்ளார். அந்த சமயத்தில் மஞ்சுளாவின் மற்ற மகள்கள் வீட்டிலிருந்த பொழுது சசிலாமேரி வெளியில் சென்று வருவதாக கூறி சென்றவர் வீடு திரும்பவில்லை.

இது குறித்து தாயார் மஞ்சுளா கொடுத்த புகாரின் பேரில் கரியாப்பட்டிணம் போலீஸ் சப்- இண்ஸ்பெக்டர் பசுபதி வழக்குப்பதிவு செய்து தீவிர விசாரணை மேற்கொண்டுள்ளார்.

சீர்காழி:

சீர்காழி அடுத்த அரசூர் மெயின்ரோடு பகுதியை சேர்ந்தவர் கலியபெருமாள் (வயது 67). இவர் திருச்சி பெல் நிறுவனத்தில் பணியாற்றி ஓய்வு பெற்றவர். இவர் நேற்று முன்தினம் குடும்பத்துடன் வெளியூர் சென்றுவிட்டு இன்று காலை ஊருக்கு வந்துள்ளார்.

அப்போது வீட்டின் முன்பக்க இரும்பு கதவு உடைக்கப்பட்டிருந்தது. இதையடுத்து வீட்டிற்குள் சென்று பார்த்த அவர் வீட்டில் இருந்த பீரோ உடைக்கப்பட்டு அதில் இருந்த நகை மற்றும் பட்டுப்புடவைகள் கொள்ளையடிக்கப்பட்டிருந்ததை கண்டு அதிர்ச்சி அடைந்தார். இதுகுறித்து கொள்ளிடம் போலீசார் வழக்குப்பதிவு செய்து விசாரணை நடத்தி வருகின்றனர்.

தரங்கம்பாடி:

மயிலாடுதுறை அருகே உள்ள கருவாழக்கரை மேலையூரில் அம்பேத்கர் பிறந்த நாளையொட்டி விடுதலை சிறுத்தைகள் கட்சி சார்பில் கொடி கம்பம் நடப்பட்டு இருந்தது. இதனை நேற்று இரவு மர்ம நபர்கள் சேதப்படுத்தி உள்ளனர்.

இது பற்றி இன்று காலை தெரியவந்ததும் விடுதலை சிறுத்தைகள் கட்சியினர் மேலையூர் மெயின் ரோட்டில் திரண்டு இன்று காலை சாலை மறியல் போராட்டம் நடத்தினர்.

இதுபற்றி தகவல் கிடைத்ததும் செம்பனார் கோவில் போலீசார் சம்பவ இத்திற்கு சென்று சமரச பேச்சு வார்த்தை நடத்தினர். அவர்களிடம் ஜாதி மோதலை உருவாக்கும் வகையில் சில அரசியல் கட்சியினர் பின்னணியில் இருந்து கொண்டு இதுபோன்ற செயல்களில் ஈடுபட்டு வருகின்றனர். அவர்களை கண்டறிந்து கைது நடவடிக்கை எடுத்தால் தான் போராட்டத்தை கைவிடுவோம் என்று கூறினர்.

இதன் காரணமாக மயிலாடுதுறை- பூம்புகார் இடையே 2 மணி நேரம் போக்குவரத்து பாதிக்கப்பட்டது.

மயிலாடுதுறை:

கிருஷ்ணகிரி மாவட்டம் பர்கூர் தாலுகா அந்திகானம் கிராமத்தை சேர்ந்தவர் தர்மர் மகன் ரமேஷ்குமார்(38). இவர் கடந்த 1½ வருடங்களாக மயிலாடுதுறை பட்டமங்கலம் கடைத்தெருவில் திருப்பூர் காட்டன் மேளா என்ற பெயரில் துணிக்கடை நடத்தி வருகிறார்.

இந்த கடையிலேயே ரமேஷ்குமார் மற்றும் அவரது தாய் லட்சுமி, மனைவி சவுந்தர்யா, பணியாள் சந்தோஷ் ஆகியோர் தங்கியுள்ளனர்.

நேற்று இரவு வியாபாரம் முடித்து விட்டு கடையை பூட்டி விட்டு தூங்க சென்றார். இந்நிலையில் நேற்று இரவு கடையின் மாடி பகுதியில் உள்ள கிரீல் கம்பியை வளைத்து மர்ம நபர்கள் உள்ளே புகுந்து கடையின் உள்ளே கல்லாவில் வைத்திருந்த ரூ.11 லட்சத்தை கொள்ளையடித்து சென்றதாக கூறப்படுகிறது.

இது குறித்து ரமேஷ்குமார் மயிலாடுதுறை போலீசில் புகார் செய்தார். போலீசார் சம்பவ இடத்துக்கு வந்து விசாரணை நடத்தி வருகின்றனர்.