பெரம்பூர்:
வியாசர்பாடி, எம்.கே.பி.நகர், புதுநகரில் ஓட்டல் நடத்தி வருபவர் தனபால். இவரது கடைக்கு வந்து சாப்பிட்ட 3 வாலிபர்கள் பணம் கொடுக்காமல் செல்ல முயன்றனர்.
இதனை தனபால் கண்டித்தார். இதனால் ஆத்திரம் அடைந்த 3 வாலிபர்களும் தனபாலை தாக்கி ரூ.1,200-யை பறித்து தப்பி சென்று விட்டனர்.
இந்த நிலையில் வியாசர்பாடி பி.வி.காலனியில் 3 வாலிபர் கத்தியை காட்டி பொதுமக்களிடம் பணம் கேட்டு மிரட்டுவதாக எம்.கே.பி. நகர் போலீசுக்கு தகவல் கிடைத்தது.
இன்ஸ்பெக்டர் பிரகாஷ் மற்றும் போலீசார் விரைந்து சென்று 3 பேரையும் மடக்கி பிடித்தனர். அவர்கள் கொடுங்கையூரை சேர்ந்த கலைச்செல்வன், செங்குன்றத்தை சேர்ந்த சதீஷ், வியாசர்பாடி மணிகண்டன் என்பதும் அவர்கள் ஓட்டல் உரிமையாளர் தனபாலை தாக்கி பணம் பறித்ததும் தெரிந்தது.
இதையடுத்து 3 பேரையும் போலீசார் கைது செய்தனர். இதில் கலைச்செல்வன், சதீஷ் மீது கொலை வழக்குகள் உள்ளன.
கைதான 3 பேரிடம் இருந்து 3 கத்தி, மோட்டார் சைக்கிள், ரூ.1,200 பறிமுதல் செய்யப்பட்டது.
