நாகப்பட்டினம்

சீர்காழி:

சீர்காழி தாலுக்கா அலுவலகம் முன்பு விடுதலை சிறுத்தைகள் கட்சி சார்பில் ஆர்ப்பாட்டம் நடை பெற்றது. ஆர்ப்பாட்டத்திற்கு நாகை வடக்கு மாவட்ட செயலாளர் ரவிச்சந்திரன் தலைமை தாங்கினார். மாவட்ட பொருளாளர் அறிவழகன், மாவட்ட செய்தி தொடர்பாளர் தேவா, சீர்காழி சட்டமன்ற தொகுதி செயலாளர் தாமு இனியவன், வழக்கறிஞர் அணி மாவட்ட அமைப்பாளர் ராஜேஷ், ஆகியோர் முன்னிலை வகித்தனர். நகர செயலாளர் ராஜசேகரன் வரவேற்றார்.

ஆர்ப்பாட்டத்தில் நாகை வடக்கு மாவட்ட செயலாளர் ரவிச்சந்திரன், கிறிஸ்து பேரவை மாநில துணை அமைப்பாளர் தலித்தாஸ், ஆகியோர் கண்டன உரையாற்றினர். தொடர்ந்து தாண்டவன்குளம், மாதானம், புதுப்பட்டினம், பட்டவிளாகம், காரைமேடு, நாங்கூர், இளையமதுகூடம் ஆகிய ஊர்களில் கட்சி கொடி கம்பத்தை சேதபடுத்துபவர்கள் மீது போலீசார் நடவடிக்கை எடுக்கவேண்டும், ஆதி திராவிடர்கள் மீது பொய் வழக்கு பதிவு செய்வததை தவிர்க்க வேண்டும், சீர்காழி பகுதியில் குடிநீர் தட்டுப்பாட்டினை நீக்கவேண்டும், விவசாயிகளுக்கு கடந்த ஆண்டு மற்றும் இந்த ஆண்டு வழங்கவேண்டிய பயிர்காப்பீட்டு தொகையினை வழங்கவேண்டும், காவிரி மேலாண்மை வாரியம் அமைக்க வேண்டும். ஹைட்ரோ கார்பன் திட்டத்தினை கை விட வேண்டும், கொள்ளிடம் ஆறு மற்றும் சீர்காழி உப்பனாறு உள்ளிட்ட ஆறுகளில் தடுப்பணை அமைக்க வேண்டும், உள்ளிட்ட கோரிக்கைகள் வலியுறுத்தப்பட்டன.

ஆர்ப்பாட்டத்தில் முன்னாள் மாவட்ட செயலாளர் வேலு குணவேந்தன், மாவட்ட துணை செயலாளர் காமராஜ், இளம் சிறுத்தை எழுச்சிபாசறை மாவட்ட அமைப்பாளர் அன்புசெல்வன், மகளிரணி நிர்வாகி ஞானவள்ளி உள்ளிட்ட பலர் கலந்து கொண்டனர். முடிவில் சங்கர் நன்றி கூறினார்.

வேதாரண்யம்:

நாகை மாவட்டம் வேதாரண்யத்தை அடுத்துள்ள ஆயக்காரன்புலம் 2-ம் சேத்தி பகுதியில் 1000-க்கும் மேற்பட்ட வீடுகளில் பொது மக்கள் வசித்து வருகின்றனர். அவர்களுக்கு கொள்ளிடம் கூட்டு குடிநிர் திட்டம் மூலம் தண்ணீர் வழங்கப்பட்டு வருகிறது.

இந்த நிலையில் குடிநீர் குழாய்களில் மின் மோட்டார் பொருத்தி குடிநீரை திருடுவதால் பலர் குடிநீர் கிடைக்காமல் அவதிபட்டனர். இது பற்றி சம்பந்தப்பட்ட அதிகாரிகளிடம் புகார் செய்தும் உரிய நடவடிக்கை எடுப்பபடவில்லை.

இதனால் ஆத்திரம் அடைந்த ஆயக்காரபுலம் 2-ம் சேத்தி பகுதி பொது மக்கள் இன்று காலை திடீர் சாலை மறியல் போராட்டம் நடத்தினர். இதனால் போக்கு வரத்து பாதிக்கப்பட்டது.

இது பற்றிய தகவல் கிடைத்ததும் ஊராட்சி ஒன்றிய ஆணையாளர் விஜயகுமார் மற்றும் அதிகாரிகள் சம்பவ இடத்திற்கு சென்று பொது மக்களிடம் பேச்சுவார்த்தை நடத்தினர். அப்போது குடிநீர் உறிஞ்சும் மின் மோட்டார்களை கண்டறிந்து அவைகளை பறிமுதல் செய்ய வேண்டும் சட்டத்துக்கு புறம்பாக குடிநீர் திருடியவர்களிடம் அபராதம் வசூலிக்க வேண்டும் என்று வற்புறுத்தினார். இதை தொடர்ந்து அங்கு தொழிலாளர்கள் வரவழைக்கபட்டு குடிநீர் திருடும் மின் மோட்டார்கள் கண்டறிந்து அகற்ற நடவடிக்கை எடுக்கப்பட்டது. அதனை கண்ட பொது மக்கள் சாலை மறியலை கைவிட்டு கலைந்து சென்றனர்.

நாகப்பட்டினம்:

நாகை காடம்பாடி மகாலட்சுமிநகர் சுனாமி குடியிருப்பு பகுதியை சேர்ந்தவர் நேசமணி (வயது21). இவருடைய மனைவி வினிதா. இவரது பக்கத்து வீட்டை சேர்ந்த சொக்கத்தங்கம் மனைவி சத்தியாவும், வினிதாவும் தோழிகள். இவர்கள் எங்கு போனாலும் ஒன்றாக சென்று வந்துள்ளனர். இது நேசமணிக்கு பிடிக்காததால், சத்தியாவுடன் வெளியில் செல்லக்கூடாது என்று மனைவியை கண்டித்தார். இதனால் வினிதா, சத்தியாவுடன் பழகுவதை நிறுத்தி கொண்டார்.

இது குறித்து சத்தியா தனது குடும்ப நண்பரான அதே பகுதியை சேர்ந்த மீனவரான கவியரசன் (35) என்பவரிடம் தெரிவித்தார். இதைதொடர்ந்து கடந்த சில நாட்களுக்கு முன்பு சத்தியாவுடன், வினிதாவை ஏன் பழக கூடாது என கண்டிக்கிறாய் என்று கேட்டு கவியரசன், நேசமணியிடம் தகராறு செய்தார். இதனால் 2 பேருக்கும் இடையே முன்விரோதம் ஏற்பட்டது.

இந்த நிலையில் நேற்று முன்தினம் இரவு கவியரசனுக்கும், நேசமணிக்கும் இடையே மீண்டும் தகராறு ஏற்பட்டது. அப்போது அங்கிருந்தவர்கள் 2 பேரையும் சமாதானம் செய்து அனுப்பி வைத்தனர். இதையடுத்து கவியரசன் வீட்டிற்கு சென்று கொண்டிருந்தார். அப்போது நேசமணி, அவருடைய அண்ணன் ரூபன் (23) மற்றும் நண்பர் செல்லூர் சுனாமி குடியிருப்பு பகுதியை சேர்ந்த அன்பழகன் மகன் சண்முகம் (20) ஆகிய 3 பேரும் சேர்ந்து கவியரசனை வழிமறித்து அரிவாளால் சரமாரியாக வெட்டினர்.

இதில் ரத்த வெள்ளத்தில் கிடந்த கவியரசனை அக்கம் பக்கத்தினர் மீட்டு நாகை அரசு மருத்துவமனையில் சிகிச்சைக்காக சேர்த்தனர். பின்னர் அங்கிருந்து மேல் சிகிச்சைக்காக திருவாரூர் அரசு மருத்துவ கல்லூரி மருத்துவமனையில் அனுமதிக்கப்பட்டார். அங்கு சிகிச்சை பலனின்றி கவியரசன் பரிதாபமாக உயிரிழந்தார்.

இது குறித்த புகாரின் பேரில் நாகை வெளிப்பாளையம் போலீசார் வழக்குப்பதிவு செய்து அண்ணன்-தம்பியான நேசமணி, ரூபன் மற்றும் சண்முகம் ஆகிய 3 பேரையும் கைது செய்து விசாரணை நடத்தி வருகின்றனர்.

வேதாரண்யம்:

வேதாரண்யம் பகுதியில் தற்போது சூறை காற்று வீசி வருகிறது. இதனால் கடல் சீற்றமாக காணப்படுகிறது. தாழ்வான பகுதியில் கடல் நீர் புகுந்துள்ளது. வேதாரண்யம் அருகே உள்ள அகஸ்தியன் பள்ளி, கடினவயல், தென்னடார் ஆகிய இடங்களில் கடல் நீர் புகுந்துள்ளது.

கடல் சீற்றம் மற்றும் சூறை காற்று காரணமாக இன்று 3-வது நாளாக பெரும்பாலான மீனவர்கள் மீன் பிடிக்க செல்லவில்லை. சுமார் 2 ஆயிரம் மீனவர்கள் கடலுக்கு செல்லவில்லை.

ஒரு சில மீனவர்கள் தான் சென்று உள்ளனர். அவர்களும் குறைந்த அளவு மீன்களையே பிடித்து வருகின்றனர். இதனால் மீன்களின் விலை உயர்ந்துள்ளது.

குத்தாலம்:

நாகை மாவட்டம் குத்தாலம் தாலுக்கா பாலையூரை அடுத்த அன்னியூர், ஆயனதாக்கம் கிராமத்தைச் சேர்ந்தவர் கருணாநிதி (வயது60). இவருக்கும் இவர் மனைவிக்கும் இடையே கருத்து வேறுபாடு இருந்து வந்ததாக கூறப்படுகிறது.

இதில் மனமுடைந்த கருணாநிதி கடந்த ஞாயிற்றுக்கிழமை அருகில் உள்ள பள்ளவாய்க்கால் பகுதிக்கு சென்று பூச்சிக்கொல்லி மருந்து சாப்பிட்டுள்ளார். இதை அறிந்த பக்கத்தில் இருந்தவர்கள் கருணாநிதியை கும்பகோணம் அரசு மருத்துவமனையில் சேர்ந்தனர்.

எனினும் சிகிச்சை பலனின்றி அவர் பரிதாபமாக உயிரிழந்தார். இதுகுறித்த புகாரின் பேரில் பாலையூர் போலீசார் வழக்குபதிவு செய்து விசாரணை நடத்தி வருகின்றனர்.

வேதாரண்யம்:

வேதாரண்யம் சேது சாலையை சேர்ந்தவர் ராஜகோபால். இவரது வீட்டில் மான் கொம்பு பதுக்கி வைத்திருப்பதாக வனத்துறையினருக்கு தகவல் கிடைத்தது.

வனத்துறையினர் அங்கு சென்று சோதனை நடத்தினர். அப்போது வீட்டில் 18 மான் கொம்புகள், நாட்டு துப்பாக்கி, தோட்டாக்கள் இருந்தது. அவற்றை பறிமுதல் செய்தனர். ராஜகோபால் கைது செய்யப்பட்டார்.

இந்த வழக்கில் மேலும் 2 பேரை வனத்துறையினர் தேடி வந்தனர். அவர்களில் வேம்ப தேவன்காடு பகுதியை சேர்ந்த சுனில் குமார் (37) என்பவரை வன அலுவலர் அயூப்கான், வனவர்கள் இளங்கோவன், சிவசுப்பிரமணியன் ஆகியோர் கைது செய்தனர். மேலும் ஒருவரை தேடி வருகிறார்கள்.