ஈரோடு

ஈரோடு:

ஈரோடு, பழைய பாளையம், குமரன் தெருவை சேர்ந்தவர் சரவணன் (வயது48). இவரது மனைவி சாந்தி. இவர்களுக்கு இரண்டு பெண் குழந்தைகள் உள்ளனர்.

சரவணன் சொந்தமாக தறிபட்டறை வைத்து நடத்தி வந்தார். சரவணனுக்கு பூர்வீக சொத்து வர உள்ளது. அது கிடைக்கும் பட்சத்தில் தனது இரண்டு மகள்கள் திருமணத்தை நடத்தி முடித்துவிடலாம் என்று நினைத்து இருந்ததாக கூறப்படுகிறது.

ஆனால் எதிர்பார்த்தது போல் சரவணனுக்கு சொத்து கிடைக்கவில்லை என்று கூறப்படுகிறது. இதனால் சரவணன் மனவேதனையில் இருந்து வந்தார்.

சம்பவத்தன்று தற்கொலை செய்ய முடிவெடுத்த சரவணன் வீட்டில் தூக்குபோட்டு தற்கொலை செய்து கொண்டார்.

இது குறித்து சூரம்பட்டி போலீசார் வழக்குபதிவு செய்து விசாரணை நடத்தி வருகிறார்கள். #tamilnews

கோபி:

கோபி அருகே உள்ள கரட்டடிபாளையத்தை சேர்ந்தவர் கருப்ப மூப்பன். இறந்துவிட்டார். இவரது மனைவி தவமணி (வயது 60). இவர்களுக்கு 2 மகள்கள், 2 மகன்கள். மூத்த மகனுக்கும், 2 மகள்களுக்கும் திருமணமாகிவிட்டது. ஆனால் இளைய மகனான செல்வராஜிக்கு (32) திருமணமாக வில்லை.

கூலி தொழிலாளியான செல்வராஜிக்கு குடிப்பழக்கம் இருந்தது. சரியாக வேலைக்கு செல்லாமல் இருந்து வந்ததாக தெரிகிறது.

மேலும் தனக்கு திருமணம் ஆகிவில்லையே என்று கூறி புலம்பியபடி இருந்தாராம். இந்த நிலையில் நேற்று வீட்டில் செல்வராஜ் தனியாக இருந்தார்.

விரக்தியில் இருந்த அவர் வீட்டிலுள்ள பனைமர சட்டத்தில் லுங்கியால் தூக்குபோட்டுக்கொண்டார். அக்கம் பக்கத்தினரும், உறவினர்களும் அவரை மீட்டனர்.

சிகிச்சைக்காக கோபி அரசு ஆஸ்பத்திரிக்கு கொண்டு சென்றனர். அங்கு பரிசோதனை செய்த டாக்டர்கள் அவர் வரும் வழியிலேயே இறந்துவிட்டதாக தெரிவித்தனர்.

இது குறித்து கோபி போலீசார் வழக்குப்பதிவு செய்து விசாரணை நடத்தி வருகிறார்கள். #tamilnews

அந்தியூர்:

அந்தியூர் அருகே உள்ள நகலூர், பெருமாபாளையத்தில் மாரியம்மன் கோவில் உள்ளது. பூசாரியாக சின்னத் தம்பி பாளையத்தை சேர்ந்த தவகுரு என்பவர் உள்ளார்.

இந்த கோவிலில் ஆண்டு தோறும் சித்திரை மாதத்தில் திருவிழா நடைபெறும். மேலும் வெள்ளிக்கிழமையும், பவுர்ணமி தினத்திலும் பூஜை நடைபெறும்.

மற்ற நாட்களில் மக்கள் வழிபாடு செய்ய கோவில் திறந்திருக்கும். ஆனால் கருவறை கதவு மூடப்பட்டு இருக்கும். பக்தர்கள் கருவறைக்கு வெளியே நின்று வழிபாடு செய்வார்கள்.

அதேபோல நேற்று மாலை வழிபாடு செய்ய காயத்ரி என்ற பெண் சென்றார். அப்போது கோவில் கருவறை கதவின் பூட்டு உடைக்கப்பட்டு கிடந்ததை அவர் பார்த்தார்.

இது தொடர்பாக தகவல் அந்த பகுதியில் பரவியது. கோவில் தர்ம கர்த்தா அர்த்தநாரிக்கும் இது பற்றி தெரிவிக்கப்பட்டது. அவர் சம்பவ இடத்துக்கு வந்த பார்த்தார்.

பின்னர் இது தொடர்பாக அந்தியூர் போலீஸ் நிலையத்தில் புகார் செய்யப்பட்டது. போலீஸ் இன்ஸ்பெக்டர் ரவி மற்றும் போலீசார் சம்பவ இடத்துக்கு விரைந்து வந்தனர்.

அவர்கள் சோதனையிட்ட போது கோவில் சுவரில் பதிக்கப்பட்டிருந்த உண்டியலில் பூட்டு உடைக்கப்பட்டு அதில் இருந்த பணம் கொள்ளையடிக்கப்பட்டது தெரியவந்தது.

யாரோ மர்ம நபர்கள் இந்த துணிகர கொள்ளையில் ஈடுபட்டுள்ளனர். அவர்கள் கருவறை கதவை உடைத்து உள்ளே சென்று கொள்ளையடிக்க முயன்றுள்ளனர்.

ஆனால் அவர்களுக்கு அங்கு ஒன்றும் சிக்க வில்லை. உண்டியல் பணத்தை மட்டும் அவர்கள் கொள்ளையடித்து சென்றுள்ளனர்.

ஆண்டு தோறும் சித்திரை மாதம் நடைபெறும் திருவிழாவின்போதுதான் உண்டியல் திறக்கப்பட்டு எண்ணப்படும். கடந்த முறை திறந்து எண்ணப்பட்டபோது ரூ. 50 ஆயிரம் இருந்ததாம்.

அந்த வகையில் பார்க்கும்போது தற்போது உண்டியலில் ரூ. 20 ஆயிரம் வரை இருந்திருக்கலாம் என்று தெரிகிறது.

இது குறித்து வழக்குப் பதிவு செய்த அந்தியூர் போலீ சார் கோவில் உண்டியலை உடைத்து கொள்ளையடித்த கொள்ளையர்களை தேடி வருகிறார்கள்.

இந்த சம்பவம் அந்த பகுதியில் பரபரப்பை ஏற்படுத்தி உள்ளது.

பவானி:

பவானி அடுத்த ஜம்பை பெரியமோளபாளையம் பகுதியை சேர்ந்தவர் முருகன். இவரது மகன் தமிழ்செல்வன் (வயது 20). இவர் சித்தோடு அருகே கங்காபுரத்தில் உள்ள ஒரு ஜவுளி கடையில் வேலை செய்து வந்தார். இவருக்கு இன்னும் திருமணமாகவில்லை. தாய் பூங்கொடியுடன் வசித்து வந்தார். இவரது தந்தை முருகன் கருத்து வேறுபாடு காரணமாக தனியாக வசித்து வருகிறார். 

இந்த நிலையில் தமிழ் செல்வன் வீட்டில் யாரும் இல்லாத நேரத்தில் நைலான் கயிறு மூலம் திடீரென தூக்கு போட்டு கொண்டார். இதில் அவர் பரிதாபமாக இறந்தார். தமிழ்செல்வன் எதற்காக தூக்குபோட்டு இறந்தார் என உடனடியாக தெரிய வில்லை. போலீசார் சம்பவ இடத்துக்கு வந்து அவரது உடலை மீட்டு பிரேத பரிசோதனைக்காக பவானி அரசு மருத்துவமனைக்கு அனுப்பி வைத்தனர். 

இதுகுறித்து பவானி போலீஸ் இன்ஸ்பெக்டர் இளங்கோ வழக்கு பதிவு செய்து விசாரணை நடத்தி வருகிறார். #tamilnews

பெருந்துறை:

பெருந்துறையை அடுத்துள்ள பெத்தாம்பாளையம் பேருராட்சி, நரிப்பாளையம் பிரிவு அருகேயுள்ள பெரிய தோட்டம் பகுதியை சேர்ந்தவர் தங்கவேல் (வயது 52).

பவர் லூம் தறிப்பட்டறை உரிமையாளரான இவர் அதே பகுதியில் தனது மனைவி பூங்கொடி (46), மகள்கள் ஷியாமளா(19), கல்பனா(16) ஆகியோருடன் வசித்து வருகிறார்.

அருகில் உள்ள மற்றொரு வீட்டில் தங்கவேலின் தாயார் மாராயம்மாள் (78) தனியாக வசித்து வந்தார். இவர்களது வீட்டின் பின்னால் உள்ள தோட்டத்தின் அருகே உறவினரான ஆறுமுகம்(60) தனது மனைவி ஜெயமணி, மகன் கோவிந்தசாமி மற்றும் மகள் சுகுணாவுடன் வசித்து வந்தார்.

விவசாயியான ஆறுமுகம் கடந்த சில மாதங்களுக்கு உடல் நலம் பாதிக்கப்பட்டு இருந்தார்.இது தொடர்பாக ஆறுமுகத்தின் குடும்பத்தினர் தங்கவேலுவிடம் தெரிவித்தனர். இதைத் தொடர்ந்து கடந்த அக்டோபர் மாதம் ஆறுமுகத்தை கோவையில் உள்ள தனியார் ஆஸ்பத்திரியில் சேர்க்க தங்கவேல் உதவி செய்தார்.

சிகிச்சை பெற்ற ஆறுமுகம் வீடு திரும்பினார். அவர் தன்னை மனநல ஆஸ்பத்திரியில் சேர்த்து தன்னை பைத்தியக்காரன் என்று அனைவரும் சொல்லும் அளவிற்கு செய்து விட்ட தாக கூறி தங்கவேலிடம் அடிக்கடி தகராறு செய்து வந்தார்.

நேற்று காலை அவர் தங்கவேலின் வீட்டிற்கு சென்றார். தங்கவேல் வீட்டின் பின்பகுதியில் பால் கறந்து கொண்டிருந்தார். தங்கவேல் வீட்டில் இல்லை என்று நினைத்து ஏமாற்றமடைந்த ஆறுமுகம் அருகில் கிடந்த தறிப்பட்டறைக்கு பயன்படுத்தும் இரும்பு ராடை எடுத்துக்கொண்டு தங்கவேலின் தாயார் மாராயம்மாள் வீட்டிற்குள் சென்றார்.

அங்கு கட்டிலில் படுத்திருந்த மாராயம்மாளை இரும்பு ராடால் தாக்கினார். மாராயம்மாள் சத்தம் போடவே அருகில் உள்ள பவர் லூம் தறிப்பட்டறையில் வேலை பார்த்த நபர்கள் மற்றும் தங்கவேலின் குடும்பத்தினர் அங்கு ஓடி வந்தனர்.

அவர்களை கண்ட ஆறுமுகம் தனது கையில் இருந்த இரும்பு ராடை வீட்டின் வாசலில் போட்டு விட்டு அங்கிருந்து தப்பி ஓடினார். வீட்டின் உள்ளே ரத்த வெள்ளத்தில் கிடந்த மாராயம்மாளை மீட்டு ஈரோட்டில் உள்ள தனியார் ஆஸ்பத்திரிக்கு அழைத்துச் சென்றனர்.

அவரை பரிசோதனை செய்த டாக்டர்கள் அவர் ஏற்கனவே இறந்து விட்டதாக தெரிவித்தனர். இதற்கிடையே மாராயம்மாளை தாக்கிவிட்டு தப்பி சென்ற ஆறுமுகத்தை சிலர் துரத்திச் சென்று பிடித்தனர்.

பின்னர் அருகிலுள்ள தென்னை மரத்தில் கட்டி வைத்து தாக்கினர். இதில் ஆறுமுகம் பரிதாபமாக இறந்தார். இந்த இரட்டைக் கொலை சம்பவம் பெரும் பரபரப்பை ஏற்படுத்தியது.

இது குறித்து காஞ்சிக் கோவில் போலீசார் வழக்குப்பதிவு செய்து விசாரணை நடத்தினர். அப்போது ஆறுமுகத்தை அடித்து கொன்றது தங்கவேல் மற்றும் அவரது பவர் லூம் தறிப்பட்டறையில் வேலை பார்த்து வரும் தண்டபாணி மற்றும் கார்த்தி என்பது தெரியவந்தது.

எனவே அவர்களை போலீசார் தேடி வந்தனர். இந்த நிலையில் நேற்று இரவு தங்கவேல், கார்த்தி, தண்டபாணி ஆகிய 3 பேரும் போலீசில் சிக்கினர். அவர்கள் கைது செய்யப்பட்டனர். தொடர்ந்து விசாரணை நடந்து வருகிறது.  #tamilnews

ஈரோடு:

கோவை விமானப்படை பிரிவில் ஊழியராக இருப்பவர் அசோக்குமார். இவரும் இவரது மனைவியும் சென்னைக்கு சென்றனர்.

பிறகு சென்னையில் இருந்து கோவைக்கு செல்லும் புளு மவுண்டன் ரெயிலில் மீண்டும் கோவைக்கு திரும்பி வந்து கொண்டிருந்தனர்.

அவர்கள் வந்த ஏ.சி. பெட்டியில் கூடலூரை சேர்ந்த சி.பி.சி.ஐ.டி. போலீஸ் சப்-இன்ஸ்பெக்டர் சந்திரசேகரும் வந்து கொண்டிருந்தார்.

ரெயில் சேலம் அருகே வந்து கொண்டிருந்தபோது சந்திரசேகர் விமானப்படை ஊழியர் மனைவியிடம் திடீரென செக்ஸ் சில்மி‌ஷத்தில் ஈடுபட்டாராம். இதை விமானப்படை ஊழியரும், அவரது மனைவியும் கண்டித்தனர்.

அந்த ரெயில் இன்று அதிகாலை 2.45 மணிக்கு ஈரோடு ரெயில் நிலையத்துக்கு வந்தது. ரெயிலில் இருந்து அசோக்குமாரும், அவரது மனைவியும் இறங்கினர். ஈரோடு ரெயில்வே போலீஸ் நிலையத்துக்கு சென்ற அவர்கள் சில்மி‌ஷத்தில் ஈடுபட்ட சந்திரசேகர் மீது புகார் செய்தனர்.

இதற்கிடையே அந்த ரெயிலில் பயணம் செய்த சந்திரசேகர் கோவைக்கு சென்றது போலீசாருக்கு தெரியவந்தது. இதைத்தொடர்ந்து ஈரோடு ரெயில்வே போலீசார் கோவைக்கு விரைந்தனர்.

அங்கு சந்திரசேகரை மடக்கி பிடித்து கைது செய்தனர். தொடர்ந்து விசாரணை நடந்து வருகிறது. #tamilnews

ஈரோடு:

ஈரோடு அருகே உள்ள பெரிய அக்ரகாரம் ஜோசப் தோட்டத்தை சேர்ந்தவர் சிராஜூதீன் (வயது 30). இவரது நண்பர்கள் சிவக்குமார், பழனி. இவர்கள் 3 பேரும் ஈரோடு ரெயில் நிலையத்தில் டீ வியாபாரம் செய்து வருகிறார்கள்.

இவர்கள் நேற்று இரவு ஒரு ஆட்டோவில் அரச்சலூருக்கு சென்று கொண்டிருந்தனர்.

அசோகபுரத்தில் வந்த போத ஒரு லாரி எதிரே வந்தது. திடீரென அந்த லாரி எதிர்பாராத வகையில் ஆட்டோ மீது மோதியது. இதில் ஆட்டோ கவிழ்ந்து உள்ளே இருந்த 3 பேரும் வெளியே ரோட்டில் தூக்கி வீசப்பட்டனர்.

அப்போது மோதிய லாரியின் சக்கரம் சிராஜூதீன் மீது ஏறி நசுக்கியது. இதில் அவர் சம்பவ இடத்திலேயே பலியானார்.

மேலும் சிவக்குமார் படுகாயம் அடைந்தார். அவரை உடனடியாக சிகிச்சைக்காக ஆஸ்பத்திரியில் சேர்த்தனர். மற்றொருவரான பழனி லேசான காயத்துடன் உயிர் தப்பினார்.

இந்த விபத்து குறித்து தாலுகா போலீசார் விசாரணை நடத்தி வருகிறார்கள். #tamilnews