ஈரோடு

ஈரோடு:

பிப்ரவரி 14-ந் தேதி கிறிஸ்தவர்களால் சாம்பல் புதன் கடைப் பிடிக்கப்பட்டது. அதை தொடர்ந்து கிறிஸ்தவர்கள் 40 நாட்கள் தவகாலம் மேற்கொண்டனர்.

இதை தொடர்ந்து கடந்த 25-ந் தேதி குறுதோலை ஞாயிறு அனுசரிக்கப்பட்டது. தொடர்ந்து பெரிய வியாழன், புனித வெள்ளி அனுசரிக்கப்பட்டது.

விழாவின் முக்கிய நிகழ்வான ஈஸ்டர் பண்டிகை இன்று கொண்டாடப்பட்டது. இயேசு பிரான் கல்லறையில் இருந்து உயிர்த்தெழுந்த நாளை உலகம் முழுவதும் உள்ள கிறஸ்தவர்கள் ஈஸ்டர் பண்டிகையாக கொண்டாடி வருகிறார்கள்.

இதையொட்டி இன்று நள்ளிரவில் கிறிஸ்தவ தேவாலயங்களில் சிறப்பு பிராத்தனைனகளும், ஆராதனைகளும் நடந்தது.

ஈரோடு ஸ்டேட் பேங்க் ரோட்டில் உள்ள புகழ் பெற்ற புனித அமல அன்னை ஆலயத்தில் இன்று நள்ளிரவு 12 மணிக்கு சிறப்பு பிராத்தனை நடந்தது. இதில் ஆயிரக்கணக்கான கிறிஸ்தவர்கள் கலந்து கொண்டனர். மேலும் இயேசு பிரான் கல்லறையில் இருந்து உயிர்த்தெழுந்த காட்சிகள் தத்ரூபமாக வைக்கப்பட்டுள்ளது. இதில் பங்கு தந்தை அருண், உதவி பங்கு தந்தை சிஜீ, அருள் தந்தை ஜான் கெனடி உள்பட பலர் கலந்து கொண்டனர்.

இதே போன்று பிரப் ரோட்டில் உள்ள சி.எஸ்.ஐ.ஆலயம், ஈரோடு ரெயில்வே காலனியில் உள்ள ஆலயம், அக்ரஹாரத்தில் உள்ள லூர்து மாதா ஆலயம் மேலும் கோபி, சத்தி, அந்தியூர், பவானி உள்பட மாவட்டம் முழுவதும் உள்ள கிறிஸ்தவ ஆலயங்களில் ஈஸ்டர் பண்டிகையையொட்டி சிறப்பு பிராத்தனை நடந்தது.

ஈரோடு:

ஈரோடு ரங்கம்பாளையத்தை சேர்ந்தவர் பெரியசாமி. விவசாயி. இவரது மனைவி சரோஜினி (வயது70). இவர்களுக்கு ஒரு மகள் உள்ளார். தினமும் காலையில் சரோஜினி நடைபயிற்சி மேற்கொள்வாராம்.

வழக்கம்போல இன்று காலையிலும் நடை பயிற்சிக்கு சென்றார். அப்போது ரங்கம்பாளையம் ரெயில்வே தண்டவாளத்தை சரோஜினி கடக்கும் போது அந்த வழியாக வந்த ரெயில் மோதி சம்பவ இடத்திலேயே பரிதாபமாக இறந்தார்.

அக்கம்பக்கத்தினர் பார்த்து அதிர்ச்சியடைந்து ஈரோடு ரெயில்வே போலீசாருக்கு தகவல் தெரிவித்தனர். சம்பவ இடத்துக்கு போலீசார் விரைந்து வந்து பிணத்தை கைப்பற்றி ஈரோடு அரசு ஆஸ்பத்திரிக்கு பிரேத பரிசோதனைக்காக அனுப்பி வைத்தனர்.

மேலும் போலீசார் வழக்குப்பதிவு செய்து விசாரணை நடத்தி வருகிறார்கள். 

ஈரோடு:

திருப்பூர் வசந்தி கார்டன் பகுதியை சேர்ந்தவர் ரவி. இவர் திருப்பூரில் உள்ள பனியன் கம்பெனியில் வேலை பார்க்கிறார். இவரது மகன் மனோஜ்குமார் (வயது 21).

மனோஜ்குமார் பெருந்துறை பகுதியில் உள்ள ஒரு தனியார் என்ஜினீயரிங் கல்லூரியில் பி.டெக் 2-ம் ஆண்டு படித்து வந்தார். இவருக்கு படிப்பு சரியாக வராததால் அவர் கல்லூரி படிப்பை பாதியில் நிறுத்தி விட்டார். இதனால் மனோஜ்பிரபு திருப்பூர் பனியன் கம்பெனி ஒன்றில் வேலை பார்த்து வந்தார். அங்கும் அவர் சரியாக வேலைக்கு போக வில்லையாம்.

இந்த நிலையில் அவர் மாயமாகி விட்டார். அவரை அவரது தந்தையும் மற்றொரு மகனும் பல இடங்களில் தேடினர்.

இந்த நிலையில் பெருந்துறை வெள்ளோடு ரோட்டில் மாணவர்கள் தங்கி இருந்த அறைக்கு சென்ற மனோஜ்பிரபு அறையில் தூக்குப்போட்டு தற்கொலை செய்து கொண்டார்.

இந்த பரிதாப சம்பவம் பற்றி பெருந்துறை போலீஸ் சப்-இன்ஸ்பெக்டர் ராம்பிரபு வழக்கு பதிவு செய்து விசாரணை நடத்தி வருகிறார்.

ஈரோடு:

காவிரி மேலாண்மை வாரியத்தை 6 வார காலத்திற்குள் அமைக்க வேண்டும் என்று உச்சநீதிமன்றம் தீர்ப்பில் கூறியிருந்தது. அந்த 6 வார காலக்கெடு நேற்றுடன் முடிந்தது. எனினும் காவிரி மேலாண்மை வாரியம் அமைக்கப்படவில்லை.

இதனை கண்டித்து பல்வேறு அரசியல் கட்சியினர் போராட்ட களத்தில் குதிக்க தயாராகி வருகின்றனர். பா.ம.க. சார்பில் இளைஞரணி தலைவர் டாக்டர் அன்புமணி ராமதாஸ் எம்.பி.நீதிமன்றம் விதித்த காலகெடுக்குள் காவிரி மேலாண்மை வாரியம் அமைக்காவிட்டால் பா.ம.க. சார்பில் முதற்கட்டமாக வீடுகளில் கருப்பு கொடியேற்றி போராட்டம் நடத்த வேண்டும் என்று அறிவித்து இருந்தார்.

அதன்படி இன்று ஈரோடு மாநகரில் வில்லரசம்பட்டி பனங்காடு, பெரியசேமூர், அக்ரஹாரம், வண்டியூரான் கோவில், வளையக்கார வீதி,தண்ணீர்பந்தல் பாளையம், வெண்டிபாளையம், மூலப்பாளையம், ஆர்.என்.புதூர், சூரம்பட்டி அணைக்கட்டு பகுதி, கலைஞர் நகர், முத்துசாமி காலனி, அம்மன்நகர் உள்பட பகுதியிலும் நூற்றுக்கணக்கான வீடுகளில் கருப்பு கொடியேற்றி போராட்டத்தில் ஈடுப்பட்டனர்.

இதே போல் சத்தியமங்கலம், கோபி, அந்தியூர், பவானி, அம்மாபேட்டை, பெருந்துறை, விஜய மங்கலம், கவுந்தப்பாடி, சிவகிரி, கொடுமுடி, அரச்சலூர், மொடக்குறிச்சி உள்பட ஆயிரத்துக்கும் மேற்பட்ட வீடுகளில் கருப்பு கொடியேற்றி பா.ம.க.வினர் போராட்டத்தில் ஈடுப்பட்டனர்.

ஈரோடு வில்லரசம்பட்டி பனங்காடு பகுதியில் மாநில துணை பொதுச்செயலாளர் பொ.வை. ஆறுமுகம் தலைமையில் நிர்வாகிகள் வீடுகளில் கருப்பு கொடியேற்றி போராட்டத்தில் ஈடுப்பட்டனர். மாநில துணை பொதுச் செயலாளர் வேலுசாமி, மாவட்ட செயலாளர் கிருபாகரன், மாவட்ட துணை தலைவர் சேகர், தமிழ்நாடு உழவர் பேரியக்க மாநில துணை செயலாளர் பெருமாள் உள்பட பலர் கலந்து கொண்டனர். #tmailnews

சத்தியமங்கலம்:

ஈரோடு மாவட்டம் சத்தியமங்கலம் வனப்பகுதி கேர்மாளம் அடுத்த கூத்தான புரத்தை சேர்ந்தவர் சிவண்ணா (வயது 30). இவரது மனைவி ராஜம்மாள் என்கிற ராஜாமணி (26). இவர்களுக்கு அபி ( 8), சிந்து (6) என்ற 2 மகள்கள் உள்ளனர்.

இவர்கள் குடும்பத்துடன் கார்நாடக மாநிலம் கொள்ளேகால் அருகே உள்ள அங்க குருவன் தொட்டியில் உள்ள உறவினர் வீட்டுக்கு சென்றனர். அங்கு நடந்த கோவில் விழாவில் கலந்து கொண்டு சொந்த ஊருக்கு நேற்று மாலை புறப்பட்டனர்.

ஊருக்கு செல்லும் பஸ்சை இவர்களால் பிடிக்க முடியவில்லை. அந்த பஸ் முன் கூட்டியே புறப்பட்டு சென்று விட்டது.

இதனால் அவர்கள் தங்கள் கிராமத்துக்கு போக காட்டுப்பகுதியில் உள்ள குறுக்கு வழியில் நேற்று மாலை நடந்து சென்று கொண்டிருந்தனர்.

கேர்மாளம் அருகே பைலூர் காளையங்கோவில் அருகே வந்தபோது புதர் மறைவில் இருந்து ஒரு யானை வெளியே வந்தது. யானையை கண்டதும் அவர்கள் நடுங்கினர். பிறகு ஆளுக்கொரு பக்கம் சிதறி ஓடினர். சிவண்ணா தனது 2 குழந்தைகளையும் பிடித்துக் கொண்டு ஓட.. பின்னால் அவரது மனைவி ராஜம்மாளும் ஓடினார்.

ஆனால் யானை அவர்களை விரட்டியது. இதில் அந்த யானை ராஜம்மாளை துதிக்கையால் தூக்கி வீசியது. பிறகு மிதித்தது.

இதில் படுகாயம் அடைந்து அவர் அலறி துடித்தார். அதன் பிறகு அந்த யானை அடர்ந்த காட்டுக்குள் புகுந்தது.

ஊர் பகுதிக்குள் ஓடிய சிவண்ணா பொதுமக்களிடம் வி‌ஷயத்தை சொல்ல அவர்கள் வனத்துறையினருக்கு தகவல் கொடுத்தனர்.

உடனடியாக சம்பவ இடத்துக்கு வனத்துறையினரும் பொதுமக்களும் விரைந்து சென்றனர். அங்கு எழுந்திருக்க முடியாமல் உயிருக்கு போராடிக் கொண்டிருந்த ராஜம்மாளை மீட்டு சத்தியமங்கலம் அரசு ஆஸ்பத்திரிக்கு கொண்டு சென்றனர்.

ஆனால் செல்லும் வழியிலேயே ராஜம்மாள் பரிதாபமாக இறந்து விட்டார். அவரது உடல் அரசு ஆஸ்பத்திரியில் சேர்க்கப்பட்டுள்ளது. இன்று பிரேத விசாரணை நடக்கிறது.

அவரது உடலை பார்த்து கணவர் சிவண்ணாவும் குழந்தைகளும் கதறி அழுத காட்சி பரிதாபமாக இருந்தது.

யானை தாக்கி பலியான ராஜம்மாள் குடும்பத்துக்கு வனத்துறையினர் சார்பில் முதல் கட்டமாக ரூ.50 ஆயிரம் நிவாரணத் தொகை வழங்கப்பட்டது. #tamilnews